1. Poukisa nou divèt savé a kimoun ki zanj-ya ?

JÉOVA lé nou konnèt so fanmi. Annan so fanmi i gen zanj-ya (gadé nòt n^o 8, paj 210). Labib-a ka aplé yé « pitit Bondjé-ya » (Job 38:7). Kisa zanj-ya ka fè ? Kouman yé idé moun tan-lontan ? Ès yé pouvé idé nou jòdla ?

2. a) Kimoun ki fè zanj-ya ? b) Konmyen zanj i gen ?

² Pou koumansé, a pou savé ki a Jéova ki fè zanj-ya. Prémyé zanj Jéova kréyé a té Jézi. Épi, dapré Colossiens 1:16, Bondjé fè tout ròt bagaj-ya ki annan syèl-a ké asou latè-a. Labib-a ka di ki i gen santenn milyon zanj (Psaume 103:20 ; Révélation 5:11).

3. Kisa Job 38:4 jiska 7 ka anprann nou asou zanj-ya ?

³ Labib-a ka anprann nou osi ki Jéova kréyé zanj-ya anvan i fè latè-a. Kisa yé rousanti lò yé wè latè-a ? Liv Job ka di ki yé té kontan toubonnman. A sa lépòk-a, yé tout té ka fè rounsèl fanmi koté tout moun té pròch di yé konpanyen é yé tout té ka sèrvi Jéova ansanm (Job 38:4-7).

4. Kouman nou fè savé ki zanj-ya lé idé moun ki asou latè-a ?

⁴ Zanj-ya lé idé moun asou latè-a é yé lé savé kouman volonté Jéova ké fèt pou latè-a é pou moun-yan ki asou l’ (Proverbes 8:30, 31 ; 1 Pierre 1:11, 12). Lò Adan ké Èv révòlté kont Jéova, a pa ti lanpenn  zanj-ya té divèt gen. É jòdla yé divèt gen plis chagren ankò di wè ki prèské tout moun asou latè-a pa ka obéyi Jéova. Mé lò roun moun ka rigrété péché i fè, ka chanjé so konpòrtman épi ka rouvini òbò Jéova, zanj-ya kontan toubonnman (Luc 15:10). Yé toujou paré pou idé moun ki ka adoré Bondjé. Jéova ka itilizé yé pou idé ké protéjé so sèrvitèr asou latè-a (Hébreux 1:7, 14). Annou wè plizyèr èkzanp.

5. Kouman zanj-ya idé sèrvitèr Bondjé ?

 ⁵ Anvan Jéova détrwi Sodòm ké Gomòr (dé vil tan-lontan), i voyé dé zanj sové Lòt ké so fanmi (Genèse 19:15, 16). Santenn lannen pita yé jité profèt Danyèl annan roun trou koté i té gen lyon. Mé anyen pa rivé l’ paské « Bondjé voyé so zanj é fronmen djòl lyon-yan » (Daniel 6:22). Pita, lò apot Pyèr té lajòl, Jéova voyé roun zanj pou libéré l’ (Actes 12:6-11). Zanj-ya idé Jézi osi lò i té asou latè-a. Parèkzanp lò i fin batizé, zanj-ya idé l’ (Marc 1:13). É jis anvan i mouri, roun zanj vini bay li fòrs (Luc 22:43).

6. a) Kouman nou savé ki zanj-ya ka idé sèrvitèr Bondjé jòdla ? b) Asou ki késyon nou ké jwenn répons ?

⁶ Jòdla, zanj-ya pa ka parèt douvan moun ankò. Mé Bondjé ka kontinyé itilizé yé pou idé so sèrvitèr-ya. Labib-a ka di : « Zanj Jéova-a ka protéjé tout sa ki gen lakrent pou Jéova, é i ka délivré yé » (Psaume 34:7). Poukisa nou bézwen protèksyon ? A paské nou gen lèlmi pwisan ki lé fè nou méchansté. A kimoun ? Ki koté yé soti ? Kouman yé ka éséyé fè nou méchansté ? Pou réponn sa késyon-yan annou gadé sa ki rivé roun ti moman apré Jéova fè Adan ké Èv.

7. Poukisa Satan ka bloublou moun-yan ?

⁷ Annan chapit 3-a, nou anprann ki roun zanj révòlté kont Bondjé. I té lé dominé ròt-ya. Labib-a ka aplé l’ Satan Djab-a (Révélation 12:9). I té lé osi ki moun-yan asou latè-a révòlté kont Bondjé. I bloublou Èv an prémyé épi i bloublou prèské tout moun asou latè-a. Mé a pa tout moun ki pri. Plizyèr moun kou Abèl, Énòk ké Noé, rété fidèl douvan Bondjé (Hébreux 11:4, 5, 7).

8. a) Kouman roun ran zanj divini démon ? b) Kisa démon-yan fè pou yé pa mouri annan Délij-a ?

 ⁸ Annan lépòk Noé-a, roun ran zanj révòlté kont Jéova. Yé lésé syèl-a pou alé viv kou moun-yan asou latè-a. Poukisa ? Labib-a ka di ki yé té lé gen fanm (li Genèse 6:2). Mé zanj-ya pa té pou fè roun mové bagaj konsa (Jude 6). Kou sa zanj méchan-yan, prèské tout moun annan sa lépòk-a koumansé fè bagaj ki té mové é yé divini vyolan. Lò i wè sa, Jéova désidé voyé roun délij, i fè bokou dlo monté asou latè-a pou détrwi yé. Mé i sové so sèrvitèr fidèl-ya (Genèse 7:17, 23). Pou yé pa mouri, zanj méchan-yan viré annan syèl-a. Labib-a ka aplé yé démon-yan. Yé chwazi maché ké Satan annan so rébélyon épi i divini yé chèf (Matthieu 9:34).

9. a) Lò démon-yan viré annan syèl-a, kisa ki rivé yé ? b) Di kisa nou ké palé annan paragraf ki ka vini-ya ?

⁹ Kou démon-yan pa té lé obéyi, Jéova pa asèpté yé rouvini annan so fanmi (2 Pierre 2:4). Yé pa pouvé chanjé kò pou divini moun ankò mé yé ka kontinyé « bloublou tout moun asou latè-a » (Révélation 12:9 ; 1 Jean 5:19). Annou wè kouman yé ka fè pou bloublou sa patché moun-yan (li 2 Corinthiens 2:11).

10. Kouman démon-yan ka bloublou moun-yan ?

¹⁰ Démon-yan gen plizyèr fason pou yé bloublou moun-yan. Moun-yan ki ka palé ké démon-yan ka fè l’ dirèktéman ouben ké rounòt moun parèkzanp roun divinò ouben roun gadò. Palé ké démon-yan, yé ka aplé sa tchenbwa (gadé nòt n^o 26, paj 221).  Labib-a ka di a pou nou rété byen lwen di tousa ki mélé ké démon-yan (Galates 5:19-21). Poukisa ? Paské, menm fason roun chasò ka sèrvi roun trap pou tchenbé roun jibyé, démon-yan ka sèrvi plizyèr trap pou pran moun-yan épi pou dominé yé.

11. a) A kisa ki divinasyon-an ? b) Poukisa nou divèt rété lwen di divinasyon-an ?

¹¹ Parèkzanp, démon-yan ka sèrvi divinasyon-an pou bloublou moun-yan. Divinasyon-an, a lò moun ka chaché savé sa ki ké rivé dimen ouben sa ki séré. A ké pouvwar démon-yan yé ka fè sa. Pou savé sa ki ké rivé pita, i gen moun ka sèrvi kart taro, boul kristal, yé ka chaché èsplikasyon rèv, yé ka gadé zétwèl-ya, ouben yé ka li lign lanmen moun. Roun patché moun ka krè ki tousa pa anyen, mé a pa vré ! Sa danjéré menm. Labib-a ka montré ki démon-yan ké gadò-ya ka travay ansanm. Actes 16:16 jiska 18 ka palé di roun tifi ki té pouvé di sa dimen té ké poté gras a roun « démon divinasyon ». Lò Pòl fè démon-an soti, tifi-a pédi tout so pouvwar.

12. a) Poukisa sa danjéré di éséyé palé ké moun mouri-ya ? b) Poukisa sèrvitèr Bondjé pa ka swiv tradisyon ki mélé ké tchenbwa ?

¹² Démon-yan ka éséyé bloublou nou lò yé ka fè nou krè ki nou pouvé palé ké moun mouri-ya. Yé lé fè nou krè ki moun mouri-ya vivan toujou rounòt koté é ki yé pouvé palé ké nou, idé nou ouben fè nou méchansté. Parèkzanp, lò yé ka pédi roun zanmi ouben roun moun di yé fanmi, i gen moun ki ka alé wè gadò ouben divinò. Gadò-ya ka fè yé krè ki yé pouvé palé ké moun mouri-ya. Pitèt i ké bay yé roun détay asou moun mouri-a é i ké menm imité so vwa  (1 Samuel 28:3-19). Anplis di sa, bokou moun ka fè bagaj pou moun mouri-ya paské yé ka krè ki yé vivan toujou rounòt koté (parèkzanp : lafèt pou moun mouri-ya, anivèrsèr yé lanmò, poté manjé ké bwè ouben ròt bagaj pou yé, tradisyon roun moun ka swiv lò so mouché ouben so madanm mouri, ouben lavéyé). Défwa, lò krétyen-yan pa lé swiv sa tradisyon-yan, yé fanmi ouben moun ki annan vilaj-a ka mal palé yé, ka jouré yé ouben pa lé wè yé ankò. Mé krétyen-yan savé ki moun mouri-ya pa ka kontinyé viv pyès ròt koté. Nou pa pouvé palé ké yé é yé pa pouvé ni fè nou méchansté ni idé nou (Psaume 115:17). Panga ! Pa janmen éséyé palé ké moun mouri-ya ouben démon-yan. Épi pa janmen swiv tradisyon ki mélé ké tchenbwa (li Deutéronome 18:10, 11 ; Isaïe 8:19).

13. Kisa moun ki té pè démon-yan rivé fè ?

¹³ Démon-yan ka bloublou moun-yan, mé anplis di sa, yé ka fè yé tranblé a fòrs yé pè. Jòdla, Satan ké démon-yan savé ki yé « gen roun ti moso tan » paské Bondjé ké fè yé disparèt di latè-a titalò (Révélation 12:12, 17). Yé pi féròs pasé pyès tan. Mé jòdla, milyé moun ki té pè démon-yan pa pè yé ankò. Kouman yé fè pou soti anba sa zafè-a ?

14. Kou roun ran krétyen ki té ka rété annan vil Éfèz, kouman roun moun pouvé soti anba pouvwar démon-yan ?

¹⁴ Labib-a ka di nou kouman pou nou tchenbé rèd douvan démon-yan é kouman pou nou soti anba yé pouvwar. Parèkzanp, anvan yé divini krétyen, roun  ran moun ki té ka rété annan vil Éfèz té ka palé ké démon-yan. Kouman yé soti anba yé pouvwar ? Labib-a ka di ki bokou moun « annan sa ki té ka fè lamaji, mété tout yé liv ansanm épi boulé yé douvan tout moun » (Actes 19:19). Yé boulé tout yé liv lamaji paské yé té lé divini krétyen. A pou nou fè menm bagaj-a jòdla. Sa ki lé sèrvi Jéova divèt jité tousa ki mélé ké démon-yan. A ké pitèt liv, oroskòp, fim, lanmizik, jwé, ouben menm zimaj : pou byen di, a tout bagaj ki lé fè moun krè ki i pa gen pyès danjé annan lamaji, pyay, démon-yan ouben sa ki pa nòrmal, kousidiré a té bagaj pou anmizé. A ké pitèt osi bagaj moun ka poté pou mal pa vini anlè yé (1 Corinthiens 10:21).

15. Kisa nou divèt fè ankò pou tchenbé rèd douvan Satan ké démon-yan ?

¹⁵ Plizyèr lannen apré krétyen Éfèz-ya boulé yé liv lamaji, apot Pòl di yé ki yé té divèt kontinyé briga « kont fòrs èspirityèl méchan-yan » (Éphésiens 6:12). Menm si yé té boulé yé liv, démon-yan té la toujou ka éséyé fè yé méchansté. Atò, kisa yé té divèt fè ankò ? Pòl di yé : « Pran gran boukliyé lafwa-a, a ké sa zòt ké pouvé étenn [arété] tout flèch difé méchan-an ka voyé » (Éphésiens 6:16). Annan roun konba, a boukliyé solda-a ki ka protéjé l’. Menm fason-an, nou lafwa pouvé protéjé nou. Si nou sir ki Jéova pouvé protéjé nou, nou ké pouvé tchenbé rèd douvan Satan ké démon-yan (Matthieu 17:20).

16. Kouman nou pouvé fè pou nou lafwa annan Jéova divini pi fò ?

¹⁶ Kouman nou pouvé fè pou nou lafwa annan Jéova divini pi fò ? Nou divèt li Labib-a chak jou. Nou  divèt osi anprann fè Bondjé konfyans épi nou divèt sir ki i ké protéjé nou. Si nou konfyans annan Jéova byen fò, Satan ké démon-yan pa ké pouvé fè nou pyès mové bagaj (1 Jean 5:5).

17. Ki ròt bagaj nou divèt fè pou paré démon-yan ?

¹⁷ Krétyen Éfèz té divèt fè rounòt bagaj. Kou yé té ka viv annan roun vil ki té plen ké tchenbwa, Pòl di yé : « Priyè annan tout okazyon » (Éphésiens 6:18). Tout-tan, yé té divèt doumandé Jéova protéjé yé. Nou menm osi, nou ka viv annan roun monn ki plen ké tchenbwa. A pou sa nou divèt doumandé Jéova protéjé nou. É lò nou ka priyè nou divèt itilizé so non (li Proverbes 18:10). Si nou ka kontinyé doumandé Jéova délivré nou di Satan, i ké réponn nou (Psaume 145:19 ; Matthieu 6:13).

18, 19. a) Kouman nou pouvé gangnen konba kont Satan ké démon-yan ? b) Ki késyon chapit ki ka vini dèyè-a ké réponn ?

¹⁸ Si nou ka jité tousa ki mélé ké tchenbwa é si nou ka fè Bondjé konfyans pou i protéjé nou, nou ké pouvé tchenbé rèd douvan Satan ké démon-yan. Nou pa divèt pè yé (li Jacques 4:7, 8). Jéova pi pwisan pasé démon-yan. I pini yé annan lépòk Noé é pita, i ké fè yé disparèt nèt (Jude 6). Pa bliyé ki nou pa ka briga kont Satan ké démon-yan nou rounso. Jéova ka sèrvi zanj-ya pou protéjé nou (2 Rois 6:15-17). Asiré pa pitèt Jéova ké idé nou pou nou gangnen sa konba-a (1 Pierre 5:6, 7 ; 2 Pierre 2:9).

¹⁹ Kou Satan ké démon-yan ka mété bokou soufrans asou latè-a, poukisa Bondjé pòkò fè yé disparèt ? Nou ké réponn sa késyon-an annan chapit ki ka vini dèyè-a.