1. ¿Mbaʼérepa Jehová oipota jaikuaa umi ánhelpe?

JEHOVÁ oipota jaikuaa porã ifamiliakuérape. Ha umi ánhel ningo Ñandejára família. La Bíbliape ojeʼe voi hesekuéra haʼeha “Ñandejára raʼykuéra” (Job 38:7, nóta). ¿Mbaʼépa ojapo umi ánhel? ¿Mbaʼéichapa yma oipytyvõ hikuái la héntepe? ¿Ikatúpa ñanepytyvõ hikuái koʼág̃a? (Ehecha nóta 8).

2. ¿Mávapa ojapo umi ánhelpe, ha mboýpa oĩ hikuái?

² ¿Mávapa ojapo vaʼekue umi ánhelpe? Colosenses 1:16-pe omombeʼu Jehová ojapo rire Jesúspe ojapo hague “entéro mbaʼe oĩva yvágape ha yvy ape ári”. Umíva apytépe oĩ umi ánhel. ¿Mboy ánhelpa ojapo vaʼekue Ñandejára? La Biblia heʼi Jehová ojapo hague “hetaiterei ánhel” (Salmo 103:20; Apocalipsis 5:11).

3. ¿Mbaʼépa heʼi Job 38:4-7 umi ánhel rehe?

³ La Biblia omombeʼu Jehová ojapóma hague umi ánhelpe, ojapo mboyve ko yvy. ¿Mbaʼéichapa oñeñandu umi ánhel ohechárõ guare ko yvy? Pe lívro de Job oĩva la Bíbliape omombeʼu haʼekuéra ovyʼaiterei hague. Umi ánhel peteĩ famíliaicha omombaʼeguasu vaʼekue Jehovápe oñondivepa (Job 38:4-7).

4. ¿Mbaʼérepa jaʼekuaa umi ánhel oñeinteresaha yvyporakuérare?

⁴ Umi ánhel ningo siémpre oñeinteresa yvyporakuérare. Chupekuéra ointeresa umi mbaʼe Jehová ojapótava ko yvýgui ha umi mbaʼe porã ojapótava yvyporakuéra rehehápe (Proverbios 8:30, 31; 1 Pedro 1:11, 12).  ¡Mbaʼeichaitépa oiméne ombyasy raʼe hikuái Adán ha Eva odesovedesérõ guare Ñandejárape! Ha koʼýte oiméne ombyasy hikuái ohechávo hetaiterei hénte naiñeʼẽrenduiha Ñandejárape. Péro haʼekuéra ovyʼaiterei avei ohechávo umi hembiapo vaíva oñarrepenti ha oservi jey Jehovápe (Lucas 15:10). Umi ánhel ningo oipytyvõseterei umi oservívape Jehovápe ha haʼe ojokuái voi chupekuéra oipytyvõ ha oprotehe hag̃ua isiervokuérape (Hebreos 1:7, 14). Jahechamína unos kuánto ehémplo ohechaukáva upéva.

5. ¿Mbaʼéichapa umi ánhel oipytyvõ Jehová siervokuérape yma?

 ⁵ Jehová omondo kuri mokõi ánhelpe oipytyvõ hag̃ua Lot ha ifamiliakuérape osẽ hag̃ua oñehundi mboyve Sodoma ha Gomorra (Génesis 19:15, 16). Heta áño upe rire, proféta Daniélpe oñemombórõ guare umi león oĩháme, Ñandejára “ombou peteĩ ánhelpe ha omboty umi leonkuéra juru”. Upéicha rupi umi león ndojapói hese mbaʼevete (Daniel 6:22). Tiémpo rire, apóstol Pedro oĩrõ guare kárselpe, Jehová omondo avei peteĩ ánhelpe oguenohẽ hag̃ua chupe upégui (Hechos 12:6-11). Umi ánhel oipytyvõ vaʼekue avei Jesúspe oĩrõ guare ko yvy ape ári. Por ehémplo, ojevautisa riremi haʼe oho kuri pe desiértore ha “umi ánhel oñatende hese” (Marcos 1:13). Ha ojejuka mboyvemi chupe katu, peteĩ ánhel oho “omombarete chupe” (Lucas 22:43).

6. a) ¿Mbaʼérepa jaʼekuaa umi ánhel oipytyvõha avei koʼág̃arupi Ñandejára siervokuérape? b) ¿Mbaʼépa jahecháta ko kapítulope?

⁶ Koʼág̃arupi umi ánhel ndojeaparesevéima yvyporakuérape, péro Jehová oipuru gueteri chupekuéra oipytyvõ hag̃ua isiervokuérape. La Biblia heʼi: “Umi orrespetáva Ñandejárape noĩri haʼeño, Jehová ánhel oĩ voi ijerére osalva hag̃ua chupekuéra” (Salmo 34:7). ¿Mbaʼérepa ñaikotevẽ hesekuéra? Pórke jareko heta enemígo ipoderosoitereíva ha ojaposéva ñanderehe mbaʼe vai. ¿Mávapa umíva? ¿Moõguipa ou? ¿Mbaʼépa ojapo hikuái ñandeperhudika hag̃ua? Ñakontesta hag̃ua koʼã pregúnta, jahechami mbaʼépa oiko vaʼekue Ñandejára ojapo riremi Adán ha Évape.

7. ¿Mbaʼépa ojapo heta hénte Satanás ombotavy rupi chupekuéra?

⁷ Kapítulo 3-pe jahecha kuri peteĩ ánhel opuʼã hague Ñandejárare ha oipota hague enterove oservi chupe.  La Biblia ohenói upe ánhel añáme Satanás el Diablo (Apocalipsis 12:9). Satanás oipota avei yvyporakuéra opuʼãmba Ñandejárare. Haʼe ombotavy kuri Évape ha upéicha avei ombotavýma hetaiterei héntepe oñemoĩ hag̃ua Ñandejára kóntrape. Upéicharõ jepe, oĩ heta yvypóra oservi vaʼekue Jehovápe ipyʼaite guive, umíva apytépe Abel, Enoc, Noé ha hetave persóna (Hebreos 11:4, 5, 7).

8. a) ¿Mbaʼéichapa heta ánhelgui ou vaʼekue oiko demónio? b) ¿Mbaʼépa ojapo umi demónio ani hag̃ua oñehundi oúrõ guare pe dilúvio?

⁸ Noé tiémpope, oĩ vaʼekue avei umi ánhel opuʼãva Jehováre yvágape ha oguejy ko yvy ape ári oiko hag̃ua yvypóraicha. ¿Maʼerãpa ojapo hikuái upéva? La Biblia heʼi haʼekuéra oipota hague hembirekorã (elee Génesis 6:2). Péro ivaieterei la ojapo vaʼekue hikuái (Judas 6). Noé tiémpope heta yvypóra ikorrúpto ha iviolentoiterei vaʼekue koʼã ánhel añáicha. Upévare Jehová odesidi ohundi peteĩ dilúvio rupive entéro umi ojapóvape mbaʼe vai. Péro Jehová osalva umi isiérvo iñeʼẽrendúvape (Génesis 7:17, 23). ¿Ha mbaʼépa oiko umi ánhel aña ou vaʼekuégui ko yvy ape ári? Ani hag̃ua omano hikuái, oho jey yvágape. La Biblia ohenói koʼã ánhel añáme demónio. Haʼekuéra odesidi kuri oñemoĩ Satanás ykére ha oheja haʼe ogoverna chupekuéra (Mateo 9:34).

9. a) ¿Mbaʼépa oiko umi demóniogui oho jey rire yvágape? b) ¿Mbaʼépa jahecháta koʼág̃a?

⁹ Umi demónio oñemoĩ rupi Jehováre, haʼe ndoaseptavéima chupekuéra yvágape ifamília apytépe (2 Pedro 2:4). Koʼág̃arupi umi demóniogui ndaikatuvéima oiko yvypóra, upéicharõ jepe, haʼekuéra ombotavy gueteri hína “ko múndo kompletoitépe” (Apocalipsis 12:9; 1 Juan 5:19). Jahechamína mbaʼéichapa ojapo hikuái upéva (elee 2 Corintios 2:11).

10. ¿Mbaʼéichapa oporombotavy umi demónio?

¹⁰ Umi demónio ombotavy la héntepe heta hendáicha. Algúno diréktamente voi otrata umi demóniondi ha ótro katu oho umi médiko térã espiritísta rendápe. La Biblia heʼi porã ñamboykete hag̃ua opaichagua “espiritísmo” ha okultísmo (Gálatas 5:19-21). ¿Mbaʼérepa? Umi mariskadór omoĩháicha ñuhã oity hag̃ua umi animálpe, umi demónio oipuru avei heta ñuhã oity hag̃ua la héntepe ha oreko hag̃ua chupekuéra ipoguýpe (ehecha nóta 26).

11. ¿Mbaʼépa hína pe adivinasión ha mbaʼérepa ñamboykete vaʼerã?

¹¹ Peteĩ ñuhã Satanás oipurúva ombotavy hag̃ua la héntepe haʼe hína pe adivinasión. ¿Mbaʼépa hína upéva? Upévape oike hína opa mbaʼe umi hénte ojapóva Satanás podér rupive omombeʼu hag̃ua la héntepe ifutúro térã ótra kósa oikuaaséva. Por ehémplo oĩ umi oleéva pe kárta de tarót, oleéva umi héntepe ipopyte, ojapóva paje, oleéva oróskopo ha hetave mbaʼe umichagua. Heta oĩ opensáva ndaivairiha koʼã mbaʼe, péro añetehápe umíva ipeligrosoiterei. La Biblia ohechauka porã umi oadivináva mbaʼépa oikóta ombaʼapoha umi demóniondi. Hechos 16:16-18 omombeʼu apóstol Pablo omosẽ hague peteĩ demónio peteĩ mitãkuñágui, ha upe rire pe mitãkuña ndaikatuvéima hague oadivina umi mbaʼe oikótava.

12. a) ¿Mbaʼérepa ndovaléi ñañehaʼã ñañeʼẽ umi omano vaʼekuéndi? b) ¿Mbaʼérepa Jehová siervokuéra ndopartisipái umi mbaʼe ojejapóvape umi omanóva rehehápe?

¹² Umi demónio omoñuhã avei la héntepe ótro hendáicha. Haʼekuéra oipota jaguerovia umi omano vaʼekue ikatuha oñeʼẽ ñanendive térã ojapo ñanderehe ivaíva. Por ehémplo, umi demónio oipota ñapensa omanóramo peteĩ ñane amígo térã ñane hénte, ikatuha ñañekomunika  hendivekuéra peteĩ espiritísta rupive. Umi espiritísta heʼi voi haʼekuéra ikatuha oñemongeta umi omano vaʼekuéndi. Ha ojeguerovia hag̃ua chupekuéra, omombeʼu hikuái la héntepe algúna kósa umi iñamígo térã ihénte omano vaʼekuégui ha oñeʼẽ voi haʼekuéraicha (1 Samuel 28:3-19). Heta oĩ opensáva umi omanóva osegiha oikove algún ládo, upéicha rupi ojapo heta mbaʼe umi omanóva rehehápe. Por ehémplo, oĩ ojapóva karu guasu, omboaretéva umi omano vaʼekue ára, algúno katu oraha chupe rregálo ipanteónpe, ojapo chupe mísa, novenário ha hetave mbaʼe. Umi oservíva Jehovápe ndopartisipái koʼã mbaʼépe, upévare umi ipariénte térã ivesinokuéra sapyʼánte otrata vai chupekuéra térã ndoikuaasevéi voi chuguikuéra mbaʼeve. Péro Jehová siervokuéra oikuaa porã umi omanóva ndosegiriha oikove mamove, ndaikatuiha oñeʼẽ ñanendive ni ojapo ñanderehe mbaʼeve (Salmo 115:17). Jajekuidákena koʼã mbaʼégui. Ni mbaʼevéicharõ nañañehaʼãi vaʼerã ñañeʼẽ umi omano vaʼekuéndi ni umi demóniondi, ha ndajajesegíri vaʼerã umi kostúmbre orekóvare la hénte (elee Deuteronomio 18:10, 11; Isaías 8:19).

13. ¿Osegípa enterove umi hénte okyhyje umi demóniogui?

¹³ Umi demónio ndahaʼéi ombotavýnteva la héntepe, síno kyhyjepópe voi oreko chupekuéra. Péro koʼẽrõite Jehová ndohejamoʼãvéima Satanás ha idemoniokuérape ombotavy la héntepe. Haʼekuéra oikuaa rupi “mbykypaitemaha pe tiémpo hembýva” chupekuéra, mas ke núnka ipochy ha ojapo heta mbaʼe vai (Apocalipsis 12:12, 17). Péro heta hénte yma okyhyje vaʼekue umi demóniogui, koʼág̃a ndokyhyjevéima chuguikuéra. ¿Mbaʼépa ojapo hikuái upearã?

14. ¿Mbaʼépa ikatu jajapo jajehekyiete hag̃ua umi demóniogui?

¹⁴ La Biblia omombeʼu ñandéve mbaʼépa jajapo vaʼerã  ani hag̃ua umi demónio ñanemoñuhã ha avei mbaʼéichapa ikatu jajehekyiete chuguikuéra. Por ehémplo, yma, peteĩ siuda héravape Éfeso, oĩ vaʼekue persóna oñekomunikáva umi demóniondi. Péro upéi koʼã persóna ou oikuaa Jehovápe ha oaprende naiporãiha umi mbaʼe. ¿Mbaʼépa ojapo hikuái ojehekyiete hag̃ua umi demóniogui? La Biblia heʼi: “Heta umi ojapo vaʼekue máhia ombyaty ilivrokuéra ha ogueru ohapy enterove renondépe” (Hechos 19:19). Haʼekuéra oservise rupi Jehovápe, ohundipaite umi lívro de máhia orekóva. Koʼág̃arupi avei, jaserviséramo Jehovápe ñahundipaite vaʼerã opa mbaʼe oúva umi demóniogui. Umíva apytépe oĩ lívro, rrevísta, oróskopo, pelíkula, músika, huégo, divúho, amuléto, kurundu ha hetave mbaʼe oúva umi demóniogui (1 Corintios 10:21).

15. ¿Mbaʼépa tekotevẽve jajapo jajeprotehe hag̃ua umi demóniogui?

¹⁵ Umi oikóva Éfesope ohapypáramo jepe umi lívro de máhia orekóva, apóstol Pablo heʼi chupekuéra osegi vaʼerãha oñorairõ umi espíritu añándi (Efesios 6:12). ¿Mbaʼérepa? Pórke umi demónio osegíta gueteri otantea oity jey hag̃ua chupekuéra iñuhãme. ¿Mbaʼépa ojapove vaʼerã hikuái ojeprotehe hag̃ua umi demóniogui? Apóstol Pablo heʼi chupekuéra: “Peñakarama pende jeroviáre peteĩ eskúdo guasúicha, upévape peẽ ikatúta pembogue kompletoite umi flécha hendýva opoíva Satanás” (Efesios 6:16). Peteĩ eskúdo oproteheháicha peteĩ soldádope gerrahápe, ñande jerovia ikatu avei ñandeprotehe. Jajeroviáramo Jehováre ñande pyʼaite guive, haʼe oñangarekóta ñanderehe, ha ikatúta ñandepuʼaka Satanás ha idemoniokuérare (Mateo 17:20).

16. ¿Mbaʼépa ikatu jajapo jajerovia mbareteve hag̃ua Jehováre?

¹⁶ ¿Mbaʼépa ikatu jajapo jajerovia mbareteve hag̃ua Jehováre? Tekotevẽ jalee la Biblia káda día ha ñakonfia  Jehová oñangarekotaha ñanderehe. Jajapóramo péicha, Satanás ha idemoniokuéra ndaikatumoʼãi ojapo ñanderehe mbaʼeve (1 Juan 5:5).

17. ¿Mbaʼépa ñanepytyvõta avei jajeprotehe hag̃ua umi demóniogui?

¹⁷ ¿Mbaʼépa tekotevẽ vaʼekue avei ojapo umi oikóva Éfesope? Haʼekuéra ningo oiko vaʼekue peteĩ siuda oĩhápe heta hénte otratáva umi demóniondi. Upévare apóstol Pablo heʼi chupekuéra: “Pesegi pejapo opaichagua ñemboʼe” (Efesios 6:18). Haʼekuéra tekotevẽ vaʼekue ojerure meme Jehovápe oprotehe hag̃ua chupekuéra. Ñane tiémpope avei oĩ hetaiterei hénte otratáva umi demóniondi, upévare jajerure meme vaʼerã Jehovápe oñangareko hag̃ua ñanderehe. Iñimportánte avei jaipuru Ñandejára réra ñañemboʼe jave (elee Proverbios 18:10). Jasegíramo jajerure Jehovápe ñanepytyvõ hag̃ua jajehekyiete hag̃ua Satanásgui, haʼe katuete ñanepytyvõta (Salmo 145:19; Mateo 6:13).

18, 19. a) ¿Mávapa ñanepytyvõta ani hag̃ua Satanás ha idemoniokuéra ipuʼaka ñanderehe? b) ¿Mbaʼe pregúntapa oñerrespondéta pe kapítulo oúvape?

¹⁸ Ñamboyketéramo opa mbaʼe oúva umi demóniogui ha jajeroviáramo Jehová ñandeprotehetaha, Satanás ha idemoniokuéra ndaipuʼakamoʼãi ñanderehe. ¡Ndaipóri jakyhyje hag̃ua chuguikuéra! (Elee Santiago 4:7, 8). Jehová ningo ipoderosoiteve umi demóniogui. Noé tiémpopema voi haʼe okastiga vaʼekue chupekuéra, ha amo gotyove katu ohundietéta voi chupekuéra (Judas 6). Ñanemanduʼákena nañaimeiha ñaneaño, Jehová ojevale hína hiʼanhelkuérare ñandeprotehe hag̃ua (2 Reyes 6:15-17). Aníkena jaduda, Jehová katuete ñanepytyvõta ñandepuʼaka hag̃ua Satanás ha idemoniokuérare (1 Pedro 5:6, 7; 2 Pedro 2:9).

¹⁹ Satanás ha idemoniokuéra ningo hetáma ombosufri la héntepe, ¿mbaʼérepa Jehová nohundírima chupekuéra? Ko pregúnta oñerrespondéta pe kapítulo oúvape.