1. Ngaa dapat naton tun-an ang parte sa mga anghel?

GUSTO ni Jehova nga mahibaluan naton ang parte sa iya pamilya. Ang mga anghel pamilya man sang Dios. Sa Biblia ginatawag sila nga “[mga] anak sang Dios.” (Job 38:7) Ano ang ginahimo sang mga anghel? Paano nila ginbuligan ang mga tawo sang una? Kag makabulig bala sila sa aton subong?—Tan-awa ang Endnote 8.

2. Diin naghalin ang mga anghel? Daw ano sila kadamo?

² Dapat naton hibaluon kon diin naghalin ang mga anghel. Ginasugiran kita sang Colosas 1:16 nga pagkatapos gintuga ni Jehova si Jesus, “gintuga ang tanan iban pa nga butang sa langit kag sa duta.” Nagalakip ina sang mga anghel. Daw ano sila kadamo? Ginasiling sang Biblia nga may ginatos ka milyon ka anghel.—Salmo 103:20; Bugna 5:11.

3. Ano ang ginasugid sa aton sang Job 38:4-7 parte sa mga anghel?

³ Ginatudlo man sa aton sang Biblia nga gintuga ni Jehova ang mga anghel antes niya gintuga ang duta. Ano ang nabatyagan nila sang nakita nila ang duta? Ginasugiran kita sang libro sang Job nga nalipay gid sila. Suod gid sila nga pamilya nga nagaalagad kay Jehova.—Job 38:4-7.

4. Ngaa masiling naton nga interesado gid ang mga anghel sa mga tawo?

⁴ Interesado gid ang mga anghel sa mga tawo kag sa katuyuan ni Jehova para sa duta kag sa mga tawo. (Hulubaton 8:30, 31; 1 Pedro 1:11, 12) Nasubuan gid sila sang  nagrebelde si Adan kag si Eva. Ilabi na gid subong, kay ang kalabanan wala nagatuman kay Jehova. Pero nalipay gid sila kon may maghinulsol kag magtuman sa Dios. (Lucas 15:10) Interesado gid ang mga anghel sa mga nagaalagad sa Dios. Ginagamit sila ni Jehova para buligan kag proteksionan ang iya mga alagad sa duta. (Hebreo 1:7, 14) Istoryahan naton ang pila ka halimbawa.

5. Paano ginbuligan sang mga anghel ang mga alagad sang Dios sang una?

 ⁵ Nagpadala si Jehova sang duha ka anghel para buligan si Lot kag ang iya pamilya nga makapalagyo sa kalaglagan sang siudad sang Sodoma kag Gomorra. (Genesis 19:15, 16) Ginatos ka tuig sang ulihi, ginhulog si propeta Daniel sa mga leon, pero wala sia mahalitan, kay “ang . . . Dios nagpadala sing anghel kag ginkipot niya ang baba sang mga leon.” (Daniel 6:22) Sang ulihi, sang napriso si apostol Pedro, nagpadala si Jehova sang anghel para paguaon sia. (Binuhatan 12:6-11) Ginbuligan man sang mga anghel si Jesus sang diri sia sa duta. Halimbawa, pagkatapos sia mabawtismuhan, “ang mga anghel nag-alagad sa iya.” (Marcos 1:13) Kag antes dakpon si Jesus, “ginpabakod sia” sang anghel.—Lucas 22:43.

6. (a) Ngaa masiling naton nga ginabuligan sang mga anghel ang mga alagad sang Dios subong? (b) Ano nga mga pamangkot ang sabton naton?

⁶ Subong, wala na nagapakita ang mga anghel sa mga tawo. Pero ginagamit sila gihapon sang Dios para buligan ang iya mga alagad. Ang Biblia nagasiling: “Ang anghel ni Jehova nagabantay sa tanan nga nagakahadlok sa Iya, kag ginaluwas niya sila.” (Salmo 34:7) Ngaa kinahanglan naton sing proteksion? Kay may gamhanan kita nga mga kaaway nga gusto manghalit sa aton. Sin-o sila? Diin sila naghalin? Ano ang ginahimo nila para halitan kita? Para masabat ina, hibaluon naton kon ano ang natabo wala madugay pagkatapos gintuga si Adan kag si Eva.

7. Ano ang ginhimo sang mga tawo bangod gindayaan sila ni Satanas?

⁷ Natun-an naton sa Kapitulo 3 nga nagrebelde sa Dios ang isa ka anghel kag gusto niya gamhan ang iban. Ginatawag sia sang Biblia nga Satanas nga Yawa. (Bugna 12:9)  Gusto ni Satanas nga magrebelde man ang iban sa Dios. Nadayaan niya si Eva, kag sugod sadto nadayaan niya ang kalabanan nga tawo. Pero, ang pila nga pareho ni Abel, ni Enoc, kag ni Noe, nangin matutom kay Jehova.—Hebreo 11:4, 5, 7.

8. (a) Paano nangin mga demonyo ang pila ka anghel? (b) Ano ang ginhimo sang mga demonyo para indi sila mapatay sa Baha?

⁸ Sang panahon ni Noe, nagrebelde ang pila ka anghel kag naghalin sila sa ila ilistaran sa langit para mangin tawo sa duta. Ngaa? Ginasilingan kita sang Biblia nga gusto nila mangasawa. (Basaha ang Genesis 6:2.) Pero sala ang ila ginhimo. (Judas 6) Pareho sinang malain nga mga anghel, ang kalabanan nga tawo sadto nangin malain man kag mapintas. Gani nagdesisyon si Jehova nga laglagon ang malain nga mga tawo paagi sa baha sa bilog nga duta. Pero ginluwas niya ang iya matutom nga mga alagad. (Genesis 7:17, 23) Nagbalik sa langit ang malain nga mga anghel para indi sila mapatay sa Baha. Inang malain nga mga anghel ginatawag sang Biblia nga mga demonyo. Nag-upod sila kay Satanas sa pagrebelde, kag nangin manuggahom nila ang Yawa.—Mateo 9:34.

9. (a) Ano ang natabo sa mga demonyo sang nagbalik sila sa langit? (b) Ano pa ang tun-an naton?

⁹ Bangod mga rebelde sila, ginsikway sila ni Jehova sa iya pamilya. (2 Pedro 2:4) Indi na puede mangin tawo liwat ang mga demonyo, pero ‘ginapatalang nila gihapon ang bug-os napuy-an nga duta.’ (Bugna 12:9; 1 Juan 5:19) Tun-an naton kon paano nila ginadayaan, ukon ginapatalang, ang madamo.—Basaha ang 2 Corinto 2:11.

10. Paano ginadayaan sang mga demonyo ang mga tawo?

¹⁰ Madamo sing paagi ang mga demonyo para dayaan ang mga tawo. Para maistorya sang mga tawo ang mga  demonyo, ginahimo nila ini sing direkta ukon paagi sa isa ka tawo, pareho sang babaylan ukon espiritista. Ginatawag ini nga demonismo ukon espiritismo. Pero ginasugo kita sang Biblia nga maglikaw sa tanan nga may labot sa mga demonyo. (Galacia 5:19-21) Ngaa? Pareho sa mangangayam nga nagagamit sing siod para madakpan ang mga sapat, ang mga demonyo nagagamit man sing siod para masiod kag makontrol ang mga tawo.—Tan-awa ang Endnote 26.

11. Ano ang pagpamakot, kag ngaa dapat naton ini likawan?

¹¹ Ang isa nga ginagamit sang mga demonyo amo ang pagpamakot. Amo ini ang paggamit sang indi kinaandan nga gahom para mahibaluan ang palaabuton ukon ang sekreto nga butang. Ginahimo ini sang iban paagi sa pagtan-aw sa mga bituon, mga panimad-on, paggamit sang tarot nga mga baraha, bola nga kristal, ukon pagpanghimalad. Para sa madamo indi ini makahalit, pero sala sila. Tama ini ka delikado. Halimbawa, ginapakita sang Biblia nga nagabuligay ang mga demonyo kag ang mga manugpakot. Sa Binuhatan 16:16-18, mabasa naton ang parte sa dalagita nga ginabuligan sang demonyo para “mapaktan . . . ang matabo sa palaabuton.” Sang ginpalayas ni apostol Pablo ang demonyo, indi na mapaktan sang dalagita ang palaabuton.

12. (a) Ngaa delikado nga istoryahon ang mga patay? (b) Ngaa wala nagaentra ang mga alagad sang Dios sa mga kustombre nga may labot sa mga demonyo?

¹² May isa pa ka paagi ang mga demonyo para masiod ang mga tawo. Ginapapati nila kita nga puede naton maistorya ang mga patay kag nagakabuhi sila sa lain nga lugar kag puede sila makaistorya ukon makahalit sa aton. Halimbawa, ang isa nga napatyan sang abyan ukon paryente mahimo magkadto sa espiritista, nga nagasiling nga maistorya niya ang patay. Ang espiritista mahimo  maghatag sing pila ka impormasyon parte sa napatay kag ilugon pa gani ang tingog sini. (1 Samuel 28:3-19) Madamo nga kustombre parte sa patay ang nabase sa pagpati nga nagakabuhi gihapon ang mga patay. Nagalakip ini sang selebrasyon sa lubong, anibersaryo sa lubong, paghalad sa patay, ritwal sa pagkabalo, ukon iban pa nga ritwal sa lubong. Ang mga Cristiano nga wala nagaentra sa sini, masami nga ginapakalain, ginainsulto, ukon ginalikawan sang ila mga pamilya ukon mga kaingod. Pero nahibaluan sang mga Cristiano nga ang patay wala na nagakabuhi sa lain nga lugar, nga indi na sila maistorya, kag indi na sila makahalit sa aton. (Salmo 115:17) Dapat ka maghalong. Indi gid pagtilawi nga istoryahon ang mga patay ukon ang mga demonyo kag indi gid mag-entra sa mga kustombre nga may labot sa mga demonyo.—Basaha ang Deuteronomio 18:10, 11; Isaias 8:19.

13. Ano na ang nabatyagan subong sang madamo nga nahadlok anay sa mga demonyo?

¹³ Wala lang ginadayaan sang mga demonyo ang mga tawo kundi ginapahog man nila. Nahibaluan subong ni Satanas kag sang iya mga demonyo nga “malip-ot na lamang ang [ila] tion” antes sila dulaon sang Dios sa duta, gani nangin mas mapintas na gid sila kag agresibo. (Bugna 12:12, 17) Pero, linibo ang nahadlok anay sa mga demonyo ang wala na nahadlok subong. Paano nila ini nahimo?

14. Pareho sa mga Cristiano sang unang siglo, paano kita makapanginpadlos sa mga demonyo?

¹⁴ Ginasugiran kita sang Biblia kon paano pakigbatuan ang mga demonyo kag manginpadlos sa ila. Halimbawa, ang kalabanan sang mga taga-Efeso nagapakig-istorya sa  mga demonyo antes nila natun-an ang kamatuoran. Paano sila nakapanginpadlos? Ang Biblia nagasiling: “Gintipon man sang madamo nga nagahimo sing madyik ang ila mga libro kag ginsunog nila ini sa atubangan sang tanan.” (Binuhatan 19:19) Bangod gusto nila mangin Cristiano, ginsunog nila ang tanan nga libro parte sa madyik. Amo man sini ang dapat himuon subong. Dapat sunugon ukon likawan sang tanan nga gusto mag-alagad kay Jehova ang tanan nga may labot sa mga demonyo. Lakip sa sini ang mga libro, magasin, horoscope, pelikula, musika, hampang, kag bisan ang mga poster nga nagapakita nga ang madyik, mga demonyo, ukon ang makatilingala nga mga butang kalingawan lang ukon indi makahalit. Nalakip man sa sini ang mga anting-anting nga ginasuksok bilang pangontra sa mga malain.—1 Corinto 10:21.

15. Ano ang dapat naton himuon para mabatuan si Satanas kag ang mga demonyo?

¹⁵ Mga pila ka tuig sa tapos ginsunog sang mga taga-Efeso ang ila mga libro parte sa madyik, nagsulat si apostol Pablo nga “nagapakig-away” sila gihapon “batok sa puersa sang malaut nga mga espiritu.” (Efeso 6:12) Huo, bisan ginsunog na nila ang ila mga libro, gusto sila gihapon halitan sang mga demonyo. Gani, ano pa ang dapat nila himuon? Ginsilingan sila ni Pablo: “Gamita ninyo ang daku nga taming sang pagtuo, nga paagi sini mapalong [ukon, masagang] ninyo ang tanan nga nagadabadaba nga baslay sang isa nga malauton.” (Efeso 6:16) Pareho sang taming nga nagaamlig sa mga soldado sa inaway, ang aton pagtuo makaamlig man sa aton. Kon bug-os kita nga magsalig nga proteksionan kita ni Jehova, mabatuan naton si Satanas kag ang iya mga demonyo.—Mateo 17:20.

16. Paano naton mapabakod ang aton pagtuo kay Jehova?

¹⁶ Paano naton mapabakod ang aton pagtuo kay Jehova? Dapat naton basahon ang Biblia kada adlaw kag magsalig  nga proteksionan niya kita. Kon mabakod ang aton pagsalig kay Jehova, indi kita mahalitan ni Satanas kag sang mga demonyo.—1 Juan 5:5.

17. Ano pa ang makabulig sa aton para maproteksionan kita sa mga demonyo?

¹⁷ Ano pa ang dapat himuon sang mga Cristiano sa Efeso? Nagaistar sila sa siudad nga puno sang demonismo. Gani ginsilingan sila ni Pablo: “Padayon kamo nga [magpangamuyo] sa tagsa ka higayon.” (Efeso 6:18) Dapat sila mangayo kay Jehova sang proteksion sa tanan nga panahon. Kamusta kita? Nagaistar man kita sa kalibutan nga puno sang demonismo. Gani dapat kita mangabay kay Jehova nga proteksionan niya kita, kag dapat naton gamiton ang iya ngalan kon nagapangamuyo. (Basaha ang Hulubaton 18:10.) Kon padayon kita nga mangabay kay Jehova nga luwason niya kita kay Satanas, sabton niya ang aton mga pangamuyo.—Salmo 145:19; Mateo 6:13.

18, 19. (a) Paano naton mapierde si Satanas kag ang mga demonyo? (b) Ano nga pamangkot ang sabton sa masunod nga kapitulo?

¹⁸ Kon likawan naton ang tanan nga butang nga may labot sa mga demonyo kag magsalig kay Jehova nga proteksionan niya kita, mabatuan naton si Satanas kag ang mga demonyo. Indi kita dapat mahadlok sa ila. (Basaha ang Santiago 4:7, 8.) Mas gamhanan si Jehova sangsa mga demonyo. Ginsilutan niya sila sang panahon ni Noe, kag laglagon niya sila sa palaabuton. (Judas 6) Dumduma, wala kita nagaisahanon. Ginagamit ni Jehova ang iya mga anghel para proteksionan kita. (2 Hari 6:15-17) Makasalig kita nga paagi sa bulig ni Jehova, mapierde naton si Satanas kag ang mga demonyo.—1 Pedro 5:6, 7; 2 Pedro 2:9.

¹⁹ Pero kon si Satanas kag ang mga demonyo ang rason sang madamo nga pag-antos, ngaa wala pa sila ginlaglag sang Dios? Sabton ini sa masunod nga kapitulo.