1. Nama kebuah patut belajar pasal bala melikat?

JEHOVAH deka kitai ngelala ruang bilik Iya. Bala melikat nya sebagi ari ruang bilik Petara. Dalam Bup Kudus, sida dikumbai ‘anak Petara.’ (Pemungkal 6:2) Nama digaga bala melikat? Baka ni sida nulung mensia menya? Lalu ulih sida nulung kitai kemaya hari tu?—Peda Nota Penutup 8.

2. Ari ni penatai bala melikat? Berapa penyampau sida?

² Kitai patut nemu ari ni penatai bala melikat. Kolosi 1:16 madahka, “semua utai ti di serega enggau di dunya” digaga pengudah Jehovah nempa Jesus. Nya nyengkaum bala melikat. Berapa penyampau sida? Bup Kudus madahka bisi beratus juta iku melikat.—Masmur 103:20; Pemandang 5:11.

3. Nama dipadah Jop 38:4-7 pasal bala melikat?

³ Bup Kudus mega madahka, Jehovah nempa bala melikat dulu agi ari Iya nempa dunya. Baka ni asai ati sida lebuh meda dunya? Bup Jop madahka sida gaga ati. Semua sida begulai nyembah Jehovah.—Jop 38:4-7.

4. Baka ni kitai nemu bala melikat sedia deka nulung mensia?

⁴ Bala melikat deka nulung orang sereta deka nemu baka ni tuju Jehovah bekaul enggau dunya sereta mensia deka dikeamatka. (Jaku Dalam 8:30, 31; 1 Peter 1:11, 12) Sida tentu balat tusah ati lebuh Adam seduai  Hawa ngelaban Jehovah. Sida tentu balat agi tusah ati diatu meda mayuh mensia enda ngasika Jehovah. Tang lebuh orang nesal ati lalu pulai baru ngagai Jehovah, bala melikat gaga ati. (Luke 15:10) Bala melikat sedia deka nulung orang ke nyembah Jehovah. Jehovah ngena bala melikat nulung sereta nyaga nembiak Iya ba dunya. (Hebrew 1:7, 14) Aram kitai meda sekeda chunto.

5. Baka ni bala melikat nulung nembiak Petara menya?

 ⁵ Jehovah ngirumka dua iku melikat ngambika nulung Lot enggau sida sebilik ngelepaska diri ari pengerusak nengeri Sodom enggau Gomorah. (Pemungkal 19:15, 16) Beratus taun udah nya, nabi Daniel dibuai ngagai lubang singa, tang singa enda ngemediska iya, laban ‘Petara udah ngasuh melikat Iya nutup mulut singa.’ (Daniel 6:22) Lalu lebuh rasul Peter dijil, Jehovah ngirumka seiku melikat ngelepaska iya. (Kereja Rasul 12:6-11) Bala melikat mega nulung Jesus maya iya ba dunya. Ngambika chunto, pengudah Jesus dibaptisa, ‘bala melikat ngintu iya.’ (Mark 1:13) Sebedau Jesus dibunuh, seiku melikat ‘ngeringka iya.’—Luke 22:43.

6. (a) Baka ni kitai nemu bala melikat nulung nembiak Petara kemaya hari tu? (b) Nama tanya ke deka disaut kitai diatu?

⁶ Kemaya hari tu, bala melikat nadai agi pegari di mua mensia. Tang Petara agi ngena bala melikat nulung nembiak Iya. Bup Kudus madahka: ‘Melikat Jehovah nyaga orang ke ngemesaika Jehovah lalu ngelepaska sida ari utai ti tau nganu sida.’ (Masmur 34:7) Nama kebuah kitai begunaka lindung? Laban kitai bisi bala munsuh ti kering ke deka ngemediska kitai. Sapa bala munsuh nya? Ari ni penatai sida? Baka ni sida nguji ngemediska kitai? Kena nyaut tanya tu, aram kitai meda utai ke nyadi enda lama pengudah Adam seduai Hawa ditempa.

7. Nama digaga mensia ketegal udah ditipu Sitan?

⁷ Ba Pelajar 3, kitai udah belajar pasal seiku melikat ke angkat ngelaban Petara sereta deka merintah atas orang bukai. Bup Kudus ngumbai iya, Antu Sitan. (Pemandang 12:9) Sitan mega deka mensia angkat  ngelaban Petara. Sitan mujur nipu Hawa, lalu kenyau ari nya, iya udah nipu mayuh mensia. Taja pia, sekeda mensia baka Abel, Enok, sereta Noah, mengkang tetap ati ngagai Jehovah.—Hebrew 11:4, 5, 7.

8. (a) Baka ni sekeda bala melikat nyadi antu? (b) Nama digaga sida ngambika selamat maya Bah Besai?

⁸ Maya jeman Noah, sekeda bala melikat ngelaban Petara lalu ninggalka rumah sida ti di serega ngambika ulih nyadi mensia sereta diau ba dunya. Nama kebuah? Bup Kudus madahka, sida deka ngembuan bini. (Bacha Pemungkal 6:2.) Tang sida enda tau ngembuan bini. (Jude 6) Baka bala melikat ke jai nya, mayuh mensia maya nya nyadi jai sereta mangah. Jehovah udah nya berunding deka ngemunaska mensia ke jai enggau ngampuhka serata dunya. Tang Iya nyelamatka nembiak Iya ke tetap ati. (Pemungkal 7:17, 23) Ngambika ulih selamat, bala melikat ke jai nya pulai ke serega. Bup Kudus ngumbai sida nya bala antu. Sida milih deka enggau Sitan ngelaban Jehovah, lalu Sitan nyadi pemerintah sida.—Matthew 9:34.

9. (a) Nama nyadi ngagai bala antu lebuh sida pulai ke serega? (b) Nama deka dipelajarka kitai udah tu?

⁹ Ketegal bala antu nya ngelaban, Jehovah enda nerima sida pulai baru ngagai ruang bilik Iya. (2 Peter 2:4) Bala antu enda ulih agi berubah nyadi mensia, tang sida agi “nipu semua dunya.” (Pemandang 12:9; 1 John 5:19) Aram kitai beratika chara sida ulih nipu, tauka nesatka, mayuh orang.—Bacha 2 Korint 2:11.

10. Baka ni bala antu nipu orang?

¹⁰ Bala antu nipu orang ngena mayuh chara. Mayuh orang ngiga bala dukun, orang ke tau keramat, sereta  bala manang. Lalu sida tu orang ke bejaku enggau bala antu. Tang Bup Kudus ngasuh kitai nyeliah ari sebarang pengawa ke bekaul enggau bala antu. (Galatia 5:19-21) Nama kebuah? Baka pengasu ke ngena panjuk nangkap jelu, bala antu ngena pengawa nipu manjuk sereta bekuasa atas orang.—Peda Nota Penutup 26.

11. Nama reti nujum, lalu nama kebuah kitai patut nyeliahka iya?

¹¹ Siti chara dikena sida nipu nya dikumbai nujum. Pengawa tu ngena kuasa ari bala antu ngambika nemu pasal jemah ila tauka utai ti enda ditemu. Orang engka nguji pengawa belian, beburung, tauka meda tapa jari. Mayuh orang ngumbai pengawa tu enda ngachau, tang tu enda amat. Pengawa tu tau nganu. Ngambika chunto, Bup Kudus nunjukka, bala antu sereta orang ke nujum sama bekereja enggau pangan diri. Ba Kereja Rasul 16:16-18, kitai macha pasal seiku “antu” ti ngasuh seiku indu nemu ngereja “pengawa nujum.” Pengudah rasul Paul muru antu nya, indu nya enda ulih nujum agi.

12. (a) Nama kebuah nguji deka bejaku enggau orang ke udah mati tau nganu? (b) Nama kebuah nembiak Petara enda enggau sebarang adat ke bekaul enggau bala antu?

¹² Bala antu ngena siti agi chara nipu orang. Sida nguji ngasuh kitai pechaya, kitai ulih bejaku enggau orang ke udah mati, lalu orang ke udah mati agi idup ba endur bukai sereta ulih bejaku enggau kitai tauka ngemediska kitai. Ngambika chunto, orang ke udah mati pangan tauka kaban belayan engka ngiga manang ke ulih bejaku enggau orang ke udah mati. Manang nya engka madahka utai ti ngerinduka ati pasal pangan tauka kaban belayan ke udah mati, lalu indah nunda bunyi nyawa orang ke udah mati. (1 Samuel 28:3-19) Kitai engka ngumbai diri bejaku enggau orang ke udah mati,  tang kebendar, kitai bejaku enggau bala antu. Mayuh adat nguburka orang ke udah mati baka gawai antu, meri pemakai ngagai orang ke udah mati, tauka nanam baya sama enggau orang ke udah mati digaga ketegal pechayaka orang ke udah mati agi idup ba endur bukai. Lebuh orang Kristian enggai enggau pengawa tu, diri sebilik tauka orang ke sama kampung engka ngutuk, bejai, tauka enggai begulai enggau sida. Tang orang Kristian nemu, orang ke udah mati enda idup ba endur bukai. Kitai enda ulih bejaku enggau sida, lalu sida enda ulih ngemediska kitai. (Masmur 115:17) Bejimat meh. Anang nguji deka bejaku enggau orang ke udah mati tauka enggau bala antu, lalu anang enggau sebarang adat ke bekaul enggau bala antu.—Bacha Ulang Adat 18:10, 11; Isaiah 8:19.

13. Nama ulih digaga orang ke kala takutka bala antu?

¹³ Bala antu ukai semina nipu orang, tang mega ngenakutka sida. Kemaya hari tu, Sitan enggau bala antu iya nemu “timpuh diri nyau deka abis” sebedau Petara muai sida ari dunya, nya alai sida balat agi mangah sereta jai ari ke udah. (Pemandang 12:12, 17) Taja pia, beribu iku orang ke kala takutka bala antu, diatu enda agi takutka sida. Baka ni sida ulih ngelepaska diri ari takutka bala antu?

14. Baka orang Kristian ba abad keterubah, baka ni kitai ulih ngelepaska diri ari bala antu?

¹⁴ Bup Kudus madahka chara ngelaban bala antu sereta chara ngelepaska diri ari sida. Ngambika chunto, sekeda orang di nengeri Epesus bejaku enggau bala antu sebedau sida belajarka pemendar. Baka ni sida  ngelepaska diri? Bup Kudus madahka: “Mayuh manang datai mai bup sida, lalu nunu bup nya di mua orang mayuh.” (Kereja Rasul 19:19) Ketegal sida deka nyadi orang Kristian, sida ngerusak semua bup ke dikena sida bemanang. Kitai mega patut ngereja utai ti sama kemaya hari tu. Semua orang ke deka nyembah Jehovah patut muai sereta ngerusak semua utai ke bekaul enggau bala antu. Tu nyengkaum bup, majalah, horoskop, cherita wayang, musik, main, sereta poster ke bekaul enggau magik, tauka bala antu ti baka ke ngagitka ati tauka enda ngemediska. Tu mega nyengkaum utai ke dikena orang nyaga diri ari antu tauka pengawa bemanang.—1 Korint 10:21.

15. Nama agi patut digaga kitai kena ngelaban Sitan enggau bala antu?

¹⁵ Beberapa taun pengudah orang di Epesus ngerusak bup ke bekaul enggau pengawa bemanang, rasul Paul madahka sida agi “beperang ngelaban” sereta “ngelaban kuasa roh ti jai.” (Epesus 6:12) Amat, taja pan sida udah nunu bup sida, tang bala antu agi nguji deka ngemediska sida. Nya alai, nama agi patut digaga sida? Paul ngasuh sida: “Ambi pengarap nyadika terabai kena kita madamka [tauka, nagang] semua laja ti beapi-api ti ditimbakka Sitan.” (Epesus 6:16) Baka terabai ke ngelindung soldadu lebuh beperang, pengarap ulih ngelindung kitai. Enti kitai amat arapka Jehovah ulih nyaga kitai, kitai ulih ngelaban Sitan enggau bala antu.—Matthew 17:20.

16. Baka ni kitai ulih ngeringka agi pengarap ba Jehovah?

¹⁶ Baka ni kitai ulih ngeringka agi pengarap kitai ba Jehovah? Kitai patut macha Bup Kudus ninting hari, lalu belajar bepanggai ba Iya ngambika nyaga kitai. Enti  kitai amat arapka Jehovah, Sitan enggau bala antu enda ulih ngemediska kitai.—1 John 5:5.

17. Nama agi ulih nyaga kitai ari bala antu?

¹⁷ Nama agi patut digaga orang Kristian di Epesus? Sida diau ba nengeri ke penuh enggau pengawa ke bekaul enggau bala antu. Nya alai Paul ngasuh sida: “Terus besampi tiap kali bisi peluang.” (Epesus 6:18, NW) Sida patut minta Jehovah seruran nyaga sida. Baka ni enggau kitai? Kitai mega diau ba dunya ke penuh enggau pengawa ke bekaul enggau bala antu. Nya alai kitai mega patut minta Jehovah nyaga kitai, lalu kitai patut ngena nama Iya lebuh besampi. (Bacha Jaku Dalam 18:10.) Enti kitai enda ngetu minta Jehovah ngelepaska kitai ari Sitan, Jehovah deka nyaut sampi kitai.—Masmur 145:19; Matthew 6:13.

18, 19. (a) Baka ni kitai ulih menang ngelaban Sitan enggau bala antu? (b) Nama tanya ti deka disaut kitai pengudah pelajar tu?

¹⁸ Enti kitai muai semua utai ke bekaul enggau bala antu sereta bepanggai ba Jehovah ngambika nyaga kitai, kitai ulih ngelaban Sitan enggau bala antu. Kitai tau enda ibuh takutka sida. (Bacha James 4:7, 8.) Jehovah kering agi ari bala antu. Iya ngukum sida maya jeman Noah, lalu jemah ila Iya deka ngemunaska sida. (Jude 6) Anang enda ingat, kitai enda kediri ngelaban Sitan enggau bala antu. Jehovah ngena bala melikat Iya nyaga kitai. (2 Raja 6:15-17) Kitai pechaya, enggau saup ari Jehovah, kitai ulih menang ngelaban Sitan enggau bala antu.—1 Peter 5:6, 7; 2 Peter 2:9.

¹⁹ Tang enti Sitan enggau bala antu ngasuh mayuh pemerinsa nyadi, nama kebuah Petara bedau agi ngemunaska sida? Tanya tu deka disaut pengudah pelajar tu.