1. Ngatta gigiammuattam i meyannung ta anghel ira?

 KAYÀ ni Jehova nga makilala tam i familiana. Parte na familia na Dios i anghel ira. Ta Biblia, nagalan ira nga “ána na Dios.” (Job 38:7) Anni i kukukuan na anghel ira? Kunnasida inuffunan i totolay ta nappasa? Moffunadda kari ittam sangawe?​—Innan i Endnote 8.

2. Sinni i namaratu ta anghel ira? Piga nga anghel i naparatu?

² Mawag tam mammuan nu sinni i namaratu ta anghel ira. Kagian nittam na Colosas 1:16 nga kabalin nga pinaratu ni Jehova si Jesus, “naparo ngamin i ganna-gannug nga egga ta langi tuange ta utun na davvun.” Nelagum tatun i anghel ira. Piga nga anghel i naparatu? Kagian na Biblia nga ginatu nga million i bilang na anghel.​—Salmo 103:20; Nepakannammu 5:11.

3. Anni i kagian nittam na Job 38:4-7 meyannung ta anghel ira?

³ Ituddu paga na Biblia nittam nga pinaratu ni Jehova i anghel ira nigena pinaratu i davvun. Anni i natagenoda turi ta nasingadda i davvun? Kagian na libru na Job nga magayayya ira. Parte ira na madukko nga familia nga massesserbi kani Jehova.​—Job 38:4-7.

4. Ngatta ammu tam nga interesadu i anghel ira ta totolay?

⁴ Kanayun nga interesadu i anghel ira ta totolay anna ta gakkag ni Jehova para ta davvun anna ta totolay. (Proverbio 8:30, 31; 1 Pedro 1:11, 12) Siguradu nga kuruga narraddam ira turi ta narrebelde da Adan anni Eva. Ngem mas paga i daddamda sangawe ta pakasingadda nga mas aru ta totolay i ari manguru-kurug kani Jehova. Ngem nu  egga i mabbabawi anna manoli ta Dios, magaya-ayayya i anghel ira. (Lucas 15:10) Talaga interesadu ira turi ira ta massesserbi ta Dios. Usu-usan ni Jehova i anghel ira tapenu uffunan anna protektan i aripanna ira ta davvun. (Hebreo 1:7, 14) Innattam i karuan nga angngarigan.

5. Kunnasi inuffunan na anghel ira i aripan ira na Dios ta ollu tiempo?

⁵ Naddog si Jehova tu dua nga anghel nga manguffun  kani Lot anna ta familiana tapenu mepaliag ta kadaral na siudad na Sodoma anna Gomora. (Genesis 19:15, 16) Ginatu nga ragun i nappasa, netabbo si profeta Daniel ta avvu na leon ira, ngem awan tu nesimmu nisa, megafu ta ‘zinog na Dios i anghelna nga nanerra ta simu na leon ira.’ (Daniel 6:22) Turi ta nefuku si apostol Pedro, naddog si Jehova tu tadday nga anghel tapenu palawanan yayya. (Kingngua 12:6-11) Inuffunan gapa na anghel ira si Jesus ta keggana taw ta davvun. Angngariganna, kabalinna nabawtisowan, “nasserbi sa i anghel ira.” (Marcos 1:13) Turi ta aranni ngana i kapatay ni Jesus, tadday nga anghel i “namasikan ta nono na.”​—Lucas 22:43.

6. (a) Ngatta ammu tam nga uuffunan na anghel ira danuri aripan na Dios sangawe? (b) Anni ira nga pakkiavu i tabbagattam?

⁶ Ari ngana mappasingan sangawe i anghel ira ta totolay. Ngem usu-usan lagapa ira na Dios tapenu uffunan danuri aripanna. Kagian na Biblia: “Tangngallan na anghel danuri i mangikakua ta YAFU, anna paliaran na ira ta ngamin nga peligro.” (Salmo 34:7) Ngatta mawag tam i proteksion? Megafu ta egga ira i makapangngua nga kalabattam nga kayàda ittam takitan. Sinni ira? Naggafuadda? Kunnasida ittam purueban nga takitan? Tapenu matabbag danatun, innattam nu anni i nesimmu ari nabbayag kabalin nga naparatu da Adan anni Eva.

7. Kunnasi kakaru i nelogo ni Satanas?

⁷ Nagigiammu tam ta Kapitulo 3 nga egga i anghel nga narrebelde ta Dios anna kayàna nga pammagurayan i totolay. Ngaganan yayya na Biblia tu Demonio onu Satanas nga Diablo. (Nepakannammu 12:9) Kayà ni Satanas nga marrebelde gapa ta Dios i tanakuan. Nilogona si Eva anna namegafu tatun, magaru ta totolay i nelogona. Ngem,  egga karuan nga nattalupaddian nga matalo kani Jehova, gitta da Abel, Abraham, anni Noe.​—Hebreo 11:4, 7, 8.

8. (a) Kunnasi nabbalin tu demonio i karuan nga anghel? (b) Anni i kingngua na demonio ira tapenu ari mesipo ta kadaral ta Delubio?

⁸ Ta tiempo ni Noe, narrebelde i karuan nga anghel anna nanaw ira ta paddianadda ta langi tapenu mabbalin tu tolay ta davvun. Ngatta? Kagian na Biblia nga kayàda i mangatawa. (Bibbigan i Genesis 6:2.) Ngem mali yatun. (Judas 6) Kagitta danuri marake nga anghel, aru nga totolay tatun nga tiempo i nabbalin tu marake anna vayolente. Yari tu nappadelubio si Jehova ta interu davvun tapenu daralan i marake nga totolay. Ngem nipaliagna danuri matalo. (Genesis 7:17, 23) Nanoli ta langi i marake ira nga anghel tapenu ari mesipo ta kadaral. Ta Biblia, nagalan danatun nga marake nga anghel tu demonio onu marake nga espiritu. Pinilida nga suportan i rebelyon ni Satanas, yatutta yayya ngana i prinsipe onu mammaguray nira.​—Mateo 9:34.

9. (a) Anni i nesimmu ta demonio ira turi ta nanoli ira ta langi? (b) Anni i tumunug nga gigiammuattam?

⁹ Megafu ta narrebelde i demonio ira, ari ngana ira nga inalawa uli ni Jehova ta familiana. (2 Pedro 2:4, NW ) Awan ngana tu pakapangngua na demonio ira nga mabbalin tu totolay, ngem ariadda lagapa nagimmang ta ‘panabag ta tanga-ravvunan.’ (Nepakannammu 12:9; 1 Juan 5:19) Ammuattam nu kunnasida natabag onu nelogo, i magaru.​—Bibbigan i 2 Corinto 2:11.

10. Kunnasi ilologo na demonio ira i totolay?

¹⁰ Aru i silu na demonio ira tapenu ilogo i totolay. Awayyana nga direkta nga makikomunika i totolay ira ta demonio onu gukaban na tadday nga tolay, gitta na albulariu onu mallavvun. I pakikomunika ta demonio ira ay magalan  tu demonismo onu espiritismo. Ngem, kagian nittam na Biblia nga arayyuattam i maski anni nga egga i koneksionna ta demonio ira. (Galacia 5:19-21) Ngatta? Gitta na gumangnganu nga mangusa tu silu tapenu makagafù tu aya-ayam, mangusa gapa i demonio ira tu silu tapenu ilogo anna kontrolan i totolay.​—Innan i Endnote 26.

11. Anni i pallavvun, anna ngatta lillitattam nakuan yatun?

¹¹ Tadday ta pangilogoda i pallavvun. Yatun ay i pangusa tu extraordinario nga pakapangngua tapenu lavvunan i mappange onu i gannug nga ariadda ammu. Angngariganna, innadda i posision na biti-bitun, magaleg ira tu senial, mabbibbig ira tu baraha (tarot card), mangusa tu bola nga kristal, onu magipalag. Aru i mangurug nga awan tu dake danatun, ngem ta kakuruganna kuruga delikadu danatun. Angngariganna, ipasingan na Biblia nga makka-uffu-uffun i demonio ira anna danuri mallavvun. Mabibbig tam ta Kingngua 16:16-18 i meyannung ta “sinallungan na marakay nga espiritu” nga babay tapenu “mallavva-lavvun.” Turi ta pinalawan ni apostol Pablo i demonio, ari ngana makapallavvun yatun nga babay.

12. (a) Ngatta delikadu nu purueban nga makibbida ta natay? (b) Ngatta ari vuluvuga nga makiparte i aripan ira na Dios ta makademonio ira nga kostumbre?

¹² Usan paga na demonio i tadday nga silu tapenu ilogo i totolay. Kayàda nga mangurug ittam nga posible nga makibbida ta natay anna danuri natay ngana ay sigga-matolay ta tanakuan nga mundo anna puede nga makibbida nittam onu matakitadda ittam. Angngariganna, awayyana nga makiyoffun i tadday nga natayan tu kofun onu kafamilia ta tadday nga tolay, gitta na espiritista, nga makkakkagi nga makibbidana i natay. Awayyana nga makkagi yatun tu interesante nga detalye meyannung ta natay nga kofun onu kafamilia anna mapariganna  paga i boses na natay. (1 Samuel 28:3-19) Aru gapa nga kostumbre para ta natay i nebase ta pangurug nga sigga-matolay i natay ta tanakuan nga mundo. Nelagum taw danuri selebrasion nige onu kabalin na tanam, anibersario na patay, pattunnag ta natay, ritual ira ta paddaddam na nabalu, onu karuan paga nga kostumbre ta ketarag na natay. Nu panakitan na Cristiano nga makiparte ta kunnaw ira nga kostumbre, awayyana nga kuestionan ira na kalugarda onu kafamilia, insultuadda ira, onu ifuerada ira. Ngem ammu na Cristiano ira nga ari tu sigga-matolay ta tanakuan nga mundo i natay ira. Imposible nga makibbida tam ira, anna ariadda ittam matakitan. (Salmo 115:17) Magimmugug ka. Ariammu vuluvuga purueban nga makibbida ta natay onu ta demonio ira anna ari vuluvuga nga makiparte ta makademonio ira nga kostumbre.​—Bibbigan i Deuteronomio 18:10, 11; Isaias 8:19.

13. Anni i nakua na aru nga dati nga maganassing ta demonio?

¹³ Ari laman nga ilogo na demonio ira i totolay, nu ari, ananassingadda paga ira. Ammu ni Satanas anna na demoniona ira nga ‘pigo ngana laman i nabattang nga tiempoda’ nige ira pawanan na Dios ta davvun, yari tu mas ngana nga vayolente anna agresibo ira. (Nepakannammu 12:12, 17) Ngem, rinivu nga totolay nga dati nga maganassing ta demonio ira i ari ngana nga maganassing sangawe. Kunnasida nalabanan i assing ta demonio ira?

14. Kagitta na Cristiano ira ta ollu-siglo, kunnasi ittam makapanaw ta influwensia na demonio ira?

¹⁴ Ituddu na Biblia nittam nu kunnasi labanan i demonio ira anna makapanaw ta influwensiada. Angngariganna, makikomunika ta demonio ira i karuan nga taga-Efeso nigeda nagigiammu i kinakurug. Kunnasi ira  nakapanaw ta influwensiada? Kagian na Biblia: “Napakaru turi ta salamangkeru ira i nangiyangay ta libru da ira ay pinattaradday da ira anna sinuggi da.” (Kingngua 19:19) Megafu ta kayàda mabbalin tu Cristiano, zinaralda i ngamin nga libru meyannung ta mahika. Kunnatun gapa i aksion nga mawag nga kuan danuri maya nga masserbi kani Jehova. Mawagda nga daralan i maski anni nga gannug nga konektadu ta demonio ira. Nelagum taw danuri libru, magazina, horoscope, pelikula, musika, gayam ira, anna maski letratu ira nga mamalawan nga awan tu marake ta mahika, demonio, onu ta misterioso ira nga gannug. Kasali gapa taw danuri iyusa na totolay tapenu protektan i baggida kontra ta marake, gitta na anting-anting onu pampasuerte.​—1 Corinto 10:21.

15. Anni paga i mawag nga kuan tapenu malabanan si Satanas anna i demoniona ira?

¹⁵ Piga dagun i nappasa kabalin nga zinaral na taga-Efeso i libruda meyannung ta mahika, nitura ni apostol Pablo nga mawagda lagapa nga ‘arubangan’ anna labanan “i marakay ira nga espiritu.” (Efeso 6:12) Wan, maski paga sinuggida ngana i libruda ira, puru-purueban lagapa na demonio ira nga takitan ira. Anni paga gafu i mawagda nga kuan? Kinagi ni Pablo nira: “Ilanno nu paga taw ira i angngurug tu kunna kalatag anna pangaddo nu [onu, pamagimmang] ta ngamin nga umafa-afi nga pana na Demonio.” (Efeso 6:16) Nu kunnasi nga protektan na kalatag i suddalu ta gerra, protektan ittam gapa na pangurug tam. Nu buu i pattalo tam nga protektan ittam ni Jehova, malabanattam si Satanas anna i demonio ira.​—Mateo 17:20.

16. Kunnasi tam mas mapaladda i pangurug tam kani Jehova?

¹⁶ Kunnasi tam mas mapaladda i pangurug tam kani Jehova? Mawag nga inaggaw tam nga bibbigan i Biblia anna mattalo nisa nga protektanna ittam. Nu masikan i  komfiansa tam kani Jehova, ari ittam vuluvuga nga matakitan ni Satanas anna na demonio ira.​—1 Juan 5:5.

17. Anni paga i mapprotekta nittam kontra ta demonio ira?

¹⁷ Anni paga i mawag nga kuan na Cristiano ira ta Efeso? Maddian ira ta siudad nga napannu tu demonismo. Yari tu kinagi ni Pablo nira: “Makimallo kamu ta maski anni nga tiempo.” (Efeso 6:18) Mawagda nga makkiddaw kani Jehova tu proteksion ta ngamin nga tiempo. Kunnasi ittam gapa? Mattolay ittam gapa ta mundo nga napannu tu demonismo. Yari tu mawag tam makkiddaw tu proteksion kani Jehova, anna mawag tam usan i ngaganna nu makimallo ittam. (Bibbigan i Proverbio 18:10.) Nu ariattam magimmang makimallo kani Jehova nga ilillina ittam kani Satanas, tabbaganna i pakimallo tam ira.​—Salmo 145:19; Mateo 6:13.

18, 19. (a) Kunnasi ittam makapavviktoria ta labattam kontra kani Satanas anna ta demonio ira? (b) Anni nga pakkiavu i matabbag ta tumunug nga kapitulo?

¹⁸ Nu alsattam i ngamin nga gannug ta pattoletam nga konektadu ta demonismo anna mattalo nga protektan ittam ni Jehova, malabanattam si Satanas anna i demonio ira. Awan tu rason nga ikassittam ira. (Bibbigan i Santiago 4:7, 8.) Mas makapangngua si Jehova anne ta demonio ira. Kinastiguna ira ta tiempo ni Noe, anna daralanna ira ta mappange. (Judas 6) Daddamman nga ari ittam magitetadday nga makillaban. Usan ni Jehova i anghelna ira tapenu protektan ittam. (2 Patul Ira 6:15-17) Makapakkomfiansa ittam nga gukaban na uffun ni Jehova, makapavviktoria ittam ta labattam kontra kani Satanas anna ta demonio ira.​—1 Pedro 5:6, 7; 2 Pedro 2:9.

¹⁹ Nu grabe nga ziga i palattuagan ni Satanas anna na demonio ira, ngatta ari pagalaman ira nga zinaral na Dios? Matabbag yatun nga pakkiavu ta tumunug nga kapitulo.