1. МелыІычхэм теухуа пэжыр щІэтщІэн хуейр сыт?

ИЕГОВЭ хуейщ мелыІычхэм теухуауэ пэжыр тщІэну, сыт щхьэкІэ жыпІэмэ ахэр абы и унагъуэщ. Библиер мелыІычхэм «Алыхьым и къуэкІэ» йоджэ (Иов 38:7). Сыт мелыІычхэм ящІэр? ЦІыхухэм ахэр ядэІэпыкъуу пІэрэ? Дэ къыддэІэпыкъуфыну пІэрэ ахэр? (8-нэ Приложением еплъ.)

2. Хэт мелыІычхэр къэзыгъэщІар икІи дапщэ ахэр зэрыхъур?

² Хэт мелыІычхэр къэзыгъэщІар? Колоссэ 1:16 зэрыжиІэмкІэ, Иеговэ Хьисэ къигъэщІа иужь, «уафэми щІылъэми щыІэ псори» къигъэщІащ, мелыІычхэри абы хэту. Дапщэ ахэр зэрыхъур? Библием жеІэ мелыІычхэр мелуан бжыгъэ куэд хъууэ (Псалом 103:20; Апокалипсис 5:11).

3. Иов 38:4—7 мелыІычхэм теухуауэ сыт къыщытщІэр?

³ Алыхьым щІыр къигъэщІын ипэ мелыІычхэр къигъэщІащ. Иов тхылъым къызэриІуатэмкІэ, мелыІычхэр егъэлеяуэ гуфІэт Иеговэ щІыр зэриухуэр щалъагъум. А зэманым мелыІычхэр зы унагъуэм хуэдэу зэкъуэтт икІи ахэр псори Иеговэ хуэлажьэт (Иов 38:4—7).

4. Сыт къэзыгъэлъагъуэр мелыІычхэм цІыхухэр къазэрыфІэІуэхур?

⁴ МелыІычхэм цІыхухэм я гъащІэр къафІэмыІуэхуу зэи щытакъым. Абыхэм сыт щыгъуи яфІэгъэщІэгъуэнт  щІылъэмрэ цІыхухэмрэ теухуауэ Иеговэ иІэ мурадыр (Притчи 8:30, 31; 1 Петр 1:11, 12). МелыІычхэм, дауикІ, я жагъуэ хъуащ Іэдэмрэ Хьэуарэ Алыхьым зэрыпэщІэувар. Ахэр нэхъ Іеижу егъэнэщхъей нобэ цІыхухэм я нэхъыбэр Алыхьым зэремыдаІуэм. Аращ мелыІычхэр щІэгуфІэр цІыху гуэрым гуэныхь щІэныр къигъанэу Алыхьым и гъуэгум щытеувэм деж (Лука 15:10). Псом хуэмыдэу мелыІычхэм гулъытэ зыхуащІыр Алыхьым и лэжьакІуэхэращ. Иеговэ и лэжьакІуэхэм ядэІэпыкъун икІи къихъумэн папщІэ мелыІычхэр яхуегъакІуэ (Еврейхэм 1:7, 14). Щапхъэ зыбжанэ зэпкърытхынщ.

5. Пасэм псэуа Алыхьым и лэжьакІуэхэм дауэ мелыІычхэр къадэІэпыкъуу зэрыщытар?

⁵ Иеговэ Содомрэ Іаморэрэ игъэкІуэдыну мурад ищІат. Ауэ ЛутІрэ абы и унагъуэмрэ хэмыкІуэдэн щхьэкІэ, Иеговэ мелыІычитІ дэІэпыкъуэгъуу абыхэм яхуигъэкІуащ (ЩІэдзапІэ 19:15, 16). Бегъымбар Даниил аслъэнхэр зэрыс мащэм щрадзам щыгъуэ, «Алыхьым и мелыІычыр къигъакІуэри аслъэнхэм я жьэр зэщІипІащ». Апхуэдэу Даниил къелащ (Даниил 6:22). Апостол Петр тутнакъым къришыжын щхьэкІэ, Иеговэ абы мелыІыч къыхуигъэкІуат (Апостолхэм 12:6—11). Хьиси мелыІычхэр къыдэІэпыкъут, ар щІылъэм щыщыІам щыгъуэ. Псалъэм папщІэ, абы псым зыщІигъэуа иужь, «мелыІычхэми Іуэхутхьэбзэ къыхуащІэ хъуащ» (Марк 1:13). Абы нэмыщІ Хьисэ щаукІыну дыдэм ипэ къихуэу «къару къритыну и пащхьэм къихутащ» зы мелыІыч (Лука 22:43).

6. 1) Дэнэ дэ щытщІэр мелыІычхэр къызэрыддэІэпыкъур? 2) АдэкІэ сыт хуэдэ упщІэхэм я жэуапхэр къэтщІэну?

⁶ Дэ нобэ мелыІычхэр тлъагъукъым. Ауэ япэм  хуэдэу Алыхьым ахэр къегъэсэбэп къыддэІэпыкъун щхьэкІэ. Библием щыжыІащ: «Иеговэ и мелыІычым Алыхь фІэлІыкІ зиІэхэр къехъумэ икІи ахэр кърегъэл» (Псалом 34:7). МелыІычхэм дыкъахъумэным сыт дыщІыхуэныкъуэр? Ди бийхэр къарууфІэщ икІи бзаджэщи аращ. Хэт хъуну ахэр? Дэнэ ахэр къыздикІар? Зэран къытхуэхъун щхьэкІэ сыт абыхэм ящІэр? Мы упщІэхэм я жэуапхэр къэдгъуэтын папщІэ, Алыхьым  Іэдэмрэ Хьэуарэ къигъэщІа иужь къэхъуа Іуэхугъуэхэр дигу къэдгъэкІыжынщ.

7. Иблисым и ягъэкІэ сыт цІыхухэм ящІар?

⁷ Мы тхылъым, 3-нэ псалъащхьэм къыщытщІащ зы мелыІычыр тепщэныгъэм хуэнэпсейуэ Алыхьым зэрыпэщІэувар. Библиер абы ШейтІан ИблискІэ йоджэ (Апокалипсис 12:9). Иблисыр хуейт цІыхухэри Алыхьым пэщІэувэну. ШейтІаным къигъэпцІэфащ Хьэуаи абы къытехъукІа цІыхухэм я нэхъыбэри. Ауэ языныкъуэхэр Иеговэ хуэпэжу къэнащ, псалъэм папщІэ, Хьэбэл, Еныху, Нухь сымэ (Еврейхэм 11:4, 5, 7).

8. 1) Дауэ языныкъуэ мелыІычхэр жин бзаджэ зэрыхъуар? 2) Псыдзэшхуэм хэмыкІуэдэн щхьэкІэ сыт абыхэм ящІар?

⁸ Нухь и зэманым щыгъуэ языныкъуэ мелыІычхэри Алыхьым пэщІэуващ. Уафэр къагъанэри ахэр щІылъэм къехащ. А мелыІычхэм цІыхухъу Іэпкълъэпкъ къащтащ, цІыхубзхэр щхьэгъусэ ящІын папщІэ. (Къеджэ ЩІэдзапІэ 6:2.) Ауэ мелыІычхэм апхуэдэ ящІэ хъунутэкъым (Иудэ 6). А зэманым псэуахэр а мелыІычхэм дэплъейуэ щІадзэри, хабзэншагъэ зезыхьэ цІыху гущІэгъуншэ хъуащ. Абы щхьэкІэ Иеговэ унафэ ищІащ цІыху Іейхэр псыдзэм хигъэкІуэдэну, ауэ езым хуэпэжхэр къригъэлыну (ЩІэдзапІэ 7:17, 23). А Псыдзэшхуэм хэмыкІуэдэн щхьэкІэ, мелыІыч бзаджэхэм уафэм ягъэзэжын хуей хъуащ. Библиер а мелыІычхэм жин бзаджэкІэ йоджэ. Жин бзаджэхэм ШейтІаным и лъэныкъуэр яубыдащ. Апхуэдэу, Иблисыр абыхэм я пашэ хъуащ (Маттэ 9:34).

9. 1) Уафэм дэкІуеижа жин бзаджэхэм сыт къащыщІар? 2) КъыкІэлъыкІуэ абзацхэм сыт къыщытщІэнур?

 ⁹ Иеговэ зыкъэзыІэта мелыІычхэр и унагъуэм афІэкІа хигъэхьэжакъым (2 Петр 2:4). Жин бзаджэхэм нобэ цІыху Іэпкълъэпкъ къамыщтэфми, абыхэм «щІылъэм тет цІыху псори» къагъапцІэ (Апокалипсис 12:9; 1 Иуан 5:19). Апхуэдиз цІыху къагъэпцІэн щхьэкІэ абыхэм сыт ящІэми къыкІэлъыкІуэ абзацхэм къыщытщІэнщ. (Къеджэ 2 Коринф 2:11.)

10. ЦІыхухэр «къаубыдын», е нэгъуэщІу жыпІэмэ къагъэпцІэн щхьэкІэ, жин бзаджэхэм сыт ящІэр?

¹⁰ Языныкъуэ цІыхухэм езыхэм жин бзаджэхэм зыпащІэ е абыхэм зыпащІэн щхьэкІэ Іэзэхэм я деж макІуэ. ЦІыхумрэ жин бзаджэхэмрэ зэпыщІа щыхъум деж, абы Іэзэгъуазэ ІуэхукІэ йоджэ. Библием зэрыжиІэмкІэ, жин бзаджэхэм пыщІа Іуэхугъуэхэм гъунэгъу захуэтщІ хъунукъым (Галатие 5:19—21). Сыт щхьэкІэ? Ар ШейтІаным и къапхъэнщ. ЩакІуэм псэущхьэр къиубыдын щхьэкІэ Іэмал зэмылІэужьыгъуэхэр къызэригъэсэбэпым хуэдэу, жин бзаджэхэми цІыхухэр «къаубыдын» папщІэ Іэмал куэд къагъэсэбэп. (26-нэ Приложением еплъ.)

11. Іэзэ гъэплъэным сыт хыхьэр икІи Іэзэ бгъаплъэ щІэмыхъунур сыт?

¹¹ Жин бзаджэхэм цІыхухэр къызэрагъапцІэ Іэмалхэм ящыщ зыщ Іэзэ гъэплъэныр. Сыт Іэзэ щІагъаплъэр? КъэкІуэным е нэгъуэщІ Іуэхугъуэ гуэрым теухуауэ къащІэн щхьэкІэ. Дауэ Іэзэр зэрыплъэр? Языныкъуэхэр вагъуэхэм е нэгъуэщІ нэщэнэхэм йоплъ. Хэти куэзыр едз, хэти абдж хъурейм е Іэгум  йоплъэ. Куэдым я гугъэщ апхуэдэ Іуэхухэм шынагъэ пымылъу, ауэ ар пэжкъым. Библием ит щапхъэхэм къагъэлъагъуэ Іэзэхэр жин бзаджэхэм зэрыпыщІар. Псалъэм папщІэ, Апостолхэм 16:16—18 и гугъу ящІ жин бзаджэм и къарукІэ къэкІуэным теухуауэ жызыІэу щыта хъыджэбз гуэрым. Апостол Паул абы жин бзаджэр къызэрыхихуу, а хъыджэбзым и къарур занщІэу фІэкІуэдащ.

12. 1) ЛІам зыпыпщІэну иужь уихьэ щІэмыхъунур сыт? 2) ЛІар зэрыщІалъхьэм пыщІа хабзэ куэдым Иеговэ и лэжьакІуэхэр щІыхэмытыр сыт?

¹² Жин бзаджэхэм цІыхухэр къызэрагъапцІэ Іэмалхэм иджыри хохьэ лІам епсэлъэныр. Абыхэм цІыхухэм я фІэщ ящІыну хуейщ лІахэр нэгъуэщІыпІэ щыпсэууэ, ахэр дэ къыдэпсэлъэфын е зэран къытхуэхъуфын хуэдэу. Зи благъэ е зи ныбжьэгъу зыфІэкІуэдам лІахэм епсэлъэфу жызыІэ цІыхум зыщыхуигъазэ къохъу. ЛІам теухуауэ Іэзэм зыгуэр жиІэжыфынущ е абы и макъкІэ къэпсэлъэфынущ (1 Самуила 28:3—19). Абы нэмыщІ лІар зыщІыпІэ щыпсэууэ зэрагугъэм тегъэщІащ хьэдэ щІэлъхьэным пыщІа хабзэ куэдыр. Абы хохьэ хьэдэІус къехьэкІыныр, лІам зыгуэр хуэщІэныр икІи хьэдэр щыдахкІэ къекІуэкІ хабзэхэр. А хабзэ псори къызыбгъэдэкІыр жин бзаджэхэращ. Иеговэ и лэжьакІуэр апхуэдэ хабзэхэм зэрытемытым щхьэкІэ, и благъэхэмрэ и гъунэгъухэмрэ ар ягъэкъуэншэнкІэ е псалъэ жагъуэ абы къыжраІэнкІэ хъунущ. Языныкъуэхэми абы епсэлъэн щыщагъэт къохъу. Ауэ Хьисэ и лъэужь ирикІуэхэм ящІэ лІар зыщІыпІи зэрыщымыпсэур, абы зэрызыпумыщІэфынур икІи ар зыкІи зэран  къызэрыпхуэмыхъуфынур (Псалом 115:17). Аращи, сыт щыгъуи сакъ — лІам зыпыпщІэну иужь уимыхьэ икІи жин бзаджэхэм къабгъэдэкІ хабзэхэм зэи ухэмыт. (Къеджэ Второзаконие 18:10, 11; Исаия 8:19.)

13. Япэм жин бзаджэхэм щышынэу щытахэм сыт яхузэфІэкІар?

¹³ Жин бзаджэхэм цІыхухэр къызэрагъапцІэм нэмыщІ, шынэр я гум илъу ягъэпсэу. ШейтІанымрэ жин бзаджэхэмрэ Алыхьым щигъэкІуэдыжыну махуэр нэхъ гъунэгъу хъуху, ахэр нэхъ бзаджэ, нэхъ губжьа мэхъу (Апокалипсис 12:12, 17). Ауэ жин бзаджэхэм ящышынэу щыта цІыху куэдыр абыхэм ящышынэжкъым. Дауэ ар яхузэфІэкІа абыхэм?

14. Ефес къалэм дэсахэм щапхъэ тепхыу, жин бзаджэхэм я лъабжьэ дауэ укъызэрыщІэкІыфынур?

¹⁴ Жин бзаджэхэм дакъыІэщІэкІын щхьэкІэ сыт тщІэн хуейми Библием къыджеІэ. Псалъэм папщІэ, Алыхьым теухуа пэжыр Ефес къалэм дэса цІыхухэм къащІэн ипэ, ахэр жин бзаджэхэм пыщІауэ зэрыщытам Библиер топсэлъыхь. Дауэ ахэр жин бзаджэхэм я лъабжьэ къызэрыщІэкІар? Апостолхэм 19:19 итщ: «Удыгъэ Іуэхум хэт цІыху куэдым я тхылъхэр зэхуахьэсри, цІыху псоми ялъагъуу ягъэсащ». Хьисэ и лъэужь иувэну зэрыхуейм къыхэкІкІэ, абыхэм удыгъэм пыщІа я тхылъхэр ягъэсащ. Ноби зыгуэр Иеговэ и лэжьакІуэ хъуну хуеймэ, Ефес къалэм дэсахэм я щапхъэм тету, жин бзаджэхэм пыщІа Іэмэпсымэ псори хыфІидзэн хуейщ. Абы хыхьэфынущ тхылъхэр, журналхэр, гороскопхэр, фильмхэр,  уэрэдхэр, видеоджэгухэр икІи сурэтхэр. Абыхэм къыпщагъэхъу удыгъэмрэ жин бзаджэхэм ягъэлъагъуэ телъыджэхэмрэ гъэщІэгъуэну икІи зэран къимыхьу. Абы нэмыщІ Іейм ущихъумэу къалъытэ Іэмэпсымэхэми зыщытхъумэн хуейщ (1 Коринф 10:21).

15. ШейтІанымрэ жин бзаджэхэмрэ дапэщІэтын щхьэкІэ сыт дэ иджыри тщІэн хуейр?

¹⁵ Ефес къалэм дэсахэм удыгъэм пыщІа я тхылъхэр зэрагъэсрэ илъэс бжыгъэ дэкІа пэтми, апостол Паул ахэр къыхуриджэрт, жин бзаджэхэр зытрамыгъакІуэу адэкІи япэщІэтыну (Ефес 6:12). Сыт щхьэкІэ? Жин бзаджэхэр абыхэм зэран яхуэхъуну иджыри иужь итт. Иеговэ и лэжьакІуэхэм сытыт иджыри ящІэн хуейр? Апостол Паул итхащ: «Абыхэм нэмыщІу, фІэщхъуныгъэр мэІуху хуэдэу къафщтэ. ШейтІаным и шабзэ плъахэр абыкІэ вгъэункІыфІын [е къэвгъэувыІэн] флъэкІынущ» (Ефес 6:16). МэІухум зауэлІыр къызэрихъумэм хуэдэу, дэри ди фІэщхъуныгъэм дыкъихъумэнущ. Дэ Иеговэ дыкъызэрихъумэнур быдэу ди фІэщ хъумэ, ШейтІанымрэ жин бзаджэхэмрэ дапэщІэтыфынущ (Маттэ 17:20).

16. Сыт ди фІэщхъуныгъэр нэхъ быдэ зыщІынур?

¹⁶ Иеговэ теухуауэ фІэщхъуныгъэ диІэр сыт нэхъ быдэ зыщІынур? Іэмал имыІэу Библием махуэ къэс деджэн икІи Иеговэ дзыхь хуэтщІу зедгъэсэн хуейщ. Абы щыгъуэ ШейтІанымрэ абы и жин бзаджэхэмрэ зэран къытхуэхъуфынукъым (1 Иуан 5:5).

17. Жин бзаджэхэм зэрызыщытхъумэн сыт хуэдэ Іэмал иджыри щыІэр?

¹⁷ Ефес къалэр Іэзэгъуазэ ІуэхукІэ гъэнщІат. Аращ  апостол Паул абы дэс Хьисэ и лъэужь ирикІуэхэм Алыхьым «сыт щыгъуи фелъэІу» жиІэу чэнджэщ щІаритар (Ефес 6:18). Жин бзаджэхэр зэран къахуэмыхъун щхьэкІэ ахэр зэпымыууэ Алыхьым тхьэлъэІукІэ зыхуагъэзэн хуейт. Дэри ІэзэгъуазэкІэ гъэнщІа дунейм дыщопсэу. Абы къыхэкІкІэ, Иеговэ и цІэр жытІэурэ тхьэлъэІукІэ зыхуэдгъэзэн хуейщ, абы дыкъихъумэн щхьэкІэ. (Къеджэ Притчи 18:10.) ШейтІаным дыщихъумэну Иеговэ делъэІумэ, абы ди тхьэлъэІум жэуап къритынущ (Псалом 145:19; Маттэ 6:13).

18, 19. 1) ШейтІанымрэ жин бзаджэхэмрэ дауэ дазэрытекІуэфынур? 2) КъыкІэлъыкІуэ псалъащхьэм сыт къыщытщІэнур?

¹⁸ Іэзэгъуазэм пыщІа псоми зыпыІуддзмэ икІи Иеговэ къызэрыддэІэпыкъунур быдэу ди фІэщ хъумэ, дэ ШейтІанымрэ жин бзаджэхэмрэ дапэщІэтыфынущ. Абыхэм дащІыщышынэн щыІэкъым. (Къеджэ Екъуб 4:7, 8.) Иеговэ жин бзаджэхэм нэхърэ куэдкІэ нэхъ къарууфІэщІ. Нухь и зэманым Алыхьым жин бзаджэхэм тезыр ятрилъхьауэ щытащ икІи куэд мыщІэу Иеговэ ахэр игъэкІуэдыжыпэнущ (Иудэ 6). Нобэ жин бзаджэхэм дапэщІэтынымкІэ Иеговэ и мелыІыч пэжхэри къыддоІэпыкъу (2 Царей 6:15—17). Быдэу уи фІэщ щІы: Иеговэ и къарукІэ ШейтІанымрэ жин бзаджэхэмрэ уатекІуэфынущ (1 Петр 5:6, 7; 2 Петр 2:9).

¹⁹ ШейтІанымрэ жин бзаджэхэмрэ апхуэдиз гуауэ цІыхухэм къыщыхуахькІэ, щхьэ Алыхьым ахэр иджыри къыздэсым имыгъэкІуэдыжарэ? Абы и жэуапыр къыкІэлъыкІуэ псалъащхьэм къыщытщІэнущ.