1. Ангеллердеңер сынны пілерге ноға кирек?

АНГЕЛЛЕР Иегованың сӧбірезінің чардығы полчалар, аннаңар Иегова олардаңар сынны кізілер пілзіннер тіп хынча. Библия ангеллерні «Худайның ооллары» тіп адапча (Иов 38:7). Ангеллер ниме итчелер? Мының алнында олар кізілерге хайди полысханнар? Олар піске полыс поларлар ба? (8 приложениені кӧріңер.)

2. Ангеллерні кем чайаан паза оларның саны нинҷе?

² Ангеллерні кем чайаан? Колосстағыларға 1:16-да Иегова Иисусты чайаан соонда, «тигірдегізі паза чирдегізі» прай чайалған тіп пазылча. Ол чайалған нимелернің аразында ангеллер дее полғаннар. Оларның саны нинҷе? Библияда чӱзер миллион ангеллер чайалған тіп чоохталча (Псалом 103:20; Азых чоох 5:11).

3. Иов 38:4—7-де ангеллердеңер ниме чоохталча?

³ Ангеллер чир чайалар алнында чайалғаннар. Иов тіп киндеде, Иегованың чирні чайапчатханын кӧріп, ангеллер ӧрінгеннер тіп пазылча. Ол туста прай ангеллер, пір сӧбіре чіли, Иеговаа нымысчыланғаннар (Иов 38:4—7).

4. Ангеллернің кізілерге полыс пирерге хынчатханнарын хайдаң пілчебіс?

⁴ Ангеллер кізілерге полызарға паза Иегованың чирдеңер паза кізілердеңер сағын салған сағызы хайди толарын піліп аларға сыбыра хынчалар (Притчи 8:30, 31; 1 Петрның 1:11, 12). Адамнаң Ева Худайға тоғырланыбысханда,  ангеллер тың ачырған парған поларлар. Пӱӱн кізілернің кӧбізі Иегованың чооғын испинчеткенін кӧріп, ангеллер уламох хомзынча поларлар. Аннаңар, кем-де пыросынып, Худайзар айланчатса, олар тың ӧрінчелер (Лука 15:10). Иеговаа пазырчатханнарға, тізең, полыс пирерге ангеллер хаҷан даа тимделер. Позының нымысчыларына полыссыннар паза оларны арачылазыннар тіп, Иегова ангеллерні ысча (Еврейлерге 1:7, 14). Нинҷе-де кӧзідім кӧр кӧреелер.

5. Пурунғыда ангеллер Худайның нымысчыларына хайди полысханнар?

 ⁵ Содом паза Гоморра тіп саарлар иңзерілер алнында, Лотха сӧбірезінең хада тизерге полыс пирзіннер тіп, Иегова ікі ангел ысхан (Бытие 19:15, 16). Даниил ухаанҷыны ала парыстар одырчатхан оймахха тастабысханнарында, «Худай позының ангелін ала парыстарның аастарын чабызарға ысхан». Аннаңар Даниилға ала парыстар теңмееннер (Даниил 6:22). Иегова Петрны харибдең сығарып аларға ангелні ысхан (Илҷілернің 12:6—11). Иисус чирде полғанда, ангеллер ағаа полысханнарох. Кӧзідімге, Иисус кіреске тӱскен соонда, «ангеллер аның алнына чӧрінгеннер» тіп пазылча (Марк 1:13). Ӧдіртер алнындағы хараада пір ангел «аның кӧңнін тыытхан» (Лука 22:43).

6. а) Ангеллер піске амғы туста полысчатханын хайдаң пілчебіс? б) Ам хайдағ сурығлар ӱзӱрербіс?

⁶ Пӱӱн ангеллер кізі хараана кӧрінминчелер. Че Худай ам даа оларнаң пастыра кізілерге полысча. Библияда «Иегованың ангелі Аннаң хорыхчатханнарны хайраллап, чуртастарын ал халча» тіп чоохталча (Псалом 34:7). Ноға ангеллерге пісті арачылирға кирек? Пістең кӱстіг паза чабал ыырҷылар піске хомай идерге кӱстенчеткен ӱчӱн. Кемнер олар? Кем оларны чайаан? Хайди олар піске хомай идерге кӱстенчелер? Пу сурығларға нандырар ӱчӱн, Худай Адамнаң Еваны чайаан соонда ниме полғанын сағысха кир кӧреелер.

7. Сайтан кізілерні, алаахтырып, нимее кӧӧктірген?

⁷ 3-ҷі пастағдаң пір ангел, пасхаларынаң устирға хынып, Худайдаң тоғыр пар сыхханын піліп алғабыс. Библия аны Сайтан алай Диавол тіп адапча (Азых чоох 12:9). Сайтан кізілерні Худайдаң тоғыр кӧдірерге кӱстеніп,  Еваны алаахтырып алған. Соонаң чирде чуртапчатхан кізілернің кӧбізін ідӧк алаахтырып алған. Андағ даа полза, пірее кізілер Иеговаа киртістіг халғаннар. Кӧзідімге, Авель, Енох паза Ной (Еврейлерге 11:4, 5, 7).

8. а) Хайди ангеллернің піреелері айналар пол парғаннар? б) Чайых тузында арачылан халар ӱчӱн, айналар ниме иткеннер?

⁸ Нойның тузында ангеллернің піреелері ідӧк Худайдаң тоғыр пар сыхханнар. Олар, тигірдегі чурттарын артыс салып, чирге тӱзіп алып, кізі чіли чуртап сыхханнар. Ноға? Библияда, ипчі алар ӱчӱн, тіп чоохталча. (Бытие 6:2 хығырыбызыңар.) Че ангеллерге андағ ниме идерге чарабас полған (Иуданың 6). Ол тустағы чон, олох чабал ангеллер чіли, сайбах паза хазыр тудын сыххан. Аннаңар Иегова чабал кізілерні хырыбызар паза киртістіг кізілерні арачылап алар ӱчӱн, прай чир ӱстӱне суғ чайылдырған (Бытие 7:17, 23). Чабал ангеллерге ӧл парбас ӱчӱн, тигірзер нандыра парарға киліскен. Библияда олар айналар тіп адалчалар. Айналар Сайтаннаң хада Худайдаң тоғыр пар сыхханнар, іди Диавол оларның устағҷызы пол парған (Матфей 9:34).

9. а) Худай айналарны позының сӧбірезінзер нандыра кирген ме? б) Аннаң андар ниме піліп аларбыс?

⁹ Аннаң тоғыр парған айналарны, Иегова позының сӧбірезінзер нандыра кирбеен (2 Петрның 2:4). Пӱӱн айналар кізее хубул полбинчатсалар даа, олар мының алнындағох чіли, «прай чир ӱстӱндегі чоннарны алаахтырчалар» (Азых чоох 12:9; 1 Иоанның 5:19). Кӧр кӧреелер, хайди айналар анҷа кӧп кізілерні алаахтырып алчалар. (2 Коринфтегілерге 2:11 хығырыбызыңар.)

10. Кізілерні «тудып» алай алаахтырып алар ӱчӱн, айналар ниме итчелер?

¹⁰ Кізілер айналарзар постары алай хамнардаң паза  сыбырағҷылардаң пастыра айланчалар. Айналарнаң палғалысханы демонизм алай спиритизм тіп адалча. Библияда айналарнаң палғалыстығ нимелердең оортах тудынарға кирек тіп пазылча (Галат чиріндегілерге 5:19—21). Ноға? Айналарнаң палғалыс хахпанға тӧӧй. Хайди аңҷылар, аң тудып алар ӱчӱн, аймах-пасха хахпаннар турғысчалар, айналар кізілерні «тудып алар» ӱчӱн, ідӧк аймах-пасха оңдайнаң кӧйтіктенчелер. (26 приложениені кӧріңер.)

11. Тӧлке салғаны нимедір ол? Ноға тӧлке саларға чарабас?

¹¹ Айналарның хахпаннарының пірсі — тӧлке салғаны. Тӧлке салғаны нимедір ол? Ол алнында ниме поларын алай пілбинчеткен нимені піліп алар ӱчӱн, айналарның кӱзінең тузаланғаны. Кізілер хайди тӧлке салчалар? Піреелері тигірдегі чылтыстар пастыра тӧлке салчалар, пасхалары танығларға киртінчелер, кем-де карталарнаң, магическай шарнаң тузаланып алай кізі айазын кӧріп, тӧлке салча. Кӧп кізі андағ нименең айғасханын пырозы чох киректер тіп санапча. Че тӧлке салғаны уғаа хорғыстығ кирек. Тӧлке салчатханнарның айналарнаң палғалыстығ полчатханнары Библиядағы кӧзідімнердең кӧрінче. Илҷілернің 16:16—18-те «полар нимені кӧзітчеткен хутха хаптырт салған» хыстаңар чоохталча. Ол хут ағаа полар нимені азынада чоохтирға кӱс пирҷең. Павел илҷі ол айнаны сығара сӱрібіскенде, ол хыс ниме поларын чоохтап полбиныбысхан.

12. а) Ноға ӱреен кізінең палғалызарға сіренгені хорғыстығ? б) Ноға Худайның нымысчылары кізіні чығҷаң пірее кибірлерде араласпинчалар?

¹² Айналарның хахпаннарының паза пірсі — ӱреен кізінең чоохтасханы. Айналар ӱреен кізілер хайда-да чуртапчатханына, олар піске хомай ит поларларына алай піснең чоохтас поларларына киртінзіннер тіп  хынчалар. Чағын нанҷызы алай туғаны ӱреп парза, піреелері ӱреен кізінең чоохтас полчам тіпчеткен кізілерзер айланчалар. Андағ кізілер ӱреен кізідеңер ниме-де чоохтап пирчелер алай аның ӱнінең дее чоохтанчалар (1 Самуила 28:3—19). Піреелері ӱреен кізі, оларзар тӱсте киліп, позына кирек нимені сурынча тіп киртінчелер. Ағаа хоза, кізі ӱреен соонда хайда-да чуртапча тіп киртіністе кізіні чығҷаң кибірлернің кӧбізі тӧстелчелер. Оларның санында ӱреен кізінің тойы, ибіріглер, ӱреен кізее сыйыхтар пиргені паза ӱреен кізіні ӱдесчеткенінең палғалыстығ пасха даа кибірлер. Прай ол кибірлер айналарнаң палғалыстығлар. Христианнар андағ кибірлерде араласпинчатсалар, туғаннар паза хонҷыхтар оларзар тоғыр харахнаң даа кӧрерлер, сӧклирлер дее алай чоохтаспиныбызарлар даа. Ӱреен кізілер пір дее чирде чуртабинчалар, оларнаң палғалыс полҷаң оңдай чоғыл паза олар кізее хомай ниме ит полбинчалар. Прай пу нимелерні христианнар пілчелер (Псалом 115:17). Аннаңар ӱреен кізінең алай айналарнаң хаҷан даа палғалыспаңар паза андағ кибірлерде араласпаңар. (Второзаконие 18:10, 11 хығырыбызыңар; Исаия 8:19.)

13. Хаҷан-да айналардаң хорығып чуртаан кізілер ниме ит полғаннар?

¹³ Айналар кізілерні алаахтырчалар паза хорыхтырчалар. Сайтан паза айналар оларға асхынах тус халғанын пілчелер. Худай оларны ӱр ниместең чирдең хыйа идібізер, аннаңар олар чабалдаң чабал полып одырчалар (Азых чоох 12:12, 17). Андағ даа полза, хаҷан-да айналардаң хорығып чуртаан муңар кізілер пӱӱн олардаң хорыхпинчалар. Олар айналардаң хайди позып алғаннар?

14. Хайди, Ефестегі христианнар чіли, айналардаң позып аларға?

¹⁴ Айналардаң хайди позып аларға Библия ӱгретче.  Кӧзідімге, анда Ефес саардағы чуртағҷылардаңар чоохталча. Олар Худайның сынын піліп алар алнында айналарнаң палғалыстығ полғаннар. Хайди олар айналардаң позып алғаннар? Илҷілернің 19:19-та пазылча: «Сыбырағҷы киреенең айғасхан кізілернің кӧбізі, постарының пічіктерін чыып алып, оларны кізілер кӧзіне ӧртеен». Олар христианнар полып аларға хынғаннар, аннаңар сыбырағҷы киреенің кинделерін прай чох идібіскеннер. Пӱӱн кем-де Иегованың нымысчызы поларға итчетсе, ағаа ідӧк айналарнаң палғалыстығ нимелерні прай чох идерге кирек. Оларның аразында кинделер, журналлар, гороскоптар, фильмнер, кӧглер, ойыннар паза плакаттар. Прай пу нимелернің ӱчӱн сыбырағ киректері, айналарнаң палғалысханы алай айналар кӱзінең иділчеткен хайхастығ нимелер хынығ паза пыро чох пілдірчелер. Пу санға ідӧк чабал нимелердең арачыланып алар ӱчӱн ал чӧрчеткен нимелер кірчелер (1 Коринфтегілерге 10:21).

15. Сайтанға паза айналарға тоғыр турар ӱчӱн, піске ниме идерге кирек?

¹⁵ Ефестегі христианнар сыбырағҷы киреенің кинделерін чох идібіскенінең нинҷе-де чыл ирт парған, че Павел илҷі оларға «чабал хуттардаң тоғыр» харбазарын тохтатпасха чахаан (Ефестегілерге 6:12). Ноға? Айналар аннаң андар оларға хомай идерге кӱстенгеннер. Ағаа хоза, христианнарға ниме идерге кирек полған? Павел илҷі пасхан: «Сайтанның прай кӧйчеткен соғаннарын ӱзӱр полар [алай тохтат полар] киртіністің хусхуйағын алып алыңар» (Ефестегілерге 6:16). Хайди хусхуйах чааҷыны арачылапча, киртініс пісті ідӧк арачылир. Иегова пісті арачылап поларына киртінізібіс пик полза, Сайтанға паза айналарға тоғыр тур поларбыс (Матфей 17:20).

16. Киртінізібісті тыыдарға піске ниме полызар?

 ¹⁶ Иеговаа киртінізібісті тыыдарға піске ниме полызар? Библияны кӱннің сай хығырып, Иеговаа ізенерге ӱгренерге кирек. Андада Сайтаннаң айналар піске хомай ит полбастар (1 Иоанның 5:5).

17. Айналардаң арачыланарға паза ниме полызар?

¹⁷ Ефес демонизм тол парған саар полған, аннаңар Павел илҷі анда чуртапчатхан христианнарға «полған на сай» пазырарға чӧп пирген (Ефестегілерге 6:18). Оларға, арачыланыс сурынып, сыбыра пазырарға кирек полған. Піске чи? Піс тее демонизм тол парған тилекейде чуртапчабыс. Аннаңар піске ідӧк, Иегованың адын адап, аннаң арачыланыс сурынарға кирек. (Притчи 18:10 хығырыбызыңар.) Пісті Сайтаннаң арачылазын тіп, Иеговадаң сурынзабыс, ол пістің сурынызыбысха нандырар (Псалом 145:19; Матфей 6:13).

18, 19. а) Сайтаннаң айналарны хайди чиңіп аларға? б) Мының соондағы пастағдаң ниме піліп аларбыс?

¹⁸ Айналарнаң палғалыстығ нимелерні прай чох идібіссебіс паза Иегова пісті арачылап поларында ікінҷілебезебіс, піс Сайтанға паза айналарға тоғыр тур поларбыс. Олардаң хорығарға кирек чоғыл. (Иаковтың 4:7, 8 хығырыбызыңар.) Иегова айналардаң хай-хай кӱстіг. Худай оларны Нойның тузындох хатығлаан, полар туста, тізең, оларны саңай чох идібізер (Иуданың 6). Ундутпаңар, піс позыбыс алнынҷа ла харбаспинчабыс, Иегова пісті ангеллер пастыра арачылапча (2 Царей 6:15—17). Ікінҷілебеңер, Иегованың полызиинаң Сайтаннаң айналарны чиңіп аларбыс (1 Петрның 5:6, 7; 2 Петрның 2:9).

¹⁹ Сайтаннаң айналар анҷа кӧп ирее ағылчатсалар, ноға Худай оларны пу тусха теере чох идібіспеен? Мының соондағы пастағдаң аннаңар піліп аларбыс.