ជំពូកទី១០
សេចក្ដីពិតអំពីទេវតានិងពួកវិញ្ញាណកំណាច
១. ហេតុអ្វីយើងគួររៀនអំពីទេវតា?
ព្រះយេហូវ៉ាចង់ឲ្យយើងម្នាក់ៗស្គាល់ក្រុមគ្រួសាររបស់លោក។ បណ្ដាទេវតាជាសមាជិកនៃក្រុមគ្រួសាររបស់ព្រះ។ ក្នុងគម្ពីរទេវតាបានត្រូវហៅថា«កូនព្រះ»។ (យ៉ូប ៣៨:៧) តើទេវតាមានតួនាទីអ្វីខ្លះ? តើពួកគេបានជួយមនុស្សនៅអតីតកាលយ៉ាងដូចម្ដេច? នៅសព្វថ្ងៃនេះ តើពួកគេអាចជួយយើងបានដែរឬទេ? (សូមមើលលេខ៨ក្នុងកំណត់នៅចុងសៀវភៅ)។
២. តើទេវតាមានដើមកំណើតមកពីណា? តើមានទេវតាប៉ុន្មានរូបដែលបានត្រូវបង្កើតមក?
២ យើងត្រូវដឹងអំពីដើមកំណើតរបស់ទេវតាជាមុនសិន។ សៀវភៅកូឡុស ១:១៦ ចែងថាព្រះយេហូវ៉ាបានបង្កើតលោកយេស៊ូ ហើយក្រោយមក«អ្វីៗឯទៀតទាំងអស់នៅស្ថានសួគ៌និងនៅផែនដីបានត្រូវបង្កើតមក»ដែរ។ នេះរួមបញ្ចូលពួកទេវតា។ តើមានទេវតាប៉ុន្មានរូបដែលបានត្រូវបង្កើតមក? គម្ពីរប្រាប់ថាមានរាប់រយលានរូប។—ទំនុកតម្កើង ១០៣:២០; ការបើកបង្ហាញ ៥:១១
៣. តើសៀវភៅយ៉ូប ៣៨:៤-៧ ប្រាប់យើងអ្វីខ្លះអំពីពួកទេវតា?
៣ ម្យ៉ាងទៀត គម្ពីរបង្រៀនថាព្រះយេហូវ៉ាបានបង្កើតទេវតាមុនពេលដែលលោកបានបង្កើតផែនដី។ តើបណ្ដាទេវតាមានអារម្មណ៍យ៉ាងណាពេលពួកគេឃើញផែនដីដែលព្រះបានបង្កើត? សៀវភៅយ៉ូបប្រាប់ថា ពួកគេមានអំណរយ៉ាងខ្លាំង។ នៅពេលនោះ ទេវតាទាំងឡាយរួមជាក្រុមគ្រួសារមួយដែលបម្រើព្រះយេហូវ៉ាដោយសាមគ្គីភាព។—យ៉ូប ៣៨:៤-៧
ទេវតាជួយរាស្ដ្ររបស់ព្រះ
៤. ហេតុអ្វីយើងដឹងថាទេវតាយកចិត្ដទុកដាក់ចំពោះមនុស្ស?
៤ ទេវតាតែងតែចាប់អារម្មណ៍នឹងមនុស្សជាតិ ព្រមទាំងគោលបំណងដែលព្រះយេហូវ៉ាមានចំពោះផែនដីនិងមនុស្ស។ (សុភាសិត ៨:៣០, ៣១; ពេត្រុសទី១ ១:១១, ១២) ពេលដែលអាដាមនិងអេវ៉ាបះបោរប្រឆាំងព្រះ នោះច្បាស់ជាធ្វើឲ្យពួកទេវតាពិបាកចិត្ដណាស់។ នៅសព្វថ្ងៃនេះ ពួកគេកាន់តែពិបាកចិត្ដខ្លាំងឡើងពេលឃើញមនុស្សភាគច្រើនមិនស្តាប់បង្គាប់ព្រះយេហូវ៉ា។ ប៉ុន្ដែ ពេលអ្នកណាម្នាក់ប្រែចិត្ដ ហើយត្រឡប់មកព្រះវិញ នោះពួកទេវតាមានអំណរក្រៃលែង។ (លូកា ១៥:១០) ទេវតាយកចិត្ដទុកដាក់ចំពោះអ្នកបម្រើព្រះយេហូវ៉ា។ ព្រះប្រើទេវតាឲ្យជួយការពារអ្នកបម្រើលោកនៅផែនដី។ (ហេប្រឺ ១:៧, ១៤) សូមយើងពិចារណាឧទាហរណ៍ខ្លះៗ។
«ព្រះនៃទូលបង្គំទ្រង់បានចាត់ទេវតារបស់ទ្រង់ ឲ្យមកបិទមាត់សិង្ហទាំងអស់»។—ដានីយ៉ែល ៦:២២
៥. តើពួកទេវតាបានជួយអ្នកបម្រើព្រះនៅអតីតកាលយ៉ាងដូចម្ដេច?
៥ ព្រះយេហូវ៉ាបានចាត់ទេវតាពីររូបឲ្យមកជួយឡុតនិងក្រុមគ្រួសាររបស់គាត់ឲ្យគេចផុតពីការបំផ្លាញចោលក្រុងសូដុមនិងកូម៉ូរ៉ា។ (លោកុប្បត្ដិ ១៩:១៥, ១៦) រាប់រយឆ្នាំក្រោយមក អ្នកប្រកាសទំនាយដានីយ៉ែលបានត្រូវបោះទៅក្នុងរូងសិង្ហ តែគាត់មិនបានជួបគ្រោះថ្នាក់អ្វីឡើយ ពីព្រោះ«ព្រះ . . . បានចាត់ទេវតារបស់ទ្រង់ ឲ្យមកបិទមាត់សិង្ហទាំងអស់»។ (ដានីយ៉ែល ៦:២២) ក្រោយមក ពេលសាវ័កពេត្រុសជាប់គុក ព្រះយេហូវ៉ាបានចាត់ទេវតាមួយរូបឲ្យទៅដោះលែងគាត់។ (សកម្មភាព ១២:៦-១១) ទេវតាក៏បានជួយលោកយេស៊ូដែរពេលលោកនៅផែនដី។ ជាឧទាហរណ៍ ក្រោយពីលោកយេស៊ូបានទទួលការជ្រមុជទឹករួច «ពួកទេវតាបានមកបម្រើលោក»។ (ម៉ាកុស ១:១៣) បន្ដិចមុននឹងលោកយេស៊ូត្រូវគេប្រហារជីវិត ទេវតាមួយរូបបានមក«ពង្រឹងកម្លាំងចិត្ដរបស់លោក»។—លូកា ២២:៤៣
៦. (ក) តើយើងដឹងយ៉ាងដូចម្ដេចថាទេវតាជួយរាស្ដ្ររបស់ព្រះនៅសព្វថ្ងៃនេះ? (ខ) តើយើងនឹងរកចម្លើយចំពោះសំណួរអ្វីខ្លះ?
៦ នៅសព្វថ្ងៃនេះ ទេវតាមិនលេចមកឲ្យមនុស្សឃើញទៀតទេ។ ទោះជាយ៉ាងនោះក៏ដោយ ព្រះនៅតែប្រើទេវតាឲ្យជួយអ្នកបម្រើរបស់លោក។ គម្ពីរចែងថា៖ «ទេវតានៃព្រះយេហូវ៉ាចោមរោមនៅជុំវិញនៃអស់អ្នកដែលកោតខ្លាចដល់ទ្រង់ ហើយក៏ជួយគេឲ្យរួច»។ (ទំនុកតម្កើង ៣៤:៧) ហេតុអ្វីយើងត្រូវការឲ្យព្រះការពារយើង? ពីព្រោះយើងមានសត្រូវដ៏ខ្លាំងក្លាដែលចង់ពាធាយើង។ តើពួកវាជានរណា? តើពួកវាមកពីណា? តើតាមរបៀបណាពួកវាព្យាយាមធ្វើបាបយើង? ដើម្បីដឹងចម្លើយ សូមយើងពិចារណាអ្វីដែលបានកើតឡើងមិនយូរក្រោយពីអាដាមនិងអេវ៉ាបានត្រូវបង្កើតមក។
សត្រូវដែលយើងមើលមិនឃើញ
៧. តើសាថានបានជោគជ័យដល់កម្រិតណាក្នុងការបោកបញ្ឆោតមនុស្សមិនឲ្យបម្រើព្រះ?
៧ យើងបានរៀនហើយក្នុងជំពូកទី៣អំពីទេវតាមួយរូបដែលបានបះបោរប្រឆាំងព្រះ ថែមទាំងចង់គ្រប់គ្រងលើអ្នកឯទៀតផងដែរ។ គម្ពីរហៅវាថាមេកំណាចសាថាន។ (ការបើកបង្ហាញ ១២:៩) មិនត្រឹមតែប៉ុណ្ណោះ វាក៏ចង់ឲ្យអ្នកឯទៀតបះបោរប្រឆាំងព្រះដែរ។ វាបានបោកបញ្ឆោតនាងអេវ៉ា ហើយតាំងពីពេលនោះមក វាបានបោកបញ្ឆោតមនុស្សស្ទើរតែទាំងអស់។ យ៉ាងណាក្ដី នៅមានមនុស្សខ្លះបានរក្សាភាពស្មោះត្រង់ចំពោះព្រះយេហូវ៉ាដូចជា អេបិល អេណុក និងណូអេជាដើម។—ហេប្រឺ ១១:៤, ៥, ៧
៨. (ក) តើតាមរបៀបណាទេវតាខ្លះបានក្លាយទៅជាវិញ្ញាណកំណាច? (ខ) តើពួកវិញ្ញាណកំណាចបានធ្វើអ្វីដើម្បីរួចជីវិតពីទឹកជំនន់?
៨ នៅសម័យណូអេ ទេវតាខ្លះបានបះបោរ ហើយចាកចេញពីស្ថានសួគ៌ ដើម្បីរស់ជាមនុស្សនៅផែនដី។ ហេតុអ្វី? គម្ពីរប្រាប់យើងថា ពួកវាចង់យកកូនស្រីមនុស្សធ្វើជាប្រពន្ធ។ (សូមអាន លោកុប្បត្ដិ ៦:២) ប៉ុន្ដែការដែលទេវតាធ្វើដូច្នេះគឺជាការខុស។ (យូដាស ៦) ដូចទេវតាអាក្រក់ទាំងនោះដែរ មនុស្សភាគច្រើននៅសម័យនោះទៅជាអាក្រក់ ហើយសាហាវឃោរឃៅ។ ហេតុនេះ ព្រះយេហូវ៉ាសម្រេចចិត្ដធ្វើឲ្យមានទឹកជន់លិចពាសពេញផែនដីទាំងមូលដើម្បីបំផ្លាញចោលមនុស្សទុច្ចរិត។ ប៉ុន្ដែ លោកបានសង្គ្រោះអ្នកបម្រើស្មោះត្រង់របស់លោក។ (លោកុប្បត្ដិ ៧:១៧, ២៣) ដើម្បីរួចជីវិត ទេវតាអាក្រក់ទាំងនោះបានត្រឡប់ទៅស្ថានសួគ៌វិញ។ គម្ពីរហៅទេវតាអាក្រក់ទាំងនោះថាពួកវិញ្ញាណកំណាច ដោយសារពួកវាបានសម្រេចចិត្ដចូលរួមបះបោរជាមួយនឹងមេកំណាចសាថាន។ ម៉្លោះហើយ មេកំណាចបានក្លាយទៅជាអ្នកគ្រប់គ្រងរបស់ពួកវា។—ម៉ាថាយ ៩:៣៤
៩. (ក) តើអ្វីបានកើតឡើងចំពោះពួកវិញ្ញាណកំណាចពេលពួកវាត្រឡប់ទៅស្ថានសួគ៌វិញ? (ខ) តើយើងនឹងរៀនអ្វីនៅវគ្គបន្ទាប់?
៩ ដោយសារពួកវាបានបះបោរប្រឆាំងព្រះយេហូវ៉ា នោះលោកមិនអនុញ្ញាតឲ្យពួកវាធ្វើជាសមាជិកនៃក្រុមគ្រួសារស្ថានសួគ៌របស់លោកទៀតទេ។ (ពេត្រុសទី២ ២:៤) ពួកវិញ្ញាណកំណាចមិនអាចកាឡាខ្លួនជាមនុស្សបានទៀតឡើយ ប៉ុន្ដែពួកវា«កំពុងបំភាន់ពិភពលោកទាំងមូល»។ (ការបើកបង្ហាញ ១២:៩; យ៉ូហានទី១ ៥:១៩) សូមយើងរៀនអំពីវិធីផ្សេងៗដែលពួកវាបានប្រើដើម្បីបោកបញ្ឆោត ឬបំភាន់មនុស្សជាច្រើន។—សូមអាន កូរិនថូសទី២ ២:១១
វិធីដែលពួកវិញ្ញាណកំណាចបោកបញ្ឆោតមនុស្ស
១០. តើតាមរបៀបណាពួកវិញ្ញាណកំណាចបោកបញ្ឆោតមនុស្ស?
១០ ពួកវិញ្ញាណកំណាចបោកបញ្ឆោតមនុស្សតាមវិធីជាច្រើន។ ពេលមនុស្សទាក់ទងពួកវិញ្ញាណកំណាច ពួកគេធ្វើដូច្នេះដោយផ្ទាល់ឬតាមរយៈអ្នកណាម្នាក់ទៀត ដូចជាតាមរយៈគ្រូមន្ដអាគមជាដើម។ ប៉ុន្ដែ គម្ពីរបង្គាប់យើងឲ្យជៀសចេញឆ្ងាយពីអ្វីណាក៏ដោយដែលជាប់ទាក់ទងនឹងពួកវិញ្ញាណកំណាច។ (កាឡាទី ៥:១៩-២១) ហេតុអ្វី? ដូចព្រានព្រៃដែលប្រើអន្ទាក់ដើម្បីចាប់សត្វ នោះពួកវិញ្ញាណកំណាចក៏ប្រើអន្ទាក់ផ្សេងៗដើម្បីគ្រប់គ្រងមនុស្សដែរ (សូមមើលលេខ២៦ក្នុងកំណត់នៅចុងសៀវភៅ)។
១១. តើការទស្សន៍ទាយគន់គូរគឺជាអ្វី ហើយហេតុអ្វីយើងគួរជៀសវាង?
១១ វិធីមួយដែលពួកវាប្រើដើម្បីបំភាន់មនុស្ស គឺតាមរយៈការទស្សន៍ទាយគន់គូរ។ នេះគឺជាការប្រើអំណាចពិសេសពីពួកវិញ្ញាណកំណាចដើម្បីខំស្វែងយល់អំពីអនាគតឬរឿងអាថ៌កំបាំង។ មនុស្សម្នាក់ប្រហែលជាចង់ដឹងអំពីអនាគតដោយមើលផ្កាយ គន់មើលប្រផ្នូល ទាយសន្លឹកបៀ ឬទាយបាតដៃ។ មនុស្សជាច្រើនគិតថាអ្វីៗទាំងនេះគ្មានគ្រោះថ្នាក់ទេ តែនោះគឺជាពាក្យកុហកសុទ្ធ។ តាមពិត វាមានគ្រោះថ្នាក់ខ្លាំងណាស់។ គម្ពីរបង្ហាញថាគ្រូទាយរួមដៃគ្នាជាមួយនឹងពួកវិញ្ញាណកំណាច។ ជាឧទាហរណ៍ នៅសកម្មភាព ១៦:១៦-១៨ ប្រាប់យើងអំពី«វិញ្ញាណកំណាច»មួយរូបបានជួយក្មេងស្រីម្នាក់«ឲ្យនាងចេះទាយ»។ ក្រោយពីសាវ័កប៉ូលបណ្ដេញវិញ្ញាណកំណាចនោះចេញពីខ្លួននាង នោះនាងក៏លែងចេះទាយទៀត។
១២. (ក) ហេតុអ្វីការខំព្យាយាមទាក់ទងនឹងមនុស្សស្លាប់នាំឲ្យមានគ្រោះថ្នាក់? (ខ) ហេតុអ្វីអ្នកបម្រើព្រះមិនត្រូវចូលរួមទំនៀមទម្លាប់ណាដែលជាប់ទាក់ទងនឹងពួកវិញ្ញាណកំណាច?
១២ ពួកវិញ្ញាណកំណាចប្រើវិធីមួយទៀតដើម្បីបំភាន់មនុស្ស គឺពួកវាព្យាយាមធ្វើឲ្យយើងជឿថាយើងអាចនិយាយជាមួយនឹងមនុស្សស្លាប់បាន ហើយថាអ្នកដែលស្លាប់នោះ កំពុងបន្ដរស់នៅកន្លែងណាមួយ។ បន្ថែមទៀត ពួកវាធ្វើឲ្យយើងជឿថា អ្នកស្លាប់អាចប្រស្រ័យទាក់ទងជាមួយនឹងមនុស្សរស់ ឬក៏អាចធ្វើបាបយើងផងដែរ។ ជាឧទាហរណ៍ មនុស្សម្នាក់ដែលមានមិត្ដភក្ដិឬសាច់ញាតិបានស្លាប់ គាត់ទំនងជាទៅជួបគ្រូខាបដើម្បីហៅអ្នកស្លាប់ឲ្យមកនិយាយជាមួយនឹងគាត់។ គ្រូខាបប្រហែលជាប្រាប់បុគ្គលនោះនូវព័ត៌មានដ៏គួរឲ្យចាប់អារម្មណ៍អំពីមិត្ដភក្ដិឬសាច់ញាតិរបស់គាត់ដែលបានស្លាប់ ហើយគ្រូខាបថែមទាំងត្រាប់តាមសំឡេងមនុស្សស្លាប់នោះទៀតផង។ (សាំយូអែលទី១ ២៨:៣-១៩) ម្យ៉ាងទៀត ទំនៀមទម្លាប់បុណ្យសពជាច្រើនក៏មានមូលដ្ឋានលើជំនឿដែលថាមនុស្សស្លាប់កំពុងបន្ដនៅរស់កន្លែងណាមួយដែរ។ ទំនៀមទម្លាប់នេះប្រហែលជារួមបញ្ចូលការសែនព្រេន ឬបុណ្យខួបមនុស្សស្លាប់ជាដើម។ ពេលគ្រិស្ដសាសនិកបដិសេធមិនចូលរួមបុណ្យទាំងនេះ ក្រុមគ្រួសារឬមនុស្សក្នុងតំបន់របស់ពួកគេប្រហែលជារិះគន់ មើលងាយ ឬមិនចង់រាប់អានពួកគេឡើយ។ ប៉ុន្ដែ គ្រិស្ដសាសនិកពិតដឹងថាមនុស្សស្លាប់គឺសូន្យបាត់ទៅ មិនមែនរស់នៅកន្លែងណាមួយទៀតទេ។ មនុស្សរស់មិនអាចទាក់ទងនឹងមនុស្សស្លាប់បានឡើយ ហើយមនុស្សស្លាប់ក៏មិនអាចធ្វើបាបយើងបានដែរ។ (ទំនុកតម្កើង ១១៥:១៧) យ៉ាងណាក្ដី សូមប្រុងប្រយ័ត្នជានិច្ច កុំព្យាយាមទាក់ទងជាមួយនឹងពួកវិញ្ញាណកំណាច ឬមនុស្សស្លាប់ឲ្យសោះ។ មួយទៀត អ្នកក៏មិនត្រូវចូលរួមពិធីឬទំនៀមទម្លាប់ណាដែលជាប់ទាក់ទងនឹងពួកវាដែរ។—សូមអាន ចោទិយកថា ១៨:១០, ១១; អេសាយ ៨:១៩
១៣. តើមនុស្សជាច្រើនដែលធ្លាប់ខ្លាចពួកវិញ្ញាណកំណាច ឥឡូវមានអារម្មណ៍យ៉ាងណា?
១៣ ពួកវិញ្ញាណកំណាចមិនត្រឹមតែនាំមនុស្សឲ្យវង្វេងប៉ុណ្ណោះទេ តែពួកវាក៏ធ្វើឲ្យមនុស្សខ្លាចផងដែរ។ សព្វថ្ងៃនេះ សាថាននិងពួកវិញ្ញាណកំណាចរបស់វាដឹងថា ពួកវាមាន«ពេលតែបន្ដិចបន្ដួច»ទេ មុនពេលដែលព្រះបញ្ឈប់សកម្មភាពរបស់ពួកវានៅផែនដី។ ដូច្នេះ ពួកវាខឹងកាន់តែខ្លាំង ហើយកាចសាហាវជាងមុនទៅទៀត។ (ការបើកបង្ហាញ ១២:១២, ១៧) យ៉ាងណាក៏ដោយ មនុស្សរាប់ពាន់នាក់ដែលធ្លាប់ខ្លាចពួកវិញ្ញាណកំណាច ឥឡូវលែងខ្លាចពួកវាទៀតហើយ។ តើពួកគេបានធ្វើអ្វីដើម្បីកុំឲ្យខ្លាចពួកវាទៀត?
ចូរតយុទ្ធហើយផ្ដាច់ទំនាក់ទំនងជាមួយនឹងពួកវិញ្ញាណកំណាច
១៤. ដូចគ្រិស្ដសាសនិកនៅសតវត្សរ៍ទី១ តើយើងអាចផ្ដាច់ទំនាក់ទំនងជាមួយនឹងពួកវិញ្ញាណកំណាចយ៉ាងដូចម្ដេច?
១៤ គម្ពីរប្រាប់យើងអំពីវិធីតយុទ្ធនឹងពួកវិញ្ញាណកំណាច និងវិធីផ្ដាច់ទំនាក់ទំនងជាមួយនឹងពួកវា។ ជាឧទាហរណ៍ អ្នកក្រុងអេភេសូរខ្លះធ្លាប់ទាក់ទងនឹងពួកវិញ្ញាណកំណាច មុនពេលដែលពួកគេរៀនសេចក្ដីពិត។ តើពួកគេបានធ្វើយ៉ាងណាដើម្បីផ្ដាច់ទំនាក់ទំនងជាមួយនឹងពួកវា? គម្ពីរចែងថា៖ «មនុស្សជាច្រើនដែលចេះវេទមន្ដបានយកសៀវភៅរបស់ពួកគេមកដាក់រួមគ្នា រួចដុតចោលនៅមុខគេទាំងអស់គ្នា»។ (សកម្មភាព ១៩:១៩) ដោយសារពួកគេចង់ក្លាយទៅជាគ្រិស្ដសាសនិក ពួកគេបានដុតចោលសៀវភៅទាំងអស់របស់ខ្លួនដែលទាក់ទងនឹងវេទមន្ដ។ នៅសព្វថ្ងៃនេះយើងក៏ធ្វើតាមគំរូពួកគេដែរ។ អ្នកដែលចង់បម្រើព្រះយេហូវ៉ាត្រូវបោះចោលអ្វីណាក៏ដោយដែលជាប់ទាក់ទងនឹងពួកវិញ្ញាណកំណាច។ នេះរួមបញ្ចូលសៀវភៅ ទស្សនាវដ្ដី ភាពយន្ដ បទភ្លេង ចម្រៀង ហ្គេម និងរូបភាព ដែលទាក់ទាញយើងឲ្យគិតថាអំណាចពិសេសពីពួកវិញ្ញាណកំណាចជាអ្វីដែលសប្បាយនិងគួរឲ្យចាប់អារម្មណ៍។ នេះក៏រួមបញ្ចូលខ្សែគាថាឬរបស់ឯទៀតដែលមនុស្សពាក់ជាគ្រឿងការពាររារាំងសត្រូវឬគ្រោះអន្ដរាយផ្សេងៗដែរ។—កូរិនថូសទី១ ១០:២១
១៥. តើយើងត្រូវធ្វើអ្វីថែមទៀតដើម្បីយកឈ្នះសាថាននិងពួកវិញ្ញាណកំណាច?
១៥ រាប់ឆ្នាំក្រោយពីពួកអ្នកក្រុងអេភេសូរបានបំផ្លាញចោលសៀវភៅវេទមន្ដរបស់ពួកគេ សាវ័កប៉ូលបានសរសេរថាពួកគេនៅតែត្រូវ«ប្រយុទ្ធ»ប្រឆាំង«ពួកអ្នកគ្រប់គ្រងពិភពលោកងងឹតនេះ»។ (អេភេសូរ ៦:១២) ពិតមែនតែពួកគេបានដុតចោលសៀវភៅទាំងនោះហើយក្ដី តែពួកវិញ្ញាណកំណាចនៅតែព្យាយាមធ្វើបាបពួកគេ។ ដូច្នេះ តើពួកគេត្រូវធ្វើអ្វីថែមទៀត? ប៉ូលប្រាប់ពួកគេថាចូរ«ទទួលយកខែលធំនៃជំនឿ ដែលអ្នកអាចប្រើដើម្បីពន្លត់[ឬបញ្ឈប់]អស់ទាំងព្រួញឆេះរបស់មេកំណាច»។ (អេភេសូរ ៦:១៦) ដូចខែលការពារទាហានក្នុងសង្គ្រាម នោះជំនឿក៏អាចការពារយើងបានដែរ។ បើយើងទុកចិត្ដទាំងស្រុងថាព្រះយេហូវ៉ាអាចការពារយើង នោះយើងនឹងអាចយកឈ្នះសាថាននិងពួកវិញ្ញាណកំណាចបាន។—ម៉ាថាយ ១៧:២០
១៦. តើតាមរបៀបណាយើងអាចពង្រឹងជំនឿរបស់យើងទៅលើព្រះយេហូវ៉ា?
១៦ តើយើងអាចពង្រឹងជំនឿលើព្រះយេហូវ៉ាយ៉ាងដូចម្ដេច? យើងត្រូវអានគម្ពីររាល់ថ្ងៃ ហើយរៀនពឹងផ្អែកលើលោកឲ្យការពារយើង។ បើយើងទុកចិត្ដព្រះយេហូវ៉ាទាំងស្រុង សាថាននិងពួកវិញ្ញាណកំណាចនឹងមិនអាចធ្វើបាបយើងបានឡើយ។—យ៉ូហានទី១ ៥:៥
១៧. តើយើងត្រូវធ្វើអ្វីទៀតដើម្បីការពារខ្លួនពីពួកវិញ្ញាណកំណាច?
១៧ តើគ្រិស្ដសាសនិកនៅក្រុងអេភេសូរត្រូវធ្វើអ្វីថែមទៀត? ពួកគេរស់នៅក្នុងក្រុងមួយដែលពោរពេញទៅដោយមន្ដអាគមនិងការទាក់ទងពួកវិញ្ញាណកំណាច។ ដូច្នេះ ប៉ូលប្រាប់ពួកគេថា៖ «ចូរបន្ដអធិដ្ឋាននៅគ្រប់ឱកាស»។ (អេភេសូរ ៦:១៨) ម៉្លោះហើយ ពួកគេត្រូវអធិដ្ឋានសុំព្រះយេហូវ៉ាការពារពួកគេគ្រប់ពេលវេលា។ ចុះយើងវិញ? យើងក៏រស់ក្នុងពិភពលោកដែលពោរពេញទៅដោយមន្ដអាគមនិងការទាក់ទងពួកវិញ្ញាណកំណាចដែរ។ ដូច្នេះយើងត្រូវសុំព្រះយេហូវ៉ាការពារយើង ហើយយើងត្រូវប្រើនាមរបស់លោកពេលយើងអធិដ្ឋាន។ (សូមអាន សុភាសិត ១៨:១០) បើយើងបន្ដអធិដ្ឋានសុំព្រះយេហូវ៉ាសង្គ្រោះយើងឲ្យរួចពីសាថាន នោះលោកនឹងធ្វើតាមសេចក្ដីអធិដ្ឋានរបស់យើង។—ទំនុកតម្កើង ១៤៥:១៩; ម៉ាថាយ ៦:១៣
១៨, ១៩. (ក) តើតាមរបៀបណាយើងអាចយកឈ្នះសាថាននិងពួកវិញ្ញាណកំណាចបាន? (ខ) តើសំណួរអ្វីដែលនឹងត្រូវឆ្លើយនៅជំពូកបន្ទាប់?
១៨ បើយើងបោះបង់ចោលអ្វីទាំងអស់ដែលទាក់ទងនឹងពួកវិញ្ញាណកំណាចនិងមន្ដអាគម ហើយពឹងផ្អែកលើព្រះយេហូវ៉ាឲ្យការពារយើង នោះយើងអាចយកឈ្នះសាថាននិងពួកវិញ្ញាណកំណាចបាន។ យើងមិនចាំបាច់ខ្លាចពួកវាឡើយ។ (សូមអាន យ៉ាកុប ៤:៧, ៨) ព្រះយេហូវ៉ាមានឫទ្ធានុភាពខ្លាំងជាងពួកវិញ្ញាណកំណាចឆ្ងាយណាស់។ លោកបានដាក់ទោសពួកវានៅសម័យណូអេ ហើយនៅអនាគតលោកនឹងបំផ្លាញពួកវាចោលជាមិនខាន។ (យូដាស ៦) សូមចាំថាយើងមិនមែនតយុទ្ធជាមួយនឹងពួកវាតែម្នាក់ឯងនោះទេ។ ព្រះយេហូវ៉ាកំពុងប្រើទេវតារបស់លោកឲ្យការពារយើង។ (ពង្សាវតារក្សត្រទី២ ៦:១៥-១៧) យើងអាចមានទំនុកចិត្ដថា ដោយមានជំនួយពីព្រះយេហូវ៉ា យើងពិតជាអាចយកឈ្នះសាថាននិងពួកវិញ្ញាណកំណាច។—ពេត្រុសទី១ ៥:៦, ៧; ពេត្រុសទី២ ២:៩
១៩ ក៏ប៉ុន្ដែ បើសាថាននិងពួកវិញ្ញាណកំណាចកំពុងធ្វើឲ្យមនុស្សរងទុក្ខវេទនាខ្លាំងដល់ម៉្លេះ ហេតុអ្វីបានជាព្រះមិនទាន់បំផ្លាញពួកវាចោល? សំណួរនេះនឹងត្រូវឆ្លើយនៅជំពូកបន្ទាប់។
