1. Morwasinke natu lirongera kuhamena vaengeli?

JEHOVA kuna hara tu dive epata lyendi, omu mwa hamena vaengeli. Yisinke sirugana sovaengeli? Ngapi omu va vaterere vantu pwanare? Kuvhura va tu vatere naina ndi?—Tara Mauzera 8.

2. Kupi va tundilira vaengeli? Vangapi va kara?

² Twa hepa kudiva oku va tunda vaengeli. Vakorosi 1:16 kutanta asi konyima zapa Jehova ga sitire Jesus makura yipo ga ‘sitire yininke nayinye yemeguru neyi yepevhu.’ Omu mwa hamenene vaengeli. Vaengeli vangapi ga sitire? Bibeli kutanta asi pwa kara vaengeli mayovi nomayovi, nokuvhura si kuvavarura.—Episarome 103:20; Ehororo 5:11.

3. Yisinke azi tu tantere Joba 38:4-7 kuhamena vaengeli?

³ Bibeli kuronga asi Karunga kwa sitire vaengeli komeho zokusita evhu. Ngapi va lizuvhire vaengeli apa va mwene evhu? Buke zaJoba kututantera asi awo kwa hefe. Awo kwa kere epata limwe eli ngali karere Jehova.—Joba 38:4-7.

4. Ngapi twa yi diva asi vaengeli kwa hara vantu?

⁴ Vaengeli kwa hara vantu ntani awo kwa hara kumona omu sina kusika mo sitambo saJehova kevhu nokovantu. (Yisewe 8:30, 31; 1 Peturusa 1:11, 12) Awo va guvire apa Adamu naEva va rwanesere Karunga,  ntani awo simpe kuguva pokumona asi sinzi sovantu kapi vana kulimburukwa Jehova. Nye nsene gumwe a litezurura, vaengeli kuhafa unene. (Rukasa 15:10) Vaengeli kwa hara unene vantu ava ava karere Karunga, ntani Jehova kuvaruganesa mokupopera nokukwafa vakareli vendi pevhu. (Vahebeli 1:7, 14) Tu tare koyihonena yimwe.

5. Ngapi vaengeli va vaterere vantu vaKarunga?

 ⁵ Jehova kwa tumine vaengeli vavali va ka popere Roto nepata lyendi apa va zonagwire sitata saSodoma naGomora. (Genesis 19:15, 16) Konyima zonomvhura mafere, muporofete Ndaniyera kwa mu zuguminine mekero lyovanyime nye kapi va mu lire morwa ‘Karunga kwa tumine muengeli a ya kumateke tuna tovanyime.’ (Ndaniyera 6:22) Apa mupositoli Peturusa va mu tulire modorongo, Jehova kwa tumine muengeli a ka mu pwagese mo. (Yirugana 12:6-11) Vaengeli kwa vaterere hena Jesus apa ga kere pevhu. Pasihonena, konyima zekuho lyaJesus, “vaengeli tava mu kerere.” (Marukusa 1:13) Ntani komeho va ka mu dipage, muengeli “ta mu koreke.”—Rukasa 22:43.

6. (a) Ngapi twa yi diva asi vaengeli kuvatera vakareli vaKarunga naina? (b) Mapuro musinke natu ka limburura?

⁶ Naina vaengeli kapi vana kumonekera hena vantu. Nye Karunga simpe kuvaruganesa mokuvatera vakareli vendi. Bibeli kutanta asi: “Muengeli gwendi kupopera ava ava tjira HOMPA, makura ta va yoworora mo mosimpagwa.” (Episarome 34:7) Morwasinke twa hepera epopero? Morwa twa kara nononkore dononene edi nadi vhura kutukoresa. Nonkore musinke odo? Kupi da tundilira? Ngapi omu da hara kutukoresa? Mokugwana malimbururo, tu konakoneni eyi ya horokere konyima zapa va sitire Adamu naEva.

7. Yisinke Satana ga rugana vantu wovanzi?

⁷ MEgaununo 3 twa lirongere asi muengeli gumwe kwa rwanesere Karunga ntani ga here kupangera. Bibeli kumutumbura asi Satana Muzonaguli.  (Ehororo 12:9) Satana kwa here vamwe va lipakerere nage mokurwanesa Karunga. Age kwa pukisire Eva ntani vantu wovanzi. Nye Abeli naHenoka naNowa kwa limburukwire Karunga.—Vahebeli 11:4, 5, 7.

8. (a) Ngapi va ya donapere vaengeli vamwe? (b) Yisinke va rugene vaengeli wovadona mokuparuka ruhanzo?

⁸ Momazuva gaNowa vaengeli vamwe kwa rwanesere Karunga, tava sigi eguru nokuwiza pevhu. Morwasinke? Bibeli kutanta asi awo kwa here kukwara vakadi. (Resa Genesis 6:2.) Nye oyo kwa kere epuko kovaengeli. (Juda 6) Vantu nawo kwa donapere nokukara nonyanya ngwendi vaengeli vena. Jehova yipo ga tokwere kuzonagura po vantu noruhanzo. Nye ga poperere vakareli vendi wovalimburukwi. (Genesis 7:17, 23) Mokuparuka, vaengeli vena wovadona yipo va tengwire meguru. Bibeli kutumbura vaengeli owo asi nompepo donondona. Awo kwa tokwere kulipakerera naSatana makura ta kara mupangeli gwawo.—Mateusa 9:34.

9. (a) Yisinke ya horokerere nompepo donondona apa da tengwire meguru? (b) Yisinke natu ka konakona?

⁹ Apa vaengeli vena va tengwire meguru, Karunga kapi ga va tambwire hena mepata lyendi. (2 Peturusa 2:4) Nompepo odo donondona ngesi nokuvhura si kugusa marutu gosintu, nye ado simpe kuna ‘kupukisa uzuni naunye.’ (Ehororo 12:9; 1 Johanesa 5:19) Tu konakone omu adi pukisa vantu.—Resa 2 Vakolinte 2:11.

10. Ngapi adi pukisa nompepo donondona vantu?

¹⁰ Nompepo donondona kupukisa vantu mononkedi  dokulisiga-siga. Vantu kuruganena kumwe nonompepo donondona pokuza koyimbanda ndi kulihameka mourodi. Nye Bibeli kutukorangeda tu nyokere po umpure. (Vagarata 5:19-21) Morwasinke? Nompepo donondona kuruganesa umpure mokukwata ndi kupukisa vantu ngwendi moomu mukongo a ruganesa siraha mokukwata yikorama.—Tara Mauzera 26.

11. Morwasinke natu nyokerera po mazanekedo?

¹¹ Kuzanekeda kuna kara siraha simwe esi adi ruganesa nompepo donondona mokupukisa vantu. Nsene vantu vana fisa ndi tava vere ndi vana hara kupapara ogu ana vaka yininke yawo ndi vana va tumbura urodi, awo kuza kokatemba va ka zanekede. Vantu wovanzi kugazara asi ezanekedo kapisi nzo, nye Bibeli kulikida asi Jehova kapi a pulisire vakareli vendi va lihameke momazanekedo.—Resa Deuteronomium 18:14.

12. (a) Morwasinke ya karera siponga kuhetekera kuuyunga novafe? (b) Nompo musinke nava nyokera po vakareli vaKarunga?

¹² Siraha simwe hena esi adi ruganesa nompepo donondona kuninkisa vantu va pure asi vafe kulisintunuka vadimu, ntani kuvhura va tu hepeke nsene eyi tuna kurugana kapi yina kuvahafesa. Vamwe nsene mvhura kapi zina kuroka, ndi kwato muzangu, ndi kuna kuvera, ndi ogu ga fa kuna kuvawizira konzodi, ndi morwa maudigu gongandi, tava pura evatero kovadimu. Sinzi sonompo edi ava kwama vantu komatamu kulikida asi awo kwa pura asi vafe kuna kuparuka simpe. Apa Vakriste ava nyokere po nompo odo, vanekoro novantu womomukunda kuvhura kuvaswaura nokuvanyenga. Nye Vakriste wousili va diva asi  kapi pwa kara vadimu morwa vafe kapi vana kuparuka. (Episarome 115:17) Ava ava hetekere ko kuuyunga novafe awo kuuyunga nonompepo donondona. Nyokera po kulikwatakana nado ndi kulihameka monompo edi da tunda konompepo donondona. *—Resa Deuteronomium 18:10, 11; Jesaya 8:19.

13. Yisinke ya horokera vantu ava ngava tjira nare nompepo donondona?

¹³ Nompepo donondona kapi tupu adi pukisa vantu nye hena kuvatjilisa. Satana nonompepo dendi donondona kuna kara nonyanya ntani vana handuka unene morwa ‘siruwo sina va hupire ko sisupi’ komeho Jehova nga ka va guse po. (Ehororo 12:12, 17) Nye sinzi sovantu ava ngava tjira nompepo donondona kapi vana kuditjira hena ngesi. Ngapi omu va funda po kutjira nompepo donondona?

14. Ngwendi Vakriste womoEfeso, ngapi omu natu vhura kunyokera po nompepo donondona?

¹⁴ Bibeli kututantera omu natu nyokera po nompepo donondona. Pasihonena, vamwe ava va kere mositata saEfeso ngava ruganene kumwe nonompepo donondona komeho va ya lironge usili. Ngapi omu va ya di nyokerere po? Bibeli kutanta asi: “Wovanzi hena ava ngava ruganesa youmpure, tava pongaike nobuke dawo, makura tava di hwike komeho zovantu navenye.” (Yirugana 19:19) Morwa va here kukara Vakriste awo kwa hwikire nobuke dawo doumpure. Ya lifana  naina. Nkenye ogu ana hara kukarera Jehova ga hepa kuzonagura po nkenye yininke eyi ya likwatakana nonompepo donondona. Ayo kwa kwatera mo yiranda nomarugodi gokugamena muntu ndi mukeke, ntani nomutji nonondandani dokugava erago asi muntu a gwane mugara ndi mukadi ndi yirugana ndi asi vantu va mu hare. Kwa kwaterera mo hena mema gemefuta aga ava ruganesa vantu mokulipopera kovarodi.—1 Vakolinte 10:21.

15. Yisinke hena twa hepa kurugana mokurwanesa nompepo donondona?

¹⁵ Konyima zonomvhura kutunda apa va zonagwire nobuke dawo doumpure, mupositoli Paurusa kwa va tjangerere asi simpe va hepa ‘kurwanesa nompepo donondona.’ (Vaefeso 6:12) Nampili ngomu va hwikire nobuke dawo nompepo donondona simpe ngadi hetekere ko kuvakoresa. Yisinke hena va hepere kurugana? Paurusa kwa va tanterere asi: “Unene po damuneni silikandwiso sepuro sokudimisisa yikutji yomundiro, eyi a ponyesa Mudona.” (Vaefeso 6:16) Ngwendi moomu silikandwiso asi popere mukwayita, epuro lyetu kuvhura kutupopera. Nsene tu huguvara mononkondo daJehova, ngatu vhura kurwanesa Satana nonompepo donondona.—Mateusa 17:20.

16. Ngapi omu natu vhura kunkondopeka epuro lyetu mwaJehova?

¹⁶ Ngapi omu natu vhura kunkondopeka epuro lyetu mwaJehova? Twa hepa kuresa Bibeli nkenye ezuva nokulironga kuhuguvara mwendi. Nsene tu kara nepuro lyokupama mwaJehova, Satana nonompepo donondona kapi ngava vhura kutukoresa.—1 Johanesa 5:5.

17. Yisinke hena ngayi tu vatera konompepo donondona?

 ¹⁷ Yisinke hena va hepere kurugana Vakriste womoEfeso? Awo kwa tungire mositata esi sa vhukire nompepo donondona. Paurusa yipo ga va tanterere asi: “Omu kanderere nkenye apa.” (Vaefeso 6:18) Awo va hepere kuhundira ekwafo kwaJehova. Nose kuna kuparuka mouzuni muna vhuka nompepo donondona. Yipo nye nose twa hepa kuhundira Jehova a tu vatere, ntani twa hepa kuruganesa edina lyendi apa atu kanderere. (Resa Yisewe 18:10.) Nsene tu hundira Jehova a tu popere kwaSatana, Jehova nga limburura makanderero getu.—Episarome 145:19; Mateusa 6:13.

18, 19. (a) Yisinke nayi tu vatera tu funde Satana nonompepo donondona? (b) Epuro musinke ngava ka limburura megaununo lyokukwama ko?

¹⁸ Nsene tu zonagura yininke nayinye eyi twa kara nayo ya likwatakana nonompepo donondona nokuhuguvara mwaJehova a tu vatere, kuvhura ngatu rwanese Satana nonompepo donondona. Kapisi hepero kuvatjira. (Resa Jakopo 4:7, 8.) Jehova nonkondo unene kupitakana nompepo donondona. Age kwa di tengekere mosiruwo saNowa, ntani komeho nga ka di zonagura po. (Juda 6) Diworoka asi kapisi nyovelike ono kurwa. Jehova kuna kuruganesa vaengeli vendi mokutupopera. (2 Vahompa 6:15-17) Twa kara nehuguvaro asi mevatero lyaJehova ngatu vhura kufunda Satana nonompepo donondona.—1 Peturusa 5:6, 7; 2 Peturusa 2:9.

¹⁹ Nsene asi Satana nonompepo donondona kuna kuhepeka vantu, morwasinke Karunga ana kudira kuvazonagura po? Epuro olyo ngava ka li limburura megaununo lyokukwama ko.