ບົດທີ 10
ຄວາມຈິງກ່ຽວກັບທູດສະຫວັນແລະປີສາດ
1. ເປັນຫຍັງເຮົາຕ້ອງຮູ້ເລື່ອງທູດສະຫວັນ?
ເຮົາໄດ້ຮູ້ຈັກພະເຢໂຫວາພະເຈົ້າແລ້ວ ແລະຕອນນີ້ພະອົງຢາກໃຫ້ເຮົາຮູ້ຈັກຄອບຄົວຂອງພະອົງເຊິ່ງກໍຄືທູດສະຫວັນ. ຄຳພີໄບເບິນເອີ້ນພວກທູດສະຫວັນວ່າ ‘ລູກຂອງພະເຈົ້າ.’ (ໂຢບ 38:7) ທູດສະຫວັນເຮັດວຽກຫຍັງ? ພວກເຂົາຊ່ວຍຜູ້ຄົນໃນສະໄໝອະດີດແນວໃດ? ແລະຕອນນີ້ພວກເຂົາຊ່ວຍເຮົາໄດ້ບໍ?—ເບິ່ງຄຳອະທິບາຍເພີ່ມເຕີມ 8
2. ທູດສະຫວັນມາຈາກໃສ? ພະເຈົ້າສ້າງທູດສະຫວັນຫຼາຍສ່ຳໃດ?
2 ທູດສະຫວັນມາຈາກໃສ? ໂກໂລຊາຍ 1:16 ບອກວ່າ ຫຼັງຈາກພະເຢໂຫວາສ້າງພະເຢຊູ ພະອົງກໍ “ສ້າງສິ່ງອື່ນໆທັງໝົດໃນສະຫວັນແລະໃນໂລກນີ້.” ສິ່ງທີ່ພະເຈົ້າສ້າງໃນສະຫວັນລວມມີທູດສະຫວັນນຳ. ແລ້ວພະເຈົ້າສ້າງທູດສະຫວັນຈັກອົງ? ຄຳພີໄບເບິນບອກວ່າມີຫຼາຍຮ້ອຍລ້ານອົງ.—ຄຳເພງ 103:20; ພະນິມິດ 5:11
3. ໂຢບ 38:4-7 ບອກຫຍັງກ່ຽວກັບທູດສະຫວັນ?
3 ຄຳພີໄບເບິນຍັງບອກເຮົາອີກວ່າພະເຢໂຫວາສ້າງທູດສະຫວັນໃຫ້ຢູ່ໃນສະຫວັນກ່ອນທີ່ພະອົງຈະສ້າງໂລກກັບມະນຸດ. ທູດສະຫວັນຮູ້ສຶກແນວໃດຕອນທີ່ເຫັນພະເຈົ້າສ້າງໂລກ? ປຶ້ມໂຢບບອກເຮົາວ່າພວກເຂົາດີໃຈຫຼາຍ. ຕອນນັ້ນພວກທູດສະຫວັນເປັນຄອບຄົວທີ່ສະໜິດກັນແລະເຮັດວຽກຮັບໃຊ້ພະເຢໂຫວານຳກັນ.—ໂຢບ 38:4-7
ທູດສະຫວັນຊ່ວຍປະຊາຊົນຂອງພະເຈົ້າ
4. ທູດສະຫວັນສົນໃຈມະນຸດແນວໃດ?
4 ພວກທູດສະຫວັນສົນໃຈມະນຸດມາຕະຫຼອດ ແລະພວກເຂົາກໍສົນໃຈໃນສິ່ງທີ່ພະເຈົ້າຕັ້ງໃຈຈະເຮັດເພື່ອມະນຸດແລະໂລກນຳອີກ. (ສຸພາສິດ 8:30, 31; 1 ເປໂຕ 1:11, 12) ຕອນທີ່ອາດາມກັບເອວາກະບົດ ພວກທູດສະຫວັນເສຍໃຈຫຼາຍ ແລະຕອນນີ້ພວກເຂົາກໍແຮ່ງເສຍໃຈທີ່ເຫັນວ່າຄົນສ່ວນຫຼາຍບໍ່ເຊື່ອຟັງພະເຢໂຫວາ. ແຕ່ຖ້າມີບາງຄົນກັບໃຈແລະກັບມາຫາພະເຢໂຫວາ ພວກທູດສະຫວັນກໍດີໃຈຫຼາຍ. (ລູກາ 15:10) ເຮົາເຫັນວ່າທູດສະຫວັນສົນໃຈຄົນທີ່ຮັບໃຊ້ພະເຈົ້າຫຼາຍແທ້ໆ. ນອກຈາກນັ້ນ ພະເຢໂຫວາໃຊ້ທູດສະຫວັນໃຫ້ຊ່ວຍແລະປົກປ້ອງຄຸ້ມຄອງຄົນທີ່ເຮັດວຽກຮັບໃຊ້ພະອົງໃນໂລກ. (ເຮັບເຣີ 1:7, 14) ຂໍໃຫ້ເຮົາມາເບິ່ງບາງຕົວຢ່າງນຳກັນ.
‘ພະເຈົ້າຂອງຜູ້ຂ້າໄດ້ໃຊ້ທູດ [ສະຫວັນ] ອັດປາກສິງ.’—ດານຽນ 6:22
5. ໃນອະດີດ ທູດສະຫວັນໄດ້ຊ່ວຍຜູ້ຮັບໃຊ້ຂອງພະເຈົ້າແນວໃດ?
5 ພະເຢໂຫວາສົ່ງທູດສະຫວັນ 2 ອົງມາຊ່ວຍໂລດກັບຄອບຄົວໃຫ້ລອດຕອນທີ່ພະອົງທຳລາຍເມືອງຊໍດົມແລະເມືອງໂຄໂມລາ. (ຕົ້ນເດີມ 19:15, 16) ຫຼາຍຮ້ອຍປີຕໍ່ມາ ຜູ້ພະຍາກອນດານີເອນຖືກຈັບໂຍນລົງໃນຂຸມໃຫຍ່ທີ່ມີສິງ ແຕ່ລາວກໍບໍ່ເປັນຫຍັງ ຍ້ອນ ‘ພະເຈົ້າໄດ້ໃຊ້ທູດ [ສະຫວັນ] ອັດປາກສິງ.’ (ດານຽນ 6:22) ສະໄໝຕໍ່ມາ ຕອນທີ່ອັກຄະສາວົກເປໂຕຖືກຄຸກ ພະເຢໂຫວາກໍສົ່ງທູດສະຫວັນມາປ່ອຍລາວອອກຈາກຄຸກ. (ກິດຈະການ 12:6-11) ນອກຈາກນັ້ນ ທູດສະຫວັນຍັງໄດ້ຊ່ວຍພະເຢຊູຕອນທີ່ເພິ່ນຢູ່ໃນໂລກ. ຕົວຢ່າງເຊັ່ນ: ຫຼັງຈາກທີ່ພະເຢຊູຮັບບັບເຕມາ ມີ “ທູດສະຫວັນໄດ້ເຝົ້າເບິ່ງແຍງເພິ່ນ.” (ມາຣະໂກ 1:13) ກ່ອນທີ່ພະເຢຊູຈະຖືກປະຫານມີທູດສະຫວັນອົງໜຶ່ງມາ “ໃຫ້ກຳລັງໃຈເພິ່ນ.”—ລູກາ 22:43
6. (ກ) ເຮົາຮູ້ໄດ້ແນວໃດວ່າທູດສະຫວັນຊ່ວຍຜູ້ຮັບໃຊ້ຂອງພະເຈົ້າໃນທຸກມື້ນີ້? (ຂ) ໃນບົດນີ້ເຮົາຈະໄດ້ຄຳຕອບຂອງຄຳຖາມຫຍັງແດ່?
6 ໃນທຸກມື້ນີ້ ທູດສະຫວັນບໍ່ໄດ້ມາປາກົດຕົວໃຫ້ມະນຸດເຫັນອີກແລ້ວ. ແຕ່ພະເຈົ້າກໍຍັງໃຊ້ທູດສະຫວັນໃຫ້ຊ່ວຍເຫຼືອຜູ້ຮັບໃຊ້ຂອງພະອົງ. ຄຳພີໄບເບິນບອກວ່າ: “ທູດຂອງພະເຢໂຫວາກໍຕັ້ງຢູ່ອ້ອມຮອບຄົນທັງຫຼາຍທີ່ຢ້ານຢຳພະອົງແລະຊ່ອຍເຂົາໃຫ້ພົ້ນ.” (ຄຳເພງ 34:7) ເປັນຫຍັງທູດສະຫວັນຕ້ອງຊ່ວຍເຮົາ? ຍ້ອນເຮົາມີສັດຕູທີ່ມີອຳນາດຫຼາຍແລະພວກມັນກໍຈອບຈະທຳຮ້າຍເຮົາ. ພວກມັນແມ່ນໃຜ? ມາຈາກໃສ? ແລະພະຍາຍາມຈະເຮັດຫຍັງເຮົາ? ເພື່ອຈະຕອບຄຳຖາມເຫຼົ່ານີ້ໄດ້ ໃຫ້ເຮົາມາເບິ່ງວ່າເກີດຫຍັງຂຶ້ນຫຼັງຈາກທີ່ອາດາມກັບເອວາຖືກສ້າງໄດ້ບໍ່ດົນ.
ສັດຕູທີ່ເຮົາເບິ່ງບໍ່ເຫັນ
7. ຊາຕານຢາກໃຫ້ມະນຸດເຮັດຫຍັງ?
7 ເຮົາໄດ້ຮຽນໃນບົດທີ 3 ແລ້ວວ່າມີທູດສະຫວັນອົງໜຶ່ງກະບົດຕໍ່ພະເຈົ້າແລະຢາກປົກຄອງມະນຸດ. ຄຳພີໄບເບິນເອີ້ນມັນວ່າມານຊາຕານ. (ພະນິມິດ 12:9) ຊາຕານຢາກໃຫ້ມະນຸດກະບົດຕໍ່ພະເຈົ້າຄືກັນ. ມັນລໍ້ລວງເອວາໄດ້ສຳເລັດ ແລະຕັ້ງແຕ່ນັ້ນມາມັນກໍລໍ້ລວງຜູ້ຄົນສ່ວນຫຼາຍໃນໂລກ. ແຕ່ກໍມີບາງຄົນທີ່ມັນລໍ້ລວງບໍ່ສຳເລັດ ເຊັ່ນ: ອາເບັນ ເອນົກ ແລະໂນອາ ຍ້ອນພວກເຂົາສັດຊື່ພັກດີຕໍ່ພະເຢໂຫວາສະເໝີ.—ເຮັບເຣີ 11:4, 5, 7
8. (ກ) ທູດສະຫວັນບາງອົງກາຍເປັນປີສາດໄດ້ແນວໃດ? (ຂ) ພວກປີສາດລອດຈາກນ້ຳຖ້ວມໄດ້ແນວໃດ?
8 ໃນສະໄໝຂອງໂນອາ ທູດສະຫວັນບາງອົງໄດ້ກະບົດຕໍ່ພະເຢໂຫວາ ແລະຖິ້ມບ່ອນຢູ່ໃນສະຫວັນແລ້ວແປງກາຍເປັນມະນຸດມາຢູ່ໃນໂລກ. ເປັນຫຍັງພວກມັນເຮັດແບບນັ້ນ? ຄຳພີໄບເບິນບອກເຮົາວ່າ ພວກມັນຢາກໄດ້ມະນຸດເປັນເມຍ. (ອ່ານຕົ້ນເດີມ 6:2) ແຕ່ການທີ່ທູດສະຫວັນເຮັດແບບນີ້ເປັນເລື່ອງທີ່ຜິດ. (ຢູດາ 6) ຄົນສ່ວນຫຼາຍໃນສະໄໝນັ້ນກໍເປັນຄືກັບທູດສະຫວັນຊົ່ວເຫຼົ່ານີ້ ພວກເຂົາເຮັດສິ່ງທີ່ຜິດ ເປັນຄົນຂີ້ຕົວະຫຼອກລວງ ແລະມັກຄວາມຮຸນແຮງ. ດັ່ງນັ້ນ ພະເຢໂຫວາຈຶ່ງຕັດສິນໃຈທຳລາຍຄົນຊົ່ວເຫຼົ່ານັ້ນໂດຍເຮັດໃຫ້ນ້ຳຖ້ວມໂລກ. ແຕ່ພະອົງຊ່ວຍຜູ້ຮັບໃຊ້ທີ່ສັດຊື່ຂອງພະອົງໃຫ້ປອດໄພ. (ຕົ້ນເດີມ 7:17, 23) ສ່ວນພວກທູດສະຫວັນຊົ່ວກໍໜີເອົາໂຕລອດກັບໄປສະຫວັນ. ຄຳພີໄບເບິນເອີ້ນທູດສະຫວັນຊົ່ວເຫຼົ່ານີ້ວ່າພວກປີສາດ. ພວກມັນກະບົດແລະເລືອກຢູ່ຝ່າຍຊາຕານ ຊາຕານຈຶ່ງກາຍເປັນຫົວໜ້າຂອງພວກມັນ.—ມັດທາຍ 9:34
9. (ກ) ເກີດຫຍັງຂຶ້ນກັບພວກປີສາດຕອນທີ່ພວກມັນກັບໄປສະຫວັນ? (ຂ) ຕໍ່ຈາກນີ້ເຮົາຈະຮຽນເລື່ອງຫຍັງ?
9 ຍ້ອນພວກປີສາດກະບົດຕໍ່ພະເຢໂຫວາ ເມື່ອພວກມັນກັບໄປສະຫວັນ ພະອົງຈຶ່ງບໍ່ຍອມໃຫ້ພວກມັນຢູ່ໃນຄອບຄົວຂອງພະອົງອີກ. (2 ເປໂຕ 2:4) ເຖິງວ່າພວກປີສາດແປງກາຍເປັນມະນຸດບໍ່ໄດ້ອີກແລ້ວ ແຕ່ພວກມັນກໍຍັງ “ລໍ້ລວງທົ່ວໂລກໃຫ້ຫຼົງຜິດ.” (ພະນິມິດ 12:9; 1 ໂຢຮັນ 5:19) ໃຫ້ເຮົາມາເບິ່ງວິທີທີ່ພວກປີສາດໃຊ້ເພື່ອລໍ້ລວງຜູ້ຄົນຈຳນວນຫຼາຍ.—ອ່ານ 2 ໂກຣິນໂທ 2:11
ວິທີທີ່ພວກປີສາດໃຊ້ເພື່ອລໍ້ລວງຜູ້ຄົນ
10. ພວກປີສາດໃຊ້ວິທີໃດເພື່ອລໍ້ລວງຜູ້ຄົນ?
10 ພວກປີສາດໃຊ້ຫຼາຍວິທີເພື່ອລໍ້ລວງຜູ້ຄົນ. ວິທີໜຶ່ງກໍຄືເລື່ອງກ່ຽວກັບໄສຍະສາດຫຼືເວດມົນຄາຖາ ຜູ້ຄົນຕິດກັບດັກປີສາດໂດຍກົງຫຼືຜ່ານທາງຄົນອື່ນ ເຊັ່ນ: ໝໍຜີຫຼືຄົນຊົງ. ແຕ່ຄຳພີໄບເບິນສັ່ງເຮົາບໍ່ໃຫ້ເຂົ້າໄປຫຍຸ້ງກ່ຽວກັບສິ່ງໃດກໍຕາມທີ່ກ່ຽວຂ້ອງກັບພວກປີສາດ. (ຄາລາເຕຍ 5:19-21) ຍ້ອນຫຍັງ? ຍ້ອນພວກປີສາດໃຊ້ວິທີເຫຼົ່ານີ້ເພື່ອລໍ້ລວງຜູ້ຄົນໃຫ້ຕິດກັບດັກແລະຕົກຢູ່ໃຕ້ອຳນາດຂອງມັນ ຄືກັບທີ່ນາຍພານໃຊ້ກັບດັກເພື່ອຈັບສັດ.—ເບິ່ງຄຳອະທິບາຍເພີ່ມເຕີມ 26.
11. ການທຳນາຍອະນາຄົດມີຫຍັງແດ່ ແລະເປັນຫຍັງເຮົາບໍ່ຄວນເຂົ້າໄປຫຍຸ້ງກ່ຽວ?
11 ກັບດັກຢ່າງໜຶ່ງທີ່ມັນໃຊ້ແມ່ນການທຳນາຍອະນາຄົດ ເຊິ່ງເປັນການໃຊ້ພະລັງເລິກລັບເໜືອທຳມະຊາດເພື່ອຈະຮູ້ອະນາຄົດຫຼືສິ່ງທີ່ຢາກຮູ້. ບາງຄົນຊອກເລີກຊອກຍາມ ເບິ່ງໄພ້ ເບິ່ງລາຍມື ທຳນາຍຄວາມຝັນ ດູດວງ ຫຼືເບິ່ງໂຫລາສາດ. ຫຼາຍຄົນຄິດວ່າການເຮັດແບບນີ້ບໍ່ມີພິດບໍ່ມີໄພຫຍັງ ແຕ່ແທ້ໆແລ້ວເປັນອັນຕະລາຍຫຼາຍ. ຕົວຢ່າງເຊັ່ນ: ຄຳພີໄບເບິນບອກໃຫ້ຮູ້ວ່າໝໍດູກັບປີສາດເຮັດວຽກນຳກັນ. ໃນກິດຈະການ 16:16-18 ບອກວ່າມີ ‘ປີສາດທີ່ເຮັດໃຫ້ທຳນາຍອະນາຄົດໄດ້’ ເຊິ່ງຊ່ວຍເດັກນ້ອຍຜູ້ຍິງຄົນໜຶ່ງໃຫ້ “ທຳນາຍໂຊກຊະຕາ.” ແຕ່ຫຼັງຈາກທີ່ອັກຄະສາວົກໂປໂລໄລ່ປີສາດອອກໄປຈາກເດັກນ້ອຍຄົນນີ້ ລາວກໍບໍ່ສາມາດທຳນາຍອະນາຄົດໄດ້ອີກເລີຍ.
12. (ກ) ເປັນຫຍັງການຕິດຕໍ່ກັບຄົນຕາຍຈຶ່ງເປັນອັນຕະລາຍ? (ຂ) ເປັນຫຍັງຄົນທີ່ນະມັດສະການພະເຈົ້າຕ້ອງລະວັງພິທີບາງຢ່າງທີ່ກ່ຽວຂ້ອງກັບຄົນຕາຍ?
12 ພວກປີສາດຍັງໃຊ້ກັບດັກອີກຢ່າງໜຶ່ງເພື່ອເຮັດໃຫ້ຄົນຕິດກັບດັກ. ພວກມັນພະຍາຍາມເຮັດໃຫ້ເຮົາເຊື່ອວ່າຄົນທີ່ຕາຍໄປແລ້ວຍັງຢູ່ບ່ອນໃດບ່ອນໜຶ່ງ ພວກເຂົາສາມາດເວົ້າລົມກັບເຮົາ ຊ່ວຍເຫຼືອຫຼືທຳຮ້າຍເຮົາກໍໄດ້. ຕົວຢ່າງເຊັ່ນ: ບາງຄົນເມື່ອໝູ່ຫຼືຍາດພີ່ນ້ອງຕາຍ ພວກເຂົາກໍຈະໄປຫາຄົນຊົງທີ່ອ້າງວ່າສາມາດຕິດຕໍ່ກັບຄົນຕາຍໄດ້ ແລະຄົນຊົງກໍອາດບອກບາງຢ່າງກ່ຽວກັບຄົນຕາຍໄດ້ຖືກຕ້ອງ ຫຼືເຖິງຂັ້ນຮຽນແບບສຽງຂອງຄົນຕາຍໄດ້ນຳອີກ. (1 ຊາເມືອນ 28:3-19) ການຕິດຕໍ່ກັບຄົນຕາຍເປັນອັນຕະລາຍຫຼາຍ. ເຮົາອາດຄິດວ່າເຮົາກຳລັງເວົ້າລົມກັບຄົນຕາຍ ແຕ່ແທ້ໆແລ້ວເຮົາກຳລັງຕິດຕໍ່ກັບພວກປີສາດ. ນອກຈາກນັ້ນ ເຮົາຍັງຕ້ອງລະວັງກ່ຽວກັບພິທີຕ່າງໆໃນງານສົບ ນີ້ລວມເຖິງພິທີໄວ້ທຸກໃຫ້ຄົນຕາຍ ອຸທິດສ່ວນກຸສົນໃຫ້ຄົນຕາຍ ເຮັດບຸນໃຫ້ຄົນຕາຍ ຫຼືການຈັດງານຄົບຮອບວັນຕາຍ. ການເຮັດພິທີຕ່າງໆເຫຼົ່ານີ້ເປັນການເຂົ້າໄປຫຍຸ້ງກ່ຽວກັບພວກປີສາດ. ເມື່ອຄລິດສະຕຽນບໍ່ຮ່ວມເຮັດພິທີກຳເຫຼົ່ານີ້ກໍອາດຖືກຍາດພີ່ນ້ອງລວມທັງຄົນທີ່ຢູ່ແຖວບ້ານເວົ້າໃຫ້ ວິພາກວິຈານ ຫຼືເຊົາໄປມາຫາສູ່. ແຕ່ຄລິດສະຕຽນຮູ້ວ່າຄົນຕາຍແລ້ວບໍ່ມີຫຍັງເຫຼືອຢູ່ຈຶ່ງເປັນໄປບໍ່ໄດ້ທີ່ຈະຕິດຕໍ່ກັບພວກເຂົາ ແລະພວກເຂົາກໍບໍ່ສາມາດຊ່ວຍເຫຼືອຫຼືທຳຮ້າຍເຮົາໄດ້. (ຄຳເພງ 115:17) ເຮົາຕ້ອງລະວັງ ຢ່າຕິດຕໍ່ກັບຄົນຕາຍຫຼືພວກປີສາດ ແລະຢ່າຫຍຸ້ງກ່ຽວກັບພິທີຕ່າງໆທີ່ກ່ຽວຂ້ອງກັບພວກປີສາດ.—ອ່ານພະບັນຍັດ 18:10, 11; ເອຊາອີ 8:19
13. ຫຼາຍຄົນທີ່ເຄີຍຢ້ານພວກປີສາດ ແຕ່ຕອນນີ້ເປັນແນວໃດ?
13 ພວກປີສາດບໍ່ພຽງແຕ່ໃຊ້ເລ່ຫຼ່ຽມເພື່ອລໍ້ລວງຜູ້ຄົນ ແຕ່ພວກມັນຍັງເຮັດໃຫ້ຄົນຢ້ານນຳອີກ. ຕອນນີ້ ຊາຕານກັບປີສາດພັກພວກຂອງມັນຮູ້ວ່າ “ເວລາຂອງມັນເຫຼືອແຕ່ໜ້ອຍດຽວ” ກ່ອນທີ່ພະເຈົ້າຈະຈັດການພວກມັນ ດັ່ງນັ້ນ ພວກມັນຈຶ່ງໂຫດຫ້ຽມຫຼາຍກວ່າແຕ່ກ່ອນ. (ພະນິມິດ 12:12, 17) ເຖິງວ່າມີຫຼາຍຄົນເຄີຍຢ້ານປີສາດ ແຕ່ຕອນນີ້ພວກເຂົາບໍ່ຢ້ານພວກມັນອີກແລ້ວແລະຫຼຸດພົ້ນຈາກພວກມັນໄດ້. ພວກເຂົາເຮັດໄດ້ແນວໃດ?
ຕໍ່ສູ້ກັບປີສາດແລະຫຼຸດພົ້ນຈາກພວກມັນ
14. ເຮົາຈະຫຼຸດພົ້ນຈາກພວກປີສາດຄືກັບຄລິດສະຕຽນໃນເມືອງເອເຟໂຊໄດ້ແນວໃດ?
14 ຄຳພີໄບເບິນບອກວິທີທີ່ເຮົາຈະຕໍ່ສູ້ກັບປີສາດແລະຫຼຸດພົ້ນຈາກພວກມັນ. ຕົວຢ່າງເຊັ່ນ: ມີບາງຄົນໃນເມືອງເອເຟໂຊທີ່ເຄີຍຕິດຕໍ່ກ່ຽວຂ້ອງກັບພວກປີສາດກ່ອນມາຮຽນຄວາມຈິງ. ພວກເຂົາຫຼຸດພົ້ນຈາກພວກປີສາດໄດ້ແນວໃດ? ຄຳພີໄບເບິນບອກວ່າ: “ຫຼາຍຄົນທີ່ເຄີຍໃຊ້ເວດມົນຄາຖາກໍເອົາມ້ວນໜັງສືຂອງພວກເຂົາມາກອງລວມກັນແລ້ວເຜົາຕໍ່ໜ້າທຸກຄົນ.” (ກິດຈະການ 19:19) ເນື່ອງຈາກພວກເຂົາຢາກເປັນຄລິດສະຕຽນ ພວກເຂົາຈຶ່ງທຳລາຍມ້ວນໜັງສືທັງໝົດທີ່ກ່ຽວຂ້ອງກັບເວດມົນຄາຖາ. ທຸກມື້ນີ້ກໍຄືກັນ ຄົນທີ່ຢາກຮັບໃຊ້ພະເຢໂຫວາຕ້ອງທຳລາຍເຄື່ອງຂອງທຸກຢ່າງທີ່ກ່ຽວຂ້ອງກັບພວກປີສາດ ເວດມົນຄາຖາ ຫຼືເລື່ອງເລິກລັບເໜືອທຳມະຊາດ ລວມທັງເຄື່ອງຂອງບາງຢ່າງທີ່ອາດເບິ່ງຄືວ່າເປັນພຽງແຕ່ສິ່ງທີ່ໃຫ້ຄວາມມ່ວນຊື່ນທີ່ບໍ່ມີພິດບໍ່ມີໄພຫຍັງ ເຊັ່ນ: ຮູບພາບ ເພງ ໜັງ ເກມ ປຶ້ມ ແມ່ນແຕ່ເຄື່ອງລາງຂອງຂັງທີ່ອາດຄິດວ່າຈະປົກປ້ອງຄຸ້ມຄອງຈາກສິ່ງທີ່ບໍ່ດີກໍຕ້ອງທຳລາຍຄືກັນ.—1 ໂກຣິນໂທ 10:21
15. ເຮົາຕ້ອງເຮັດຫຍັງອີກເພື່ອຕໍ່ສູ້ກັບຊາຕານແລະພວກປີສາດ?
15 ທັງໆທີ່ຄົນໃນເມືອງເອເຟໂຊທຳລາຍມ້ວນໜັງສືທີ່ກ່ຽວຂ້ອງກັບພວກປີສາດໄດ້ຫຼາຍປີແລ້ວ ແຕ່ອັກຄະສາວົກໂປໂລກໍຍັງຂຽນຈົດໝາຍບອກພວກເຂົາວ່າ ພວກເຂົາຍັງຕ້ອງ “ຕໍ່ສູ້ກັບກອງທັບປີສາດຊົ່ວ” ຕໍ່ໄປ. (ເອເຟໂຊ 6:12) ເຖິງວ່າພວກເຂົາຈູດມ້ວນໜັງສືເຫຼົ່ານັ້ນຖິ້ມແລ້ວ ແຕ່ພວກປີສາດກໍຍັງຫາທາງທຳຮ້າຍພວກເຂົາຢູ່. ດັ່ງນັ້ນ ພວກເຂົາຕ້ອງເຮັດຫຍັງ? ໂປໂລບອກວ່າ: “ໃຫ້ເອົາຄວາມເຊື່ອເປັນໂລ້ໃຫຍ່ເພື່ອຈະມອດ [ຫຼືຢຸດ] ລູກທະນູໄຟທຸກດອກຂອງຕົວຊົ່ວຮ້າຍໄດ້.” (ເອເຟໂຊ 6:16) ຄືກັບໂລ້ທີ່ທະຫານໃຊ້ເພື່ອປ້ອງກັນຕົວໃນສະໄໝກ່ອນ ຄວາມເຊື່ອກໍສາມາດປ້ອງກັນເຮົາໄວ້ຈາກພວກປີສາດໄດ້. ຖ້າເຮົາເຊື່ອແລະໝັ້ນໃຈແທ້ໆວ່າພະເຢໂຫວາປົກປ້ອງຄຸ້ມຄອງເຮົາໄດ້ ເຮົາກໍຈະຕໍ່ສູ້ກັບຊາຕານແລະພວກປີສາດໄດ້.—ມັດທາຍ 17:20
16. ເຮົາຈະເຮັດໃຫ້ຄວາມເຊື່ອຂອງເຮົາທີ່ມີຕໍ່ພະເຢໂຫວາເຂັ້ມແຂງຂຶ້ນໄດ້ແນວໃດ?
16 ເຮົາຈະເຮັດໃຫ້ຄວາມເຊື່ອຂອງເຮົາທີ່ມີຕໍ່ພະເຢໂຫວາເຂັ້ມແຂງຂຶ້ນໄດ້ແນວໃດ? ເຮົາຕ້ອງອ່ານຄຳພີໄບເບິນທຸກໆມື້ແລະຝຶກທີ່ຈະວາງໃຈໃຫ້ພະເຢໂຫວາປົກປ້ອງຄຸ້ມຄອງເຮົາ. ຖ້າເຮົາເຊື່ອໝັ້ນໃນພະອົງແທ້ໆ ຊາຕານກັບພວກປີສາດກໍທຳຮ້າຍເຮົາບໍ່ໄດ້.—1 ໂຢຮັນ 5:5
17. ມີຫຍັງອີກທີ່ຈະປົກປ້ອງຄຸ້ມຄອງເຮົາຈາກພວກປີສາດ?
17 ຄລິດສະຕຽນໃນເມືອງເອເຟໂຊຕ້ອງເຮັດຫຍັງອີກ? ເນື່ອງຈາກພວກເຂົາຢູ່ໃນເມືອງທີ່ມີແຕ່ເລື່ອງທີ່ກ່ຽວຂ້ອງກັບພວກປີສາດ ໂປໂລຈຶ່ງບອກພວກເຂົາວ່າ: “ໃຫ້ອະທິດຖານຕໍ່ໆໄປໃນທຸກໂອກາດ.” (ເອເຟໂຊ 6:18) ພວກເຂົາຕ້ອງຂໍໃຫ້ພະເຢໂຫວາປົກປ້ອງຄຸ້ມຄອງພວກເຂົາຕະຫຼອດເວລາ. ແລ້ວເຮົາເດ? ເຮົາກໍຢູ່ໃນໂລກທີ່ມີແຕ່ເລື່ອງທີ່ກ່ຽວຂ້ອງກັບພວກປີສາດ ເຮົາເອງກໍຕ້ອງຂໍໃຫ້ພະເຢໂຫວາປົກປ້ອງຄຸ້ມຄອງເຮົາໂດຍການອະທິດຖານອອກຊື່ພະອົງ. (ອ່ານສຸພາສິດ 18:10) ຖ້າເຮົາອະທິດຖານຂໍໃຫ້ພະເຢໂຫວາຊ່ວຍເຮົາໃຫ້ຫຼຸດພົ້ນຈາກຊາຕານ ພະອົງກໍຈະຊ່ວຍເຮົາ.—ຄຳເພງ 145:19; ມັດທາຍ 6:13
18, 19. (ກ) ເຮົາຈະຊະນະຊາຕານກັບພວກປີສາດໄດ້ແນວໃດ? (ຂ) ໃນບົດຕໍ່ໄປຈະຕອບຄຳຖາມຫຍັງ?
18 ຖ້າເຮົາທຳລາຍເຄື່ອງຂອງທຸກຢ່າງທີ່ກ່ຽວຂ້ອງກັບພວກປີສາດແລະວາງໃຈໃຫ້ພະເຢໂຫວາປົກປ້ອງຄຸ້ມຄອງເຮົາ ເຮົາກໍຈະຕໍ່ສູ້ກັບຊາຕານແລະພວກປີສາດໄດ້. ເຮົາບໍ່ຕ້ອງຢ້ານພວກມັນອີກຕໍ່ໄປ. (ອ່ານຢາໂກໂບ 4:7, 8) ພະເຢໂຫວາມີລິດເດດຫຼາຍກວ່າພວກປີສາດ. ພະອົງເຄີຍລົງໂທດພວກມັນມາແລ້ວໃນສະໄໝຂອງໂນອາ ແລະອີກບໍ່ດົນພະອົງກໍຈະທຳລາຍພວກມັນຈົນບໍ່ເຫຼືອຊາກ. (ຢູດາ 6) ຢ່າລືມວ່າ ເຮົາບໍ່ໄດ້ຕໍ່ສູ້ກັບພວກມັນຕາມລຳພັງ. ພະເຢໂຫວາໃຊ້ທູດສະຫວັນໃຫ້ປົກປ້ອງຄຸ້ມຄອງເຮົາ. (2 ກະສັດ 6:15-17) ເຮົາໝັ້ນໃຈໄດ້ວ່າພະເຢໂຫວາຈະຊ່ວຍເຮົາໃຫ້ຊະນະຊາຕານກັບພວກປີສາດໄດ້ແນ່ນອນ.—1 ເປໂຕ 5:6, 7; 2 ເປໂຕ 2:9
19 ໃນເມື່ອຊາຕານກັບພວກປີສາດເປັນຕົ້ນເຫດທີ່ເຮັດໃຫ້ມະນຸດຕ້ອງທຸກລຳບາກຫຼາຍ ແລ້ວເປັນຫຍັງພະເຈົ້າຈຶ່ງບໍ່ທຳລາຍພວກມັນ? ໃນບົດຕໍ່ໄປຈະຕອບຄຳຖາມນີ້.
