1. Engvângin nge vântirkohte chungchâng kan zir?

JEHOVA chuan a chhûngkaw chungchâng kan hriat a duh a. A chhûngkaw zîngah chuan vântirhkohte an tel a, Bible chuan anni chu “Pathian fate,” tiin a ko a ni. (Joba 38:7) A nih leh, vântirhkohte hian eng nge an thawh? Hmân laiah engtin nge mihringte an lo ṭanpui ṭhin? Tûn laiah min la ṭanpui thei em?—Endnote 8-na en rawh.

2. Vântirhkohte chu khawi aṭanga lo awm ṭan nge an nih? Vântirhkoh eng zât nge awm?

² Vântirhkohte lo awm ṭan dân kan hriat a ngai a. Kolossa 1:16 chuan Jehova’n Isua a siam hnuah ‘vâna awmte leh leia awmte pawh tiamin engkim a siam’ thu min hrilh a. Chûng zîngah chuan vântirhkohte an tel a ni. Vântirhkoh eng zât nge siam an nih? Bible chuan vântirhkoh maktaduai za têl an awm thu a sawi a ni.—Sâm 103:20; Thu Puan 5:11.

3. Vântirhkohte chungchângah Joba 38:4-7 chuan eng nge min hrilh?

³ Jehova chuan leilung a siam hma daihin vântirhkohte a siam tih Bible chuan min hrilh a. Leilung an hmuh hun chuan engtin nge an awm? Joba bu chuan an hlim hle tih min hrilh a. Anni chu Jehova rawngbâwl tlâng chhûngkaw inpawh tak an ni.—Joba 38:4-7.

4. Engtin nge vântirhkohte’n mihringte an ngaihven tih kan hriat?

⁴ Vântirhkohte chuan mihringte bâkah, leilung leh mihringte tâna Jehova thiltum chu an ngaihven reng a.  (Thufingte 8:30, 31; 1 Petera 1:11, 12) Adama leh Evi an hel khân pawi an ti hle dâwn tih chu rinhlelh rual a ni lo. Tûnah phei chuan mi tam zâwkin Jehova thu an âwih si lo va, pawi an ti lehzual ngei ang. Mahse, inchhîra Pathian lama rawn hawi an awm apiangin an lâwm hle a ni. (Luka 15:10) Chu bâkah, vântirhkohte chuan Pathian rawngbâwltute pawh an ngaihven hle bawk. Jehova chuan leia a chhiahhlawhte ṭanpui a, vênghim tûrin anni chu a hmang ṭhîn a ni. (Hebrai 1:7, 14) A hman dân ṭhenkhat chu i lo en ang u.

5. Engtin nge vântirhkohte’n hmân laia Pathian chhiahhlawhte an lo ṭanpui?

⁵ Jehova chuan Sodom leh Gomorra khawpui chhiatna  laka Lota te chhûngkua chhan chhuak tûrin vântirhkoh pahnih a tîr a. (Genesis 19:15, 16) A hnu kum za tam takah, zâwlnei Daniela chu sakeibaknei pûka paih a ni a; mahse, ‘Pathianin a vântirhkoh rawn tîr a, sakeibaknei kâte a tihchîp’ avângin tihnat a ni lo. (Daniela 6:22) A hnua tirhkoh Petera tân ina a tân pawh khân chhan chhuak tûrin Jehova chuan vântirhkoh pakhat a tîr leh a ni. (Tirhkohte 12:6-11) Chu bâkah, Isua leia a awm lai khân vântirhkohte chuan an ṭanpui bawk. Entîr nân, baptisma a chan hnuah “vântirhkohte chuan a rawng an bâwlsak a.” (Marka 1:13) Tihhlum a nih hma zânah pawh vântirhkoh pakhatin a rawn “tiharh,” a nih loh leh a rawn tichak a ni.—Luka 22:43.

6. (a) Engtin nge vântirhkohte’n tûn laia Pathian mite an ṭanpui tih kan hriat? (b) Eng zawhnate chhânna nge kan bih chian dâwn?

⁶ Tûn laiah, vântirhkohte chu an inlâr tawh lo va. Mahse, Pathianin a chhiahhlawhte ṭanpui tûrin a la hmang reng tho a ni. Bible chuan: “Amah ṭihtute chu, an vêlah LALPA vântirhkoh chuan a awm chilh a, a chhanhim ṭhîn,” a ti. (Sâm 34:7) A nih leh, engvângin nge vênhim kan ngaih? Min tihnat tum hmêlma thiltithei tak takte an awm vâng a ni. Chûng chu tute nge ni? Khawi aṭanga lo awm nge an nih? Engtin nge tihnat min tum? A chhânna hriat nân, Adama leh Evi siam an nih hnu lawka thilthleng kha i lo bih chiang ang u.

7. Setana bumna chu eng ang khawpin nge a hlawhtlin?

⁷ Bung 3-naah khân, vântirhkoh pakhat chu Pathian laka helin, mi dangte chunga rorêl a duh tih kan hre tawh a. Chu vântirhkoh chu Bible chuan Diabol-Setana a ti a. (Thu Puan 12:9) Setana chuan mi dangte pawh Pathian laka hel tûrin a duh a. Evi a bum a, chumi hnuah khawvêla mi a tam zâwkte chu a bum thlu leh a ni.  Mahse, Abela, Enoka, leh Nova te ang mi ṭhenkhat chu Jehova chungah an rinawm tlat a ni.—Hebrai 11:4, 5, 7.

8. (a) Engtin nge vântirhkoh ṭhenkhat chu ramhuaite an lo nih? (b) Tuilêta dam chhuak tûrin ramhuaite chuan eng nge an tih?

⁸ Nova hun lai khân vântirhkoh ṭhenkhat chu an hel a, an vân in kalsanin leiah mihring angin an rawn awm a. Engvângin nge? Bible chuan nupui an neih duh vâng a ni tih min hrilh a ni. (Genesis 6:2 chhiar rawh.) Mahse, vântirhkohte tân chutianga awm chu a dik lo. (Juda 6) Chûng vântirhkoh sualte ang bawkin, chutih hun laia mi a tam zâwkte nungchang chu a bawlhhlawhin, a râwng hle a. Chuvângin, Jehova’n mi sualte chu khawvêl pum tui lêta tihboral a tum ta a. Mahse, a chhiahhlawh rinawmte chu a chhan chhuak a ni. (Genesis 7:17, 23) Vântirhkoh suaksualte chu an himna tûrin vânah an chho leh a. Bible chuan anni chu ramhuaite tiin a ko va. Setana helnaa an tel avângin ani chu an lal a rawn ni ta a ni.—Matthaia 9:34.

9. (a) Ramhuaiho vâna an chhoh leh khân eng thil nge thleng? (b) Tûnah eng nge kan zir dâwn?

⁹ Ramhuaite chu an hel avângin Jehova chuan a chhûngkaw zîngah a pawm tawh lo va. (2 Petera 2:4) Mihringah pawh an chang thei tawh lo; mahse, ‘khawvêl zawng zawng chu an la bum’ reng tho a ni. (Thu Puan 12:9; 1 Johana 5:19) Tûnah, mi tam takte an bum, a nih loh leh an hruai sual theih dân i lo zir ang u.—2 Korinth 2:11 chhiar rawh.

10. Engtin nge ramhuaite’n mite an bum?

¹⁰ Ramhuaite chuan mite chu kawng chi hrang hrangin an bum a. Mite’n ramhuaite chu direct-in emaw, ramhuai zâwl, a nih loh leh dawithiam emaw hmangin an be pawh ṭhîn. Chutianga ramhuai nêna  inbiakna chu ramhuai zâwlna, a nih loh leh dawithiamna tia koh a ni. Mahse, Bible chuan ramhuaite nêna inzawmna thil rêng rêng laka inthiarfihlîm tûrin thu min pe a. (Galatia 5:19-21) Engvângin nge? Sapêl miin ramsate man nâna thang a hmang angin, ramhuaite chuan mite man a, an thunun theih nân bumna an hman vâng a ni.—Endnote 25-na en rawh.

11. Ai en chu eng nge ni a, engvângin nge kan tih loh vang?

¹¹ An bumnate zînga pakhat chu aienna a ni a. Chu chu hma lam hun, a nih loh leh thil hriat lohte hriat nâna tisa khawvêl piah lama thiltihtheihna hman hi a ni a. Tuemaw chuan arsi en te, mumang hrilhfiah te, lehkhaden te, a nih loh leh kutze en te hmangin tih a tum thei a ni. Mi tam tak chuan hêng thilte hi a hlauhawm lovah an ngai a; mahse, chutiang a ni lo. A nihna takah chuan thil hlauhawm tak a ni. Entîr nân, Bible chuan ramhuaite leh aien thiamte chu pâwl khat an ni tih a târ lang a. Tirhkohte 16:16-18-ah “ramhuai aienthiam” ṭanpuina avânga “ai en” thei nula pakhat chungchâng kan chhiar a. Tirhkoh Paula’n ramhuai a hnawh chhuah hnuah, nula chuan a ai en theihna a hloh a ni.

12. (a) Engvângin nge mitthite biak tum chu thil hlauhawm tak a nih? (b) Engvângin nge Pathian chhiahhlawhte chu ramhuaite nêna inzawmna nei eng thilah mah an tel loh?

¹² Ramhuaite chuan mite an awh nân bumna dang an hmang bawk a. Anni chuan mitthite chu an biak theih a, khawi emaw laia an la nun reng bâkah, min rawn be theiin min tina thei bawk tih ring tûra min bum chu an tum a ni. Entîr nân, a ṭhian emaw, a chhûngte emaw sûntu tuemaw chu mitthite be thei nia insawi mi pakhat hnênah a va kal mai thei a. Ani chuan mitthi ta chanchin ngaihvenawm tak a lo hrilhin, a aw  ang chiahin thu a rawn sawi hial pawh a ni thei a ni. (1 Samuela 28:3-19) Mitthi nêna inkûngkaiha tih dân tam takte chu khawi emaw laiah an la nung reng tih ngaih dân ṭanchhana neih a ni a. Chûng zîngah chuan mitthi vui liam hnua ei leh ina hlimhlawp bâwlna te, thih champhaphâk hmanna te, mitthi tâna inthawina hlan te, nupui pasal sûnte tih tûr serh leh sâng te, leh mitthi lumena tlaivâr ang chite a tel a ni. Kristiante’n chûng thiltihte an hnâwl hian an chhûngte leh khawtlâng chuan an demin, an hmusit pawh a ni thei a, a nih loh leh inzawmna neih an duh tawh lo pawh a ni thei bawk. Mahse, Kristiante chuan mitthite chu khawiah mah an nung zawm lo tih an hria a. Biak pawh theih an ni lo va, min tina thei hek lo. (Sâm 115:17) Mitthite leh ramhuaite chu biak pawh tum ngai suh la, ramhuaite nêna inzawmna nei eng thilah mah tel lo tûrin fîmkhur hle ang che.—Deuteronomy 18:10, 11 chhiar rawh; Isaia 8:19.

13. Ramhuaite lo hlau ṭhîn mi tam takte chuan tûnah eng nge an tih theih?

¹³ Ramhuaite hian mite bum an chîn mai bâkah, tih ṭhaih an chîng bawk a. Tûn laiah, Setana leh a ramhuaite chuan Pathianin he lei aṭanga a paih bo hmain “hun tlêm tê chauh” an nei tawh tih an inhriat avângin, tûn hma zawng aiin an râwng a, an sual lehzual a ni. (Thu Puan 12:12, 17) Mahse, ramhuaite hlau ṭhîn mi sâng tam takte chuan tûnah an hlau tawh lo. Engtin nge an zalên theih?

14. Kum zabi khatnaa Kristiante ang bawkin, engtin nge ramhuaite laka kan zalên theih?

¹⁴ Bible chuan ramhuaite do dân leh an lak ata zalên dân min hrilh a. Entîr nân, Ephesi khuaa mi  ṭhenkhat chuan thutak an hriat hmain ramhuaite nêna inzawmna an nei a. Engtin nge an zalên theih? Bible chuan: “Dawihmang a ṭhen tam tak pawhin an lehkhabute an rawn la khâwm a, mi zawng zawng mithmuhah an hâl ta a,” a ti a ni. (Tirhkohte 19:19) Kristian an nih duh avângin an dawi hmanna lehkhabute chu an tichhe vek a. Tûn laiah pawh chutianga tih chu a ngai a ni. Jehova rawngbâwl duhtute chuan ramhuaite nêna inkûngkaihna nei an thil neih eng pawh chu an paih bo vek tûr a ni. Chutah chuan lehkhabu te, magazine te, horoscope te, film te, rimawi te, leh games te bâkah, tisa khawvêl piah lam thil te, mitdawivaih te, leh ramhuaite chu thil hlauhawm lo leh phûrawm tak anga lantîrtu poster-te pawh a tel a. Chu bâkah, ramhuaite laka invênhim nâna an hman thilte pawh a tel bawk a ni.—1 Korinth 10:21.

15. Setana leh a ramhuaite do tûrin eng thil dang nge kan tih ngai?

¹⁵ Ephesi khuaa mite’n an dawi hmanna lehkhabute an tihboral hnu kum engemaw zâtah, tirhkoh Paula chuan “thlarau sualho awmte” chu an ‘buan’ a la ngai cheu tih a ziak a. (Ephesi 6:12) Ni e, an lehkhabute chu hâl tawh mah se, ramhuaite chuan tihnat an la tum reng a ni. Chuvângin, eng dang nge an la tih ngai? Paula chuan an hnênah: “Rinna phaw la ula, chu mi chuan mi sual thal alh thei zawng zawng chu in timit thei ang,” tiin a hrilh a ni. (Ephesi 6:16) Phaw hian indonaah sipai a vênghim ang bawkin, kan rinna chuan min vênghim thei a. Jehova’n min vênghim thei tih kan rinngheh tlat chuan, Setana leh a ramhuaite chu kan do hneh thei ang.—Matthaia 17:20.

16. Engtin nge Jehova kan rinna kan tihngheh lehzual theih?

¹⁶ Engtin nge Jehova kan rinna chu kan tihngheh lehzual theih? Ni tîna Bible chhiar leh min vênghim  tûra amah rinchhan dân kan zir chu a ngai a. Jehova kan rinchhan tlat chuan, Setana leh a ramhuaite chuan min tina thei lo vang.—1 Johana 5:5.

17. Eng thil dangin nge ramhuaite lakah min vênghim ang?

¹⁷ Ephesi khuaa Kristiante chuan eng thil dang nge an tih ngai? Ramhuai biaknaa khat khawpuiah an chêng a. Paula chuan anni chu: ‘Eng hun pawha ṭawngṭai’ tûrin a hrilh a ni. (Ephesi 6:18) An tân chuan engtik lai pawha Jehova vênhimna an dîl a ngai a. Kan tân a ngai ve em? Keini pawh ramhuai biaknaa khat khawvêlah kan chêng a. Chuvângin, Jehova hnênah a vênhimna kan dîl a ngaih bâkah, kan ṭawngṭai hunah a hming kan lam a ngai a ni. (Thufingte 18:10 chhiar rawh.) Setana laka min vênghim tûra kan dîl zawm zêl chuan, Jehova’n kan ṭawngṭainate chu min chhânsak ngei ang.—Sâm 145:19; Matthaia 6:13.

18, 19. (a) Engtin nge Setana leh a ramhuaite chu kan do hneh theih? (b) Bung 11-ah eng zawhna nge chhân ni dâwn?

¹⁸ Kan nuna ramhuai biakna nêna inzawmna nei thil eng pawh kan paihbo va, min vênghim tûra Jehova kan rinchhan tlat chuan Setana leh a ramhuaite chu kan do hneh thei ang. Anni chu kan hlauh a ngai lo. (Jakoba 4:7, 8 chhiar rawh.) Jehova chuan ramhuaite aiin thil a tithei zâwk daih a. Anni chu Nova hun lai khân a hrem tawh a, nakinah a la tiboral ang. (Juda 6) Mahni chauhva do kan ni lo tih hre reng ang che. Jehova chuan a vântirhkohte chu min vênghim tûrin a hmang a. (2 Lalte 6:15-17) Jehova ṭanpuina nên chuan Setana leh a ramhuaite chu kan do hneh thei tih kan ring nghet tlat thei a ni.—1 Petera 5:6, 7; 2 Petera 2:9.

¹⁹ Setana leh a ramhuaite’n hrehawm tam tak min tawrhtîr si a, engvângin nge Pathianin anni chu a la tihboral loh? He zawhna hi bung 11-ah chhân a ni ang.