1. Суксо-влак нерген чыным молан палаш кӱлеш?

ИЕГОВА суксо-влак нерген чыным пален налмынам вуча, вет нуно Юмын ешышкыже пурат. Библийыште суксо-влакым «Юмын эргыже-влак» манме (Иов 38:7). Суксо-влак могай пашам шуктат? Нуно еҥ-влаклан полшат мо? А мыланна нуно полшен кертыт мо? (8-ше ешартыш статьям ончыза.)

2. Суксо-влак кушеч толын лектыныт да нуно мынярын улыт?

² Суксо-влак кушеч толын лектыныт? Колоссян-влаклан 1:16 почеламут дене келшышын, Иисусым ыштымыж деч вара Иегова «пылпомышто, мландӱмбалне мо уло», суксо-влакымат, чылажымат ыштен. Юмо мыняр суксым ыштен? Библийын каласымыж почеш нуно шӱдӧ миллион дене ыштыме лийыныт (Псалом 102:20; Почмаш 5:11).

3. Иов 38:4—7 суксо-влак нерген мом пален налына?

³ Иегова суксо-влакым мландым ыштыме деч ончыч ыштен. Юмын ыштыме мландым ужын, нуно чот йывыртеныт манын, Иов книгаште каласкалалтеш. Ту пагытыште чыла суксо ик еш семын Иеговалан служитлен (Иов 38:4—7).

4. Суксо-влак айдемын илышыже нерген тургыжланат манын, кушеч палена?

⁴ Суксо-влак еҥ-влакын илышыштым эре эскереныт.  Мланде ден айдеме тукым шотышто Иегован шонен пыштымашыжым нуно эре пален налнешт ыле (Притчи 8:30, 31; 1 Петрын 1:11, 12). Кунам Адам ден Ева Юмым колыштмым чарненыт, суксо-влак, мутат уке, чот шӱлыкаҥыныт. Тачат шукырак еҥже Иеговам огеш колышт. Векат, суксо-влакым тиде эше утларак шӱлыкаҥда. Но иктаж-кӧ, осал пашажым коден, Юмылан служитлаш тӱҥалеш гын, суксо-влак чот йывыртат (Лукан 15:10). Мутат уке, суксо-влак поснак Юмын служитлышыже-влак верч тургыжланат. Шке служитлышыже-влаклан полшаш але нуным аралаш манын, Иегова суксыж-влакым колта (Еврей-влаклан 1:7, 14). Айста икмыняр примерым ончен лектына.

5. Суксо-влак Юмын служитлышыже-влаклан ожно кузе полшеныт?

⁵ Содом ден Гоморра олалам пытарыме годым Лот ден ешыжым утарашлан Иегова кок суксыжым колтен (Тӱҥалтыш 19:15, 16). А шуко жап эртымеке, Даниил пророкым лев-влак деке вынемыш шуэныт, но Юмо «лев-влакын умшаштым петырашлан, суксыжым колтен». Тыге Юмо тудым утарен (Даниил 6:22). Икымше курымышто Иегова апостол Петрым казамат гыч лукташ манын, суксыжым колтен (Апост. пашашт 12:6—11). Иисусланат мландыште илымыж годым суксо-влак полшеныт. Мутлан, тынеш пурымыжо почешак Иисуслан суксо-влак служитленыт (Маркын 1:13). А колымыжо вашеш ик суксо тудлан «вийым пуэн» (Лукан 22:43).

6. а) Суксо-влак мыланна таче полшат манын, молан ӱшанен кертына? б) Могай йодыш-влакым ме кызыт ончен лектына?

⁶ Таче суксо-влакым ужаш огеш лий. Но Иегова, шке служитлышыже-влаклан полшаш манын, тачат  нуным кучылтеш. Библийыште возымо: «Юмо деч лӱдшӧ-шамычым Юмын Суксыжо йыр авырен налеш да утара» (Псалом 33:8). Мемнам аралаш молан кӱлеш? Молан манаш гын мемнан виян да осал тушманна-влак улыт. А нуно кӧмыт улыт? Нуно кушеч толын лектыныт? Нуно мыланна осалым кузе ыштен  кертыт? Нине йодышлан вашмутым пален налашлан, айста шарналтена, Адам ден Евам ыштыме деч вара вашке мо лийын.

7. Сатана еҥ-влакым мом ышташ таратен?

⁷ 3-шо ужаш гыч ик суксын Юмо ваштареш шогалмыж нерген ме пален налынна. Тудо вуйлатымашым шке кидышкыже налаш шонен улмаш. Библий тудым Сатана Диавол манын лӱмда (Почмаш 12:9). Еҥ-влакымат Юмо ваштареш шогалташ Сатанан кумылжо лийын. Тудо эн ончыч Евам, а варажым мландыште илыше ятыр еҥым ондален кертын. Мо-гынат, южышт Иеговалан ӱшанле кодыныт, мутлан, Авель, Енох да Ной (Еврей-влаклан 11:4, 5, 7).

8. а) Южо суксо-влак кузе демон лийыныт? б) Демон-влак вӱд ташлымаш годым утаралташлан мом ыштеныт?

⁸ Нойын илыме жапыштыже южо суксат Юмо ваштареш шогалын. Нуно, кавасе илемыштым коден, мландыш воленыт да айдеме капым налыныт. Молан нуно туге ыштеныт? Библийын каласымыж почеш нуно ӱдырым налнешт ыле. (Тӱҥалтыш 6:2 лудын лекса.) Но суксо-влаклан тидым ышташ ок лий улмаш (Иудан 6). Нине осал суксо-влаклан кӧра еҥ-влак пужленыт да осалештыныт. Сандене Иегова вӱд ташлымашым колташ шонен. Туге тудо осал еҥ-влакым пытарен, а ӱшанле-влакым утарен (Тӱҥалтыш 7:17, 23). Осал суксо-влаклан утаралташлан мӧҥгеш кавашке пӧртылаш логалын. Библийыште нуным демон-влак манме. Нуно Сатанан могырышкыжо шогалыныт да тыге Диаволым шке вуйлатышылан ойырен налыныт (Матфейын 9:34).

9. а) Юмо осал суксо-влакым шке ешышкыже мӧҥгеш пуртен мо? б) Умбакыже ме мом пален налына?

 ⁹ Иегова ваштареш шогалше-влакым ешышкыже мӧҥгеш пуртен огыл. Таче осал суксо-влак айдеме капым налын огыт керт гынат, ожнысо семын уло мландым ондалат (Почмаш 12:9; 1 Иоаннын 5:19). Кузе нуно тынар шуко еҥым ондален кертыт, айста ончен налына. (2 Коринфян-влаклан 2:11 лудын лекса.)

10. Демон-влак калыкым кузе ондалкалат?

¹⁰ Демон-влак калыкым тӱрлӧ семын ондалкалат. Шуко еҥ демон-влак дене кылым куча. Южо тидым шке шот дене ышта, а южо, мутлан, юзо еҥ але экстрасенс гоч. Демон-влак дене кылым кучымаш демонизм, але, вес семын, спиритизм маналтеш. Библийыште каласыме почеш демон-влак дене кылдалтше кеч-могай ӱзгар але паша деч ме кораҥшаш улына (Галат-влаклан 5:19—21). Молан? Молан манаш гын тиде вапш. Демон-влакым сонарзе дене таҥастараш лиеш. Сонарзе янлыкым кучашлан тӱрлӧ вапшым кучылтеш. Тыгак демон-влакат калыкым ондалашлан тӱрлӧ йӧным кучылтыт. (26-шо ешартыш статьям ончыза.)

11. Мо тыгай мужедмаш да молан мужедаш ок лий?

¹¹ Вапш-влак гыч иктыже — мужедмаш. Мо тыгай мужедмаш? Тиде ончыкылык илышым але иктаж-мом палыдымым пален налашлан юзо вийым кучылтмаш. Еҥ-влак кузе мужедыт? Южышт картым але шӱдырым ончен мужедыт. Весышт тӱрлӧ шоя палылан ӱшанат. Кумшышт юзылымо шарым кучылтыт але кидым ончен мужедыт. Шукышт шонат, пуйто нине паша-влак  уда огытыл, но, чынже денак, нуно кугу зияным кондат. Ончылгоч лийшашым каласыше еҥ демон-влак дене кылдалтеш. Тидым Библий гыч пример-влак ончыктат. Тыге, Апост. пашашт 16:16—18 почеламутлаште «шинчанужшо шӱлышан» ик ӱдыр нерген каласкалалтеш. Тудын кӧргыштыжӧ демон лийын. Лачак тудо ӱдырлан ончык ужын мошташ вийым пуэн. Апостол Павел демоным поктен луктын, сандене ӱдырын тыгай моштымашыже пытен.

12. а) Колышо-влак дене кылым кучаш молан лӱдыкшӧ? б) Юмын служитлышыже-влак тойымо йӱлам молан нигунамат кучаш огыт тӱҥал?

¹² Демон-влакын кучылтмо эше ик вапшышт — тиде колышо-влак дене кылым кучымаш. Демон-влак мемнам ӱшандарынешт, пуйто колышо-влак вес тӱняште илымым шуят да мемнан дене мутланен але мыланна осалым ыштен кертыт. Южышт, лишыл йолташыштым але родыштым йомдарымеке, тыгай еҥ деч полышым йодыт, кудыжо ойла, пуйто колышо-влак дене мутланен кертеш. Тыгай еҥ, очыни, колышо нерген иктаж-мом почын ойла але тудын йӱкшӧ дене мутланен кертеш (1 Самуила 28:3—19). Тыгак, колышо-влак вес тӱняште умбакыжат илат манме туныктымаш дене шуко тойымо йӱла негызлалтеш. Тойымо йӱла-влак тӱрлӧ улыт, мутлан: поминка, колышым ужатымаш, колышылан пӧлекым пуымаш. А эше колышо еҥлан йӧрышӧ лияш манын, тӱрлӧ йӱлам эртарат. Чыла нине ритуал-влакым ышташ демон-влак таратат. Но христиан-влак тыгай йӱлам огыт кучо. Сандене родышт але пошкудышт нуным судитлат, вурсат але нунын дене кылым кучымым чарнат. Христиан-влак  палат: колышо-влак нигуштат огыт иле, нунын дене кылым кучаш огеш лий да нуно мыланна осалым ыштен огыт керт (Псалом 113:25, 26). Сандене шекланен шогыза. Нигунамат тыгай йӱлам ида эртаре да колышо-влак але демон-влак дене кылым ида кучо. (Второзаконие 18:10, 11 лудын лекса *; Исаия 8:19.)

13. Демон-влак деч ондак лӱдын илыше-влак мом ыштен кертыныт?

¹³ Демон-влак чыла еҥым ондалкалат гына огыл, эше лӱдыктылыт. Вашке Юмо Сатана ден демон-влакым пытара. Сандене нуно, жапышт шагал улмым пален, эше чотрак осалештыт да ажгынат (Почмаш 12:12, 17). Но улыт тӱжем дене еҥ-влак, кудышт ончыч демон-влак деч лӱдыныт, а кызыт лӱдмым чарненыт. Мо нунылан полшен?

14. Ефес олаште илыше христиан-влак семын демон-влак деч кузе утлаш лиеш?

¹⁴ Демон-влак деч кузе аралалташ лиеш Библий мемнам туныкта. Мутлан, Библийыште Ефес олан илышыже-влак нерген каласкалалтеш. Нуно Юмо нерген чыным пален налмышт деч ончыч демон-влак дене кылым кученыт. Но нуно демон-влак деч кузе утлен кертыныт? Апост. пашашт 19:19 почеламутышто возымо: «А юзыланыше кокла гыч ятырынже, тунемме книгаштым поген, уло калык ончылно йӱлалтеныт». Нуно христиан лийнешт ыле, сандене юлымаш  дене кылдалтше книгаштым пытареныт. Тачат Иеговалан служитлаш шонышо еҥлан демон-влак дене кылдалтше тӱрлӧ ӱзгар-влак деч утлаш кӱлеш. Тышке пурат: книга, журнал, гороскоп, фильм, музык, модыш, плакат-влак да тулеч моло. Тыгай ӱзгар-влаклан кӧра юзо паша оҥайын койын кертеш. Нуно эҥгекым огыт кондо манын ондалалтын шонаш лиеш. Тышкак тӱрлӧ ӱзгар-влак пурат, кудыштым еҥ-влак осал деч аралтыш семын кучылтыт (1 Коринфян-влаклан 10:21).

15. Сатана ден демон-влаклан ваштареш шогалаш манын, мом эше ыштыман?

¹⁵ Ефес олаште илыше христиан-влак юлымаш дене кылдалтше книга-влак деч утленыт. Туге гынат, шуко ий эртымеке, апостол Павел нуным «осал шӱлыш-влак ваштареш» умбакыжат кучедалаш таратен (Ефесян-влаклан 6:12). Молан? Демон-влак нунылан ончычсо семынак зияным ышташ тыршеныт. Нине христиан-влаклан мом эше ышташ кӱлын? Апостол Павел возен: «Юмылан ӱшанымашым авыртыш семын налза, тудын дене те осалын чыла йӱлышӧ пикшыжым йӧртен [але чарен] кертыда» (Ефесян-влаклан 6:16). Кузе авыртыш сарзым арала, тугак ӱшанымашна мемнам арала. Иегова мемнам арален кертеш манын ӱшанена гын, Сатана ден демон-влак ваштареш шоген кертына (Матфейын 17:20).

16. Ӱшанымашнам пеҥгыдемдаш мо полшен кертеш?

¹⁶ Иеговалан ӱшанымашнам мо пеҥгыдемден кертеш? Кажне кечын Библийым лудаш да Иеговалан инанаш тунемаш кӱлеш. Тунам Сатана ден демон-влак мыланна осалым ыштен огыт керт (1 Иоаннын 5:5).

17. Ме шкенам демон-влак деч кузе эше арален кертына?

 ¹⁷ Ефес ола демонизм дене темше лийын улмаш. Сандене апостол Павел тушто илыше христиан-влаклан «чыла годымат» кумалаш каҥашым пуэн (Ефесян-влаклан 6:18). Тудын мутшо ончыктен: нунылан аралтыш нерген эре кумалаш кӱлын. А мыланна? Меат демонизм дене темше тӱняште илена. Сандене мыланнат Иегова деч аралтышым йодман да тудлан лӱмжӧ дене кумалман. (Притчи 18:10 лудын лекса.) * Сатана деч мемнам аралашлан Иеговам йодына гын, тудо йодмашналан вашмутым пуа (Псалом 144:19; Матфейын 6:13).

18, 19. а) Сатана ден демон-влакым кузе сеҥаш лиеш? б) Вес ужаш гыч мом пален налына?

¹⁸ Тыге, демон-влак ден кылдалтше чыла паша да ӱзгар деч утлена гын, да Иегова мемнам арала манын ӱшанена гын, Сатана ден демон-влаклан ваштареш шогалын кертына. Сандене нунын деч лӱдаш огеш кӱл. (Иаковын 4:7, 8 лудын лекса.) Иегова демон-влак деч ятырлан виянрак. Нойын илыме жапыштыже Юмо нуным наказатлен, а ончыкыжым Юмо нуным курымешлан пытара (Иудан 6). Шарныза: тиде кредалмаште ме шкетын огынал. Иегова, шке суксыж-влакым кучылтын, мемнам арала (2 Царей 6:15—17). Ӱшаныза: Иегован полышыж дене Сатанам да демон-влакым сеҥаш лиеш (1 Петрын 5:6, 7; 2 Петрын 2:9).

¹⁹ Но Сатана ден демон-влак тынар шуко орланымашым кондат гын, Юмо нуным тымарте молан пытарен огыл? Тидын нерген вес ужаш гыч пален налына.