1. Tae-i ǃaroma da ǃhomǃgāgu xa nî ǁkhāǁkhāsen?

JEHOVAB ge ra ǂhâba î da ǁîb omaris xa ǁkhāǁkhāsen. ǀHomǃgāgu ge ǁîb omaris ǃâba ra kuruǂui. Elobmîs ǃnâ gu ge “Elob ôagu” di ra ǂgaihe. (Job 38:7) ǀHomǃgāga tae-e ra dī? Mati gu khoena ǃkharu ge ǁae gere hui? Tsî ǁîga sada nēsi hui ǁkhā-e?—8ǁÎ ǀArosa ǃgāsasiba mû re.

2. ǀHomǃgāna mapa xu ra hā? Tsî matikō ǀhomǃgāga ge kuruhe?

² ǂHâbasa i ge a î da ǂan mapa xu gu ǀhomǃgāga ra hāsa. Koloseǁîn 1:16 ge ra mîba da Jehovab ge Jesuba kuru toas khaoǃgâ kha ge, “ǀhommi ǃnâ hân tsî ǃhūbaib ai hân hoan” tsîna ge kuru. Nēs ge ǀhomǃgāgu tsîna ǃkhōǂgā hâ. Matikō ǀhomǃgāga ge kuruhe? Elobmîs ge ra mî kaidisidi miliundi ǀhomǃgāgu hâsa.—Psalmdi 103:20; ǂHaiǂhais 5:11.

3. Job 38:4-7 sa tae-e ra mîba da ǀhomǃgāgu xa?

³ Elobmîs ge ra mîba da Jehovab ge ǀhomǃgāga ǃhūbaibab nî kurus aiǃâ a kurusa. Mati gu gere tsâ ǃhūbaiba gu ge mû o? Jobi di ǂkhanis ge ra mîba da ǃgâiaǂgao gu gere ǃkhaisa. ǁÎgu ge ǀguiǃnâxasib ǃnâ Jehovaba ǀguiba gere ǃoaba omarise.—Job 38:4-7.

4. Mati da a ǂan ǀhomǃgāgu khoen ǃnâ ǃgâiǃgâibasensa ūhâsa?

⁴ ǀHomǃgāgu ge khoen ǃnâ ǃgâiǃgâibasensa hoaǁae ūhâ tsî Jehovab ǂâibasens ǃhūbaib tsî khoen ǃoa-ais tsîna. (ǂKhoamîdi 8:30, 31; 1 Petrub 1:11, 12) ǁÎgu ge kaise ge tsûaǂgao Adammi tsî Evas tsîn ge Eloba mâǃoa o. ǁÎgu  tsîn ge kaise nēsi ra tsûaǂgao ǃnāsa khoen Jehovaba ǁnâuǀnam tama hâ ǃkhais ǃaroma. Xawe khoe-i ga ǃhausen tsî Elob ǃoa ūdawasen o, o gu ge ǀhomǃgāga kaise ra ǃgâiaǂgao. (Lukab 15:10) ǀHomǃgāgu ge ǁnān hîna Eloba ra ǃoaban ǃnâ kai ǃgâiǃgâibasensa ūhâ. Jehovab ge ǀhomǃgāga ra sîsenū î gu ǁîb ǃoaba-aon ǃhūbaib ai hâna hui. (Hebreǁîn 1:7, 14) Hā re î da ǀnî aiǁgaude kē.

5. ǀHomǃgāga mati Elob di ǃoaba-aona ǃkharu ge ǁae gere hui?

 ⁵ Jehovab ge ǀhomǃgāga ge sî î gu Loti tsî ǁîb omaris tsîna hui Sodoms tsî Gommaorras tsîn nî dīkākāhes aiǃâǃ (Genesis 19:15, 16) Kaidisi kurigu khaoǃgâb ge kēbo-aob Daniela xamgu di ās ǃnâ ge aoǂgāhe xaweb ge tsûtsûhe tama ge hâ i “Elob ge ǀhomǃgāb âba go sî” tib ge ge mî “tsî ǁîb ge amǃnâb xamgu diba go ǂganam.” (Danieli 6:23) Ega apostel Petrub ge ǃkhō-oms ǃnâ hâ io, ob ge Jehovaba ǁîb ǀhomǃgāba ge sî îb ǃnora kaihe. (ǃNaeǃkhaidi 12:6-11) ǀHomǃgāgu tsîn ge Jesuba ge hui ǃhūbaib aib ge hâ io. Aiǁgause, ǁāǁnâheb ges khaoǃgâ “gu ge ǀhomǃgāga gere ǃoaba bi.” (Markub 1:13) Jesub nî ǃgamhes aiǃâ-i ge ǀhomǃgāba ge “ǀgaiǀgaiǃnâ bi.”—Lukab 22:43.

6. (a) Mati da a ǂan ǀhomǃgāgu Elob khoena nētsē ra hui ǃkhaisa? (b) Mâ dîde da nēsi nî ǃeream?

⁶ Nētsē gu ge ǀhomǃgāga khoen xa mûhe ǁoa. Xawe Elob ge noxoba ra sîsenū gu î gu ǁîb ǃoaba-aona hui. Elobmîs ge ra mî: “ǀHomǃgāb ǃKhūb [“Jehovab,” NW] dib ge ǁnān ǁîba ra ǃaoǃgân ǂnamipe ra ǁgoe, tsî ǁîna ra huiǂui.” (Psalmdi 34:7) Tae-i ǃaroma da huihesa ǂhâ hâ? ǀGaisa khākhoegu hîna ra tsûtsû da ǂgaoga da ge ūhâ. Hamga ǁîga? Mapa xu gu ra hā? Mati gu sada ra tsûtsû ǂgao? ǁNā dîdi ǃereamde hōs ǃaroma, hā re î da kē tae-i ge a īsa Adammi tsî Evas tsîn ge kuruhe toas khaoǃgâ.

7. Khoena tae-e Satanni gāxaǃnâsib xa ra dī?

⁷ ǃNonaǁî danaǃâs ǃnâ da ge go ǁkhāǁkhāsen ǀgui ǀhomǃgāb ge Eloba mâǃoa tsî khoena gere ǂgaeǂgui ǂgao ǀgaus xa. Elobmîs ge Satanna, ǁGâuab di ra ǂgai. (ǂHaiǂhais 12:9) Satanni tsîn ge gere ǂhâba în ǀnî khoena Eloba mâǃoa. ǁÎb ge ǁkhāsiba ge ūhâ i Evasa  gāxaǃnâsa, ǁnā ǁaeba xub ge ǃnāsa khoena ra gāxaǃnâ. Xawe Abeli, Henoxi tsî Noaxi tsîn ge ǂgomǂgomsase Jehovab ǃoa-ai ge mâ.—Hebreǁîn 11:4, 5, 7.

8. (a) Mati gu ge ǀnî ǀhomǃgāga demon kai? (b) Demonga tae-e ge dī î gu Kai ǁgammi dâusa ûiǃkharu?

⁸ Noaxi tsēdi ǃnâ gu ge ǀnî ǀhomǃgāga ge a ǁore tsî ǀhomma xu ǁgôaxa tsî khoese gere ǃhūbaib ai ûi. Tae-i ǃaroma? Elobmîs ge ra mîba da ǁîgu ge tarekhoede gere ǂhâba. (Khomai re Genesis 6:2.) Xawe ǁnās ge ǂhanu tama ge hâ i ǀhomǃgān ǃaroma. (Judab 6) ǁNā eloxoresa ǀhomǃgāgu khamin ge ǃnāsa khoena ǁnā ǁaeba xu ge ǁgaoǂgā tsî ge ǂkhabadīxa kai. Jehovab ge ǁnāpaxū ge mîǁgui eloxoresa khoena dīkākāsa kai ǁgammi dâus ǀkha hoaraga ǃhūbaib ǂamai. Xaweb ge ǁÎb di ǂgomǂgomsa ǃgān ǀguina ge sâu. (Genesis 7:17, 23) Ûiǃkharus ǃaroma gu ge nē eloxoresa ǀhomǃgāga ǀhommi ǃoa ge oa. Elobmîs ge nē eloxoresa ǀhomǃgāga demongu di ra ǂgai. ǁÎgu ge ǁGâuab mâǃoasa ge a ǁhao tsî ǁGâuab ge ge ǁîgu di ǂgaeǂgui-ao kai.—Mateub 9:34.

9. (a) Tae-e ge ī demongu ǀkha ǀhommi ǃoa gu ge oa o? (b) Tae-e da sao rase nî ǁkhāǁkhāsen?

⁹ Demongu ge Jehovaba mâǃoa ǃkhais ǃaromab ge ǁîga ǁîb omaris ǃnâ ge ūǃoa tama ge i. (2 Petrub 2:4) Demongu ge ǁkhawa khoen ǃnâ a ǀkharaǀkharasen ǁoa xawe gu ge noxoba ‘ǃhūbaib hoaragaba ra ǂgaeǂhapu.’ (ǂHaiǂhais 12:9; 1 Johaneb 5:19) Hā re î da kē mati gu ǂgui khoena ra gāxaǃnâ tamas ka io ra ǂgaeǂhapu ǀgausa.—Khomai re 2 Korinteǁîn 2:11.

10. Demonga mati khoena ra gāxaǃnâ?

¹⁰ Demongu ge khoena ǂgui ǀgaugu ǃnâ ra gāxaǃnâ. Khoen ge demongu ǀkha ǃoa tamas ka io khoe-i ǃnâ-ū  ra ǀhaoǀhaosen, aiǁgause ǃgai-aob tamas ka io khoen di ǂâide ra khomai khoe-i khami. Demongu ǀkha ǃgaeǀhaosa ūhâs ge ǃgaidīb di ra ǂgaihe. Xawe Elobmîs ge ra mîba da î da ǃnūse hâ demongu ǀkha dī xū-e ūhâ xūna xu. (Galateǁîn 5:19-21) Tae-i ǃaroma? ǃAu-aob ta ǃnuisa sîsenū îb ǀguruna ǃkhō khami gu ge demonga gāxaǃnâsiba ra sîsenū î gu khoena ǃnui tsî ǂgaeǂgui.—26ǁÎ ǀArosa ǃgāsasiba mû re.

11. Tae-e a aimûǀgaru tsî tae-i ǃaroma da nî ǁî-e xu ǃnūse hâ?

¹¹ ǁÎgu di ǀgui ǃkhō ǃkhais ge aimûǀgarus di ra ǂgaihe. ǁNās ge khoen ǃâ-ai hâ ǀgaiba sîsenūsa hānîǁaeb tamas ka io ǀūsa xūna ǂanǂui ǂgaosa. ǀNîn ge nēsa ǀgamirode kēs, xoma-aona dîǃgâs, tarot karkide khomais—[nē gu ge ai-īsiga ūhâ hānîǁaeb ǃnâ ra ī xūna ra ǁguiǃā karkide], ǂkhaira ǀuide sîsenūs tamas ka io khoe-i di ǃomǃnākha khomais ǃnâ-ū ra dīhe. ǂGui khoen ge ǂâi hâ nē ǁnaetigu tsū tama di xawen ge a tsū. Kaisen ge a ǁkhōǁkhōsa. Aiǁgauses ge Elobmîsa ra ǁgau demongu tsî aimûǀgaru ra khoen ra sîsenǀhaosa. ǃNaeǃkhaidi 16:16-18 ǃnâ da ge ra khomai ǀgôas hîna ge ‘aimûǀgarugaga-e ūhâ’ īs xa, nē gaga-i ge ǁîsa gere hui “aimûǀgarus” ǀkha. Apostel Paulub ge demona ǁîsa xu ge ǃhaeǂui, os ge nē ǀgôasa aimûǀgarus ǁkhāsiba ge a ǂoaǃnâ.

12. (a) Tae-i ǃaroma i a ǁkhōǁkhōsa ǁkhā ǁō hân ǀkha ǃhoa ǂgaosa? (b) Tae-i ǃaroman Elob ǃoaba-aona demongu ǁnaetigu ǃnâ ǁhao tama hâ?

¹² Demongu ge ǀnî hâ gāxaǃnâsiba ra sîsenū khoena ǃnuis ǀkha. ǁÎgu ge ra ǂgom kai da ǁō hân ǀkha a da ǃhoa ǁkhāsa, ǁō ge khoe-i ǀnî hâba ûitsama ǃkhaisa tsî ǁî-i sada ǀkha a ǃhoa tsî a tsûtsû da ǁkhāsa. Aiǁgause, khoe-i di ǀhō-i tamas ka io ǀaokhoe-i ga ra ǁō o, o i ge ǁgâuaǁkhāǁkhāsabe-e [xoma-ao-e] ra sī mû, mî ra-e  ǁî-i ǁō go khoe-i ǀkha a ǃhoa ǁkhā ǃkhaisa. Nē ǁgâuaǁkhāǁkhāsabeb ge ǁō hâ ǀhōsa-i tamas ka io ǀaokhoe-i xa mâǂoa ra xū-e a mî ǁkhā tsî nē ǁō hâ khoe-i di domma a ǁgae ǁkhā. (1 Samueli 28:3-19) ǂGui ǁkhōdi ǁnaetigu tsîn ge a ǃgaoǃgaosa ǁō hân ǀnî hâ ǃkhai-i tawa sī ra ûisa. Nēs ge ǁkhōdi ǁâudīs, ǁkhōs ge dīhe kurib xa ǂâiǂâisens, ǁō hâna ǁguiba-e dības, ǃoatarasisa ǁâudīs tamas ka io ǂnûǂkhais ǁnaetiga ǃkhōǂgā hâ. Xristeǁî-i ga ǂkhā o ǁnāti ī ǁnaetigu ǃnâ ǁhaosa, on ge ǁîn omaris din tamas ka io ǃgaroǃās di ǀhûhâsib xa ra ǀauhe, mî ǁgaiǁgaihe tamas ka io dīxū-e ǁîn ǀkha ûhâ ǂgao tama hâ. Xawe Xristeǁî-i a ǂans ge ǁō hân ǀnî hâ ǃkhai-i tawa sī hâ tamasa. Ī ǁoa-i ge a ǁō hân ǀkha ǃhoasa tsî ǁîn ge a tsûtsû da ǁoa. (Psalmdi 115:17) ǂAnbasen re. Tā dītsâ re ǁō hân tamas ka io demongu ǀkha ǃhoasa tsî tā demongu ǁnaetigu ǃnâ ǃkhōǂgāsen re.—Khomai re Deuteronomium 18:10, 11; Jesajab 8:19.

13. Tae-en ǂgui khoen hîna demonga gere ǃaona ge dī hō?

¹³ Demongu ge khoena gāxaǃnâs ǀguisa dī tama hâ xawe ǁîna ǃaoǃaos tsîna ra hî. Nētsēb ge Satanni tsî ǁîb demongu tsîna a ǂan “ǂkhari ǁaerobab ūhâ ǃkhaisa” Elob xa gu nî ǃhūbaiba xu ūbēhes aiǃâ, ǁnā-amaga gu ge ra ǂkhabadī tsî a ǁgaoǁgaosa ǂguros xa. (ǂHaiǂhais 12:12, 17) ǂGui khoen hîna ge demonga gere ǃaon ge nēsi ǃaogu tama hâ. Matin ge demonga ǃaosa xu ǃnora kaihe?

14. ǂGurokamǁaeb di Xristeǁîn khami, mati da demonga xu nî ǃnora kaisen?

¹⁴ Elobmîs ge ra mîba da mati da nî demonga mâǃoa ǀgausa tsî mati da ǁîga xu nî ǃnora kaisensa. Aiǁgause,  ǀnîn hîna ge Efesen di ǃās ǃnâ hâ in ge demongu ǀkha gere ǃhoa amab xan nî ǁkhāǁkhāsens aiǃâ. Matin ge ǃnora kaihe? Elobmîs ge ra mî: “Tsî ǁkhāti ǂguin, ǃgaidīga gere dīn ge ǂkhanide ūhā, tsî ǁîde ǂhaisase ge khauǃkhū.” (ǃNaeǃkhaidi 19:19) ǁÎn ge gere Xristeǁî kai ǂgao ǁnā-amagan ge ǁîn ǂkhanin ǃgaidīb xa ge hâ ina ge dīkākā. ǁKhā xū-e dīs ge a ǂhâbasa nētsē. Jehovaba ra ǃoaba ǂgao khoen hoan ge demongu ǀkha dīxū-e ūhâ xūna xu nî ǂgōsen. Nēs ge ǂkhanin, ǂkhanigu, ǂhôaǂkhanin ǃnâ hâ ǀgamiro kēs, muvin, musiki, ǀhuru-ūxūn tsî ai-īsigu ǃgaidīb xa hâ gu, demongu tamas ka io khoesib ǃâ-ai hâ ǀgaib hîna tsūse tamas ka io ǁkhoaxase ra mûsena ǃkhōǂgā hâ. Tsî xūn hîna ra ǁgahen ǁgai ǂoagu ǃoagu ǁkhaubasens tsîna ǃkhōǂgā hâ.—1 Korinteǁîn 10:21.

15. Tae-e da nî dī î da Satanni tsî ǁîb demonga mâǃoa?

¹⁵ Kurigu ǃkharu hâ ǁnān hîna ge Efeseǁîn ǃās ǃnâ ǁîn ǂkhanin ǃgaidīb xa hâna dīkākān khaoǃgâb ge apostel Pauluba ge a xoa ǁîn noxoba “ǂkhaba gagagu” ǃoagu nî ǃkhamsa. (Efeseǁîn 6:12) ǁÎn ge ǂkhanina ǂhubi xawe gu ge demonga noxoba ǁîna gere tsūdī ǂgao. Tae-e ge ǂhâbasa i ǁîn nî dī-e? Paulub ge ǁîna ge mîba: “Î du nēn hoan ǂamai khōsikhōb ǂgoms diba ǃkhōbasen, ǁîb ǀkha du ǀaexa ǂāgu ǂkhabab digu hoaga a ǀari ǁkhāba.” (Efeseǁîn 6:16) Soldab torob ǃnâ ra ǁkhaubasen-ū xū-e sîsenūs khami da ge sada tsîna sada di ǂgoms xa a huihe ǁkhā. ǀOasa ǂgomǃgâsiba da ga Jehovab ǃnâ ūhâ o, ob ge a hui da ǁkhā î da Satanni tsî ǁîb demongu tsîna mâǃoa.—Mateub 17:20.

16. Mati da, sada ǂgomsa Jehovab ǃnâ a ǀgaiǀgai ǁkhā?

¹⁶ Tae-e da a dī ǁkhā is sada ǂgomsa Jehovab ǃnâ ǀgai?  Elobmîsa da ge tsēs hoasa nî khomai tsî nî ǁkhāǁkhāsen ǁîb ai ǂgomaiǂnûisa, ǁîb a hui da ǁkhā xui-ao. ǀGaisa ǂgomǃgâsiba da ga Jehovab ǃnâ ūhâ o, ob ge Satanni tsî ǁîb demongu tsîna tsûtsû da tide.—1 Johaneb 5:5.

17. Tae-i tsîna demonga xu nî hui da?

¹⁷ Efeseǁîn ǃās ǃnâ ge hâ i Xristeǁîna tae-e ge ǂhâ hâ i dīsa? ǁÎn ge ǃās ǃnâ ge ǁan hâ i demongu xa ǀoa hâsa. Paulub ge ǁîna ge mîba: ‘Î du hugaǀgui ǀgore.’ (Efeseǁîn 6:18) ǁÎn ge Jehovab huiba hoaǁae ge ǂhâ hâ i ǂgansa. O sada? Sada tsîn ge demongu xa ǀoa hâ ǃhūbaib ai ûi hâ. Sada tsîn ge Jehovab huiba nî ǂgan tsî ǁîb ǀonsa nî sîsenū ǀgore da ga ra o. (Khomai re ǂKhoamîdi 18:10.) Hâhâ da ga ra o Jehovaba ǂgansa îb ore da Satanna xu, ob ge Jehovaba sada di ǀgorede nî ǁnâu-am.—Psalmdi 145:19; Mateub 6:13.

18, 19. (a) Mati da Satanni tsî ǁîb demongu ǃkhamsa a dan ǁkhā? (b) Mâ dîsa sao ra danaǃâs ǃnâ nî ǃereamhe?

¹⁸ Demongu ǀkha dīxū-e ūhâ xūna xu da ga ra ǂgōsen o, ob ge Jehovaba nî hui da î da Satanni tsî ǁîb demongu tsîna mâǃoa ǁkhā. ǂHâbasa tama i ge a hâ ǁîga ǃaosa. (Khomai re Jakobub 4:7, 8.) Jehovab ge ǃnūse demongu xa a ǀgaisa. ǁÎb ge Noaxi tsēdi ǃnâ ge a ǁkharagu tsî hānîǁae nî dīkākāgu. (Judab 6) ǂÂis ǃnâ ūhâ re ǀguri da ge nē ǃkhams ǃnâ hâ tama hâ, Jehovab ge ǁîb ǀhomǃgāga nî sîsenū sada huis ǀkha. (2 Gao-aogu 6:15-17) ǂGomǃgâsiba da ge Jehovab huib ǃnâ a ūhâ ǁkhā Satanni tsî ǁîb demogu ǃkhamsa dans ǀkha.—1 Petrub 5:6, 7; 2 Petrub 2:9.

¹⁹ Satanni tsî ǁîb demongu ge ǃgomsiga ra ǃaroma, o tae-i ǃaromab Eloba ǁîga dīkākā tama hâ? Nē dîs ge sao ra danaǃâs ǃnâ nî ǃereamhe.