CIPAUKO 10
Cokwadi ngo Pamusoro po Ngirozi
1. Ngenyi tinodikana kujija ngo pamusoro po ngirozi?
JEHOVHA anoda kuti tizive mbhuri yake. Ngirozi idivi ro mbhuri ya Mwari. Mu Bhaibheri jinodanijwa kuti “vana . . . va Mwari.” (Jobe 38:7) Ngirozi jinoitenyi? Jakabeseresa kudini vandhu mu nguva jo kare? Zve jingakwanisa kutibesera wari uno here?—Vonanyi Masoko o Kupejisira civerengo 8.
2. Ngirozi jakabva kwapi? Mutengonyi wo ngirozi jakasikwa?
2 Tinodikana kuziva kuti ngirozi jakabva kwapi. VaKolosi 1:16 inotibvunja kuti Jehovha paakapera kusika Jesu, “bziro bzese bzakaruhwa, mugore no mu nyika yo pasi.” Izvi zvinobatanijavo ngirozi. Mutengonyi wo ngirozi jakasikwa? Bhaibheri rinonanga kuti kuno mazana o zviuru zvo ngirozi.—Nduyo 103:20; Apokalipsi 5:11.
3. Job 38:4-7 inotibvunjenyi ngo pamusoro po ngirozi?
3 Bhaibheri rinotijijisa kuti Jehovha wakarura ngirozi acito akarura nyika. Jakazwa kudini pojakavona nyika? Bhuku ra Jobe rinotibvunja kuti ijona jakadakara maningi. Ijona jakava mbhuri yakabatana jecishanda pamwepo na Jehovha.—Jobe 38:4-7.
NGIROZI JINOBESERA VANDHU VA MWARI
4. Tinozvizivisa kudini kuti ngirozi jinodakarira vandhu?
4 Ngirozi nguva jese jinodakarira vandhu pomwe no cidisiso ca Jehovha no pasi pano zve no vandhu. (Mazwi Akangwara 8:30, 31; 1 Pedru 1:11, 12) Jakanyangajwa maningi ngo kupandukira kwa Adhamu na Evha. Jinonyangajwazve maningi wari uno pajinovona vandhu vacikazwiri Jehovha. Asi kudari umwe mundhu paanokhauya wo hwirira kuna Mwari, ngirozi jinodakara maningi. (Luka 15:10) Ngirozi jinodakarira maningi vaya vanoshandira Mwari. Jehovha anoshandisa ngirozi jake kuti jibesere no kujivirira vashandiri vake vari pasi pano. (Vaheberi 1:7, 14) Ngatimbovona muezaniso jimweni jajo.
“Mwari wangu wakanditumira ngirozi yake, wofunga muromo yo mbhondoro.”—Danieli 6:23
5. Ngirozi jakabeseresa kudini vashandiri va Mwari vo mu nguva jo kare?
5 Jehovha wakatumira ngirozi mbiri kuti jibesere Roti no mbhuri yake paainga ecida kuparaja Sodhoma no Gomora. (Genesi 19:15, 16) Papera zana ro makore, Danieri abva kukhandihwa mu gomba ro mbhondoro, asi aazivi kurumwa ndijona, ngokuti “Mwari wangu wakanditumira ngirozi yake, wofunga muromo yo mbhondoro.” (Danieli 6:23) Perapo mupostori Pedhru paainga ari mu gunia, Jehovha wakatuma ngirozi yake kuti isujunure Pedhru. (Maitiro o Vapostori 12:6-11) Ngirozi jakabesera Jesu paainga ari pasi pano. Inga muezaniso, naapera kubhabhatijwa, iyena wainga “ecibatihwa ngo ngirozi.” (Marco 1:13) Pa nguva yo kuti Jesu wainga ari phedo no kuti aurawe, ngirozi “yakamugumira, yomunyaraja.”—Luka 22:43.
6. (a) Tinozivisa kudini kuti ngirozi jinobesera vandhu va Mwari nyamasi uno? (b) Mubvunjo japi jatinoda kudavira?
6 Nyamasi uno ngirozi ajiripi ndhambo no vandhu. Mwari aciri kushandisa ngirozi kuti jibesere vashandiri vake. Bhaibheri rinoti: “Ngirozi ya [Jehovha] Mwari inogara phedo pa vaya vanomuthya, zve inovaponesa.” (Nduyo 34:8) Ngenyi tinoda kubvikirihwa? Ngokuti tino vavengi vanosimba maningi vanoda kutikhuvaza. Ndivanani? Vakabva kwapi? Vanoejesa kudini kutikhuvaza? Kuti tidavire mubvunjo iji, ngatimbovona zvakaitika pakandopera kuruhwa Adhamu na Evha.
VAVENGI VEDU VACIKAVONEKI
7. Zvicinyi zviri kuitika kuno vandhu ngo pamusoro po kucengejwa ndi Sathana?
7 Takajija mu Cipauko 3 kuti pano ngirozi imwe yakapandukira Mwari zve yaida kutonga vamweni. Bhaibheri rinomudaninja kuti ndi Sathana Dhiabhu. (Apokalipsi 12:9) Sathana waitodavo kuti vamweni vapandukire Mwari. Iyena wakakwanisa kucengeja Evha, zve kubvira pondhopo iyena ari kuenderera mberi ecicengeja vandhu vakawanda. Pikija zvakadaro, vamweni vakadari inga ndi Abheri, Enoki, zve Noa, vakaramba vakagondeka kuna Jehovha.—Vaheberi 11:4, 5, 7.
8. (a) Ngirozi jimweni jakaitisa kudini kuti jive madhimoni? (b) Madhimoni akaitisa kudini kuti apokonyoke pa Ndambi?
8 Mu nguva ya Noa, ngirozi jimweni jakapanduka zve josiya muzi wajo wo mudenga joviya kuzorarama no vandhu vari pasi pano. Ngenyi? Bhaibheri rinotibvunja kuti ijona jaida kuva no vakaji. (Verenganyi Genesi 6:2.) Asi zvainga zvakashata maningi kuti ngirozi jiite kudaro. (Juda 1:6) Inga ngirozi jo kushata jiya, vandhu vazinji vo mu nguva yondhoyo vakavavo vakashatisisa pomwe no uphanga. Jehovha wakatema civaringo co kuparaja nyika yese ngo ndambi. Yena wakaponesa vashandiri vake vakagondeka. (Genesi 7:17, 23) Ngirozi jakashata, jakapokonyoka ngo kutiza jo hwirira mudenga. Bhaibheri rinodaninja ngirozi iji kuti i madhimoni. Iwona akasana kubatana na Sathana pa kupandukira, zve Dhiabhu wakava mutungamiriri wawo.—Mateu 9:34.
9. (a) Zvicinyi zvakaitika kuno madhimoni paakahwirira mudenga? (b) Ngozvapi zvinotevera zvaticazojija?
9 Ngo kupandukira kwajo, Jehovha aazivizve kutendera madhimoni kuti ahwirirezve kuno mbhuri yake. (2 Pedru 2:4) Madhimoni aacinji kuva vandhu asi iwona aciri ‘kucengeja nyika yese yo pasi pano.’ (Apokalipsi 12:9; 1 Johani 5:19) Ngatijije kuti iwona anokwanisa kudini, kupausa vazinji.—Verenganyi 2 VaKorinto 2:11.
MADHIMONI ANOCENGEJESA KUDINI VANDHU
10. Madhimoni anoitisa kudini kuti abate vandhu?
10 Madhimoni anocengeja vandhu ngo njira jakasiyana-siyana. Vandhu pavanobhuya no madhimoni, ivona vangatobhuya nawo kamare ngo kushandisa ari wese, wakadari inga muroi nyanga, kana nyamusoro. Kubhuya no madhimoni, kunodaninjwa kuti ngozvoudhimoni kana zvomujimu. Asi Bhaibheri rinotipangira kuti tinodikana kugara ndhambo no ciri cese cakabatana no madhimoni. (VaGalàsia 5:19-21) Ngenyi? Kufanana no munyangi anoshandisa murau kuti abate nyama, madhimoni anoshandisa muejo jakasiyana siyana kuti abate vandhu.—Vonanyi Masoko o Kupejisira civerengo 26.
11. Kufembera kudini, zve ngenyi tinodikana kukutiza?
11 Umwe wo murau waanoshandisa unodanijwa kuti kufembera. Izvi zvinoreva kushandisa simba riciripi ro kubahwa naro kuitira kuziva zvo kumbeji. Vamweni vangaeja kufembera, ngo kusota ndhondho, kuringijira zembe, shoro, kuverenga zvinyora zvo munyara, kurira ko shiri no kurota hope. Vandhu vazinji vanorangarira kuti zviito izvi azvikhuvazi, asi andizvopi. Izvona zvinokhuvaza maningi. Inga muezaniso, Bhaibheri rinovonesa kuti vafemberi no madhimoni vanoshanda pamwepo. Pana Maitiro o Vapostori 16:16-18, tinoverenga kuti dhimoni “ro kufembera” raipekeja simba musikane kuti ‘afembere.’ Mupostori Pauro paakagogomera dhimoni riya, musikane wiya aazivizve kuzokwanisazve kufembera zvo kumbeji.
12. (a) Ngenyi, i ngozi kubhuya no vakafa? (b) Ngenyi vashandiri va Mwari avabatanijwi mu zvirovejeso zvo madhimoni?
12 Madhimoni anoshandisa murau umweni kuti abate vandhu. Anoeja kuti tidavire kuti zvinokwanisika kubhuya no vakafa zve kuti ivona vaciri kuraramira ku ndau imweni zve vangakwanisa kubhuya na itusu kana kutikhuvaza. Inga muezaniso, mundhu anoshamwari kana ukama wake wakatamika, angaenda ka nyamusoro anonanga kuti angabhuya no vakafa. Nyamusoro angatonanga ciro cakatoezana no co shamwari kana ukama wakafaya, pikija kutotevejera izwi rake. (1 Samueli 28:3-19) Zvirovejeso zvizinji zvo njaumba zvakacijikira mu kudavira kuti vakafa vaciri kurarama ku ndau imweni. Izvi zvingabatanija kuita mbhambha, kucereceja njiku ya nyakufa, kupira mupiro kuno vakafa, no mutango-mutango unoitihwa noni, no zvimweni zvicina shwiro. MaKristu paanoramba kuita divi ro zviro izvi, vo mbhuri kana vo mundharaundhemo vangavashora, vangavatuka, vangaramba kuita zviri zvese navo. Asi maKristu anoziva kuti vakafa avaripi kuraramira ku ndau imweni. Atikwanisi kubhuya navo, nee avangatikhuvazi. (Nduyo 115:17) Ngatingwarire maningi. Ticamboeja kubhuya no vakafa kana no madhimoni zve mucabatana mu zvirovejeso zvo madhimoni.—Verenganyi Deuteronòmio 18:10, 11; Isaia 8:19.
13. Zvicinyi zvakaitika ku vandhu vazinji vairarama vecithya madhimoni?
13 Madhimoni aacengeji basi vandhu, asi anovathyisijira. Nyamasi uno, Sathana no madhimoni ake vanoziva kuti ‘nguva yavanayo i doko,’ kuti Mwari avabvise pasi pano, ngo kudaro ivona vakazara ngo uphanga pomwe no ushungu kupinda kare. (Apokalipsi 12:12, 17) Ngokudaro, zviuru zvo mazana zvo vandhu vairarama vecithya madhimoni, wari avacamathyi. Vakaitisa kudini kuti vatame kuthyazve madhimoni?
RAMBANYI ZVE MUCASHANDISA ZVOMADHIMONI
14. Inga maKristu o muzana ro kutanga ro makore, tingaitisa kudini kuti tiregere zvo madhimoni?
14 Bhaibheri rinotibvunja kuti tingaitisa kudini kuti tirambe madhimoni zve toregera kushandisa zviro zvawo. Inga muezaniso, vamweni vainga vari mu dhorobha ro Efeso vaibhuya no madhimoni vacito vajija cokwadi. Vakazozviregeresa kudini? Bhaibheri rinoti: “Vazinji vainga varingiji vakazisa mabhuku avo no kumapisa pa nyasi po vese.” (Maitiro o Vapostori 19:19) Ngokuda kuva maKristu, ivona vakapisa mabhuku avo ese o masaramuso. Izvo zvinodikanavo nyamasi uno. Wese anoda kushandira Jehovha anodikana kuva acina ciri cese cakabatana no madhimoni. Izvi zvinobatanijavo mabhuku, marevhista, mavhidhio, horóscopo (kufembera zvo kumbeji), no mumbo jakatorehwa jinokurumijira ku mabasa o zvomujimu zve zvoita inga zvinodakajisa. Zvinobatanijazve zviro zvinosimihwa ngo vandhu kuitira kujijivirira ku zviro zvakashata.—1 VaKorinto 10:21.
15. Ngozvapi zvimwenizve zvatinodikana kuita kuti tirambe Sathana no madhimoni?
15 Makore manganani akapera, vo kuEfeso novapera kupisa mabhuku avo o masaramuso, mupostori Pauro wakatara kuti ivona vaciri ‘kujipana’ no masimba o “vajimu vakaxata.” (VaEfeso 6:12) Pikija ivona vainga vakapisa mabhuku avo madhimoni aindoeja kuvatambuja. Waro, ngozvapi zvovaidikana kuita? Pauro wakavabvunja kuti: “[Batanyi] mu nyara muviko wo rutendo, nguva yese: Mozokwanisa kujima ndiwona mupaxa yese yakabwaka ya Sathana.” (VaEfeso 6:16) Inga cijito cinojivirira musoca pa hondo, rutendo hwedu hungakwanisa kutijivirira. Kudari tecithemba Jehovha kamare, tinozokwanisa kuramba Sathana no madhimoni ake.—Mateu 17:20.
16. Tingaitisa kudini kuti tive no rutendo hwakavanga na Jehovha?
16 Tingaitisa kudini kuti tive no rutendo hwakavanga na Jehovha? Tinodikana kuverenga Bhaibheri njiku jese zve tojijira kuthemba kuti iyena anotijivirira. Kudari tecigonda Jehovha kamare, Sathana no madhimoni ake avazotitambuji.—1 Johani 5:5.
17. Ngozvapizve zvingazotijivirira ku madhimoni?
17 Ngozvapi zvimweni zvaidikana kuithwa ngo maKristu o ku Efeso? Ivona vairarama mu dhorobha raizara ngo madhimoni. Asi mupostori Pauro wakavabvunja kuti: “Namatanyi njiku jese.” (VaEfeso 6:18) Vaidikana kukumbira Jehovha kuti avavhikire nguva jese. Kuzoti itusuvo keni? Tiri kurarama mu nyika yakazara ngo madhimoni. Tinodikanavo kukumbira kujivirihwa ndi Jehovha, zve tinodikana kushandisa zina rake patinoita mukumbiro. (Verenganyi Mazwi Akangwara 18:10.) Kudari tikaramba tecikumbira Jehovha kuti atiponese munyara ja Sathana, Jehovha anozodavira mukumbiro yedu.—Nduyo 145:19; Mateu 6:13.
18, 19. (a) Tingawinisa kudini pa kuhwa na Sathana no madhimoni? (b) Mubvunjo wapi unozodavihwa mu cipauko cinotevera?
18 Kudari tikasveja zvese zvakabatana no madhimoni zve togonda kuti Jehovha anotijivirira, tingakwanisa kuramba Sathana no madhimoni ake. Itusu atidikani kumathya. (Verenganyi Jakobo 4:7, 8.) Jehovha anosimba maningi kupinda madhimoni. Iyena wakamapanica mu njiku ja Noa, zve kumbejiyo iyena acazomaparaja. (Juda 1:6) Ceujanyi kuti, atiripi kuhwa tega. Jehovha ari kushandisa ngirozi jake kuti jitijivirire. (2 Majimambo 6:15-17) Itusu tingathemba kuti, no besero ra Jehovha, tinganyisa Sathana no madhimoni ake.—1 Pedru 5:6, 7; 2 Pedru 2:9.
19 Asi kudari Sathana no madhimoni vecibara matambujiko mazinji, waro ngenyi Mwari aavaparaji? Mubvunjo uwu unozoadavihwa mu cipauko cinotevera.
