1. Tan’ ore nge co ule kacen’ ore ta angela?

IEHOVA ci alane ko eje co ule kacen’ ore fami ni Nubonengo. Ri fami ni Iehova numu ta angela. Tusi Hmijoc ci kaio buice ko “nodei tei Makaze.” (Iopu 38:7) Nge kore ruace ni buic? Korione ke buice hna konekatuon’ ore ta ngome ri eziene koda? Ka ilo, buice thuni co konekatu eje te onom?​—Ule ore Note 8, ri page 240.

2. (a) La kore thu pupul’ ore nodei angela? (b) Xara ele ke buic?

² Iehova hna puze ore nodei angela. Ke Nubonengo hna puli dani Iesu. Aselo, Kolose 1:16 ci ie ko, Iehova hna puze ore “nodei ac’ ileoden’ omeloi ri aw, ne ome ri ten.” Tusi Hmijoc ci ie ko numu ta millions kore angela.​—Ta Salamo 103:20; Ahngabot 5:11.

3. Iopu 38:4-7 ci yeno ej’ ore nge ri pon’ ore nodei angela?

³ Tusi Hmijoc ci yeno eje joko ko, Iehova hna puze ore nodei angela dan’ ore ten’ ore aw. Nge kore uane ri hnore ni buic, buice ma ulelo ore ten’ ore aw? Ri tusi ni Iopu, ci ie ko buice nidi hna opodon. Ri ezien’ omelei, buice ci menenge sese, ka ileodene buice ci sinemenenge sese du Iehova.​—Iopu 38:4-7.

4. Eje ci ule korione ko ta angela ci nidi acon’ ore ngom?

⁴ Ta angela hna iara nidi acon’ ore ngom, ne il’ ore alatone ni Iehova son’ ore ten’ ore aw, ne son’ ore ngom. (Ta Onatre 8:30, 31; 1 Peteru 1:11, 12) Ri rane Adamu ne  Eva hna cie ore wathebo ni Madaru, ta angela ngei nidi hna sheusheu. Ka onom, buice ngei ci nidi nidi sheusheu ma ci ule ko hmaiaiil’ ore ngome deko ma ninen’ o Iehova. Roidi, buice ci nidi opodone ngei o se ngome ma lereieti ore ta nia ni bon, ne ci cil’ ore ta ruace me nia ni bon, ne ci yewe yawe du Iehova. (Luke 15:10) Ta angela ci nidi acon’ ore ngome ci sinemenenge du Madaru. Iehova ci ujeni buice co konekatuon, ne co cagoren’ ore nodei sinemenenge ni Nubonengo ome ri ten. (Hebera 1:7, 14) Eje dai ule sesonelo ore ta ruace nore ta angela.

5. Korione kore ta angela hna konekatuon’ ore ta sinemenenge ni Madaru?

⁵ Ri dan’ ore co atakoni ore rue menenge i Sodoma ne Gomora, Iehova hna siane tru kore angela ha thu co awarumani Lota ne fami ni bon. (Genese 19:15, 16) Thubenelo ore ta 100 kore kenereken, ha hna cedo perofeta Daniela ri malu ni ta liona. Roidi, ta liona deko hna ia bone wen’ ore “Madarungo ha hna siaton’ o re angela ni nubonengo, ka ha hna punise (thingilu) o re ta tubenengoce no re ta liona.” (Daniela 6:22) Hue kore ta ezien, Iehova hna siane sa kore angela du Peteru aposetolo co aukuni Peteru buti sere ri kalabus. (Ta Ruace 12:6-11) Ta angela se hna konekatu Iesu ri eziene Nubone hna ome ri ten. Inome ri thuben’ ore hna bapataizo Iesu, “ta angela hna sinemenenge du Nubon”. (Mareko 1:13) Ka ri dan’ ore Iesu co tango, se angela “hna aengetaceni Nubon.”​—Luke 22:43.

6. (a) Eje ci ule korione ko ta angela ci konekatuon’ ore ta sinemenenge ni Madaru onom? (b) Nge kore ta hnenge eje co cedi?

⁶ Onom, ta angela ha deko ci ahnga du ngom. Roidi, Madaru ci ujeni buice ko co konekatuon’ ore ta sinemenenge ni Nubonengo. Tusi Hmijoc ci ie ko: “Ono re  angela ni Iehova ci cumo buic’ o re ci pareuo nubonengo, ne ci awarumani buic.” (Ta Salamo 34:7) Nge kore tane eje co iara numu ngome bane cagoreni ej? Tan’ ore numu ta icuhma me tace ri poni eje ci alane co rue ore nia du ej. La ke buic’ omelei? Ka buice hna pina sere il? Korione ke buice ci rue ore nia du ej? Thu co uni ore so ne cedi, eje co ule sesone ko, nge kore ace hna pina thubenelo ore hna puli Adamu ne Eva.

7. Tan’ ore nge Satana ci amenuni ore ngom?

⁷ Ri Yeno 3, eje hna yenone ko, numu se angela hna icatace ne Madaru. Bone hna alane co musion’ osoten. Tusi Hmijoc ci kaio bone ko, Satana Diabolo. (Ahngabot 12:9) Bone hna alane ko, ngome co icatace joko ne Madaru. Satana hna whane da co amenuni Eva, hale bone me amenuni te ore hmaiaiil’ ore ngom. Roinedi ko, ta ngome inomei Abela, Enoka ne Noa hna menenge netiti ko du Madaru.​—Hebera 11:4, 5, 7.

8. (a) Hna korione kore ta angela co demoni di? (b) Nodei demoni hna rue ore nge, ha thu co waruma ri ezien’ ore hna pina kore ue?

⁸ Ri ezieni Noa, numu ta angela hna icatace ne Madaru. Buice hna icelu sere ri awe thu co menenge inom’ ore ngome ome ri ten. Wen’ ore nge? Tusi Hmijoc ci ie ko, buice hna alane co lae hmenew. (Ieielo Genese 6:2.) Ke nianedi ko, kugu kore ruace hnei buice hna rue. (Juda 6) Inom’ ore nodei angela omelei me tho, hmaiaiil’ ore ngome ri ezien’ omelei, ha rue joko ore nia. Buice ha nodei ngome me tho, ne pareu re ngom. Hale i Iehova me uane co atakoni buice buti ome ri tene hnen’ ore ue. Roidi, Iehova hna awarumani ore ade sinemenenge ni Nubonengo me netit. (Genese 7:17, 23) Ore nodei angela me tho, hna yewe yawe jeu’ ore awe ha thu waruma. Tusi Hmijoc ci kaio buice ko, nodei demoni. Ile buice me ureie co kora ne Satana ri ci icatac. Wen’ omelei ha doku ni buice kei Satana.​—Mataio 9:34.

9. (a) Nge kore ace hna pina du nodei demoni ma hna yewe yawe jeu’ ore aw? (b) Nge kore eje co ethanatati ri soten’ ore so paragraf?

⁹ Iehova hna ke ko nodei demoni co yewe yawe jeu’ ore awe ha thu kani Nubonengo, wen’ ore buice hna icatace ne Nubonengo. (2 Peteru 2:4) Buice ha tha thuni ko co yose ore hnengome inom’ ore ngom, ke buice ci iara  “amenuni o re ten’ o re aw’ ileoden.” (Ahngabot 12:9; 1 Ioane 5:19) Eje dai ule sesonelo ko, korione kei nodei demoni ci amenuni ore hmaiaiil’ ore ngom.​—Ieielo 2 Korinito 2:11.

10. Korione kore nodei demoni ci amenuni ore ngom?

¹⁰ Hmaiai kore la rue nore nodei demoni bane amenuni ore ngom. Ta ngome thuni co ethanata ne ta demoni. O se ngome thuni co ethanata ne se demoni oden, ca lene sen’ o se kaze, ca lene sen’ o se médium (ngome ci ie dan’ ore ace co pina). Ore ci enengoco ne nodei demoni ci kaione ko: ci tha kaze. Tusi Hmijoc ci awa eje ko co nidi menenge ithuabuti ne nodei ace ni nodei demoni. (Galatia 5:19-21) Tan’ ore nge? Tan’ ore nodei demoni hmaiai kore la rue bane cori ore nodei ngome ha thu musi’ o buic. Inom’ o se thu leu ia, nodei demoni ci ilon’ ore hna watija bane cori o se ia.​—Ule ore Note 26, ri page 252.

11. (a) Nge kore ci ru kaze? (b) Tan’ ore nge nidi ace ke eje co kecon’ ore ci ru kaze?

¹¹ Ore ci ru kaze, melei ko se hna watija nodei demoni ci ruacone ha thu co amenuni ore ngom. Nge kore ci ru kaze? Ngome ci tubuhnidi co ule ore ace co pina, ca ore ace ri nashen, lene sen’ ore ta nene me deko ma wenei ngom. Numu ta ngome ci tubuhnidi co ule ore eziene co pina, lene sen’ ore ta kaadre re eleda tarot, lene ri ta tutuo, lene sen’ ore boule de cristal, lene sen’ ore astrologie (ta ngome ci ie dan’ ore ciroi no se ngome lene sen’ ore ta wajekol), ca lene sen’ ore ta laene ri ta aranin. Hmaiai kore ngome ci uane ko, tharan’ ore nodei ac’ omelei deko ma nia. Nianedi ko waiao komelei! Nodei  ac’ omelei thuni co nian’ ore ciroi ni ej. Tusi Hmijoc ci aehngeni ko, nodei demoni ne nodei thu ru kaze ci ruace sese. Ta Ruace 16:16 ca pina ri 18 ci nengocon’ o se cenewe me thuni co ie dan’ ore eziene co pina, lene sen’ ore “uien’ o re kaze.” Paulo hna canga uwonebut’ ore demoni omelei, hale i cenewe ma ha deko nene co ie dan’ ore eziene co pina.

12. (a) Tan’ ore nge nidi nia kore co tubuhnidi co enengoco ne nodei tango? (b) Tan’ ore nge nodei sinemenenge ni Iehova deko te co hue lewe ore ta pene node me ci ujeni buice co acenon’ ore ci ru kaze?

¹² Nodei demoni ci amenuni joko ore ta ngome ha thu co uane ke buice ko, buice thuni co enengoco ne nodei tango. Nodei demoni ci alane ko, eje co ua sesekone ko, nodei tango be ciroi ko, ka buice thuni co ethanata ne ej, thuni co konekatu ej, ca thuni co rue ore nia du ej. Inome ko, ma tango ko se kani ej, numu ta ngome ci hue co ule ore ta kaze, ca ta médiums. Buic’ omelei ci ie ko, buice thuni co enengoco ne ta tango. Ore médium ngei co ie o se ace me seseko ri pon’ ore ngome ma ha tango, ka se thuni joko co yose ore la nengoce nore ngome ma ha tango. (1 Samuela 28:3-19) Hmaiai kore ngome ci uane ko, nodei tango be ciroi ko ri se guhne. Wen’ omelei, hmaiai kore ta la rue son’ ore ta tango (inome ko: ci ca pe hna tango, ca ci uan’ ore hna tango no se ngom, ca ci hmi son’ ore ta tango, ca ore ta lata son’ ore ta etetangotango, ca ci veillée ne tango). Se ta ezien, ngei ore ta sinemenenge ni Iehova ma ke co hue lewe ore ta pene nod’ omelei, ta kani buic, ca ta guhnamenenge ni buice ci iala nia buic, ci papa nia buic, ca ci aceni o buic. Roidi, nodei sinemenenge ni Iehova ha ule ko, nodei tango deko ma ciroi ko ri se guhne. Tha thuni ko ke eje co enengoco ne buic. Ka buice tha thuni ko joko co rue ore nia  du eje, ca co konekatu ej. (Ta Salamo 115:17) Hneconelo ke bua! Hage tubuhnidi ke bua co enengoco ne nodei tango, ca nodei demoni. Ka se hage kanete co rue ore ta pene node ci ujeni bua co acenon’ ore ci ru kaze.​—Ieielo Deuteronomi 18:10, 11; Isaia 8:19.

13. Hna thuni co rue ore nge kore ta ngome hna pareuo demoni koda?

¹³ Nodei demoni deko ma ci amenuni so ore ta ngom. Buice ci apareuni joko ore ta ngom. Onom, Satana ne nodei demoni ha ule ko “ha gukokode so ko re ezieni” buic, wen’ ore Iehova ha bathu atakoni buice buti ser’ ome ri ten. (Ahngabot 12:12, 17) Wen’ omelei, buice ha nidi tace thawalan’ ore ta eziene koda. Roinedi ko, onome ha ta milliers kore ngome ma ha deko ma pareuon’ ore nodei demoni. Hna korione ke buice ma ha deko ma pareu?

14. Inom’ ore hna rue hnen’ ore ta sinemenenge ni Madaru no Efeso, korione ke eje co cengi eje buti wene ri nene nore nodei demoni?

¹⁴ Tusi Hmijoc ci ie du eje ko, korione ke eje co sere etha ne il’ ore nodei demoni, ka korione joko ke eje co cengi eje buti wene ri nene ni buic. Inom’ o re hna pina du ta ngome si Efeso. Ri dan’ ore co sinemenenge ni Iehova, buice hna enengoco ne nodei demoni. Ka korione ke buice hna cengi buice buti wene ri nene nore nodei demoni? Tusi Hmijoc ci ie ko, hmaiai kore si Efeso me “thu tha ace (ta ruace nore ta magiciens) hna hue sese ti bot’ o re nodei tusi ni buic, ne ci reulelu ri tadan’ o re xaranumu.” (Ta Ruace 19:19, MN) Buice hna reul’ ore so gu tusi bane ru magie, wen’ ore buice hna alane co sinemenenge ni Madaru. Onom, eje se co rue inomei si Efeso. Ore ta ngome ci alane co sinemenenge ni  Madaru, nidi ace ke buice co cicil’ ore nodei la rue nore nodei demoni. Inom’ ore ta gu tusi, ta magazines, ta horoscopes, ta films, ta miuzik, ta wa eleda ca ta posters: co cilebut’ ore nodei ac’ omelei ci aehngeni ore ta ci ru magie, ca ore ci ru kaze, ca nodei demoni, ca ta ace me deko ma wenei ngom. Ore ta ngome ci uane ko nodei ac’ omelei deko ma nia, ca bane eleda. Inome joko ore ta ace eje ci cori bane cagoreni ej.​—1 Korinito 10:21.

15. Eje co rue joko ore nge ha thu co sere etha ne Satana ne il’ ore nodei demoni?

¹⁵ Hue kore ta kenereken, thubenelo ore hna reul’ ore so gu tusi re ru magie hnei nodei sinemenenge ni Madaru no Efeso, Paulo aposetolo hna ie du buice ko, nidi ace ke buice co iara “sere etha” ne “nodei nia re uieni ri nodei guhnene re aw.” (Efeso 6:12) Seseko, buice ha hna reul’ ore so gu tusi buic. Ke nodei demoni ci iara there ko co rue ore nia du buic. Hale me buice co rue kane di ore nge? Paulo hna ie du buice ko: “Yoselo te o re nethakuie, ono re ci une ri pon’ ileoden, buhnije ha thu tace co thati abini o re ta cace iei no re thu nia.” (Efeso 6:16) Inome ngei ma ci irue, o se shoja hna cagorene hnen’ ore nethakuie. Se ineko, ore ci une ni eje kore ci cagoreni ej. Ngei eje ma ua sesekone ko, Iehova thuni co cagoreni ej, eje thuni co sere etha ne Satana ne il’ ore nodei demoni.​—Mataio 17:20.

16. Korione ke eje co aengetaceni ore ci une ni eje du Iehova?

¹⁶ Korione ke eje co aengetaceni ore ci une ni eje du Iehova? Nidi ace ke eje co ieie ore Tusi Hmijoc ri nodei ran. Nidi ace joko ke eje co yenone co une du Madaru, ka co ua sesekone ko, Nubonengo co cagoreni ej. Ngei eje ma une du Iehova, Satana ne nodei demoni tha thuni ko co rue ore nia du ej.​—1 Ioane 5:5.

17. Eje co rue ore nge joko ha thu deko co nia ngom’ o eje kei nodei demoni?

 ¹⁷ Sa joko ko se ace nodei sinemenenge ni Madaru no Efeso hna rue. Nidi cece hnei ta thu ru kaze kore node ni buic. Wen’ omelei, Paulo hna ie du buice ko: “Iara hnelo ke buhnij.” (Efeso 6:18) Ridri ne ran, nidi ace ke buice co sibo Iehova co cagoreni buic. Onom, eje joko se ci menenge ri nidin’ ore ta thu ru kaze. Wen’ omelei, nidi ace ke eje co sibo Iehova co cagoreni ej. Ka ngei eje ma hne, nidi ace kore co ie ore yele ni Madaru. (Ieielo Ta Onatre 18:10.) Ngei eje ma sibonelo ko du Iehova co cengi eje buti wene ri nene ni Satana, Nubonengo co cedi ore ta ci hne ni ej.​—Ta Salamo 145:19; Mataio 6:13.

18, 19. (a) Korione ke eje co sere etha ne Satana ne il’ ore nodei demoni? (b) Nge kore hnenge me co cedi ri Yeno 11?

¹⁸ Thuni ke eje co sere etha ne Satana ne il’ ore nodei demoni ngei eje ma cicil’ ore nodei la rue nore nodei demoni. Nidi ace joko ke eje co une du Madaru thu co cagoreni ej. Eje deko co pareuon’ ore nodei demoni. (Ieielo Iakobo 4:7, 8.) Iehova kore nidi nene ri pon’ ore nodei demoni. Nubonengo hna hnaelo buice ri eziene ni Noa. Ka ri ta eziene co pina, Iehova ha co atakoni buic. (Juda 6) Bua deko co hnedungone ko, eje deko ma ci sere etha odene ne Satana ne il’ ore nodei demoni. Iehova ci ujeni ore ta angela ha thu co cagoreni ej. (2 Nodei Doku 6:15-17) Eje thuni co ua sesekone ko, Iehova ma konekatu ej, melei nodei demoni ne Satana tha thuni ko co tace ri poni ej.—1 Peteru 5:6, 7; 2 Peteru 2:9.

¹⁹ Satana ne nodei demoni ci nidi apinani ore sheusheu ome ri ten. Wen’ ore nge Madaru be deko ko ma atakoni buic? Eje co cedi seson’ ore hneng’ omelei ri Yeno 11.