1. Ahabw’enki twine kumanya ebirikukwata ahari baamaraika?

YEHOVA naayenda ngu tumanye eka ye. Baamaraika ni bamwe aha b’omu ka ya Ruhanga. Baibuli neebeeta “abaana ba Ruhanga.” (Yobu 38:7) Kwonka shi, baamaraika nibakora ki? Bakahwera bata abantu ira? Mbwenu shi nibabaasa kutuhwera hati?—Reeba Ebirikukiraho 8.

2. Baamaraika bakaruga nkahi, kandi nibaingana ki?

² Buzima twine kumanya obukomooko bwa baamaraika. Abakolosai 1:16 nihooreka ngu Yehova akahanga ‘ebintu byona eby’omu iguru n’eby’ahansi,’ bwanyima y’okuhanga Yesu. Ebintu ebyo nibitwariramu baamaraika. Ni baamaraika bangahi abaahangirwe? Baibuli neeyoreka ngu hakahangwa baamaraika nyamwingi.—Zaaburi 103:20; Okushuuruurwa 5:11.

3. Ebiri omu Yobu 38:4-7 nibigamba ki ahari baamaraika?

³ Baibuli neegaruka egira ngu Yehova akahanga baamaraika atakahangire ensi. Bakeehurira bata ku baareebire ensi? Ekitabo kya Yobu nikigira ngu bakateera akaari k’okushemererwa. Bakaba bari nk’eka emwe erikuheereza Yehova.—Yobu 38:4-7.

4. Nitumanya tuta ngu baamaraika nibakunda abantu?

⁴ Baamaraika batwire nibata munonga omutima aha bantu n’aha kigyendererwa kya Ruhanga ahabw’ensi n’abantu. (Enfumu 8:30, 31; 1 Petero 1:11, 12) Kiine kuba kyabagwisize kubi munonga obu Adamu na Haawa baagoma. Kandi baine kuba baahuriire kubi munonga  kureeba abantu baingi nibagomera Yehova. Kwonka, omuntu omwe ku arikweteisa akagarukira Yehova, ‘baamaraika nibashemererwa.’ (Luka 15:10) Baamaraika nibakunda munonga abaheereza ba Yehova. Yehova naakoresa baamaraika kuhwera abaheereza be ab’omu nsi n’okubarinda. (Abaheburaayo 1:7, 14) Ka tureebe bamwe abaarinzirwe baamaraika.

5. Ira baamaraika bakahwera bata abaheereza ba Ruhanga?

⁵ Yehova akoohereza baamaraika babiri kuhwera Looti  n’eka ye kutacwekyerera obu ababi baabaire nibacwekyerezibwa omuri Sodoma na Gomora. (Okutandika 19:15, 16) Bwanyima y’emyaka mingi, nabi Danieli akanagwa omu kiina ky’entare, kwonka tiyaakorwaho kabi koona atyo yaagira ati: “Ruhanga wangye atumire maraika we, yaigara eminwa y’entare.” (Danieli 6:22) Bwanyima, obu entumwa Petero yaabaire ari omu kihome, Yehova akoohereza maraika yaamuhwera kuruga omu kihome. (Ebyakozirwe 12:6-11) Kandi, baamaraika bakahwera Yesu obu yaabaire ari omu nsi. Nk’eky’okureeberaho, Yesu ku yaaherize kubatizibwa, ‘baamaraika bakamuheereza.’ (Mako 1:13) Yesu atakaitsirwe, maraika akaija “yaamugumya” Luka 22:43.

6. (a) Nitumanya tuta ngu baamaraika nibahwera abaheereza ba Ruhanga obunaku obu? (b) Ni bibuuzo ki ebi turikuza kushwijuma?

⁶ Obunaku obu, abantu tibakireeba baamaraika. Kwonka Ruhanga naakikoresa baamaraika kuhwera abaheereza be. Baibuli neegira eti: “Maraika wa Mukama ateera amahema okwehinguririza abarikumutiina, kandi abajuna.” (Zaaburi 34:7) Ahabw’enki nitwetenga oburinzi? Ahakuba twine abazigu b’amaani abarikwenda kutukora kubi. Nibo baahi? Nibaruga nkahi? Nibateeraho bata kutukora kubi? Okubaasa kugarukamu ebibuuzo ebyo, ka tureebe ekyabaireho Adamu na Haawa baherize kuhangwa.

7. Sitaane arikukoresa emitego ye areeteire abantu kukora ki?

⁷ Omu Shuura ya 3 tukeega ngu maraika omwe akagomera Ruhanga yaagira ekyetengo ky’okwenda kutegyeka abandi. Baibuli neemweta Sitaane Omuregi. (Okushuuruurwa 12:9) Sitaane akaba naayenda ngu n’abandi bagomere Ruhanga. Akabaasa kutega Haawa, kandi kuruga obwo ahabiise baingi. Kwonka abamwe nka Abeeli,  Enoka, na Noa, bakaguma bari abeesigwa ahari Yehova.—Abaheburaayo 11:4, 5, 7.

8. (a) Baamaraika abamwe bakahinduka bata baadaimoni? (b) Baadaimoni bakakora ki kwetantara kucwekyerezibwa Omwegyemure?

⁸ Omu bunaku bwa Noa, baamaraika abamwe bakaba abagomi baaruga omu iguru baija kutuura omu nsi nk’abantu. Ahabw’enki? Baibuli neegira ngu bakaba baine ekyetengo ky’okutunga abakazi. (Shoma Okutandika 6:2.) Kwonka buzima baamaraika bakaba batahikire kukora ekyo. (Yuda 6) Baamaraika abo ababi, bakareetera abantu baingi obunaku obwo kuba babi kandi enshaarizi. Yehova akacwamu kucwekyereza abantu babi omu nsi yoona arikukoresa omwegyemure. Kwonka akajuna abaheereza be abeesigwa. (Okutandika 7:17, 23) Baamaraika abagomi kubaasa kuhonokaho, bakagaruka omu iguru. Baamaraika abo ababi Baibuli neebeeta baadaimoni. Bakacwamu kushagika Sitaane omu bugomi bwe, reero yaaba omutegyeki waabo.—Matayo 9:34.

9. (a) Niki ekyahikire ahari baadaimoni obu baagaruka omu iguru? (b) Niki eki turikuza kwegaho?

⁹ Ahabw’okugira ngu baadaimoni bakagoma, Yehova tarabaikiriize kugaruka omu ka ye. (2 Petero 2:4) Obunaku obu, baadaimoni tibarikubaasa kwehinduramu abantu, kwonka bakiriyo ‘nibagobeza ensi yoona.’ (Okushuuruurwa 12:9; 1 Yohaana 5:19) Ka twetegyereze oku babaasize kugobeza nari kuhabisa abantu baingi.—Shoma 2 Abakorinso 2:11.

10. Baadaimoni nibahabisa bata abantu?

¹⁰ Baadaimoni nibahabisa abantu omu miringo mingi. Abantu ku barikuba nibenda kwejumba omu bikorwa  bya baadaimoni nibakikora butunu nari kurabira omu muntu ondiijo nk’Omufumu. Okwejumba omu bikorwa bya baadaimoni nikwetwa okubandwa nari eby’obufumu. Baibuli neeturabura okwetantara ekintu kyona ekiine akakwate na baadaimoni. (Abagalatia 5:19-21) Ahabw’enki? Nk’oku omuhiigi arikukoresa omutego kukwata enyamaishwa, baadaimoni nibakoresa obukodyo nari emitego kuhabisa abantu.—Reeba Ebirikukiraho 26.

11. Okubandwa niki, kandi ahabw’enki tushemereire kukwetantara?

¹¹ Omutego gumwe ogu baadaimoni barikukoresa n’okubuuza abafumu ebirikwija kubaho omu biro by’omumaisho. Abamwe nibabaasa kukora eki barikuraguza enyonyoozi, barikukoresa engisha, emandwa, okucecera, n’okuteeraho kumanya eby’omumaisho kurabira omu bumanyiso nari ebirooto. Abantu baingi nibateekateeka ngu ebikorwa ebi ti by’akabi. Kwonka harimu akabi kaingi. Nk’eky’okureeberaho, abarikuragura ebirikwija kubaho nibakora hamwe na baadaimoni. Ebyakozirwe 16:16-18 nihagamba ahari “daimoni orikuragura” owaabaire abaasisa omwishiki ‘kuragura.’ Kwonka bwanyima y’entumwa Paulo kubinga daimoni, omwishiki akarekyera aho kuragura.

12. (a) Ahabw’enki n’eky’akabi kuteeraho kugamba n’abafu? (b) Ahabw’enki abaheereza ba Ruhanga nibeetantarira kimwe okwejumba omu by’obufumu?

¹² Baadaimoni nibakoresa omuringo ogundi kuhabisa abantu. Nibateeraho kutubeihabeiha ngu nikibaasika kugamba na bafu, ngu abafu haine ahu bari, kandi ngu nibabaasa kugamba naitwe nari kutusaasa. Nk’eky’okureeberaho, omuntu ofeereirwe omunywani nari omunyabuzaare, naabaasa kwebuuza aha mufumu orikugira ngu naagamba n’abafu. Omufumu naabaasa kubareetera  obutumwa bw’omutaano nari naabaasa kugamba omu iraka eriri nk’ery’ogwo owaafiire. (1 Samueli 28:3-19) Emigyenzo y’okuziika enyingi neeshagika enyikiriza ngu abafu haine ahu bari. Emigyenzo egi neetwariramu emikoro y’okuziika, okwijuka abafu buri mwaka, okuhongyera abafu, nari emikoro y’efaakazi. Abakristaayo ku barikwanga kwejumba omu migyenzo egi, ab’omu maka gaabo nari abataahi nibabaasa kubeetomboitera, kubagambaho kubi, nari kutakwatanisa nabo. Kwonka Abakristaayo nibamanya ngu abafu nibaba bataine magara kandi tibaine ahu bari. Titurikubaasa kugamba nabo, kandi tibarikubaasa kutusaasa. (Zaaburi 115:17) Yegyendesereze munonga. Yetantare kuteeraho kugamba n’abafu nari baadaimoni kandi otakaayejumba omu migyenzo erimu ebikorwa bya baadaimoni.—Shoma Eky’Ebiragiro 18:10, 11; Isaaya 8:19.

13. Abantu baingi abaabaire nibatiina baadaimoni babaasize kukora ki?

¹³ Emyoyo emibi neehabisa abantu kandi ebatiinatiinisa. Omu bunaku obu, Sitaane na baadaimoni be nibamanya ngu hatsigaireyo ‘akaanya kakye’ bakacwekyerezibwa, kandi hati ni babi munonga kandi baine ekiniga kingi okukira oku baabaire bari. (Okushuuruurwa 12:12, 17) N’obu kiraabe kiri kityo, enkumi n’enkumi z’abantu abaabaire nibatiina baadaimoni hati tibarikutiina. Niki ekyabahwereire kutatiina baadaimoni?

14. Nitubaasa kwecwa tuta aha myoyo mibi nk’Abakristaayo b’omu kyasha ky’okubanza?

¹⁴ Baibuli neetugambira oku turikubaasa kwangira baadaimoni n’oku turikubaasa kubeecwaho. Nk’eky’okureeberaho, bamwe ab’omu rurembo Efeso bakaba  nibagamba na baadaimoni batakeegire amazima. Bakakora ki kubaasa kureka eby’obufumu? Baibuli neegira eti: ‘Baingi ahari abo abaabaire nibakora eby’obufumu bakateeranira hamwe ebitabo byabo, eby’okuragura baabyokyeza omu maisho g’abantu boona.’ (Ebyakozirwe 19:19) Ahabw’okwenda kuba Abakristaayo, bakacwekyereza ebitabo byabo byona eby’okuragura. Nikyo kimwe n’obunaku obu. Buri omwe orikwenda kuheereza Yehova ashemereire kweyihaho ekintu kyona ekiine akakwate n’eby’obufumu. Ekyo nikitwariramu ebitabo, magaziini, vidiyo, ebipande, ebyeshongoro ebirikushagika ebikorwa by’obufumu ebirikureebeka nka birungi nari ebirikushemeza. Nikitwariramu n’ebindi bintu ebirikujwarwa kwerinda akabi.—1 Abakorinso 10:21.

15. Niki ekindi eki tushemereire kukora kubaasa kwangira emyoyo emibi?

¹⁵ Bwanyima y’emyaka Abakristaayo omuri Efeso baherize kucwekyereza ebitabo byabo by’okuragura, entumwa Paulo akabahandiikira ngu nabwo bakaba ‘nibafukaana’ kandi nibarwana “n’amahe g’emyoyo emibi.” (Abaefeso 6:12) N’obu baraabe baabaire baaherize kwotsya ebitabo, baadaimoni bakaba nibakiteeraho kwenda kubakora kubi. Mbwenu shi bakaba baine kukora ki ekindi? Paulo akagira ati: “Ahari ebyo byona, mukwatireho engabo y’okwikiriza ei murikubaasa kuraarisa emyambi y’omuriro yoona ey’Omubi [Sitaane].” (Abaefeso 6:16) Nk’oku engabo erikurinda omuserukare omu rutaro, okwikiriza kwaitu nikuturinda. Twaba nitwikiririza kimwe ngu Yehova naabaasa kuturinda, nitusingura Sitaane na baadaimoni be.—Matayo 17:20.

16. Nitubaasa kwongyera tuta kwikiririza omuri Yehova?

¹⁶ Nitubaasa kwongyera tuta kwikiririza omuri Yehova? Twine kushoma Baibuli butoosha kandi tukeesiga Yehova  ngu naaza kuturinda. Twaba nitwesigira kimwe Yehova, Sitaane na baadaimoni be tibarikubaasa kutukora kubi.—1 Yohaana 5:5.

17. Niki ekindi ekiraatuhwere kwerinda baadaimoni?

¹⁷ Abakristaayo b’omuri Efeso bakaba baine kukora ki ekindi? Bakaba nibatuura omu rurembo orwijwire eby’obufumu. N’ahabw’ekyo Paulo akabagambira ati: ‘Mushabe obutoosha.’ (Abaefeso 6:18) Bakaba baine kushaba Yehova kubarinda obwire bwona. Kandi shi itwe? Naitwe tutwire omu nsi eijwiremu ebikorwa bya baadaimoni. N’ahabw’ekyo twine kushaba Yehova kuturinda, kandi twine kukoresa eiziina rye omu kushaba. (Shoma Enfumu 18:10.) Yehova naija kugarukamu okushaba kwaitu, twaguma nitumushaba kutujuna Sitaane.—Zaaburi 145:19; Matayo 6:13.

18, 19. (a) Nitubaasa kusingura tuta Sitaane na baadaimoni? (b) Ni kibuuzo ki ekirikuza kugarukwamu omu shuura erikukurataho?

¹⁸ Twayeyihaho ekintu kyona ekirikukwata aha by’obufumu tukeesiga Yehova kuturinda, nitubaasa kwangira Sitaane na baadaimoni be. Titushemereire kubatiina. (Shoma Yakobo 4:7, 8.) Yehova aine amaani maingi okukira baadaimoni. Omu bwire bwa Noa, akabafubira, kandi naija kubacwekyereza omu biro by’omumaisho. (Yuda 6) Ijuka ngu tituri twenka omu kurwana kwaitu. Yehova naakoresa baamaraika be abeesigwa kuturinda. (2 Abagabe 6:15-17) Nitubaasa kugira obuhame ngu twayesiga Yehova, nitwija kusingura omu kurwanisa Sitaane na baadaimoni.—1 Petero 5:6, 7; 2 Petero 2:9.

¹⁹ Kwonka shi ahabw’enki Ruhanga arekireho Sitaane na baadaimoni abarikubonabonesa abantu munonga? Ekibuuzo ekyo nikiza kugarukwamu omu shuura erikukurataho.