1.‏ سانوں فرشتیاں بارے کیوں جاننا چاہی دا اے؟‏

پاک کلام چ دَسیا گیا اے کہ فرشتے خدا دے بیٹے نیں۔‏ (‏ایوب 38:‏7‏)‏ ایس توں پتہ چلدا اے کہ اوہ خدا دے خاندان دا حصہ نیں۔‏ پر خدا دے خاندان چ فرشتیاں دا کردار کیہہ اے؟‏ خدا چاہندا اے کہ اَسی ایہدے بارے جانیے۔‏ آؤ ویکھئے کہ فرشتیاں نے ماضی چ لوکاں دی مدد کیویں کیتی؟‏ کیہہ اوہ اَج ساڈی مدد کر سکدے نیں؟‏—‏کتاب دے آخر چ نکتہ نمبر 8 نُوں ویکھو۔‏

2.‏ (‏الف)‏ فرشتے کیویں بنے؟‏ (‏ب)‏ یہوواہ خدا نے کِنّے فرشتے بنائے؟‏

² سب توں پہلاں ویکھنے آں کہ فرشتے کیویں بنے۔‏ پاک کلام چ دَسیا گیا اے کہ یہوواہ خدا نے یسوع مسیح نُوں بناؤن توں بعد اسمان دِیاں تے زمین دِیاں ساریاں چیزاں بنائیاں۔‏ (‏کُلسّیوں 1:‏16‏)‏ ایہناں چ فرشتے وی شامل نیں۔‏ پر یہوواہ خدا نے کِنّے فرشتے بنائے؟‏ پاک کلام دے مطابق فرشتیاں دی تعداد کروڑاں چ اے۔‏—‏زبور 103:‏20؛‏ مکاشفہ 5:‏11‏۔‏

3.‏ اَسی ایوب 38:‏4-‏7 توں فرشتیاں بارے کیہہ سکھنے آں؟‏

³ پاک کلام توں پتہ چلدا اے کہ جدوں یہوواہ خدا نے زمین نُوں بنایا تے فرشتے اوہدوں موجود سن۔‏ زمین نُوں ویکھ کے فرشتیاں نُوں کیہو جیہا لگا؟‏ ایوب دی کتاب چ دَسیا گیا اے کہ فرشتے زمین نُوں ویکھ کے بوہت ای خوش ہوئے۔‏ اوہ اِک خاندان دے طور تے یہوواہ خدا دی عبادت کردے سن۔‏—‏ایوب 38:‏4-‏7‏۔‏

4.‏ سانوں کیویں پتہ اے کہ فرشتے انساناں نُوں پیار کردے نیں؟‏

⁴ فرشتے انساناں نُوں پیار کردے نیں تے شروع توں ای ایہہ جانن وچ دلچسپی رکھدے نیں کہ زمین تے انساناں لئی خدا دا مقصد کیویں پورا ہوئے گا۔‏ (‏امثال 8:‏30،‏ 31؛‏ 1-‏پطرس 1:‏11،‏ 12‏)‏ جدوں آدم تے  حوا نے خدا دی نافرمانی کیتی تے فرشتیاں نُوں بڑا دُکھ ہویا ہوئے گا۔‏ پر ایس توں وی بوہتا دُکھ تے اوہناں نُوں ایہہ ویکھ کے ہوندا ہوئے گا کہ اَج کل بوہت سارے انسان یہوواہ خدا دے حکماں تے نئیں چلدے۔‏ پر جدوں کوئی انسان اپنے گناہواں توں توبہ کردا اے تے خدا وَل واپس آ جاندا اے تے فرشتے بوہت خوش ہوندے نیں۔‏ (‏لُوقا 15:‏10‏)‏ فرشتے اوہناں لوکاں نُوں وی ویکھ کے بوہت خوش ہوندے نیں جیہڑ‌ے یہوواہ خدا دی عبادت کردے نیں۔‏ فرشتے اپنے خالق یہوواہ خدا دے حکم نال اوہدے بندیاں دی مدد تے حفاظت کردے نیں۔‏ (‏عبرانیوں 1:‏7،‏ 14‏)‏ آؤ ویکھئے کہ ماضی چ فرشتیاں نے خدا دے بندیاں دی مدد کیویں کیتی۔‏

5.‏ ماضی چ فرشتیاں نے خدا دے بندیاں دی مدد کیویں کیتی؟‏

 ⁵ جدوں یہوواہ خدا سدوم تے عمورہ دے شہراں نُوں تباہ کرن والا سی تے اوہنے دو فرشتیاں نُوں لُوط تے اوہناں دے خاندان کول گھلیا تاکہ اوہ اوہناں نُوں تباہی توں بچا سکن۔‏ (‏پیدایش 19:‏15،‏ 16‏)‏ ایس واقعے دے کئی صدیاں بعد جدوں دانی‌ایل نبی نُوں شیراں دی غار چ سُٹیا گیا تے خدا دے فرشتے نے آ کے شیراں دے مونہہ بند کر دِتے تے اِنج دانی‌ایل نُوں کوئی نقصان نہ پونچیا۔‏ (‏دانی‌ایل 6:‏22‏)‏ فیر اِک واری جدوں پطرس رسول قید وچ سن تے یہوواہ خدا نے اپنے فرشتے نُوں گھل کے اوہناں نُوں قید چوں چھڈا لیا۔‏ (‏اعمال 12:‏6-‏11‏)‏ فرشتیاں نے یسوع مسیح دی وی مدد کیتی جدوں اوہ زمین تے سن۔‏ مثال دے طور تے یسوع مسیح دے بپتسمے توں بعد فرشتیاں نے آ کے اوہناں دی خدمت کیتی۔‏ (‏مرقس 1:‏13‏)‏ فیر اوہناں دی موت توں کجھ دیر پہلاں اِک فرشتے نے آ کے اوہناں دا حوصلہ ودھایا۔‏—‏لُوقا 22:‏43‏۔‏

6.‏ (‏الف)‏ سانوں کیویں پتہ اے کہ فرشتے اَج وی خدا دے بندیاں دی مدد کردے نیں؟‏ (‏ب)‏ ہُن اَسی کیہڑے سوالاں تے غور کراں گے؟‏

⁶ اَج کل فرشتے انساناں نُوں نظر نئیں آؤندے۔‏ پر یہوواہ خدا اَج وی اوہناں دے ذریعے اپنے بندیاں دی مدد کردا اے۔‏ پاک کلام چ لکھیا اے کہ یہوواہ خدا توں ڈرن والیاں دے چارچوفیرے اوہدا فرشتہ خیمہ‌زن رہندا اے تے اوہناں نُوں بچاؤندا اے۔‏ (‏زبور 34:‏7‏)‏ پر سوال ایہہ وے کہ سانوں فرشتیاں دی مدد دی لوڑ کیوں اے؟‏ کیونکہ ساڈے دُشمن بوہت طاقت‌ور نیں تے اوہ سانوں نقصان پونچاؤنا چاہندے نیں۔‏ پر ساڈے دُشمن کون نیں؟‏ اوہ کتھوں آئے نیں؟‏ اوہ سانوں نقصان کیویں پونچاؤنا چاہندے نیں؟‏ ایہناں سوالاں دے جواب جانن لئی آؤ ویکھئے کہ جدوں خدا نے آدم تے حوا نُوں بنایا تے اوہدے کجھ عرصے بعد کیہہ ہویا۔‏

7.‏ شیطان دے جال چ پھس کے بوہت سارے لوکاں نے کیہہ کیتا اے؟‏

⁷ باب نمبر 3 چ اَسی سکھیا سی کہ اِک فرشتے نے خدا دے خلاف بغاوت کیتی کیونکہ اوہ دُوجیاں تے حکومت کرنا چاہندا سی۔‏ پاک کلام چ ایس فرشتے نُوں شیطان اِبلیس کہیا گیا اے۔‏ (‏مکاشفہ 12:‏9‏)‏ شیطان چاہندا سی کہ دُوجے وی خدا دے خلاف بغاوت کرن۔‏ ایس لئی اوہنے سب توں پہلے حوا  نُوں اپنے جال چ پھسایا تے اوہدوں توں لے کے ہُن تک اوہ بوہت سارے انساناں نُوں اپنے جال چ پھسا چُکیا اے۔‏ پر کجھ انسان جیویں کہ ہابل‏،‏ حنوک تے نوح اوہدے جال چ نہ پھسے سگوں یہوواہ خدا دے وفادار رہے۔‏—‏عبرانیوں 11:‏4،‏ 5،‏ 7‏۔‏

8.‏ (‏الف)‏ کجھ فرشتے بُرے کیویں بن گئے؟‏ (‏ب)‏ بُرے فرشتیاں نے طوفان توں بچن لئی کیہہ کیتا؟‏

⁸ نوح دے زمانے چ کجھ فرشتیاں نے خدا دے خلاف بغاوت کیتی۔‏ اوہ اسمان نُوں چھڈ کے زمین تے آ گئے تے انساناں دے طور تے رہن لگ پئے۔‏ ایہدی وجہ کیہہ سی؟‏ پاک کلام چ دَسیا گیا اے کہ اوہ فرشتے اصل چ عورتاں نال ویاہ کرنا چاہندے سن۔‏ ‏(‏پیدایش 6:‏2 نُوں پڑھو۔‏)‏ پر فرشتیاں نُوں ایہدی اِجازت نئیں سی۔‏ (‏یہوداہ 6‏)‏ اوس زمانے دے بوہت سارے لوک ایہناں فرشتیاں وانگوں بدکار تے ظالم بن گئے۔‏ ایس کر کے یہوواہ خدا نے فیصلہ کیتا کہ اوہ پوری زمین تے طوفان لیائے گا تے بدکار لوکاں نُوں ختم کر دَوے گا۔‏ پر اوہنے اپنے وفادار بندیاں نُوں بچا لیا۔‏ (‏پیدایش 7:‏17،‏ 23‏)‏ ایس تباہی توں بچن لئی بُرے فرشتے اسمان تے واپس چلے گئے۔‏ اوتھے جا کے اوہناں نے شیطان دی حمایت کرن دا فیصلہ کیتا تے اِنج شیطان اوہناں دا حاکم بن گیا۔‏ (‏متی 9:‏34‏)‏ ایہناں بُرے فرشتیاں نُوں شیاطین یاں بدروحواں وی کہیا جاندا اے۔‏

9.‏ (‏الف)‏ جدوں بُرے فرشتے اسمان تے واپس گئے تے اوہناں نال کیہہ ہویا؟‏ (‏ب)‏ ہُن اَسی کیہہ سکھاں گے؟‏

⁹ یہوواہ خدا نے بغاوت کرن والے فرشتیاں نُوں دُبارہ اپنے خاندان چ شامل نہ کیتا۔‏ (‏2-‏پطرس 2:‏4‏)‏ ہُن ایہہ فرشتے پہلے وانگوں انسانی جسم نئیں لے سکدے پر فیر وی اوہ ساری زمین تے انساناں نُوں گمراہ کر رہے نیں۔‏ (‏مکاشفہ 12:‏9؛‏ 1-‏یوحنا 5:‏19‏)‏ آؤ ویکھئے کہ بُرے فرشتے اَج کل انساناں نُوں کیویں گمراہ کر رہے نیں۔‏‏—‏2-‏کُرنتھیوں 2:‏11 نُوں پڑھو۔‏

10.‏ بُرے فرشتے لوکاں نُوں اپنے وَس چ کرن لئی کیہہ کردے نیں؟‏

¹⁰ بُرے فرشتے لوکاں نُوں گمراہ کرن لئی بوہت سارے طریقے استمال کردے نیں۔‏ جیویں  اِک شکاری جانوراں نُوں پھڑن لئی طرحاں طرحاں دے پھندے لاؤندا اے اوسے طرحاں بُرے فرشتے لوکاں نُوں اپنے وَس چ کرن لئی طرحاں طرحاں دے طریقے استمال کردے نیں۔‏ مثال دے طور تے اوہ جادوگراں تے تویت دھاگے کرن والیاں دے ذریعے لوکاں نُوں اپنے قابو چ کردے نیں۔‏ جادوگر یاں تویت دھاگا کرن والے عامل،‏ لوکاں دا رابطہ بُرے فرشتیاں نال کراؤندے نیں۔‏ اِنج لوک ایہناں فرشتیاں دے جال چ پھس جاندے نیں۔‏ ایسے لئی پاک کلام چ حکم دِتا گیا اے کہ اَسی ہر اوس شے توں دُور رہیے جدا تعلق بُرے فرشتیاں نال اے۔‏—‏گلتیوں 5:‏19-‏21‏؛‏ کتاب دے آخر چ نکتہ نمبر 26 نُوں ویکھو۔‏

11.‏ (‏الف)‏ لوک مستقبل دا حال جانن لئی کیہہ کردے نیں؟‏ (‏ب)‏ سانوں مستقبل دا حال دَسن والے لوکاں کولوں کیوں بچنا چاہی دا اے؟‏

¹¹ بُرے فرشتے لوکاں نُوں مستقبل دا حال جانن یاں غیب دا علم حاصل کرن دی ہلاشیری دین نال وی گمراہ کردے نیں۔‏ لوک اپنی قسمت یاں مستقبل دا حال جانن لئی نجومیاں،‏ فال کڈھن والیاں،‏ ہتھ ویکھن والیاں تے خواباں دا مطلب دَسن والیاں کول جاندے نیں۔‏ بوہت سارے لوک سوچدے نیں کہ ایہو جہے لوکاں کول جان چ کوئی خطرہ نئیں۔‏ پر ویکھیا جائے تے ایہدے چ بوہت زیادہ خطرہ اے کیونکہ پاک کلام توں پتہ چلدا اے کہ قسمت دا حال دَسن والیاں دا رابطہ بُرے فرشتیاں نال ہوندا اے۔‏ اعمال 16:‏16-‏18 چ اِک ایسی کُڑی بارے دَسیا گیا اے جدے چ اِک بُرا فرشتہ سی جیہڑ‌ا اوہنوں غیب دا علم دیندا سی۔‏ ایسے فرشتے دی مدد نال اوہ کُڑی مستقبل دا حال دَسدی سی۔‏ پر جدوں پولس رسول نے اوس کُڑی چوں بُرے فرشتے نُوں کڈھ دِتا تے فیر اوہ مستقبل دا حال دَسن دے قابل نہ رہی۔‏

12.‏ (‏الف)‏ مُردیاں نال گل‌بات کرن دی کوشش کرنا خطرناک کیوں اے؟‏ (‏ب)‏ خدا دے بندے اوہناں رسماں چ شریک کیوں نئیں ہوندے جنہاں دا تعلق بُرے فرشتیاں نال اے؟‏

¹² بُرے فرشتے اِک ہور طریقے نال وی لوکاں نُوں گمراہ کردے نیں۔‏ اوہ لوکاں نُوں ایہہ یقین دواؤندے نیں کہ مُردے کسے ہور جہان چ زندہ نیں تے اوہ ساڈے نال گل‌بات کر سکدے نیں تے  اَسی اوہناں نال گل‌بات کر سکنے آں نالے اوہ سانوں فائدہ یاں نقصان پونچا سکدے نیں۔‏ مثال دے طور تے جدوں کسے دا کوئی عزیز مر جاندا اے تے شاید اوہ کسے جادوگر یاں عامل کول جائے۔‏ فیر اوہ جادوگر یاں عامل شاید مرے ہوئے شخص بارے کوئی خاص گل دَسے یاں اوہدی آواز چ گل کرے۔‏ (‏1-‏سموئیل 28:‏3-‏19‏)‏ ایہدے علاوہ کسے شخص دے مرن توں بعد ایہو جہیاں رسماں کیتیاں جاندیاں نیں جنہاں دا تعلق ایس عقیدے نال اے کہ مُردے کسے ہور جہان چ زندہ نیں،‏ مثلاً مُردیاں لئی چڑھاوے چڑھاؤنا تے برسیاں مناؤنا۔‏ جدوں یہوواہ خدا دے بندے ایہناں رسماں چ حصہ نئیں لیندے تے شاید اوہناں دے رشتےدار یاں برادری دے لوک اوہناں نُوں بُرابھلا کہن،‏ اوہناں دی بےعزتی کرن یاں اوہناں نال تعلق توڑ دین۔‏ پر خدا دے بندے جان دے نیں کہ مُردے کسے ہور جہان چ زندہ نئیں،‏ اوہناں نال گل‌بات نئیں کیتی جا سکدی تے اوہ سانوں کوئی نقصان نئیں پونچا سکدے۔‏ (‏زبور 115:‏17‏)‏ ایس لئی خبردار رہوو۔‏ کدی وی مُردیاں یاں بُرے فرشتیاں نال گل‌بات کرن دی کوشش نہ کرو تے نہ ای ایہو جہیاں رسماں چ شریک ہووو جنہاں دا تعلق بُرے فرشتیاں نال اے۔‏‏—‏اِستثنا 18:‏10،‏ 11 نُوں پڑھو؛‏ یسعیاہ 8:‏19‏۔‏

13.‏ جیہڑ‌ے لوک پہلے بُرے فرشتیاں یاں بدروحواں کولوں ڈردے سن،‏ ہُن اوہ کیس قابل ہو گئے نیں؟‏

¹³ بُرے فرشتے لوکاں نُوں صرف گمراہ ای نئیں کردے سگوں اوہناں نُوں ڈراؤندے وی نیں۔‏ شیطان تے بُرے فرشتیاں نُوں پتہ اے کہ اوہناں کول بس تھوڑا جیہا وقت رہ گیا اے کیونکہ خدا اوہناں نُوں بوہت چھیتی ختم کرن والا اے۔‏ ایس لئی اوہ پہلے نالوں کِتے زیادہ بھڑکے ہوئے نیں تے لوکاں تے ظلم ڈھا رہے نیں۔‏ (‏مکاشفہ 12:‏12،‏ 17‏)‏ پر ہزاراں لوک جیہڑ‌ے پہلے بُرے فرشتیاں یاں بدروحواں کولوں ڈردے سن،‏ ہُن نئیں ڈردے۔‏ اوہ ایس ڈر توں آزاد کیویں ہوئے نیں؟‏

14.‏ پرانے زمانے دے کجھ مسیحیاں وانگوں اَسی بُرے فرشتیاں دی قید چوں آزاد کیویں ہو سکنے آں؟‏

¹⁴ پاک کلام چ دَسیا گیا اے کہ اَسی بُرے فرشتیاں دا مقابلہ کیویں کر سکنے آں تے اوہناں دی قید چوں آزاد کیویں ہو سکنے آں۔‏ ایس سلسلے چ اِک مثال تے غور کرو۔‏ پرانے زمانے چ اِفسس  دے شہر چ کجھ لوک مسیحی بنن توں پہلاں ایہو جہے کم کردے سن جنہاں دا تعلق بُرے فرشتیاں نال سی۔‏ اوہ لوک بُرے فرشتیاں دی قید چوں آزاد کیویں ہوئے؟‏ بائبل چ لکھیا اے کہ بوہت سارے لوکاں نے جیہڑ‌ے جادوٹونا کردے سن،‏ اپنیاں جادومنتر والیاں کتاباں ساریاں دے سامنے ساڑ دِتیاں۔‏ (‏اعمال 19:‏19‏)‏ ایہہ لوک مسیحی بننا چاہندے سن ایس لئی اوہناں نے ایہہ کتاباں ختم کر دِتیاں۔‏ اَج وی جیہڑ‌ے لوک یہوواہ خدا دی عبادت کرنا چاہندے نیں اوہناں نُوں ایہو جہیاں ساریاں شیواں نُوں ضائع کر دینا چاہی دا اے جنہاں دا تعلق بُرے فرشتیاں نال اے۔‏ ایہناں شیواں چ اوہ کتاباں،‏ رسالے،‏ گانے،‏ فلماں تے ویڈیو گیماں وغیرہ شامل نیں جنہاں چ دَسیا جاندا اے کہ بُرے فرشتیاں نال رابطہ کرن یاں جادوٹونا کرن چ کوئی بُرائی نئیں سگوں ایہدے چ بوہت مزہ آؤندا اے۔‏ ایہناں چ اوہ شیواں وی شامل نیں جیہڑ‌یاں لوک بدروحواں تے نظر لگن توں بچن لئی پاؤندے نیں۔‏—‏1-‏کُرنتھیوں 10:‏21‏۔‏

15.‏ شیطان تے بُرے فرشتیاں دا مقابلہ کرن لئی سانوں ہور کیہہ کرن دی لوڑ اے؟‏

¹⁵ جدوں اِفسس چ کجھ مسیحیاں نے جادومنتر والیاں کتاباں ساڑیاں تے اوہدے کجھ سالاں بعد پولس رسول نے لکھیا کہ اوہ مسیحی حالے وی بُرے فرشتیاں دے لشکراں نال جنگ کر رہے نیں۔‏ (‏اِفسیوں 6:‏12‏)‏ بھانویں کہ اوہ اپنیاں کتاباں ساڑ چُکے سن پر بُرے فرشتے فیر وی اوہناں نُوں نقصان پونچاؤن دی کوشش کر رہے سن۔‏ اوہناں مسیحیاں نُوں بُرے فرشتیاں توں بچن لئی ہور کیہہ کرن دی لوڑ سی؟‏ پولس رسول نے اوہناں نُوں کہیا کہ ایمان دی وڈی ڈھال چُک لوو جدے نال تُسی شیطان دے اَگ والے تیراں نُوں بجھا سکو گے۔‏ (‏اِفسیوں 6:‏16‏)‏ جیویں جنگ چ اِک ڈھال فوجی دی حفاظت کردی اے اونویں ای ایمان ساڈی حفاظت کردا اے۔‏ جے اَسی پورا بھروسا رکھاں گے کہ یہوواہ خدا ساڈی حفاظت کر سکدا اے تے فیر اَسی شیطان تے بُرے فرشتیاں دا مقابلہ کرن چ ضرور کامیاب ہونواں گے۔‏—‏متی 17:‏20‏۔‏

16.‏ اَسی یہوواہ خدا اُتے اپنا ایمان مضبوط کیویں کر سکنے آں؟‏

¹⁶ اَسی یہوواہ خدا اُتے اپنا ایمان مضبوط کیویں کر سکنے آں؟‏ ہر روز بائبل پڑھن تے ایس گل تے  یقین رکھن نال کہ یہوواہ خدا ساڈی حفاظت کر سکدا اے۔‏ جے اَسی یہوواہ خدا اُتے پورا بھروسا رکھاں گے تے شیطان تے بُرے فرشتے ساڈا کجھ نئیں وگاڑ سکن گے۔‏—‏1-‏یوحنا 5:‏5‏۔‏

17.‏ اَسی بُرے فرشتیاں توں بچن لئی ہور کیہہ کر سکنے آں؟‏

¹⁷ اِفسس دے مسیحیاں نُوں ہور کیہہ کرن دی لوڑ سی؟‏ ایس شہر چ ایہو جہے بوہت سارے کم ہوندے سن جنہاں دا تعلق بُرے فرشتیاں نال سی۔‏ ایس لئی پولس رسول نے مسیحیاں نُوں نصیحت کیتی کہ ہر موقعے تے دُعا کردے رہوو۔‏ (‏اِفسیوں 6:‏18‏)‏ اوہناں نُوں ہر ویلے یہوواہ خدا کولوں حفاظت لئی دُعا منگن دی لوڑ سی۔‏ اَج اَسی وی ایہو جہی دُنیا چ رہ رہے آں جدے چ بُرے فرشتیاں نال تعلق رکھن والے بوہت سارے کم ہوندے نیں۔‏ ایس لئی سانوں وی یہوواہ خدا کولوں حفاظت لئی دُعا منگن دی لوڑ اے۔‏ تے اَسی جدوں وی دُعا کرئیے،‏ دُعا چ اوہدا ناں ضرور استمال کرئیے۔‏ ‏(‏امثال 18:‏10 نُوں پڑھو۔‏)‏ جے اَسی ایہہ دُعا منگدے رہواں گے کہ خدا سانوں شیطان توں بچائے تے اوہ ساڈی دُعا ضرور سُنے گا۔‏—‏زبور 145:‏19؛‏ متی 6:‏13‏۔‏

18،‏ 19.‏ (‏الف)‏ اَسی شیطان تے بُرے فرشتیاں دے خلاف جنگ کیویں جت سکنے آں؟‏ (‏ب)‏ اگلے باب چ کیہڑے سوال دا جواب دِتا جائے گا؟‏

¹⁸ ہر اوس چیز نُوں اپنی زندگی چوں کڈھ دیو جدا تعلق بُرے فرشتیاں نال اے تے ایس گل تے پورا بھروسا رکھو کہ یہوواہ خدا تواڈی حفاظت کرے گا۔‏ بُرے فرشتیاں توں ڈرن دی کوئی لوڑ نئیں۔‏ ‏(‏یعقوب 4:‏7،‏ 8 نُوں پڑھو۔‏)‏ یہوواہ خدا بُرے فرشتیاں نالوں کِتے زیادہ طاقت‌ور اے۔‏ اوہنے نوح دے زمانے چ ایہناں نُوں سزا دِتی تے مستقبل چ اوہ ایہناں نُوں ہمیشاں لئی ختم کر دَوے گا۔‏ (‏یہوداہ 6‏)‏ یاد رکھو کہ بُرے فرشتیاں نال جنگ چ اَسی کلّے نئیں آں۔‏ یہوواہ خدا دے زورآور فرشتے ساڈی مدد تے حفاظت کر رہے نیں۔‏ (‏2-‏سلاطین 6:‏15-‏17‏)‏ سانوں پورا یقین اے کہ اَسی شیطان تے بُرے فرشتیاں دے خلاف جنگ ضرور جت لواں گے۔‏—‏1-‏پطرس 5:‏6،‏ 7؛‏ 2-‏پطرس 2:‏9‏۔‏

¹⁹ پر جے شیطان تے بُرے فرشتے انساناں لئی اینیاں مصیبتاں کھڑیاں کر رہے نیں تے خدا نے ایہناں نُوں حالے تک ختم کیوں نئیں کیتا؟‏ ایس سوال دا جواب اگلے باب چ دِتا جائے گا۔‏