1. Dahme kahrehda kitail en sukuhlki duwen tohnleng kan?

SIOHWA ketin kupwurki kitail en ese duwen sapwellime peneinei. Tohnleng kan wia kisehn sapwellimen Koht peneinei. Dahme tohnleng kan kin wia? Ia duwen ar sewesehda aramas akan mahso? Oh irail kak sewese kitail ahnsou wet?​—Menlau kilang Ire kan 8.

2. Ia wasa tohnleng kan kohsang ie? Tohnleng depe me kepikipikda?

² Kitail anahne ese ia wasa tohnleng kan kohsang ie. Kolose 1:16 padahkihong kitail me mwurin Siohwa eh ketin kapikada Sises, e “ketin kapikada soahng koaros me mi nanleng oh sampah.” Met iangahki tohnleng kan. Irail meh depe me kepikipikda? Paipel mahsanih me mie tohnleng rar pak epwiki kei.​—Melkahka 103:20; Kaudiahl 5:11.

3. Dahme Sohp 38:4-7 padahkihong kitail duwen tohnleng kan?

³ Paipel pil padahkihong kitail me Siohwa ketin kapikada tohnleng kan mwohn eh ketin kapikada sampah. Ia ahn tohnleng kan pepehm ni ar kilang sampah? Pwuhken Sohp padahkihong kitail me irail perenkihda. Irail wia peneinei keren ehu me kin ehupene papah Siohwa.​—Sohp 38:4-7.

4. Ia duwen atail ese me tohnleng kan kin nsenohki aramas akan?

⁴ Tohnleng kan kin ahnsou koaros nsenohki aramas  akan oh kupwuren Siohwa ong sampah oh tohnsampah. (Lepin Padahk 8:30, 31; 1 Piter 1:11, 12) Ele irail uhdahn nsensuwedkihla ni ahnsou me Adam oh Ihp uhwongada Siohwa. Ele arail nsensuwed pil laudla ahnsou pwukat ni arail kin kilang me pali moron en aramas kin sapeikiong Siohwa. Ahpw ni ahnsou me emen kin koluhla oh pwuralahng rehn Koht, tohnleng kan kin perenkihda. (Luk 15:10) Tohnleng kan kin uhdahn nsenohki irail kan me kin papah Koht. Siohwa kin ketin doadoahngki tohnleng kan en sewese oh pere sapwellime ladu kan nin sampah. (Ipru 1:7, 14) Kitail kilang ekei karasepe kan duwen met.

5. Ia duwen tohnleng kan ar sewesehda sapwellimen Koht ladu kan mahso?

⁵ Siohwa ketin kadarala tohnleng riemen en sewese Lohd oh eh peneinei pwe ren pitsang kasohrlahn kahnimw en Sodom oh Komora. (Senesis 19:15, 16) Sounpar epwiki kei mwuri, soukohp Daniel lekdekdiong nan pesen laion ehu, ahpw e sohte ohla, pwehki ‘Koht ketin poaronehdo sapwellime tohnleng me kakuhpene ewen laion ko.’ (Daniel 6:22) Mwuhr, ni ahnsou me wahnpoaron Piter mihmi nan imweteng, Siohwa ketin poaronehdo tohnleng men pwehn kasaledekihala. (Wiewia 12:6-11) Tohnleng kan pil sewesehda Sises ni ahnsou me e ketiket sampah. Karasepe, mwurin eh ketin papidaisla, “tohnleng kan ahpw kin pwarodo oh kin sewese.” (Mark 1:13) Mwohnte Sises eh pahn kamakamala, tohnleng men “karosonda” ih.—Luk 22:43.

6. (a) Ia duwen atail ese me tohnleng kan kin sewese sapwellimen Koht ladu kan rahnwet? (b) Peidek dah kan me kitail pahn sapengala met?

⁶ Rahnwet, tohnleng kan solahr kin pwarohng aramas akan. Ahpw Koht kin ketin doadoahngkihte tohnleng  kan en sewese sapwellime ladu kan. Paipel mahsanih: “Sapwellime tohnleng kin sinsile irail kan me kin wauneki KAUN-O, oh kin kapitirailsang soahng keper kan.” (Melkahka 34:7) Dahme kahrehda kitail anahne perepatail? Pwehki mie atail imwintihti kehlail kan me men kamedekeikitailla. Ihs irail? Ia wasa irail kohsang ie? Ia duwen ar kin song en kamedekeikitailla? Pwehn sapengala peidek pwukat, kitail pahn tehk dahme wiawi mwurinte Adam oh Ihp kepikipikda.

7. Dahme aramas akan wiadahr pwehki ahn Sehdan widing kan?

⁷ Kitail sukuhlkiher nan Irelaud 3 me mie tohnleng men me uhwongada Koht oh men kaunda meteikan. Paipel kin kahdaneki ih Sehdan me Tepil. (Kaudiahl 12:9) Sehdan pil men meteikan en uhwongada Koht. E pitiehdi Ihp oh sangete ahnsowo kohdo e pil pitiedier pali moron en aramas. Ahpw, ekei me duwehte Eipel, Enok, oh Noha, kolokolte ar lelepek ong Siohwa.​—Ipru 11:4, 5, 7.

8. (a) Ia duwen ekei tohnleng kan ar wiahla ngehn suwed kei? (b) Dahme ngehn suwed kan wia pwe ren pitsang Nohliko?

⁸ Ni mwehin Noha, ekei tohnleng kan uhwongada Koht oh kohkohlahsang dewerail nanleng pwehn mour nin duwen aramas nin sampah. Dahme kahrehda? Paipel padahkihong kitail me irail men pwoudikihda lih kan. (Wadek Senesis 6:2.) Ahpw e sapwung ong tohnleng kan en wia met. (Sud 6) Duwehte tohnleng suwed ko, pali moron en aramas nan ahnsowo pil kin mwersuwed oh lemei. Siohwa eri ketin pilada en doadoahngki nohliko pwehn kasohrehla aramas suwed kan nin sampah. Ahpw e ketin doarehla sapwellime ladu lelepek kan. (Senesis 7:17, 23) Pwe irail en pitila, tohnleng suwed ko pwurala nanleng. Paipel kin kahdaneki tohnleng suwed pwuko ngehn suwed kan. Irail pilada en iang Sehdan uhwongada Koht, oh Tepilo wiahla arail kaun.​—Madiu 9:34.

9. (a) Dahme wiawihong ngehn suwed kan ni ahnsou me re pwuradahlahng nanleng? (b) Dahme kitail pahn sukuhlki mwuhr?

⁹ Pwehki arail iang uhwongada ih, Siohwa sohte kupwurki kapwurehdo ngehn suwed ko nan sapwellime peneinei. (2 Piter 2:4) Ngehn suwed kan solahr kak wia aramasala, ahpw irail kin wie “pitipitih sampah pwon.”  (Kaudiahl 12:9; 1 Sohn 5:19) Kitail pahn sukuhlki ia duwen arail kak widinge, de pitih, aramas tohto.​—Wadek 2 Korint 2:11.

10. Ia duwen ngehn suwed kan ar kin pitih aramas akan?

¹⁰ Ngehn suwed kan kin pitih aramas ni ahl tohto. Ni aramas akan ar kin lokaiahiong ngehn suwed kan, re kin pein wia met de doadoahngki ekei aramas, duwehte sounwunahni de sounkosetipw. En lokaiahiong ngehn suwed kan kin adaneki katieni de wunahni. Ahpw Paipel kehkehlikihong kitail en soikeweisang kitail soahng koaros me kin pidada ngehn suwed kan. (Kalesia 5:19-21) Dahme kahrehda? Duwehte sounpwek mahn emen me kin doadoahngki soangsoangen lidip kan pwehn saikedi mahn akan, ngehn suwed kan kin doadoahngki widing kan pwehn lidipihedi oh kaunda aramas akan.​—Menlau kilang Ire kan 26.

11. Dahkot kosetipw? Dahme kahrehda kitail en soikeweisang kitail mewet?

¹¹ Ehu wiepen arail widing kan iei kosetipw. Met iei doadoahngki manaman en ngehn suwed kan pwehn song en diarada duwen dahme pahn wiawi ni ahnsou kohkohdo de mehkan me re sehse. Ele emen pahn song en wia met sang ni eh pahn kin kasawih usu kan, raparapahki soahng kei me re kin nda kihlenwo, doadoahngki tehn kahs (tarot), doadoahngki kilahs pwonopwon ong kosetipw (crystal ball), de wadek lain kan nan pehn aramas. Aramas tohto kin lemehiong me wiewia pwukat sohte keper, ahpw met sapwung. Mepwukat uhdahn keper. Karasepe, Paipel kasalehda me ngehn suwed kan oh sounkosetipw kan kin doadoahkpene. Nan Wiewia  16:16-18, kitail wadek duwen serepein men me “ngehn saut tiadahr powe” me kin sewese serepeino en “kasawih duwen audepen rahn akan.” Mwurin wahnpoaron Pohl kausasang ngehn sauto, serepeino sohla kak koasoiahda dahme pahn wiawi ni ahnsou kohkohdo.

12. (a) Dahme kahrehda e keper en song en koasoiong me melahr kan? (b) Dahme kahrehda sapwellimen Koht ladu kan sohte kin iang pidada tiahk en ngehn suwed kan?

¹² Ngehn suwed kan kin doadoahngki pil ehu widing en lidipihedi aramas. Irail kin song en kahrehiong kitail en kamehlele me kitail kak koasoiong me melahr kan oh dene me melahr akan uhdahn momour wasakis oh kak koasoiong kitail de kamedekeikitailla. Karasepe, emen me kompoakepah de kisehn eh peneinei mehla ele kin kohla rehn emen sounkapwour eni oh sounkapwour enio kin padahkihong ih me e kak koasoiong me melahr kan. Sounkapwour enio ele kak padahkihong aramaso mehkot me pid kompoakepaho de kisehn eh peneinei me melahro oh pil kin kak wiahda ngilen aramas me melahro. (1 Samuel 28:3-19) Tiahk en mehla tohto pil kin poahsoankihda padahk me dene me melahr kan wie momourte wasakis. Soangen tiahk pwukat kin iangahki kasarawi en me melahr kan, katamanpen me melahr kan, meirong kan ong irail me melahr, de tiahk en pehdinpwong kan. Ni Kristian kan ar kasalehda me re sohte pahn iang pidada tiahk pwukat, arail peneinei kan de tohn arail kousapw kan ele pahn kauwe irail, kepitkin irail, de sohla pahn iang irail wia mehkot. Ahpw Kristian kan ese me me melahr kan sohte wie momour ehu wasa tohrohr. Kitail sohte douluhl kak koasoiong irail, oh irail sohte kak kamedekeikitailla. (Melkahka 115:17) Uhdahn kanahieng. Dehr  song en koasoiong me melahr kan de ngehn suwed kan oh dehr iang pidada nan soangen tiahk pwukat.​—Wadek Deuderonomi 18:10, 11; Aiseia 8:19.

13. Dahme aramas tohto me mahso kin masak ngehn suwed kan kakehr wia met?

¹³ Ngehn suwed kan sohte kin ihte widinge aramas akan ahpw irail pil kin kamasak irail. Rahnwet, Sehdan oh nah ngehn suwed kan ese me arail “ahnsou mwotomwotalahr” mwohn Koht eh pahn ketikihsang irail pohn sampah, eri irail kin uhdahn lemei. (Kaudiahl 12:12, 17) Ahpw, aramas kid kei me mahs kin masak ngehn suwed kan solahr kin masak irail met. Ia duwen ar sohla masak ngehn suwed kan?

14. Duwehte ni mwehin tepin Kristian akan, ia duwen atail kak saledek sang ngehn suwed kan?

¹⁴ Paipel padahkihong kitail ia duwen atail pahn kin pelianda ngehn suwed kan oh ia duwen atail pahn saledeksang irail. Karasepe, ekei nan kahnimw kan nan Episos kin koasoiong ngehn suwed kan mwohn arail sukuhlki padahk mehlel. Ia duwen ar saledeksang irail? Paipel mahsanih: “Me tohto sang irail kan me kin wunahni re kihpene neirail pwuhk kan oh isikala mwohn masarail koaros.” (Wiewia 19:19) Pwehki re men wia Kristian kei, irail kauwehla neirail pwuhken wunahni ko koaros. Soangen wiewia wet pil anahn rahnwet. Koaros me men papah Siohwa anahne kesehla soahng kan me kin pidada ngehn suwed kan. Met kin iangahki pwuhk kan, makasihn kan, doaropwe kan me kasalehda kasawih usu kan, kasdo kan, keseng, mwadong kan, oh pil iangahki kilel kan me kin kasalehda akmanaman,  ngehn suwed kan, de soangen wunahni kan me dene mepwukat kaperen oh sohte keper. E pil kin pidada soahng kan me aramas kin kapwatki pwehn perehsang irail soahng suwed kan.​—1 Korint 10:21.

15. Dahme kitail pil anahne wia pwehn pelianda Sehdan oh ngehn suwed kan?

¹⁵ Sounpar kei mwurin irail oko nan Episos kauwehla neirail pwuhken wunahni kan, wahnpoaron Pohl ntingkiwohng irail me irail anahnehte “mahweniong” oh peiong “manaman en ngehn suwed kan.” (Episos 6:12) Ei, mendahki arail isikalahr neirail pwuhk ko, ngehn suwed kan kin nannantihte song en kamedekeirail. Eri, dahme irail pil anahne wia? Pohl padahkihong irail: “Kumwail pahn wa pwoson pwe en wia amwail mehn sansar, pwe kumwail en kak kakunkihla [de, kauhdi] ketieu kisiniei kan sang rehn Me Suwedo.” (Episos 6:16) Duwehte mehn sansar ehu eh kak pere sounpei men nan mahwen, atail pwoson kak pere kitail. Ma kitail uhdahn likih me Siohwa pahn ketin pere kitail, kitail pahn kak pelianda Sehdan oh ngehn suwed kan.​—Madiu 17:20.

16. Ia duwen atail kak kakehlailihala atail pwoson Siohwa?

¹⁶ Ia duwen atail kak kakehlailihala atail pwoson Siohwa? Kitail anahne wadek Paipel rahn koaros oh sukuhlki en kin likih me e pahn ketin pere kitail. Ma kitail likih douluhl Siohwa, Sehdan oh ngehn suwed kan sohte pahn kak kamedekeikitailla.​—1 Sohn 5:5.

17. Dahme pahn pil pere kitail sang ngehn suwed kan?

¹⁷ Soahng dah kan me Kristian kan nan Episos pil anahne wia? Irail kin kousoan nan kahnimw ehu me diren tiahk en ngehn suwed kan. Eri Pohl padahkihong irail: “Kapakap ahnsou koaros.” (Episos 6:18) Irail anahne  peki rehn Siohwa mehn pereparail ahnsou koaros. A ia duwen kitail? Kitail pil kin momour nan sampah ehu me diren tiahk en ngehn suwed kan. Eri kitail pil anahne peki rehn Siohwa mehn perepatail, oh kitail anahne doadoahngki mware ni ahnsou me kitail kapakap. (Wadek Lepin Padahk 18:10. *) Ma kitail kaukaule pekipeki Siohwa en ketin doareikitailsang Sehdan, Siohwa pahn ketin sapeng atail kapakap kan.​—Melkahka 145:19; Madiu 6:13.

18, 19. (a) Ia duwen atail kak kana nan atail pei ong Sehdan oh ngehn suwed kan? (b) Mehnia peidek me pahn pasapengla nan irelaud en mwurin met?

¹⁸ Ma kitail kesehla soahng koaros nan atail mour me kin pidada tiahk en ngehn suwed kan oh likih me Siohwa pahn ketin pere kitail, kitail pahn kak pelianda Sehdan oh ngehn suwed kan. Kitail sohte anahne masak irail. (Wadek Seims 4:7, 8.) Siohwa uhdahn manaman sang ngehn suwed kan. E ketin kaloke irail ni mwehin Noha mahso, oh pil ni ahnsou kohkohdo e pahn ketin kasohrirailla. (Sud 6) Tamataman, kitail sohte kelekelehpw nan pei wet. Siohwa kin ketin doadoahngki sapwellime tohnleng kan en pere kitail. (2 Nanmwarki 6:15-17) Kitail kak likih me sang sapwellimen Siohwa sawas, kitail kak kana nan atail pei ong Sehdan oh ngehn suwed kan.​—1 Piter 5:6, 7; 2 Piter 2:9.

¹⁹ Ahpw ma Sehdan oh ngehn suwed kan kin kahrehda lokolok laud, dahme kahrehda Koht saikinte ketin kasohrirailla? Peidek wet pahn pasapengla nan irelaud en mwurin met.