1. ¿Imaraykun angelkunamanta yachananchis?

DIOSQA munanmi familianta reqsinanchista. Angelkunaqa familianmi kanku, chaymi Bibliapi nin: “Diospa wawankuna”, nispa (Génesis 6:2). ¿Imatan angelkuna ruwanku? ¿Imaynatan ñaupaq tiempopi runakunata yanaparanku? ¿Yanapawasunmanchu kay tiempopipas? (Qhaway 8 willakuyta.)

2. a) ¿Pin angelkunata kamaran? b) ¿Jayk’a angelkunan kan?

² Colosenses 1:16 textopin willashan Jehová Dios Jesusta ñaupaqta kamasqanta. Chay qhepamanmi Diosqa janaq pachapi angelkunata, kay pachapi tukuy ima kaqkunatapas kamaran. ¿Jayk’a angelkunatan Dios kamaran? Biblian willan pachaj-pachaj millonninpi angelkuna kasqanta (Salmos 103:20; Apocalipsis 5:11).

3. ¿Ima ninmi Job 38:4-7 texto angelkunamanta?

³ Bibliapin willan Diosqa manaraq kay allpata kamashaspa angelkunata kamasqanta. ¿Imaynan sientekuranku allpata Dios kamaqtin? Job libropin willan angelkuna kusikusqankuta. Chay tiempopiqa llapallankun juj familia jina Diosta serviranku (Job 38:4-7).

4. ¿Imaynapin yachanchis angelkuna runakunapi interesakusqankuta?

⁴ Angelkunaqa interesakunkun runakunapi Diospa munayninpipas (Proverbios 8:30, 31; 1 Pedro 1:11, 12). Adanwan Evawan Diosta mana kasukusqankumantaqa  llakikurankuchá. Kunanqa astawanraqchá llakikunku yaqa llapa runakuna Diosta mana kasukusqankumanta. Ichaqa kusikunkun juj runallapas Diosman kutirikuqtinqa (Lucas 15:10). Angelkunaqa interesakunkun Dios serviqkunapi, chaymi Diosqa utilizan serviqninkunata yanapananpaq pakaykunanpaqwan (Hebreos 1:7, 14). Wakinmanta yachasun.

5. ¿Imaynatan angelkuna yanaparanku ñaupa tiempopi Dios serviq runakunata?

 ⁵ Sodoma Gomorra llaqtakunata thuninan kashaqtinmi Jehová Diosqa iskay angelkunata kacharan Lot-ta familiantawan chay llaqtamanta orqomunankupaq (Génesis 19:15, 16). Pachaj-pachaj watakuna qhepamantaq profeta Danielta leonkunaq t’oqonman wijch’uykuranku. Diosmi ichaqa angelninta kachamuspa leonkunaq siminta wisq’aran (Daniel 6:22). Apóstol Pedrotapas juj angelmi carcelmanta orqoran (Hechos 12:6-11). Jesustapas angelkunaqa yanaparankun bautizakusqan qhepaman (Marcos 1:13). Wañupunanpaq pisillaña faltashaqtinpas juj angelmi “kallpacharan” (Lucas 22:43).

6. a) ¿Imaynapin yachanchis angelkuna kay tiempopi Dios serviqkunata yanapasqankuta? b) ¿Ima tapuykunatan kutichisun?

⁶ Angelkunaqa manañan runakunaman rijurinkuchu. Chaywanpas Diosqa serviqninkunata yanapananpaqmi utilizan. Biblian nin: ‘Diospa angelninqa, Dios manchakuqkunatan muyuykunpas salvanpas’, nispa (Salmos 34:7). Noqanchisqa necesitanchismi atiyniyoq enemigokunamanta pakaykusqa kayta. ¿Pikunan kanku? ¿Maymantan jamuranku? ¿Imaynatan dañota ruwawasunman? Chay tapuykunata kutichinapaq ñaupaqta yachasun Adán Evaq tiemponpi imachus pasasqanmanta.

7. ¿Imatan Satanás yaqa llapa runakunawan ruwaran?

⁷ Kinsa capitulopi yachasqanchis jina juj angelmi runakunata kamachiyta munaspa Dios contra jatariran. Chay angeltan Biblia sutichan “Saqra”, “Satanás”  nispa (Apocalipsis 12:9). Payqa munaranmi jujkunapas Dios contra jatarinankuta. Yaqa llapa runakunatan Evata jina engañaran. Wakin runakunan ichaqa Abel, Enoc, Noé jina Diosta kasukuranku (Hebreos 11:4, 5, 7).

8. a) ¿Imaynapin wakin angelkuna supaykunaman tukupuranku? b) ¿Imatan supaykuna ruwaranku mana wañunankupaq?

⁸ Noepa tiemponpin Diospa contranpi jatarispa wakin angelkuna kay allpaman uraykamuranku runaman tukuspa warmikunawan casarakunankupaq (leey Génesis 6:2). Chay ruwasqankuqa millaymi karan (Judas 6). Jinan yaqa llapa runakuna millayman tukupuranku, chaymi Diosqa jatun parawan chay runakunata wañuchiran. Kasukuq runakunatan ichaqa salvaran (Génesis 7:17, 23). Chay angelkunaqa mana wañunankuraykun janaq pachaman kutipuranku. Paykunatan Biblia “supaykuna otaq demoniokuna” nispa sutichan. Satanasmanmi juñukapuranku, chaymi Satanás kamachiqninku kapuran (Mateo 9:34).

9. a) ¿Iman pasaran supaykunawan janaq pachaman kutipuqtinku? b) ¿Imatan qatimuqpi yachasun?

⁹ Chay supaykuna janaq pachaman kutipuqtinkuqa, Diosqa manañan familianpi chaskiranñachu (2 Pedro 2:4). Manaña runaman tukuyta atinkuchu chaypas kay allpapi ‘runakunatan pantachishanku’ (Apocalipsis 12:9; 1 Juan 5:19). Kunan yachasun imaynatas runakunata engañanku chayta (leey 2 Corintios 2:11).

10. ¿Imaynatan supaykuna runakunata engañanku?

¹⁰ Supaykunaqa imaymana formamantan runakunata  engañanku. Askha runakunan kikinkumanta otaq layqakunaq yanapayninwan supaykunawan rimanku, chaytan “espiritismo” nispa nikun. Diosmi kamachiwanchis chaykunamanta karunchakunanchista (Gálatas 5:19-21). Imaynan animalta cazaq runaqa imaymana trampata utilizan animalta jap’inanpaq, chhaynatan supaykunapas imaymana trampawan runakunata engañanku (qhaway 26 willakuyta).

11. a) ¿Imatan runakuna ruwanku? b) ¿Imaraykun chaykunata mana ruwananchischu?

¹¹ Wakin runakunaqa adivinokunaman, coca qhawaqkunaman, layqakunaman iman rinku suerteta qhawachikunankupaq, jamuq tiempomanta yachanankupaq otaq jampichikunankupaq. Chaykunawanmi Satanasqa runakunata engañan. Askha runakunan piensanku chaykunata ruwayqa allin kasqanta, Biblian ichaqa willan chay runakunaqa supaykunaq atiyninwan ruwasqankuta. Ejemplopaq, Hechos 16:16-18 textopin willashan supaypa yanapayninwan suerteta qhawaq sipasmanta. Apóstol Pablon chay sipasmanta demoniota qarqoran, jinan chay sipasqa manaña suerteta qhawayta atiranchu.

12. a) ¿Imaraykun peligroso kanman wañuqkunawan rimayta munay? b) ¿Imaraykun manapuni ruwananchischu supaykunaq paqarichisqan costumbrekunata?

¹² Supaykunaqa creechiytan munawanchis wañuqkunawan rimayta atisqanchista. Chaymi askha runakuna familianku otaq amigonku wañupuqtin layqakunaman rinku wañuqkunawan rimanankupaq. Yaqapaschá chay layqaqa creechinman wañuqwan rimashasqanta ichaqa supaywanmi rimashan (1 Samuel 28:3-19). Jinaspapas wañuq runapaqmi imaymana  costumbrekunata ruwanku. Ejemplopaq, wañuqpa almanta velanku, p’achanta t’aqsanku, ocho diasninta ruwanku, Todo los Santos p’unchaypitaq mijunata churapunku juj ruwaykunatawan ruwanku. Chaykunata ruwayta mana munaqtinchisqa yaqapaschá familianchiskuna, vecinonchiskunapas phiñakunqaku manañataq rimaykuwasunchu, ichaqa yachasqanchis jina wañuqkunaqa manañan maypipas kausankuñachu nitaq yanapawasunmanchu (Salmos 115:17). Noqanchisqa manapunin chay costumbrekunataqa ruwananchischu nitaq layqakunamanpas rinanchischu (leey Deuteronomio 18:10, 11; Isaías 8:19).

13. ¿Pikunatan millonninpi runakuna manaña manchakunkuchu?

¹³ Chaymantapas supaykunaqa runakunatan manchachinku. Diosqa pisi tiempollatañan permitinqa Satanaspas supayninkunapas millaykuna ruwanankuta, chayta yachaspan paykunaqa aswan millaykunataraq ruwashanku (Apocalipsis 12:12, 17). Millonninpi runakunan ichaqa manaña supaykunata manchakunkuchu. ¿Iman yanaparan manaña manchakunankupaq?

14. Ñaupa tiempopi cristianokuna jina, ¿imaynatan supaykunamanta librakusunman?

¹⁴ Biblian niwanchis supaykunamanta imayna librakunanchista. Ejemplopaq, Éfeso llaqtapin wakin runakuna manaraq cristiano kashaspanku supaykunawan parlaqku. ¿Imaynatan librakuranku? Biblian willan: “Supaykunaq yanapayninwan imaymanata ruwaqkunapas askhan libronkuta juñuspa llapa runakunaq ñaupanpi kanaykapuranku”, nispa (Hechos  19:19). Paykunaqa cristiano kaytan munaranku chaymi layqananku libronkuta kanapuranku. Kunanpas Diosta serviyta munaqqa manan jap’inanchu supaykunawan tupaq cosaskunata. Chaykunan kanman: librokuna, revistakuna, horóscopo, peliculakuna, takikuna, cartakuna, amuletokuna ima. Amuletokunatan askha runakuna jap’inku mana allinmanta pakaykusqa kanankupaq. Allinpaqña chaykuna qhawarikunman chaypas manapunin jap’inanchischu (1 Corintios 10:21).

15. ¿Imatawanmi ruwananchis Satanasmanta supaykunamantapas librakunapaq?

¹⁵ Éfeso llaqtamanta cristianokunaqa maqanakusharankuraqmi “mana allin espiritukunawan”, chaytan apóstol Pablo willaran (Efesios 6:12). Kanarankuña layqananku libronkuta chaypas, chay supaykunaqa manan paykunata kachariyta munarankuchu. Chhaynaqa, ¿imatawanmi ruwaranku? Apóstol Pablon niran: “Iñiyniykichista jatun escudota jina jap’iychis”, nispa (Efesios 6:16). Imaynan escudoqa maqanakuq soldadota pakaykun, chhaynatan iñiyninchispas supaykunamanta pakaykuwasunman. Sichus tukuy sonqonchiswan confianchis Jehová Dios pakaykuwananchispi chayqa, atipasunmi Satanasta supaykunatapas (Mateo 17:20).

16. ¿Imatan ruwananchis allin iñiyniyoq kanapaq?

¹⁶ ¿Imatan ruwasunman allin iñiyniyoq kanapaq? Bibliatan sapa p’unchay leenanchis yachananchistaqmi Jehová Diospi confiayta. Allin iñiyniyoq kasun chayqa manan Satanaspas supayninkunapas atipawasunchu (1 Juan 5:5).

17. ¿Imatawanmi ruwananchis supaykunamanta pakaykusqa kananchispaq?

 ¹⁷ Éfeso llaqtaqa supaykunaq ruwayninwanmi junt’a kasharan, chaymi Pabloqa cristianokunata niran Diosmanta mañakushanallankupaq (Efesios 6:18). Tukuy tiempon Diosmanta mañakunanku karan pakaykusqa kanankupaq. Kunanpas kay pachaqa supaykunaq ruwayninwanmi junt’a kashan, chaymi Diosmanta mañakushanallanchis pakaykuwananchispaq, sutinmantataq wajakunanchis (leey Proverbios 18:10, NM). Sichus Diosmanta mañakushallasun chayqa, Diosqa librawasunmi Satanasmanta (Salmos 145:19; Mateo 6:13).

18, 19. a) ¿Imaynatan atipasunman Satanasta supaykunatapas? b) ¿Imatan qatimuq capitulopi yachasun?

¹⁸ Sichus supaykunaq ruwayninkunamanta karunchakusun, Diospitaq confiasun chayqa pakaykusqan kasun. Supaykunataqa manan manchakunanchischu (leey Santiago 4:7, 8). Jehová Diosmi supaykunamantaqa aswan atiyniyoq. Noepa tiemponpin paykunata castigaran, jamuq tiempopitaq wañuchipunqa (Judas 6). Manan sapanchischu kashanchis supaykunawan maqanakuypiqa Diosmi angelninkunawan pakaykuwanchis (2 Reyes 6:15-17). Diospa yanapayninwanqa atipasunmi Satanasta supaykunatapas (1 Pedro 5:6, 7; 2 Pedro 2:9).

¹⁹ Yachasqanchis jina Satanaspas supaykunapas mana allinkunatan ruwashanku, chhaynaqa tapukunchispaschá: “¿Imaraykun Dios kunankama mana wañuchinchu?”, nispa. Chaytan qatimuq capitulopi yachasun.