1. Соске требе те сикльовас по–бут е ангеленге?

О ЙЕХОВА мангел те жанас по–бут лескере семействоске. О ангеля си част таре Девлескоро семейство. Анди Библия ленге пхенел пес „е Девлескере чшаве“. (Йов 38:7) Со керен о ангеля? Сар помагиненас е манушенге андо пуране диеса? Ащи ли те помагинен аменге авдиес? (Дикх и 8 бележка ко крайос далкхе лилесте.)

2. Катар авен о ангеля? Кизом ангеля уле керде?

² Требе те жанас катар авен о ангеля. Андо Колосяни 1:16 пхенел пес, кай о Йехова кергяс е Исусес тай палал далкхесте „уле керде саворе букя ко небес тай ки пхув“. Машкар далкхе букиенде си о ангеля–да. Кизом ангеля уле керде? И Библия пхенел, кай иси бут милионя ангеля. (Псалм 103:20; Откровение 5:11)

3. Со ахальовас е ангеленге таро Йов 38:4–7?

³ И Библия също сикавел, кай о Йехова кергяс е ангелен англал те керел и пхув. Сар чувствисайле он, кана дикхле и пхув? Андо лил Йов четинас, кай бут лошанде. Он служиненас е Йеховаске заедно сар йекх обединено семейство. (Йов 38:4–7)

4. Катар жанас, кай о ангеля помагинен е манушенге?

⁴ О ангеля манген те помагинен е манушенге тай те дикхен сар ка изпълнингьол е Девлескери воля ки пхув. (Притчи 8:30, 31; 1 Петър 1:11, 12) Сигурно ачшило ленге бут мъчно, кана о Адам тай и Ева ухтиниле  мамуй о Дел. Тай сигурно си ленге панда по–мъчно авдиес, като дикхен, кай по–бут таро мануша на шунен е Йеховас. Ама кана йекх мануш разкаинел пес тай иринел пес паш о Дел, о ангеля бут лошанен. (Лука 15:10) О ангеля бут интересувинен пес далкхендар, колато служинен е Девлеске. О Йехова използвинел е ангелен, за те помагинел пе служителенге ки пхув тай те пазинел лен. (Евреи 1:7, 14) Нека те дикхас десаве примеря, колато сикавен сар керел давкха.

5. Сар о ангеля помагинде е Девлескере служителенге андо пуране диеса?

 ⁵ О Йехова бичшалгяс до ангелен те помагинен е Лотеске тай лескере семействоске те нашен таро диза Содом тай Гомор, колато ка овенас унищожиме. (Битие 19:15, 16) Бут бреша палал далкхесте о пророки Даниил уло чшивдо йекхе баре хевяте лъвовиенца, ама о лъвовя на керде леске нищо, соскето о „Дел бичшалгяс пе ангелес тай ов пханляс е лъвовиенгоро муй“. (Даниил 6:22) Кана о апостол Петър уло андо пханлибе, о Йехова бичшалгяс йекхе ангелес те освободинел лес. (Деяния 12:6–11) О ангеля помагинде е Исусеске–да, кана уло ки пхув. Например палал е Исусескоро покръстване, „о ангеля грижиненас пес лескере нужденге“. (Марко 1:13) Точно англал те овел мудардо о Исусес, йекх ангели „зораляргяс лес“. (Лука 22:43)

6. а) Катар жанас, кай о ангеля помагинен е Девлескере народоске авдиес? б) Саве въпрося ка раздикхас акана?

⁶ Авдиес о ангеля на появинен пес англал о мануша. Ама о Дел панда използвинел е ангелен те помагинел пе служителенге. И Библия пхенел: „Е Йеховаскоро ангели пазинел далкхен, колато даран таро Дел, тай спасинел лен.“ (Псалм 34:7) Соске требел аменге защита? Соскето иси амен зорале душманя, колато манген те керен аменге кханилипе. Кола си он? Катар авен? Сар дикхен те дукхавен амен? За те ахальовас о отговоря далкхе въпросиенге, нека те дикхас со ачшило хари палал о време, кана о Дел кергяс е Адамиес тай е Ева.

7. Со керде о мануша, ашал далкхеске кай о Бенг хохавгяс лен?

⁷ Андо 3 шеро сиклилям, кай йекх ангели ухтинило мамуй о Дел тай мангляс те управлинел упрал околенде. Анди Библия леске пхенел пес Сатана  о Бенг. (Откровение 12:9) О Бенг мангелас о мануша–да те ухкьен мамуй о Дел. Ов хохавгяс е Ева тай жи авдиес успеингяс те хохавел по–бутен таро мануша. Ама десаве мануша, сарто о Авел, о Енох тай о Ной, ачшиле верна е Йеховаске. (Евреи 11:4, 5, 7)

8. а) Сар десаве ангеля ачшиле демоня? б) Со керде о демоня, за те преживинен о Потопи?

⁸ Анде Нойескере диеса десаве ангеля ухтиниле мамуй о Дел тай ухлистиле таро небес те живинен сар мануша ки пхув. Соске? И Библия пхенел аменге, кай он мангле те лен песке ромниен. (Четине Битие 6:2.) Ама давкха со керде о ангеля уло кханило. (Юда 6) По–бут таро мануша околе диесенде ачшиле марисчидес тай кханиле сар далкхе кханиле ангеленде. Адалкхеске о Йехова решингяс те керел потопи ки цело пхув, за те унищожинел е кханиле манушен. Ама ов спасингяс пере верноне служителен. (Битие 7:17, 23) За те ачшовен живде, о кханиле ангеля ирисайле ко небес. Анди Библия далкхе кханиле ангеленге пхенел пес демоня. Он лиле е Бенгескери риг тай ов ачшило ленгоро владетели. (Матей 9:34)

9. а) Со ачшило е демониенца, кана ирисайле ко небес? б) Со ка сикльовас акана?

⁹ Ашал далкхеске кай о демоня ухтиниле мамуй лесте, о Йехова на позволингяс ленге те иринен пес лескере семействосте. (2 Петър 2:4) Вече о демоня нащи те ачшон мануша, ама панда хохавен „о цело светос“. (Откровение 12:9; 1 Йоан 5:19) Нека те сикльовас сар успеинен те хохавен зомкха буте манушен. (Четине 2 Коринтяни 2:11.)

10. Сар о демоня хохавен е манушен?

¹⁰ Иси бут букя, коленца о демоня хохавен е манушен. Десаве мануша общувинен е демониенца  директно или жан магяриенде или манушенде, колато хоратинен духовиенца. Далкхеске пхенел пес демонизъм или спиритизъм. Ама и Библия пхенел аменге те нашас саворе букиендар, колато авен таро демоня. (Галатяни 5:19–21) Соске? Сарто йекх ловеци използвинел примка, за те долел животнонен, чука о демоня–да използвинен бенгипе, за те овел лен контроли упрал о мануша. (Дикх и 26 бележка ко крайос далкхе лилесте.)

11. Со си о гадателство тай соске требе те нашас лестар?

¹¹ Йекх начини, колеса хохавен е манушен, си о гадателство. Давкха си мануш те използвинел е демониенгери сила, за те ахальовел со ка ачшол андо бъдеще или букя, колато мангел те жанел. Десаве мануша дикхен ко черхеня, роден тайнствена знакя, дикхен картенде, ко кристално кълбо или вастесте. Бут мануша мислинен, кай далкха букя нанай опасна, ама он си бут опасна. Например и Библия сикавел, кай о демоня тай о гадателя керен бути заедно. Андо Деяния 16:16–18 четинас, кай йекх „демони гадатели“ помагинелас йекхе чшаяке те „предскажинел о бъдеще“.

12. а) Соске си опасно те общувинас е муленца? б) Соске е Девлескере служителя нисар на участвинен андо демонична традициес?

¹² Иси панда варесо, колеса о демоня хохавен е манушен. О демоня манген те верувинас, кай ащи те хоратинас е муленца тай кай о муле бешен декхате авретхе тай ащи те хоратинен аменца, те помагинен аменге или те керен аменге кханилипе. Например декхой, колескоро амал или ендано муло, ащи те жал йекхе магяриесте, ковато пхенел, кай ащи те хоратинел е муленца. О магяри ащи те пхенел леске десаве букя е муле манушеске, даже ащи те дикхьол, кай ов хоратинел е мулескере гласоса. (1 Царе 28:3–19) Кана декхой мерел, о мануша керен бут букя,  соскето верувинен, кай о муле продължинен те живинен декхате. Далкха букя ащи те овен традициес, колато о мануша керен, кана паронен декхас, сарто те разден хабе те аракхльол е мулеске тай те ачшовен жангале е мулеса презал и рат англал те паронен лес или и традиция те керен диеса лескере меримнастар. Саворе далкха букя авен таро демоня. Кана о християня на керен лен, ленгере енданя тай комшидес ащи те аракхен ленге махана, те дукхавен лен пе хоратенца или те на манген те общувинен ленца. Ама о християня жанен, кай о муле на живинен декхате авретхе. Нанай възможно те общувинас ленца тай нащи те керен аменге нито кханилипе, нито лачшипе. (Псалм 115:17) Ов бут внимателно. Нисар ма опитине те общувинес е муленца или е демониенца тай нисар ма участвине андо демонична традициес. (Четине Второзаконие 18:10, 11; Исаия 8:19)

13. Со успеинде те керен бут мануша, колато даранас таро демоня?

¹³ О демоня ма само хохавен е манушен, ама даравен–да лен. Авдиес о Бенг тай лескере демоня жанен, кай ачшол лен панда „хари време“ англал о Дел те унищожинел лен, адалкхеске он си бут жестока тай кханиле сар нисар жи акана. (Откровение 12:12, 17) Ама бут мануша, колато даранас таро демоня, акана на даран лендар. Сар он отчшивде пери дар таро демоня?

14. Сар те освободинас амен таро демоня сар о християня ко пуране диеса?

¹⁴ И Библия сикавел амен сар те заачшовас мамуй о демоня тай сар те освободинас амен лендар. Например десаве мануша тари диз Ефес общувиненас е демониенца англал те сикльон и истина.  Сар освободисайле лендар? И Библия пхенел: „Бут далкхендар, колато керенас магиес, анде пере лила йекхе тханесте тай тхарде лен англал саворенде.“ (Деяния 19:19) Ашал далкхеске кай мангле те ачшон християня, он унищожинде саворе пере магярска лила. Авдиес–да требе те керас о също. Секой, ковато мангел те служинел е Йеховаске, требе те отчшиел саворе букя, колато авен таро демоня. Далкха букя ащи те овен лила, списания, хороскопя, филмя, музика, игрес тай плакакя, колато керен те дикхьол, кай о демоня, и магия тай о свръхестествена букя нанай опасна, а си варесо шукар. Иси салка–да букя, сар мирикле, колато о мануша пхиравен, за те пазинен лен кханилипнастар тай те анен ленге бах. (1 Коринтяни 10:21)

15. Со авер требе те керас, за те заачшовас мамуй о Бенг тай о демоня?

¹⁵ О мануша таро Ефес унищожинде пе магярска лила, ама десаве бреша палал далкхесте о апостол Павел пишингяс, кай он панда требелас те водинен „борба ... мамуй о кханиле духовна силес“. (Ефесяни 6:12) Ва, въпреки кай он тхарде пере лила, о демоня панда мангенас те керен ленге кханилипе. Со авер требелас те керен? О Павлес пхенгяс ленге те „лен о баро щити е вяракоро“, колеса ка ащи те спиринен е „Кханилескере стрелес“. (Ефесяни 6:16) Сарто йекх щити защитинел е войникиес, амари вяра ащи те пазинел амен. Ако синям сигурна, кай о Йехова ащи те защитинел амен, ка ащи те заачшовас мамуй о Бенг тай о демоня. (Матей 17:20)

16. Сар ащи те барярас амари вяра андо Йехова?

¹⁶ Сар ащи те барярас амари вяра андо Йехова? Требе те четинас и Библия секо диес тай те сикльовас те мукас амен лескере вастенде, за те защитинел амен. Ако амаро доверие ко Йехова си баро, о Бенг тай  о демоня нанай те ащи те керен аменге кханилипе. (1 Йоан 5:5)

17. Со авер требе те керас, за те пазинас амен таро демоня?

¹⁷ Саве авер букя требелас те керен о християня таро Ефес? Он бешенас йекхе дизате, която сине пхерди бенгикане букиенца. Ашал далкхеске о Павлес пхенгяс ленге те използвинен секо йекх възможност, за те молинен пес. (Ефесяни 6:18) Он требелас те молинен е Йеховас винаги те пазинел лен. А аме со требе те керас? Аме–да живинас йекхе светосте, ковато си пхердо бенгикане букиенца. Адалкхеске аме–да требе те молинас е Йеховас те пазинел амен тай кана молинас амен требе те използвинас лескоро алав. (Четине Притчи 18:10.) Ако продължинас те молинас амен е Йеховаске те пазинел амен таро Бенг, о Йехова ка отговоринел амаре молитвенде. (Псалм 145:19; Матей 6:13)

18, 19. а) Сар ащи те побединас ки война мамуй о Бенг тай о демоня? б) Саве въпросиесте ка отговоринас ко следващо шеро?

¹⁸ Ако чшияс саворе букя, колато авен таро демоня, тай мукас амен е Йеховаске андо васта те защитинел амен, ащи те заачшовас мамуй о Бенг тай о демоня. На требе те дарас лендар. (Четине Яков 4:7, 8.) О Йехова си бут по–зорало таро демоня. Ов накажингяс лен анде Нойескере диеса тай андо бъдеще ка унищожинел лен. (Юда 6) Ма бистер, кай на боринас амен коркоре. О Йехова използвинел пере ангелен те защитинел амен. (4 Царе 6:15–17) Ащи те овас сигурна, кай о Йехова ка помагинел аменге те побединас ки война е Бенгеса тай е демониенца. (1 Петър 5:6, 7; 2 Петър 2:9)

¹⁹ Ама щом о Бенг тай о демоня керен зомкха бут кханилипе, соске о Дел панда на унищожингяс лен? Ка отговоринас далкхе въпросиесте ко следващо шеро.