1. Sostar vorbinas ande kado kotor pal le andyalura?

O JEHOVA kodo kamel, te pinzharas leski familija. Vi le andyalura ande leski familija si. E Biblia kade phenel pe lende, ke le Devleske shave (Job 38:7). So keren le andyalura? Sar zhutinde le manushenge dulmut? Vi amenge zhanen te zhutinen? (Dikh: Informaciovo 8, Andyala.)

2. Kathar si le andyalura? Sodezhene si?

² Anglunes trubul te zhanas, ke kathar si le andyalura. O Kolosse 1:16 iskiril, ke o Jehova anglunes kerdas le Jezushes, thaj pala kodo „kerdyilas sakofelo ando cheri thaj pe phuv”, thaj vi le andyalura. Sodezhene si? E Biblia phenel, ke butshela milliovura si anda lende (Asharimata 103:20; Sikadyimaski 5:11).

3. So shaj zhanas ando Job 38:4–7 pal le andyalura?

³ Andar e Biblia vi kodo shaj zhanas, ke o Jehova angla phuv aba kerdas le andyalon. Le Jobeski ginadyi iskiril, kana le andyalura dikhle e phuv, zurales losshanas. Savorazhene le Jehovas sluginas, thaj ande zurali familija phanglas len kethane (Job 38:4–7).

4. Sostar shaj phenas, ke le andyalura kamen te zhanen, so si le manushenca?

⁴ Le andyalura mindig kamenas te zhanen, ke so si le manushenca, thaj so kamel o Del le manushenca, thaj la phuvasa (Godyaver Vorbi 8:30, 31; 1Peter 1:11, 12). Zurales brigake sas, ke o Adam thaj e Eva chi mukhlepe le  Devleske. Anda kodo pale inke majbrigakej, ke le majbut manusha adyes chi patyan muj le Devleske. De kana varikon bunul peske bezexa, thaj palpale zhal kaj o Del, le andyalura zurales losshan (Lukach 15:10). Bares kamen te zhanen, ke so perelpe le Devleske slugenca. O Jehova le andyalonca zhutil, thaj lel sama pe peske manusha pe phuv (Heberenge 1:7, 14). Dikhas pe kadala peldi!

5. Sar zhutinde le andyalura le Devleske slugenge dulmut?

 ⁵ O Jehova duje andyalon bishaldas kaj o Lot, thaj kaj leski familija, te zhutin lenge te shaj muntunpe avri, kana pustisajlas e Sodoma, thaj e Gomorra (1Mozesh 19:15, 16). Butshela bershenca majdur le Daniel profetas ande shude ande jekh gropa, mashkar le vadni bare muci, thaj chi azbade les. Sar shaj sas kado? O Del „bishaldas peske andyalos”, thaj „ande phandadas le bare vadni mucengo muj” (Daniel 6:22). Kana pale, le Peter aposhtoles ando angluno shelto ande temlica phandade, o Jehova peske andyalosa avri slobodisardas les (Aposhtola 12:6–11). Le andyalura vi le Jezusheske zhutinde, kana pe phuv sas. Pala soste boldaspe „le andyalura slugisarde leske” (Marko 1:13). Angla soste mudarde les, jekh andyalo „zurardas les” (Lukach 22:43).

6. a) Kathar zhanas, ke le andyalura vi adyes zhutin le Devleske slugen? b) Pe soske pushajipe rodas vorba?

⁶ Le andyalura adyes aba chi sikadyon le manushenge, de o Del inke vi akanak zhutil lenca peske slugenge. E Biblia avri phenel: „Le Jehovasko andyalo sama lel pe kodola, kon les daran, thaj muntuj kodalen” (Asharimata 34:7). Sostar trubul te len pe amende sama? Ke zurale xojake si amen, kon kamen te azban amen. Kon si von? Kathar si? Sar kamen amenge nasul? Den amen vorba, te dikhasa, so pelas pala kodo, kana kerdyilas o Adam thaj e Eva.

7. Pe soste zhanel opre te lel o Beng butzhenen?

⁷ Ando 3. kotor aba sas vorba pe kodo, ke jekh andyalo chi mukhlaspe le Devleske, thaj kamelas te rajil pe kaverende. E Biblia le Shataneske, le Bengeske akharel les (Sikadyimaski 12:9). O Beng kodo kamelas, ke vi kavera  te na mukhenpe le Devleske. Andre zhanglas te xoxavel la Eva, thaj zhi kathar kodo, vi le majbute manushen. De sas unyizhene – sar o Abel, o Enok, thaj o Noe – kon patyivale ashile karing o Jehova (Heberenge 11:4, 5, 7).

8. a) Unyi andyalura sar kerdyile demonura? b) So kerde le demonura, te na meren ande shordyimasko paji?

⁸ Ande le Noeske dyesa vi majbut andyalura chi mukhlepe le Devleske, thaj mukhle o cheri, kaj so beshenas, pe phuv te trajin sar le manusha. Sostar kerde kado? E Biblia phenel amenge, ke romnya kamenas te len penge. (Ginav: 1Mozesh 6:2!) De le andyalura kado nashtig kerdino (Judash 6). Ande kodi vrama le majbut manusha, sar kadal nasul andyalura, rumusajle thaj nasula kerdyile. O Jehova kade gindindas, ke anel jekh baro shordyimasko paji pe intrego luma, thaj pustitil le nasule manushen. De peske patyivale manushen, muntundas (1Mozesh 7:17, 23). Le nasula andyalura te muntun pengo trajo, palpale gele ando cheri. E Biblia demononge akharel len. Pasha o Beng tordyile, thaj vi von le Devleske gele. O Beng kerdyilas lengo raj (Mate 9:34).

9. a) So pelaspe le demononca, kana palpale gele ando cheri? b) So dikhasa akanak?

⁹ Ke le demonura le Devleske gele, o Jehova aba chi las len palpale ande peski familija (2Peter 2:4). Majbut nashtig trajin pe phuv sar manusha, de inke vi adyes rigate ingren „e intrego phuv” (Sikadyimaski 12:9; 1Janosh 5:19). Akanak dikhas, sar zhanen kasave bute manushen rigate te ingren, thaj te xoxaven. (Ginav: 2Korintus 2:11!)

10. Sar xoxaven le demonura le manushen?

¹⁰ Le demonura pe but riga zhanen ande te xoxaven le manushen. Le manusha vi vorta lenca shaj vorbin, thaj  vi kade, ke mashkar lende si jekh mediumo. Kana varikon vorbil le demononca, kodo demonizmusheske vaj spiritizmusheske akharen. E Biblia chi mukhel, te keras khanchi, so kathar le demonura si (Galacia 5:19–21). Sostar? Ke sar jekh manush, kon allaton kamel te xutyilel, kade keren vi le demonura, rigate te ingren, thaj von te traden le manushen. (Dikh: Informaciovo 26, Demonizmushi [spiritizmushi].)

11. So si o drabaripe, thaj sostar te boldas amen lestar?

¹¹ Lengi jekh butyi o drabaripe si, kodo, ke varikon karing le nasul duxura boldelpe, te zhanel variso pa kodo so avla, thaj so inke chi pinzharel. Si, kon le cherhajen dikhen, somnura roden, lila dikhen, anda glazha dikhen, vaj ande palma drabaren. But manusha kodo phenen, ke ande kadal naj khanchi nasul. De na kadej, thaj zurales sama si te las lendar. E Biblia opre sikavel, ke le demonura thaj le drabara kethane keren butyi. Ande Aposhtola 16:16–18 kodo shaj ginavas, ke jekh „drabari demono sas” kon zhutindas jekha shejake, te zhanel te drabarel. Pala soste o Pal avri nashadas anda late le demonos, e shej aba chi zhanglas te phenel, so avla.

12. a) Sostar si nasul te vorbis le mulenca? b) Sostar chi keren le Devleske slugi kasave, pasha soste le demonura tordyon?

¹² Le demonura vi kaversar xoxaven le manushen. Kamen te patyavaven amenca, ke shaj vorbinas le mulenca, thaj ke le mule inke trajin varikaj, shaj vorbin amenca, thaj shaj azban amen. Phenas, varikaske merel lesko amal vaj lesko nipo, thaj zhal kaj jekh mediumo, kon kodo phenel, ke zhanel te vorbil le mulesa. O mediumo shajke variso chacho phenel po mulo, thaj inke vi pe lesko glaso vorbil (1Shamuel 28:3–19). Shajke kodo  gindinas, ke le mulesa vorbinas, de o chachimo kodoj, ke le demononca vorbinas. But sakofelo, so pala o praxope, vaj po praxope keren, kothar si, ke le mule inke trajin varikaj. Kasave si, kana khelen thaj gilaben po praxope, sako bersh inkren le praxopesko dyes, avri shoren le mulenge vaj anda mule, so kerel le mulesko rom vaj leski romnyi, thaj unyi butya, kana ratyi kethane aven kaj le mulesko kher. Le kristianura chi keren kasavo, ande soste spiritizmushi si. Lenge nipura, vaj kon pasha lende beshen, shaj phenen pe lende nasul, vaj shaj ke chi vorbin lenca. De le kristianura zhanen ke le mule chi trajin pe kaver than, nashtig vorbin lenca, thaj nashtig azban amen (Asharimata 115:17). Zurales le sama! Soha na zumav te vorbis le mulenca vaj le demononca, thaj soha na ker kasave, pasha soste le demonura tordyon! (Ginav: 5Mozesh 18:10, 11; Izaiash 8:19).

13. So zhangle te keren butzhene, kon dulmut daranas kathar le demonura?

¹³ Le demonura butivar xoxaven le manushen, de si, kana daraven len. O Beng thaj leske demonura zhanen, ke aba cerra vrama si len, zhi kaj o Del chi shuvel len rigate pe phuv. Kade majnasulaj thaj majzorakej, sar angla kado dulmut (Sikadyimaski 12:12, 17). De but ezera manusha, kon dulmut daranas kathar le demonura, slobodisajle kathar kado. Sar zhangle kado te keren?

14. Sar le kristianura ando angluno shelto, sar zhanas te shinas amen kathar le demonura?

¹⁴ Andar e Biblia shaj zhanas, sar shaj shinas amen kathar le demonura, thaj sar shaj inkras amen dur lendar. Ando Efezushi trajinas kasave kristianura, kon kethane phanglepe le demononca, angla soste pinzharde  o chachimo. Sar zhangle te shinen pe lendar? Kado phenel e Biblia: „mashkar kodol, kon e magia kerenas, dosta butzhene kethane phirade penge ginadya, thaj angla sakoneste phabarde len” (Aposhtola 19:19). Ke kristianura kamenas t’aven, phabarde penge intregi ginadya, ande soste magia sas. Vi amenge kade trubul te keras. Kon kamel le Jehovas te slugil, kodoleske avri trubul te shudel sakofelo, so kathar le demonura si. Kado shaj avel, ginadyi, nyevipo, horoskopo, filmo, giji, khelimo, vaj jekh posteri, so la magia, le demonon, thaj le nasul duxon lasheske thaj shukareske sikaven. De shaj avel vi variso, so o manush anda kodo phiravel, sama te lel pe leste kathar le nasul zora (1Korintus 10:21).

15. So trubul inke te keras, anglal te zhanas te tordyuvas le Bengeske, thaj leske demononge?

¹⁵ Pala kodo, kana le efezushicka phabarde penge ginadya pal le magia, o Pal aposhtol kodo iskirindas, ke inke trubul te marenpe le nasul duxonca (Efezush 6:12). Vi te phabarde penge ginadya, le demonura inke kamenas te azban len. Atunchi so trubulas inke te keren? O Pal kado phendas lenge: „len ande tumaro vast le patyamesko baro sastri, sosa sharaven tume, savesa zhanena tele te mudaren, [te tordyaren] le nasuleske sogodi phabarde khanre” (Efezush 6:16). Sar o baro sastri sama lel pe ketana ando maripe, vi amaro patyamo sama lel pe amende. Kana zurales patyas kodo, ke o Jehova sama zhanel te lel pe amende, atunchi anglal zhanas te tordyuvas le Bengeske, thaj leske demononge (Mate 17:20).

16. Sar shaj zuraras amaro patyamo ando Jehova?

¹⁶ Sar shaj zuraras amaro patyamo ando Jehova? Sako dyes trubul te ginavas e Biblia, thaj trubul te sityuvas te  patyas ando Jehova, sama te lel pe amende. Kana anda chacho jilo patyas ando Jehova, o Beng thaj leske demonura, chi zhanen te azban amen (1Janosh 5:5).

17. So lela pe amende sama kathar le demonura?

¹⁷ Pasha kado inke trubundas te keren variso le efezushicka kristianura? O Efezushi pherdo sas demonizmushesa, anda kado o Pal kodo phendas lenge, ke mindig zurales te rudyinen (Efezush 6:18). Mindig trubundas te mangen le Jehovas, te lel pe lende sama. So si amenca? Vi amari luma pherdoj demonizmushesa. Anda kado vi amenge trubul te mangas le Jehovas, te lel pe amende sama, thaj kana rudyinas, pe lesko anav si te phenas leske. (Ginav: Godyaver Vorbi 18:10!) Kana zurales mangas le Jehovas, te slobodisarel kathar o Beng, shunela amaro rudyimo (Asharimata 145:19; Mate 6:13).

18–19. a) Sar shaj avas avri mishto ando maripe le Bengesa, thaj leske demononca? b) Pe sosko pushajipe den amen vorba ando kaver kotor?

¹⁸ Kana sakofelo avri shudas, so shaj phandel amen kaj o demonizmushi, thaj te patyas ando Jehova, te lel pe amende sama, atunchi anglal zhanas te tordyuvas le Bengeske, thaj leske demononge. Chi trubul te daras lendar. (Ginav: Jakab 4:7, 8!) O Jehova butesa majzuraloj, sar le demonura. Ande le Noeske dyesa krisi shindas pe lende, na butara pale pustitila len (Judash 6). Na bister: chi sam korkori ando maripe! O Jehova sama lel pe amende peske andyalonca (2Kraja 6:15–17). Shaj patyas, ke le Jehovasa mishto shaj avas avri anda maripe le Bengesa, thaj leske demononca! (1Peter 5:6, 7; 2Peter 2:9).

¹⁹ De kana o Beng thaj leske demonura kattyi dukh keren, atunchi o Del inke sostar chi mudardas len? Pe kado ando kaver kotor avla vorba.