1. Ndíjkha rí ndayóoʼ majmañulúʼ ga̱jma̱a̱ numún ángeles rá.

ÁNGELES ni̱ndxu̱ún familia ndrígóo Jeobá. Náa Biblia naxná mbiʼñún “e̱ji̱i̱n Dios” (Job 38:7). Ga̱jma̱a̱ Dios nandoo rí muniʼnúnʼ familia ndrígóo. Ndiéjunʼ eni ángeles rá. Xú káʼnii nimbañúún xa̱bu̱ nákha wajyúúʼ xá. Lá ma̱ndoo mumbayúlú rí mbiʼi xúgi̱ xáʼ. (Atayáá nota 8.)

2. a) Tsáa niʼniin ángeles rá. b) Nguáthi̱i̱n ángeles kuwa rá.

² Ginii ndayóoʼ mbuʼyáá tsáa niʼniin ángeles. Colosenses 1:16 naʼthí rí Jeobá ginii niʼnii Jesús, ga̱jma̱a̱ nda̱wa̱á “niguma xúgíʼ dí rígá mekhuíí ga̱jma̱a̱ dí rígá náa tsu̱du̱u̱ ku̱ba̱ʼ”. Ga̱jma̱a̱ “xúgíʼ i̱ʼwáʼ” rí niʼni ni̱ndxu̱ún ángeles. Nguáthi̱i̱n ángeles niʼnii Jeobá rá. Náa Biblia naʼthí rí kuwa mbaʼin wéñuʼ ángeles (Salmo 103:20; Revelación [Apocalipsis] 5:11).

3. Ndiéjunʼ eʼthí Job 38:4-7 ga̱jma̱a̱ numún ángeles rá.

³ Náa Biblia naʼthí rí Dios niʼniin ginii ángeles nákha xóó tséʼni Ku̱ba̱ʼ. Xú káʼnii nikumu̱ún ikhiin nákha Jeobá niʼni Ku̱ba̱ʼ rá. Náa libro ndrígóo Job naʼthí rí nidxún wéñuʼ. Xúgínʼ ángeles ninindxu̱ún mbá familia bi̱ kuwa mbá jnduʼ runi ñajuunʼ Jeobá (Job 38:4-7).

4. Xóo eʼyáá rí ángeles naxmiéjunʼ kuñún xa̱bu̱ numbaaʼ rá.

⁴ Ángeles naxmiéjúnʼ kuñún má xúʼko̱ xa̱bu̱ numbaaʼ ga̱jma̱a̱ rí eyoo Jeobá náa ikhiin ma̱ngaa náa tsu̱du̱u̱ Ku̱ba̱ʼ (Proverbios 8:30, 31; 1 Pedro 1:11, 12). Ángeles nikuwa gíná wéñuʼ índo̱ Adán ga̱jma̱a̱ Eva túnimbu̱ún. Rí  xúgi̱ kuwa itháan gíná índo̱ nduyáá rí mbaʼin xa̱bu̱ tsénimbu̱ún kuyáá Dios. Mú ikhiin nadxúún wéñuʼ índo̱ mbáa nagáwiinʼ a̱jkiu̱u̱n rí niʼni ga̱jma̱a̱ natanga̱a̱ náa Dios (Lucas 15:10). Ángeles naxmiéjunʼ wéñuʼ kuñún xa̱bi̱i̱ Dios, ga̱jma̱a̱ ikhaa najmiuu ángeles mu mambáñun ga̱jma̱a̱ mañewu̱u̱n xa̱bi̱i̱ (Hebreos 1:7, 14). Guʼyáá tikhuu xkri̱da.

5. Xú káʼnii nimbañúún ángeles xa̱bi̱i̱ Dios nákha wajyúúʼ rá.

 ⁵ Jeobá nikuʼmiin a̱jmi̱i̱n ángeles mu mumbayíí Lot gajmíi̱n bi̱ kuwa náa goʼwóo índo̱ niguma gámbáa xuajen Sodoma ga̱jma̱a̱ Gomorra (Génesis 19:15, 16). Mba̱yu̱ʼ tsiguʼ nda̱wa̱á, gaʼyee Daniel nixuma̱a̱ʼ náa iñáʼ mi̱jnu̱ʼ náa kajtiin i̱ndi̱i̱ʼ. Mú nda̱a̱ rí nigíʼnuu numuu rí Dios “nikuʼmaa mbáa ángel ndrígio̱o̱ ga̱jma̱a̱ nirugoo rawúnʼ i̱ndi̱i̱ʼ” (Daniel 6:22). Nákha siglo timbá, Dios nikunguaanʼ mbáa ángel mu maʼni kríyaaʼ náa guʼwá e̱jua̱nʼ apóstol Pedro (Hechos 12:6-11). Ángeles nimbayíí Jesús índo̱ nixtáa náa tsu̱du̱u̱ Ku̱ba̱ʼ. Nda̱wa̱á rí nijngúun iyááʼ, tikhun ángeles nimbayíí (Marcos 1:13). Ga̱jma̱a̱ índo̱ inuu makhañúu, mbáa ángel “nixnúu tsiakii” (Lucas 22:43).

6. a) Xóo eʼyáá rí ángeles numbañún xa̱bi̱i̱ Dios rí mbiʼi xúgi̱ rá. b) Ndiéjunʼ graxe̱ gáxti̱ʼña̱a̱ rá.

⁶ Ángeles nánguá esngajmamijná náa xa̱bu̱ rí mbiʼi xúgi̱. Mú Dios najmiuu má xúʼko̱ mu mambáñun xa̱bi̱i̱. Xú káʼnii eʼyáá rá. Náa Biblia naʼthí: “Ángel ndrígóo Jeobá xtáa raruguama̱ʼa̱n náa xúgínʼ bi̱ namiñun kuyáá, ga̱jma̱a̱ naʼni káwíin” (Salmo 34:7). Ndayúlú rí mixtie̱wu̱nlú numuu rí kuaʼdiin xa̱bu̱ sia̱nʼ bi̱ guáʼdáá wéñuʼ tsiakii bi̱ nandún muniulúʼ dí raʼkhí. Tsíin ni̱ndxu̱ún xa̱bu̱ sia̱nʼ bugi̱ rá. Náa nigájnun xá. Xú káʼnii egííʼ muni gawúnlú xá. Mu mbuʼyáá, guʼyáá rí nirígá nda̱wa̱á rí Adán ga̱jma̱a̱ Eva nigumiin.

7. Ndiéjunʼ niʼngo̱o̱ niʼniún Satanás mbaʼin xa̱bu̱ rá.

⁷ Náa capítulo 3 nijmañulúʼ rí mbáa ángel nikuximínáʼ náa Dios ga̱jma̱a̱ nindoo maʼtáñajúúnʼ eʼwíínʼ xa̱bu̱. Náa Biblia naxná mbiʼyuu “Gixa̱a̱ ga̱jma̱a̱ Satanás” (Revelación 12:9). Satanás ma̱ngaa nindoo rí xa̱bu̱ numbaaʼ  xúnimbu̱ún. Niʼngo̱o̱ niʼni nduwaaʼ Eva ga̱jma̱a̱ asndu nákha ikhú naʼni nduwiinʼ mbaʼin wéñuʼ xa̱bu̱. Mú tikhun xa̱bu̱ ninindxu̱ún jmbiin náa Jeobá, xóo Abel, Enoc ga̱jma̱a̱ Noé (Hebreos 11:4, 5, 7).

8. a) Xú káʼnii nirtaximíjna̱ xa̱bu̱ wéñiʼ tikhun ángeles rá. b) Ndiéjunʼ nini xa̱bu̱ wéñiʼ mu makáwíin náa Ruʼwa mbiiʼ rá.

⁸ Nákha mbiʼi rí nixtáa Noé, tikhun ángeles bi̱ kuwa mekhuíí niguájtaa náa tsu̱du̱u̱ Ku̱ba̱ʼ mu makuwá xóo xa̱bu̱ numbaaʼ. Náa numuu rá. Náa Biblia naʼthí rí nindúún muguaʼdíin guʼñún (atraxnuu Génesis 6:2). Mú ikhiin rakáʼñun muni rúʼko̱ (Judas 6). Xó má xa̱bu̱ buʼko̱ bi̱ túnimbu̱ún, mbaʼin xa̱bu̱ bi̱ nikuwa ikhú nánguá nini rí jmbu ga̱jma̱a̱ nijmangu̱nʼ wéñuʼ. Jeobá niʼnimbáti̱gi̱i̱n xa̱bu̱ xkawiinʼ náa mbá Ruʼwa mbiiʼ rí nijnííʼ náa xúgíʼ tsu̱du̱u̱ Ku̱ba̱ʼ. Mú niʼni káwíin xa̱bi̱i̱ bi̱ jmbiin (Génesis 7:17, 23). Mu makáwíin náa Ruʼwa mbiiʼ, ángeles bi̱ túnimbu̱ún nitangi̱i̱n mekhuíí. Náa Biblia naxná mbiʼñún xa̱bu̱ wéñiʼ. Ikhiin nigún kidxuuʼ Satanás, bi̱ ni̱jkha̱nú niʼtáñajúúnʼ (Mateo 9:34).

9. a) Ndiéjunʼ nigíʼniin xa̱bu̱ wéñiʼ índo̱ nitangi̱i̱n mekhuíí rá. b) Ndiéjunʼ gúʼyáá gi̱i̱ rá.

⁹ Índo̱ xa̱bu̱ wéñiʼ nitangi̱i̱n mekhuíí, Jeobá nánguá niniñúnʼ rí mani̱ndxu̱ún familia ndrígóo (2 Pedro 2:4). Maski ajndu xa̱bu̱ wéñiʼ nánguá xóo murtaximijnáa xóo xa̱bu̱ numbaaʼ, xóó nuninduwiinʼ “xúgínʼ xa̱bu̱ bi̱ kuwa náa xúgíʼ tsu̱du̱u̱ ku̱ba̱ʼ” (Revelación 12:9; 1 Juan 5:19). Guʼyáá xú káʼnii eʼngu̱u̱n eni nduwiinʼ mbaʼin wéñuʼ xa̱bu̱ numbaaʼ (atraxnuu 2 Corintios 2:11).

10. Xú káʼnii eninduwaʼ xa̱bu̱ wéñiʼ rá.

¹⁰ Xa̱bu̱ wéñiʼ mbaʼa enii xóo eninduwiinʼ xa̱bu̱ numbaaʼ. Tikhun xa̱bu̱ nutamijná gajmiún o najmiún imba̱a̱  xa̱bu̱ xóo brujo o bi̱ nuni xawan. Rí nutamijná gajmiún xa̱bu̱ wéñiʼ najmaʼnuuʼ xóo “xawan”. Dios naʼthúlúʼ rí mutsíngumíjná náa xúgíʼ rí kaʼñún xa̱bu̱ wéñiʼ (Gálatas 5:19-21). Xó má mbáa xa̱bu̱ bi̱ naguguin xujkhúʼ najmuu mbaʼa tsáʼkhá, xúʼko̱ má xa̱bu̱ wéñiʼ najmún rí minduwaʼ mu muniríjiinʼ xa̱bu̱ (atayáá nota 26).

11. a) Ndiéjunʼ eni xa̱bu̱ mu mbuyáá rí marigá nda̱wa̱á rá. b) Ndíjkha rí gíʼmaa muʼni gaʼduunʼ rá.

¹¹ Mbá rí najmún xa̱bu̱ wéñiʼ nindxu̱u̱ rí xa̱bu̱ maʼndún mbuyáá dí marigá nda̱wa̱á, rí nindxu̱u̱ tsiakii ndrígu̱ún xa̱bu̱ wéñiʼ. Tikhun xa̱bu̱ najmún cartas ndrígóo tarot o nuraxnuu ñawúunʼ, nduñíinʼ bi̱ nuni xawan, najmún astrología o mbá bola ndrígóo cristal (itsí niwanʼ o itsí xngiyaʼ). Mbaʼin nakumu̱ún dí rígi̱ na̱nguá nindxu̱u̱ ra̱májánʼ, mu rí phú gajkhun, nindxu̱u̱ migamíi wéñuʼ. Náa Biblia nasngájma rí xa̱bu̱ wéñiʼ numbañún xa̱bu̱ mu mbuyáá rí marigá nda̱wa̱á. Mbá xkri̱da, náa Hechos 16:16-18 naʼthí ga̱jma̱a̱ numuu “mbáa xa̱bu̱ wéñiʼ” bi̱ nimbáyúu mbáa dxáʼgú mu maʼtáriyaʼ rí marigá nda̱wa̱á. Índo̱ apóstol Pablo nixkriyaaʼ xa̱bu̱ wéñiʼ náa dxáʼgú ikhú nindáti̱go̱o̱ tsiakii.

12. a) Ndíjkha rí gamíi mataʼgíʼ maratamíjná gajmiáanʼ bi̱ nikháñun rá. b) Náa numuu rí cristianos tseni nimbá rí na̱ʼkha̱ náa xa̱bu̱ wéñiʼ rá.

¹² I̱mba̱ nduwaʼ rí najmún xa̱bu̱ wéñiʼ nindxu̱u̱ rí ma̱ndoo muʼtámíjná gajmiúlú xa̱bu̱ bi̱ nikháñun. Ikhiin nandún muʼnimbulúʼ rí xa̱bu̱ bi̱ nikháñun kuwa i̱mba̱ ni̱ʼkhá ga̱jma̱a̱ rí ma̱ndoo muʼtámíjná gajmiúlú, mumbayulúʼ o muni gínáanʼ. Índo̱ nakháñuu mbáa bi̱ nambáxulúʼ gajmiúlú o bi̱ kuʼyáá, tikhun nduyáaʼ imba̱a̱ xa̱bu̱ bi̱ nandoo naʼtámíjná gajmíi̱n bi̱ nikháñun. Mbáa ikhaa maʼthí mbá rí gíʼdoo numuu o asndu maʼniriyaʼ  aʼwóo bi̱ nikháñu. Mbáa xa̱bu̱ maku̱mu̱u̱ rí naʼtámíjná ga̱jma̱a̱ bi̱ nikháñu, mu xtáa raʼtámíjná gajmíi̱n xa̱bu̱ wéñiʼ (1 Samuel 28:3-19). Mbaʼa costumbres rí nuni índo̱ najuaʼdi̱i̱ mbáa na̱ʼkha̱ náa ku̱ma̱ rí bi̱ nikháñu xtáa i̱mba̱ numbaaʼ. Índo̱ cristianos tsíñún guni costumbres rígi̱, bi̱ kuñún ga̱jma̱a̱ bi̱ kuwa mijngii náa kúwi̱i̱n nutanumún o nakiʼníin kuñún. Mú cristianos nduyáá rí bi̱ nikháñún nánguá kuwa i̱mba̱ numbaaʼ. Xándoo muʼtámíjná gajmiúlú ikhiin ga̱jma̱a̱ xándoo mumbayúlú ni má muniulúʼ dí raʼkhí (Salmo 115:17). Ikha jngó atiewumínaʼ wéñuʼ. Xátaʼgíʼ maratamíjná gajmiáanʼ bi̱ nikháñun o xa̱bu̱ wéñiʼ, ga̱jma̱a̱ atani gaʼduunʼ xúgíʼ rí kaʼyoo ga̱jma̱a̱ numún xa̱bu̱ wéñiʼ (atraxnuu Deuteronomio 18:10, 11; Isaías 8:19).

13. Ndiéjunʼ niʼngu̱u̱n nini mbaʼin nákha wajyúúʼ bi̱ nimiñun kuñún xa̱bu̱ wéñiʼ rá.

¹³ Xa̱bu̱ wéñiʼ raʼkháa i̱ndó nuni nduwiinʼ xa̱bu̱, ma̱ngaa nunimiñún. Rí mbiʼi xúgi̱, Satanás gajmíi̱n xa̱bu̱ wéñiʼ nduyáá rí “na̱jkha̱ ratumuu mbiʼi” mu muni dí ra̱májánʼ náa tsu̱du̱u̱ Ku̱ba̱ʼ, numuu rí Dios ní xániñúnʼ muni. Ikha jngó najmangu̱nʼ ga̱jma̱a̱ nakiʼníin wéñuʼ (Revelación 12:12, 17). Mú mbaʼin xa̱bu̱ nákha wajyúúʼ bi̱ nimiñun kuñún xa̱bu̱ wéñiʼ niʼngu̱u̱n náa gamíi rúʼko̱. Xú káʼnii nini xá.

14. Xó má cristianos bi̱ nikuwa nákha siglo timbá, xóo gúʼni káwimíjná náa xa̱bu̱ wéñiʼ rá.

¹⁴ Náa Biblia naʼthí xú káʼnii gándoo guñeumíjna̱ náa xa̱bu̱ wéñiʼ. Mbá xkri̱da, nákha siglo timbá, tikhun xa̱bu̱ náa xuajen Éfeso nutamijná gajmiún xa̱bu̱ wéñiʼ nákha xóó tsénindxu̱ún cristianos. Xú káʼnii niʼngu̱u̱n nini  káwimíjná xá. Náa Biblia naʼthí: “Mbaʼin bi̱ nini magia niguwáʼ kudúún libro ndrígu̱ún ga̱jma̱a̱ nitsikha̱a̱ náa inún xúgínʼ xa̱bu̱” (Hechos 19:19). Numuu rí nindúún mani̱ndxu̱ún cristianos, nini gámbáa xúgíʼ libros ndrígu̱ún rí naʼthí ga̱jma̱a̱ numuu magia. Ikhaa má eyóoʼ muʼni rí mbiʼi xúgi̱. Mu muʼni ñajuunʼ Jeobá, ndayóoʼ muʼni gámbáa xúgíʼ rí kagujtuminaʼ ga̱jma̱a̱ numún xa̱bu̱ wéñiʼ. Xóo libros, revistas, horóscopos, películas, ajmúú, gitsíin, i̱yi̱i̱ʼ o i̱ʼwáʼ náa na̱ʼkha̱ ga̱jma̱a̱ numuu magia, xa̱bu̱ wéñiʼ ga̱jma̱a̱ tsiakii ndrígu̱ún rí nakujmaa rí nindxu̱u̱ májánʼ ga̱jma̱a̱ naʼni manigu̱u̱nʼ. Ma̱ngaa nandoo gáʼthúu̱n xúgíʼ rí najmún xa̱bu̱ mu muñeumíjna̱ náa dí ra̱májánʼ, xóo amuletos (1 Corintios 10:21).

15. Ndiéjunʼ gíʼmaa muʼni itháan mu muñeumíjna̱ náa Satanás gajmíi̱n xa̱bu̱ wéñiʼ rá.

¹⁵ Tsiguʼ nda̱wa̱á rí xa̱bu̱ bi̱ nikuwa náa Éfeso nini gámbáa libros ndrígóo magia, apóstol Pablo niʼnirámáʼ rí kaʼníí egiʼdu̱u̱n gajmiún “mbaʼin xa̱bu̱ wéñiʼ” xkawiinʼ (Efesios 6:12). Maski ajndu nitsikha̱a̱ libros ndrígu̱ún, mú xa̱bu̱ wéñiʼ nugíʼ muniu̱u̱ má xúʼko̱ dí raʼkhí. Ndiéjunʼ ndiyóoʼ muni itháan cristianos buʼko̱ rá. Mu ma̱ndoo mumbayúmijna náa xúgíʼ rí naʼni Satanás, Pablo niʼthún: “Gíʼmaa maguaʼdáá fe rí nindxu̱u̱ xóo mbá escudo mba̱a̱” (Efesios 6:16). Xóo mbá escudo nañewu̱u̱n soldado náa guerra, fe ndrígúlú ma̱ndoo mañewu̱nlú náa xkujndu rí kuaʼdáá gajmiúlú xa̱bu̱ wéñiʼ. Á mu nakumulú kuʼyáá káxi̱ Jeobá maʼngulú muraʼníí xúgíʼ rí naʼni Satanás gajmíi̱n xa̱bu̱ wéñiʼ (Mateo 17:20).

16. Ndiéjunʼ gándoo gúʼni mu maʼni itháan gújkhuʼ fe ndrígúlú náa Jeobá rá.

¹⁶ Ndiéjunʼ gíʼmaa muʼni mu maʼni itháan gújkhuʼ fe ndrígúlú náa Jeobá rá. Muraxnuu Biblia xúgíʼ mbiʼi ga̱jma̱a̱  guʼyáá rí ikhaa má gáñewu̱nlú. Á mu kuaʼdáá mbá fe gújkhuʼ náa Jeobá, Satanás gajmíi̱n xa̱bu̱ wéñiʼ xáʼngu̱u̱n gúniulú dí raʼkhí (1 Juan 5:5).

17. Ndiéjunʼ gíʼmaa muʼni itháan mu muñeumíjna̱ náa xa̱bu̱ wéñiʼ rá.

¹⁷ Cristianos bi̱ kuwa náa Éfeso rígá rí ndayóoʼ muni itháan. Kuwa náa xuajen náa rígá wéñuʼ xawan. Ikha jngó Pablo niʼthún rí gíʼmaa mutajkáan “má xúʼko̱” (Efesios 6:18). Gíʼmaa munda̱ʼa̱a̱ má xúʼko̱ Jeobá rí mañewu̱u̱n. Ikháanʼ mangáanʼ kuwáanʼ náa mbá numbaaʼ náa rígá wéñuʼ xawan. Ikha jngó gíʼmaa munda̱ʼa̱a̱ Jeobá rí mañewu̱nlú ga̱jma̱a̱ gajmulú mbiʼyuu índo̱ nuʼtákáñii (atraxnuu Proverbios 18:10). Á mu nunda̱ʼa̱a̱ Jeobá mbaʼa nuthu rí maʼni káwáanʼ náa Satanás, ikhaa mariʼña̱a̱ rí gúʼthán (Salmo 145:19; Mateo 6:13).

18, 19. a) Xú káʼnii gáʼngulú gúʼni gajmiúlú Satanás gajmíi̱n xa̱bu̱ wéñiʼ rá. b) Xú káʼnii graxe̱ guriʼña̱a̱ náa i̱mba̱ capítulo rá.

¹⁸ Á mu nuʼni gámbáa xúgíʼ rí na̱ʼkha̱ náa xa̱bu̱ wéñiʼ ga̱jma̱a̱ nakumulú kuʼyáá Jeobá rí ikhaa gáñewu̱nlú, Satanás gajmíi̱n xa̱bu̱ wéñiʼ xáʼngu̱u̱n guni gawúnlú. Nda̱a̱ numuu mamiñúlú kuʼñúún (atraxnuu Santiago 4:7, 8). Jeobá gíʼdoo itháan tsiakii ki xóo xa̱bu̱ wéñiʼ. Ndiʼyáá má rí nixnúún castigo nákha mbiʼi rí nixtáa Noé, ga̱jma̱a̱ nduʼyáá rí maʼni gámbíin nda̱wa̱á (Judas 6). Garmáʼáan a̱jkia̱nʼ rí na̱nguá kuwáanʼ ndajkuáanʼ náa xkujndu rígi̱. Jeobá najmiuu ángeles mu mañewu̱nlú (2 Reyes 6:15-17). Jeobá má gambáyulú mu muʼni gajmiúlú Satanás gajmíi̱n xa̱bu̱ wéñiʼ (1 Pedro 5:6, 7; 2 Pedro 2:9).

¹⁹ Ndiʼyáá má rí Satanás gajmíi̱n xa̱bu̱ wéñiʼ nuniu̱u̱n dí ra̱májánʼ xa̱bu̱ numbaaʼ. Ikha jngó mbáa nuraximíjna̱: “Náa numuu rí xóó tséʼni gámbíin Dios xá.” Graxe̱ rígi̱ majuixtiʼña̱a̱ náa i̱mba̱ capítulo.