1. Tanbasá mak importante atu aprende kona-ba anju sira?

JEOVÁ hakarak ita atu hatene didiʼak ninia família, inklui mós anju sira. Bíblia temi anju sira nuʼudar “Maromak nia oan-mane sira”. (Job 38:7, nota-rodapé) Anju sira halo serbisu saida? Oinsá mak sira ajuda ema iha tempu uluk? Sira bele ajuda ita ohin loron ka lae?​—Haree Apéndise 8.

2. Sé mak kria anju sira? Iha anju naʼin-hira?

² Ita presiza hatene sé mak kria anju sira. Tuir Koloso 1:16, depois Maromak kria tiha Jesus, nia “kria buat hotu iha lalehan no iha rai”, inklui mós anju sira. Iha anju naʼin-hira? Bíblia hatete katak iha anju millaun ba millaun.​—Salmo 103:20; Apokalipse 5:11.

3. Job 38:4-7 hatete saida kona-ba anju sira?

³ Bíblia mós hanorin katak Jeová kria uluk anju sira antes nia kria mundu. Bainhira anju sira haree mundu, sira sente oinsá? Livru Job hatete katak sira sente haksolok. Sira mak parte husi família ida neʼebé serbí Jeová ho unidade.​—Job 38:4-7.

4. Oinsá mak ita bele hatene katak anju sira interese ba ema?

⁴ Anju sira hakarak ajuda ema no interese kona-ba oinsá Jeová kumpre ninia hakarak ba mundu no ema. (Provérbios 8:30, 31; 1 Pedro 1:11, 12) Ita bele fiar katak bainhira Adão no Eva kontra hasoru Maromak,  anju sira sente triste tebes. Sira mós sente triste liután ohin loron tanba ema barak la halo tuir Jeová. Maibé kuandu ema ruma arrepende an no fila fali ba Maromak, ida-neʼe halo anju sira kontente tebes. (Lucas 15:10) Sira prontu atu ajuda ema neʼebé serbí Jeová. Jeová uza anju sira atu ajuda no proteje ninia atan sira iha mundu. (Ebreu 1:7, 14) Mai ita hanoin kona-ba ezemplu balu.

5. Oinsá mak anju sira ajuda Maromak nia atan sira iha tempu uluk?

 ⁵ Antes Jeová halakon sidade Sodoma no Gomorra, nia haruka anju naʼin-rua atu ajuda Lot no ninia família halai sees husi kastigu neʼe. (Génesis 19:15, 16) Bainhira ema soe profeta Daniel ba leaun nia kuak, “Maromak haruka ninia anju hodi taka leaun sira-nia ibun”. (Daniel 6:22) Jeová mós haruka anju ida atu hasai apóstolu Pedro husi komarka. (Apóstolu 12:6-11) Jesus mós hetan ajuda husi anju sira bainhira nia iha mundu. Porezemplu, depois nia hetan batizmu, “anju sira ajuda nia”. (Marcos 1:13) No antes Jesus hetan kastigu-mate, anju ida “hametin nia”.​—Lucas 22:43.

6. (a) Tanbasá ita bele hatene katak anju sira ajuda Maromak nia atan ohin loron? (b) Ita sei koʼalia kona-ba pergunta saida deʼit?

⁶ Ohin loron, anju sira la mosu tan ba ema. Maibé Maromak uza nafatin anju sira atu ajuda ninia atan sira. Bíblia hatete: “Jeová nia anju proteje sira neʼebé hamtaʼuk Nia, no nia salva sira.” (Salmo 34:7) Tanbasá mak ita presiza anju sira-nia ajuda? Tanba iha inimigu sira neʼebé hakarak atu halo aat mai ita. Sira mak sé? Sira mai husi neʼebé? Oinsá mak sira koko atu halo aat ita? Atu hatán ba pergunta sira-neʼe, mai ita hanoin fali buat neʼebé akontese lakleur depois Maromak kria Adão no Eva.

7. Satanás lohi ema barak atu halo saida?

⁷ Iha Kapítulu 3, ita aprende ona katak anju ida kontra hasoru Maromak no hakarak ukun Maromak nia kriatura seluk. Bíblia hanaran nia Diabu Satanás. (Apokalipse 12:9) Satanás mós hakarak ema atu  kontra Maromak. Nia lohi Eva, no husi tempu neʼebá, nia mós lohi ona ema barak tebes. Maski nuneʼe, ema hanesan Abel, Enoc no Noé kontinua halo tuir Jeová.​—Ebreu 11:4, 5, 7.

8. (a) Oinsá mak anju balu sai aat? (b) Bainhira rai-nabeen, anju aat sira-neʼe halo saida atu salva sira-nia an?

⁸ Iha Noé nia tempu, anju balu kontra hasoru Maromak, no husik sira-nia fatin iha lalehan hodi nakfila an sai ema. Tanbasá? Bíblia esplika katak sira hakarak hola feto iha mundu. (Lee Génesis 6:2.) Maibé hahalok sira-neʼe mak sala. (Judas 6) Ikusmai, ema barak mós hatudu hahalok aat no halo violénsia oioin. Tan neʼe, Jeová deside atu halakon ema aat hotu hodi halo udan boot no rai-nabeen, maibé salva ninia atan sira neʼebé laran-metin ba nia. (Génesis 7:17, 23) Bainhira rai-nabeen, anju aat sira fila fali ba lalehan atu salva sira-nia an. Sira hili atu apoia Satanás hodi kontra hasoru Maromak, no Diabu Satanás mak sai sira-nia ukun-naʼin.​—Mateus 9:34.

9. (a) Saida mak akontese ba anju aat sira neʼebé fila fali ba lalehan? (b) Ita sei aprende kona-ba saida?

⁹ Jeová la simu fali anju aat sira neʼebé kontra nia atu sai parte ba ninia família. (2 Pedro 2:4) Anju aat sira-neʼe mós labele ona nakfila an sai ema, maibé sira kontinua “lohi ema iha mundu tomak”. (Apokalipse 12:9; 1 João 5:19) Mai ita aprende oinsá mak sira lohi ona ema barak.​—Lee 2 Korinto 2:11.

10. Oinsá mak anju aat sira lohi ema?

¹⁰ Anju aat sira uza dalan oioin atu lohi ema. Ema balu envolve an ho anju aat sira hodi hamulak ka bolu  sira, no balu tan husu matan-dook ka siʼikdór nia ajuda. Hahalok sira-neʼe iha ligasaun ho anju aat, no neʼe mak espiritizmu. Maibé Bíblia haruka ita atu hadook an husi buat hotu neʼebé iha ligasaun ho anju aat. (Galásia 5:19-21) Tanbasá? Hanesan peskadór neʼebé uza iska oioin atu kail ikan, anju sira mós uza buat oioin atu lasu ema no kontrola ema nia moris.​—Haree Apéndise 26.

11. Ema halo saida deʼit atu buka-hatene kona-ba futuru? Tanbasá mak ita tenke sees husi hahalok hanesan neʼe?

¹¹ Ema balu toman bá matan-dook ka siʼikdór atu buka-hatene kona-ba futuru ka buat neʼebé sira la hatene. Iha mós ema neʼebé siʼik futuru liuhusi oróskopu, ka haree animál nia aten ka ema nia liman-laran. Maski ema barak hanoin katak buat sira-neʼe la perigu, maibé tuir loloos buat sira-neʼe mak anju aat sira-nia iska no perigu tebes. Tuir Bíblia, anju aat sira mak ajuda no fó apoiu ba siʼikdór sira. Apóstolu 16:16-18 konta kona-ba atan-feto ida neʼebé “siʼik futuru” tanba hetan ajuda husi anju aat ida. Bainhira apóstolu Paulo duni sai anju aat neʼe, atan-feto neʼe labele siʼik tan.

12. (a) Tanbasá mak perigu atu koko koʼalia ho ema neʼebé mate ona? (b) Kostume saida deʼit mak liga ho anju aat sira?

¹² Anju aat sira mós uza dalan seluk tan atu lohi ema. Sira hakarak halo ita fiar katak ita bele koʼalia ho ema neʼebé mate ona, no matebian sira sei moris iha fatin seluk no sira bele koʼalia ho ita, ajuda ita, ka halo aat ba ita. Porezemplu, karik ema ida husu ajuda ba matan-dook atu bele koʼalia ho ninia família ka belun neʼebé mate ona. Matan-dook neʼe karik fó sai informasaun ruma kona-ba ema mate neʼe, ka hasara ninia  lian. (1 Samuel 28:3-19) Iha mós kostume barak neʼebé mai husi hanorin falsu katak ema neʼebé mate ona sei moris hela iha fatin ruma. Karik kostume sira-neʼe balu mak uza lutu, hadeer meza, hatuur ai-han ba matebian, ai-funan moruk no ai-funan midar. Bainhira ema Kristaun sira la hola parte iha kostume sira-neʼe, sira-nia família ka viziñu sira koʼalia aat sira, ka la liga tan sira. Maibé ema Kristaun sira hatene katak ema neʼebé mate ona la moris iha fatin seluk. Ema mate labele koʼalia, no labele halo aat ba ema neʼebé sei moris. (Salmo 115:17) Tan neʼe, kuidadu bá. Keta koko atu koʼalia ho ema neʼebé mate ona ka anju aat sira, no keta envolve an iha kostume hanesan neʼe.​—Lee Deuteronómio 18:10, 11; Isaias 8:19.

13. Ema barak neʼebé uluk taʼuk ba anju aat sira, agora sente oinsá?

¹³ Anju aat sira laʼós deʼit lohi ema, maibé mós hataʼuk ema. Ohin loron, Satanás no ninia anju aat sira hatene katak ‘sira-nia tempu hela uitoan deʼit’ no lakleur tan Maromak sei halakon sira husi mundu, tan neʼe sira sai hirus liután. (Apokalipse 12:12, 17) Maibé ema rihun ba rihun neʼebé uluk taʼuk ba anju aat sira, agora la taʼuk tan. Oinsá mak sira konsege halakon taʼuk ba anju aat sira?

14. Hanesan ho ema Kristaun sira iha apóstolu nia tempu, oinsá mak ita bele sai livre husi anju aat sira?

¹⁴ Bíblia hanorin ita oinsá atu kontra hasoru anju aat sira no oinsá atu sai livre husi sira. Porezemplu, ema balu iha sidade Éfeso toman atu halo masonik hodi simu ajuda husi anju aat sira, maibé ikusmai sira aprende lia-loos. Oinsá mak sira sai livre husi  anju aat? Bíblia hatete: “Ema barak neʼebé uluk halo masonik oioin, sira halibur sira-nia livru hamutuk no sunu iha ema hotu nia oin.” (Apóstolu 19:19) Tanba sira hakarak sai ema Kristaun, sira sunu hotu sira-nia livru kona-ba masonik. Ita mós presiza halo tuir sira-nia ezemplu. Ema hotu neʼebé hakarak serbí Jeová, presiza halakon sasán naran deʼit neʼebé iha ligasaun ho anju aat sira maski ema balu hanoin buat sira-neʼe mak baibain deʼit no la lori perigu. Buat sira-neʼe inklui oróskopu, no mós livru, filme, múzika, game no poster neʼebé iha ligasaun ho masonik, anju aat no espiritizmu. Ita mós presiza soe biru ka sasán ruma neʼebé ema uza hodi fiar katak sira bele hetan protesaun husi buat aat oioin.​—1 Korinto 10:21.

15. Atu kontra hasoru Satanás no anju aat, ita presiza halo saida tan?

¹⁵ Tinan balu liutiha husi tempu neʼebé ema Éfeso sira sunu sira-nia livru kona-ba masonik, apóstolu Paulo hakerek karta hodi haruka sira atu kontinua ‘halo funu kontra anju aat sira’. (Éfeso 6:12) Maski sira sunu ona sira-nia livru, maibé anju aat sira koko nafatin atu book sira. Entaun, saida tan mak sira presiza halo? Paulo hatete ba sira: “Lori eskudu boot fiar nian, hodi imi bele hamate rama-oan hotu neʼebé lakan ho ahi husi aat-naʼin.” (Éfeso 6:16) Hanesan eskudu neʼebé bele proteje soldadu iha funu, ita-nia fiar mós bele proteje ita. Se ita fiar metin katak Jeová bele proteje ita, ita bele kontra hasoru Satanás no anju aat sira.​—Mateus 17:20.

16. Oinsá mak ita bele hametin ita-nia fiar ba Jeová?

¹⁶ Oinsá mak ita bele hametin ita-nia fiar ba Jeová? Ita presiza lee Bíblia loron-loron no sai toman atu  sadere ba nia. Se ita iha fiar metin ba Jeová, Satanás no anju aat sira labele halo aat ita.​—1 João 5:5.

17. Hodi halo saida tan mak ita bele hetan protesaun?

¹⁷ Ema Kristaun iha sidade Éfeso presiza halo saida tan? Sira hela iha sidade neʼebé nakonu ho influénsia husi anju aat sira. Tan neʼe, Paulo hatete ba sira: “Kontinua halo orasaun iha situasaun hotu.” (Éfeso 6:18) Sira presiza husu beibeik Jeová nia protesaun. Oinsá ho ita? Ita mós moris iha mundu neʼebé nakonu ho influénsia husi anju aat sira. Tan neʼe, ita presiza husu Jeová nia ajuda no temi ninia naran bainhira ita halo orasaun. (Lee Provérbios 18:10.) Se ita kontinua husu Jeová atu salva ita husi Satanás, Jeová sei hatán ba ita-nia orasaun.​—Salmo 145:19; Mateus 6:13.

18, 19. (a) Oinsá mak ita bele manán hasoru Satanás no anju aat sira? (b) Iha kapítulu tuirmai, ita sei koʼalia kona-ba pergunta saida?

¹⁸ Se ita soe buat hotu neʼebé iha ligasaun ho anju aat sira no sadere ba Jeová, ita bele kontra hasoru Satanás no anju aat sira. Ita la presiza taʼuk ba sira. (Lee Tiago 4:7, 8.) Jeová mak forsa boot liu fali anju aat sira. Jeová fó kastigu ba anju aat sira iha Noé nia tempu, no iha futuru nia sei halakon sira. (Judas 6) Hanoin-hetan katak ita nunka mesak. Jeová uza ninia anju sira atu proteje ita. (2 Reis 6:15-17) Ho Jeová nia ajuda, ita bele manán hasoru Satanás no anju aat sira.​—1 Pedro 5:6, 7; 2 Pedro 2:9.

¹⁹ Maibé tanbasá mak Maromak seidauk halakon Satanás no anju aat sira neʼebé hamosu susar barak? Ita sei aprende kona-ba neʼe iha kapítulu tuirmai.