1. Inogne ty anto’e ianaragne ty miomba o anjelio?

TEÀ i Jehovah ho fantantikagne ty keleia’e. Agnisa ty keleian’Andrianagnahare o anjelio. “Anak’Andrianagnahare” ty irehafa ty Baiboly iareo. (Joba 38:7) Inogne ty raha atao o anjelio? Akore ty nagnampea iareo ty ndaty taloha? Mbe magnampe antikagne vao iareo amy hinane zao?—Henteo ty Fagnazavagne 8.

2. Akore ty nampisy o anjelio, sady fire ty isa iareo?

² Toko’e ho fantantikagne tie akore ty nampisy o anjelio. Rehafe ty Kolosianina 1:16 fa tafara ty namboara i Jehovah i Jesosy, ty “namboaragne ze kila raha andagnitse agne naho an-tane etoy.” Agnisa izay ty anjely. Fire ty isa iareo? Rehafe ty Baiboly tie misy an-jato’e tapetrisa o anjelio.—Salamo 103:20; Apokalypsy 5:11.

3. Inogne ty rehafe ty Joba 38:4-7 miomba ty anjely?

³ Ampianare ty Baiboly ka, fa namboatse anjely ty Jehovah taloha ty namboara’e ty tane toy. Akore ty nihafalea iareo naho fa nivita voatse ty tane toy? Rehafe ty boke i Joba fa tsy hay rehafegne ty hafalea iareo. Keleian-draike miharo fanompoagne i Jehovah o anjelio.—Joba 38:4-7.

4. Akore ty ahafantarantikagne tie mahafale o anjelio o ndatio?

⁴ Nahafale o anjelio fa ela o ndatio. Teà iareo ka ty safiry i Jehovah miomba ty tane toy naho o ndatio. (Ohabolana 8:30, 31; 1 Petera 1:11, 12) Nampanahelo iareo ty fivaliha i Adama naho i Eva, naho ty tsy fagnoriha ty  ankamaroa ty ndaty amy izao ty fanoroa i Jehovah. Faie naho fa misy ndaty mibaboke sady miheregne aman’Andrianagnahare, le fale o anjelio. (Lioka 15:10) Teà o anjelio ze ndaty manompo an’Andrianagnahare. Mampiasa anjely mba hagnampeagne naho hiarovagne ty mpanompo’e an-tane etoy ty Jehovah. (Hebreo 1:7, 14) Andao hagnente ty ohatse miomba izay.

5. Akore ty nagnampea o anjelio ty mpanompon’Andrianagnahare taloha?

 ⁵ Nandefa anjely roe ty Jehovah mba hagnampe i Lota naho ty keleia’e hilay, amy ty fandravagne ty tanà i Sodoma naho i Gomora. (Genesisy 19:15, 16) Natorake tamy ty lavake misy liona ty Daniela mpaminany, zato taogne tafara izay, faie tsy naratse reke fa ‘nagnirake ty anjeli’e ty Andrianagnahare le nampikombogne ty vava i lionay.’ (Daniela 6:22) Ginadra ty apositoly Petera tafara atoy, faie nandefa anjely hagnafake aze ty Jehovah. (Asan’ny Apostoly 12:6-11) Nampea ty anjely ka ty Jesosy tamy ie tan-tane etoy. Tafara ty nanoagne badisa aze ohatse, le “nisy anjely nikarakara aze.” (Marka 1:13) Taloha ty namonoagne aze ka, le nisy anjely “nampaozatse aze.”—Lioka 22:43.

6. a) Akore ty ahafantarantikagne fa magnampe ty mpanompon’Andrianagnahare o anjelio amy hinane zao? b) Inogne iaby ty fagnonteneagne hovaleantikagne?

⁶ Fa tsy miseho amo o ndatio o anjelio amy hinane zao. Faie mbe mampiasa ty anjeli’e avao ty Andrianagnahare hagnampeagne ty mpanompo’e. Hoe ty Baiboly: “Ty anjely i Jehovah mitobe magnodidigne ze matahotse Aze, sady mandrombake aze.” (Salamo 34:7) Inogne ty ipaliàntikagne fiarovagne? Misy fahavalo mahery te hagnisy raty antikagne. Ia iareo, sady akore ty nampisy iareo? Akore ty agnisia iareo raty antikagne? Mba hamaleagne izay, le hohenteantikagne ty raha niseho tafara ty namboaragne i Adama naho i Eva.

7. Voafita i Satana hanao akore o ndatio?

⁷ Nianarantikagne tamy Toko faha-3 ao fa nisy anjely nivalike taman’Andrianagnahare sady te hifehe ty hafa. I Satana Devoly ty irehafa ty Baiboly aze. (Apokalypsy 12:9) Teà i Satana hanohetse an’Andrianagnahare ka  ty hafa. Finita’e ty Eva, sady nanomboke tamy izay ty namitaha’e ty ankamaroa o ndatio. Faie nisy avao ka ty tsy nivalike tamy i Jehovah. Agnisa izay ty Abela, i Enoka naho i Noa.—Hebreo 11:4, 5, 7.

8. a) Akore ty nahavy ty anjely ila’e ho demonia? b) Inogne ty natao o demoniao mba tsy ho mate i Ranobeỳ?

⁸ Nivalike ty ila o anjelio tamy ty andro faha i Noa. Nienga i lagnitsey iareo, le niova ho ndaty an-tane etoy. Nagnino? Rehafe ty Baiboly fa te hanambaly iareo. (Vakio Genesisy 6:2.) Faie tsy izay ty nanoagne o anjelio. (Joda 6) Niharaty naho nagnoho-doza manahake o anjely ratio ty ndaty tamy izay. Izay ty nahavy i Jehovah nampiavy ranobey, hamonoagne ty ndaty raty fagnahy tambone tane etoy. Faie nandrombake ty mpanompo’e tsy mivalike reke. (Genesisy 7:17, 23) Niheregne an-dagnitse agne i anjely raty rey mba tsy ho mate. Demonia ty irehafa ty Baiboly iareo. Nifily ty hanohagne ty fivaliha i Satana iareo, le nanjare lahibey iareo ty Devoly.—Matio 9:34.

9. a) Natao akore i demonia rey naho fa niheregne an-dagnitse agne? b) Inogne ty raha hianarantikagne amy ty magnarake?

⁹ Tsy nirambese i Jehovah ho agnisa ty keleia’e sasa iareo naho fa nivalike ama’e. (2 Petera 2:4) Fa tsy miova ho ndaty sasa o demoniao amy hinane zao, faie mbe ‘mamitake ze tane misy ndaty.’ (Apokalypsy 12:9; 1 Jaona 5:19) Andao hofantarentikagne ze fomba famitaha’e zay.—Vakio 2 Korintianina 2:11.

10. Akore ty fomba amitaha o demoniao o ndatio?

¹⁰ Maro ty fomba amitaha o demoniao o ndatio. Ty ndaty ila’e mifandrambe amo o demoniao mivantagne ndra amy ty alala ty ambiasa ndra ty mpijoro. Izay ty atao tihoe fifandrambesagne amy ty demonia ndra fagnahy  raty. Faie rarà ty Baiboly mafe tikagne mba hagnalavitse ze kila raha misy ifandrambesagne amy ty demonia. (Galatianina 5:19-21) Nagnino? Mampiasa fandrike maro ty mpamandrike biby. Isan-karaza’e ka ty fitake ampiasae o demoniao mba hamandrihagne o ndatio naho hifeheagne aze.—Henteo ty Fagnazavagne 26.

11. Inogne o sikily izao, sady nagnino tikagne ro toko’e hagnalavitse aze?

¹¹ Raike amy ty fitake ampiasae iareo ty fanoagne sikily. Tsy inogne izay, fa ty fampiasagne hery mahagaga mba hamantaragne ty hoavy ndra ty raha tsy fantatse. Va’e hisy ndaty hagnente vasiagne, raha famantaragne ty hoavy, karatse fisikiliagne, vato kirisitaly magnambara ty hoavy, ndra soritse amy ty lela tagnagne. Maro ty ndaty mihevetse fa tsy mampagnino ty fanoagne o raha rehoe, faie diso zay. Magnoho-doza o raha rehoe naho ty maregne. Atoro ty Baiboly ohatse, fa miharo asa ty demonia naho o mpisikilio. Nirehake miomba ty somondrara raike “nitoboha ty demonia mpitoky” ty Asan’ny Apostoly 16:16-18. Nanjare nahay ‘naminany ty raha hoavy’ i somondraray. Faie tsy nihai’e sasa izay naho fa niroahe i apositoly Paoly i demonia’ey.

12. a) Nagnino ty fifandrambesagne amo o mateo ro magnoho-doza? b) Nagnino ty mpanompon’Andrianagnahare ro tsy manao ty fombafomba o mpisikilio?

¹² Mampiasa fitake hafa hamandrihagne ndaty ka o demoniao. Atao’e ze hinoantikagne fa mbe azontikagne irehafagne o ndaty mateo. Fitahe’e ka tikagne tie mbe velogne amy ty toeragne hafa ty ndaty mate sady mbe azo ifandrambesagne ndra magnisy raty. Va’e handeha mbamy ty mpisikily mbeo ohatse ty ndaty raike nimate longo ndra ragnetse maifitse, fa nao zao mbe azo’e atao ty mifampirehake amy i ndaty nimatey. Va’e  hirehake raha soa ndra raha raty miomba i ndaty nimatey i mpisikilỳ, ndra hangala tahake ty feo i ndaty nimatey. (1 Samoela 28:3-19) Ty finoagne tihoe mbe velogne avao o ndaty nimateo ka, ty ifotora ty ankamaroa ty fombafomba atao naho fa misy mate. Agnisa izay ty havoriagne, fankalazagne ty fete ty mate, fanoagne sorogne hoahy ty mate, fanoagne remavoigne, ndra fanoagne ari-tory. Naho tsy mandrambe anjara amo o fomba rehoe ty Kirisitianagne, le sasà ty longo’e, ndra afaha’e baraka. Faie fanta ty Kirisitianagne tie fa tsy velogne sasa ty mate, sady fa tsy azo atao ty mifandrambe ama’e. Tsy mahavita magnisy raty antikagne ka iareo. (Salamo 115:17) Mitaoa rehe mba tsy hifandrambe amo o mateo ndra o demoniao sady ko manao ty fombafomba o mpisikilio.—Vakio Deoteronomia 18:10, 11; Isaia 8:19.

13. Votsotse tamy ty inogne ty ndaty maro natahotse o demoniao?

¹³ Tsy vita tie mamitake o demoniao, fa mbe magnorohoro ka. Fa fanta i Satana naho o demonia’eo tie fa “fohe ty fotoagne” anagna’iareo aloha ty hagnafahagne iareo amy ty tane toy. Izay ty mahavy iareo manao raha maro feno halozagne mihoatse ty taloha. (Apokalypsy 12:12, 17) Faie ndaty agnarivo’e ty fa afake amo o demoniao sady fa tsy matahotse iareo sasa. Akore ty nahavy iareo tsy natahotse o demoniao sasa?

14. Akore ty hisintahantikagne o demoniao, manahake ty Kirisitianagne tamy ty taon-jato voaloha’e?

¹⁴ Ambara ty Baiboly amantikagne tie akore ty fomba handieragne naho hisintahagne o demoniao. Nifandrambe tamo o demoniao ohatse ty ndaty ila’e tamy ty tanàgne atao tihoe Efesosy, taloha ty nianara iareo ty hamarenagne. Akore ty nisintaha iareo aze? Hoe ty Baiboly:  “Maro tamy iareo nitobohan-draha ty namory ty boke’e, le noroagne tagnatreha i ndaty maroy eo.” (Asan’ny Apostoly 19:19) Noroa iareo iaby ze boke mazỳ tamy iareo tao, fa te ho Kirisitianagne iareo. Soa naho tsikombegne ka ty natao iareo. Toko’e hisintake ze raha misy ifandrambesa’e amo o demoniao ze ndaty te hanompo i Jehovah. Agnisa izay ty boke, gazete, fagnoriham-bitagne, filima, mozike, fihisagne naho ze sare manoro mazỳ ndra demonia, ndra ty raha va’e hanimba ndra hagnendrakendrake antikagne. Mbe agnate izay ka ty vogne atao fiaro.—1 Korintianina 10:21.

15. Inogne ty raha ila’e mbe toko’e hatao hanoheragne i Satana naho o demoniao?

¹⁵ Tafara ty nagnoroa o Efesianao ty boke mazỳ iareo, le nanoratse ty apositoly Paoly, fa tsy maintsy mialy mafe iareo hanoheragne ty “fagnahy raty.” (Efesianina 6:12) Ndra tie fa nagnoro ty boke’e iareo, le mbe te hagnisy raty iareo avao o demoniao. Inogne ty raha ila’e mbe toko’e ho natao iareo? Hoe ty Paoly tamy iareo: “Rambeso ka ty fikalagnagne bala jabajaba, le ty finoagne, hikalagna’areo ze bala-polesidoro mirehetse atify i ratỳ.” (Efesianina 6:16) Miaro ty maramila raike agn’aly ty fikalagnam-bala ampiasae’e. Mitovy amy izay ka fa miaro antikagne ty finoantikagne. Hahatohetse i Satana naho o demoniao tikagne naho matoky ty fiarova i Jehovah antikagne.—Matio 17:20.

16. Inogne ty toko’e hatao hagnamafesagne ty finoantikagne i Jehovah?

¹⁶ Inogne ty toko’e hatao hagnamafesagne ty finoantikagne i Jehovah? Toko’e hamaky Baiboly isan’andro naho hianatse hiantehetse amy i Jehovah tikagne mba harova’e. Tsy ho vita i Satana naho o demoniao ty hagnisy raty antikagne naho fa mafe ty finoantikagne i Jehovah.—1 Jaona 5:5.

17. Inogne ka ty hiaro antikagne amo o demoniao?

 ¹⁷ Inogne ty raha ila’e mbe toko’e ho natao ty Kirisitianagne ta Efesosy agne? Nitoboke tamy ty tanàgne feno demonia iareo. Le hoe ty reha i Paoly tamy iareo: “Mivavaha lognandro ndra ombia ndra ombia.” (Efesianina 6:18) Mbe nipay ty fiarova i Jehovah isan’andro iareo. Akore ka ty amantikagne? Miaigne amy ty tontolo feno ty asan-demonia toy tikagne. Toko’e hangatake amy i Jehovah tikagne mba harova’e sady toko’e hanognogne ty tahinagne tihoe Jehovah naho fa mivavake. (Vakio Ohabolana 18:10.) Hamale ty vavake ataontikagne ty Jehovah naho mivavake ama’e lognandro tikagne mba hamotsora’e antikagne amy i Satana.—Salamo 145:19; Matio 6:13.

18, 19. a) Akore ty hanoherantikagne i Satana naho o demoniao? b) Inogne ty fagnonteneagne hovaleagne amy ty toko manonjohy itoy?

¹⁸ Hahatohetse i Satana naho o demoniao tikagne naho fa magnalavitse ze raha misy ifandrambesa’e amy ty demonia sady miantehetse amy ty fiarova i Jehovah. Tsy toko’e hatahotse iareo tikagne. (Vakio Jakoba 4:7, 8.) Maozatse ambone o demoniao ty Jehovah. Nanaze iareo reke tamy ty andro faha i Noa sady mbe hamonovono iareo ka amy ty hoavy. (Joda 6) Ko haligno fa tsy mialy raike tikagne, fa hampiasae i Jehovah hiarovagne antikagne o anjeli’eo. (2 Mpanjaka 6:15-17) Handrese i Satana naho o demoniao tikagne, naho matoky ty fagnampea i Jehovah antikagne.—1 Petera 5:6, 7; 2 Petera 2:9.

¹⁹ Maro ty fijaleagne atao i Satana naho o demoniao. Inogne ty tsy le avy le namonovonoan’Andrianagnahare iareo? Izay ty hovaleagne amy ty toko manonjohy itoy.