1. ¿Tuku xlakata xlakaskinka nakatsiyaw tiku ángeles?

ÁNGELES makgtapakgsikgo kxfamilia Jehová. Biblia kalimapakuwi pi «xkamanan Dios» (Job 38:7). Chu Dios lakaskin pi kalakgapaswi xfamilia. ¿Tuku tlawakgo ángeles? ¿La kamakgtayakgolh latamanin makgasata? ¿Tlan nakinkamakgtayakgoyan la uku? (Kaʼakxilhti nota 8, niku wan «Ángeles»).

2. 1) ¿Tiku kamalakatsukilh ángeles? 2) ¿La kgalhalit ángeles anan?

² Talakaskin nakatsiyaw tiku kamalakatsukilh ángeles. Colosenses 1:16 lichuwinan pi Jehová pulana malakatsukilh Jesús chu alistalh «malakatsukika putum tuku xalak akgapun chu putum tuku xalak katiyatni». Akxni wan «putum tuku xalak akgapun» na kakilhchanima ángeles. ¿La kgalhalit ángeles kamalakatsukilh Jehová? Biblia wan pi anan lhuwa millones ángeles (Salmo 103:20; Apocalipsis 5:11).

3. ¿Tuku wan Job 38:4-7 xlakata ángeles?

³ Biblia na lichuwinan pi Dios kamalakatsukilh ángeles akxni nina xmalakatsuki Katiyatni. ¿La makgkatsikgolh ángeles akxni Jehová malakatsukilh Katiyatni? Libro xla Job lichuwinan pi lu paxuwakgolh. Putum ángeles akgtum familia xwankgonit chu akxtum kskujnanikgo Jehová (Job 38:4-7).

4. ¿Tuku likatsiyaw pi ángeles kalilakgaputsakgo latamanin?

⁴ Ángeles ankgalhin kalilakgaputsakgo latamanin chu tuku Jehová lakaskin xpalakatakan chu xpalakata Katiyatni (Proverbios 8:30, 31; 1 Pedro 1:11, 12). Ángeles lu lilipuwankgolh akxni Adán chu Eva ni kgalhakgaxmatkgolh Dios. Chu la uku max tlakg lipuwankgo akxni akxilhkgo pi makgapitsi latamanin ni kgalhakgaxmatkgo Dios. Pero xlakan lu paxuwakgo akxni chatum lataman nialh tlawa tuku  nitlan chu lakgtaspita Dios (Lucas 15:10). Ángeles lu kalilakgaputsakgo xlakskujnin Dios. Xla kalimaklakaskin ángeles xlakata nakamakgtayakgo chu nakakuentajtlawakgo xlakskujnin (Hebreos 1:7, 14). Kaʼakxilhwi makgapitsi liʼakxilhtit.

5. ¿La kamakgtayakgolh ángeles xlakskujnin Dios xala makgasa?

⁵ Jehová kamalakgachalh chatiy ángeles xlakata nakamakgtayakgo Lot chu xfamilia natsalakgo akxni xkamasputumaka Sodoma chu Gomorra (Génesis 19:15, 16). Titaxtulh kilhtamaku, palakachuwina Daniel mujuka niku xwilakgo  leones. Pero nitu lanilh xlakata Dios «makamilh xʼángel chu kamalakchuwanilh xkilhnikan leones» (Daniel 6:22). Kxapulana siglo, Dios malakgachalh chatum ángel xlakata natamakxtu apóstol Pedro kpulachin (Hechos 12:6-11). Ángeles nachuna makgtayakgolh Jesús akxni xlama kKatiyatni. Akgtum liʼakxilhtit, Biblia wan pi akxni xtamununita «ángeles xmatliwakglhkgo» (Marcos 1:13). Chu akxni atsinu xtsankga naniy, chatum ángel «matliwakglhli» (Lucas 22:43).

6. 1) ¿Tuku likatsiyaw pi ángeles kamakgtayakgo xlakskujnin Dios la uku? 2) ¿Tuku takgalhskinin nakgalhtiyaw?

⁶ La uku ángeles nialh katasiyanikgo latamanin. Pero Dios chuntiya kalimaklakaskin xlakata nakamakgtayakgo xlakskujnin. Biblia wan: «Xʼángel Jehová kakuentajtlawama putum tiku pekuanikgo, chu kalakgmaxtu» (Salmo 34:7). Xlakskujnin Dios lakaskinaw pi kakinkakuentajtlawakan xlakata kgalhiyaw xalakgtliwakga kintalamakgasitsinkan, tiku kinkatlawaniputunkgoyan tuku nitlan. ¿Tiku umakgolh kintalamakgasitsinkan? ¿Niku minkgocha? ¿La kinkatlawaniputunkgoyan tuku nitlan? Xlakata nakatsiyaw, kaʼakxilhwi tuku lalh akxni kamalakatsukika Adán chu Eva.

7. ¿Tuku katlawaninit Satanás latamanin?

⁷ Kcapítulo 3 katsiniw pi chatum ángel talalakatawakalh Dios chu xkamapakgsiputun amakgapitsin. Biblia limapakuwi «Akgskgawini chu Satanás» (Apocalipsis 12:9). Satanás na xlakaskin pi latamanin xtalalakatawakakgolh Dios. Akgskgawilh Eva chu asta la uku kaʼakgskgawikgo lhuwa latamanin. Pero makgapitsi latamanin ni makgxtakgkgolh Jehová, chuna la Abel, Enoc chu Noé (Hebreos 11:4, 5, 7).

8. 1) ¿La demonios litaxtukgolh makgapitsin ángeles? 2) ¿Tuku tlawakgolh demonios xlakata nalakgtaxtukgo kMunkaklat?

⁸ Kxkilhtamaku Noé, makgapitsi ángeles talalakatawakakgolh Jehová chu taktakgocha k’akgapun xlakata nalatamakgo  kKatiyatni la latamanin. ¿Tuku xlakata? Biblia wan pi xkgalhiputunkgo xlakpuskatinkan (kalikgalhtawakga Génesis 6:2). Pero ángeles nichuna xlitlawatkan xwanit (Judas 6). Xtachuna la umakgolh ángeles tiku ni kgalhakgaxmatnankgolh, makgapitsi latamanin na nitlan tsukukgolh likatsikgo chu xalakluku wankgolh. Wa xlakata Jehová kalimalakgsputulh Munkaklat latamanin tiku lixkajni xlikatsikgo. Pero kalakgmaxtulh xlakskujnin tiku ni makgxtakgkgolh (Génesis 7:17, 23). Xlakata ángeles nalakgtaxtukgo kMunkaklat, taspitparakgolh k’akgapun. Biblia kalimapakuwi «demonios» umakgolh nixatlan ángeles. Xlakan laksakkgolh natatayakgo Satanás tiku la uku xmapakgsinakan litaxtu (Mateo 9:34).

9. 1) ¿La kakitaxtunilh demonios akxni taspitkgolh k’akgapun? 2) ¿Tuku na’akxilhaw la uku?

⁹ Akxni demonios taspitkgolh k’akgapun, Jehová nialh kamaxkilh talakaskin namakgtapakgsiparakgo kxfamilia (2 Pedro 2:4). La uku, demonios nialhla kgalhikgo akgtum tiyatliwa, pero chuntiya «kaʼakgskgawima putum tiku lamakgolh kkatiyatni» (Apocalipsis 12:9; 1 Juan 5:19). Kaʼakxilhwi la kaʼakgskgawikgo lhuwa latamanin (kalikgalhtawakga 2 Corintios 2:11).

10. ¿La kaʼakgskgawikgo demonios latamanin?

¹⁰ Demonios tipalhuwa la kaʼakgskgawikgo latamanin. Makgapitsi latamanin lakgankgo chatum skgoyuna o katsini xlakata xla nakatachuwinan demonios. Dios kinkawaniyan pi nipara tsinu namakgtanuyaw tuku xla demonios (Gálatas 5:19-21). Chuna la chatum tiku makgni animales limaklakaskin li’akgsiyat, nachuna demonios wi tuku maklakaskinkgo xlakata nakali’akgskgawikgo latamanin.

11. 1) ¿Tuku maklakaskinkgo demonios? 2) ¿Tuku xlakata nalakgmakganaw?

¹¹ Demonios kamaklakaskinkgo skgoyonanin chu skuwananin  xlakata naka’akgskgawikgo latamanin. Uma latamanin maklakaskinkgo xlitliwakgakan demonios xlakata namapaksakgo makgapitsi tajatat o xlakata nakatlawanikgo tuku nitlan amakgapitsin. Skuwananin skinkgo lhakgat, fotos, akchixit o atanu tuku tlan namaklakaskinkgo xlakata nakalitlawanikgo tuku nitlan amakgapitsin. Demonios nachuna kaliʼakgskgawikgo latamanin tamanixnat, likgalhtawakgakan makan chu tiku wankgo tuku aku nala. Lhuwa latamanin lakpuwankgo pi uma ni talakgalhin, pero kxlakatin Dios uma lu nitlan. Biblia lichuwinan pi demonios taskujkgo tiku wankgo tuku aku nala. Akgtum li’akxilhtit, Hechos 16:16-18 lichuwinan pi chatum tsumat xkgalhi «demonio nema xtlawa pi tlan xkatsilh tuku aku xʼama la». Akxni apóstol Pablo tamakxtulh uma demonio, uma tsumat nialhla chuna tlawalh.

12. 1) ¿Tuku xlakata lu nitlan kitaxtu komo nalitsakgsayaw nakatachuwinanaw tiku nikgonita? 2) ¿Tuku xlakata kililakgmakgatkan putum tuku tatalakxtumi demonios?

¹² Atanu tuku li’akgskgawinankgo demonios wa pi kinkamakanajliputunkgoyan pi tlan katachuwinankan tiku nikgonita. Uma lilakgapaskan taskuwan. Demonios kinkamakanajliputunkgoyan pi tiku nikgonita chuntiya staknamakgolh alakatanu chu tlan kinkatachuwinankgoyan, tlan nakinkamakgtayakgoyan o nakinkatlawanikgoyan tuku nitlan. Akxni niy tiku xalak kifamiliajkan o kiʼamigojkan, max wi tiku naputsa xtamakgtay chatum lataman tiku wan pi tlan katachuwinan tiku nikgonita. Chu max uma lataman wi tuku nawan nema kaks nakinkamalakawaniyan chu asta max nachuna nachuwinan la xchuwinan tiku ninita. Max uma lataman nalakpuwan pi wa tachuwinama tiku ninita pero tiku xlikana katachuwinama wa demonios (1 Samuel 28:3-19). Makgapitsin lakpuwankgo pi tiku nilh nakatasiyani kxtamanixnatkan chu wi tuku nakaskini. Na tlawakan oración xpalakata tiku  nikgolh xlakata lakpuwankan pi chuna najaxa x’espíritu, makatamikan o wi tuku tlawanikan xlakata nalakapastakkan akxni tinilh, wi tuku kamakamaxkikan akxni kalakgatawilakan. Akxni kstalaninanin Cristo ni makgtlawakgo uma, max tiku xalak xfamilia chu xtalakatsuninkan nitlan nakalichuwinankgo o nialh katikatachuwinankgolh. Pero xlakan katsikgo pi tiku nikgonita nialh latamakgo alakatanu akxni nikgonita. Nila katachuwinanaw chu xlakan nialhla kinkatachuwinankgoyan chu nila kinkatlawanikgoyan tuku nitlan (Salmo 115:17). Wa xlakata lu kuenta katlawaw uma. Nikxni kalitsakgsa nakatachuwinana tiku nikgonita o demonios chu kalakgmakganti putum tuku tatalakxtumi demonios (kalikgalhtawakga Deuteronomio 18:10, 11; Isaías 8:19). (Kaʼakxilhti nota 26, niku wan «Taskuwan chu demonios»).

13. ¿Tuku tlawakgonit lhuwa latamanin tiku makgasata xkapekuanikgo demonios?

¹³ Demonios ni kajwatiya kaʼakgskgawikgo latamanin, nachuna kamakgapekuankgo. La uku, Satanás chu xdemonios liwana katsikgo pi «nialh lhuwa kilhtamaku» kgalhikgo xlakata natlawakgo tuku nitlan kKatiyatni, xlakata Dios nialh makgas nakamalakgsputu. Wa xlakata la uku tlakg lixkajni likatsikgo (Apocalipsis 12:12, 17). Pero lhuwa latamanin tiku makgasata xkapekuanikgo demonios la uku nialh kapekuanikgo. ¿Tuku xlakata?

14. Chuna la kstalaninanin Cristo xalak pulana siglo, ¿la tlan nakatamakgatliniyaw demonios?

¹⁴ Biblia kinkawaniyan tuku kilitlawatkan xlakata nakatamakgatliniyaw demonios. Akgtum liʼakxilhtit, kxapulana siglo makgapitsi latamanin xalak Éfeso, xkatachuwinankgo demonios akxni nina kstalaninanin Cristo xlitaxtukgo.  ¿La katamakgatlinikgolh demonios? Biblia wan: «Lhuwa tiku skuwananin xwankgonit mastokgkgolh xlibroskan chu kalhkuyukgolh kxlakatinkan putum latamanin» (Hechos 19:19). Xlakata kstalaninanin Cristo xlitaxtuputunkgo, lhkuyukgolh xlibroskan xla magia o xla taskuwan. La uku nachuna kilitlawatkan. Xlakata tlan nalakskujnaniyaw Jehová talakaskin namakganaw putum tuku tatalakxtumi demonios. La komo libros, revistas, horóscopos, películas, tatlakgni, takgaman o atanu tuku tatalakxtumi demonios, nema tlawa pi lilakgatit natasiya. Nachuna tuku latamanin maklakaskinkgo xlakata lakpuwankgo pi nitu nakaʼakgspula, la komo tapixnu o atanu (1 Corintios 10:21).

15. ¿Tuku atanu tlan natlawayaw xlakata nakatamakgatliniyaw Satanás chu xdemonios?

¹⁵ Makgapitsi kata alistalh akxni umakgolh latamanin xalak Éfeso klhkuyukgonit xlibroskan xla magia, apóstol Pablo tsokgwililh pi chuntiyaku “xkatalatlawamakgolh lhuwa demonios” (Efesios 6:12). Maski xlakan klhkuyukgonita xlibroskan, demonios chuntiya xkatlawaniputunkgo tuku nitlan. ¿Tuku atanu xlitlawatkan xwanit kstalaninanin Cristo? Pablo kawanilh: «Katiyatit lanka escudo xla takanajla nema tlan nalimamixiyatit putum xalakpasani xflechas Satanás» (Efesios 6:16). Chuna la akgtum escudo makgtaya chatum soldado akxni an kʼguerra, kintakanajlakan nachuna tlan nakinkamakgtayayan. Komo xliputum kinakujkan nalipawanaw Jehová, tlan nakatamakgatliniyaw putum tuku nakinkatlawaniputunkgoyan Satanás chu xdemonios (Mateo 17:20).

16. ¿Tuku kilitlawatkan xlakata namatliwakglhaw takanajla nema kgalhiniyaw Jehová?

¹⁶ ¿Tuku kilitlawatkan xlakata namatliwakglhaw takanajla nema kgalhiniyaw Jehová? Chali chali nalikgalhtawakgayaw Biblia chu nalipawanaw pi Jehová nakinkakuentajtlawayan. Komo xliputum kinakujkan nalipawanaw Jehová,  Satanás chu xdemonios nila kintikatlawanikgon tuku nitlan (1 Juan 5:5).

17. ¿Tuku tanu tlan natlawayaw xlakata nakatamakgatliniyaw demonios?

¹⁷ ¿Tuku atanu xlitlawatkan xwanit kstalaninanin Cristo xalak Éfeso? Xlamakgo kʼakgtum kachikin niku xʼanan lhuwa skuwananin. Wa xlakata Pablo kawanilh pi xtlawakgolh oración «putum kilhtamaku» (Efesios 6:18). Xtalakaskin pi ankgalhin kskinikgolh xtamakgtay Jehová. Akinin nachuna lamaw kkakilhtamaku niku anan lhuwa skuwananin. Wa xlakata, kaskiniw Jehová pi kakinkakuentajtlawan chu kamaklakaskiw xtukuwani akxni natlawaniyaw oración (kalikgalhtawakga Proverbios 18:10). Komo ankgalhin naskiniyaw Jehová pi kakinkamakgtayan natamakgatliniyaw Satanás, xla nakgalhti kioracioneskan (Salmo 145:19; Mateo 6:13).

18, 19. 1) ¿La tlan nakamakgatlajayaw Satanás chu xdemonios? 2) ¿Tuku takgalhskinin nakgalhtiyaw kʼatanu capítulo?

¹⁸ Komo namakganaw putum tuku tatalakxtumi demonios chu komo nalipawanaw pi Jehová nakinkamakgtayayan, Satanás chu xdemonios nila kintikatlawanikgon tuku nitlan. Ni anan tuku xlakata nakalipekuaniyaw (kalikgalhtawakga Santiago 4:7, 8). Jehová tlakg tliwakga nixawa demonios. Kamalakgaxokgelh kxkilhtamaku Noé chu kkilhtamaku nema aku mima nakamalakgsputu (Judas 6). Kalakapastakwi pi ni kiʼakstukan katalatlawamaw demonios. Jehová kalimaklakaskin xʼángeles xlakata nakinkakuentajtlawakgoyan (2 Reyes 6:15-17). Nakamakgatlajayaw Satanás chu demonios xlakata Jehová nakinkamakgtayayan (1 Pedro 5:6, 7; 2 Pedro 2:9).

¹⁹ Pero komo Satanás chu xdemonios lu katlawanimakgolh tuku nitlan latamanin, ¿tuku xlakata Dios nina kamalakgsputu? Uma takgalhskinin nakgalhtiyaw kʼatanu capítulo.