SAPTA 10
Tok Baibel i Mekim Long Ol Ensel Na Ol Spirit Nogut
1. Bilong wanem yumi laik kisim save long ol ensel?
JEHOVA i laik bai yumi kisim save long famili bilong em. Ol ensel ol i famili bilong God. Baibel i kolim ol ensel olsem “olgeta pikinini man bilong God.” (Jop 38:7) Ol ensel i save mekim wanem? Olsem wanem ol i bin helpim ol manmeri long bipo? Na olsem wanem ol inap helpim yumi long nau?—Lukim Futnot long pes 210.
2. Ol ensel i kam long we? God i wokim hamas ensel?
2 Yumi mas save ol ensel i kam we. Kolosi 1:16 i tok olsem taim Jehova i wokim pinis Jisas, em i “wokim olgeta arapela samting long heven na long graun.” Dispela i makim ol ensel tu. God i wokim hamas ensel? Baibel i tok i gat planti milion ensel.—Song 103:20; Revelesen 5:11.
3. Jop 38:4-7 i tok wanem long ol ensel?
3 Baibel i tok tu olsem God i wokim ol ensel paslain long em i wokim dispela graun. Ol i pilim olsem wanem taim ol i lukim graun? Buk Jop i tok olsem ol i amamas. Olgeta i insait long wanpela famili i wanbel long mekim wok bilong Jehova.—Jop 38:4-7.
OL ENSEL I HELPIM OL MANMERI BILONG GOD
4. Olsem wanem yumi save ol ensel i laik helpim ol man?
4 Ol ensel i laik helpim ol manmeri na ol i laik save long ol samting God i tingting pinis long mekim long ol man na long dispela graun. (Provep 8:30, 31; 1 Pita 1:11, 12) Taim Adam na Iv i bikhet, ating dispela i mekim ol ensel i bel hevi. Ol i mas bel hevi moa long nau taim ol i lukim olsem planti man i sakim tok bilong Jehova. Tasol taim wanpela man i kam bek long God, ol ensel i amamas long dispela. (Luk 15:10) Ol ensel i save redi long helpim ol man i lotuim God. Jehova i save yusim ol ensel bilong helpim na lukautim ol wokman bilong em long graun. (Hibru 1:7, 14) Yumi ken skelim sampela stori olsem.
“God bilong mi i salim ensel bilong em i kam pasim maus bilong ol laion.”—Daniel 6:22
5. Olsem wanem ol ensel i helpim ol wokman bilong God long bipo?
5 Jehova i salim tupela ensel i go helpim Lot na famili bilong em long ranawe na abrusim bagarap bilong taun Sodom na Gomora. (Stat 19:15, 16) Planti handet yia bihain, ol i tromoi profet Daniel i go daun long hul bilong ol laion, tasol em i no kisim bagarap, long wanem, “God . . . i salim ensel bilong em i kam pasim maus bilong ol laion.” (Daniel 6:22) Bihain, taim aposel Pita i stap long kalabus, Jehova i salim wanpela ensel i go helpim em long lusim kalabus. (Aposel 12:6-11) Na tu, ol ensel i bin helpim Jisas taim em i stap long graun. Bihain long em i baptais pinis, “ol ensel i kam helpim em.” (Mak 1:13) Na paslain liklik long ol i kilim Jisas i dai, wanpela ensel i kam na “strongim em.”—Luk 22:43.
6. (a) Olsem wanem yumi save ol ensel i save helpim ol manmeri bilong God long nau? (b) Nau bai yumi kisim bekim bilong wanem ol askim?
6 Long nau, ol ensel i no save kamap ples klia long ol man. Maski i olsem, God i save mekim wok yet long ol ensel bilong helpim ol wokman bilong em. Baibel i tok: “Ensel bilong Jehova i save was raunim ol manmeri i pret long God, na em i save kisim bek ol.” (Song 34:7) Bilong wanem ol i mas lukautim yumi? Long wanem, yumi gat ol birua we ol i gat bikpela strong em ol i laik bagarapim yumi! Ol i husat? Ol i kam long we? Olsem wanem ol i laik bagarapim yumi? Bilong kisim save long bekim bilong ol dispela askim, yumi ken skelim wanem samting i bin kamap bihain long taim God i wokim Adam na Iv.
OL BIRUA BILONG YUMI EM YUMI NO INAP LUKIM
7. Satan i bin giamanim hamas manmeri?
7 Yumi bin lainim long Sapta 3 olsem wanpela ensel i bikhet long God na i laik bosim ol narapela. Baibel i kolim em Satan dispela Devil. (Revelesen 12:9) Satan i laik bai ol man i bikhet tu long God. Em i bin giamanim Iv, na kirap long dispela taim na i kam em i bin giamanim klostu olgeta man. Tasol sampela i no givim baksait long Jehova, kain olsem Abel, Enok, na Noa.—Hibru 11:4, 5, 7.
8. (a) Olsem wanem sampela ensel i kamap spirit nogut? (b) Bilong abrusim bagarap long Bikpela Tait, ol spirit nogut i mekim wanem?
8 Long taim bilong Noa, sampela ensel i bikhet na lusim ples bilong ol long heven, na ol i kam i stap olsem ol man long graun. Bilong wanem? Baibel i tok ol i laik maritim ol meri. (Ritim Stat 6:2.) Tasol i no stret ol ensel i mekim olsem. (Jut 6) Olsem ol dispela bikhet ensel, klostu olgeta man long dispela taim i no bihainim pasin i stret na ol i bagarapim ol arapela. Jehova i kamapim wanpela bikpela tait long olgeta hap we i bagarapim olgeta man nogut. Tasol ol gutpela wokman bilong em i abrusim bagarap. (Stat 7:17, 23) Bilong abrusim bagarap, ol dispela bikhet ensel i go bek gen long heven. Baibel i kolim ol dispela bikhet ensel olsem ol spirit nogut. Ol i go long sait bilong Satan, olsem na Devil i kamap hetman bilong ol.—Matyu 9:34.
9. (a) Wanem samting i painim ol spirit nogut taim ol i go bek long heven? (b) Nau bai yumi skelim wanem samting?
9 Ol i bikhet, olsem na Jehova i no orait long ol dispela spirit nogut long i go bek insait long famili bilong em. (2 Pita 2:4) Ol spirit nogut i no inap tanim i kamap man moa, tasol ol i wok yet long “giamanim olgeta manmeri bilong graun.” (Revelesen 12:9; 1 Jon 5:19) Nau yumi ken skelim olsem wanem ol i giamanim planti manmeri.—Ritim 2 Korin 2:11.
OL ROT OL SPIRIT NOGUT I GIAMANIM OL MAN
10. Olsem wanem ol spirit nogut i save giamanim ol manmeri?
10 Ol spirit nogut i save yusim kain kain samting bilong giamanim ol man. Ol man i toktok wantaim ol spirit nogut taim ol yet i mekim o long rot bilong narapela man, kain olsem glasman. Pasin bilong toktok wantaim ol spirit nogut i insait long wok bilong ol spirit nogut. Tasol Baibel i tok yumi mas i stap longwe long olgeta kain wok bilong ol spirit nogut. (Galesia 5:19-21) Bilong wanem yumi mas mekim olsem? Wankain olsem man bilong painim abus i save yusim trap bilong kisim ol animal, ol spirit nogut i save yusim kain kain pasin giaman bilong kisim ol manmeri na bosim ol.—Lukim Futnot long pes 221-222.
11. Ol man i save mekim wanem bilong tokaut long ol samting bai kamap bihain? Bilong wanem yumi mas sakim dispela pasin?
11 Wanpela pasin giaman bilong ol em pasin bilong tokaut long ol samting bai kamap bihain o samting i stap hait. Sampela i yusim skin bilong diwai, sampela lip, mambu, o buai bilong mekim wok painimaut. Sampela i ting long rot bilong driman o horoskop ol i kisim save long ol samting bai kamap bihain. Planti man i ting ol dispela pasin i no inap bagarapim ol, tasol ol inap bagarapim ol. Baibel i soim olsem ol man i save tokaut long ol samting bai kamap bihain, ol i save wok wantaim ol spirit nogut. Aposel 16:16-18 i stori long wanpela meri em “wanpela spirit nogut i stap long em na i save givim save long em long ol samting i stap hait” na i helpim em “long tokaut long ol samting bai kamap bihain.” Tasol taim aposel Pol i rausim dispela spirit nogut long em, dispela meri i no inap tokaut long ol samting bai kamap bihain.
12. (a) Bilong wanem pasin bilong traim long toktok wantaim ol man i dai pinis inap nogutim man? (b) Bilong wanem ol wokman bilong God i no save insait long ol kastam long sait bilong ol daiman?
12 Ol spirit nogut i giamanim ol man long narapela rot. Ol i laik mekim na bai yumi ting olsem yumi inap toktok long ol man i dai pinis, na ol man i dai pinis i stap laip long wanpela hap, na ol inap toktok wantaim yumi o mekim nogut long yumi. Olsem, sampela em ol pren o famili bilong ol i dai pinis, ol i save go long wanpela man i save toktok wantaim ol daiman. Na dispela man inap kamapim sampela samting bilong dispela pren o famili i bin dai pinis o em i toktok long nek i olsem nek bilong man i dai pinis. (1 Samuel 28:3-19) Planti man i bilip olsem ol daiman ol i stap laip yet olsem na dispela i as bilong planti fiuneral kastam ol man i save bihainim. Sampela bilong ol dispela kastam i olsem, bung bilong tingim de man i bin i dai, wokim sakrifais i go long man i dai pinis, olkain pasin meri i mas mekim taim man bilong em i dai, na was long bodi bilong man i dai pinis. Taim ol Kristen i no insait long ol dispela kastam, ol famili bilong ol o lain long ples bilong ol bai krosim ol, mekim tok i daunim ol, o ol i no laik mekim ol samting wantaim ol. Tasol ol Kristen i save olsem ol daiman i no go i stap long wanpela hap. Yumi no inap toktok wantaim ol na ol i no inap mekim nogut long yumi. (Song 115:17) Yumi mas was gut. Yumi no ken traim long toktok wantaim ol daiman o ol spirit nogut na yumi no ken insait long ol kastam we wok bilong ol spirit nogut i as bilong en.—Ritim Lo 18:10, 11; Aisaia 8:19.
13. Planti man em bipo ol i pret long ol spirit nogut ol i bin mekim wanem?
13 Ol spirit nogut i save giamanim ol man, na tu, ol i save pretim ol. Long nau, Satan na ol spirit nogut bilong em i save olsem ol i gat “sotpela taim tasol bilong i stap” na bihain ol i no inap mekim wok bilong ol, olsem na pasin bilong ol i go nogut moa, winim bilong bipo. (Revelesen 12:12, 17) Tasol maski i olsem, planti tausen manmeri em bipo ol i save pret nogut tru long ol spirit nogut, ol i bin lusim dispela pret. Olsem wanem ol inap lusim pasin bilong pret long ol spirit nogut?
ROT BILONG SAKIM NA LUSIM OL SPIRIT NOGUT
14. Olsem ol Kristen long taim bilong ol aposel, olsem wanem yumi ken lusim ol spirit nogut?
14 Baibel i tokim yumi long rot bilong sakim ol spirit nogut na rot bilong lusim ol olgeta. Olsem, sampela long taun Efesus i save toktok wantaim ol spirit nogut paslain long ol i kisim save long tok i tru. Olsem wanem ol i lusim dispela pasin? Baibel i tok: “Planti bilong ol husat i save wokim ol kain kain marila posin samting, ol i karim ol buk bilong ol i kam na kukim long ai bilong olgeta manmeri.” (Aposel 19:19) Ol i laik kamap Kristen, olsem na ol i kukim ol dispela buk bilong ol i stori long marila posin samting. Long nau tu, man i mas bihainim wankain pasin. Ol man i laik mekim wok bilong Jehova ol i mas rausim olgeta samting i bilong mekim wok bilong ol spirit nogut. Olsem ol buk, ol magasin, horoskop, ol muvi, ol musik, ol gem, na ol piksa bilong bilasim haus we i strongim ol man long insait long ol wok bilong ol spirit nogut na i kirapim ol long ting ol dispela wok i gutpela samting na samting bilong amamas. Na tu, ol i mas rausim ol paspas na ol narapela samting ol man i save werim bilong lukautim ol yet na bai samting nogut i no inap painim ol.—1 Korin 10:21.
15. Bilong sakim Satan na ol spirit nogut, yumi mas mekim wanem narapela samting?
15 Sampela yia bihain long ol Kristen long Efesus i kukim ol buk bilong ol i stori long wok bilong marila posin, aposel Pol i tok ol i mas wok yet long “pait” wantaim “ol spirit nogut.” (Efesus 6:12) Tru, ol i kukim pinis ol buk bilong ol, tasol ol spirit nogut i wok yet long mekim nogut long ol. Olsem na ol i mas mekim wanem narapela samting? Pol i tokim ol: “Yupela i mas kisim bilip olsem hap plang bilong pait na bai yupela inap mekim i dai [o, stopim] olgeta spia paia bilong Satan.” (Efesus 6:16) Wankain olsem hap plang bilong pait i save lukautim soldia long taim bilong pait, bilip bilong yumi bai lukautim yumi. Sapos yumi bilip strong olsem Jehova inap lukautim yumi, yumi inap sakim Satan na ol spirit nogut.—Matyu 17:20.
16. Olsem wanem yumi ken strongim bilip bilong yumi long Jehova?
16 Olsem wanem yumi ken strongim bilip bilong yumi long Jehova? Yumi mas ritim Baibel long olgeta de na lain long bilip olsem em bai lukautim yumi. Sapos yumi bilip strong long Jehova, Satan na ol spirit nogut bai i no inap mekim nogut long yumi.—1 Jon 5:5.
17. Yumi mas mekim wanem bilong lukautim yumi long ol spirit nogut?
17 Ol dispela Kristen long Efesus i mas mekim wanem narapela samting? Ol i sindaun long taun i pulap long ol wok bilong ol spirit nogut. Olsem na Pol i tokim ol: “Wok yet long beten long olgeta kain taim.” (Efesus 6:18) Ol i mas beten askim Jehova long lukautim ol long olgeta taim. Olsem wanem long yumi? Yumi tu i stap long graun i pulap long ol wok bilong ol spirit nogut. Olsem na yumi mas beten askim Jehova long lukautim yumi, na yumi mas kolim nem bilong Jehova taim yumi beten. (Ritim Provep 18:10.) Sapos yumi wok long beten askim Jehova long kisim bek yumi long han bilong Satan, Jehova bai harim ol beten bilong yumi.—Song 145:19; Matyu 6:13.
18, 19. (a) Olsem wanem yumi inap win long pait na sakim Satan na ol spirit nogut? (b) Sapta i kamap bihain long dispela bai bekim wanem askim?
18 Sapos yumi rausim olgeta samting long laip bilong yumi we i insait long wok bilong ol spirit nogut, na yumi bilip strong long Jehova long lukautim yumi, yumi inap sakim Satan na ol spirit nogut. Yumi no gat wok long pret long ol. (Ritim Jems 4:7, 8.) Jehova i gat bikpela strong moa winim ol spirit nogut. Em i bin mekim save long ol long taim bilong Noa, na long bihain em bai bagarapim ol. (Jut 6) Tingim, i no yumi tasol i insait long dispela pait. Jehova i yusim ol ensel bilong em long lukautim yumi. (2 King 6:15-17) Yumi ken bilip tru olsem Jehova bai helpim yumi na Satan na ol spirit nogut i no inap winim yumi.—1 Pita 5:6, 7; 2 Pita 2:9.
19 Satan na ol spirit nogut i givim bikpela pen na hevi long ol man, tasol wai na God i no bagarapim ol? Sapta i kamap bihain bai bekim dispela askim.
