1. Parché ne ocore imparar sora i àngeli?

GEOVÀ el vol che cognossemo la so fameia. I àngeli i fà parte dela fameia de Dio. Ntela Bìblia i ze ciamadi “fioi de Dio”. (Jó 38:7) Cossa i àngeli i fà? Come lori i ga giutà le persone ntel passà? E sarà che i pol giutarne ancoi? —Vedi la Nota Final 8.

2. Chi ga creà i àngeli e quanti i ze stati creadi?

² Colossenses 1:16 el dise che dopo che Geovà el ga creà Gesù, “tute le altre robe le ze state creade ntei cieli e ntela Tera.” Ntra queste robe i era i àngeli. Ma quanti àngeli Geovà el ga creà? La Bìblia la dise che ghen’è sentene de milioni de àngeli. —Salmo 103:20; Apocalipse 5:11.

3. Cossa Jó 38:4-7 el dise sora i àngeli?

³ La Bìblia anca la insegna che Geovà el ga creà i àngeli vanti de crear la Tera. Come i àngeli i se ga sentio quando i ga visto la Tera? El libro de Giobe el dise che i ze restadi pròpio contenti. Lori i era una fameia unida che la servia a Geovà. —Jó 38:4-7.

4. Come savemo che i àngeli i se preocupa coi umani?

⁴ I àngeli i ga sempre bio preocupassion coi umani e col propòsito de Geovà par la Tera e par la ­umanità. (Provérbios 8:30, 31; 1 Pedro 1:11, 12) I àngeli i ze restadi tanto tristi quando Adamo e Eva i se ga ­rebelà e ancora pi tristi de veder la maioransa dei umani desobedir a Geovà. Ma  lori i resta tanto contenti quando qualchedun el cambia e el ritorna a Geovà. (Lucas 15:10) I àngeli i se importa con quei che i serve a Dio. Geovà dopera i àngeli par giutar e proteger i so servi qua ntela Tera. (Hebreus 1:7, 14) Ndemo veder arquanti esempi de questo.

5. Come i àngeli i ga giutà i servi de Dio del passà?

 ⁵ Geovà el ga mandà due àngeli par giutar Lò e so fameia a scampar dela destrussion de Sodoma e Gomora. (Gênesis 19:15, 16) Sentene de ani dopo, el profeta Daniel l’è stà butà zo ntela busa dei leoni, ma lu no’l ga sofrio gnanca un mal, parché “Dio el ga mandà el so àngelo e el ga serà su la boca dei leoni.” (Daniel 6:22) In naltra ocasion, Geovà el ga mandà un so àngelo par liberar Piero dela preson. (Atos 12:6-11) I àngeli i ga giutà anca a Gesù quando l’era qua ntela Tera. Par esémpio, dopo de esser batesà, “i àngeli i era drio servirlo.” (Marcos 1:13) Pena vanti de Gesù esser copà, un àngelo “el ga dato forsa a lu.” —Lucas 22:43.

6. (a) Come savemo che i àngeli i ze drio giutar i servi de Dio ancoi? (b) Che domande ndemo risponder?

⁶ Ancoi i umani no i vede pi i àngeli, ma Dio el seita doperarli par giutar i so servi. La Bìblia la dise: “El àngelo de Geovà l’è de star intorno de quei che i Lo teme, e el salva a lori.” (Salmo 34:7) Parché gavemo bisogno de protession? Parché gavemo poderosi nemighi che i vol farne mal. Chi i ze sti nemighi? De ndove i vien? Come i proa farne mal? Par saver la risposta a queste domande, ndemo veder cossa l’è sucedesto vanti de Adamo e Eva esser creadi.

7. Par via dei ingani de Sàtana, cossa le persone le ga fato?

⁷ Gavemo imparà ntel capìtolo  3 che un àngelo el se ga rebelà contra Geovà e el volea governar el mondo. La Bìblia lo ciama Sàtana el Diaol. (Apocalipse 12:9) Sàtana el volea che anca i umani i se rebelasse contra Dio. Lu l’è stà bon inganar Eva e tanti altri  umani. Ma arquanti, come par esémpio Abel, Enoc e Noè, i ze restadi fedeli a Geovà. —Hebreus 11:4, 5, 7.

8. (a) Come arquanti àngeli i ze deventadi demoni? (b) Cossa i demoni i ga fato par salvarse del Dilùvio?

⁸ Nei giorni de Noè, arquanti àngeli i se ga rebelà e i ga assà el cielo par viver come umani ntela Tera. Parché? La Bìblia la dise che lori i volea maridarse cole done. (Lesi Gênesis 6:2.) Ma far questo l’era pròpio sbalià. (Judas 6) Compagno quei àngeli rugni, la pi granda parte dei umani de quel tempo i ze deventadi disonesti e violenti. Par quela, Geovà el ga finio fora con tuti quei umani rugni par meso de una inondassion, ma Lu el ga salvà i servi fedeli. (Gênesis 7:17, 23) Par salvarse, quei àngeli rugni i ze ritornadi al cielo. La Bìblia la ciama quei àngeli rugni de demoni. Lori i ga scoliesto unirse ala rebelion de Sàtana el Diaol e lu l’è deventà el governante dei demoni. —Mateus 9:34.

9. (a) Cossa l’è sucedesto ai demoni quando i ze ritornadi al cielo? (b) Cossa ndaremo imparar adesso?

⁹ Geovà no’l ga mia acetà nantra volta quei demoni ntela so fameia parché lori i se gavea rebelà. (2 Pedro 2:4) I demoni no i pol pi deventar umani, ma lori ancora i seita “inganar tuta la tera abitada.” (Apocalipse 12:9; 1 João 5:19) Ndemo imparar come lori i ze boni inganar tante persone.—Lesi 2 Coríntios 2:11.

10. Come i demoni i ingana le persone?

¹⁰ I demoni i dopera diverse maniere par inganar le persone. Le persone le se mete in contato coi demoni diretamente o par meso de un mago o de un  mediun. Questo contato coi demoni l’è ciamà demonismo o spiritismo. Ma la Bìblia la ne manda star distante de tuto quel che l’è relassionà coi demoni. (Gálatas 5:19-21) Parché? Parché i demoni i dopera tràpole par inganar e controlar le persone, cossita come un cassador che el dopera una tràpola par ciapar animai. —Vedi la Nota Final 26.

11. Cossa la è la indovinassion, e parché gavemo de evitarla?

¹¹ Una dele tràpole la è la indovinassion, che vol dir doperar poderi sopranaturai par saver qualcossa sora el futuro o sora el oculto. Arquanti i proa far questo vardando le stele, catando presagi, lesendo le carte, doperando una sfera de cristal o lesendo la man de una persona. Tanti i pensa che praticar ste robe no’l fà mal a nissuni. Ma questo no l’è mia vera. Queste pràtiche le ze pròpio pericolose. Par esémpio, la Bìblia la mostra che i indovinadori i laora insieme coi demoni. In Atos 16:16-18, lesemo sora “un demònio de indovinassion” che el giutea una tosa a far la “indovinassion”. La tosa la ga perso el so poder de indovinar el futuro quando el apòstolo Paolo el ga parà via el demònio.

12. (a) Parché l’è pericoloso proar parlar coi morti? (b) Parché i servi de Dio no i ga mia de partissipar de costumi demoniachi?

¹² Nantra tràpola che i demoni i dopera par inganar le persone l’è far creder che i morti i continua a viver in qualche posto, che i morti i pol parlar con noantri e anca i pol giutarne. Femo un esémpio: qualchedun el ga perso una persona amada ntela morte. Pol esser che lu el desside ndar a una persona, come un mediun, che la dise che la pol parlar col morto. E quel mediun el pol dar qualche informassion sora el morto e anca  imitar la vose del morto. (1 Samuel 28:3-19) Tanti dei costumi fùnebri i ze relassionadi cola idea che i morti i continua a viver in qualche posto. Esempi de questi costumi i ze rituai durante el funeral, sacrifissi par i morti e altri costumi fùnebri. Quando i cristiani no i partissipa de sti costumi, pol esser che le persone dela so fameia o del so paese i va criticar, insultar o anca no i parla pi con lori. Ma i cristiani i sa che i morti no i continua a viver in qualche posto. No podemo parlar con lori, no i pol giutarne e gnanca farne mal. (Salmo 115:17) Stà atento! No stà mia proar parlar coi morti e gnanca partissipar de costumi che i ze relassionadi coi demoni. —Lesi Deuteronômio 18:10, 11; Isaías 8:19.

13. Cossa le ga fato tante persone che le gavea paura dei demoni?

¹³ I demoni no sol i ingana le persone, ma anca le spaventa. Ancoi, Sàtana e i so demoni i sa che i ga “una s-cianta de tempo” vanti de Dio cavarli via dela Tera. Par quela, come mai prima, lori i ze tanto rugni e violenti. (Apocalipse 12:12, 17) Ancora cossita, miliari de persone che le gavea paura dei demoni le ga perso sta paura. Come le se ga liberade de sta paura?

14. Compagno i Cristiani del primo sècolo, come podemo liberarse dei demoni?

¹⁴ La Bìblia la dise come resister ai demoni e come liberarse de lori. Par esémpio, arquanti dela cità de Èfeso, vanti de imparar la verità, i parlea coi  demoni. Come i se ga liberadi? La Bìblia la dise: “Un gran nùmero de quei che i pratichea arti màgiche i ga portà i so libri e li ga brusà davanti de tuti.” (Atos 19:19) Lori i ga finio fora con tuti quei libri de magia parché i volea esser cristiani. Ancoi gavemo de far la medèsima cosa. Tuti quei che i vol servir a Geovà i ghe toca liberarse de tute le cose che le ze relassionade coi demoni. Questo vol dir liberarse de libri, riviste, oròscopi, filmi, giughi e anca pósteri che i fà creder che la magia, i demoni o el sopranatural i ze emossionanti e no i ze mia pericolosi. Anca gavemo de liberarse de cose che le persone le dopera par protègerse del mal. —1 Coríntios 10:21.

15. Cossa gavemo de far par resister a Sàtana e ai demoni?

¹⁵ Arquanti ani dopo che i Cristiani de Èfeso i ga finio fora coi libri de magia, el apòstolo Paolo el ga scrito che lori ancora i gavea de “lotar” e far guera “contra le forse spirituai perverse”. (Efésios 6:12) Anca se i gavea belche brusà tuti i libri, i demoni i seitea proar farghe mal. Alora, cossa i gavea de far? Paolo el ga dito a lori: “Ciapé el grande scudo dela fede, col qual podé finir fora tute le fresse ardenti del perverso.” (Efésios 6:16) Come un scudo el protege el soldado ntela guera, cossita la nostra fede la pol proteger noantri. Se pròpio se fidemo che Geovà el pol proteger noantri, alora si saremo boni resister a Sàtana e ai demoni. —Mateus 17:20.

16. Come podemo far ancora pi forte la nostra fede in Geovà?

¹⁶ Come podemo far ancora pi forte la nostra fede in Geovà? Gavemo de leser la Bìblia tuti i di e imparar a fidarse che Dio  el ne protege. Se noantri se fidemo del tuto in Geovà, Sàtana e i demoni no i sarà boni farne mal. —1 João 5:5.

17. Cossa pol anca proteger noantri dei demoni?

¹⁷ Che nantra cosa i gavea de far i Cristiani in Èfeso? Lori i vivea in una cità piena de demonismo. Par quela, Paolo el ga dito a lori: “Seité far orassion in tute le ocasion.” (Efésios 6:18) Lori i gavea de domandar a Geovà protession tuto el tempo. E noantri, cossa gavemo de far? Anca noantri semo drio viver in un mondo pien de demonismo. Par quela gavemo bisogno de domandar a Geovà protession e gavemo de doperar el So nome quando femo orassion. (Lesi Provérbios 18:10.) Se seitemo domandar a Geovà che el libere noantri de Sàtana, Geovà el risponderà ale nostre orassion. —Salmo 145:19; Mateus 6:13.

18, 19. (a) Come podemo vinser la guera che gavemo contra Sàtana e i demoni? (b) Che domanda risponderemo ntel pròssimo capìtolo?

¹⁸ Se ntela nostra vita se liberemo de tuto quel che l’è relassionà col demonismo e se fidemo che Geovà el ne protege, podemo resister a Sàtana e ai demoni. No ocore mia gaver paura de lori. (Lesi Tiago 4:7, 8.) Geovà l’è pi poderoso che i demoni. Lu li ga punidi nei giorni de Noè e nel futuro Lu ndarà finir fora con tuti lori. (Judas 6) No stà mia desmentegarte, no semo soli in questa guera. Geovà l’è drio doperar i so àngeli par proteger noantri. (2 Reis 6:15-17) Podemo esser sicuri che col aiuto de Geovà podemo vinser la guera che gavemo contra Sàtana e i demoni. —1 Pedro 5:6, 7; ­2 ­Pedro 2:9.

¹⁹ Ma se Sàtana e i demoni i causa tanto sofrimento, parché Dio no’l ga belche finio fora con lori? Risponderemo a sta domanda ntel pròssimo capìtolo.