1. Mwaha wa heeni ontthuneyaaya osuwela sa malaika?

ONNATTHUNEYA osuwela ekhaikhai woohima sa malaika. Mwaha wa heeni? Mwaha wooweera Yehova ontthuna weera nisuwele emusi awe. Nave Biblya onnitthana malaika okhala “anamwane a Muluku.” (Yobi 38:7 Tradução do Novo Mundo) Malaika anipaka eheeni? Vano malaika yaakhavihenre hayi atthu a khalai? Mahikhwaano malaika anaakhavihera hayi atthu? — Nwehe Enoota 8.

2. Malaika apakiwe nnaani? Ni malaika makavi apattuxinwe?

² Akolosi 1:16 onahima weera Yehova ampattuxakaru Yesu, “sòpattuxiwa sothesene wirimu ni vathi vava.” Nto eyo ennoonihera weera Yehova oroopattuxa malaika, khaiyono aroothatuwa. Moosuwela malaika makavi Yehova opattunxaawe? Biblya onnahima weera akhala malaika mantxipale. — Nsalmu 103:20; Apokalise 5:11.

3. Ebuukhu ya Yobi 38:4-7 NM enthaliha eheeni woohima sa malaika?

³ Ebuukhu ya Yobi 38:4-7 NM, enahima weera Yehova aapattuxa malaika ahinaaye opattuxa elapo ya vathi. Neereke malaika wahasivela omoona Yehova apakaka elapo ya vathi? Woohihovela waahasivela vantxipale. Ni malaika ootheene yaari oowiraana ni omwiiwelela Yehova. — Yobi 38:4-7 NM.

4. Ninsuwela hayi weera malaika annaapwattha atthu?

⁴ Biblya onahima weera malaika annisiveliwa vantxipale n’atthu. Awo, antthuna weera atthu ekhaleke nnene ntoko Yehova ontthunaawe ni elapo ya vathi. (Miruku 8:30, 31; 1 Pedru 1:11, 12) Malaika yaaripiwa murima vantxipale ewonakaru Adamu ni Heva, ekhoottaka omwiiwelela Yehova. Nave  awo anniripiwa murima, yaawoonaka atthu akina ekhoottaka omwiiwelela Muluku. Biblya onnahima weera malaika annitteeliwa murima yaawonaka atthu ettharuwaka soottheka saya, ni enatthikela omwiiwelela Yehova. (Luka 15:10) Malaika tho annaapwattha vantxipale akaporo a Yehova. Nto Yehova onnavarela muteko malaika weera yaathokororeke ni waakhavihera akaporo awe. (Aheberi 1:7, 14) Nrowe noone matakihero vakhaani.

5. Nvahe matakihero eri mBiblyani enoonihera weera arumeyi akhalayi yaakhaviheriwa ni malaika.

 ⁵ Yehova ahinaakuveene ohisa esidade ya Sodoma ni Gomora, owo aaruma malaika meeli weera yamukhavihere Lothi ni emusi awe weera etthaweleke ottayi. (Ephattuwelo 19:15, 16) Evinreene ehuhu, Mwene mmoha aalamula weera Daniyeli avonyeriwe nlitti yaakhala akharamu weera akhuuriwe. Mene khaakhuurinwe, “Muluku amurumihela ntxelo awe ni òwala iyano sa amwatto.” (Daniyeli 6:23 [6:22 NM]) Ntakihero nikina naari na murummwa Pedru. Owo eera atthukiweene, mene Yehova aaruma nlaika weera nimutaphule Pedru. (Miteko 12:6-11) Nave-tho Yesu aaraawe elapo ya vathi, aakhaviheriwa ni malaika. Mene ikwaha sa makhavihero ene yaawo, yaari ehuhu Yesu abatiziwakaru. (Marko 1:13) Nave evinreene emaara, nlaika nimoha naahoowa “ni ànamulipiha.” — Luka 22:43.

6. (a) Eheeni ontthuneyaaya ororomela weera malaika annaakavihera atthu a Muluku? (b) Makoho heeni ninrowaahu waakhula?

⁶ Mahikwaano malaika khenwa ntoko yawaaya khalayi. Mene nroromeleke weera malaika ennaakhavihera atthu a Muluku olelo va, mwaha wooweera Biblya onihima weera, Yehova onnavarihela muteko malaika weera yaakhavihere arumeyi awe. (Nsalmu 34:8 [34:7 NM]) Mwaha wa heeni ontthuneyaaya okhaviheriwa ni malaika? Nto awo annikhavihera moota heeni? Onnatthuneya okhaviheriwa ni malaika mwaha wooweera ninkhala eriyari yaamwiittani. Mohasuwela amwiittani ene yaawo? Weera niwere waakhula makoho ala, ontthuneya osuwela ele yaakhumelenle Yehova ampattuxakaru Adamu ni Heva.

7. Satana onipaka eheeni mahikwaano?

⁷ Muru wa  3 wa ebuukhu ela, woohima weera nookhala  nlaika nampittukuwenle Muluku ntthunaka olamula. Vano nlaika nno nneriwa Satana, Diabo. (Apokalise 12:9) Satana ontthuna weera atthu ehimwiiweleleke Muluku. Ti yeeyo yaamwerinhe omoototha Heva ni onnavireleliha owoototha atthu antxipale mahikwaano. Maxi aakhala atthu yaamwiwelenle Muluku mpaka okhwa, ntoko Habeli, Enokhi, ni Nowa. — Aheberi 11:4, 5, 7.

8. (a) Mademooniyu taani? (b) Mademoniyu yaapanke heeni weera ehikhwe ni epula yamirupi?

⁸ Aakhala malaika makina yaamutthanre Satana ehiyaka omwiiwelela Muluku. Biblya onniitthana malaika awo okhala mademooniyu. Nave mahiku a Nowa, yaakhala malaika yaakhumme wirimu enawa elapo ya vathi, enakhala ntoko atthu. Moosuwela etthu yawenlaaya? Biblya onahima weera, awo yaatthuna waathela athiyana. (Mmusome Ephattuwelo 6:2.) Mene malaika khiyapakeliwe othela. (Yuda 6) Nave atthu a elapo ya vathi yaatepa okhala oohiiwelela ni oowali. Nto Yehova, aalakela waanyaanya atthu oonanara murima. Elapo yootheene yaasareya maahi. Biblya onahima weera yaari epula yamirupi. Mene Yehova ahavuluxa akaporo awe owiiwelela. (Ephattuwelo 7:17, 23) Malaika ale weera ehikhwe ni epula yamirupi, yaatthikela wirimu. Nto yahakanyerana ni Diabo yoowo ori mutokweenaya. — Matheyo 9:34.

9. (a) Eheeni yakhumelenle mademooniyu etthikelakaru wirimu? (b) Vano ninrowa woona eheeni?

⁹ Eheeni yaakhumelenle mademooniyu etthikelakaru wirimu? Yehova khawakhulenle weera mademoniyu ale yaakanyerane neemusi awe. (2 Pedru 2:4) Mademooniyu awo khaniwera tho othatuwa weera ekhale atthu, ntoko yeenraaya khalai. Naamwi vareene hiiho, awo “anamotha a elapo yothene.” (Apokalise 12:9; 1 Yohani 5:19) Vano nrowe noone moota mademooniyu anaawokaaya atthu mahikwaano. — Mmusome 2 Akorinto 2:11.

10. Mademooniyu anvarela eheeni muteko weera ewototheke atthu?

¹⁰ Etthu mademooniyu anvarelaaya muteko weera yaawokeke atthu, ori onammunepani. Onammunepani ti heeni? Onammunepani mukhalelo atthu aneereraya wuuluma ni minepa soonanara. Atthu akina annipaka mukhalelo owo ehisuwelaka weera anuuluma ni mademooniyu. Aakhala atthu akina aniwera wuuluma ni mademooniyu. Mene akina, anrowa wakhulukano naari waanahako weera ewere wuuluma ni mademooniyu. Nto Biblya onnakhotthiha opaka etthu enivarihana ni mademooniyu. (Agalata 5:19-21) Onammunepani ori ntoko enyapwata. Yeeyo mulipa oomesera onihelelawe vapesani weera awarule ehopa. Nave mademooniyu anvarela muteko onammunepani weera ewoototheke atthu. — Nwehe Enoota 26.

11. Mwaha wa heeni waasa ehako oraaya etthu yoowopiha?

¹¹ Mukhalelo mukina woonammunepani ori waasa ihako. Atthu akina annitthuna osuwela itthu sinrowa weereya muhoolo evarelaka muteko iloola. Nave akina, anneerera otaphulela sooloha ni osoma mmatatani mwa mutthu itthu samuhoolo. Nto atthu antxipale anoona okhala itthu sooreera. Maxi iyo itthu sowopiha, mwa ntakihero, Biblya onihima weera mademooniyu anaavarela muteko atthu anaasa ihako. Miteko 16:16-18, onahima weera mwali mmoha anakhaviheriwa ni “munepa wa ehako” weera asuweleke itthu sa muhoolo. Emaara murummwa Paulo ikanraawe munepa ole wa ehako, mwali ole khaawera tho ohima itthu sa muhoolo.

12. (a) Eheeni oraaya woowopiha wuuluma ni alipa ookhwa? (b) Nto heeni akristu ahinkhaviheraaya sookhovelela munookhwani?

¹² Wookhala moota mukina mademooniyu anawokaya atthu. Mademooniyu antthuna weera atthu yuupuweleke weera alipa ookhwa annoona ni anniiwa. Nto awo  anniivuwiha weera atthu akumi anoowera waavekela etthu alipa ookhwa. Aakhala anahako akina, anahima weera atthu akumi anoowera wuuluma ni owoona muloolani alipa ookhwa. (1 Samuweli 28:3-19) Ti wowopiha wuuluma ni alipa ookhwa, mwaha wooweera emaara atthu anuulumaaya ni alipa ookhwa, khansuwela weera anuuluma ni mademooniyu. Biblya onnakhottiha wuuluma ni alipa ookhwa, mwaha wooweera awo khaaniwera onihasula naari onikhavihera. Tiyeeyo akristu eekhaikha ansepaya sookhovelela simpakiwa munookhwani. (Nsalmu 115:17) Nave mapuro makina atthu ennavela okhapurini, waala ifulori ni opaka isataka yaavahaka alipa ookhwa. Ahéé, akina tho ennapattiha iveela okhapurini. Mene makristu ekhaikhai khaanipaka sookhovelela iyo. Mwaha wooweera Muluku khantthuna weera atthu awe epakeke itthu sinvarihana ni Mademooniyu eyo tiyo onammunepani. Mukristu pooti weera amusi ni ale aattamannaweno, ohisuwela mwaha wa heeni ohinkhaviheraawe itthu iyo. Amusi ni atthu akina ennaanyeserera akristu opaka itthu iyo, yaakhottaka ennawitta. Pooti itthu iyo siweerelakani. Nto mwaatthunaka omusiveliha Muluku, muheerere wuuluma ni alipa ookhwa naari opaka itthu Biblya onkhottihaawe. — Mmusome Olaleya 18:10, 11; Yesaya 8:19 NM.

13. Atthu yaahaasuliwa ni mademooniyu yataphunwe hayi?

¹³ Ohiya waawoka atthu, mademooniyu-tho ennaahasula atthu. Nto veeli-veeli annavireleliha waahasula atthu. Mwaha wooweera, aasuwela weera Muluku khanrowa waahiya yaawo evirelelaka wahasula atthu. Mene ehuhu aya eneera emalaka. (Apokalise 12:12, 17) Atthu akina yannihasuliwa ni mademooniyu, maxi exutterakaru moota woowasepa, awo ari oottaphuwa ni khaniwoova-tho. Vano awo yaawenre hayi?

14. Entthuneya heeni weera nisempe waatanano ni mademooniyu?

¹⁴ Biblya onnahima etthu entthuneya opaka weera  naasepe mademooniyu. Mwa ntakihero, Biblya onnaaverenkela atthu yaakhalanne sookhovelela sa waatana ni mademooniyu ehaakunve okhala makristu. Atthu ene yaawo yaakhala epooma yeeriwa wEfeso. Vano yawenre hayi wiitaphula ni mikhalelo sene seiyo? Biblya onihima weera, “Ni tho antxipale akina a yale yaapaka miteko seiya sa maxitta, yaathukumanya yàwo ibuukhu saya ehisaka vamaithoni va atthu othene.” (Miteko 19:19) Atthu awo weera yiisempihe ni mademooni, wannitthuneya ohisa ibuukhu sakhavihera opaka maxitta. Vano olelova naatthunaka omurumeela Yehova, ontthuneya-tho ohisa naari opwexa itthu sinoonihera weera ti sa mademooniyu. Itthu iyo pooti okhala ibuukhu, irevista, itthuwo, iloola, mapaatiri, ni itxipo sa mirusi seiyo sinvariheliwa muteko weera mutthu iikhwimihe naari wiilipiha. Mene atthu akina onnasivela wuuluma sa maxitta. Mene pooti weera itthu iyo ti soohinanara ni sootthekulela paahi. Mene nihiisootothe. Itthu iyo sinnavarihana ni mademooniyu. — 1 Akorinto 10:21.

15. Nnawere hayi omusempa Satana ni mademooniyu awe?

¹⁵ Mademooniyu khayaahiyerenre oweerera atthu a wEfeso. Sivinreene iyaakha, makristu a wEfeso ehinseene ibuukhu saya sa maxitta, murummwa Paulo enre weera atthu a wEfeso nlelo yaakhalano ekhotto ni “minepa sonanara siri wirimu.” (Aefeso 6:12) Vano waatthuneya opaka eheeni mwaha wa ekhotto yaawanaaya? Murummwa Paulo ahimme weera “mukunxene ehuhu yothene exukudu yowiwelela” weera mwisakihe ni miraakho sa Satana ni mademooniyu. (Aefeso 6:16) Khalai, anakhotto yanniwara exukudu yaarowaka okhottoni weera yiisakihe. Emoharu, hiyo tho nintthuneya weera nikhaleno nroromelo ntoko exukudu. Nave nroromeleke weera Yehova ononthokorora. Nakhalano mikhalelo iya, nnoowera omusempa Satana ni mademooniyu awe. — Matheyo 17:20.

16. Nnilipihe hayi nroromelo nahu ni Yehova?

¹⁶ Nnalipihe hayi nroromelo nahu ni Yehova? Ontthuneya omusoma Biblya mahiku ootheene. Neera haawo, nnimoona  weera Yehova onoonilipiha ni omuroromela wahu onimwaatxeerereya. Vano nroromelo nahu nalipa, Satana ni mademooniyu khanrowa owera onihasula. — 1 Yohani 5:5.

17. Taani aneera awere onikhavihera osempa miraakho sa Satana?

¹⁷ Makristu a wEfeso yaatthuneya opaka eheeni? Wannitthuneya opaka etthu, mwaha wooweera epoma ele, atthu antxi yaapaka itthu sa maxitta. Nto Paulo ahaleela akristu weera onnitthuneya opaka mavekelo. (Aefeso 6:18) Aani, wannitthuneya ovekela nikhavihero wa Yehova ehuhu yootheene. Ekhaikhai weera hiyo tho ninkhala mahiku oowaatta alipa amirette. Mene onnitthuneya opaka mavekelo nromolaka nsina na Yehova weera anikhavihere. (Mmusome Miruku 18:10.) Nanvekela Yehova, ononikhavihera osempa miraakho sa Satana. — Nsalmu 145:19; Matheyo 6:13.

18, 19. (a) Ninrowa owina hayi ekhotto ninwanaahu ni Satana ni mademooniyu awe? (b) Nikoho heeni ninrowahu wakhula muru onittharelana?

¹⁸ Weera niwine ekhotto ninwanaahu ni Satana ni mademooniyu awe, ontthuneya osempa miraakho sootheene sinvarihana ni yaawo. Ni ontthuneya omuroromela Yehova. Nihooveke malaika oonanara eyo tiiyo, mademooniyu. (Mmusome Yakobe 4:7, 8.) Yehova, Muluku owera sootheene, owo ahattaruxa mademooniyu ehuhu ya Nowa, nave onrowa waanyaanya khuluyi. (Yuda 6) Ti woorera osuwela weera, khanikhanle meekhihu ninwana ni Satana. Yehova onnanikhavihera aavarelaka muteko malaika. (2 Mamwene 6:15-17) Aani, nroromeleke weera, nikhaviheriwaka ni Yehova, nnoowina ekhotto ninwanahu ni Satana ni madenooniyu awe. — 1 Pedru 5:6, 7; 2 Pedru 2:9.

¹⁹ Naamwi vareenne hiho, Satana onnahasula atthu. Vano heeni Muluku ohinimwiivaawe? Nikoho nna ninrowa waakhula muru onttharelana.