1. ¿Baʼax kʼaʼabéet k-kanik u maasil yoʼolal le ángeloʼoboʼ?

LE ÁNGELOʼOBOʼ táakaʼanoʼob ichil u familia Jéeoba. Le Bibliaoʼ ku yaʼalikeʼ «u paalal[oʼob] Dios» (Job 38:7, nota). Letiʼeʼ u kʼáat ka k-kʼaj óolt u familia. Chéen baʼaleʼ, ¿baʼax meyajil ku beetik le ángeloʼoboʼ? ¿Bix tu yáantiloʼob le máakoʼob úuchjeakiloʼ? ¿Jeʼel wa u yáantkoʼonoʼob bejlaʼeʼ? (Ilawil nota 8).

2. 1) ¿Máax beet le ángeloʼoboʼ? 2) ¿Jaytúuloʼob?

² Yáaxeʼ unaj k-ojéeltik máax beet le ángeloʼoboʼ. Colosenses 1:16, ku yaʼalikeʼ Jesús yáax beetaʼab tumen Jéeoba. Ka tsʼoʼokeʼ Dioseʼ tu beetaj «tuláakal le uláakʼ baʼaloʼob yanoʼob teʼ kaʼanoʼ bey xan le yanoʼob way luʼumeʼ». Ichiloʼobeʼ tiaʼan le ángeloʼoboʼ. ¿Jaytúuloʼob? Le Bibliaoʼ ku yaʼalikeʼ yaan u millonesil ángeloʼob (Salmo 103:20; Apocalipsis 5:11).

3. ¿Baʼax ku yaʼalik Job 38:4-7 yoʼolal le ángeloʼoboʼ?

³ Le Bibliaoʼ ku yaʼalik xaneʼ Jéeobaeʼ tu beetaj le ángeloʼob táanil tiʼ u beetik le Luʼumaʼ. ¿Bix tu yuʼubilubaʼob ka tu yiloʼob le Luʼumaʼ? U libroil Jobeʼ ku yaʼalikeʼ jach kiʼimakchaj u yóoloʼob. Junmúuchʼ u meyajtikoʼob kaʼach Jéeoba bey junpʼéel familiaeʼ (Job 38:4-7).

4. ¿Baʼaxten k-aʼalik le ángeloʼoboʼ u kʼáat u yáantoʼob wíinik?

⁴ Le ángeloʼoboʼ taak u yáantkoʼob wíinik, yéetel u kʼáat u yiloʼob bix kun béeytal baʼax u tukultmaj Dios utiaʼal wíinik yéetel le Luʼumaʼ (Proverbios 8: 30, 31; 1 Pedro 1:11, 12). Yaachaj u yóoloʼob ka tu yiloʼob maʼ tu yuʼubaj tʼaan Adán yéetel Evaiʼ. Bejlaʼeʼ maas ku yaatal u yóoloʼob tumen óoliʼ mix máak uʼuyik u tʼaan Jéeoba. Baʼaleʼ ku kiʼimaktal u yóoloʼob kéen u kʼex u tuukul máak yéetel kéen u kaʼa natsʼuba tiʼ Dios (Lucas 15:10). Jéeobaeʼ ku túuxtik le ángeloʼob utiaʼal u yáantik yéetel u kanáantik le máaxoʼob meyajtikoʼ (Hebreos 1:7, 14). Koʼox ilik bix u beetkoʼob.

5. ¿Bix áantaʼabik le máaxoʼob meyajt Dios úuchjeakil tumen le ángeloʼoboʼ?

 ⁵ Jéeobaeʼ tu túuxtaj kaʼatúul ángeloʼob u yáantoʼob Lot yéetel u láakʼtsiloʼob utiaʼal u púutsʼloʼob tiʼ u xuʼulsajil Sodoma yéetel Gomorra (Génesis 19:15, 16). Ka máan kʼiineʼ profeta Danieleʼ puʼul ichil leónoʼob, baʼaleʼ mix baʼal úuchtiʼ tumen «Dioseʼ tu túuxtaj juntúul u ángeleʼ ka tu makaj u chiʼ le leónoʼoboʼ» (Daniel 6:22). Juntéenjeak xaneʼ Jéeobaeʼ tu túuxtaj u ángel utiaʼal u jóoʼsik apóstol Pedro teʼ cárceloʼ (Hechos 12:6-11). Le ángeloʼoboʼ tu yáantoʼob xan Jesús le tiaʼan way Luʼumoʼ. Ka tsʼoʼok u yokjaʼeʼ «kanáantaʼab tumen le ángeloʼoboʼ» (Marcos 1:13). Táanil tiʼ u kíimil xaneʼ ‹líiʼsaʼab u yóol› tumen juntúul ángel (Lucas 22:43).

6. 1) ¿Baʼaxten k-aʼalik tak bejlaʼa jeʼel k-áantaʼal tumen le ángeloʼoboʼ? 2) ¿Baʼax kʼáatchiʼiloʼob ken k-núuke?

⁶ Bejlaʼeʼ maʼ tu chíikbeskuba le ángeloʼob tiʼ wíinikoʼ. Baʼaleʼ láayliʼ ku yáantkoʼob máaxoʼob meyajtik Dioseʼ. Le Bibliaoʼ ku yaʼalik: «U ángel Jéeobaeʼ ku kanáantik le máaxoʼob meyajtik Diosoʼ, letiʼ salvarkoʼob» (Salmo 34:7). Kʼaʼabéet k-kanáantaʼal, tumen yaan máaxoʼob jach yaan u páajtaliloʼob taak u beetkoʼobtoʼon loob. ¿Máaxoʼobiʼ? ¿Tuʼux u taaloʼob? ¿Bix jeʼel u beetkoʼobtoʼon loobeʼ? Utiaʼal k-ojéeltikeʼ koʼox ilik baʼax úuch le ka beetaʼab Adán yéetel Evaoʼ.

7. ¿Baʼax tsʼoʼok u beetik Satanás tiʼ óoliʼ tuláakal máak?

⁷ Tu yóoxpʼéel xookileʼ t-kaneʼ juntúul ángeleʼ tu tsʼáajuba tu contra Dios yéetel tu tsʼíiboltaj u gobernar. Teʼ Bibliaoʼ ku yaʼalaʼaltiʼ «Kʼaasilbaʼal wa Satanás» (Apocalipsis 12:9). Satanáseʼ u kʼáat ka u tsʼáauba uláakʼ  máakoʼob tu contra Dios. Tu tusaj Eva, yéetel desde teʼ kʼiin jeʼeloʼ tsʼoʼok u tusik óoliʼ tuláakal máak. Baʼaleʼ anchaj máaxoʼob chúukpaj u yóol u meyajtoʼob Jéeoba, jeʼex Abel, Enok yéetel Noé (Hebreos 11:4, 5, 7).

8. 1) ¿Bix suunajik demonioʼob le ángeloʼoboʼ? 2) ¿Baʼax tu beetaj le demonioʼob utiaʼal maʼ u kíimloʼob teʼ Búulkabaloʼ?

⁸ Tu kʼiiniloʼob Noéeʼ líikʼ jujuntúul ángeloʼob tu contra Dios, ka éemoʼob way Luʼum bey wíinikoʼobeʼ. ¿Baʼaxten? Le Bibliaoʼ ku yaʼalikeʼ taakchaj u yantal u yatanoʼob (xok Génesis 6:2). Baʼaleʼ maʼ unaj kaʼach u beetkoʼobiʼ (Judas 6). Jeʼex le kʼasaʼan ángeloʼoboʼ yaʼab máakoʼob tu beetoʼob xan baʼax kʼaas. Jéeobaeʼ tu taasaj junpʼéel búulkabal utiaʼal u xuʼulsik le kʼasaʼan máakoʼoboʼ, baʼaleʼ tu kanáantaj le máaxoʼob tu yuʼuboʼob tʼaanoʼ (Génesis 7:17, 23). Utiaʼal maʼ u kíimil le kʼasaʼan ángeloʼoboʼ suunajoʼob teʼ kaʼanoʼ. Teʼ Bibliaoʼ ku yaʼalaʼaltiʼob «demonioʼob» tumen tu yéeyoʼob Satanás bey u gobernanteʼobeʼ (Mateo 9:34).

9. 1) ¿Baʼax úuch tiʼ le demonioʼob ka suunajoʼob teʼ kaʼanoʼ? 2) ¿Baʼax ken k-il beoraaʼ?

⁹ Ka suunaj le ángeloʼob teʼ kaʼanoʼ Jéeobaeʼ maʼ tu chaʼaj u yantaloʼob ichil u paalaloʼobiʼ (2 Pedro 2:4). Kex le demonioʼob maʼ tu páajtal u kaʼa sutkubaʼob wíinikileʼ láayliʼ «táan u tus[koʼob] tuláakal yóokʼol kaa[beʼ]» (Apocalipsis 12:9; 1 Juan 5:19). Koʼox ilik bix u tuskoʼob máak (xok 2 Corintios 2:11).

10. ¿Bix u tuʼusul máak tumen le demonioʼoboʼ?

¹⁰ Le demonioʼoboʼ jejeláas bix u tuskoʼob máak. Yaan máakeʼ ku tratartik u tʼaan yéetel juntúul máax kimen. Le kéen u beet beyoʼ u jaajileʼ táan u tratartik  u tʼaan yéetel le demonioʼoboʼ. Yaan máak xaneʼ utiaʼal u tʼaan yéetel juntúul máax kimeneʼ ku bin yiknal juntúul j-meen wa juntúul máak ku tsʼaakankil yéetel u yáantaj le demonioʼoboʼ. Le Bibliaoʼ ku yaʼalik ka náachchajkoʼon tiʼ tuláakal baʼax yaan yil yéetel le demonioʼoboʼ (Gálatas 5:19-21). ¿Baʼaxten? Jeʼex u meyaj léechoʼob tiʼ juntúul máak utiaʼal u chukik juntúul baʼalcheʼeʼ, le demonioʼoboʼ ku meyajtiʼob tuusoʼob utiaʼal u táabskoʼob máak.

11. ¿Baʼax le jóoʼsaj suerteoʼ, yéetel baʼaxten maʼ unaj k-táakpajliʼ?

¹¹ Le jóoʼsaj suerteoʼ junpʼéel tuus ku meyaj tiʼ le demonioʼoboʼ. Leloʼ ku beetaʼal utiaʼal u yojéeltaʼal bin baʼax kun úuchul wa uláakʼ baʼaloʼob maʼ ojéelaʼaniʼ. Utiaʼal leloʼ ku meyaj horóscopo (le baʼax bin u kʼáat u yaʼal le estrellaʼoboʼ), sáastun, barajas, wa ku xoʼokol u táan u kʼab máak. Yaʼab máakeʼ ku tuklikeʼ maʼ kʼaas le baʼaloʼobaʼ. Baʼaleʼ teʼ Bibliaoʼ k-kanikeʼ yéetel demonioʼob ku meyaj máaxoʼob beetik baʼaloʼob beyaʼ. Hechos 16:16-18, ku yaʼalikeʼ juntúul x-chʼúupaleʼ ku yáantaʼal kaʼach tumen juntúul demonio u naʼat baʼax ku taal u kʼiin u yúuchul. Baʼaleʼ ka jóoʼsaʼab le demonio tiʼ tumen apóstol Pablooʼ xuʼul u beetik.

12. 1) ¿Baʼaxten maʼ unaj u tʼaan máak yéetel le kimenoʼoboʼ? 2) ¿Baʼaxten maʼatech u táakpajal máax meyajtik Dios tiʼ baʼax yaan yil yéetel le demonioʼoboʼ?

¹² Le demonioʼoboʼ u kʼáatoʼob xan ka k-creerteʼ jeʼel u béeytal k-tʼaan yéetel le kimenoʼoboʼ. U kʼáatoʼob ka k-tukleʼ láayliʼ kuxaʼan le máax tsʼoʼok u kíimiloʼ, jeʼel u tʼaan t-éeteleʼ, jeʼel u yáantkoʼoneʼ wa jeʼel u beetiktoʼon loobeʼ. Yaan máakeʼ kéen kíimik juntúul u láakʼtsileʼ ku kaxtik u yáantaj juntúul j-meen wa espiritista. Maʼ xaaneʼ le j-meenoʼ jeʼel u yaʼalik wa baʼax yoʼolal le kimenoʼ  wa jeʼel tak u kʼexik u voz utiaʼal ka uʼuyaʼak bey letiʼe kimen ku tʼaanoʼ (1 Samuel 28:3-19). Yaʼab tiʼ le baʼaxoʼob ku beetaʼal kéen kíimik máakoʼ ku beetaʼal tumen ku tuklaʼal láayliʼ kuxaʼaneʼ. Yaan kʼiineʼ ku tʼalkúuntaʼal u yoʼoch yóoʼ mesa, ku beetaʼal u biix, u novenaʼob wa uláakʼ baʼaloʼob. Máaxoʼob meyajtik Dioseʼ maʼatech u táakpajloʼob tiʼ baʼaloʼob beyaʼ, le oʼolal maʼ xaaneʼ u láakʼtsiloʼob wa u vecinoʼobeʼ ku kʼuuxiloʼob tu yéeteloʼob wa ku yaʼalikoʼob baʼal tiʼob. Máax meyajtik Dioseʼ u yojel xuʼulul ku beetik u kuxtal máak kéen kíimik. Maʼ tu páajtal k-tʼaan yéetel juntúul kimen; maʼ xan tu páajtal u yáantkoʼon, mix u beetiktoʼon loob (Salmo 115:17). Le oʼolaleʼ kanáantaba. Maʼ a tratartik a tʼaan yéetel le kimenoʼoboʼ, tumen wa ka beetkeʼ u jaajileʼ táan a tratartik a tʼaan yéetel le demonioʼoboʼ. Náachkuntaba tiʼ tuláakal baʼax yaan yil yéetel le demonioʼoboʼ (xok Deuteronomio 18:10, 11; Isaías 8:19; ilawil nota 25).

13. ¿Bix u yuʼubikuba bejlaʼa le máaxoʼob saajkoʼob kaʼach tiʼ le demonioʼoboʼ?

¹³ Le demonioʼoboʼ maʼ chéen ku tuskoʼob máakiʼ, ku jaʼasikoʼob xan u yóol. Satanás yéetel u demonioʼobeʼ jach pʼujaʼanoʼob tumen u yojloʼob «chéen junpʼíit kʼiin pʼaatal[tiʼob]» utiaʼal u beetkoʼob baʼax kʼaas way Luʼumeʼ; maʼ tun xáantaleʼ yaan u luʼsaʼaloʼob tumen Dios (Apocalipsis 12:12, 17). Yaʼab máakeʼ sajak kaʼach tiʼ le demonioʼoboʼ, baʼaleʼ bejlaʼeʼ maʼ saajkoʼobiʼ. ¿Baʼaxten?

14. ¿Bix jeʼel k-náachtal tiʼ le demonioʼoboʼ?

¹⁴ Le Bibliaoʼ ku yaʼalik bix jeʼel k-kanáantikba yéetel bix jeʼel k-náachkuntikba tiʼ le demonioʼoboʼ. Teʼ yáax siglooʼ jujuntúul tiʼ u kajnáaliloʼob Éfesoeʼ táanil tiʼ u  káajal u meyajtikoʼob Dioseʼ ku tʼaanoʼob kaʼach yéetel le demonioʼoboʼ. ¿Bix úuchik u náachtaloʼob tiʼob? Le Bibliaoʼ ku yaʼalik: «Yaʼab tiʼ le máaxoʼob ku beetik kaʼach u j-meeniloʼoboʼ tu muchʼkíintaj u libroʼobeʼ ka tu tóokoʼob tu táan tuláakal» (Hechos 19:19). Tumen u kʼáat u tsaypachtoʼob Cristoeʼ tu láaj tóokaj u libroʼob yaan yil yéetel j-meenil. Bejlaʼa xaneʼ tuláakal le máax u kʼáat u meyajt Jéeobaoʼ unaj u pʼatik tuláakal baʼax yaan yil yéetel le demonioʼoboʼ. Ichil le baʼaloʼobaʼ táakaʼan libroʼob, revistaʼob, horóscopoʼob, películaʼob, paaxoʼob, videojuegos, fotoʼob, bey xan le nuʼukuloʼob ku tuklaʼal ku kanáantkoʼob máak utiaʼal maʼ u beetaʼal kʼaas tiʼoʼ (1 Corintios 10:21).

15. ¿Baʼax unaj k-beetik utiaʼal k-kanáantikba tiʼ Satanás yéetel u demonioʼoboʼ?

¹⁵ Ka máan wa jaypʼéel jaʼab u tóok u libroʼob le éfesoiloʼoboʼ apóstol Pabloeʼ tu yaʼalaj láayliʼ táan u baʼateloʼob tu contra le demonioʼoboʼ (Efesios 6:12). Kex tu tóokaj u libroʼobeʼ láayliʼ taak u beetaʼal kʼaas tiʼobeʼ. ¿Baʼax uláakʼ túun unaj u beetkoʼob? Apóstol Pabloeʼ tu yaʼalajtiʼob: «Chʼaʼex u nojoch escudoil le fejoʼ utiaʼal ka páajchajak a tupikeʼex tuláakal u tʼabaʼan flechaʼob le Kʼaasilbaʼaloʼ» (Efesios 6:16). Jeʼex junpʼéel escudo kanáantik juntúul soldadoeʼ, le fejoʼ jeʼel u kanáantkoʼon tiʼ le demonioʼoboʼ. Unaj k-kʼubik k-óol tiʼ Jéeoba utiaʼal ka u kanáantoʼon tiʼ Satanás yéetel le demonioʼoboʼ (Mateo 17:20).

16. ¿Bix jeʼel u maas yantal k-fe tiʼ Jéeobaeʼ?

¹⁶ ¿Bix jeʼel u maas yantal k-fe tiʼ Jéeobaeʼ? Unaj k-xokik sáamsamal le Bibliaoʼ yéetel unaj k-kʼubik k-óol tiʼ Dios. Wa muʼukʼaʼan k-fe tiʼ Jéeobaeʼ maʼ tun  beetbiltoʼon kʼaas tumen Satanás mix tumen le demonioʼoboʼ (1 Juan 5:5).

17. ¿Baʼax unaj k-beetik utiaʼal k-kanáantikba tiʼ le demonioʼoboʼ?

¹⁷ Le cristianoʼob yanoʼob kaʼach Éfesooʼ yanchaj u beetkoʼob uláakʼ baʼal. Letiʼobeʼ kajaʼanoʼob kaʼach tuʼux jach yaan j-meenil, le oʼolal apóstol Pabloeʼ tu yaʼalajtiʼob kʼaʼabéet u oraroʼob «tiʼ jeʼel baʼalak súutukileʼ» (Efesios 6:18). Mantatsʼ unaj u kʼáatkoʼob ka kanáantaʼakoʼob tumen Jéeoba. Bejlaʼa xaneʼ yaʼab u beetaʼal baʼaloʼob yaan yil yéetel le demonioʼoboʼ. Le oʼolal unaj k-kʼáatik tiʼ Jéeoba ka u kanáantoʼon yéetel unaj k-aʼalik u kʼaabaʼ kéen orarnakoʼon (xok Proverbios 18:10). Wa mantatsʼ k-kʼáatik tiʼ Jéeoba ka u kanáantoʼon tiʼ Satanáseʼ, Jéeobaeʼ yaan u beetik (Salmo 145:19; Mateo 6:13).

18, 19. 1) ¿Bix jeʼel k-tsʼáanchaʼatik Satanás yéetel le demonioʼoboʼ? 2) ¿Baʼax kʼáatchiʼil kun núukbil tuláakʼ xookoʼ?

¹⁸ Wa k-náachkuntikba tiʼ tuláakal baʼax yaan yil yéetel le demonioʼob bey xan wa k-kʼubik k-óol tiʼ Jéeobaeʼ maʼ kun beetbiltoʼon kʼaas tumen Satanás yéetel le demonioʼoboʼ. Maʼ unaj k-sajaktal tiʼobiʼ (xok Santiago 4:7, 8). Jéeobaeʼ maas yaan u páajtalil tiʼ letiʼob. Tu kʼiiniloʼob Noéeʼ, tu castigartoʼob yéetel yaan u kʼuchul u kʼiinil u jach xuʼulskoʼob (Judas 6). Kʼaʼajaktecheʼ maʼ ta juunal yanechiʼ. Jéeobaeʼ yaan u kanáantkech yéetel u ángeloʼob (2 Reyes 6:15-17). Yéetel u yáantaj Jéeobaeʼ yaan k-tsʼáanchaʼatik Satanás yéetel le demonioʼoboʼ (1 Pedro 5:6, 7; 2 Pedro 2:9).

¹⁹ Tsʼoʼok k-kanikeʼ Satanás yéetel le demonioʼoboʼ táan u beetkoʼob kʼaas tiʼ wíinik. Le oʼolal maʼ xaaneʼ k-tuklik: «¿Baʼaxten maʼ xuʼulsaʼakoʼob tumen Diosiʼ?». Le kʼáatchiʼaʼ yaan u núukaʼal tuláakʼ xookoʼ.