1, 2. Mɔgɔ caaman b’u yɛrɛ ɲininga mun lo la?

DUGUKOLO yɛrɛyɛrɛla kɔgɔji kɔnɔ ani jii woyora ka dugu dɔ halaki. Cɛɛ dɔ ye marifa ci legilizi kɔnɔ ka mɔgɔ caaman faga ani ka dɔw mandimi. Kansɛri bana ye muso dɔ faga ka denmisɛn duuru to a kɔ.

² Balawow wala gwɛrɛgwɛrɛko nunu ɲɔgɔn mana kɛ, mɔgɔ caaman b’u yɛrɛ ɲininga ko: “Mun na sa?” U t’a lɔn fɛɛn min kama mɔgɔw be ɲɔgɔn kɔniya ten ani tɔɔrɔkow ka ca duniɲa kɔnɔ. I ma deli k’i yɛrɛ ɲininga o la wa?

3, 4. a) Abakuki ye ɲiningali jumanw lo kɛ? b) Jehova y’a jaabi cogo di?

³ Bibulu b’a fɔ ko cɛɛ dɔw y’o ɲiningaliw ɲɔgɔn kɛ hali k’a sɔrɔ u tun limaniyanin lo Ala la kosɔbɛ. Ɲɛyirali fɛ, kira Abakuki ye Jehova ɲininga ko: “Mun na i b’a to ne ɲaa be la tilenbaliyakow kan? Mun na i be sɔn kojugu ka kɛ i ɲana? Ne te foyi yera ni benkanni ani fariyakow dama tɛ! Kɛlɛw be kɛra, bɛnbaliya ka ca.”—Abakuki 1:3.

⁴ Abakuki 2:2, 3 b’a yira ko Ala ye Abakuki jaabi ani a y’a fɔ ko ale bena o koow ɲɛnabɔ. Jehova be adamadenw kanu kosɔbɛ. Bibulu b’a fɔ ko: “A be janto aw la.” (1 Piyɛri 5:7). Tiɲɛn na, ka mɔgɔw ye u be tɔɔrɔla, o ka gwo Ala ye ka tɛmɛ an kan (Ezayi 55: 8, 9). N’o lo, an k’a filɛ mun na tɔɔrɔ ka ca duniɲa kɔnɔ ten.

5. Diinan kuntigi caaman be mun lo fɔ tɔɔrɔw koo la? Bibulu be mun lo fɔ o koo la?

⁵ Tuma caaman na, diinan kuntigiw ani karamɔgɔ dɔw b’a fɔ ko adamadenw ka tɔɔrɔ ye Ala ka latigɛ ye. Mɔgɔ dɔw fɛ, koo o koo be mɔgɔ sɔrɔ, hali gwɛrɛgwɛrɛkow, Ala lo kɔnna k’u bɛɛ latigɛ ani an tɛ se k’o koo faamu. Dɔ wɛrɛw b’a fɔ ko mɔgɔw be sa, hali denmisɛnw fana, walisa ka taga to ni Ala ye sankolo la. Nka, o tɛ tiɲɛn ye. Jehova tɛ kojugu kɛ fewu. Bibulu b’a fɔ ko: “Ka kojugu kɛ, o miiriya ka jan Ala la. Ka kodagabali kɛ, o miiriya ka jan Setigi la.”—Zɔbu 34:10.

6. Tɔɔrɔko minw bɛɛ be kɛ duniɲa kɔnɔ, mun na mɔgɔ caaman be Ala jalaki o la?

⁶ Tɔɔrɔko minw bɛɛ be kɛ duniɲa kɔnɔ, mɔgɔ caaman be Ala jalaki o la sabu u b’a miiri ko Ala lo be duniɲa nin marala. Nka, an y’a ye kalansen 3nan na ko mɔgɔ min be duniɲa nin marala tiɲɛn tiɲɛn na, o ye Sutana Naafigi lo ye.

7, 8. Mun na tɔɔrɔ ka ca duniɲa kɔnɔ ten?

⁷ Bibulu b’a fɔ an ye ko: “Diɲɛ bɛɛ bɛ Sitanɛ fanga kɔrɔ.” (1 Zan 5:19, ABM). Sutana do ka jugu ani a ka fari. A be “dugukolo kan mɔgɔw bɛɛ lafili.” (Yirali 12:9, ABM). Mɔgɔ caaman be ale lo ladegi. O lo y’a to duniɲa fanin be ngalontigɛ, kɔniya ani fariya koow la.

⁸ Duniɲa fanin be tɔɔrɔkow la koo wɛrɛw kosɔn. Adama ni Awa ka murutili kosɔn, u deenw jurumutɔ wolola. Jurumu kosɔn, adamadenw be tɔɔrɔ la u mɔgɔɲɔgɔn kan. Tuma caaman na, u b’a fɛ k’u  yɛrɛ fisaya ka tɛmɛ tɔɔw kan. U be kɛlɛ kɛ ani u be tɔɔw niin tɔɔrɔ (Waajulikɛla 4:1; 8:9). Tuma dɔw la, mɔgɔw be tɔɔrɔ sabu “barinako” dɔ ye u sɔrɔ (Waajulikɛla 9:11). Kasara be se k’u sɔrɔ sabu u be yɔrɔ min na ani wagati min na, o man ɲi.

9. Jehova b’a to tɔɔrɔkow ka kɛ. Mun na an lanin b’a la ko kuun b’o la?

⁹ Jehova tɛ mɔgɔ tɔɔrɔ abada. Marifakɛlɛw, nintɔɔrɔ ani fariyako minw be duniɲa kɔnɔ, u si tɛ ale nɔɔ ye. Balawo minw be kɛ i n’a fɔ dugukoloyɛrɛyɛrɛ, sanfɔɲɔba ani sanjiba minw be tiɲɛni kɛ, u tɛ Ala nɔɔ ye. N’a sɔrɔ i b’i yɛrɛ ɲininga ko: ‘Ni Jehova ye Sebagayabɛɛtigi ye, mun na a tɛ o balawokow bali?’ An b’a lɔn ko Ala b’a janto an na sɔbɛ la. O kama, n’a b’a to tɔɔrɔkow ka kɛ, kuun b’o la.—1 Zan 4:8.

10. Sutana ye Jehova ka kuntigiya sɔsɔ cogo di?

¹⁰ Sutana ye Adama ni Awa lafili Edɛn nankɔtu kɔnɔ. A ye Ala jalaki ko a tɛ Kuntigi ɲuman ye. A ko Ala be Adama ni Awa jɛn fɛɛn ɲuman dɔ la. Sutana tun b’a fɛ u k’a miiri ko ale ka kuntigiya bena fisaya ni Jehova ta ye ani ko u mako tɛ Ala la.—Zɛnɛzi 3:2-5; kunnafoni wɛrɛw lajɛ, 27nan.

11. An mako be ɲiningali jumanw jaabili la?

¹¹ Adama ni Awa murutira Jehova ma. Min ka ɲi ani min man ɲi, u tun b’a miiri ko joo b’u fɛ k’o latigɛ u yɛrɛ ma. Jehova tun bena a yira cogo di ko joo t’o mɔgɔ murutininw fɛ? Min ka fisa an ma, a tun bena a yira cogo di ko ale lo b’o lɔn?

12, 13. a) Mun na Jehova ma sin ka mɔgɔ murutininw halaki? b) Mun na Jehova y’a to Sutana ka kɛ duniɲa nin kuntigi ye ani adamadenw k’u yɛrɛ mara?

 ¹² Jehova ma sin ka Adama ni Awa halaki. A yɛrɛ y’a to u ye deenw sɔrɔ. O kɔ, a y’a to Adama ni Awa kɔmɔgɔw k’a sugandi u b’a fɛ ka tugu mɔgɔ min ka kuntigiya kɔ. Jehova sagonata tun ye ko mɔgɔ dafaninw ka dugukolo fa. Sutana tun mana a kɛ cogo o cogo, Ala sagonata tun bena dafa.—Zɛnɛzi 1:28; Ezayi 55:10, 11.

¹³ Sutana ye Jehova sɔsɔ mɛlɛkɛ miliyɔn caaman ɲɛɛ na (Zɔbu 38:7; Yirali 5:11). O kama, Jehova ye wagati to Sutana ye a k’a yira n’a ka sɔsɔli kumaw ye tiɲɛn ye. A fana ye wagati to adamadenw ye u k’u yɛrɛ ka gofɛrɛnɛmanw sigi k’u to Sutana ka fanga kɔrɔ. O la, u tun bena a yira ni u be se k’u yɛrɛ mara ka ɲɛ ni Ala m’u dɛmɛ.

14. Mun lo yirala ka gwɛ?

¹⁴ Saan waa caaman kɔnɔ, adamadenw y’a ɲini k’u yɛrɛ mara, nka u dɛsɛra. A yirala ka gwɛ ko Sutana ye ngalontigɛla ye. Adamadenw mako gwɛlɛ be Ala ka dɛmɛ na. Tiɲɛn tun be kira Zeremi fɛ k’a fɔ ko: “Masaba, ne y’a lɔn ko see te adamaden ye ka se k’a yɛrɛ ka koo latigɛ, o t’a ka koo ye.”—Zeremi 10:23.

15, 16. a) Mun na Jehova y’a to tɔɔrɔw be kɛra kabi wagatijan? b) Sutana ye gwɛlɛya minw lase an ma, mun na Jehova m’u ɲɛnabɔ?

¹⁵ Mun na Jehova y’a to tɔɔrɔw be kɛra kabi wagatijan? Ani mun na a tɛ kojuguw bali u ka kɛ? A ye wagati to walisa bɛɛ k’a ye ko Sutana ka  kuntigiya ma foyi ɲɛ. Adamadenw ye gofɛrɛnɛman sifaw bɛɛ kɛ k’a filɛ, nka u si ma ɲɛ u bolo. U ye ɲɛtaga sɔrɔ lɔnnikow la, nka tilenbaliya, fantanya, kojugukɛ, ani marifakɛlɛ juguyara sisan ka tɛmɛ fɔlɔ kan. An tɛ se k’an yɛrɛ mara ka ɲɛ ni Ala ma an dɛmɛ.

¹⁶ Sutana ye gwɛlɛya minw lase an ma, Jehova m’u ɲɛnabɔ. N’a tun y’o kɛ, a tun bena kɛ komi a be Sutana dɛmɛna a ka kuntigiya la. Ala tɛna o kɛ abada. Adamadenw fana tun bena a miiri ko u be se k’u yɛrɛ mara ka ɲɛ. Nka, o tɛ tiɲɛn ye. Ala do tɛ se ka kɛ ngalontigɛlaw jɛnɲɔgɔn ye. A tɛ ngalon tigɛ abada.—Eburuw 6:18.

17, 18. Jehova bena mun lo kɛ ka Sutana ka tiɲɛnikow bɛɛ lalaga?

¹⁷ Sutana ni adamadenw ka murutiliko nana ni tiɲɛni minw bɛɛ ye, yala Jehova be se k’u lalaga wa? Ɔnhɔn, a be se. Ala tɛ dɛsɛ foyi la. Sutana ka sɔsɔli kumaw bɛɛ bena ɲɛnabɔ a ɲɛɛ ma tuma min na, Jehova b’o lɔn. O kɔ, a bena dugukolo kɛ alijɛnɛ ye i ko a tun b’a fɛ cogo min na. A y’a hakili to mɔgɔ sanin minw bɛɛ la, a bena olu kunu (Zan 5:28, 29). Mɔgɔw tɛna bana wala ka sa tugun abada. Sutana ye tiɲɛni minw bɛɛ kɛ, Yezu bena u bɛɛ lalaga. Jehova bena tɛmɛ Yezu fɛ ka “Sutana ka kɛwaliw cɛn.” (1 Zan 3:8). An be Jehova waleɲuman lɔn sabu a muɲuna an kɔrɔ. O b’a to an be se k’a lɔn ani k’a latigɛ ko ale lo ka kɛ an Kuntigi ye (2 Piyɛri 3:9, 10 kalan). Hali n’an be tɔɔrɔla, a b’an dɛmɛ ka muɲuli kɛ.—Zan 4:23; 1 Korɛntikaw 10:13 kalan.

¹⁸ Jehova t’an waajibiya k’ale kɛ an Kuntigi ye. A ye  see di an ma an ka koow latigɛ an yɛrɛ ma. O ye nilifɛn nafaman ye. An k’a filɛ o kɔrɔ ye min ye an fɛ.

19. Jehova ye nilifɛn nafaman juman lo di an ma? Mun na an ka ɲi ka Jehova waleɲuman lɔn o kosɔn?

¹⁹ Jehova ye see di an ma an ka koow latigɛ an yɛrɛ ma. O nilifɛn nafaman b’a to an be dan na bɛgɛnw na. Bɛgɛnw be koow kɛ u kunfɛ. Nka, an be se k’a latigɛ an bena an ka ɲɛnamaya kɛ cogo min na. An be se k’a latigɛ fana n’an b’a fɛ k’an koo diya Jehova ye (Talenw 30:24, NW). An fana tɛ komi mansinw. Olu dilanna baara min kama, u b’o dɔrɔn lo kɛ. An b’a fɛ ka kɛ mɔgɔ sifa min ye, ka mɔgɔ minw kɛ an teriw ye ani ka min kɛ an ka ɲɛnamaya kɔnɔ, an yɛrɛ lo be se k’o latigɛ. Jehova b’a fɛ an ka ɲɛnamaya diyabɔ.

20, 21. I be se ka koo fisaman juman lo latigɛ sisan?

²⁰ Jehova b’a fɛ an k’ale kanu (Matiyo 22:37, 38). A be komi denfa. Ni mɔgɔ ma deen waajibiya, nka ale yɛrɛ y’a fɔ a faa ye ko “i koo ka di n’ ye,” o ka di a faa ye. Jehova y’a to an yɛrɛ lo k’a latigɛ n’an bena ale sago kɛ wala n’an tɛna o kɛ. Sutana, Adama ani Awa y’a latigɛ ka ban Jehova la. Jehova ye see min di an ma walisa an ka koow latigɛ an yɛrɛ ma, ele bena mun lo kɛ n’o ye?

²¹ See min dira i ma ka koow latigɛ i yɛrɛ ma, baara kɛ n’o ye ka Jehova sago kɛ. Mɔgɔ miliyɔn caaman y’a latigɛ k’u koo diya Jehova ye ani ka ban Sutana la (Talenw 27:11). Sisan, e be se ka mun lo kɛ walisa ka don Ala ka duniɲa kura kɔnɔ? O yɔrɔ la, tɔɔrɔw bɛɛ bena ban. Kalan nata bena kuma o koo la.