1, 2. ¿Kasa jülüjaka saaʼin wainma wayuu sutuma jouluin tü kasa mojusükat?

EESÜ waapawaire süchiki sajaʼlajaain wanee pueulo sutuma süsetüin tü palaakat, eesü waapüle nüchiki wanee wayuu oʼunaʼalakai saaʼin wainma wayuu suluʼukana wanee iküleesia. Jee shiale waapüin süchiki outuin wanee wayuu sutuma cáncer jee süpütüin jaʼraishii süchonniichein.

² Sülatüle kasa mojusü makat aka saaʼin tia, eeshii na wayuu jülüjakana aaʼin tüü: «¿Jamüsüche joutka müliaa?». ¿Eeirü jülüjain paaʼin jamüin müliaka maʼin wayuu maaʼulu?

3, 4. (1) ¿Jamüsü nünüiki Habacuc nümüin Jeʼwaa? (2) ¿Kasa nüküjaka Jeʼwaa nümüin Habacuc?

³ Aküjünüsü suluʼu tü Wiwüliakat nachiki waneinnua wayuu aʼyataapuʼukana nümüin Jeʼwaa shapaakana aaʼin sutuma tü kasa mojusü alatakat. Eejachi wanee nünüikimaajachi Maleiwa kanüliakai Habacuc, müshi nia nümüin Jeʼwaa: «¿Jamüshikai piyüülajaka taya sünain anajaa saaʼu kasa mojusü? ¿Jamüshi puuʼulaaka teʼrüin müliain wayuu atumawaa? Aʼülüjiraasü jee atkaajiraasü neʼe wayuu jalapünaa yaa» (Habacuc 1:3).

⁴ Saashin tü Wiwüliakat asoutushi Jeʼwaa nümüin Habacuc jee nüküjain nümüin nunouteʼerüinjatüin sukuwaʼipa tü kasa alatakat (Habacuc 2:2, 3). Aishaatasü wayuu nüpüla Jeʼwaa. Saashin tü Wiwüliakat kachipünaashii waya naaʼin (1 Pedro 5:7, TNM). Eesü aire wamüin weʼrüle müliain wayuu, nialeekajaʼa nnojoleematüin alin nümüin Maleiwa sümüliala wayuu (Isaías 55:8, 9). Müleje shia, ¿jamakaʼa joutka maʼin müliaa? Wekirajaa sünain tia.

5. (1) ¿Jamüsü sülataka kasa mojusü naashin na shikiipüʼükana tü iküleesiakalüirua? (2) ¿Jamüsü sünüiki tü Wiwüliakat süchiki tia?

⁵ Naashin noʼutku na shikiipüʼükana tü iküleesiakalüirua  eesü anale jee mojule nukuwaʼipa wanee wayuu süka alejatia neʼe tia nutuma Maleiwa. Eeshii na makana matüjaaju aaʼu tü naaʼinrakat Maleiwa. Outule wanee wayuu jee niale wanee joʼuu: «Nümaashi nia Maleiwa sirumatuʼumüin süka choʼujaain nia nümüin chayaa», müshii naya. Alawaapejeʼe tia münakat, nnojoishi niain Maleiwa kasirüin tü kasa mojusü alatakat sümüin wayuu. Müsü sünüiki tü Wiwüliakat: «Nnojorüleejaʼa süpüla naaʼinrüinjatüin chi Maleiwa shiimainshikai wanee kasa mojusü süka lotuin maʼin nukuwaʼipa sümüin wayuu» (Job 34:10).

6. ¿Jamüshi niaka Maleiwa kasirüin tü kasa mojusü alatakat saaʼu tü Mmakat saashin wainma wayuu?

⁶ Wainma na wayuu makana niain Maleiwa kasirüin tü kasa mojusü alatakat saaʼu tü mmakat süka niain chi aluwataakai saaʼu. Wekirajaapejeʼe anain suluʼu ekirajaaya 3 niain Satanaa chi aluwataakai saaʼu tü wayuukalüirua sainküin mmakat.

7, 8. ¿Jamüsü joutka maʼin müliaa sainküin mmaka?

⁷ Müsü sünüiki tü Wiwüliakat: «Tü wayuu manoujainsatkalüirua suluʼu mmakat süpüshua, nia aluwataaka saaʼu chi Yolujaakai» (1 Juan 5:19). Nia Satanaa aluwataaka saaʼu wayuu sainküin mmakat, mojulaashi nia otta anasü nümüin aaʼinraa kasa mojusü. Nia «chi eʼikeʼerakai wayuu sainküin mmakat süpüshua» (Alateetkat Mapeena [Apocalipsis] 12:9). Watta saalii wayuu ashataka nukuwaʼipa Satanaa. Tia shia tü palajatkat kasa eeka atuma kasa mojusü, müsüjeseʼe mojulaain maʼin tü wayuukalüirua otta shimeejünüin wayuu maaʼutpünaa.

⁸ Wekirajaa sünain tü piamaka kasa müliakalü atuma wayuu. Kaainjalashi Adán sümaa Eva nuulia Maleiwa, jee sükajee kaainjalain Adán, oʼttüsü wayuu ütamüinreʼeya sünain kaainjalaa. Süka kaleʼeruʼuin kaainjalaa wayuu süpüshuaʼa, wainma na mojulaakana otta müliasü wayuu natuma. Eesü wayuu anaka amüin nayainjanain alanaʼaleein noulia na waneinnua, müshiijeseʼe natkaain otta müliain na waneinnua natuma (Eclesiastés 4:1; 8:9). Tü apünüinkat kasa eeka atuma müliaa, shia «sülatalaʼa sümüle wanee kasa nümüin wanee wayuu» (Eclesiastés 9:11). Tia maluʼulu eein süpüla sülatüin wanee kasa mojusü  wamüin mayaainjeʼe nnojoluin wachajaʼalaain shia, alatalaʼa müsü neʼe.

9. ¿Jamüsü mojuka nümüin Maleiwa müliain wayuu?

⁹ Nnojoishi niain kasirüin Jeʼwaa tü kasa mojusü alatakat saaʼu tü Mmakat maʼaka saaʼin tü atkawaakat, tü eʼraakat wayumüin otta tü kasa mojusü aainjünakat sümüin wayuu. Nnojoishi niain kasirüin sukutkujaain tü mmakat, eein wanee wawai otta süsetüle tü palaakat suluʼumüin wanee pueulo. Eesüjaʼa süpüla jülüjain paaʼin jamüin nuuʼulaaka Maleiwa sülatüin kasa mojusü eereje pülain maʼin nia. Watüjaa aaʼu alin maʼin waya nüpüla Jeʼwaa otta nnojotsü anain nümüin weʼrüinjatüin wamüliala (1 Juan 4:8). Aireje maʼin wayuu nüpüla Maleiwa, ¿jamakaʼa nuuʼulaaka sülatüin kasa mojusü?

10. ¿Kasa nüküjaka Satanaa nüchiki Jeʼwaa?

¹⁰ Suluʼu tü apainkat Edén, nüküjain Satanaa naʼalain nümüin Adán sümaa Eva. Nnojoishi anain Jeʼwaa süpüla aluwatawaa saaʼu wayuu naashin otta nüküjain nuunjulajüin Maleiwa süchiki wanee kasa anasü noulia na wayuukana. Shia keeʼireeka naaʼin Satanaa nüneekünüinjachin sutuma wayuu süpüla aluwatawaa naaʼu, nnojoishi anain Maleiwa süpüla oʼuniraa nakuwaʼipa na wayuukana naashin (Génesis 3:2-5). (Paashajeʼera noota 26).

11. ¿Jarat tü pütchi wasoutajatkalü eʼipajee?

¹¹ Moonooinsalii Adán sümaa Eva sümaa nünüiki Jeʼwaa otta eʼrüliijaashii naya wayumüin. Alaülaajaashii naya saaʼu nakuwaʼipa namüiwaʼa. ¿Kasache naaʼinrajatka Jeʼwaa süpüla sütüjaanüin aaʼu mojuin tü kasa nüneekakat Adán sümaa Eva? ¿Kasa naaʼinrajatka Jeʼwaa süpüla sütüjaanüin aaʼu niain neʼe niakai anakai süpüla oʼuniraa wakuwaʼipa?

12, 13. (1) ¿Jamüshii nnojoliikana najaʼttiramaatüin Jeʼwaa Adán sümaa Eva? (2) ¿Jamüsü nuuʼulaaka Jeʼwaa naluwanaajiraain na wayuukana saaʼu nakuwaʼipa namüiwaʼa otta nuluwataain Satanaa saaʼu wayuu sainküin mma?

¹² Shia keeʼireetüjütkalia naaʼin Maleiwa paʼaraiisüinjatüin  tü Mmakat otta jouluinjanain na nooʼuliwoʼukana Adán sümaa Eva. Nikeraajeerü Jeʼwaa tü keeʼireekat naaʼin jaʼitairü kasain naainjain Satanaa (Génesis 1:28; Isaías 55:10, 11). Müshijeseʼe nnojoluin najaʼttiramaatüin Adán sümaa Eva, nuuʼulaain naya süpüla kachooinjanain naya. Nayasaʼa na nuuʼuliwoʼukana Adán, eeshii süpüla naneeküin jaralinjachin aluwataain naaʼu, niale Jeʼwaa niataapa Satanaa.

¹³ Nüküjain Satanaa noʼupala napüshuaʼa na aapieekana nnojoluin anain Jeʼwaa süpüla aluwatawaa (Job 38:7; Daniel 7:10). Nuuʼulaain Jeʼwaa nuluwataain Satanaa süpüla sütüjaanüin aaʼu alawaain tü nümakat. Alatüsü wainma juya sünain naluwanaajiraain na wayuukana saaʼu nakuwaʼipa namüiwaʼa otta nuluwataain Satanaa saaʼu tü Mmakat. Suluʼujee tia, atüjaanajatü aaʼu aneerüle sukuwaʼipa wayuu sutuma nayoutuin Maleiwa süpüla aluwatawaa naaʼu.

14. Süka kakaliainnain na wayuukana sünain naluwanaajiraain saaʼu nakuwaʼipa namüiwaʼa, ¿kasa atüjaanüitpaka aaʼu?

¹⁴ Kakaliainna maʼin na wayuukana sünain naluwanaajiraain saaʼu nakuwaʼipa namüiwaʼa, mojupejeʼe maʼin nakuwaʼipa sünainjee tia. Suluʼujee tia, atüjaanüitpa aaʼu alawaain neʼe tü nümakat Satanaa otta niain neʼe Maleiwa anaka süpüla oʼuniraa sukuwaʼipa wayuu. Shiimainjaʼa tü nümakat Jeremías, wanee nünüikimaajachi Maleiwa wanaa sümaa nümüin: «Jeʼwaakalee, tatüjaa aaʼu nnojolin laülaain chi wayuukai saaʼu nukuwaʼipa nümüiwaʼa. Nnojoireejaʼa niainjachin oʼunirüin nukuwaʼipa nümüiwaʼa» (Jeremías 10:23).

15, 16. (1) ¿Jamüsü nnojotka najaʼttiramaatüin Jeʼwaa tü müliaa shiʼrakat wayuu? (2) ¿Jamüsü nnojotka nunouteʼerüin Jeʼwaa tü kasa mojusü naaʼinrakat Satanaa?

¹⁵ ¿Jamüsü nnojotka najaʼttiramaatüin Jeʼwaa tü müliaa shiʼrakat wayuu? ¿Jamüshi nuuʼulaka sülatüin kasa mojusü? Alatüsü wainma juya süpüla sütüjaanüin aaʼu nnojoluin anain Satanaa süpüla aluwatawaa. Otta müshia na wayuukana,  wainma sukuwaʼipa naluwataaya, nnojotpajaʼa anayaain nakuwaʼipa suluʼujee tia. Mayaainjeʼe wainmain kasa natüjaka apüleerua na cientiificokana otta wainmain kasa akumajünaka, ayatüsia kooʼomüin müliaa, maʼletsee, atkawaa otta aainjünüsü maʼin kasa mojusü sainküin mmaka. Nnojoleerü anain wakuwaʼipa waluwanaajiraale saaʼu wakuwaʼipa wamüiwaʼa, choʼujaashi chi Maleiwakai wamüin.

¹⁶ Nnojotsü nunouteʼerüin Jeʼwaa maaʼulu tü kasa mojusü naaʼinrakat Satanaa. Naaʼinrüle Jeʼwaa tia, paaʼinwajiraweechi nia nümaa Satanaa sünain aluwatawaa, nnojoireejaʼa süpüla paaʼinwainjachin nia nümaa Satanaa. Nunouteʼerüleje Jeʼwaa tü kasa mojusü naaʼinrakat Satanaa, müshiije na wayuukana: «Anashii waya süka waluwanaajiraain saaʼu wakuwaʼipa wamüiwaʼa», alawaapejeʼe neʼe tia. Nnojoishi süpüla wanaawain Jeʼwaa namaa, watüjaa aaʼuchi Maleiwa matüjain nia aküjaa alawaa (Hebreokana 6:18).

17, 18. ¿Kasa naaʼinrajatka Jeʼwaa süpüla nunouteʼerüin tü kasa mojusü naaʼinrakat chi Yolujaakai?

¹⁷ Nunouteʼereerü Jeʼwaa süpüshuaʼa tü kasa mojusü eekat sutuma neʼrüliijaain wayumüin Satanaa namaa na wayuukana. Nnojotsü kasain isain nüchiki Jeʼwaa. Kettaaitpa nutuma Jeʼwaa tü kaʼi nunouteʼerüinjatkalü oʼu tü kasa mojusü naaʼinrakat Satanaa, atüjaaneerü aaʼu alawaain süpüshuaʼa tü nümakat. Süchikijee tia, paʼaraiisüinjatüin nutuma tü Mmakat maʼaka keeʼireetüjüliain shia naaʼin otta asoʼiraweerü saaʼin «tü wayuu ouktüsükalüirua» (Juan 5:28, 29). Müiria nnojoluin eein ayuulii jee outaa. Nükajee Jesuu najaʼlajeʼerüinjatüin Jeʼwaa «tü kasa mojusü naaʼinrakat chi Yolujaakai» (1 Juan 3:8). Anataʼaleesüjaʼa maʼin wakuwaʼipa süka nnojoluin nüntiramaatüin Jeʼwaa tü nükaliakat, sükajee müin tia eeshii, süpüla weʼraajüin nukuwaʼipa Jeʼwaa otta waneeküin nuluwataain waaʼu (paashajeʼera 2 Pedro 3:9, 10). Nükaaliijain waya Jeʼwaa süpüla wachecherüinjatüin waaʼin soʼunnaa sülatüin kasa mojusü wamüin (Juan 4:23; paashajeʼera 1 Corinto 10:13).

¹⁸ Nnojotsü nüpüleeruain waaʼin Jeʼwaa süpüla waneeküin  niainjachin aluwataain waaʼu. Nukumajüin waya Jeʼwaa süpüla waneeküin süka waaʼin wamüiwaʼa tü waaʼinrajatkat. Wekirajaa süchiki tia.

19. (1) ¿Kasa nuuʼulaaka Jeʼwaa süpüla waneeküin? (2) ¿Jamüsü kojutuinjatka wamüin tia?

¹⁹ Nuuʼulaain Jeʼwaa waneeküin süka waaʼin wamüiwaʼa tü waaʼinrajatkat. Naata wakuwaʼipa suulia tü mürütkalüirua, aletüjülia sukumajia tü mürütkalüirua süpüla saaʼinrüinjatüin wanee kasa, nnojotsü sütüjaain aaʼu mojule jee anale wanee kasa (Proverbios 30:24-28). Naatapejeʼe wakumajia waya wayuukana, eeshii süpüla waneeküin tü waaʼinrajatkat otta waʼyataainjanale nümüin Jeʼwaa. Nnojoishii müin aka waya wanee maakina saainjaka neʼe tü akumajünakalü apüla shia. Eeshii süpüla waneeküin jamüinjatüin wakuwaʼipa otta jaraliinjanain na waʼaleewainkana. Shia keeʼireeka naaʼin Jeʼwaa talatüinjatüin waaʼin.

20, 21. ¿Kasa anaʼleeka maʼin süpüla püneeküin?

²⁰ Keeʼireesü naaʼin Jeʼwaa alinjachin nia wapüla (Mateo 22:37, 38). Jeʼwaa müshi aka naaʼin wanee wayuu eekai kachooin. Jamüshijaʼa wanee wayuu eekai kachooin talatüsü naaʼin nümaa chi nüchonkai müleka «aishi pia tapüla» nümüle nümüin süka naaʼin nümüiwaʼa. Nuuʼulaain Jeʼwaa süpüla waneeküin süka waaʼin wamüiwaʼa waʼyataainjanale nümüin. Watüjaa aaʼu mojuin maʼin tü kasa nüneekakat Satanaa otta Adán sümaa Eva. ¿Kasa püneeküinjatka süka paaʼin pümüiwaʼa?

²¹ Tü anaʼleekat maʼin süpüla püneeküin shia aʼyatawaa nümüin Jeʼwaa. Watta naalii na wayuu aneekakana aʼyatawaa nümüin Jeʼwaa otta nayoutuin nuluwataain Satanaa naaʼu (Proverbios 27:11). ¿Kasache paaʼinrajatka süpüla suluʼuinjachin pia tü Paʼaraiisükat najaʼttirapa Maleiwa tü kasa mojusükat? Wekirajaajeerü anain tia sünain tü wane ekirajaayakat.