1, 2. Ino bantu baanji baleepusha nshi?

AMUYEEYELE shakucitika ishi: Bulobe bunene bwanyonyoola mushi woonse. Musankwa ucite mfuti wanjila muceeci akucaya bantu baanji. Mwanakashi wafwa abulwashi bwa kansa, akushiya baana 5.

² Na kwacitika mapensho anene mbuli aya, bantu baanji baleepusha ayi, “Ino nciinshi cilengesha shintu sha mushobo uyu kucitika?” Baanji baleepusha mulandu ncokubetele lupato lunene amapensho aanji bobulya. Sa amwebo mwakaliipushawo kale miipusho mbuli yeeyi?

3, 4. (a) Ino njimiipusho nshi Abakuku njaakeepusha? (b) Ino Yehova wakamukumbula buyani?

³ Na twabelenga mu Baibo, tulacana kwaamba ayi abantu bakalinga kucite lushomo luyumu muli Lesa abalo bakeepushawo miipusho mbuli yeeyi. Kucakubonenaako, mushinshimi Abakuku wakeepusha Yehova ayi: ‘nceebonshi mulanengesha kubona shintu shitaluleme? Alimwi ino nceebonshi mulalangilishabo shilubo sha mushobo uyu? Ino nceebonshi ndishiitebo pakati ka kunyonyoolwa ashimfulunganya? Alimwi ino nceebonshi kulwana akupikishanya kulibo kumbasu shangu shoonse?’​—Abakuku 1:3.

⁴ Abakuku 2:2, 3, ilaamba Lesa mbwaakakumbula miipusho yakwe Abakuku ambwaakamushomesha ayi alaakucitawo comwi. Yehova alibasuni abuumbi bantu. Baibo ilaamba ayi: “Alamubikila maano.” (1 Pita 5:7) Alimwi Lesa taasuniwo nabi paniini kubona bantu kabapenga. (Isaya 55:8, 9) Ono atubandike mwiipusho waamba ayi, Ino nceebonshi ncokubetele mapensho aanji bobulya?

5. Ino beshibupailishi baanji balaiisha nshi pamakani akupenga? Ino Baibo ilaiisha nshi?

⁵ Bamapasita, bamapulisiti abamafundishi babupailishi liinji balaamba ayi nkuyanda kwakwe Lesa ayi bantu banoopenga. Bamwi balaamba ayi cili coonse ceenga cacitikila muntu, naabibo shintu shibiibi, Lesa wakashilembela limwi, na ayi wakashibambila limwi. Alimwi balaamba ayi taakuwo muntu weenga wanyumfwisha Lesa ncaakacitila boobo. Bamwi balaamba ayi na muntu wafwa, nabi mwaana muniini nkuyanda kwakwe Lesa kwaamba ayi bakekaale anguwe kwiculu. Sombi ishi teshi shancine. Yehova teshi ngolengesha shintu shibiibi. Baibo ilaamba ayi: “Lesa wancine taakoonshi kucita cibiibi napaceyi, alimwi Shinkusu shoonse taakoonshi kubisha sobwe!”​—Jobo 34:10.

6. Ino nceebonshi bantu baanji balapa mulandu Lesa pamapensho ali pacishi?

⁶ Bantu baanji balapa mulandu Lesa pamapensho ali pacishi mukwiinga balayeeya ayi Lesa ngootokweendelesha cishi. Ono bweenka mbuli mbotwakeeya mu Mutwi 3, Satana Diabolosi ngootokweendelesha cishi.

7, 8. Ino nceebonshi ncokubetele mapensho aanji pacishi?

⁷ Baibo ilatulwiita ayi “cishi coonse cili mumaansa amubiibi.” (1 Joni 5:19) Satana ngo mubiibi uyo utokweendelesha cishi, ngumukali alimwi taacite nkumbu. ‘Ngootocenjeeka bantu boonse pacishi ca panshi.’ (Ciyubululo 12:9) Bantu baanji balakonkela micito yakwe. Alimwi uyu ngomulandu omwibo payeeyo ilengesha kwaamba ayi kubeca, lupato, abukali shifule pacishi.

⁸ Kuli ashimwi shilengesha kwaamba ayi kube mapensho aanji abuumbi pacishi. Adamu a Efa ndyebakapondoka, bana babo boonse bakapyana bubi. Paceebo ceeci bantu baanji balapensha bamwi. Balisunibo kuba peculu  kwiinda bamwi. Nceceebo ceeco ncokubetele kulwana, nkoondo, alimwi akulyatililana. (Shikushimikila 4:1; 8:9) Cimwi ciindi bantu balacana mapensho ceebo ‘cakushamwa’ na kuwiitwa mapensho akuteengashila. (Shikushimikila 9:11) Nkokwaamba ayi balacana mapensho ceebo cakucanika pamusena apaciindi citabete kabotu.

9. Ino nceebonshi nceenga twashomena ayi kuli mulandu ubotu Yehova ncaalekela mapensho kutolelela?

⁹ Yehova teshi ngoolengesha mapensho. Teshi ngotweelete kupa mulandu pashintu shibiibi shicitika. Lesa teshi ngoolengesha mapensho mbuli shitentaanshi, bulobe amiyoba icaya bantu baanji. Ano mpashi inga mweepusha ayi, ‘Na Yehova ngu shinkusu shoonse kwiculu apacishi ca panshi, ino nceebonshi taakashi shintu shibiibi kucitika?’ Tulishi kwaamba ayi Lesa alitusuni abuumbi alimwi alatubikilaako maano, aboobo cilyeelete kwaamba ayi kuli mulandu ubotu ncaalekela mapensho kutolelela.​—1 Joni 4:8.

10. Ino Satana wakapikisha buyani bweendeleshi bwakwe Yehova?

¹⁰ Satana wakacenjeeka Adamu a Efa mumuunda wa Edeni. Satana wakabekesha Lesa ayi ngu Mweendeleshi mubiibi. Wakabeca ayi Lesa wakashisa Adamu a Efa cintu cimwi cibotu. Satana wakalinga kusuni ayi Adamu a Efa bashome ayi inga waba mweendeleshi mubotu kwiinda Yehova, alimwi ayi tabakalinga kuyandika butanjilishi bwakwe Lesa.​—Matalikilo 3:2-5; amubone Makani Aamwi 27.

11. Ino ngumwiipusho nshi ngotweelete kukumbula?

¹¹ Adamu a Efa tabakwe kunyumfwila Yehova aboobo bakamupondokela. Bakalinga kuyeeya ayi balicite nkusu shoonse shakulisalila cibiibi acibotu. Ino Yehova wakalinga kweelete kucita buyani kwaamba ayi atondeshe ayi beshikupondoka aba tabakalinga baluleme alimwi lakwe ngoocishi kabotu shintu sheenga shatucafwa?

12, 13. (a) Ino nceebonshi Yehova ncaatakwe kunyonyoola Adamu aEfa peenka palya? (b) Ino nceebonshi Yehova ncaalekela Satana kuba mweendeleshi wacishi ici abantu kulibikila mfulumeende shabo?

 ¹² Yehova taakwe kunyonyoola Adamu a Efa peenka palya. Sombi wakabaleka kwaamba ayi bashale baana. Lyalo Yehova wakapa bana bakwe Adamu a Efa coolwe cakulisalila ngobakalinga kusuni kubeendelesha. Yehova wakalinga kusuni ayi cishi ca panshi cisule abantu basalalite alimwi wakalinga kushinishite kwaamba ayi nabi Satana acite buyani, kuyanda kwakwe kulaakukumanishikwa.​—Matalikilo 1:28; Isaya 55:10, 11.

¹³ Satana wakapikisha Yehova pameenso abaanjelo baanji. (Jobo 38:7; Danyelo 7:10) Aboobo Yehova wakapa Satana ciindi kwaamba ayi atondeshe na nshaakaamba shakalinga shancine. Abalo bantu wakabapa ciindi cakulibikila mfulumeende shabo kwiinda mubutanjilishi bwakwe Satana kwaamba ayi tubone na balaakuswitilila kwakubula lucafwo lwakwe Lesa.

14. Ino nciinshi cabonekela patuba mukuya kwaciindi?

¹⁴ Kwa myaaka iinji abuumbi, bantu beelesha kulyeendelesha beenka, sombi baalilwa. Satana wabonekela patuba ayi ngumubeshi. Bantu balayandika butanjilishi bwakwe Lesa. Mushinshimi Jelemiya wakaamba ncancine ayi: “Ndicishi kabotu, O Yehova, kwaamba ayi muntu taacitewo nkusu shakushiba nshila shakwe. Muntu taacite nkusu shakweendelesha buumi bwakwe.”​—Jelemiya 10:23.

15, 16. (a) Ino nceebonshi Yehova walekela mapensho kutolelela kwaciindi cilaamfu bobulya? (b) Ino nceebonshi Yehova ncaatana kukusha mapensho Satana ngaakaleta?

¹⁵ Ino nceebonshi Yehova ncaalekela kupenga ayi kutolelele kwaciindi cilaamfu bobulya? Ino nceebonshi  taatoocitawo comwi kwaamba ayi shibiibi shimane? Cabwesa ciindi kwaamba ayi buleelo bwakwe Satana bubonekele patuba ayi bwaalilwa. Bantu beelesha mfulumeende shipusene pusene, sombi baalilwa. Nabi kwaamba ayi shintu mbuli sayansi alushibo shaya panembo munshiku shino, shintu mbuli kutalulama, bukandu, kucayana, ankoondo shitooya bubicilaakobo. Aboobo sobantu inga tatucikoonshi kulyeendelesha kwakubula Lesa.

¹⁶ Nabi kwaamba ayi Yehova inga wacikonsha kukusha mapensho Satana ngaakaleta, taakwe kucita boobo. Mukwiinga kucita boobo inga kwasansulula ayi Lesa atoocafwa bweendeleshi bwakwe Satana alimwi Lesa inga taacitiiwo ico napaceyi. Kwiilikaawo, ico inga capa bantu kuyeeya ayi inga bacikonsha kulyeendelesha beene. Ano uko nkubeca, alimwi Yehova inga taabaniimo mukubeca uku. Mukwiinga taabeciiwo.​—Bene Ebulu 6:18.

17, 18. Ino Yehova alaakwacita buyani mapensho Satana ngaakaleta?

¹⁷ Sa Yehova inga wacikonsha kumana mapensho akaletwa akupondoka kwakwe Satana abantu? Ee. Kuli Lesa shintu shoonse shilakonsheka. Yehova alicishi kabotu ciindi ndyeshi akamanishe bubeshi boonse bwakwe Satana. Lyalo pesule alakwaalula cishi ca panshi kuba paladaiso, bweenka mbocakalinga pakutaanguna. Abo boonse bali “mushuumbwe” balaakubuka. (Joni 5:28, 29) Bantu teshi bakaciswewo nabi kufwa. Yesu alaakukusha mapensho oonse Satana ngaakaleta. Yehova alaakusebensesha Yesu “kunyonyoola ncito shakwe Diabolosi.” (1 Joni 3:8) Tulalumba abuumbi ayi Yehova watukalikila moyo pacecino ciindi kwaamba ayi tucikoonshe kumushiba akumusala ayi abe Mweendeleshi wesu. (Amubelenge 2 Pita 3:9, 10.) Nabi tucane mapensho ali buyani, Lesa alatucafwa kuliyumya.​—Joni 4:23; amubelenge 1 Bene Kolinto 10:13.

 ¹⁸ Yehova taatukakatishiwo ayi tusale nguwe kuba Mweendeleshi wesu. Wakapa muntu uli woonse coolwe cakulisalila. Atwiiye mbweenga coolwe cibotu abuumbi ici catucafwa.

19. Ino ncoolwe nshi cibotu Yehova ncaakatupa? Ino nceebonshi tulyeelete kulumba pacoolwe ici?

¹⁹ Coolwe cibotu cakulisalila Yehova ncaakatupa cilatupusanya abuumbi kushinyama. Shilacita shintu kweelana amboshakalengwa. Ano sobantu tulalisalila nshetusuni kucita abuumi bwesu. Cili kulindiswe kusala kucita shintu shisangalasha Yehova nabi sobwe. (Tusimpi 30:24) Alimwi tulipusene amamashini ayo acitabo shintu nshobakaapangila kucita. Tulicite coolwe cakulisalila bukaalo mbotusuni, babyesu mbotusuni, anshetusuni kucita abuumi bwesu. Yehova alisuni ayi tusangalale abuumi bwesu.

20, 21. Ino nciinshi ncomweelete kusala kwaamba ayi musebenseshe kabotu coolwe canu cakulisalila?

²⁰ Yehova alisuni kwaamba ayi tusune nguwe. (Mateyo 22:37, 38) Ali anga ngumushali usangalala na mwanaakwe wamulwiita kuswa panshi lya moyo ayi, “Ta ndimusuni” kuteshi kukakatishikwa aumwi. Yehova wakatupa coolwe cakusala kumusebensela nabi sobwe. Satana, Adamu, a Efa bakakaka Yehova. Ino mwebo mulaakucisebensesha buyani coolwe canu cakulisalila?

²¹ Amusebenseshe coolwe canu cakulisalila kusebensela Yehova. Kuli bantu mamiliyoni aanji abo basala kusangalasha Lesa akukaka Satana. (Tusimpi 27:11) Ino nciinshi ncomweelete kucita pacecino ciindi kwaamba ayi mukacanikeeko mucishi cipya Lesa ndyeshi akakushe mapensho oonse? Tulaakwiiya cikumbulo mumutwi utookonkelaawo.