1, 2. ¿Ndáaña ndákanixi̱ní ku̱a̱ʼání na̱ yiví?

IIN ñuu ndeéní ni̱ta̱an ta ndi̱ʼi-xa̱ʼa̱ ndiʼi ña̱ʼa. Iin ta̱ ta̱a ki̱xáʼara kánira ka̱a tu̱xií na̱ yiví na̱ ñúʼu ini iin veʼe-ñu̱ʼu, ta xa̱ʼníra savana ta savana tu̱kue̱ʼe̱na. Iin ñá nána ni̱xi̱ʼi̱ñá i̱xaa kue̱ʼe̱ ña̱ cáncer ta ki̱ndo̱o ndáʼvi u̱ʼu̱n na̱ va̱lí se̱ʼeñá.

² Tá yáʼayó nu̱ú tu̱ndóʼo táʼan ña̱yóʼo, ku̱a̱ʼání na̱ yiví ndákanixi̱nína nda̱chun ndeéní sáa̱-ini na̱ yiví xínitáʼanna ta nda̱chun íyoní tu̱ndóʼo ñuyǐví yóʼo. ¿Á xa̱a̱ ndákanixi̱níún xa̱ʼa̱ ña̱yóʼo sava yichi̱?

3, 4. a) ¿Ndáaña ni̱ka̱ʼa̱n ta̱ Habacuc xíʼin Jehová? b) ¿Ndáaña ni̱ka̱ʼa̱n Jehová xíʼinra?

³ Ña̱ Biblia káʼa̱nña xíʼinyó ña̱ saátu xi̱ndakanixi̱ní sava na̱ xi̱ndasakáʼnu Ndióxi̱ tá tiempo xi̱naʼá. Tá kúú ta̱ profeta Habacuc ni̱nda̱ka̱tu̱ʼunra Jehová: “¿Nda̱chun táxiún xítoi̱ ku̱a̱ʼání ña̱ kini? ¿Nda̱chun táxiún íxandi̱va̱ʼa na̱ yiví xíʼin táʼanna? ¿Nda̱chun táxiún xítoi̱ ña̱ íyoní na̱ íxandi̱va̱ʼa xíʼin inkana ta saátu na̱ kíndaa ña̱ʼa ndaʼa̱ inkana? ¿Nda̱chun ndeéní kánitáʼan na̱ yiví?” (Habacuc 1:3).

⁴ Ña̱ Biblia káʼa̱nña, ña̱ ni̱ka̱ʼa̱n Jehová xíʼin ta̱ Habacuc ña̱ va̱ása taxikara koo ña̱yóʼo (Habacuc 2:2, 3). Chi Jehová kúʼvi̱ní-inira xínira na̱ yiví. Ña̱ Biblia káʼa̱nña ña̱yóʼo xa̱ʼa̱ Ndióxi̱: “Ta̱yóʼo ndíʼi̱ní-inira xa̱ʼa̱ndó” (1 Pedro 5:7). Xóʼvi̱níka-ini Ndióxi̱ ña̱ xítora íyoní tu̱ndóʼo nu̱úka miíyó (Isaías 55:8, 9). Tá saá íyoña, ¿nda̱chun íyoní tu̱ndóʼo ñuyǐví yóʼo? Ná kotoyó nda̱chun.

5. a) ¿Ndáaña káʼa̱n ku̱a̱ʼání na̱ su̱tu̱ xíʼin na̱ pastor xa̱ʼa̱ Ndióxi̱? b) Ta, ¿ndáaña káʼa̱n Biblia?

⁵ Ku̱a̱ʼání na̱ su̱tu̱ xíʼin na̱ pastor káʼa̱nna ña̱ mií Ndióxi̱ kúú ta̱ kúni̱ ña̱ ná xo̱ʼvi̱yó. Savana káʼa̱nna ña̱ ndiʼi tu̱ndóʼo ña̱ va̱xi nu̱úyó, xa̱a̱ mií Ndióxi̱ kúú ta̱ ni̱ka̱ʼa̱n ña̱ kundoʼoyó ña̱yóʼo. Ta káʼa̱ntuna ña̱ nda̱a̱ ni iin yichi̱ va̱ása xa̱a̱yó kunda̱a̱-iniyó nda̱chun kéʼéra saá. Ta savatuna káʼa̱nna ña̱ tá xíʼi̱ na̱ va̱lí á na̱ náʼnu ku̱a̱ʼa̱nna koona xíʼin Ndióxi̱ chí ndiví. Soo su̱ví ña̱ nda̱a̱ kúú ña̱yóʼo. Jehová nda̱a̱ ni iin yichi̱ va̱ása táxira tu̱ndóʼo ndaʼa̱yó. Ña̱ Biblia káchiña: “Nda̱a̱ ni loʼo va̱ása xíniñúʼu ndakanixi̱níyó ña̱ kéʼé Ndióxi̱ ta̱ nda̱a̱ ña̱ va̱ása va̱ʼa, ni ña̱ ndakanixi̱níyó xa̱ʼa̱ ta̱ íyo ndiʼi ndee̱ ña̱ kéʼéra ña̱ va̱ása nda̱kú” (Job 34:10).

6. ¿Nda̱chun ku̱a̱ʼání na̱ yiví chíka̱a̱na ku̱a̱chi Ndióxi̱ xa̱ʼa̱ ndiʼi tu̱ndóʼo ña̱ íyo ñuyǐví yóʼo?

⁶ Ku̱a̱ʼání na̱ yiví chíka̱a̱na ku̱a̱chi Ndióxi̱ xa̱ʼa̱ ndiʼi tu̱ndóʼo ña̱ íyo vitin, saáchi ndákanixi̱nína ña̱ miíra kúú ta̱ xáʼndachíñu ñuyǐví yóʼo. Soo nu̱ú ña̱ capítulo 3 sa̱kuaʼayó, ta̱ Ndi̱va̱ʼa kúú ta̱ xáʼndachíñu ñuyǐví yóʼo.

7, 8. ¿Nda̱chun íyoní tu̱ndóʼo ñuyǐví yóʼo?

⁷ Ña̱ Biblia káʼa̱nña xíʼinyó ña̱ “ñuyǐví yóʼo ndíka̱a̱ña ndaʼa̱ ta̱ Ndi̱va̱ʼa” (1 Juan 5:19). Ta̱ Ndi̱va̱ʼa kúú ta̱ xáʼndachíñu ñuyǐví yóʼo, ta ndeéní ndi̱va̱ʼa-inira. Ta̱yóʼo kúú “ta̱ sándaʼvi ndiʼi na̱ ndóo nu̱ú ñuʼú” yóʼo (Apocalipsis 12:9). Ta ku̱a̱ʼání na̱ yiví kéʼéna nda̱a̱ táki̱ʼva kéʼé ta̱yóʼo. Ta xa̱ʼa̱ ña̱yóʼo kúú ña̱ íyoní na̱ káʼa̱n ña̱ vatá, na̱ sáa̱-ini xínitáʼan xíʼin na̱ ndi̱va̱ʼaní-ini.

⁸ Ná kotoyó ndáa inka xa̱ʼa̱ kúú ña̱ íyoní tu̱ndóʼo. Tándi̱ʼi ni̱ya̱ʼandosó ta̱ Adán xíʼin ñá Eva ña̱ ni̱ka̱ʼa̱n Ndióxi̱, sa̱yáʼana ku̱a̱chi ndaʼa̱ se̱ʼena. Xa̱ʼa̱ ña̱yóʼo, na̱ yiví kútóonína keʼéna ña̱ kini ta saátu ña̱ saxóʼvi̱na inkana. Sava yichi̱ kúni̱na kundayáʼvikana nu̱ú inkana, kánitáʼanna, ku̱a̱ʼa̱nna guerra ta íxandi̱va̱ʼana xíʼin inkana (Eclesiastés 4:1;  8:9). Ta saátu inka xa̱ʼa̱ ña̱ xóʼvi̱ní na̱ yiví kúú ña̱ “ndiʼivayó iin sana ndákava tu̱ndóʼo nu̱ú” (Eclesiastés 9:11). Ña̱yóʼo kúni̱ kachiña ña̱ sava yichi̱ ndóʼoyó tu̱ndóʼo saáchi su̱ví iin lugar va̱ʼa kúú nu̱ú ni̱xa̱a̱yó á su̱ví míí tiempo ña̱ va̱ʼa kúúña.

9. ¿Nda̱chun kándíxayó ña̱ íyova iin xa̱ʼa̱ kúú ña̱ táxi Ndióxi̱ íyo tu̱ndóʼo?

⁹ Su̱ví Jehová kúú ta̱ táxi tu̱ndóʼo ndaʼa̱yó. Ni su̱ví ku̱a̱chira kúú ña̱ íyoní guerra, ni ña̱ kánitáʼanna, ni ña̱ sáxo̱ʼvi̱ táʼanna, ni ña̱ táan, ni ña̱ kúun kini sa̱vi̱, ni nda̱a̱ ndáaka tu̱ndóʼo ña̱ kúu. Soo sana ndáka̱tu̱ʼún miíún: “Tá Jehová kúú ta̱ íyoní ndee̱ nu̱ú ndiʼi na̱ íyo ñuyǐví yóʼo, ¿nda̱chun kǒo sándiʼi-xa̱ʼa̱ra ndiʼi ña̱ kini ña̱ kúu?”. Kúnda̱a̱va-iniyó ña̱ kúni̱ní Ndióxi̱ xínira miíyó, ña̱kán miíra xíni̱ ndáa xa̱ʼa̱ kúú ña̱ táxira íyo tu̱ndóʼo (1 Juan 4:8).

10. ¿Ndáaña ni̱ka̱ʼa̱n ta̱ Ndi̱va̱ʼa xa̱ʼa̱ Jehová?

¹⁰ Nu̱ú jardín ña̱ Edén, ta̱ Ndi̱va̱ʼa ni̱ka̱ʼa̱nra ña̱ vatá xíʼin ta̱ Adán ta saátu xíʼin ñá Eva. Ni̱ka̱ʼa̱nra xíʼinna ña̱ va̱ása va̱ʼa xáʼndachíñu Jehová, chi íyo iin ña̱ va̱ʼa kǒo xíínra taxira ndaʼa̱na. Ta̱ Ndi̱va̱ʼa xi̱kuni̱ra sáxi̱nu̱ra-inina ta kandíxana ña̱ va̱ʼaníka kaʼndachíñu miíra nu̱úka Jehová, ta saátu ña̱ ná ndakanixi̱nína ña̱ va̱ása xíniñúʼuna Ndióxi̱ (Génesis 3:2-5). (Koto nota 27, “Ña̱ xáʼndachíñu Jehová”).

11. ¿Ndáaña xíniñúʼu ndakuiinyó?

¹¹ Ta̱ Adán xíʼin ñá Eva kǒo níxiniso̱ʼona ña̱ ni̱ka̱ʼa̱n Jehová ta ni̱ya̱ʼandosóna tu̱ʼunra. Nda̱kanixi̱nína ña̱ kivi ndaka̱xin miína ndáa ña̱ kúú ña̱ va̱ʼa ta ndáa ña̱ kúú ña̱ va̱ása va̱ʼa keʼéna. ¿Ndáaña kivi keʼé Jehová ña̱ va̱ʼa na̱ʼa̱ra ña̱ su̱ví ña̱ va̱ʼa kúú ña̱ nda̱kaxin ta̱ Adán xíʼin ñá Eva keʼéna? Ta, ¿ndáaña kivi keʼéra ña̱ na̱ʼa̱ra ña̱ iinlá miívara kúú ta̱ xíni̱ ndáa ña̱ kivi chindeétáʼan xíʼinyó?

12, 13. a) ¿Nda̱chun va̱ása ndi̱ku̱n nísandiʼi-xa̱ʼa̱ Jehová ta̱ Adán xíʼin ñá Eva? b) ¿Nda̱chun táxi Jehová ña̱ xáʼndachíñu ta̱ Ndi̱va̱ʼa ñuyǐví yóʼo, ta saátu ña̱ xáʼndachíñu na̱ yiví nu̱ú táʼan miína?

 ¹² Ña̱ xi̱kuni̱ Jehová kúú ña̱ koo ñuʼú yóʼo iin ñuʼú livi, ta ndakutú nu̱úña xíʼin na̱ se̱ʼe ta̱ Adán xíʼin ñá Eva. Soo Jehová saxínuvara ña̱ kúni̱ra koo chí nu̱únínu, ni ná kuni̱ ta̱ Ndi̱va̱ʼa kasira nu̱úra (Génesis 1:28; Isaías 55:10, 11). Xa̱ʼa̱ ña̱kán, Jehová va̱ása ndi̱ku̱n nísandiʼi-xa̱ʼa̱ra ta̱ Adán xíʼin ñá Eva, chi ta̱xivara ña̱ ná koo se̱ʼena. Tasaá, na̱ se̱ʼe ta̱ Adán xíʼin ñá Eva kivi ndaka̱xin miína ndáa na̱ kúni̱na kaʼndachíñu nu̱úna.

¹³ Ta̱ Ndi̱va̱ʼa ni̱ka̱ʼa̱nra ña̱ va̱ása va̱ʼa xa̱ʼa̱ Jehová nu̱ú ku̱a̱ʼání na̱ ángel (Job 38:7; Daniel 7:10). Ña̱kán, ta̱xi Jehová tiempo ndaʼa̱ra ña̱ va̱ʼa na̱ʼa̱ra á ndixa ña̱ nda̱a̱ kúú ña̱ ni̱ka̱ʼa̱nra. Ta saátu ta̱xi Jehová tiempo ndaʼa̱ na̱ yiví ña̱ ná kaʼndachíñuna nu̱ú táʼan miína nu̱ú ñuyǐví ta̱ Ndi̱va̱ʼa yóʼo. Tasaá kúú ña̱ kivi na̱ʼa̱ na̱ yiví á va̱ʼa xáʼndachíñuna nu̱ú táʼan miína, ta á ndixa va̱ása xíniñúʼuna ña̱ chindeétáʼan Ndióxi̱ xíʼinna.

14. ¿Ndáaña kúnda̱a̱ káxi iniyó xa̱ʼa̱ ña̱ xa̱a̱ ku̱a̱ʼání tiempo ni̱ya̱ʼa?

¹⁴ Xa̱a̱ ku̱a̱ʼání ku̱i̱ya̱ xáʼndachíñu na̱ yiví nu̱ú táʼan miína, soo nda̱a̱ ni loʼo va̱ása kúchiñuna kaʼndachíñu viína. Ta xíʼin ña̱yóʼo kúnda̱a̱ káxi iniyó ña̱ iin ta̱ vatá kúú ta̱ Ndi̱va̱ʼa, ta na̱ yiví xíniñúʼuvana ña̱ chindeétáʼan Ndióxi̱ xíʼinna. Ña̱ nda̱a̱ní kúú ña̱ ni̱ka̱ʼa̱n ta̱ profeta Jeremías tá ka̱chira: “Jehová, kúnda̱a̱ va̱ʼa inii̱, na̱ yiví kǒo ndee̱ ndaʼa̱na ña̱ ndaka̱xin miína yichi̱ nu̱ú ku̱ʼu̱nna. Na̱ yiví va̱ása kúchiñuna kuniʼina yichi̱ nu̱ú miína” (Jeremías 10:23).

15, 16. a) ¿Nda̱chun xa̱a̱ ku̱a̱ʼání tiempo táxi Jehová íyo tu̱ndóʼo? b) ¿Nda̱chun ta̱ʼán sandíʼi-xa̱ʼa̱ Jehová ndiʼi tu̱ndóʼo ña̱ táxi ta̱ Ndi̱va̱ʼa?

¹⁵ ¿Nda̱chun xa̱a̱ ku̱a̱ʼání tiempo táxi Jehová ña̱ íyo  tu̱ndóʼo? ¿Nda̱chun kǒo nda̱a̱ ni iin ña̱ʼa kéʼéra ña̱ va̱ʼa sandíʼi-xa̱ʼa̱ra ña̱ kini? Xa̱ʼa̱ ña̱ xa̱a̱ ku̱a̱ʼání tiempo ni̱ya̱ʼa, kúnda̱a̱ káxi iniyó ña̱ va̱ása kúchiñu ta̱ Ndi̱va̱ʼa kaʼndachíñura. Ta xa̱a̱ síín síín na̱ chíñu xáʼndachíñu nu̱ú na̱ yiví, soo nda̱a̱ ni iinna va̱ása kúchiñu kaʼndachíñu vií. Ni xa̱a̱ ndíchiní ku̱a̱ʼa̱n ndúu na̱ ñuyǐví tiempo vitin, soo ni saá ndeéníka íyo na̱ kǒo kéʼé ña̱ nda̱kú, íyo na̱ ndáʼvi, íyoní ku̱a̱chi ta ndeénítu íyo guerra. Xa̱ʼa̱ ña̱ va̱ása chíndeétáʼan Ndióxi̱ xíʼinyó kǒo kúchiñuyó kaʼndachíñuyó nu̱ú táʼan miíyó.

¹⁶ Ta saátu ta̱ʼán sandíʼi-xa̱ʼa̱ Jehová ndiʼi tu̱ndóʼo ña̱ táxi ta̱ Ndi̱va̱ʼa, chi tá ná keʼéra ña̱yóʼo kúni̱ kachiña ña̱ chíndeétáʼanra xíʼin ta̱ Ndi̱va̱ʼa ña̱ kaʼndachíñura. Soo Ndióxi̱ nda̱a̱ ni iin yichi̱ va̱ása chíndeéra ta̱yóʼo. Ta na̱ yiví kivi ndakanixi̱nína ña̱ va̱ʼava xáʼndachíñuna. Soo ña̱yóʼo su̱ví ña̱ nda̱a̱ kúúña, ña̱kán va̱ása chíndeétáʼan Jehová xíʼin na̱ yiví tá xáʼndachíñuna nu̱ú táʼan miína. Chi Jehová nda̱a̱ ni iin yichi̱ va̱ása káʼa̱nra ña̱ vatá (Hebreos 6:18).

17, 18. ¿Ndáaña keʼé Jehová ña̱ va̱ʼa sandíʼi-xa̱ʼa̱ra ndiʼi tu̱ndóʼo ña̱ táxi ta̱ Ndi̱va̱ʼa?

¹⁷ Íyoní tu̱ndóʼo xa̱ʼa̱ ña̱ va̱ása níxiniso̱ʼo ta̱ Ndi̱va̱ʼa xíʼin na̱ yiví ña̱ ni̱ka̱ʼa̱n Jehová, soo kiviva sandíʼi-xa̱ʼa̱ Jehová ndiʼi ña̱yóʼo. Chi nu̱ú Jehová kǒo ni iin ña̱ʼa ña̱ yo̱ʼvi̱. Soo Jehová xíni̱vara ama kúú ña̱ na̱ʼa̱ káxira ña̱ su̱ví ña̱ nda̱a̱ kúú ndiʼi ña̱ vatá ña̱ ni̱ka̱ʼa̱n ta̱ Ndi̱va̱ʼa xa̱ʼa̱ra. Tasaá kúú ña̱ ndasalivira nu̱ú ñuʼú yóʼo nda̱a̱ táki̱ʼva xi̱kuni̱ra kooña tá xa̱ʼa̱. “Ndiʼi na̱ ni̱xi̱ʼi̱” ndatakuna (Juan 5:28, 29). Na̱ yiví kǒoka kue̱ʼe̱ kiʼin miína ta ni va̱ása kuvikana. Jehová kuniñúʼura ta̱ Jesús “ña̱ sandíʼi-xa̱ʼa̱ra ña̱ kéʼé ta̱ Ndi̱va̱ʼa”, ña̱yóʼo kúni̱ kachiña ña̱ sandíʼi-xa̱ʼa̱ra ndiʼi tu̱ndóʼo ña̱ táxi ta̱ Ndi̱va̱ʼa (1 Juan 3:8). Ta, táxiníyó tíxa̱ʼvi ndaʼa̱ Jehová xa̱ʼa̱ ña̱ ndátura ña̱ va̱ʼa xa̱a̱yó sakuaʼayó xa̱ʼa̱ra, tasaá kivi ndaka̱xinyó tá kúni̱yó kaʼndachíñura nu̱úyó (kaʼvi 2 Pedro 3:9, 10). Ta saátu tá yáʼayó nu̱ú  tu̱ndóʼo, Jehová chíndeétáʼanra xíʼinyó ña̱ va̱ʼa ya̱ʼayó nu̱úña (kaʼvi 1 Corintios 10:13).

¹⁸ Jehová va̱ása íxandúxara xíʼinyó ña̱ ndaka̱xinyó ña̱ kaʼndachíñura nu̱úyó. Chi táxira ña̱ ná ndaka̱xinyó ña̱ kúni̱ miívayó. Ta yóʼo sakuaʼayó ndáa ki̱ʼva kéʼéra ña̱yóʼo.

19. a) ¿Ndáaña va̱ʼaní táxi Jehová ndaʼa̱yó? b) ¿Nda̱chun xíniñúʼu táxiyó tíxa̱ʼvi ndaʼa̱ra xa̱ʼa̱ ña̱yóʼo?

¹⁹ Jehová táxira ña̱ va̱ʼa ndaka̱xinyó ña̱ kúni̱ miíyó keʼéyó. Xa̱ʼa̱ ña̱yóʼo kivi ndaka̱xinyó ndáa ki̱ʼva kúni̱yó kutakuyó, ta saátu kivi ndaka̱xinyó ña̱ ndasakáʼnuyó Jehová á va̱ása ndasakáʼnuyóra. Chi miíyó va̱ása íyoyó táki̱ʼva íyo tí kití (Proverbios 30:24-28). Ta ni va̱ása íyoyó nda̱a̱ táki̱ʼva íyo iin máquina, chi túyóʼo kéʼé kuitínú ña̱ʼa ña̱ na̱kuva̱ʼanú keʼénú. Soo miíyó kiviva ndaka̱xinyó ndáa na̱ yiví kúni̱yó kooyó, ndáa na̱ kúni̱yó koo migoyó ta ndáa ña̱ kúni̱yó keʼéyó. Chi Jehová kúni̱ra ña̱ si̱í ná kooyó.

20, 21. ¿Ndáaña kúú iin ña̱ va̱ʼaní kivi ndaka̱xiún keʼún vitin?

²⁰ Jehová kúni̱ra ña̱ ná kuʼvi̱-iniyó kuniyóra (Mateo 22:37, 38). Jehová íyora nda̱a̱ táki̱ʼva íyo na̱ yiváyó, chi na̱yóʼo kúsi̱íní-inina tá iin se̱ʼena káʼa̱nna xíʼinna xíʼin ndiʼi níma̱na ña̱ kúni̱nína xíninana, ta su̱ví xíʼin ña̱ ndúxa̱ kéʼénaña. Jehová táxira ña̱ ndaka̱xinyó ndasakáʼnuyóra á va̱ása ndasakáʼnuyóra. Ta̱ Ndi̱va̱ʼa, ta̱ Adán xíʼin ñá Eva, nda̱kaxinna ña̱ va̱ása kuniso̱ʼona ña̱ ni̱ka̱ʼa̱n Jehová. Ta yóʼó, ¿ndáaña ndaka̱xiún keʼún?

²¹ Iin ña̱ va̱ʼaní kivi keʼún vitin kúú ña̱ ndaka̱xiún ndasakáʼnún Jehová. Xa̱a̱ ku̱a̱ʼání na̱ yiví ndáka̱xinna ndasakáʼnuna Jehová ta kǒo kítáʼanna xíʼin ta̱ Ndi̱va̱ʼa (Proverbios 27:11). Nda̱a̱ táki̱ʼva xa̱a̱ sa̱kuaʼayó, Ndióxi̱ sandíʼi-xa̱ʼa̱ra ndiʼi tu̱ndóʼo ña̱ íyo vitin ta ndasalivira nu̱ú ñuʼú yóʼo. ¿Ndáaña kivi keʼún ña̱ va̱ʼa xa̱ún koún kán? Nu̱ú ña̱ inka capítulo sakuaʼayó xa̱ʼa̱ ña̱yóʼo.