1, 2. Tae-en ǂgui khoena ra dî?

TSUNAMIB ga ǃgaroǃāsa dīkākā o. ǃApusa ūhâ khoeb ga kerkeb ǃnâ ǂnôa khoena tsûtsû tsî ǃgam o. ǁGûs hîna kankers xa go ǃgamhes tsî koro ǀgôana go ǁōǃaus.

² Tsūkēǃgâb nēti īb ga ra ī o, on ge ǂgui khoena ra dî “tae-i ǃaroma?” ǂGui khoen ge ra dî tae-i ǃaromab ǃhūbaiba ǁkhangub tsî ǃgomsin xa ǀoa hâ. Sado xare ǂâi i du ra nēn xa?

3, 4. (a) Mâ dînab ge Habakuka dî? (b) Jehovaba mati ge ǃeream bi?

³ Elobmîs ǃnâ da ge go ǁkhāǁkhāsen khoen hîna Elob ǃnâ ge ǀgaisa ǂgomsa ūhâ în tsîn ge ǁnāti ī dîna gere dî. Aiǁgause, kēbo-aob Habakuki ge Jehovaba ge dî: “Tarexats ra satsa ǂhanuoǃnâsiba mû kai te? Tsî tarexats ra ǂōǂōsiba ǃgapaǀî kai te? Hîǀhurus tsî ǀgaidīs tsîra ti ǃoagu hâ, tsî ǂnoagu-i ge hâ, tsî ǃkhams ra ǃnā xui-ao.”—Habakuki 1:3.

⁴ Habakuki 2:2, 3 tawa da ge ra khomai Elob ge Habakuki ge dî dîsa a ǃeream tsî a mîmâisa mâsibab nî ǂhanuǂhanu ǃkhaisa. Jehovab ge ǃgam ǀnamma khoena ūba hâ. Elobmîs ge ra mî: “ǁÎb sado ra ǂhansenba xuige.” (1 Petrub 5:7) Ama as ge Elob ge ǃhui hâ ǃgomsina mûsa. (Jesajab 55:8, 9) Hā re î da nē dîs xa ǃhoa, tae-i ǃaroman nētikō ǃgomsina ǃhūbaib ǃnâ hâ?

5. ǂGui ǂgomde tae-e ra ǁkhāǁkhā ǃgomsin xa? Xawe Elobmîsa tae-e ra ǁkhāǁkhā?

⁵ Pastorgu, priestergu tsî ǂgomdi ǁkhāǁkhā-aogu ge hoaǁae ra mî Elob di ǂâis ge khoen da ǃgomma tsâbasa. ǀNî gu ge ra mî mâ xū-i hoa-i khoe-i ǀkha ra ī i tsūkēǃgâb khami i ge ǀnai Elob xa ge mîǁguihe tsî da ge tātsēs tsîna ǁnâuǃā ǁkhā tide tae-i ǃaroma i go īsa. ǀNîn ge ra mî ǂkhari ǀgôaro-i ga ǁō o, on Elob ǀkha sī ǀhommi ǃnâ hâsa. ǁNā i ge ama tama-e. Jehovab ge tātsēs tsîna ǁgai xūna ī kai tama hâ. Elobmîs ge ra mî: “Tsî amase, Elob ge eloxoresase sîsen tama hâ, tsî Hoaǀgaixab ge ǂhanuba dawaǃkhuni tama hâ.”—Job 34:12.

6. Tae-i ǃaroman ǂgui khoena Eloba ra ǀhapiǂgā-am hoa ǃgomsin ǃhūbaib ai hân ǃaroma?

⁶ ǂGui khoen ge Eloba ra ǀhapiǂgā-am hoa ǃgomsin ǃhūbaib ai hân ǃaroma, ǁîn ge ra ǂâi Elob ǃhūbaiba ra ǂgaeǂgui di. Xawe 3ǁî danaǃâs ǃnâ da ge go ǁkhāǁkhāsen ǁGâuab nē ǃhūbaib di ǂgaeǂgui-aosa.

7, 8. Tae-i ǃaroma i nētikō ǃgomsina ǃhūbaib ai ǃhâ?

⁷ Elobmîs ge re mîba da: “ǃHūbaib hoaragab ǂkhabab [“ǁGâuab,” NW] ǃnâ ǁgoesa.” (1 Johaneb 5:19) Nē ǃhūbaib di ǂgaeǂgui-aob ǁGâuab ge a ǁkhōǁkhōsa tsî a karoǂgaoxa. ǁÎb ge “ǃhūbaib hoaragaba ra ǂgaeǂhapuba.” (ǂHaiǂhais 12:9) ǂGui khoen ge ǁîba ra ǁgae. Tsî nēs ge a ǀgui ǃaroma ǃhūbaib ǂhumib, ǃhuigub tsî karoǂgaoxasib xa ǀoahe hâsa.

⁸ ǁNāpa i ge ǀnî hâ ǃaromasa hâ tae-i ǃaromab ǃhūbaiba ǃgomsin xa ǀoahe hâsa. Adammi tsî Evas tsîn ge Eloba mâǃoas khaoǃgâ ra ge ǁoreba ǁîra di ǀgôana ge māǃkharu. Tsî ǁnā-amagan ge khoena ǃgomsiga ra  ǃaroma. ǁÎn ge ǀnî khoen xan ǃnāsase a ǂhâǂhâsa di ra ǂâi. ǁNā-amagan ge ra ǃkham, torodī tsî nau khoena ra ǁgâiǀā. (Aoǁnâ-aob 4:1; 8:9) Xawe ǀnî ǁaegan ge khoena ǃgomma ra tsâ “ǁaeb tsî hâsib” [ǃâubasen taman hâ ǁaxasigu xan ga ra ǁnāǂamhe o.] (Aoǁnâ-aob 9:11) ǁÎn ga ǂhanu tama ǃkhais tsî ǁaeb ai hâ o, on ge tsūkēǃgân tsî ǁgai xūn tsîna ǁîna a hāǂam ǁkhā.

9. Tae-i ǃaroma da ǂgomǃgâsiba a ūhâ ǁkhā Jehovab ǃgâi ǃaromasa ūhâsa ǃgomsina aiǃgû kais diba?

⁹ Jehovab ge tātsēs tsîna ǃgomsina ǃaroma tama hâ. ǁÎb ge torob, ǂkhabadīb tsî ǁgâiǀāb ǃaroma a ǀhapiǂgā-amhe ǁoa. Elob ge ǃhūǂgubigu, hurrikangu tsî kai ǁgammi dâudi tsîna ǃaroma tama hâ. Xawe sadu ge ǀnîsi ra ǂâi, ‘Jehovab ga hoaǀgaixa o, ǀhommi tsî ǃhūbaib ǂama, tae-i ǃaromab tsū xūna ǁkhae tama hâ?’ ǂAn da as ge Elob ge sada ǃgamse ra tsâba ǁnās ǀkhab ge ǃgâi ǃaromasa ūhâ ǃgomsina mā-amsa în aiǃgû.—1 Johaneb 4:8.

10. Satanna mati Jehovaba ge a mâǃoa?

¹⁰ Edenni ǃhanab ǃnâb ge ǁGâuaba Adammi tsî Evas tsîna ge ǂgaeǂhapu. ǁGâuab ge ge mî Elob a ǁgai ǂGaeǂgui-ao di. ǁÎb ge ge mî Elob ǃgâi xūna Adammi tsî Evas tsîna xu ra ǃkhō-oa di. Satanni ge gere ǂhâba îra ǂgom ǁîb Jehovab xa a ǃgâi ǂgaeǂgui-aosa tsîra ǁnās ǀkha Eloba ǂhâ tama hâsa.—Genesis 3:2-5; 27ǁî ǀArosa ǃgāsasiba mû re.

11. Mâ dîna da nî ǃeream?

¹¹ Adammi tsî Evas tsîn ge Jehovaba ge ǁnâuǀnam tama hâ i tsî ge mâǃoa bi. ǁÎra ge ge ǂâi hâ i, ǁîra a mîǁguibasen ǁkhāsa tae-i a ǂhanus tsî tsūs tsîn ǁaegu. Jehovaba  mati ga ǁgau hâ mâǃoa-aon ge ǂhanu tama hâ isa tsî ǁîb hoan xa ǃamkuse ǂansa tae-i sada a ǃgâibasa?

12, 13. (a) Jehovaba tae-i ǃaroma mâǃoa-aona ǃkhais ai ge ǃgam tama hâ i? (b) Tae-i ǃaromab ge Jehovaba Satanna mā-am îb nē ǃhūbaiba ǂgaeǂgui tsî khoena ǁîb ǃnaga aitsama ǂgaeǂguisen?

¹² Jehovab ge Adammi tsî Evas tsîna ǃkhais ai ge ǃgam tama hâ i. Xaweb ge ǁîra ge a mā-am îra ǀgôana hō. Jehovab ge ge ī ǁkhā kai în Adammi tsî Evas ǀgôana ǁhûibasen ham-en ra ǁîn ǂgaeǂgui-aose ǂhâba ǃkhaisa. Jehovab di ǂâibasens ge ge i ǃhūbaib nî dīǀoaǀoasa khoen ǀkha ǀoahe ǃkhaisa tsî ǁnās ge ǁGâuab di ǁgūtsâdi ǂamai ga ī hâ.—Genesis 1:28; Jesajab 55:10, 11.

¹³ Satanni ge Jehovaba miliundi ǀhomǃgāgu aiǃâ ge mâǃoa. (Job 38:7; Danieli 7:10) Jehovab ge Satanna ge mā-am îb ǁgauǁgausen ǁîb di ǀhapiǂgā-ams a ama ǃkhaisa. ǁÎb ge khoena ge a mā-am în ǁGâuab di ǂgaeǂguis ǃnaga khoesi ǂhanuga dībasen în mû Elob huib osen nî ǃgâiǃō ǃkhaisa.

14. ǁAeba tae-e ge ǁgauǁgau?

¹⁴ ǀOadisidi kurigan ge khoena ge dītsâ aitsama ǂgaeǂguisensa xawen ge ge ǃgâiǃō tama hâ i. Nēs ge ra ǁgau Satanni a ǂhumi-aosa. Khoen ge Elob di huiba ǂhâ hâ. Kēbo-aob Jeremiab ge ge ǂhanu i mîb ge o: “Tita ge a ǂan, ǃKhūtse [“Jehovatse,” NW] daob âb khoeb di tama ǃkhaisa; khoeb ǃgû rab di ǃkhai tamas ge, matis ǃgûs âba nî īsa.”—Jeremiab 10:23.

15, 16. (a) Jehovaba tae-i ǃaroma nētikō ǀhapese ǃgomsina ra mā-am? (b) Jehovaba tae-i ǃaroma Satanni ra ǃaroma ǃgomsina ǃgâiǃgâi tama hâ?

¹⁵ Jehovaba tae-i ǃaroma nētikō ǀhapese ǃgomsina  mā-am hâ în aiǃgû? Tsî tae-i ǃaromab tsūxūna ǁkhae tama hâ? ǁAeba i ge ge ū Satanni ǂgaeǂguis di ǂkhabusasiba ǁgausa. Khoen tsîn ge ǂgui ǂgaeǂgui ǀgauga ge dītsâ xawe ǃgâiǃō tama hâ. Nēsi i ge aiǃgûde kurus ǂnamipeb ǂans tsî texnoloxib ǃnâ dīhe hâ xawe i ge ǃnāsase ǂhanuoǃnâsib, ǀgâsib, ǂkhabadīb tsî torogu tsîna hâ ǂguros xa. Elob ose da ge ǃgâise a ǂgaeǂguisen ǁoa.

¹⁶ Xaweb ge Jehovaba Satanni ra ǃaroma ǃgomsina ǃgâiǃgâi tama hâ. Dib ga ra dī o, o i ge nî mûsen Elob ta Satanni ǂgaeǂguisa ǂkhâǃnâ ǃkhaisa tsî ǁîb ge ǁnāsa tātsēs tsîna dī tide. ǁNās ǃnâ-ūn ge khoen tsîna nî ǂgom aitsaman ǃgâise a ǂgaeǂguisen ǁkhā ǃkhaisa. Xawe ǁnāb kom ǂhumiba o tsî Jehovab ge ǁnā ǃkhaisa ǂkhâǃnâ tide. ǁÎb ge tātsēs tsîna a ǂhumi ǁoa.—Hebreǁîn 6:18.

17, 18. Jehovaba tae-e nî dī Satanni ra ǃaroma ǂkhôab ǀkha?

¹⁷ Jehovaba ǁkhāb a, ǂkhôab hînab ge Satanni tsî khoen tsîna dība ǃgâiǃgâisa? Î. Elob ǀkhan ge hoa xūna a ī ǁkhā. Jehovab ge ǃamkuse a ǂan mâǁaes Satanni mâǃoasa ǀoasase nî ǃereamhesa. ǁNāpaxūb ge ǃhūbaiba paradais ǃnâ nî ǀkharaǀkhara, ǁîb ge ǂâibasen hâ i khami. ǁNān hoan “ǀhobadi ǃnâ hân” ge khâisa nî māhe. (Johaneb 5:28, 29) Khoen ge tātsēs tsîna ǀaesen tsî ǁō tide. Jesub ge Satanni ra ǃaroma ǂkhôaba nî ǃgâiǃgâi. Jehovab ge Jesuba nî sîsenū “ǁgâuab di sîsengab nî hîkākāse.” (1 Johaneb 3:8) ǃGôaǃgâ da ge ra Jehovab go nētikōse ǃnūǃnâxaba da isa î da ǁîb xa ǂan tsî î da mîǁgui ǁîb sada di ǂgaeǂgui-ao ǃkhaisa. (Khomai re 2 Petrub 3:9, 10.) Nēsi da ga ǃgomma tsâ xaweb ge nî hui da î da tani ǁkhā.—Johaneb 4:23; khomai re Jesajab 40:29.

 ¹⁸ Jehovab ge ǁgari da tama hâ î da ǁîba sada di ǂGaeǂgui-aose ǁhûi. ǁÎb ge khoena aitsama ǁhûibasens ǁkhāsiba ge mā ǀkhaeb ase. Hā re î da ôaǃnâ nē ǀkhaeb tae-e ra ǂâibasensa.

19. Tae-i buruxa ǀkhaebab ge Jehovaba mā da? Mati i io da nē ǀkhaeba nî ǃgôaǃgâ?

¹⁹ Jehovab di buruxa ǀkhaeb aitsama ǁhûibasens ǁkhāsib dis ge sida ǀguruna xu ra mâǂoa kai. ǁÎn ge kuruhen hâ ǀgaub ai ǀgui ra tanisen xawe sada ge a ǁhûi ǁkhā mati da ra ûi ǂgaosa tsî a mîǁgui ǁkhā Jehovaba da ra ǂkhîǂkhî ǂgaosa. (ǂKhoamîdi 30:24) Masini khami da ge kuruhe tama hâ. ǃNorasasiba da ge ūhâ ǁhûisa tae kai ǂgao da ras tsî hamna da ra ǀhō ǂgaos tsîna. Jehovab ge ǁkhoaxase da nî ûisa ra ǂhâba.

20, 21. Mâ ǃgâi mîǁgui-e du nēsi a dī ǁkhā?

²⁰ Jehovab ge ra ǂhâba î da ǀnam bi. (Mateub 22:37, 38) ǁÎb ge dadasab khami ī ǃgâiaǂgao raba ǀgôa-i ga “ǀnam du ta ge a,” ti mî o, ǂgaob ǃgamsiba xu tsî ǁgarihe tamase. Jehovab ge ǃnorasasiba ge mā da ǁîba ǃoaba tamas ka io ǃoaba tama isa. Satanni, Adammi tsî Evas tsîn ge ge ǁhûi Jehovaba ǃharaxūsa. Mati du sadu di ǀkhaeb aitsama ǁhûibasens ǁkhāsib disa nî sîsenū?

²¹ Sîsenū re sadu aitsama ǁhûibasens ǁkhāsiba î du Jehovaba ǃoaba. Miliundi khoen ge ge mîǁgui Eloba ǂkhîǂkhîsa tsî Satanna ǃharaxūsa. (ǂKhoamîdi 27:11) Tae-e du nēsi a dī ǁkhā î du Elob di ǀasa ǃhūbaib ǃnâ hâ, ǃgomsin hoanab ga ra ūbē o? Sao ra danaǃâs ge nē dîsa nî ǃeream.