1, 2. Bantu bebungi abeyipushaa naminyi?

KIPAPI kikata kibaponesha mashibo mu kibundji. Musalayi beele mputu mu kipwilo bantu bebungi abatapika na bangi abaafu. Mukumbo wa kansere ubayipa nyina bana, na bana baye batano abashala bupenka.

² Nsaa ayimweneka malwa sunga masaku bu ano, bantu bebungi abeyipushaa’shi; “bwakinyi”? Bebungi bakwete kwiyipusha bwakinyi kwi mushikwa na makyenga ebungi bino pa nsenga. Obe namu topwile kwiyipusha luno lukonko su?

3, 4. (a) Abakuke baadi mwele nkonko kinyi? (b) Yehowa bamwalulwile naminyi?

³ Bible etulongyesha’shi, bantu abaadi na lukumiino lwibukopo mwi Efile Mukulu abeyipwishe namu ino nkonko. Kileshesho, mutemuki Abakuke bayipwishe Yehowa shi: ‘Bwakinyi bokumina’shi mone buno bubi? Mwanda kinyi okwete kutadîla kuno kumweshana kwa malwa? Ku mpese yôso namono banyenganyi na buntomboshi. Koso koso kwi nka kwifundêna na kwikutwena?’​—Abakuke 1:3, EEM.

⁴ Mukanda wa Abakuke 2:2, 3, aulesha’shi Efile Mukulu baadi mwalule nkonko ya Abakuke na kumulaa bwa kupudisha ino myanda. Yehowa mmufule bantu bikile. Bible amba’shi: “kwete kwinulama.” (1 Mpyeele 5:7) Kushi mpaka, Efile Mukulu mmushikwe kumona makyenga kukila na byabeamonaa kwi bantu. (Yeeshaya 55:8, 9) Byabya, tubande kutala lukonko alwamba’shi, Bwakinyi kwi makyenga ebungi bino pa nsenga?

5. Bakata ba bipwilo bebungi abalongyeshaa kinyi pabitale makyenga? Bible namu etulongyesha kinyi?

⁵ Bakata ba bipwilo abambaa shi, Efile Mukulu akumiinaa bantu bakyenga. Bangi abambaa’shi myanda yooso ayifwilaa muntu, mpa na malwa, Efile Mukulu tabapwile kwiyilumbuula na tatwi bya kuuka bwakinyi bi byabya. Bangi namu abambaa’shi, bantu bakulu na bana bakinga bakwete kufwa bwashi bende bakashaale n’Efile Mukulu mwiyilu. Anka ta mbya binyibinyi nya. Yehowa t’afwishaa makyenga nya. Bible amba’shi: “Efile Mukulu t’a kukita bubi nyâ! Ê, sha bukome booso, t’a kukita kintu kishi kilulame.”​—Yoobo 34:10, EEM.

6. Bwakinyi bantu bebungi bakwete kutopeka Efile Mukulu bwa makyenga ooso e pa nsenga?

⁶ Bantu bebungi bakwete kutopeka Efile Mukulu bwa makyenga ooso e pa nsenga mwanda abanangushena’shi Efile Mukulu nyi akunkusha nsenga. Kadi nka byatwikalanga balongye mu Shapitre 3, Satana Diabulu nyi kwete kukunkusha nsenga.

7, 8. Bwakinyi kwi makyenga ebungi bino pa nsenga?

⁷ Bible etulungula’shi “byaa-pano byooso mbishaale ku matalwa a mubi.” (1 Yowano 5:19) Satana Diabulu mukunkushi a ino nsenga, e n’etombo na kifita. Kwete ‘kulubisha ba pa nsenga boso.’ (Kibafumbwilwe 12:9, EEM) Bantu bebungi bakwete kumwambula. Uno ngumune wa ku myanda ayifwisha madimi, mushikwa, na buntomboshi pa nsenga.

⁸ Kwi ingi myanda ayilesha bwakinyi kwi makyenga ebungi bino pa nsenga. Adama na Eeva pa babapwile kutomboka, bana baabo abaadi bapyane milwisho yabo. Na mwanda wa milwisho, bantu bakwete kukyengyesha benaabo, abakumiinaa dingi kwikala nka kunundu kwa bangi. Mbakumiine kulwila bufumu, kulwa ngoshi,  na kumwesha bangi malwa. (Mulungudi 4:1; 8:9) Ingi nsaa, bantu abakyengaa mwanda wa “nsaa na myanda ya kimpulunkamba ayibafwilaa booso.” (Mulungudi 9:11, NWT) Pe bantu mu mbalo ibi pa nsaa ibi, masaku na myanda ibubi mbilombeene kwibamwekyela.

9. Bwakinyi atushinkamisha’shi Yehowa auku kyadi mmutadidiile makyenga?

⁹ Yehowa t’afwishaa makyenga nya. Ta bibuwa kumutopeka bwa ngoshi, bibeshi, na mpombo nya. Efile Mukulu ta nnaye kwete kufwisha makyenga bu; kutshinkatshinka kwa nsenga, mpapi, na mpeshi a kifita nya. Anka we bya kwiyipusha’shi, ‘Su Yehowa ndjo muntu sha bukome bukile bwa bantu booso mwiyilu na pa nsenga, bwakinyi ta mmwimikye ino myanda yooso?’ Atwiuku’shi Efile Mukulu kwete kwikalakasha bikata pa mwanda wetu. Byabya, auku bwakinyi mmutadiile makyenga.​—1 Yowano 4:8.

10. Satana baadi mutombokyele Yehowa naminyi?

¹⁰ Mu lupango lwa Edene, Diabulu badimbile Adama na Eeva. Aye nkudimbiila Efile Mukulu shi, mukunkushi e bubi. Nkwamba dimo’shi, Efile Mukulu baadi mufye Adama na Eeva kintu kibuwa. Satana baadi akyebe bakumiine’shi, aye nyi mukunkushi ebuwa kushii Yehowa, na’shi Adama na Eeva t’abaadi na lukalo lw’Efile Mukulu nya.​—Kibangilo 3:2-5; tala Kikumbashilo 27.

11. Lukonko kinyi alutungu‘shi twalule?

¹¹ Adama na Eeva abaadi bapele kukookyela Yehowa na abo nkumutombokyela. Abaadi bamone’shi abo banabeene be na matalwa a kwata kitshibilo pabitale kibuwa na kibubi. A Yehowa baadi mulombeene kulesha naminyi’shi bano ba ntomboshi abaadi balwishe, n’ashi aye nyi auku kibuwa bwetu?

12, 13. (a) Bwakinyi Yehowa tabaadi mwipe Adama na Eeva? (b) Bwakinyi Yehowa mmutadiile Satana bwa kukunkusha nsenga? Bwakinyi mmutadiile bantu bekunkushe abo banabeene?

 ¹² P’abalwishishe Adama na Eeva, Yehowa ta mmwibayipe nya. Anka, baadi mwibatadiile bwashi batande bana. Aye nkukita’nyi mushindo wa’shi bana ba Adama na Eeva basangule abakumiina bu mukunkushi aabo. Mpàngo ya Yehowa ibaadi’shi nsenga yiule na bantu bapwidikye, na sunga Diabulu akita naminyi yaya mpàngo ibaadi na kya kulombana.​—Kibangilo 1:28; Yeeshaya 55:10, 11.

¹³ Satana baadi mwele mpaka na Yehowa kumpala kwa binunu bya ba miikeyilu. (Yoobo 38:7; Ndanyele 7:10) Ndjo, Yehowa nkulekyeela Satana kipindji bwa kulesha su myanda ibaadi mwakule ngya binyibinyi. Aye nkulekyeela’nyi bantu kipindji bwashi bakite yabo mbulamatadi ku bukunkushi bwa Satana bwa kumona su mbakumbeene koobesha kushii bukwashi bw’Efile Mukulu.

14. Kutadiila’shi kipindji kikile nkutuushe bipeta kinyi?

¹⁴ Munda mwa bipwa binunu na binunu bantu mbatompe kwikunkusha, anka ta mboobeshe nya. Mbimwenekye patooka’shi Satana e na madimi. Bantu be nka na lukalo lwa bukwashi bw’Efile Mukulu. Mutemuki Yeelemiya bakwile na kushinkamisha bino: “Yehowa, neûku’shi muntu ta mmulombêne kwiludika ê nabêne kalolo, ooo. T’e na su nkipaso kyadya kuludika matabula ê mwishinda di buwa.”​—Yeelemiya 10:23, EEM.

15, 16. (a) Bwakinyi Yehowa mmutadiile makyenga kipindji ki bula bino? (b) Bwakinyi Yehowa ta mmukimbe bya kupudisha nkalakashi yabadi bafwishe kwi Satana?

¹⁵ Bwakinyi Yehowa mmutadiile makyenga atungunukye kipindji ki bula bino? Bwakinyi ta mmwimikye myanda ibubi ikwete kukitshika? Mmubande  kulekekyeela’shi kipindji kikile bwa kulesha’shi bukunkushi bwa Satana tabwi kapu nya. Bantu mbatompe kukita mbulamatadi ya bipaso byooso kushi’bo koobesha. Sunga myanda ya siyanse na ya busendwe yenda kumpala ngofu, kukutwa kwa kululama, bulanda, bibeshi, na ngoshi bibafiimi kukila na bibabidi kala. Tatwi balombeene koobesha kwikunkusha atwe banabeene kushii Efile Mukulu.

¹⁶ Anka, Yehowa ta mmukimbe bya kupudisha nkalakashi yabadi bafwishe kwi Satana, mwanda kukita byabya kwi nka bu kukwatshisheena bukunkushi bwa Satana, na te kukita byabya nya. Dingi, bantu abadya kumona’shi be na bukome bwa koobesha kwikunkusha abo banabeene. Anka aa nyi mmadimi, na Yehowa ta mulombeene kwiakwatshisheena nya. Aye t’adimbaa.​—Beena-Ebelu 6:18.

17, 18. Yehowa akakitshi kinyi pabitale myanda yooso ibubi yabadi bafwishe kwi Satana?

¹⁷ Yehowa mulombeene kupudisha bubi booso butuukye ku buntomboshi bwa Satana na bantu su? Oolo. Kwi Efile Mukulu takwi ki bukopo nya. Aye auku nsaa y’akapu mpaka yooso ya Satana. Ndjo akekashe nsenga yooso mpaladiisu, bu bibaayidi ku kibangilo. Baaba booso “be mu ma-nyembo” bakasangukye. (Yowano 5:28, 29) Bantu t’abakakumbu sunga kufwa dimo nya. Yesu akapudisha myanda yooso ibubi yabadi bafwishe kwi Satana. Yehowa akamutumu bwashi “abutule mifubo ya Diabulu.” (1 Yowano 3:8, Kilombeeno kipya 2014) Atutumbula Yehowa bikata mwanda ku bukwashi bwa lwishinko lwaye, twi balombeene kumwiuka na kumusangula bu Mukunkushi etu. (Badika 2 Mpyeele 3:9, 10.) Byabya, patudi mu makyenga, etukwasha bwa kunyingiila.​—Yowano 4:23; badika 1 Beena-Kodinda 10:13.

¹⁸ Yehowa ta mmulombeene kwitukitshisha pa bukopo bwashi tumusangule bu mukunkushi etu nya. Mmupe bantu kya buntu; bulungantu bwa kwisangwila myanda.  Tubandeyi kutaluula akipushisha kino kya buntu ki na muulo kwatudi.

19. Nkya buntu kinyi kibuwa kyabadi betupe kwi Yehowa? Bwakinyi abitungu twikale na lutumbu bwa kino kya buntu?

¹⁹ Twi belekeene bikata na nyema mwanda Yehowa mmwitupe kya buntu kya kwisangwila myanda. Nyema tayi na kinangu kya kwisangwila myanda nya, anka atwe twi balombeene kusangula kipaso kyatudya kwikala, kwata kitshibilo kya kukumiina sunga kupela kusankisha Yehowa. Na dingi, tatwi bu byamo abikitaa nka byabebitumu nya. Twi na bulungantu bwa kusangula byatukyebe kwikala, na ba kuuku batukyebe kwikala nabo, na kyatukyebe kukita mu nshalelo etu. Yehowa akyebe’shi tusangeele muwa.

20, 21. Nkitshibilo kinyi kibuwa kyodi mulombeene kwata kubanga binobino?

²⁰ Yehowa akyebe’shi tumufule. (Mateo 22:37, 38) E nka bu nshe bana e na muloo wa kupusha mwan’aye amulungula’shi, “ne mukufule.” Nsaa ayakula mwana bino, alesha’shi kifulo kyaye akikatukila mwishimba kushi bu muntu abakitshisha pa bukopo. Yehowa mmwitupe bulungantu bwa kupela sunga kukumiina kumufubila. Satana, Adama na Eeva abaadi bapele Yehowa. Obe namu, we kutumika na bulungantu bwa kwisangwila myanda naminyi?

²¹ Fubila Yehowa na bulungantu boobe bwa kwisangwila myanda. Kwi binunu na binunu bya bantu basangule bwa kusankisha Yehowa na kupela Satana. (Nkindji 27:11) Nkinyi kyoodi mulombeene kukita su okyebe kwikala mu ndumbulwilo mupya a Efile Mukulu nsaa y’akakaasha makyenga ooso? Shapitre alondo akalula luno lukonko.