1, 2. Inogne ty fagnontenea ty ndaty maro naho fa misy loza?

MISY tanàgne raike niravae ty tsunami (riake miakatse amy i tanàgney). Nisy malaso nampipoake basy agnate fiangonagne sady nandratse naho namono ndaty maro. Nimate ty kansera ty rakemba raike managn’anake dime.

² Izao ty fagnontenea ty ndaty maro naho fa misy loza ndra voigne miseho: “Nagnino?” Maro ty magnontane ty anto’e mahavy ty tontolo toy ho feno fankalaignagne naho fijaleagne. Fa nagnontane izay ka vao rehe?

3, 4. a) Inogne ty raha nagnontenea i Habakoka? b) Le akore ty navale i Jehovah aze?

³ Rehafe ty Baiboly fa nisy lahilahy nanam-pinoagne nagnontane izay an’Andrianagnahare. Izao ohatse ty nagnontenea i Habakoka mpaminany: “Nagnino raho ampagnente’o raha ratio, vaho vazohoe’o avao ka o haratiagneo? Nagnino ty amako eo misy rotake naho hampiarotegneo, le nagnino ka misy fanoitoigne naho fandiedietseo?”—Habakoka 1:3.

⁴ Treantikagne amy Habakoka 2:2, 3 ao ty namalean’Andrianagnahare ty fagnontenea i Habakoka. Treantikagne ao ka fa nampitamà Reke fa handamigne i raha manahiragney. Teà i Jehovah vata’e o ndatio. Hoe ty Baiboly: “Ie ro miatrake anareo.” (1 Petera 5:7) Mihoatse ty falaignantikagne o fijaleagneo ty falaigna’Andrianagnahare  aze. (Isaia 55:8, 9) Andao areke tikagne handineke tie: Nagnino ro maro ty fijaleagne amy ty tontolo toy?

5. Ino ty rehafe ty ankamaroa o mpagnanatse fivavahagneo miomba o fijaleagneo, faie ino ty ampianare ty Baiboly?

⁵ Mateteke ty mpitarike fivavahagne naho ty mpagnanatse fivavahagne ro mampianatse fa lahan’Andrianagnahare ty fijalea o ndatio. Va’e hirehake ty ndaty ila’e tie fa lahan’Andrianagnahare fa ela ty loza manjò o ndatio sady tsy ho fantantikagne ty anto’e. Va’e hisy ndaty hirehake ka naho fa misy ndaty mate tie nalaen’Andrianagnahare ho ama’e an-dagnitse agne. Agnisa izay ty ajaja kidikidy. Faie tsy maregne zay. Tsy boake amy i Jehovah ty raha raty miseho. Hoe ty Baiboly: “Faly i Andrianagnahare vata’ey ty hanao raty, sady faly i Tompo ty Herỳ ty hanao raha vilagne!”—Joba 34:10.

6. Ino ty mahavy o ndatio hagnomey tsiny an’Andrianagnahare amy ty hamaro o fijaleagneo?

⁶ Maro ty ndaty magnomey tsiny an’Andrianagnahare amy ty hamaro o fijaleagneo. Mieretseretse iareo fa Andrianagnahare ty mpitondra ty tontolo toy. Faie fa nianarantikagne tamy Toko faha-3 ao fa i Satana Devoly ty mpitondra ty tontolo toy.

7, 8. Ino ty anto’e mahamaro o fijaleagneo?

⁷ Hoe ty Baiboly: “Ty tontolo toy ro fehe i ratỳ.” (1 Jaona 5:19) Masiake sady magnoho-doza ty Satana, i mpitondra ty tontolo toỳ. ‘Mamitake ze tane misy ndaty’ reke. (Apokalypsy 12:9) Maro ty ndaty manahake aze. Izay ty anto’e raike mahavy ty tontolo toy ho feno vande, fankalaignagne naho famonoagne.

⁸ Mbe misy anto’e hafa ka mahavy ty tontolo toy ho feno fijaleagne. Namindra ota tamy ty tarana’e ty Adama naho i Eva tafara ty nivaliha iareo. Manan-tahigne  o ndatio, le mampijale ty hafa ka. Mateteke iareo ro te ho ambone ty hafa. Mialy iareo sady mandeha agn’aly ro mampijale ty ila’e. (Mpitoriteny 4:1; 8:9) Va’e hijale ka o ndatio naho “voan-draha amy ty andro tsy ampoize’e.” (Mpitoriteny 9:11) Va’e ho zoen-draha tampoke amy ty toeragne misy loza iareo ndra mete hisy raha raty hanjò iareo.

9. Nagnino tikagne ro matoky tie mbe misy anto’e soa kanao engà i Jehovah hisy o fijaleagneo?

⁹ Tsy i Jehovah ty mahavy o fijaleagneo. Tsy toko’e homeagne tsiny reke naho misy ty aly, malaso naho ty fampijaleagne ndaty. Tsy boake aman’Andrianagnahare o ezegnezen-taneo, naho ty tiobey mahery vaho ty ranobey. Va’e hieretseretse rehe tie: ‘Naho toe tompo ty hery ty Jehovah, nagnino tsy kalagna’e o lozao?’ Fantantikagne fa mikarakara antikagne ty Andrianagnahare sady mbe misy anto’e soa kanao engà’e hisy o fijaleagneo.—1 Jaona 4:8.

10. Inogne ty fagnaratiagne natao i Satana i Jehovah?

¹⁰ Finita i Devoly ty Adama naho i Eva tamy i tonda Edenay ao. Niharatie i Satana ty Andrianagnahare. Nirehafe’e tie Mpitondra tsy mahay Reke sady misy raha soa tsy teà’e homeigne i Adama naho i Eva. Teà i Satana hino iareo fa ty fitondrà’e ro soa sady tsy mipay an’Andrianagnahare iareo mirovaly.—Genesisy 3:2-5; henteo ty Fagnazavagne 27.

11. Inogne ty fagnonteneagne hovaleantikagne?

¹¹ Tsy nagnorike ty fagnanara i Jehovah ty Adama naho i Eva fa nivalike ama’e. Nieretseretse iareo fa managne fahefagne hanapa-kevetse ty soa naho ty raty.  Akore ty nagnaporofoa i Jehovah fa diso i mpivalike rey, fa i Jehovah raike avao ty mahafantatse ty hahasoa antikagne?

12, 13. a) Inogne ty tsy le avy le namonoa i Jehovah i mpivalike rey? b) Ino ty nahavy i Jehovah nienga i Satana hitondra ty tontolo toy naho ty nagnengà’e o ndatio hifampitondra?

¹² Tsy le avy le vinono i Jehovah ty Adama naho i Eva. Nengà’e hiterake iareo. Natao i Jehovah ze hahavy ty tarana i Adama naho i Eva hijobogne ze ho mpitondra iareo. Fagnirian’Andrianagnahare tihoe ho feno ndaty voririke ty tane toy sady ho avy eo zay ndra inogn’inogne ty atao i Devoly.—Genesisy 1:28; Isaia 55:10, 11.

¹³ Nanohetse i Jehovah tagnatreha ty anjely antapetrisa’e ty Satana. (Joba 38:7; Daniela 7:10) Nengà i Jehovah hoporofoe i Satana hey ty vande nanoe’e. Nengà’e hagnoregne fitondràm-panjakagne ambane ty fitariha i Satana ka o ndatio. Izay ty hahatreavagne tie ho soa vao ty fitondrà’e ndra tie tsy misy ty fagnampean’Andrianagnahare.

14. Inogne ty nivoaporofo ampara izay?

¹⁴ Fa agnarivo taogne ty nifampitondrà o ndatio, faie tsy nisy raha nanjary. Nivoaporofo tie mpavande ty Satana sady vata’e mipay ty fagnampean’Andrianagnahare o ndatio. Maregne ty reha i Jeremia mpaminany tie: “O Jehovah, fantako fa tsy hay o ndatio ty lalagne homba’e. Tsy namboaregne hivey vatagne avao ka o ndatio.”—Jeremia 10:23.

15, 16. a) Inogne ty mbe agnengà i Jehovah o fijaleagneo hisy? b) Inogne ty tsy nagnarena i Jehovah ty raha manahiragne nanoe i Satana?

¹⁵ Inogne ty mbe agnengà i Jehovah o fijaleagneo hisy? Inogne ty tsy ikalagna’e o raha ratio? Mipay  fotoagne lavalava ty hagnaporofoagne tie tsy mahay mitondra ty Satana. Nengàgne hagnandragne fitondràmpanjakagne isan-karaza’e o ndatio, faie tsy nisy nanjary. Mbe misy mihoatse ty taloha avao ty tsy rare’e, ty fahantragne, ty malaso naho ty aly ndra tie fa mandroso bey ty siansa naho ty tekinolojia. Tsy mahavita minday ty vatantikagne tikagne naho tsy misy an’Andrianagnahare.

¹⁶ Faie tsy nagnaregne ty raha manahiragne nanoe i Satana ty Jehovah. Manjare hoe raha manohagne ty fitondrà i Satana reke naho nanao izay sady tsy mba hanao izay. Sady hino ka o ndatio tie soa ty fitondrà’e. Faie vande zay sady tsy hagnampe aze amy izay ty Jehovah. Tsy mahay mandagnitse ty Jehovah.—Hebreo 6:18.

17, 18. Hatao i Jehovah akore ze raha raty natao i Satana?

¹⁷ Hahavita hagnafake ty raha raty vokatse ty fivaliha i Satana naho o ndatio vao ty Jehovah? Eka. Mahavita ze kila raha ty Andrianagnahare. Mahafantatse ty fotoagne hamalea’e ty fanohera i Satana ty Jehovah. Hatao i Jehovah paradisa manahake ty taloha amy izay ty tane toy. Hovelomegne iaby “ze an-kibory agne.” (Jaona 5:28, 29) Tsy harare sady tsy ho mate sasa o ndatio fa hagnafake ze raha raty natao i Satana ty Jesosy. Hampiasa i Jesosy mba “handrava ty asa i Devoly” ty Jehovah. (1 Jaona 3:8) Fale tikagne fa mbe manam-paharetagne amantikagne ty Jehovah. Mbe afake mahafantatse aze naho mbe afake manapa-kevetse tikagne tie ie ty Mpitondra antikagne. (Vakio 2 Petera 3:9, 10.) Afake magnampe antikagne hiaretse reke ndra tie mijale tikagne.—Jaona 4:23; vakio 1 Korintianina 10:13.

¹⁸ Tsy teré i Jehovah hijobogne aze ho Mpitondra tikagne. Nimea’e safily malalake o ndatio. Andao tikagne  handineke tie inogne ty dika ze i fagnomezagne sarobily izay amantikagne.

19. Inogne ty fagnomezagne miambake nimey i Jehovah antikagne, le nagnino zay ro toko’e hahafale antikagne?

¹⁹ Fagnomezagne miambake boake amy i Jehovah ty fahaiagne mifily anagnantikagne. Faie tsy manahake izay o bibio fa ze namboaran’Andrianagnahare aze avao ro atao’e. Afake mijobogne ze ho fiaignantikagne tikagne sady afake manapa-kevetse ndra hampifale i Jehovah ndra tsy hampifale aze. (Ohabolana 30:24) Tsy manahake ty masina manao ze raha ampanoegne aze avao tikagne. Afake mijobogne ze raha teàntikagne hatao tikagne. Agnisa izay ty ndaty ho ragnetentikagne naho ty raha teàntikagne hatao amy ty fiaignagne. Teà i Jehovah ho fale amy ty fiaignagne tikagne.

20, 21. Inogne ty fanapaha-kevetse soa azo’o atao amy izao?

²⁰ Teà i Jehovah ho tea aze tikagne. (Matio 22:37, 38) Mahafale ty rae ty maharey ty ana’e mirehake tie: “Teàko rehe baba”, naho boake amy ty fo’e ty anoa’e izay fa tsy tinere. Hambagne amy izay ka ty tsapa i Jehovah. Mea i Jehovah safily malalake tikagne ndra hanompo aze ndra tsy hanompo aze. Nijobogne ty handietse i Jehovah ty Satana, i Adama naho i Eva. Akore ka ty hampiasa’o ty safily malalake anagna’o?

²¹ Ampiasao mba hanompoagne i Jehovah ty azo. Ndaty an-tapetrisa’e ty fa nijobogne hampifale i Jehovah sady mandietse i Satana. (Ohabolana 27:11) Inogne ty toko’e hatao’o amy izao mba ho avy amy i tane vaovaoy ao rehe, naho fa hagnafake o fijaleagneo ty Andrianagnahare? Hovaleagne amy ty toko manonjohy itoy o fagnonteneagne iohoe.