1, 2. Se a te fesili e fai mai ne tino e tokouke?

NE FAKAMASEI ne se galu lasi se fakai. Ne fanafana ne se tagata a tino i loto i se falesā, kae ne pa‵kia kae ‵mate i ei a nisi tino. Ne mate se mātua i te masaki ko te kenisa, kae tiaki mai ana tama‵liki e tokolima.

² Kafai e ‵tupu a fakalavelave io me ne mea fakafanoa‵noa penā, e fesili aka a tino e tokouke, “Kaia?” E fesili mai a tino e tokouke me kaia ko ‵fonu ei te lalolagi i uiga fakatakalia‵lia mo logo‵maega. Kai mafaufau aka eiloa koe ki te mea tenā?

3, 4. (a) Ne a fesili ne fai atu ne Sapakuka? (e) Se a te tali a Ieova ki a ia?

³ I te Tusi Tapu, e tauloto tatou me i tino kolā e fakatuanaki malosi ki te Atua e fesili mai ne latou a vaegā fesili penā. E pelā me se fakaakoakoga, ne fesili atu te pelofeta ko Sapakuka ki a Ieova: “Kaia e fai ei ne koe ke kilo atu au ki amioga ma‵sei? Kaia e talia ei ne koe a amioga fakasaua? Kaia e isi ei ne fakamaseiga mo fakasauaga i oku mua? Kae kaia ko uke ei a kinauga mo taua?”—Sapakuka 1:3.

⁴ I te Sapakuka 2:2, 3, e fai‵tau tatou i ei ki te tali a te Atua ki fesili a Sapakuka mo Tena tautoga me ka faka‵tonu aka ne ia te tulaga tenā. E alofa malosi a Ieova ki tino. E fai mai te Tusi Tapu: “E atafai a ia ki a koutou.” (1 Petelu 5:7) A te tonuga loa, e sili atu te takalialia o te Atua ke kilo atu ki logo‵maega i lō tatou. (Isaia 55:8, 9) Tela la, ke sau‵tala nei tatou ki te fesili, Kaia ko uke ‵ki ei a logo‵maega i te lalolagi?

5. Ne a pati a faiakoga fakalotu e tokouke e uiga ki logo‵maega? Se a te mea e akoako mai i te Tusi Tapu?

⁵ E masani o fai mai sāle a faifeau, mo faiakoga fakalotu me ko te loto eiloa o te Atua ke logo‵mae a tino. E fai mai nisi tino me i mea katoa kolā e ‵tupu ki se tino, e aofia i ei a mea fakafanoanoa, ne mea kolā ko oti ne fakaiku ne te Atua ke ‵tupu kae e se mafai eiloa o malamalama tatou i te pogai. Kae e fai mai nisi tino me e ‵mate a tino, e aofia ei a tama‵liki fo‵liki, ko te mea ke ‵nofo fakatasi latou mo te Atua i te lagi. Kae e se tonu te mea tenā. E se ko Ieova e fai ne ia ke ‵tupu a mea ma‵sei. Muna a te Tusi Tapu: “E seki mafaufau eiloa a te Atua tonu ke fai ne ia a faifaiga ma‵sei, ke fai ne te Atua Malosi Katoatoa a te mea ‵se!”—Iopu 34:10.

6. Kaia e ‵losi atu ei a tino e tokouke me e māfua mai i te Atua a logo‵maega katoa i te lalolagi?

⁶ E ‵losi atu a tino e tokouke me e māfua mai i te Atua a logo‵maega katoa i te lalolagi me mafau‵fau latou me ko te Atua te pule o te lalolagi. Kae pelā mo te mea ne tauloto ne tatou i te Mataupu e 3, a te pule tonu o te lalolagi ko Satani te Tiapolo.

7, 8. Kaia ko uke ‵ki ei a logo‵maega i te lalolagi?

⁷ E fai mai te Tusi Tapu ki a tatou me i “te lalolagi kātoa ko nofo mai lalo i te pule a te tino masei.” (1 Ioane 5:19) A te pule o te lalolagi nei ko Satani, se tino fakasaua kae masei. “E takitaki ‵se ne ia te lalolagi nofoaki kātoa.” (Fakaasiga 12:9) E tokouke a tino e fakaakoako ki a ia. Kae ko te mea tenā se pogai fua e tasi ko ‵fonu ei te lalolagi i te loi, takalialiaga, mo mea ma‵sei.

⁸ E isi ne nisi pogai ko ‵fonu ei te lalolagi i logo‵maega. Mai tua o te ‵tekeatuga a Atamu mo Eva, ne faka‵solo atu ne lāua te agasala ki lā tama‵liki. Kae ona ko te agasala, ko logo‵mae ei a tino ona ko mea e fai ne nisi tino. E masani  latou o fai ke sili atu latou i nisi tino. E ‵fusu, e olo ki taua, kae fia ‵mafi ki nisi tino. (Failauga 4:1; 8:9) Nisi taimi e logo‵mae a nisi tino ona ko “taimi o fakalavelave mo mea ‵tupu fakafuasei.” (Failauga 9:11) Kafai e ‵nofo atu latou i te koga ‵se i te taimi ‵se, e mafai o ‵tupu a fakalavelave mo nisi mea ma‵sei ki a latou.

9. Kaia e mautinoa ei i a tatou me isi se pogai ‵lei ne talia ei ne Ieova ke tumau a logo‵maega?

⁹ E se māfua mai eiloa i a Ieova a logo‵maega. E se ‵tau o ‵losi atu me ne māfua mai i a ia a taua, amioga solitulafono mo faifaiga sē ‵lei. E se māfua mai i te Atua a fakalavelave o te natula e pelā mo mafuie, matagi ma‵losi mo lofiaga. Kae kāti ka mafaufau aka koe, ‘Kafai a Ieova ko te ‵toe tino malosi i te iunivesi, kaia e se fakagata ei ne ia a mea matagā konei e ‵tupu?’ E iloa ne tatou me atafai malosi mai a te Atua ki a tatou, tela la, e ‵tau o isi se pogai ‵lei ne talia ei ne ia ke tumau a logo‵maega konei.—1 Ioane 4:8.

10. Se a te ‵losiga ne fai ne Satani e uiga ki a Ieova?

¹⁰ Ne takitaki ‵se ne te Tiapolo a Atamu mo Eva i te fatoaga o Etena. Ne ‵losi atu a Satani me i te Atua se Pule masei. Ne fai atu a ia me isi se mea ‵lei e ‵funa ne te Atua mai i a Atamu mo Eva. Ne manako a Satani ke tali‵tonu lāua me e sili atu te ‵lei o tena pulega i lō Ieova kae e se manakogina ne lāua a te Atua.—Kenese 3:2-5; onoono ki te Fakamatalaga Fakaopoopo i te 27.

11. Se a te fesili e ‵tau o tali aka ne tatou?

¹¹ Ne seki faka‵logo a Atamu mo Eva ki a Ieova kae ne ‵teke atu ki a ia. Ne mafau‵fau lāua me maua ne lāua te aiā ke fai a fakaikuga mō lāua e uiga ki te mea tonu mo te mea sē tonu. Ne fakamaoni aka pefea ne Ieova me e se tonu te mea ne fai ne tino ‵teke konei, kae ko ia fua e iloa ne ia te ‵toe mea ‵lei mō tatou?

12, 13. (a) Kaia ne seki fakaseai fakavave atu ei ne Ieova a tino ‵teke? (e) Kaia ne talia ei ne Ieova ke pule a Satani ki te lalolagi nei kae ke pule a tino ki a latou eiloa?

 ¹² Ne seki fakaseai fakavave atu ne Ieova a Atamu mo Eva. I lō te fai penā, ne talia ne ia ke fai ne lā tama‵liki. Kae ne tuku atu ne Ieova ke filifili aka ne tama‵liki a Atamu mo Eva a te tino e ma‵nako latou ke fai mo olotou pule. Ne manako eiloa a Ieova ke faka‵fonu te lalolagi ki tino ‵lei katoatoa, kae ka tupu eiloa te mea tenā faitalia a taumafaiga e fai ne te Tiapolo.—Kenese 1:28; Isaia 55:10, 11.

¹³ Ne fai a ‵losiga a Satani e uiga ki a Ieova i mua o te fia miliona o agelu. (Iopu 38:7; Tanielu 7:10) Tenā ne tuku atu ei ne Ieova ki a Satani se taimi ke fakamaoni aka me e tonu tena ‵losiga io me ikai. Ne tuku atu foki ne ia ki tino te avanoaga ke faka‵tu olotou malo mai lalo i te takitakiga a Satani ke iloa aka me e mata, ka manuia eiloa latou e aunoa mo te fesoasoani o te Atua io me ikai.

14. Ne a mea ko oti ne fakamaoni aka ne tatou mai tua o se fia afe tausaga?

¹⁴ Ko oti ne taumafai a tino ke pule atu ki a latou eiloa i se fia afe tausaga, kae ne seki manuia eiloa latou. Ko oti ne fakamaoni aka i a Satani se tino loi. E ma‵nako a tino ki te fesoasoani o te Atua. E tonu eiloa te pelofeta ko Ielemia i ana pati: “E iloa ‵lei ne au, e Ieova, me e se mafai o pule te tagata i tena auala. E seai se pule a te tagata ke fakatonutonu ne ia tena auala.”—Ielemia 10:23.

15, 16. (a) Kaia ne talia ei ne Ieova ke tumau a logo‵maega mō se taimi leva ‵ki? (e) Kaia ne seki faka‵lei aka ne Ieova a fakalavelave ne fakamāfua aka ne Satani?

¹⁵ Kaia ne talia ei ne Ieova ke tumau a logo‵maega mō se taimi leva ‵ki? Kaia e se fakagata aka ei ne ia a mea ma‵sei? Ne manakogina se taimi tai leva ke fakamaoni aka ei te masei o te pulega a Satani. Ko oti ne tofotofo aka a tino ki  vaegā pulega kese‵kese, kae e seki manuia. E ui eiloa ne gasolo aka te lotou ‵poto i mea tau saienisi mo poto ‵fou, kae ko uke atu a faifaiga sē fakamaoni, te mativa, amioga solitulafono mo taua i aso nei i lō aso mua. E se mafai eiloa o pule atu a tatou ki a tatou eiloa mo te manuia e aunoa mo te Atua.

¹⁶ Kae ne seki faka‵lei aka ne Ieova a fakalavelave kolā ne māfua mai i a Satani. Kafai e faka‵lei aka ne ia, ko tena uiga ko ‵lago atu a te Atua ki te pulega a Satani, kae ka se fai eiloa ne Ia te mea tenā. E se gata i ei, ka tali‵tonu a tino me e mafai ne latou o pule atu ki a latou eiloa mo te manuia. Kae ko te mea tenā se loi, kae ka se ‵lago atu foki a Ieova ki te mea tenā. E se mafai a ia o loi.—Epelu 6:18.

17, 18. Ne a mea ka fai ne Ieova ki fakamaseiga katoa ne fai ne Satani?

¹⁷ E mata, e mafai ne Ieova o faka‵lei aka a fakamaseiga katoa kolā ne māfua mai i te ‵tekeatuga a Satani mo tino? Ao. E mafai o fai a mea katoa i te fesoasoani o te Atua. E iloa ne Ieova māfai ko oti ne tali faka‵lei aka a ‵losiga katoa ne fai ne Satani. Tenā ko fai ei ne ia te lalolagi ke liu palataiso, e pelā eiloa mo te mea ne ‵tau o tupu. A tino katoa “i loto i tanuga” ka toe faka‵tu aka. (Ioane 5:28, 29) A tino ka se ma‵saki io me ‵mate. Ka toe faka‵lei aka ne Iesu a fakamaseiga katoa kolā ne fai ne Satani. Ka fakaaoga ne Ieova a Iesu “ke lepe ne ia a galuega a te Tiapolo.” (1 Ioane 3:8) E fia‵fia tatou me ne kufaki eiloa a Ieova i a tatou talu mai te kamataga ko te mea ke mafai o iloa ne tatou a ia kae ke mafai o fai ‵tou fakaikuga me ma‵nako tatou ke fai a ia mo fai ‵tou Pule. (Faitau te 2 Petelu 3:9, 10.) Kafai e logo‵mae tatou, e fesoasoani mai a ia ke kufaki tatou.—Ioane 4:23; faitau te 1 Kolinito 10:13.

¹⁸ E se faimālō ne Ieova tatou ke filifili ne tatou a ia ke fai mo fai ‵tou Pule. Ne tuku atu ne ia ki tino a te meaalofa ko  te saolotoga ke fai olotou filifiliga. Ke iloilo nei ne tatou te aoga o te meaalofa tāua tenei ki a tatou.

19. Se a te meaalofa gali ne tuku mai ne Ieova ki a tatou? Kaia e ‵tau ei o loto fakafetai tatou ki te meaalofa tenei?

¹⁹ A te meaalofa gali a Ieova ko te saolotoga ke fai ‵tou filifiliga e fai ei ke tu ‵kese tatou mai i manu. E fai ne latou a mea e ‵tusa mo te lotou atamai, kae e mafai o filifili aka ne tatou a te vaegā olaga e ma‵nako tatou ki ei kae fakaiku aka me fia fakafiafia atu tatou ki a Ieova io me ikai. (Faataoto 30:24) E se gata i ei, a tatou e se ‵pau mo masini kolā e fai fua a mea kolā ko oti ne fakapolokalame ke fai ne latou. E maua ne tatou te saolotoga ke fai ‵tou filifiliga e uiga ki te vaegā tino e ma‵nako tatou ki ei, taugasoa e ma‵nako tatou ki ei, mo mea e ma‵nako tatou o fai ki ‵tou olaga. E manako a Ieova ke fia‵fia tatou ki te olaga.

20, 21. Se a te ‵toe fakaikuga ‵lei e mafai o fai nei ne koe?

²⁰ E manako a Ieova ke a‵lofa tatou ki a ia. (Mataio 22:37, 38) E fai a ia pelā me se tamana telā e fiafia ma lagona ne ia tena tamaliki e fai atu penei, “Au e alofa ki a koe,” mai tena loto eiloa kae e se ona ko te mea e faimālō ke fai penā. Ne tuku mai ne Ieova te saolotoga ke filifili aka me tavini tatou ki a ia io me ikai. Ne filifili aka ne Satani, Atamu, mo Eva ke ‵teke latou ki a Ieova. Ka fakaaoga pefea ne koe te meaalofa ko te saolotoga ke fai au filifiliga?

²¹ Fakaaoga tou saolotoga ke tavini atu ki a Ieova. E lau i miliona a tino ko oti ne fakaiku aka ke tavini atu ki te Atua kae ‵teke ki a Satani. (Faataoto 27:11) Ne a au mea e mafai o fai i te taimi nei ko te mea ke nofo atu koe i te lalolagi fou a te Atua māfai ko fakaseai ne ia a logo‵maega? Ka tali mai i te suā mataupu te fesili tenā.