1, 2. Etthu xeeni atthu anceene aniikoha aya?

MITTETTHE sinceene sinninyaanyiwa mwaha wa itetere. Nave materrorista annipaha ikerexa, yaavulalihaka ni owiiva atthu anceene. Kanser onniwiiva aximaama onaahiya anamwane aryeene ikwaasuni.

² Vaavo ihasara iyo sinikhumelela aya, atthu anceene anniikoha so: “Nthowa xeeni?” Anamunceene anniikoha wira: Xeeni olumwenku ola osaren’ya aya onyokhana ni ohaawa? Niireke mootoko wiikoha siiso?

3, 4. (a) Nikoho xeeni aapanke awe Habakuki? (b) Yehova aakhunle sai?

³ MBiibiliyani, ninnisoma voohimya sa atthu yaamwaamini vanceene Muluku, yaawo yaapanke makoho manceene. Mwa ntakiheryo, profeta Habakuki aahimukoha Yehova wira: “Munkòniherya-ni sotakhala? Nyuwo munniwona atthu epuheriwaka, khuhiyàwakiha. Okherekhere waka, kinòna opwetexiwa n’uwali pahi: atthu othene anninyakulihana, annikumiheryana ekhotto”.​—Habakuki 1:3.

⁴ Eliivuru ya Habakuki 2:2, 3, ninniphwanya moota Muluku onaakhula awe makoho a Habakuki ni moota saarowa awe olokiherya makhalelo ale. Yehova onnaaphenta vanceene apinaatamu. Biibiliya onihimya so: “Owo onnokhapelelani”. (1 Pedru 5:7) Tthiri, Muluku khivanimusivela waaweha atthu ahaawaka. (Yesaya 55:8, 9) Vano, nrowe nithokorerye nikoho nna: Xeeni olumwenku osaren’ya aya ohaawa?

5. Moovarihana ni awiixuttihi a itiini, ti pani onikumiherya ohaawa? Nto Biibiliya oniixuttiha exeeni?

⁵ Mapastoore, mapaatiri, ni awiixuttihi a itiini, ikwaha  sinceene anihimya wira Muluku toniwiiriha atthu ohaawa. Akina anihimya wira ihasara sinikhumelela, ni khula etthu enimwiiraneela mutthu, Muluku aahilepa khalairu nto itthu iyo ovila wiiwexexa. Nlelo akina anihimya wira anamwane anikhwa, anirowa wiirimu wira yakhaleke ni Muluku. Masi eyo khahiyo ekeekhai. Maana Yehova khahiyo tonikumiherya itthu sootakhala. Biibiliya onihimya wira: “Muluku khivo yotakhala enìrawe: Nanwerya sothene khanttheka”.​—Yobi 34:10.

6. Xeeni atthu anceene aninvaha aya nthowa Muluku mwaha wa ohaawa wahu?

⁶ Atthu anceene anninvaha nthowa Muluku mwaha wa ohaawa wahu, maana anuupuwela wira Muluku tonilamulela olumwenku ola. Masi nihiixutta Muru 3, wira Satana Diabo tonilamulela olumwenku ola.

7, 8. Xeeni ohaawa osaren’ya aya olumwenku ola?

⁷ Biibiliya onihimya wira “elapo yothene enniweriwa ni mutakhali”. (1 Yohani 5:19) Satana, yoowo onilamulela olumwenku ola mutakhali ni khorina othunku. Nave ti yoowo ‘oniwototha atthu othene’. (Wisupulula 12:9) Atthu anceene animutakiha yoowo. Ti nthowa naya olumwenku ola osaren’ya aya wootha, onyokhana, ni otakhala.

⁸ Aakhala-tho mathowa makina aniiriha osareya ohaawa olumwenku ola. Nuumala Adamu ni Eva ommwareela Muluku, awo ahaaraviha etampi anaaya. Mwaha wa etampi, apinaatamu annaakumiherya maxakha akhwaaya. Maana ikwaha sinceene aniixoona okhala a faita waavikana atthu akina. Awo annikhaliherya ikhotto, anniwana, ni annaahaaxa atthu akina. (Musuweli 4:1; 8:9) Ikwaha sikina atthu annihaawa mwaha wa “oreriwa n’utakhaliwa”. (Musuweli 9:11) Mutthu pooti omwiiraneela ehasara aahiiso etthu yoohiloka, mwaha wookhala nipuro ni okathi woohiloka.

9. Exeeni ennikupaliha wira Yehova ookhalana mathowa ooloka animwiiriha waahiya apinaatamu ahaawaka?

 ⁹ Yehova khahiyo tonikumiherya ohaawa. Nave khahiyo tonikumiherya ikhotto, ikrime, ni ohaaxana. Muluku khonikumiherya ihasara, itetere, munamukhaya, ni osarya wa maasi. Woonasa wene muniikoha so: ‘Akhala wira Yehova toowerya waavikana atthu otheene, nto xeeni ohinikhoottiherya awe itthu sootakhala sinikhumelela?’ Tthiri Muluku ookhalana mathowa ooloka animwiiriha waahiya apinaatamu ahaawaka, maana Muluku onninikhapelela vanceene.​—1 Yohani 4:8.

10. Satana anvaanyinhe sai Yehova?

¹⁰ OJardim ya wEedeni Diabo aahaawoka Adamu ni Eva. Satana aahimootherya Muluku omuhimyaka okhala Namalamulela ootakhala. Nave, aahimootherya Muluku wira aakhoottiherya Adamu ni Eva itthu sooloka. Satana aaphavela owiiriha Adamu ni Eva okupali wira owo tokhanle namalamulela oolokexa onvikana Yehova, ni wira khivanitthuneya otthara malakiheryo a Muluku.​—Maphattuwelo 3:2-5; nwehe Enoota 27.

11. Nikoho xeeni ninreerela ahu waakhula?

¹¹ Mwaha wa ohiiwelela wa Adamu ni Eva, eyo yaahiwiiriha ommwareela Yehova. Awo yuupuwela wira vano yaahikhalana ehakhi ya othanla ele eri yooloka ni yoohiloka. Nto Yehova aarowa wooniherya sai wira Adamu ni Eva yaahivonya ni wira Yehova onnisuwela ele eri yooloka wa hiyo?

12, 13. (a) Xeeni Yehova ohaapwetenxe awe okathi yoole anammwareya ale? (b) Xeeni Yehova omweemereryaka Satana olamulela olumwenku ola ni waahiya apinaatamu yiilamulelaka?

¹² Yehova khaapwetenxe okathi yoole Adamu ni Eva.  Masi aaheemererya wira yaayareke anamwane. Nto, Yehova ohaavaha eparakha anaaya Adamu ni Eva wira amuthanle ole animphavela aya wira aalamuleleke. Yehova aaphavela wira elapo ela esareye apinaatamu oohittheka, tthiri eyo enimwiiraneya hata Diabo eereryaka okhoottiherya.​—Maphattuwelo 1:28; Yesaya 55:10, 11.

¹³ Satana aahinvaanyiha Yehova ohoolo wa malaikha imilyau sinceene. (Yobi 38:7; Daniyeli 7:10) Nto Yehova aahinvaha Satana okathi wira ooniherye ovaanyiha wawe waari wekeekhai. Nave, ohaavaha apinaatamu okathi wira arumeele khuta eguvernu yeettihiwaka ni Satana, wira awehe akhala wira yaamukhumela saana ahikhaliheriwaka ni Muluku.

14. Olamulela wa Satana woonihenrye exeeni?

¹⁴ Iyaakha ikonto sinceene sa olamulela wa apinaatamu, sihooniherya wira atthu khaniwerya wiilamulela. Nave, Satana ohooniherya okhala nawoothe. Apinaatamu anitthuneya okhaliheriwa ni Muluku. Profeta Yeremiya aahihimya ekeekhai oriki: “Apwiya! Kosuwela sana wira mutthu khansuwela emalelo awe: owo khanwerya wettiha mavalo awe”.​—Yeremiya 10:23.

15, 16. (a) Xeeni Yehova ohalaka weemererya ohaawa ovikanihaka okathi munceene? (b) Xeeni Yehova vahinikhoottiherya awe mixankiho sinikumiheriwa ni Satana?

¹⁵ Xeeni Yehova ohalaka weemererya ohaawa ovikanihaka okathi munceene? Xeeni ohimmaliha awe itthu sootakhala siniiraneya? Yehova oohiya okathi munceene wira ooniherye wira Satana khoniwerya olamulela. Apinaatamu aheererya inamuna soovirikana sa olamulela, masi khanikhumela saana. Nnaamwi akenle ene vahoolo voohimya sa siensia ni etekonologia, masi onootepa  wuncerereya ohikhala exariya, ohaawa, ikrime, ni ikhotto sinootepa vano ovikana khalai. Tthiri apinaatamu khanikhumela saana ahilamuleliwaka ni Muluku.

¹⁶ Nave Yehova khonikhoottiherya mixankiho sinikumiheriwa ni Satana maana khonikhaliherya olamulela wa Satana, ni khonikhala-khala okhaliheryaka. Nave apinaatamu anikupali wira anookhumela saana yiilamulelaka. Tthiri iwo wiiwoka, maana Yehova khonikhaliherya olamulela wa apinaatamu ni wa Satana. Nave-tho Muluku khonootha.​—aHéberi 6:18.

17, 18. Yehova onrowa omaliha sai maxakha otheene akumiheriwe ni Satana?

¹⁷ Niireke Yehova onoowerya olokiherya ohaawa wotheene okumiheriwe mwaha wa omwareya wa Satana ni apinaatamu? Aayo. Tthiri khiivo Muluku enooceela awe. Yehova onnisuwela moota woomala-maliha mixankiho sotheene sikumiheriwe ni Satana. Nuumala-vo onrowa wiiriha elapo ela okhala eparayiisu, ntoko saarya aya wanipacerya. Nto otheene ari “mmahiye” anuupuweliwa anrowa ohihimuxiwa. (Yohani 5:28, 29) Atthu khanrowa owereiwaka nnakhala okhwa. Yesu onrowa omaliha maxakha otheene akumiheriwe ni Satana. Yehova onrowa omurumeela Yesu “wira apwetexe miteko sa Satana”. (1 Yohani 3:8) Ninnixukhurela vanceene mwaha woowi Yehova onninipixerya murima wira nimusuwele ni omuthanla okhala Namalamulela ahu. (Mmusome 2 Pedru 3:9, 10.) Hata okathi yoole onihaawa ahu, Yehova onninikhaliherya ovilela mixankiho iyo.​—Yohani 4:23; mmusome 1 aKorinto 10:13.

¹⁸ Nto Yehova khonnikhanyererya wira nimuthanle okhala Namalamulela ahu. Maana oonivaha othanla mootaphuwa. Nrowe nthokorerye ele othanla mootaphuwa enitaphulela aya wa hiyo.

19. Etthu xeeni yootepa oreera evahiwa ahu ni Yehova? Xeeni vanitthuneya ahu oxukhurela yoovaha ela?

¹⁹ Othanla mootaphuwa yoovaha yootepa oreera evahiwa ahu ni Yehova, yeeyo enniiriha ovirikana ni axinama. Maana axinama khanuupuwela, masi hiyo ninnuupuwela ni pooti othanla mweettelo oniphavela ahu otthara aahiiso nnoowerya othanla omuhakalaliha Yehova. (Miruku 30:24) Nave hiyo noovirikana ni maakina okhala wira maakina anivara ele epakeliwa aya paahi. Hiyo nookhalana othanla mootaphuwa, ni nnoowerya othanla mweettelo oniphavela ahu otthara, apatthani anaaphavela ahu, ni moota woweettiha okumi ahu. Yehova oniphavela wira nihakalaleke.

20, 21. Yoothanla xeeni yooloka enitthuneya ahu opaka?

²⁰ Yehova oniphavela wira nimphenteke. (Matheyo 22:37, 38) Yehova ori ntoko tiithi yoole onisiveliwa omwiiwa mwanawe oriki: “Kinnoophentani” masi ohimyaka eyo ni murima awe wotheene, ni moohikhanyereriwa. Nave Yehova oonivaha othanla mootaphuwa hata niphavelaka omurumeela aahiiso nihiphavelaka. Satana, Adamu ni Eva yaahithanla omukhootta Yehova. Vano, nyuwo munrowa orumeela sai yoovaha ela enikhuma wa Muluku?

²¹ Murumeele saana yoovaha ela muthanlaka omurumeela Yehova. Aakhala atthu imilyau sinceene yaawo anithanla omuhakalaliha Muluku, ohiya Satana. (Miruku 27:11) Nto muhaana opaka exeeni wira mukele elapo esya yeeyo Muluku onrowa awe omaliha ohaawa wotheene? Muru onittharelana, onrowa waakhula nikoho nna.