1, 2. Ano an iginpapakiana han damu nga tawo?

GINBUNGKAG hin tsunami an usa nga lugar. Usa nga tawo an namusil ha sulod hin singbahan ngan may mga nasamaran ngan namatay. Usa nga nanay nga may lima nga anak an namatay tungod hin kanser.

² Kon nahitatabo an sugad hito nga mga kalamidad o trahedya, damu nga tawo an nagpapakiana, “Kay ano?” Damu an napakiana kon kay ano nga an kalibotan puno gud hin kangalas ngan pag-antos. Nagpakiana ka na ba liwat hin sugad hito?

3, 4. (a) Ano an mga pakiana ni Habakuk? (b) Ano an baton ha iya ni Jehova?

³ Ha Biblia, nahibaroan naton nga may mga tawo nga may daku nga pagtoo ha Dios nga nagpakiana liwat hin sugad hito. Pananglitan, hi propeta Habakuk nagpakiana kan Jehova: “Kay ano nga imo ako ginpapakita han sayop nga buhat? Ngan kay ano nga imo gintutugotan an panalumpigos? Kay ano nga aada ha akon atubangan an kabungkagan ngan kamadarahog? Ngan kay ano nga damu an araway ngan kasamok?”​—Habakuk 1:3.

⁴ Ha Habakuk 2:2, 3, aton mababasa an baton han Dios ha mga pakiana ni Habakuk ngan an Iya saad nga tatadungon an sitwasyon. Daku gud an gugma ni Jehova ha mga tawo. An Biblia nasiring: “Nagtatagad hiya ha  iyo.” (1 Pedro 5:7) Ha pagkamatuod, kon nangangalas kita ha pagkita han pag-antos, labaw pa an kangalas nga inaabat han Dios. (Isaias 55:8, 9) Salit hisgotan naton an pakiana nga, Kay ano nga duro an pag-antos ha kalibotan?

5. Ano an ginsisiring han damu nga magturutdo hin relihiyon mahitungod ha pag-antos? Ano an igintututdo han Biblia?

⁵ An mga pastor, padi, ngan magturutdo hin relihiyon kaurogan nga nasiring nga kaburut-on han Dios nga mag-antos an mga tawo. An iba bangin magsiring nga an ngatanan nga nahitatabo ha usa nga tawo, upod na an mga trahedya, itinanda na nga daan han Dios ngan diri gud naton masasabtan kon kay ano. An iba bangin magsiring pa ngani nga an mga tawo, pati an gudtiay pa nga kabataan, namamatay basi makaupod han Dios ha langit. Pero diri ito tinuod. Hi Jehova diri gud nagpapahinabo hin magraot nga mga butang. An Biblia nasiring: “Imposible gud nga magbuhat hin maraot an tinuod nga Dios, nga magbuhat hin sayop an Makagarahum-ha-ngatanan!”​—Job 34:10.

6. Kay ano nga an Dios an ginbabasol han damu nga tawo ha ngatanan nga pag-antos ha kalibotan?

⁶ An Dios an ginbabasol han damu nga tawo ha ngatanan nga pag-antos ha kalibotan kay kahuna nira nga an Dios an nagmamando ha kalibotan. Pero nahibaroan naton ha Kapitulo 3 nga hi Satanas nga Yawa an tinuod nga magmarando han kalibotan.

7, 8. Kay ano nga duro an pag-antos ha kalibotan?

⁷ An Biblia nagsusumat ha aton nga “an bug-os nga kalibotan aada ha gahum han usa nga maraot.” (1 Juan  5:19) An magmarando hini nga kalibotan, hi Satanas, mapintas ngan madarahog. Hiya “nanlilimbong ha bug-os nga inuukyan nga tuna.” (Pahayag 12:9) Damu nga tawo an nagsusubad ha iya. Ngan usa la ito han mga rason kon kay ano nga an kalibotan puno gud han kabuwaan, kangalas, ngan kamadarahog.

⁸ May iba pa nga rason kon kay ano nga duro an pag-antos ha kalibotan. Katapos magrebelde hira Adan ngan Eva, iginpasa nira an sala ha ira mga anak. Ngan tungod han sala, an mga tawo nagigin hinungdan nga mag-antos an iba nga tawo. Kaurogan nga karuyag nira nga magin mas importante kay ha iba. Nakikig-away hira, naapi ha girra, ngan ginraraugdaog an iba. (Eclesiastes 4:1; 8:9) Usahay an mga tawo nag-aantos tungod han “panahon ngan diri ginlalaoman nga mga hitabo.” (Eclesiastes 9:11) Kon aada hira ha sayop nga lugar ha sayop nga panahon, an mga aksidente ngan iba pa nga magraot nga butang puydi mahitabo ha ira.

9. Kay ano nga makakasigurado kita nga hi Jehova may maopay gud nga rason nga iya gintutugotan nga magpadayon an pag-antos?

⁹ Hi Jehova diri gud nagpapahinabo han pag-antos. Diri hiya an sadang basulon ha nahitatabo nga mga girra, krimen, ngan pagmaltrato. Diri an Dios an nagpapahinabo han mga kalamidad sugad han linog, bagyo, ngan baha. Pero bangin maghunahuna ka, ‘Kon hi Jehova an pinakagamhanan nga persona ha uniberso, kay ano nga diri niya ginpapaundang iton magraot nga nahitatabo?’ Maaram kita nga hinigugma gud kita han Dios, salit sigurado nga may maopay gud hiya nga rason nga iya gintutugotan nga magpadayon an pag-antos.​—1 Juan 4:8.

10. Ano an akusasyon ni Satanas kan Jehova?

¹⁰ Ha garden han Eden, ginlimbongan han Yawa hira Adan ngan Eva. Hi Satanas nag-akusar nga an Dios maraot nga Magmarando. Nagsiring hiya nga an Dios may maopay nga butang nga diri iginhahatag kanda Adan ngan Eva. Karuyag ni Satanas nga tumoo hira nga magigin mas maopay hiya nga magmarando kay ha kan Jehova, ngan diri nira kinahanglan an Dios.​—Genesis 3:2-5; kitaa an Endnote 27.

11. Ano nga pakiana an kinahanglan naton batunon?

¹¹ Hira Adan ngan Eva waray sumugot kan Jehova ngan nagrebelde ha iya. Naghunahuna hira nga may katungod hira nga magdesisyon para ha ira kalugaringon kon ano an husto ngan sayop. Paonan-o papamatud-an ni Jehova nga sayop an mga rebelde ngan hiya an maaram han pinakamaopay para ha aton?

12, 13. (a) Kay ano nga waray dayon pataya ni Jehova an mga rebelde? (b) Kay ano nga gintugotan ni Jehova nga hi Satanas magin magmarando hini nga kalibotan ngan an mga tawo magmando ha ira kalugaringon?

¹² Hira Adan ngan Eva waray dayon pataya ni Jehova. Lugod, gintugotan niya nga magkaada hira mga anak. Katapos, gintugotan ni Jehova an mga anak nira Adan ngan Eva nga magpili kon hin-o an ira karuyag nga magmarando. Katuyoan ni Jehova nga pun-on an tuna hin perpekto nga mga tawo, ngan mahitatabo ito anoman an buhaton han Yawa.​—Genesis 1:28; Isaias 55:10, 11.

¹³ Gin-akusaran ni Satanas hi Jehova ha atubangan han minilyon nga anghel. (Job 38:7; Daniel 7:10) Salit gintagan ni Jehova hi Satanas hin panahon basi pamatud-an  kon tinuod an iya akusasyon. Iya liwat gintagan an mga tawo hin panahon nga maghimo hin ira kalugaringon nga gobyerno ha paggiya ni Satanas basi ipakita kon maglalampos hira nga waray an bulig han Dios.

14. Ano an napamatud-an ha paglabay han panahon?

¹⁴ Ha sulod hin yinukot nga katuigan, an mga tawo naningkamot nga mandoan an ira kalugaringon, pero napakyas hira. Napamatud-an nga buwaon hi Satanas. Kinahanglan gud han mga tawo an bulig han Dios. Husto hi propeta Jeremias han nagsiring hiya: “Maaram gud ako, O Jehova, nga an dalan han tawo diri iya. Diri para ha tawo bisan an paggiya han iya pitad.”​—Jeremias 10:23.

15, 16. (a) Kay ano nga gintutugotan ni Jehova nga magpadayon an pag-antos hin maiha hinduro nga panahon? (b) Kay ano nga diri ginsusulbad ni Jehova an mga problema nga ginpapahinabo ni Satanas?

¹⁵ Kay ano nga gintutugotan ni Jehova nga magpadayon an pag-antos hin maiha hinduro nga panahon? Kay ano nga diri niya ginpupugngan an magraot nga mga nahitatabo? Ginkikinahanglan an panahon basi pamatud-an nga pakyas an pagmando ni Satanas. Gintestingan han mga tawo an tagsa nga klase hin gobyerno, pero waray naglampos. Bisan kon nakahimo hira hin mga pag-uswag ha syensya ngan teknolohiya, mas damu yana an kawaray-hustisya, kapobrehan, krimen, ngan girra kay han naglabay. Diri kita maglalampos ha pagmando ha aton kalugaringon nga waray an Dios.

¹⁶ Pero diri ginsusulbad ni Jehova an mga problema nga ginpapahinabo ni Satanas. Kon bubuhaton ito han  Dios, magpapasabot ito nga nasuporta hiya ha pagmando ni Satanas, ngan diri gud Niya ito bubuhaton. Sugad man, an mga tawo matoo nga malampuson nga makakagmando hira ha ira kalugaringon. Pero buwa ito, ngan hi Jehova diri liwat masuporta hito. Diri gud hiya nagbubuwa.​—Hebreo 6:18.

17, 18. Ano an bubuhaton ni Jehova ha ngatanan nga kadaot nga ginpahinabo ni Satanas?

¹⁷ Maibabalik ba ni Jehova ha maopay nga kahimtang an ngatanan nga kadaot nga resulta han pagrebelde ni Satanas ngan han mga tawo? Oo. An ngatanan nga butang posible ha Dios. Maaram hi Jehova kon san-o an eksakto nga panahon nga bug-os na nga mababaton an ngatanan nga akusasyon ni Satanas. Katapos, an tuna hihimoon niya nga paraiso, sugad han iya katuyoan. An ngatanan nga aadto ha “handumanan nga mga lubnganan” babanhawon. (Juan 5:28, 29) An mga tawo diri na gud magkakasakit o mamamatay. Ibabalik ni Jesus ha maopay nga kahimtang an ngatanan nga kadaot nga ginpahinabo ni Satanas. Gagamiton ni Jehova hi Jesus “basi wad-on an mga buhat han Yawa.” (1 Juan 3:8) Mapasalamaton kita nga yana hi Jehova nagpapailob ha aton basi makilala naton hiya ngan makadesisyon kita nga hiya an karuyag naton nga Magmarando. (Basaha an 2 Pedro 3:9, 10.) Bisan kon nag-aantos kita, ginbubuligan kita niya nga makapailob.​—Juan 4:23; basaha an 1 Corinto 10:13.

¹⁸ Diri kita ginpipirit ni Jehova nga pilion hiya sugad nga aton Magmarando. Gintagan niya an mga tawo han regalo nga kagawasan ha pagbuot. Aton usisahon kon ano an kahulogan para ha aton hini nga presyoso nga regalo.

19. Ano nga maopay gud nga regalo an iginhatag ha aton ni Jehova? Kay ano nga sadang kita magpasalamat tungod hini?

¹⁹ Tungod han maopay gud nga regalo ni Jehova nga kagawasan ha pagbuot, iba kita ha mga hayop. An mga hayop nagios tungod la han kinaiya, pero kita, makakapili han aton karuyag nga pagkinabuhi ngan makakadesisyon kon karuyag naton lipayon hi Jehova. (Proberbios 30:24) Diri liwat kita pariho ha mga makina nga nagbubuhat la kon ano an gindisenyo nga buhaton hito. May kagawasan kita nga magpili han karuyag naton nga klase hin pagkatawo, han aton karuyag nga kasangkayan, ngan han karuyag naton buhaton ha aton kinabuhi. Karuyag ni Jehova nga magmalipayon kita.

20, 21. Ano an gimaopayi nga desisyon nga mahihimo mo yana?

²⁰ Karuyag ni Jehova nga higugmaon naton hiya. (Mateo 22:37, 38) Pariho hiya ha usa nga tatay nga nalilipay makabati ha iya anak nga nasiring “Hinigugma ko ikaw” kon kinasingkasing nga ginsisiring ito han anak ngan diri kay ginpipirit hiya. Gintagan kita ni Jehova hin kagawasan nga magpili kon mag-aalagad kita ha iya o diri. Ginpili nira Satanas, Adan, ngan Eva nga isalikway hi Jehova. Paonan-o mo gagamiton an regalo ha imo nga kagawasan ha pagbuot?

²¹ Gamita an imo kagawasan ha pagbuot ha pag-alagad kan Jehova. Minilyon nga iba pa an nagdesisyon nga lipayon hi Jehova ngan isalikway hi Satanas. (Proberbios 27:11) Ano an imo mahihimo yana basi makaukoy ka ha bag-o nga kalibotan han Dios kon iya na wad-on an ngatanan nga pag-antos? Ito nga pakiana babatunon ha sunod nga kapitulo.