1, 2. Which kind question plenty people de ask?

EVERYDAY, we de hear plenty bad things wey e de happen. Things like water destroy one village, person carry gun enter church, e kill and wound plenty people. Sickness kill one woman wey e get five children.

² When problem like this de happen, plenty people go de ask “Why?” Plenty people de ask why suffer full this world. You don ever ask yourself this kind question?

3, 4. (a) Which question Habakkuk be ask God? (b) How Jehovah answer?

³ We learn for Bible say people wey they get strong faith for God still ask this kind questions. For example, prophet Habakkuk ask Jehovah say: “Why you de allow me see bad things? And why you de keep quiet when people de suffer? Why you de leave-am as things de spoil and people de fight for my front? And why quarrel and fight full everywhere?”​—Habakkuk 1:3.

⁴ For Habakkuk 2:2, 3, Jehovah answer the question wey Habakkuk ask. And e promise say e go correct the problem. Jehovah really love people. Na e make Bible talk say: “E de care for wuna.” (1 Peter 5:7) The truth be say, God hate suffer pass the way we hate-am. (Isaiah 55:8, 9) So make we talk about this question, Why suffer full this world?

5. Wetin plenty teachers for religion de talk about suffer? Wetin Bible teach?

⁵ Pastors, priests, and teacher for religion de teach people say God like-am as we de suffer. Some de talk say all the bad things wey e de happen to person na the thing wey God want. And say the person no go fit understand why e de happen. Other people talk say when person or small pikin die, na because God want make they come heaven. But that na big lie. Jehovah no de ever make bad thing happen. Bible talk say: “God no fit ever do wicked thing, or say the Almighty go do bad thing!”​—Job 34:10.

6. Why plenty people de blame God for all the suffer for this world?

⁶ Plenty people de blame God for all the suffer wey e dey for this world, because they believe say na God de rule the world. But as we don learn for Chapter 3, the person wey e de rule this world na Satan the Devil.

7, 8. Why suffer plenty for this world?

⁷ Bible tell us say “na the wicked person de control the whole world.” (1 John 5:19) Na Satan de rule this world. E bad and e wicked. E “de deceive the whole world.” (Revelation 12:9) Plenty people de copy Satan. This na one reason why people for this world de lie, de hate other people and bad things plenty.

⁸ Some other reason still dey wey e make suffer plenty for this world. When Adam and Eve no obey Jehovah, they sin and they pass sin for all their children. Because of sin, some people de make other people suffer. Them de like show say they better pass  other people. Them de fight, de go war, and de oppress other people. (Ecclesiastes 4:1; 8:9) Sometimes when the thing wey people “no expect” happen, e de make them suffer. (Ecclesiastes 9:11) Accident and other bad things fit happen when people dey for wrong place for the wrong time.

9. Why we dey sure say Jehovah must get correct reason why e allow bad things de happen?

⁹ Jehovah no de ever make people suffer. No be Jehovah de cause the war and other bad things wey de make people suffer. When ground de shake, or strong breeze and water de destroy things, no be God cause-am. But you fit de wonder say, ‘If na Jehovah get power pass everybody for heaven and earth, why e no just stop all the bad things wey e de happen?’ We know say Jehovah really care about us, so e must get correct reason why e allow all this things de happen.​—1 John 4:8.

10. Wetin Satan talk about Jehovah?

¹⁰ Satan fool Adam and Eve for Garden of Eden. E talk say God no be better ruler. E still talk say Jehovah de hide good things from Adam and Eve. Satan want make they believe say e go fit rule well pass Jehovah and say they no need God.​—Genesis 3:2-5; check Endnote 27.

11. Na which question we go answer?

¹¹ Adam and Eve no obey Jehovah and they stop to support Jehovah. They think say they get right to decide the thing wey e correct and the one wey e no correct. How Jehovah go show say e know the  thing wey e good for us and say Adam and Eve dey wrong?

12, 13. (a) Why Jehovah no destroy Adam and Eve as they sin? (b) Why Jehovah allow Satan make e rule this world and make people rule theirself?

¹² Jehovah no destroy Adam and Eve as they sin. Instead, e allow them born children. God allow the children of Adam and Eve make they choose person wey go rule them. Jehovah want make the earth full with perfect people. Wetin Jehovah want must happen, and Devil no fit change-am.​—Genesis 1:28; Isaiah 55:10, 11.

¹³ Satan talk bad things about Jehovah for front of plenty angels. (Job 38:7; Daniel 7:10) So Jehovah give Satan chance to prove whether the things wey e talk na true. E still give people time to form their own government for this world wey Satan de control, whether they go fit succeed if God no help them.

14. Wetin we don see for all the years wey e don pass?

¹⁴ Plenty years don pass wey people de try rule theirself but they no succeed. So this one don show say Satan de lie. People really need God to help them. Prophet Jeremiah correct when e talk say: “O Jehovah, I know well say person no fit direct e self. Person wey e de waka no fit even direct e step.”​—Jeremiah 10:23.

15, 16. (a) Why Jehovah allow make suffer de continue for long time? (b) Why Jehovah never remove the problem wey Satan don cause?

¹⁵ Why Jehovah allow suffer continue for long time? Why e no stop bad things make they no de  happen? All this time wey e don pass don prove say the things wey Satan talk na lie. People don try different kind of government but e no work. Even though say people don use science make plenty things, they no fit stop things like partial, poverty and war. This bad things don full the world pass as e be before. We no fit rule ourself, na Jehovah fit rule us fine.

¹⁶ But Jehovah never remove the problem wey Satan cause. If e do like that, e go mean say e de support the world wey Satan de control. Jehovah no go ever support Satan. If e do-am, people go de think say they fit rule theirself well. That one na big lie, and Jehovah no go support-am. God no go ever lie.​—Hebrews 6:18.

17, 18. Wetin Jehovah go do about all the problem wey Satan don cause?

¹⁷ You think say Jehovah go fit remove all the problem wey Satan and people don cause? Yes. Nothing dey wey God no fit do. Jehovah know the correct time wey e go answer Satan. Na that time the earth go be paradise, as e be for the time wey God make-am. That time, all the “people inside grave” go live again. (John 5:28, 29) People no go ever sick or die again. Jehovah go remove all the problem wey Satan don cause. E go use Jesus “destroy all the work wey Devil don do.” (1 John 3:8) We dey glad say Jehovah dey patient with us. This one give us chance to know Jehovah and choose say e go be our Ruler. (Read 2 Peter 3:9, 10.) Even when we de suffer, e de help us endure.​—John 4:23; read 1 Corinthians 10:13.

 ¹⁸ Jehovah no de force us. Instead, e don give us chance to choose how we go live our life. We fit choose Jehovah make e rule us. Make we see how we fit use this correct chance wey e don give us.

19. Which correct chance Jehovah don give us? Why e good make we thank Jehovah for this correct chance?

¹⁹ We dey different from animals because of this correct chance wey Jehovah don give us. Animals no de fit think. But God no make us like that. We fit choose how we want live our life, whether na to use-am serve Jehovah or not. (Proverbs 30:24) Jehovah no make us like machine wey them de control. Na we go choose the kind person wey we go be, the kind people wey they go be our friend, and the kind life wey we go live. Jehovah want make we enjoy life.

20, 21. Wetin be the best thing wey you fit do now?

²⁰ Make we love Jehovah. Na wetin e want be that. (Matthew 22:37, 38) E be like papa wey e de happy any time e pikin talk say “I love you.” But wetin e de like pass na when the pikin talk-am from e heart. Jehovah de allow us make we choose who we go serve. Satan, Adam, and Eve no choose to serve Jehovah. You go serve Jehovah?

²¹ Serve Jehovah with the chance wey you get. Plenty-plenty people don agree say na Jehovah they go serve instead of Satan. (Proverbs 27:11) Na wetin you go do now so that you go dey for the new world when Jehovah go remove suffer? We go see the answer for the next chapter.