1. Ni oha owatuhire amagara?

YEHOVA ni ‘Ruhanga ohurire.’ (Yeremia 10:10) Ni Omuhangi witu kandi akatuha amagara. Bibuli negamba ngu: ‘Ahabw’okuba ni iwe owahangire byona; ahabw’okukunda kwawe bikahangwa kandi byabaho.’ (Okushuuruurwa 4:11) Mazima, Yehova nayenda ngu tubeho. Amagara ni ekiconco eki yatuhire.—Shoma omuri Zaaburi ya 36:9.

2. Ni enki eki tushemerire kukora ngu tugire eki twahikaho?

² Yehova akatuha byona ebi turi kwetenga ngu tugume turiho; harimu ebyokurya n’amizi. (Ebyakozirwe 17:28) Konka ekiri kukiraho, nayenda ngu tubeho tushemerirwe. (Ebyakozirwe 14:15-17) Kugira ngu tugire eki twahikaho omu kubaho kwitu, tushemerire korobera ebiragiro bya Ruhanga.—Isaaya 48:17, 18.

3. Ni enki eki Yehova yakozire obu Kaini yisire Abeeli?

³ Bibuli netwegesa ku amagara gitu n’ag’abandi gari ag’omuhendo ahari Yehova. Ecokureberaho: Obu omwana wa Adamu na Eva ori kwetwa Kaini yagirire ekiniga murumuna weye, Abeeli, Yehova akamurabura, yamugambira ku ashemerire kutegeka ekiniga ceye. Konka Kaini akanga kuhurira, yaguma ayine ekiniga, kuhika aha ‘kwita omurumuna Abeeli.’ (Okutandika 4:3-8) Yehova akahana Kaini ahabw’okwita Abeeli. (Okutandika 4:9-11) Obwe rero, ekiniga n’orwango ni bibi munonga ahabw’okuba nibituma twaba ensharizi kandi tubasa n’okwitana. Omuntu nk’ogo taritunga amagara agatahwaho.  (Shoma omuri 1 Yohaana 3:15.) Kugira ngu tushemeze Yehova, tushemerire kwemanyiza kukunda abantu bona.—1 Yohaana 3:11, 12.

4. Ekiragiro kimwe eki Yehova yahire Abaisraeli nikitwegesa ki aha magara?

⁴ Ku hahwire emyaka myingi bwanyima yaho, Yehova akereka ku nareba amagara nk’ag’omuhendo, ari kuha Musa ebiragiro ikumi. Kimwe omuri ebyo biragiro nikigira ngu: ‘Otarita.’ (Eky’Ebiragiro 5:17) Omuntu ku yabire nayita ondijo akigenderire na we akaba ashemerire kwitwa.

5. Ruhanga nareba ata okwihamu enda?

⁵ Ruhanga nareba ata okwihamu enda? Amagara g’omwana otakazirwe na go ni ag’omuhendo ahari Yehova. Omu biragiro ebi Yehova yahire Abaisraeli, akagamba ku omuntu owabire aratere omukazi, enda ekarugamu, na we yabire ashemerire kwitwa. (Shoma omu Kuruga 21:22, 23; Zaaburi 127:3.) Eco nikitwegesa ku okwihamu enda kiri kibi.—Reba Enyongezo ya 28.

6, 7. Tukayereka Yehova tuta ku nitureba amagara nk’ag’omuhendo?

⁶ Tukayereka Yehova tuta ku nitureba amagara gitu n’ag’abandi nk’ag’omuhendo? Tukabyereka tutari kukora ekintu cona ekiri kubasa kuta omu kabi amagara gitu ninga ag’abandi. Ni yo nshonga tutari kuresa etabi ninga enjaga, n’okukoresa ebindi bitaburabwonko, ahabw’okuba nibishisha amagara kandi nibibasa kutwita.

⁷ Ruhanga ni we owatuhire amagara n’omubiri kandi tushemerire kubikoresa nk’oku ari kwenda. Obwe rero tushemerire kukwata ge omubiri gwitu. Twaba tutakikozire, nituba abatashemire omu misho ga Ruhanga. (Abarooma 6:19; 12:1; 2 Abakorinso 7:1) Tituri kubasa kushaba Yehova owatuhire amagara kandi turi kugakwata kubi. N’obu kureka emitwarize mibi kiri kuba kigumire, Yehova  natukwasa twatamu amani tukaguma turi kureba amagara nk’ekiconco eki yatuhire.

8. Ni enki eki tushemerire kukora ngu tutata amagara gitu n’ag’abandi omu kabi?

⁸ Twamara kwega ku amagara gari ekiconco c’omuhendo. Yehova nayesiga ku nitwija kukora cona eki turi kubasa tukerinda ekintu cona ekiri kubasa kuta amagara gitu n’ag’abandi omu kabi. Eco nitucereka twaba nituvuga emotoka, epiki n’ebindi. Nitwerinda emizano ey’akabi. (Zaaburi 11:5) Nambwenu nitutamu amani omu kuboneza amaka gitu. Yehova akaha Abaisraeli ekiragiro ekiri kugira ngu: ‘Ku oriyombeka enju nsya, ote aha mutwe gwayo ec’okuzibira abantu kugwa, kigehinguririze, oreke kuretera enju yawe orubanja rw’eshagama ahabw’omuntu kugihanukaho, akagwa aha nsi.’—Eky’Ebiragiro 22:8.

9. Ni bata oku tushemerire kukwata enyamishwa?

⁹ Oku turi kukwata enyamishwa na co ni ec’omugasho ahari Yehova. Natwikiririza kwita enyamishwa turi kuronda ebyokurya n’ebyokujwara, kandi atwikiririza ngu twite eziri kwenda kutukora kubi. (Okutandika 3:21; 9:3; Okuruga 21:28) Konka titushemerire kukora kubi enyamishwa ninga kuzita turi kweshemeza.—Enfumu 12:10.

10. Nitumanya tuta ku eshagama ari go magara?

¹⁰ Eshagama ni eri kwera ahari Yehova aha kuba ni go magara. Kaini ku yamazire kwita Abeeli, Yehova akamugambira ngu: ‘Iraka ry’eshagama ya murumuna wawe, nirimpururiza omu itaka.’ (Okutandika 4:10) Eshagama ya Abeeli ekaba eri amagara geye, kandi Yehova akahana Kaini ahabw’okwita Abeeli. Bwanyima y’omwijuro g’omu biro bya Noa, Yehova akashuba yayereka ku eshagama ari go magara. Yehova akikiririza Noa kurya enyama z’enyamishwa. Akagira ngu: ‘Ebiri kwegendesa byona ebyine amagara  biryaba ebyokurya byanyu; mbibahire byona, nk’oku nabahire ebiri kumera.’ Konka hariho ekintu kimwe eki Yehova yabazibire kurya. Akabagambira ngu: ‘Mutarirya enyama n’amagara gayo, ni yo shagama yayo.’—Okutandika 1:29; 9:3, 4.

11. Ni kiha kiragiro ekikwatirine n’eshagama eki Ruhanga yahire ihanga rya Israeli?

¹¹ Ku hahwire emyaka eri kuhika ahari 800 Yehova azibire Noa kurya eshagama, akongera yaragira abantu ati: ‘Omuntu wena omu Baisraeli nari ow’omu banyamahanga obashuhukiremu, orita enyamishwa eri kuribwa nari enyonyi ahigire, ayate eshagama yayo aha nsi, agishweke iju.’ Akongeraho ati: ‘Mutarirya eshagama y’ekihangirwe cona.’ (Abaleevi 17:13, 14) Nabwo Yehova akaba acayenda ngu abahereza beye barebe eshagama nk’eri kwera. Bakaba bari kubasa kurya enyama konka batarye eshagama. Ku babire nibita enyamishwa bari kwenda kugirya, bakaba bashemerire kwata eshagama aha nsi.

12. Abakristo nibareba bata eshagama?

¹² Hahwire emyaka mice Yesu afire, entumwa n’abazehe b’omu kibina ca Kikristo c’omuri Yerusaalemu bakateranira hamwe ngu bege aha bintu by’omu Biragiro bya Musa ebi Abakristo babire bashemerire kukuratiza. (Shoma omu Byakozirwe 15:28, 29; 21:25.) Yehova akabakwasa kushoborocerwa ku eshagama yabire ecari ey’omuhendo kandi ku babire bashemerire kugireba nk’eri kwera. Abakristo b’omu kinyigana c’okubanza bakaba batari kurya ninga kunywa eshagama, ninga shi kurya enyama ezitajwisize. Kukora eco kikaba kiri kibi nk’okuramya ebishushani ninga shi kushambana. Kwiha omuri obwo bwire, Abakristo ab’amazima bakaba batari kubasa kurya ninga kunywa eshagama. Mbwenu shi erizoba biri bita? Na hati Yehova nayenda ngu turebe eshagama nk’eri kwera.

13. Ahabw’enki Abakristo batari kwikiriza kuterwa eshagama?

 ¹³ Mbwenu shi eco nikimanyisa ngu Abakristo bashemerire n’okwanga kuterwa eshagama? Yego, ni ko kiri. Yehova akaturagira ngu tutarirya eshagama ninga ngu tuginywe. Mbwenu shi dokita akuzibire kunywa amarwa, okarengaho ogetera omu misi? Mazima eco tokakikora! Omuri obwo buryo, ekiragiro c’okutarya eshagama ninga kuginywa nikimanyisa ku tutashemerire n’okwikiriza kuterwa eshagama.—Reba Enyongezo ya 29.

14, 15. Ahabw’enki Abakristo bashemerire kukwata ge amagara kandi bakorobera ebiragiro bya Yehova?

¹⁴ Kandi shi tukakora ki dokita atugambire ku turije kufa twayanga kuterwa eshagama? Buri muntu wena ashemerire kweshariramu korobera ekiragiro ca Ruhanga ekiri kugamba aha shagama. Itwe Abakristo nitukwata ge ekiconco c’amagara eki Ruhanga yatuhire, kandi nitubasa kukoresa obundi buryo bw’okutambirwa kugira ngu tugumeho; konka titukayikiriza kuterwa eshagama.

¹⁵ Nitukora cona eki tubasize ngu tugume kugira amagara marungi, konka ahabw’okuba amagara gari ag’omugasho ahari Ruhanga, titushemerire kwikiriza kuterwa eshagama. Korobera Yehova ni co kikuru kusinga kugezaho kweyambayamba konka tukita ekiragiro ceye. Yesu akagira ati: ‘Omuntu wena ori kwenda kukiza amagara ge, aryagabuza; kandi ori kubuzya amagara ge aha bwange, aryagakiza.’ (Matayo 16:25) Nitworobera Yehova ahabw’okuba nitumukunda. Namanya ekitushemerire; ni ahabw’eco nitukwata ge amagara kandi tugareba nk’agari kwera, nk’oku Yehova ari kugareba.—Abaheburaayo 11:6.

16. Ahabw’enki abahereza ba Ruhanga bari kumworobera?

¹⁶ Abahereza ba Ruhanga b’abesigwa bakamaririra korobera ekiragiro ceye ekiri kugamba aha shagama. Tibari kwikiriza kurya ninga kunywa eshagama, kandi tibari kwikiriza  kugiterwa nk’omubazi. * Konka, nibikiriza obundi bujanjabi kugira ngu bakize amagara gabo. Nibesiga ku Omuhangi w’amagara n’eshagama ari kumanya ekirungi ahari bo. Mbehi noyikiriza ku Ruhanga ari kumanya ekiri kubasa kukubera kirungi?

17. Ni buha buryo bumwe bwonka bw’okukoresa eshagama obu Yehova yabire yayikiririze Abaisraeli?

¹⁷ Omu Biragiro ebi Yehova yahire Musa, akagambira Abaisraeli ati: ‘Amagara g’omubiri gaba omu shagama, ni co nagibahera kushukwa ah’itambiro ngu erihirire [etume mwasasirwa] amagara ganyu; eshagama ni yo erihirira ahabw’okuba erimu amagara.’ (Abaleevi 17:11) Abaisraeli ku babire nibacumura, bakaba bashemerire kushaba Yehova kubasasira bari kutamba itungo kandi bashaba omutambi kushuka eshagama ah’itambiro ry’omuri hekalu. Obwo ni bwo buryo bumwe bwonka obu Yehova yayikiririze Abaisraeli kukoresamu eshagama.

18. Ekitambo ca Yesu kikatuma abantu bona batunga guha mugisha?

¹⁸ Obu Yesu yizire omu nsi, akihaho ekiragiro c’okutamba itungo, ari kutuha amagara geye, ninga eshagama yeye, kugira ngu tusasirwe ebicumuro byitu. (Matayo 20:28; Abaheburaayo 10:1) Amagara ga Yesu gakaba gari ag’omuhendo munonga, catuma Yehova yamuzorera kuza omu iguru, kandi gatuma Yehova yatuha omugisha g’okwija kubaho ebiro byona.—Yohaana 3:16; Abaheburaayo 9:11, 12; 1 Petero 1:18, 19.

19. Ni enki eki tushemerire kukora ngu ‘tube abere ahabw’eshagama y’abantu bona’?

 ¹⁹ Nitusima Yehova ahabw’okutuha ekiconco c’amagara! Kandi nitwenda kugambira abantu ngu ku barikirize Yesu, nibija kubaho ebiro byona. Ahabw’okuba turi kukunda abantu, nitukora buri cona eki turi kubasa ngu tubegese oku bari kubasa kutunga amagara agatahwaho. (Ezekieli 3:17-21) Rero bwanyima, kimwe n’entumwa Paulo, turyabasa kugamba ngu: ‘Ndi omwere ahabw’eby’eshagama y’abantu bona; aha kuba tindatinire kubagambira enama yona eya Ruhanga.’ (Ebyakozirwe 20:26, 27) Mazima, nitwereka ku nitukwata ge amagara n’eshagama turi kugambira abandi ebikwatirine na Yehova n’oku ari kureba amagara.