1. Kimoun ki bay nou lavi ?

JÉOVA sa « Bondjé ki vivan-an » (Jérémie 10:10). A li ki kréyé nou é i bay nou lavi. Labib-a ka di : « A to ki kréyé tout bagaj, é gras a to volonté yé ka èkzisté é to kréyé yé » (Révélation 4:11). Si nou gen lavi jòdla a paské a sa Jéova té lé. Lavi-a sa roun kado Bondjé bay nou ki gen bokou valò (li Psaume 36:9).

2. Kisa nou divèt fè pou nou rivé annan nou lavi ?

² Jéova ka bay nou sa nou bézwen pou nou kontinyé viv, parèkzanp manjé ké bwè (Actes 17:28). Mé anplis di sa i lé osi nou gen roun bèl lavi (Actes 14:15-17). Pou nou rivé annan nou lavi, nou divèt obéyi so lalwa (Isaïe 48:17, 18).

3. Lò Kayen tchwé Abèl, kisa Jéova fè ?

³ Labib-a ka anprann nou ki nou lavi ké sa di ròt moun-yan gen bokou valò pou Jéova. Annou pran èkzanp Kayen, prémyé pitit Adan ké Èv. I té kòlè kont so frè Abèl. Jéova di li kontrolé so kò. Mé Kayen pa kouté Jéova. I « volé asou so frè Abèl épi i tchwé l’ » (Genèse 4:3-8). Jéova pini Kayen paské i té tchwé so frè (Genèse 4:9-11). Kòlè ké rayi moun sa tré danjéré : sa bagaj-ya pouvé fè roun moun divini vyolan ouben mové menm. Si roun moun gen sa défo-ya, i pa pouvé  rousouvwè lavi pou tout-tan (li 1 Jean 3:15). Pou fè Jéova plézi nou divèt anprann kontan tout moun (1 Jean 3:11, 12).

4. Kisa roun annan 10 koumannman-yan ka anprann nou asou valò lavi-a ?

⁴ Milyé lannen pita, lò Jéova bay Moyiz 10 koumannman-yan, i montré ki lavi-a té gen bokou valò pou li. Roun di sa koumannman-yan té ka di : « To pa divèt tchwé » (Deutéronome 5:17). Si roun moun té ka tchwé rounòt moun parèsprè, yé té divèt tchwé l’.

5. Kisa Bondjé ka pansé asou zafè jité timoun ?

⁵ Kisa Bondjé ka pansé asou zafè jité timoun ? (gadé nòt n^o 28, paj 222). Pou li, menm lavi roun timoun ki annan vant so manman gen bokou valò. Lalwa Jéova té bay Israyélit-ya té ka di ki, si roun moun té blésé roun fanm ki té ansent é si timoun-an té mouri, yé té divèt tchwé sa moun-an (li Exode 21:22, 23 ; Psaume 127:3). Sa ka anprann nou ki jité timoun a roun mové bagaj.

6, 7. Kouman nou pouvé montré Jéova ki pou nou lavi-a gen bokou valò ?

⁶ Kouman nou pouvé montré Jéova ki pou nou, nou lavi ké sa di ròt moun-yan gen bokou valò ? Nou pa divèt fè anyen ki pouvé mété nou lavi ké sa di ròt moun-yan an danjé. Parèkzanp, nou pa divèt ni fimen ni pran ladròg. Fimen ké pran ladròg a bagaj ki mové pou nou santé é ki pouvé tchwé nou.

⁷ A Jéova ki bay nou roun kò é ki bay nou lavi. A pou sa nou divèt sèrvi yé kou i lé. Nou divèt pran swen di nou kò. Si nou pa ka fè sa, nou pa ké sen douvan Bondjé (Romains 6:19 ; 12:1 ; 2 Corinthiens 7:1). Nou  pa pouvé adoré Jéova ki bay nou lavi, si an menm tan, lavi-a pa gen pyès valò pou nou. Sa ké pitèt rèd di lésé vyé labitid nou gen. Mé si nou ka briga pou lésé sa vyé labitid-ya, paské nou ka rèspèkté lavi-a, atò Jéova ké idé nou.

8. Kisa nou pouvé fè pou nou pa mété ni nou lavi ni sa di ròt moun-yan an danjé ?

⁸ Nou anprann ki lavi-a sa roun kado ki gen bokou valò. É Jéova savé ki nou ké fè tousa nou pouvé pou nou pa fè anyen ki ké mété nou lavi ouben sa di ròt moun-yan an danjé. Parèkzanp, nou ka panga lò nou ka roulé roun loto, roun moto ouben ròt bagaj ankò. Nou pa ka fè pyès èspòr ki danjéré ouben vyolan (Psaume 11:5). É nou ka fè tousa nou divèt fè pou i pa gen pyès danjé pou pésonn annan nou kaz. Jéova té di Israyélit-ya : « Si to ka fè roun kaz, to ké divèt baré to twa. » Poukisa ? Paské si roun moun té ka tonbé di twa-a, pou Jéova, a té mèt kaz-a ki té rèsponsab (Deutéronome 22:8).

9. Kouman nou divèt trété zannimo-ya ?

⁹ Fason nou ka trété zannimo-ya osi enpòrtan pou Jéova. I ka pèrmèt nou tchwé zannimo pou manjé ouben lò nou lavi an danjé (Genèse 3:21 ; 9:3 ; Exode 21:28). Mé nou pa gen drwa fè zannimo-ya pyès méchansté ni tchwé yé pou bon tchò (Proverbes 12:10).

10. Kouman nou savé ki disan-an ka rouprézanté lavi-a ?

¹⁰ Disan-an sakré pou Jéova paské i ka rouprézanté lavi-a. Apré Kayen tchwé Abèl, Jéova di li : « Disan to  frè ka rélé dipi atè-a jis douvan mo » (Genèse 4:10). Disan Abèl té ka rouprézanté so lavi. É Jéova pini Kayen paské i té tchwé Abèl. Apré Délij-a, i di ankò ki disan-an ka rouprézanté lavi-a. I di Noé ké so fanmi : « Zòt ké pouvé manjé tout zannimo-ya [...]. Mé, zòt pa divèt manjé lachè-a ké so lavi—so disan » (Genèse 1:29 ; 9:3, 4) (gadé nòt n^o 17, paj 214). Jéova pèrmèt Noé ké so fanmi manjé zannimo. Mé i défann yé manjé vyann-an ké so disan, paské disan-an ka rouprézanté lavi-a.

11. Ki lalwa Bondjé bay Israyélit-ya asou disan-an ?

¹¹ Près 800 lannen apré Jéova di Noé pa manjé disan, i di Israyélit-ya ankò : Si roun moun « ka alé lachas é i ka pran roun vyann ouben roun jibyé yé pouvé manjé, i ké divèt fè disan-an koulé atè épi kouvri l’ ké lapousyè ». Épi Jéova di : « Zòt pa divèt manjé disan ki annan pyès kalité lachè » (Lévitique 17:13, 14). Jéova pa té chanjé lidé, i té lé ki so sèrvitèr wè disan-an kou roun bagaj ki sakré. Yé té pouvé manjé vyann, mé pa disan-an. Lò yé té ka tchwé roun zannimo pou manjé, yé té divèt fè disan-an koulé atè.

12. Kouman krétyen-yan ka wè disan-an ?

¹² Plizyèr lannen apré lanmò Jézi, apot-ya ké ansyen di kongrégasyon ki té Jérizalèm rasanblé roun jou. Yé té divèt désidé kilès koumannman, annan Lalwa Jéova té bay Israyélit-ya, krétyen-yan té divèt obéyi (li Actes 15:28, 29 ; 21:25). Jéova idé yé konprann ki disan-an té toujou gen bokou valò pou li é ki pou krétyen-yan i té divèt sakré. Krétyen-yan ki té ka viv annan sa lépòk-a pa té ka ni bwè ni manjé disan, é yé pa té ka manjé non plis vyann ki pa té byen senyen.  Pran disan, a té roun bagaj ki té osi grav ki alé adoré zidòl ouben fè péché sèksyèl. Pou byen di, krétyen-yan toujou réfizé manjé ké bwè disan. É jòdla ? Jéova toujou lé ki nou wè disan-an kou roun bagaj ki sakré.

13. Krétyen-yan pa ka asèpté pran disan. Poukisa ?

¹³ Ès sa lé di ki krétyen-yan pa divèt asèpté pran disan ? A sa menm. Jéova ka di nou pa manjé ni bwè disan. Si roun dòktèr ka di ou pa bwè alkòl, ès ou ké mété l’ annan ou venn ? Ou pa ké jen fè sa ! Menm fason-an, kou nou pa divèt ni manjé ni bwè disan, nou pa ka asèpté pran disan annan nou venn (gadé nòt n^o 29, paj 222).

14, 15. a) Kouman krétyen-yan ka wè lavi-a ? b) Ès krétyen-yan ka dézobéyi Bondjé pou éséyé viv pi lontan ? Èspliké.

¹⁴ É si roun dòktèr ka di ki nou ké mouri si nou pa ka asèpté pran disan ? A chak moun ki divèt désidé si i ké kouté lalwa Bondjé asou disan-an. Krétyen-yan gen bokou rèspè pou lavi-a, a roun kado Bondjé bay nou. A pou sa yé ka chaché ròt trètman pou kontinyé viv. Mé yé pa ka asèpté pran disan.

¹⁵ Nou ka fè tousa nou pouvé pou kontinyé gen roun bon santé. Mé nou pa ka asèpté pran disan paské disan-an ka rouprézanté lavi é paské i sakré pou Bondjé. Kouté Jéova pi enpòrtan pasé dézobéyi l’ pou éséyé viv pi lontan. Jézi di : « Sa-la ki lé sové so lavi ké pédi l’ ; mé sa-la ki ka pédi so lavi akoz di mo ké sové l’ » (Matthieu 16:25). Nou lé obéyi Jéova paské nou kontan li. I savé sa ki miyò pou nou. Nou ka wè lavi-a kou Jéova : i gen bokou valò é i sakré (Hébreux 11:6).

16. Poukisa sèrvitèr Bondjé-ya ka obéyi l’ ?

 ¹⁶ Sèrvitèr Bondjé-ya lé obéyi lalwa asou disan-an. Yé pa ka manjé disan-an é yé pa ka bwè l’. Menm si a pou yé santé yé pa ka asèpté pran disan *. Mé kou yé pa lé mouri, yé ka asèpté ròt trètman. Yé sir ki Sa-la ki kréyé lavi-a ké disan-an savé sa ki miyò pou yé. É ou menm, ès ou ka pansé Bondjé savé sa ki miyò pou ou ?

17. Jéova té ka pèrmèt Israyélit-ya sèrvi disan pou rounsèl bagaj. Kilès ?

¹⁷ Annan Lalwa Bondjé bay Moyiz, i di Israyélit-ya : « Lavi lachè-a annan disan-an, é mo menm mo mété l’ pou zòt asou lotèl-a, pou zòt péché pardonnen, paské a ké disan-an péché-ya ka pardonnen » (Lévitique 17:11). Lò Israyélit-ya té ka péché yé té pouvé doumandé Jéova pardon ké roun sakrifis zannimo. Prèt-a té ka vidé roun tibi disan zannimo-a asou lotèl tanp-a. A sèl bagaj Jéova té ka pèrmèt Israyélit-ya fè ké disan-an.

18. Gras a sakrifis Jézi, ki posibilité nou gen ?

¹⁸ Jézi vini asou latè-a é i ranplasé lalwa asou sakrifis zannimo. Kouman i fè sa ? I bay so lavi ouben so disan. A té roun sakrifis pou nou péché pardonnen (Matthieu 20:28 ; Hébreux 10:1). Lavi Jézi té gen bokou valò : Jéova résisité Jézi é gras a so sakrifis, i pouvé bay tout moun posibilité viv pou tout-tan (Jean 3:16 ; Hébreux 9:11, 12 ; 1 Pierre 1:18, 19).

19. Kisa nou divèt fè pou « nou pa rèsponsab disan pyès moun » ?

 ¹⁹ Jéova bay nou lavi é nou gen bokou rékonésans pou sa bèl kado-a. Nou anvi di moun-yan ki si yé gen lafwa annan Jézi, yé pouvé viv pou tout-tan. Nou kontan moun-yan é nou ka fè tousa nou pouvé pou anprann yé kouman yé pouvé gen lavi pou tout-tan (Ézéchiel 3:17-21). Konsa nou ké pouvé di kou apot Pòl : « Mo pa rèsponsab disan pyès moun, paské mo fè tousa mo té pouvé pou palé zòt di tousa Bondjé lé » (Actes 20:26, 27). Annou palé moun-yan di Jéova é annou di yé ki lavi-a gen bokou valò pou li. Konsa, nou ké montré ki nou gen bokou rèspè pou lavi-a ké disan-an.