1. Ñanyi witupele bumi?

YEHOBA “ye Lesa mumi.” (Yelemiya 10:10) Ye Mulenga wetu kabiji ye witupa bumi. Baibolo waamba’mba: “Yenu mwalengele bintu byonse kabiji na mambo a kyaswa muchima wenu, byaikeleko ne kulengwa.” (Lumwekesho 4:11) Yehoba ukeba’mba twikale na bumi. Kabiji bumi ke bupe bwanema bingi bwitupa Lesa.—Tangai Salamo 36:9.

2. Twafwainwa kuba byepi pa kuba’mba twikalenga bulongo?

² Yehoba ye witupa bintu bitukwasha kwikala na bumi, nabiji mema ne kajo. (Byubilo 17:28) Kabiji ukeba’mba twikalenga bulongo. (Byubilo 14:15-17) Pa kuba’mba twikalenga bulongo, twafwainwa kulondelanga mizhilo ya Lesa.—Isaya 48:17, 18.

3. Yehoba waubile byepi Kaina byo aipayile Abela?

³ Baibolo waamba’mba Yehoba wanemeka bingi bumi bwetu ne bwa bakwetu. Mwana wa ba Adama ne Evwa, aye Kaina kimye kyo amuzhingijile nkasanji Abela, Yehoba wamujimwineko Kaina amba afwomone bukaji. Bino Kaina walengulwile ne kuzhingila kya kuba “wamuvundumukijile nkasanji Abela ne kumwipaya.” (Ntendekelo 4:3-8) Yehoba wamukabishe Kaina mambo wayipaile nkasanji. (Ntendekelo 4:9-11) Bukaji ne lupato byatama bingi mambo bilengela muchima kukanama ne kuba bya bumbanzhi. Muntu uba bino kechi ukekala na bumi bwa myaka ne myaka ne. (Tangai 1 Yoano 3:15.) Twafwainwa kutemwa bantu bonse pa kuba’mba Yehoba etutalenga bulongo.—1 Yoano 3:11, 12.

4. Muzhilo umo Lesa ye apele bena Isalela witufunjishapo ka pa bumi?

 ⁴ Byo papichile myaka yavula, Yehoba wamwesheshe byo anemeka bumi mu Mizhilo Jikumi yo apele Mosesa. Muzhilo umo pa ino Mizhilo waambile’mba: “Kwipayañana ne.” (Mpitulukilo ya mu Mizhilo 5:17) Muntu waipaya mukwabo kya nshiji naye bafwainwe kumwipaya.

5. Lesa umona byepi kufumya jiimi?

⁵ Nanchi Lesa umona byepi kufumya jiimi? Bumi bwa mwana ukyangye kusemwa nabo bwanema bingi kwi Yehoba. Mu Mizhilo Yehoba yo apele bena Isalela, Yehoba waambile’mba umvwe muntu wasakula mwanamukazhi waimita kabiji mwana munda wafwa, muntu wauba byobyo bafwainwe kumwipaya. (Tangai Kulupuka 21:22, 23; Salamo 127:3) Kino kilumbulula’mba kufumya jimi kwatama bingi.—Monai Byambo byo Balumbulula, 28.

6, 7. Twafwainwa kuba byepi pa kuba’mba Yehoba etumonenga’mba twanemeka bumi?

⁶ Twafwainwa kuba byepi pa kuba’mba Yehoba etumonenga’mba twanemeka bumi bwetu ne bwa bakwetu? Kechi twafwainwa kubanga bintu byakonsha kubika bumi bwetu ne bwa bakwetu mu kizumba. Onkao mambo, kechi twafwainwa kupepanga jamba, nangwa fwanka nangwa kwingijisha michi ipendañana ne, mambo byakonsha kwitulengela kukolwa nangwa kwitwipayatu.

⁷ Lesa ye walengele mubiji ye tuji nanji ne bumi. Onkao mambo, twafwainwa kwikalanga byonka Lesa byo akeba. Twafwainwa kulamanga bulongo mibiji yetu. Inge ketubule kwiilama bulongo, Lesa kechi uketutalanga bulongo ne. (Loma 6:19; 12:1; 2 Kolinda 7:1) Inge kechi twanemeka bumi ne, kikatazha bingi kupopwela Yehoba witupa bumi ne kumutokesha kumuchima. Nangwa  kya kuba kuleka byubilo byatama kechi kwapela ne, bino inge twibikako, Yehoba wakonsha kwitukwasha kuleka bino byubilo bimwesha’mba kechi twanemeka bumi ne.

8. Twafwainwa kuba byepi pa kuba’mba tubule kubika bumi bwetu ne bwa bakwetu mu kizumba?

⁸ Twafunda kuba’mba bumi bwanema bingi. Yehoba ukeba’mba tubulenga kubika bumi bwetu ne bwa bakwetu mu kizumba. Tuba bino inge ketwendeshe bulongo myotoka ne makinga nangwa tupulututu. Kabiji kechi tukaya makayo abika bumi mu kizumba nangwa atundaika bumbanzhi ne. (Salamo 11:5) Kabiji twafwainwa kumona kuba’mba pa nzubo petu twawamishapo bulongo kuchiina mapuso. Yehoba wakambizhe bena Isalela amba: “Umvwe washimika nzubo ya katataka, wafwainwa kuzhokoloshako ka lupango peulu ya musemi, pa kuba’mba ukabule kwikala na mambo a mashi umvwe muntu wapona kufuma peulu.”—Mpitulukilo ya mu Mizhilo 22:8.

9. Twafwainwa kumonanga byepi banyama?

⁹ Yehoba ukeba kuba’mba tunemekenga ne bumi bwa banyama. Lesa waswisha kwipaya banyama bakuja ne kulengako bya kuvwala nangwa kwibepaya kuchiina’mba bakepaya bantu. (Ntendekelo 3:21; 9:3; Kulupuka 21:28) Nangwa byonkabyo, kyatama bingi kwikala na muchima wakanama na banyama nangwa kwibepayatu kya nshiji.—Byambo bya Maana 12:10.

10. Twayuka byepi kuba’mba mashi bo bumi?

¹⁰ Mashi azhila bingi kwi Yehoba mambo bo bumi. Kaina byo aipayile nkasanji Abela, Yehoba wamwambijile’mba: “Mashi a nkasobe aji mu mushiji abena kunjijila.” (Ntendekelo 4:10) Mashi a kwa Abela aimenejilengako bumi bwanji, kabiji Yehoba wamukambwile Kaina  byo aipayile Abela. Muyulo wa mu moba a Nowa byo apwile, Yehoba waambile jikwabo kuba’mba mashi emenako bumi. Yehoba waswishishe Nowa ne kisemi kyanji kuja nyama. Pano bino wibambijile amba: “Byumi byonse byenda bikekala ke kajo kenu. Byonkatu byo nemupele bijimwa, ne bino byonse nebipana kwi anweba.” Bino Yehoba wibakainye kuja mashi amba: “Nyama uji na bumi ko kuba’mba mashi, kechi mwafwainwa kumuja ne.”—Ntendekelo 1:29; 9:3, 4.

11. Lesa wakambizhe bena Isalela amba ka pa mashi?

¹¹ Byo papichile myaka 800 kufuma kimye kyo bamukainye Nowa kuja mashi, Yehoba wakambizhe bena Isalela amba: “Umvwe mwina Isalela nangwa muntu wafuma ku kyalo kingi ye mwikala nanji waya na kusonsola kabiji wakwata nyama wa mungye nangwa kañonyi ka kuja, wafwainwa kusuumisha mashi ako ne kuzhiikapo maloba.” Kabiji waambile’mba: ‘Kechi mukaje mashi ne.’ (Bena Levi 17:13, 14) Yehoba wakebelenga bantu banji kumonanga mashi amba azhila. Bafwainwe kuja nyama kechi mashi ne. Inge baipaya nyama wa kuja, bafwainwe kwichila mashi anji panshi.

12. Bena Kilishitu bamona byepi mashi?

¹² Byo papichile myaka yavula kufuma kimye kyafwile Yesu, batumwa ne bakulumpe mu kipwilo kya bena Kilishitu mu Yelusalema bapwijile pamo na kwisamba pa Mizhilo Lesa yo apele bena Isalela yafwainwe kulondelanga bena Kilishitu. (Tangai Byubilo 15:28, 29; 21:25.) Yehoba wibalengejile kuyuka kuba’mba wanemeka bingi mashi kabiji ne abo bafwainwe kwiamonanga’mba azhila. Bena Kilishitu batanshi kechi bajanga nangwa kutoma mashi nangwa kuja nyama yo babula kukingya ne. Kuba bino kwajingatu pamo na kupopwela bankishi nangwa kuba bulalelale. Kufumatu kyo kya kimye kufika ne lelo jino, bena Kilishitu bakine bakana kuja nangwa  kutoma mashi. Mambo ka? Mambo ne lelo jino Yehoba ukeba’mba tumonenga mashi amba azhila.

13. Mambo ka bena Kilishitu o bakaina kwibabika mashi?

¹³ Nanchi kino kibena kulumbulula’mba bena Kilishitu bafwainwa kukananga kwibabika mashi nyi? Ee. Yehoba witukanya kuja nangwa kutoma mashi. Inge dokotala wimukanya kutoma maalwa, nanchi kijitu bulongo kwiasa nguya ya maalwa nyi? Ine! Mukambizho wa Lesa witukanya kuja nangwa kutoma mashi wavwangamo ne kukana kwitubika mashi.—Monai Byambo byo Balumbulula, 29.

14, 15. Mambo ka bena Kilishitu o bafwainwa kunemekela bumi ne kukokela Yehoba?

¹⁴ Pano mwakonsha kuba byepi inge dokotala wimwambila’mba musakufwa inge mukane kwimubika mashi? Muntu mwine wafwainwa kufuukulapo kukokela muzhilo wa Lesa waamba pa mashi nangwa ne. Bena Kilishitu banemeka bingi bumi bwibapa Lesa, kabiji baswa mashinda akwabo a kubukilwamo. Pano bino kechi tuswa kwitubika mashi ne.

¹⁵ Twibikako kulama bulongo butuntulu bwetu bwa mubiji mambo bumi bwanema bingi kwi Lesa. Pano bino, kechi tuswa kwitubika mashi ne. Mambo kyanema kukokela Yehoba kukila kubula kumukokela na mambotu a kukeba kwikala moba avula. Yesu waambile’mba: “Awa ukeba kupulusha bumi bwanji ukebwela, pakuba yense wela bumi bwanji na mambo a amiwa ukebutaana.” (Mateo 16:25) Tukokela Yehoba mambo twamutemwa. Aye ye wayuka bituwamina, twanemeka bumi kabiji twibumona’mba bwazhila byonka Yehoba byo ebumona.—Bahebelu 11:6.

16. Ki ka kilengela bapopweshi bakishinka kukokela Lesa?

¹⁶ Bapopweshi ba Lesa bakishinka bakookela muzhilo waamba pa mashi. Bakana kuja nangwa kutoma mashi,  kabiji kechi baswa kwibabika mashi pa kubukwa ne. * Bino baswa kubukwa kwa kubula kwingijisha mashi pa kuba’mba bapulushe bumi bwabo. Bashiinwa kuba’mba Lesa mwine walengele bumi ne mashi wayuka bintu bibawamina. Nanchi ne anweba mwashiinwa kuba’mba Lesa ye wayuka bimuwamina nyi?

17. Ñanyi jishinda jimotu Yehoba jo aswishishe bena Isalela kwingijisha mashi?

¹⁷ Mu Mizhilo Lesa yo apele Mosesa, Yehoba waambijile bena Isalela amba: “Bumi bwa kintu kyumi buji mu mashi, kabiji amiwa neapana pa kya kusokelapo bitapisho kwikala a kufuchilako [nangwa’mba a kwingijisha pa kulomba kwimulekelako] mambo enu, mambo mashi o afuchilako mambo.” (Bena Levi 17:11) Umvwe bena Isalela balenga mambo, balombanga Yehoba kwibalekelako mambo kupichila mu kulambula nyama ne kwambila ñanga wa Lesa kwichila mashi a yeo nyama pa kya kusokelapo bitapisho ku nzubo ya Lesa. Jino jo jonkatu jishinda Yehoba jo aswishishe bena Isalela kwingijisha mashi.

18. Twamwenamo ka mu kitapisho kya kwa Yesu?

¹⁸ Yesu byo aishile pano pa ntanda, bumi bwanji bo apaine bwafumishepo milambo ya banyama, nangwa mashi o bapananga pa kuba’mba mambo etu alekelwe. (Mateo 20:28; Bahebelu 10:1) Bumi bwa kwa Yesu bwanemene bingi, mambo Yehoba byo amusangwile ne kumutwala mwiulu, Yehoba popo apele bantu luketekelo lwa bumi bwa myaka ne myaka.—Yoano 3:16; Bahebelu 9:11, 12; 1 Petelo 1:18, 19.

19. Twafwainwa kuba byepi pa kuba’mba ‘tubinge ku mashi a bantu bonse’?

 ¹⁹ Tumusanchila bingi Yehoba mambo witupa bumi! Kabiji tukebesha bingi kubuulako bantu kuba’mba inge baitabila mwi Yesu bakekala na bumi bwa myaka ne myaka. Twibikako kufunjisha bantu byo bafwainwa kuba pa kuba’mba bakekale na bumi bwa myaka ne myaka mambo twibatemwa. (Ezikyo 3:17-21) Tukamba byonka byaambile mutumwa Paulo amba: ‘Nabinga ku mashi a bantu bonse, mambo kechi nalekele kwimubuula kyaswa muchima wa Lesa ne.’ (Byubilo 20:26, 27) Onkao mambo, tumwesha’mba twanemeka bumi ne mashi inge ke tufunjishe bantu pe Yehoba ne byo anemeka bumi.