CHAPTA TƆTIN
Sho Se Yu Rɛspɛkt Layf
1. Udat gi wi layf?
JIOVA “na di Gɔd we de alayv.” (Jɛrimaya 10:10) Na in mek wi, ɛn i dɔn gi wi layf. Di Baybul se: “Na yu mek ɔltin ɛn yu mek dɛn ɛn gi dɛn layf bikɔs na dat yu want.” (Rɛvɛleshɔn 4:11) Fɔ tru, Jiova want wi fɔ gɛt layf. Layf na gift frɔm Jiova we rili valyu.—Rid Sam 36:9.
2. Wetin go mek wi layf bɛtɛ?
2 Jiova de gi wi wetin wi nid fɔ mek wi go kɔntinyu fɔ liv, lɛk tin fɔ it ɛn wata. (Di Apɔsul Dɛn Wok [Akt] 17:28) Bɔt nɔto dat nɔmɔ, i want wi fɔ ɛnjɔy layf. (Di Apɔsul Dɛn Wok [Akt] 14:15-17) Fɔ mek wi layf bɛtɛ, wi nid fɔ obe Gɔd in lɔ dɛn.—Ayzaya 48:17, 18.
AW GƆD DE SI LAYF?
3. Wetin Jiova du we Ken bin kil Ebɛl?
3 Di Baybul tich wi se wi layf ɛn ɔda pipul dɛn layf rili valyu to Jiova. Fɔ ɛgzampul, we Ken we na Adam ɛn Iv dɛn pikin bin vɛks bad wan pan in smɔl brɔda Ebɛl, Jiova bin wɔn Ken se i nid fɔ kɔntrol in wamat. Bɔt Ken nɔ bin lisin, ɛn i bin vɛks pasmak te i “fɔdɔm pan in brɔda ɛn kil am.” (Jɛnɛsis 4:3-8) Jiova bin pɔnish Ken fɔ we i kil Ebɛl. (Jɛnɛsis 4:9-11) So fɔ vɛks ɛn fɔ et pɔsin na tin we rili bad bikɔs i go mek wi bi pɔsin we lɛk fɛt-fɛt ɔ wikɛd tin. Pɔsin we de lɛk dat nɔ go gɛt layf we go de sote go. (Rid Jɔn In Fɔs Lɛta 3:15.) Fɔ mek Jiova gladi, wi fɔ lan fɔ lɛk ɔlkayn pipul dɛn.—Jɔn In Fɔs Lɛta 3:11, 12.
4. Wetin wan pan di lɔ dɛn we Jiova bin gi di Izrɛlayt dɛn tich wi bɔt layf?
4 Leta, afta lɔng lɔng tɛm, Jiova bin gi Lɔ dɛn to Mozis we sho se i rili valyu layf. Wan pan di lɔ dɛn se: “Nɔbɔdi nɔ fɔ kil in kɔmpin.” (Ditarɔnɔmi 5:17) If pɔsin kil in kɔmpin bay wilful, dɛn fɔ kil di pɔsin bak.
5. Aw Gɔd de fil we pɔsin pwɛl bɛlɛ?
5 Aw Gɔd de fil we pɔsin kin pwɛl bɛlɛ? Pikin sɛf we dɛn nɔ bɔn yet valyu to Jiova. Insay di Lɔ we Jiova bin gi di Izrɛlayt dɛn, Jiova bin se if pɔsin du bad tin to bɛlɛ-uman ɛn dat mek in pikin day, dɛn fɔ kil da pɔsin de bak. (Rid Ɛksodɔs 21:22, 23; Sam 127:3.) Dis de tich wi se fɔ pwɛl bɛlɛ na tin we rili bad.—Luk Ɛndnot 28 na pej 222.
6, 7. Aw wi go sho Jiova se wi valyu layf?
6 Aw wi go sho Jiova se wi valyu wi layf ɛn ɔda pipul dɛn layf? Na we wi nɔ du ɛnitin we go ambɔg wi layf ɔ ɔda pipul dɛn layf. So wi nɔ fɔ smok sigrɛt, it snɔf, ɔ tek drɔgs, bikɔs dɛn tin ya nɔ fayn ɛn dɛn kin ivin kil wi.
7 Na Gɔd gi wi layf ɛn bɔdi, ɛn wi fɔ yuz dɛn di we aw in want. So wi nid fɔ kia gud gud wan fɔ wi bɔdi. If wi nɔ du dat, wi go dɔti na Gɔd in yay. (Lɛta Fɔ Rom 6:19; 12:1; Sɛkɛn Lɛta Fɔ Kɔrint 7:1) Wi nɔ go wɔship Jiova, we gi wi layf, if we nɔ valyu layf. Pan ɔl we i nɔ go rili izi fɔ stɔp bad abit dɛn, Jiova go ɛp wi if wi tray tranga wan bikɔs wi valyu layf.
8. Wetin wi fɔ du fɔ mek shɔ se wi nɔ put wi layf ɔ ɔda pipul dɛn layf pan denja?
8 Wi dɔn lan se layf na gift we rili valyu. Jiova no se wi go du wi bɛst fɔ mek wi nɔ put wi layf ɔ ɔda pɔsin in layf pan denja. Wi go du dis bay aw wi de drayv wi motoka ɔ ɔnda. Wi de avɔyd spɔt dɛn we gɛt fɛt-fɛt. (Sam 11:5, NW) Wi de du wi bɛst bak fɔ mek wi os sef. Jiova bin gi lɔ to di Izrɛlayt dɛn se “we dɛn de bil nyu os, dɛn fɔ mek shɔ se dɛn mek relin [ɔ, lo wɔl] rawnd di ruf, bikɔs if pɔsin fɔdɔm kam dɔn ɛn day, in blɔd go de na dɛn ed.”—Ditarɔnɔmi 22:8.
9. Aw wi fɔ trit animal dɛn?
9 Ivin di we aw wi de trit animal dɛn sɛf impɔtant to Jiova. I alaw wi fɔ kil animal dɛn fɔ it ɛn fɔ yuz as klos, ɛn i alaw wi fɔ kil animal if di animal want fɔ du bad tin to wi. (Jɛnɛsis 3:21; 9:3; Ɛksodɔs 21:28) Bɔt wi nɔ fɔ trit animal dɛn bad ɔ kil dɛn jɔs fɔ spɔt.—Prɔvabs 12:10.
RƐSPƐKT LAYF BIKƆS I OLI
10. Aw wi no se blɔd tinap fɔ layf?
10 Blɔd oli to Jiova bikɔs blɔd tinap fɔ layf. Afta we Ken bin kil Ebɛl, Jiova bin tɛl Ken se: “Yu brɔda in blɔd de kray to mi frɔm di grɔn.” (Jɛnɛsis 4:10) Ebɛl in blɔd bin tinap fɔ in layf, ɛn Jiova bin pɔnish Ken fɔ we i kil in brɔda Ebɛl. Afta di Ebi Ebi Ren insay Noa in tɛm, Jiova bin sho bak se blɔd tinap fɔ layf. Jiova bin gi Noa ɛn i famili di rayt fɔ it animal dɛn. I tɛl dɛn se: “A dɔn gi [di animal] dɛn to una fɔ it.” Bɔt Gɔd bin tɛl dɛn wan tin we dɛn nɔ fɔ du. I se: “Una nɔ fɔ it ɛni animal wit in blɔd.”—Jɛnɛsis 1:29; 9:3, 4, NW.
11. Us lɔ Jiova bin gi di Izrɛlayt dɛn bɔt blɔd?
11 Afta i dɔn pas lɛk 800 ia we Jiova bin tɛl Noa nɔ fɔ it blɔd, i bin tɛl in pipul dɛn bak se: “Ɛni Izrɛlayt ɔ ɛni strenja we de wit una we kech wayl animal ɔ bɔd we pipul dɛn kin it, fɔ tɔn di animal in blɔd na grɔn ɛn kɔba am wit dɔti.” Dɔn i bin tɛl dɛn bak se: “Una nɔ fɔ it di blɔd we de pan ɛnitin we gɛt layf.” (Livitikɔs 17:13, 14, NW) Jiova bin stil want in pipul dɛn fɔ si blɔd as sɔntin we oli. Dɛn fɔ it bif bɔt nɔto di blɔd. We dɛn kil animal fɔ it, dɛn fɔ tɔn in blɔd na grɔn.
12. Aw Kristian dɛn de si blɔd?
12 Afta sɔm tɛm we Jizɔs day, in apɔsul dɛn ɛn di ɛlda dɛn na di Kristian kɔngrigeshɔn insay Jerusɛlɛm bin kam togɛda fɔ disayd us pat dɛn pan di Lɔ we Gɔd bin gi di Izrɛlayt dɛn we Kristian dɛn fɔ obe. (Rid Di Apɔsul Dɛn Wok [Akt] 15:28, 29; 21:25.) Jiova bin ɛp dɛn fɔ ɔndastand se blɔd bin stil valyu to am ɛn dɛn fɔ stil si blɔd as sɔntin we oli. Di fɔstɛm Kristian dɛn nɔ fɔ it ɔ drink blɔd ɔ it bif we blɔd de pan. If dɛn du dat, i go bad jɔs lɛk we dɛn de wɔship aydɔl dɛn ɔ du mami ɛn dadi biznɛs di we aw Gɔd nɔ want. Frɔm da tɛm de, tru Kristian dɛn nɔ de gri fɔ it ɔ drink blɔd. We wi tide? Jiova stil want wi fɔ si blɔd as sɔntin we oli.
13. Wetin mek Kristian dɛn nɔ fɔ tek blɔd?
13 Fɔ se dis min se Kristian dɛn nɔ fɔ tɛk blɔd? Yɛs, na dat i min. Jiova tɛl wi se wi nɔ fɔ it ɔ drink blɔd. If dɔktɔ se mek yu nɔ drink rɔm, yu go tek am as injɛkshɔn? Fɔ tru, yu nɔ go du dat! Semweso, we di Baybul se wi nɔ fɔ it ɔ drink blɔd min se wi nɔ fɔ tek blɔd.—Luk Ɛndnot 29 na pej 222.
14, 15. Wetin mek i impɔtant fɔ mek Kristian dɛn rɛspɛkt layf ɛn obe Jiova?
14 Bɔt wetin wi go du if dɔktɔ tɛl wi se wi go day if wi nɔ tek blɔd? Wi ɔl gɛt fɔ disayd if wi fɔ obe Jiova in lɔ bɔt blɔd. Kristian dɛn gɛt dip rɛspɛkt fɔ di layf we Gɔd gi wi, ɛn wi de luk fɔ tritmɛnt dɛn we go ɛp wi fɔ kɔntinyu fɔ liv; bɔt wi nɔ go tek blɔd.
15 Wi de tray tranga wan fɔ gɛt wɛlbɔdi, ɛn wi nɔ want fɔ day, bɔt bikɔs layf rili valyu to Gɔd, wi nɔ de tek blɔd. Fɔ obe Jiova rili impɔtant pas fɔ tray fɔ sev wi layf ɛn nɔ obe am. Jizɔs bin se: “Ɛnibɔdi we de tray fɔ sev in layf go lɔs am; bɔt ɛnibɔdi we lɔs in layf fɔseka mi, go gɛt tru layf.” (Matyu 16:25) Wi want fɔ obe Jiova bikɔs wi lɛk am. I sabi wetin gud fɔ wi, ɛn jɔs lɛk aw Jiova de si layf as sɔntin we rili valyu ɛn oli, na so wisɛf de si layf.—Di Ibru Pipul Dɛn 11:6.
16. Wetin mek Gɔd in savant dɛn de obe am?
16 Gɔd in fetful savant dɛn rili rɛdi fɔ obe in lɔ bɔt blɔd. Dɛn nɔ go it ɔ drink blɔd, ɛn dɛn nɔ go tek blɔd fɔ ɛni rizin. * Bɔt dɛn go tek ɔda tritmɛnt dɛn fɔ mek dɛn go sev dɛn layf. Dɛn rili biliv se Gɔd we mek layf ɛn blɔd no wetin gud fɔ dɛn. Yu biliv se Gɔd no wetin gud fɔ yu?
DI WANGREN WE WE JIOVA BIN ALAW FƆ YUZ BLƆD
17. Insay Izrɛl, us we nɔmɔ Jiova bin alaw di Izrɛlayt dɛn fɔ yuz blɔd?
17 Insay di Lɔ we Gɔd bin gi Mozis, Jiova bin tɛl di Izrɛlayt dɛn se: “Na insay di blɔd di layf de, ɛn a dɔn mek una de put di blɔd na di ɔlta fɔ mek una beg fɔ una sin dɛn, bikɔs na di blɔd de mek a kɔba una sin dɛn.” (Lɛvitikɔs 17:11) We di Izrɛlayt dɛn sin, dɛn kin aks Jiova fɔ fɔgiv dɛn bay we dɛn kin sakrifays animal ɛn aks di prist fɔ tɔn sɔm blɔd na di ɔlta we de na di tɛmpul. Na dis we nɔmɔ Jiova bin alaw di Izrɛlayt dɛn fɔ yuz blɔd.
18. Wetin Jizɔs in sakrifays mek pɔsibul fɔ wi?
18 We Jizɔs bin kam na di wɔl, i pul di lɔ fɔ sakrifays animal bay we i bin gi in layf ɔ blɔd fɔ mek Gɔd go fɔgiv wi sin dɛn. (Matyu 20:28; Di Ibru Pipul Dɛn 10:1) Jizɔs in layf bin so valyu dat afta Jiova bin gi am layf bak fɔ go na ɛvin, Jiova gi ɔlman di chans fɔ liv sote go.—Jɔn 3:16; Di Ibru Pipul Dɛn 9:11, 12; Pita In Fɔs Lɛta 1:18, 19.
Aw yu go sho se yu rɛspɛkt layf ɛn blɔd?
19. Wetin wi go du fɔ mek wi nɔ go gɛt blem fɔ ɔda pipul dɛn layf?
19 Wi de tɛl Jiova tɛnki fɔ di layf we i gi wi, we na wɔndaful gift! Ɛn wi want fɔ tɛl pipul dɛn se if dɛn put fet pan Jizɔs in sakrifays, dɛn go gɛt layf we go de sote go. Wi lɛk pipul dɛn, ɛn wi de du ɔltin we wi ebul fɔ tich dɛn bɔt aw dɛn go gɛt layf. (Izikɛl 3:17-21) Dɔn lɛk di apɔsul Pɔl, wi go ebul fɔ se: “Una fɔ blem unasɛf if Gɔd kɔndɛm una mek una day. Una no se a nɔ kin ayd natin wɛn a de tɛl una ɔl wetin Gɔd go du.” (Di Apɔsul Dɛn Wok [Akt] 20:26, 27) Fɔ tru, wi de sho se wi rili rɛspɛkt layf ɛn blɔd we wi tɛl ɔda pipul dɛn bɔt Jiova ɛn aw layf valyu to am.
^ par. 16 If yu want fɔ no mɔ bɔt fɔ tek blɔd, rid pej 77 to pej 79 na di buk we gɛt di taytul Kɔntinyu fɔ Du Wetin Go Mek Gɔd Lɛk Yu. Na Jiova Witnɛs dɛn mek am.
