1. Ham-e ûiba ge a mā da?

JEHOVAB “ge a ûitsama Elo.” (Jeremiab 10:10) ǁÎb ge sada di Kuru-aoba tsî ǁîb ge ûiba ge a mā da. Elobmîs ge ra mî: “Sats ge hoana kuru xui-ao, tsî sa ǂâisa xun hâ tsîn ge kuruhe xui-ao.” (ǂHaiǂhais 4:11) Î, Jehovab ge ra ǂhâba î da ûiba ūhâ. Ûib ge ǀgapi ǀkhaeba ǁîba xu.—Khomai re Psalmdi 36:9.

2. Mati da ǃgâiǃgâxa ûiba a ūhâ ǁkhā?

² Jehovab ge ǂhâ da hâ xūna ra mā da î da ûi ǁkhā, aiǁgause ǂû-i tsî ǁgammi khami. (ǃNaeǃkhaidi 17:28) Xawe ǁnās ǂamaib ge ra ǂhâba î da ǁkhoaxa ûiba ūhâ. (ǃNaeǃkhaidi 14:15-17) ǃGâiǃgâxa ûiba da ga ra ūhâ ǂgao o, o da ge Elob ǂhanuga nî ǁnâuǀnam.—Jesajab 48:17, 18.

3. Jehovaba tae-e ge a dī Kainni ge Abela ǃgam o?

³ Elobmîs ge sada ûib tsî nau khoen ûib tsîn mati a Jehovab aiǃâ ǃgomǀgausa ǃkhais xa ra ǁkhāǁkhā da. Aiǁgause, Kainni—Adammi tsî Evas ǀgôab—ge kaise ge ǁaixa hâ i ǁîb ti ǂkham ǃgâsab Abeli ǀkha, Jehovab ge Kainna ge a ǃkhâikhom îb ǁîb ǁaiba xu ǁkhaesen. Xawe Kainni ge ge ǃgâ tama hâ i tsî kaise ge a ǁaixa tsî “ǁîb di ǃgâsab Abeli ǃoagu khâi tsî ge ǂnauǃan bi.” (Genesis 4:3-8) Jehovab ge Kainna ge a ǁkhara Abelab ge ǃgam ǃkhais ǃaroma. (Genesis 4:9-11) ǁAib tsî ǃhuib tsîkha  ge kaise a ǁkhōǁkhōsa ǁîkha ǂkhabadī tamas ka io ra karoǂgaoxa kai da xui-ao. ǁNāti ī khoe-i ge ǀamo ûiba ūhâ tide. (Khomai re 1 Johaneb 3:15.) Jehovaba da ga ra ǂkhîǂkhî ǂgao o, o da ge nî ǁkhāǁkhāsen î da hoa khoena ǀnam.—1 Johaneb 3:11, 12.

4. Elob ge Israelǁaesa mā ǂhanuga tae-e ra ǁkhāǁkhā da ûib di ǀkhaeb xa?

⁴ ǀOadisidi kurigu ǃkharu hâseb ge Jehovaba ge a ǁgau ǁîb ûiba ǀgapise ra ǃgôasa Disi mîmādeb ge Moseba a mā o. ǀGui ǂhanub ge sao ra-e ra mî: “ǃGamts ge tide.” (Deuteronomium 5:17) Tsî khoe-i ga ǀnî hâ khoe-e ǃgam o, o i ge ǁnāti ī khoe-i tsîna gere ǃgamhe.

5. Eloba mati ra tsâ ǀgôa āǁnâs xa?

⁵ Eloba mati ra tsâ ǀgôa āǁnâs xa? ǃNaehe tama ǀgôa-i di ûib tsînab ge Jehovaba ra ǀgapi ǃgôa. Jehovab ge Israelǁaesa mā ǂhanugu ǃnâb ge ge mî khoe-i ga ǀgamǀkhā khoesa tsûtsû o tsîs ga ǁîs ǀgôaro-e ǂoaǃnâ o, o i ge ǁnā khoe-e gere ǃgamhe. (Khomai re Eksodus 21:22, 23; Psalmdi 127:3.) Nēs ge ra ǁkhāǁkhā da ǀgôa āǁnâs a tsū ǃkhaisa.—28ǁÎ ǀArosa ǃgāsasiba mû re.

6, 7. Mati da Jehovaba ra ǁgau ûiba da ǃgomǀgauxase ra mûsa?

⁶ Mati da Jehovaba a ǁgau ǁkhā sada ûib tsî nau khoen ûib tsîna da ra ǀgapi ǃgôa ǃkhaisa? Sada ûib tsî nau khoen ûib tsîna da ge tā ǁkhōǁkhōsa mâsib ǃnâ nî mâi. ǁNās ǀkha da ge tapaga-i tamas ka io ǀhubuǀhubusenxūna sîsenū tide, ǁîn ǂkhôadī da tsî a ǃgam da ǁkhā amaga.

⁷ Elob ge sada ûib tsî soros tsîna ge a mā ǁnā-amaga da ge ǁîb ra ǂhâba khami nî ûi. ǂHâbasa i ge a sada sorode kēǃgâsa. Dī tama da ga ra i o, o da ge Elob mûǁae a ǀurixa. (Romeǁîn 6:19; 12:1; 2 Korinteǁîn 7:1) Jehovaba da ge a ǀgoreǀî ǁoa, ǁîb ge sada a mā ûiba da ga  ǃgomǀgausase mû tama i o. Kaise i ge nî ǃgom ǃgâi tama ǁnaetiga xu ǂgōsensa xaweb ge Jehovaba ǁguiǂgāsen da ga ra o nî hui da, î da ûiba ǃgomǀgausase mû.

8. Tae-e da nî dī î da tā sada ûib tsî nau khoen ûib tsîna ǁkhōǁkhōsa mâsib ǃnâ mâi?

⁸ ǁKhāǁkhāsen da ge go ûib a ǃgomǀgausa ǃkhaisa. Jehovab ge ra ǂgomǃgâ sida ûib tsî nau khoen ûib tsîna da ǃaoroxa mâsib ǃnâ mâi tidesa. Nēsa da ge ra dī sada audodi, ǀurihāb tamas ka io ǀnî hâ ǃnari xūna da ra ǃnari ǀgaub ai. ǁKhōǁkhōsa tsî ǁgai ǂgamǂgamsen ǀhuruna xus tsîna da ge nî ǂgōsen. (Psalmdi 11:5) Dītsâ da ge nî sada omdi tsîna ǃnorasase ūhâsa. Jehovab ge Israelǁaesa ge mîmā: “ǀAsa omsats ga ǂnubibaseno, ots ge ǂamǃnâs âs ai ǃgâsenai-e nî dīǂnamipe, ǀaoǀhapi-ets sa oms ai ǁgui tidese, khoe-i ga ǁnāpa xu ǁnāo.”—Deuteronomium 22:8.

9. Mati da ǀguruna nî hâ ū?

⁹ ǀGuruna da ra hâ ū ǀgaub ge kaise Jehovaba ǂhâǂhâsaba. ǁÎb ge ra mā-am î da ǀguruna ǂû-i tsî saran ǃaroma ǃgam tsî ra mā-am da ǀguruna ǃgamsa sida ûiban ga ǁkhōǁkhōsa mâsib ǃnâ mâi o. (Genesis 3:21; 9:3; Eksodus 21:28) Xawe da ge karoǂgaoxa tamas ka io ǁkhoaxasib ǃaroma ǀguruna ǃgam tide.—ǂKhoamîdi 12:10.

10. Mati da a ǂan ǀaob ûiba ra ǂnûǁkhaeba ǃkhaisa?

¹⁰ ǀAob ge a ǃgomǀgausa tamas ka io a ǃanu, Jehovab mûǂuisa xub ge ǀaoba ûiba ra ǂnûǁkhaeba. Kainni ge Abela ǃgams khaoǃgâb ge Jehovaba ge mîba bi: “Sa ǃgâsab ǀaob di dommi ge ǃhūbaiba xu tita ǃoa ra ǂgaiba.” (Genesis 4:10) Abeli di ǀaob ge ǁîb ûiba gere ǂnûǁkhaeba tsî Jehovab ge Kainna ge a ǁkhara Abelab ge ǃgam  ǃkhais ǃaroma. Kai ǁgammi dâus khaoǃgâb ge Jehovaba ǁkhawa ge a ǁgau ǀaob ûiba ra ǂnûǁkhaebasa. Jehovab ge Noaxi tsî ǁîb omaris tsîna ge a mā-am în xamarina ǂû. ǁÎb ge ge mî: “Gon ra xū-i ûitsama-i hoa-e a-i ǂûse ība du! Tita ge ǁî-i hoa-e go mā du, ǃam ǁhaon ǁkhān khami.” Xawe ǁnāpa i ge ǀgui xū-e ge hâ i Jehovab ge mîmā nî-e în tā ǂû: “ǁGans hîa ǀoms âs xa hâǃnâhes ǀaob âs ǃnâ, ǁîsa du ge ǂû tide.”—Genesis 1:29; 9:3, 4.

11. Tae-i mîmās ǀaob disab ge Eloba Israelǁaesa mā?

¹¹ ǁAubexa 800 kurigu ǃkharu hâ Jehovab ge Noaxa mîba ǀaobats ge ǂû tides khaoǃgâb ge ǁkhawa ǁîb khoena ge a mîmā: “Tsî ǁkhāti mâ-i Israeli ôan di-i hoa-i tsî ǃhaokhoen, ǁîn ǁaegu hân di-i hoa-e ga amǀnē-i kas, ani-i ǂûhe ra-i kas hoasa ǃkhō i, ǃaub ǃnâ, ǁî-i ge ǁnā-i di ǀaoba ǂnâxū tsî nî ǁîba tsarab ǀkha ǃgū-ai.” ǁÎb ge ge mî: “Sadu ge ǁgans xares di ǀaoba ǂû tide.” (Levitikus 17:13, 14) Jehovab ge noxoba gere ǂhâba în ǁîb khoena ǀaoba ǃanu xūse mû. ǁÎn ge ge mā-amhe ǁgan-e ǂûsa xawe ǀaob ose. Xamarinan ga ra ǂû-i ǃaroma ǃgam o, on ge ǁî-i di ǀaoba ǃhūb ai nî ǂnâxū.

12. Xristeǁîna mati ǀaoba ra mû?

¹² Jesub ǁōb khaoǃgâgu ge apostelgu tsî ǀhaohâb ǃûi-aogu tsîna Jerusalems tawa ge a ǀhao î gu mîǁgui mâ ǃâb Moseb ǂhanub din Israelǁaesa ge māhe hâ ib noxoba sîsenǂuiba Xristeǁîn ai ūhâsa. (Khomai re ǃNaeǃkhaidi 15:28, 29; 21:25.) Jehovab ge ǁîga ge hui î gu ǁnâuǃā ǀaob noxoba a ǃgomǀgausa ǃkhaisa tsî gu ge ge ǂhâ hâ i noxoba ǀaoba ǃanuse mûsa. ǂGurokamǁaeb di Xristeǁîn ge ǀaoba ǂû tama i, ā tama i tsî ǃamkuse ǀaoba ǂnâǂui tama hâ ǁgan-i tsîna ge ǂû tama hâ i. ǁNāsan ga ǁnâuǀnam tama io, o i ge ge ǀgui i ǁgôa tsî ǁgoa eloǃoabas  tamas ka io ǁgauoǃnâ ǁgoe-ūgub ǀkha. ǁNā ǁaeba xun ge ama Xristeǁîna ra ǂkhā ǀaoba ǂû tsî āsa. O nētsēs? Jehovab ge noxoba ra ǂhâba î da ǀaoba ǃanuse mû.

13. Tae-i ǃaroman Xristeǁîna ǀaoba ǁîn sorodi ǃnâ ǁaiǂgā tama?

¹³ Nēsa ra ǂâibasen Xristeǁîn ǀaoba ǁîn sorodi ǃnâ ǁaiǂgā tidesa? Î, dis ge. Jehovab ge ge mîmā î da tā ǀaoba ǂû tamas ka io ā. ǀAedī-aob ga ra mîba du o, î du tā alkohol-e ā, o du nî ǁî-e sadu soros ǃnâ ǁaiǂgā? Tātsēs tsîna! ǁKhā ǀgaub ais ge mîmās ǀaoba tā ǂû tsî ās tsîna ra ǂâibasen î da tā ǀaoba sada di sorodi ǃnâ ǁaiǂgā.—29ǁÎ ǀArosa ǃgāsasiba mû re.

14, 15. Matikōse i a ǂhâǂhâsa Xristeǁî-i ûiba ǃgôa tsî Jehovaba nî ǁnâuǀnam ǃkhaisa?

¹⁴ ǀAedī-aob ga ra mîba du o, ǀaoba du ga sadu soros ǃnâ ǁaiǂgā tama io du ge nî ǁō ti, tae-e du nî dī? Mâ khoe-i hoa-i ge nî mîǁguibasen Elob ǂhanub ǀaob xa hâba i ra ǁnâuǀnam ǂgao ǃkhaisa. Xristeǁîn ge ǃgam ǃgôasiba ûib di ǀkhaeba ūba hâ Eloba xu ra hāba, ǁnā-amaga da ge ǀnî hâ ǀgauga ra ūǃoa ǀaeǃkhōhes ǃaroma î da ûi ǁkhā; xawe da ge ǀaoba sida sorodi ǃnâ ǁaiǂgā tide.

¹⁵ ǁKhā da an hoana da ge ra dī î da ǂuruse hâ, ǀaoba sida di sorodi ǃnâ ǁaiǂgās xa, ûib Eloba kaise a ǃgomǀgausaba amaga. Kaise i ge a ǂhâǂhâsa Jehovaba ǁnâuǀnamsa ǁîba ǁnâuǀnamoǃnâs xa gaxuse da ra ûi ǂgao amaga. Jesub ge ge mî: “ǁÎ-i ûiba ga sâubasen ǂgao-i hoa-i ge ǁîb xa nî kāhe-e, tsî ǁî-i ûiba tita ǃaroma ga kāhe-i hoa-i nî ǁîba hō xuige.” (Mateub 16:25) Jehovaba da ge ra ǁnâuǀnam ǂgao ǁîba da a ǀnam amaga. ǁÎb ge a ǂan tae-i sada a ǃgâiba ǃkhaisa tsî ûiba da ge ǃgomǀgausa tsî ǃanuse ra mû Jehovab khami.—Hebreǁîn 11:6.

16. Tae-i ǃaroman Elob di ǃoaba-aona ǁîba ra ǁnâuǀnam?

 ¹⁶ Elob di ǂgomǂgomsa ǃoaba-aon ge ǀaob ǂhanuba ǂgaob hoab ǀkha ra ǁnâuǀnam. ǁÎn ge ǀaoba ǂû tsî ā tama hâ tsî ǀaoba ūǃoa tide ǂurusib ǃaroma. * Xawen ge ǀnî hâ ǀaeǃkhō ǀgauga ra ūǃoa în ǁîn ûiba sâu ǁkhā. ǁÎn ge ra ǂgom ûib tsî ǀaob di Kuru-aob ǃamkuse a ǂansa tae-i ǁîna a ǃgâibasa. Sado ǂgom î du ra ǁÎb ǃgâiba ra ǁkhoreba du ǃkhaisa?

17. Israelǁaesa tae-i ǃgao ǀgui ǀaoba sîsenūsa ge mā-amhe hâ i Jehovab xa?

¹⁷ Elob ge Moseba mā ǂhanub ǃnâb ge Eloba Israelǁaesa ge mîba: “ǀOms ǁgans dis ge ǀaob ǃnâ hâ amaga ta ge tita ǁîba altars ai ge mā du, sadu ǀomdi nî ǂkhîbagusa dībahese; ǁîb ge ǁnā ǀaob ǀomsa ǂkhîbagusa nî dībaba xui-ao.” (Levitikus 17:11) Israelǁî-i ga ra ǁore o, o i ge Jehovab di ǀûbasa nî ǂgan xamari-e ǁguibas ǃnâ-ū tsî i ge pristera nî ǂgan îb ǀnî ǀaoba altars ai ǂnâ templi ǃnâ. Jehovab ge ǁnā ǀgaub ai ǀgui Israelǁaes ǀaoba nî sîsenūsa ge mā-am.

18. Jesub di ǁguibasa tae-e ra ī ǁkhā kai?

¹⁸ Jesub ge ǃhūbaib ǃoa hā o, ob ge xamarin ǁguibasa ge a ǃkhōǃkhuni, ǁîb di ûib tamas ka io ǀaobab ge sada di ǁoren ǀûbas ǃaroma a mā o. (Mateub 20:28; Hebreǁîn 10:1) Jesub ûib ge kaise ge ǀgapi i Jehovab xab ge ǀhommi khâisa māhes khaoǃgâb ge Jehovaba hoa khoena ǃēsa ge mā în ǀamose ûi ǁkhā.—Johaneb 3:16; Hebreǁîn 9:11, 12; 1 Petrub 1:18, 19.

19. Tae-e da a dī ǁkhā î da mî khoen di “ǀaob xa ta a ǃanu” ti?

 ¹⁹ Jehovaba da ge ra gangan ǁîb buruxa ǀkhaeb ûib dis xa! Tsî da ge khoena ra mîba ǂgao Jesub ǃnân ga ra ǂgom o, on ge ǀamose a ûi ǁkhā. Khoena da ge a ǀnam tsî ǁkhā da a xūn hoana da ge ra dī khoena ǁkhāǁkhāsa în ûiba hō. (Esegieli 3:17-21) Apostel Paulub khami da ge a mî ǁkhā: “Hoadu di ǀaob xa ta a ǃanu ǃkhaisa, xū-i xare-e ta ǁnāxūǃnâ tama hâ xui-ao, Elob di ǂâibasens hoaragasa ta ge sado gere aoǁnâba.” (ǃNaeǃkhaidi 20:26, 27) Î, ǁgau da ge ra ǃgamse da ra ûib tsî ǀaob tsîna ǃgôasiba ūba hâsa, khoena Jehovab xa mîbas tsî matikōseb ǁîba ra ûiba ǀgapi ǃgôa ǃkhais tsîna.