1. Haniha zameʼe khöda faʼauri?

YEHOWA no ”Lowalangi sauri”. (Yeremia 10:10) Yaʼia Zomböi ba sameʼe faʼaurida. Imane Sura Niʼamoniʼö, ”Yaʼugö zamazökhi fefu hadia ia, ba börö nilau dödöu, wa so ia.” (Famaʼeleʼö 4:11) Omasi Yehowa na auri ita. Faʼauri ba no buala fondrege zebua böli moroi khönia.​—Baso Zinunö 36:10.

2. Hewisa enaʼö mofozu waʼaurida?

² Ibönökhi zoguna khöda Yehowa simane ö ba idanö enaʼö tola auri ita. (Halöwö Zinenge 17:28) Baero daʼö, omasi ia na ohahau dödöda. (Halöwö Zinenge 14:15-17) Enaʼö mofozu waʼaurida, taʼoʼö mene-mene Lowalangi.​—Yesaya 48:17, 18.

3. Hadia nifalua Yehowa khö Gaʼino me ibunu Habeli?

³ Ifahaʼö ita Sura Niʼamoniʼö wa ebua sibai mböli waʼauri niha gulidanö föna Yehowa. Duma-dumania, simane ono Gadamo ba Khawa sotöi Kaʼino me mofönu ia khö nakhinia Habeli, ifangelama Gaʼino Yehowa enaʼö iʼalösi wönunia. Hizaʼi, lö ifondro-ndrongo Kaʼino, mofönu sibai ia irege ’ibunu Habeli’. (I Moze 4:3-8) Ihuku Gaʼino Yehowa börö me no ibunu Habeli. (I Moze 4:9-11) Fönu ba faʼabao dödö tola tobali fangala, daʼö mbörö wa tobali ita niha safaito. Tebai lasöndra waʼauri  si lö aetu niha simane daʼö. (Baso I Yohane 3:15.) Ba wangomusoiʼö tödö Yehowa, moguna taʼomasiʼö fefu niha.​—I Yohane 3:11, 12.

4. Ba goroisa nibeʼe Lowalangi ba ndraono Gizaraʼeli, hadia zi tobali famahaʼö khöda?

⁴ Ngahönö fakhe aefa daʼö, iforomaʼö Yehowa wa iʼosinangegö sibai waʼauri niha, me inötö ibeʼe Goroisa si Fulu khö Moze, simane, ”Böi angeʼe.” (V Moze 5:17) Na so niha si no moʼangeraigö wamunu awönia, ba labunu göi ia.

5. Hewisa dödö Lowalangi na so zondru-ndrugö ono ba dalu?

⁵ Hewisa dödö Lowalangi na so zondru-ndrugö ono ba dalu? Iʼosinangegö Yehowa nono si so ba dalu. Ba Goroisa nibeʼe Yehowa ba ndraono Gizaraʼeli, labunu niha sanimba ira alawe sanabina na no aekhu dabinania. (Baso II Moze 21:22, 23; Zinunö 127:3.) Ba daʼö aboto ba dödöda wa fasala wondru-ndrugö ono.​—Faigi Gonönöta 28.

6, 7. Hewisa wangoromaʼöda khö Yehowa wa taʼosinangegö waʼauri?

⁶ Hewisa wangoromaʼöda föna Yehowa wa taʼosinangegö waʼaurida ba faʼauri niha böʼö? Yaʼia daʼö böi tafalua zi möi famakiko faʼaurida hegöi niha böʼö. Andrö böi taʼogunaʼö mbago, afo, mazui narkoba, börö me daʼö zi möi famunuda.

⁷ No ibeʼe mboto ba faʼaurida Lowalangi, taʼogunaʼö si faudu ba zomasi ia. Andrö moguna tarorogö mbotoda. Na lö tafalua daʼö, raʼiö ita föna Lowalangi. (Roma 6:19; 12:1; II Korindro 7:1) Na lö taʼosinangegö waʼaurida, tebai möi ita enoni Yehowa.  Itolo ita Yehowa na taforege wangosinangegö faʼauri ba taböhöli gamuata niʼogorofinia.

8. Hadia nifaluada enaʼö lö tafakiko waʼaurida ba faʼauri niha böʼö?

⁸ No taʼila wa faʼauri andrö no buala sebua böli. Faduhu dödö Yehowa wa lö tafakiko waʼaurida hegöi faʼauri niha böʼö, ba ginötö taʼohe moto, honda, ba tanö böʼönia. Böi fao ita ba olahraga si möi famaʼala ma famakiko mbotoda. (Zinunö 11:5) Tahaogö wamaigi enaʼö böi mosikho niha ba nomoda. Imane Yehowa ba ndraono Gizaraʼeli, ”Na molau omo ndraʼugö, ba öfotarali zagö khöu, faböi tohare ba nomou horö fangeʼe öbeʼe, na so zaekhu tou, moroi yawa, niha.”​—V Moze 22:8.

9. Hadia zinangea tafalua ba gurifö?

⁹ Iʼila Yehowa hadia nifaluada ba gurifö. Itehegö tabunu gurifö enaʼö taʼa, ba tabaliʼö nukha gulinia. Itehegö tabunu gurifö samaʼala yaʼita. (I Moze 3:21; 9:3; II Moze 21:28) Hizaʼi, böi tafakao-kao gurifö mazui tabunu ha börö olahraga.​—Gamaedola 12:10.

10. Hana wa taʼila wa do andrö salahi waʼauri?

¹⁰ Do ba no niʼamoniʼö ba wamaigi Yehowa, börö me do andrö no faʼauri. Imane Yehowa khö Gaʼino me no aefa ibunu Habeli, ”Muʼao khögu ndro nakhiu andrö moroi ba danö tou.” (I Moze 4:10) Do Habeli no salahi waʼaurinia, andrö ihuku Gaʼino Yehowa me no ibunu nakhinia. Me no aefa Anönö Danö Idanö ba götö Noakhi, ifuli iforomaʼö Yehowa wa do andrö faʼauri. Itehegö Yehowa khö ndra Noakhi wemanga nagole gurifö. Imane, ”Fefu  zaliwa-liwa, si so noso, ba ömi: simane fameʼegu bulu ndruʼu andrö ubeʼe khömi, fefu.” Hizaʼi, so nitegu Yehowa enaʼö böi muʼa, ”Ha nagole si so noso—na bakha, si so donia—na, ba lö tola miʼa.”​—I Moze 1:29; 9:3, 4.

11. Hadia goroisa nibeʼe Lowalangi ba ndraono Gizaraʼeli sanandrösa ba ndro?

¹¹ Mato 800 fakhe me no aefa itegu Noakhi ba wemanga ndro, imane Yehowa ba ndraono Gizaraʼeli, ”Ba dozi iraono Gizaraʼeli, awö niha böʼö, si so ba khöra, na so zahulu hadia ia ba ma fofo, si tola laʼa, ba ifowöi ndro ba ibalugö tanö.” Imane zui Yehowa, ”Lö tola miʼa ndro nösi.” (III Moze 17:13, 14) Omasi Yehowa na ono mbanuania laʼamoniʼö ndro andrö. Tola laʼa nagole, tobali tebai laʼa ndro. Na laʼa gurifö, lataba, laduwagö ndronia ba danö.

12. Hadia nifalua niha Keriso sanandrösa ba ndro?

¹² Mato haʼuga fakhe me no aefa mate Yesu, owulo fefu zinenge ba mbanua niha Keriso awö zatua ba Yeruzalema ba wamatunö hezo manö Goroisa Moze sinangea lafalua niha Keriso. (Baso Halöwö Zinenge 15:28, 29; 21:25.) Itolo ira Yehowa enaʼö so khöra waʼaboto ba dödö wa ebua sibai mböli ndro ba wamaiginia, ba itötöna göi enaʼö laʼamoniʼö ndro. Tebai laʼa ndro niha Keriso si föföna mazui labadu, ba tebai laʼa gurifö si lö aduwa do. Na laʼa ndro fagölö ira zanömba adu mazui samalua amuata wohorö. Andrö wa fefu niha Keriso sindruhu tebai laʼa mazui labadu ndro. Hewisa niha Keriso ba ginötö andre? Omasi Yehowa na laʼamoniʼö ndro.

13. Hana wa lö latema niha Keriso transfusi darah?

 ¹³ Hadia daʼö geluahania tebai labeʼe niha Keriso ndro bakha ba mbotora (transfusi darah)? Yaʼia. No itegu ita Yehowa ba wemanga mazui famadu do. Duma-dumania, na itegu ndraʼugö doto ba wamadu tuo, hadia ösuti duo andrö ba mbotou? Tatu manö löʼö! Simanö göi me no itegu ita ba wemanga do, eluahania tebai tasuti ba mbotoda ndro mazui taʼogunaʼö transfusi darah.​—Faigi Gonönöta 29.

14, 15. Hewisa niha Keriso wangosinangegö faʼauri hegöi ba woloʼö somasi Yehowa?

¹⁴ Hewisa dödöu na iwaʼö doto mate ndraʼugö na lö öʼogunaʼö transfusi darah? Yaʼita samösa zangaʼi angetula ba woloʼö oroisa Lowalangi sanandrösa ba ndro. Niha Keriso sindruhu, laʼosinangegö sibai waʼauri, andrö laʼalui dalu-dalu tanö böʼö si lö itegu Lowalangi. Hizaʼi, tebai laʼogunaʼö transfusi darah.

¹⁵ Taʼodödögö wondrorogö botoda, ba börö me ebua mböli waʼaurida andre föna Lowalangi, lö tatema transfusi darah. Abölö sökhi na taʼoʼö niwaʼö Yehowa, moroi na anau nosoda ba tasawö goroisania. Imane Yesu, ”Ba zangalui faʼanau nosonia, aetu ia, ba saetu noso, na börö ndraʼo, daʼö zanöndra yaʼia.” (Mataiʼo 16:25) Omasi ita taʼoʼö niwaʼö Yehowa börö me taʼomasiʼö ia. Abölö iʼila hadia zi sökhi khöda, ba taʼamoniʼö ndro simane nifalua Yehowa.​—Heberaiʼo 11:6.

16. Hana wa laʼoʼö li Lowalangi ono mbanuania?

¹⁶ Ono mbanua Lowalangi si lö faröi, lahalö gangetula ba woloʼö oroisania sanandrösa ba ndro. Lö laʼa mazui labadu ndro, ba lö latema transfusi  darah gofu hadia zalua. * Hizaʼi, latema dalu-dalu tanö böʼö si lö itegu Lowalangi enaʼö tola döhö ira. Faduhu dödöra wa Somböi faʼauri ba sameʼe do zabölö mangila hadia zi sökhi khöra. Hadia faduhu dödöu wa iʼila Lowalangi zi sökhi khöu?

17. Hezo laʼogunaʼö ndro nitehegö Yehowa ba ndraono Gizaraʼeli?

¹⁷ Ba Goroisa nibeʼe Lowalangi khö Moze, imane Yehowa ba ndraono Gizaraʼeli, ”Noso nösi sa zi so ba ndro, ba no utehe khömi ba naha wameʼe sumange, enaʼö labeʼe fameta zalami; fameta zala sa ndro andrö.” (III Moze 17:11) Na no lafalua horö iraono Gizaraʼeli, lataba gurifö ba wangandrö fangefa horö khö Yehowa, ba laʼandrö khö ndra ere sebua ba wanuwagö do gurifö andrö ba naha wameʼe sumange. Ha daʼö lala nitehegö Yehowa ba ndraono Gizaraʼeli ba wongogunaʼö do.

18. Hadia guna höli si no ibeʼe Yesu?

¹⁸ Me möi Yesu ba gulidanö, lö saʼe tabeʼe gurifö tobali fangefa horö me no isalahini Yesu faoma faʼaurinia mazui donia. (Mataiʼo 20:28; Heberaiʼo 10:1) Me no isusugi Yesu Yehowa ba zorugo, ibeʼe waʼaurinia sebua böli tobali höli ba niha gulidanö enaʼö lasöndra waʼauri si lö aetu.​—Yohane 3:16; Heberaiʼo 9:11, 12; I Fetero 1:18, 19.

19. Hadia nifaluada enaʼö ’lö horöda ba ndro niha fefu’?

 ¹⁹ Taʼandrö saohagölö khö Yehowa me no ibeʼe khöda mbuala sebua yaʼia waʼauri! Börö waʼomasida ba niha, tafatunö ba tafahaʼö ira wa lasöndra waʼauri si lö aetu na mamati ira khö Yesu. (Hezekieli 3:17-21) Aefa daʼö tola tawaʼö simane niwaʼö zinenge sotöi Faulo, ”Lö horögu ba ndrora fefu. Löʼö sa nitahagu, fa lö uʼombakhaʼö khömi gera-era Lowalangi fefu.” (Halöwö Zinenge 20:26, 27) Taʼosinangegö waʼaurida ba do si no ibeʼe khöda na tafatunö ba niha sanandrösa khö Yehowa ba hewisa waʼebua mböli waʼaurida andre khönia.