1. Ke mang a re filego bophelo?

JEHOFA “ke Modimo yo a phelago.” (Jeremia 10:10) Ke Mmopi wa rena, e bile o re file bophelo. Beibele e re: “O bopile dilo ka moka gomme di bile gona le go bopša ka baka la thato ya gago.” (Kutollo 4:11) Ee, Jehofa o be a nyaka gore re phele. Bophelo ke mpho e bohlokwa kudu e tšwago go yena.​—Bala Psalme 36:9.

2. Re ka dira’ng gore re atlege bophelong?

² Jehofa o re nea dilo tšeo re di hlokago gore re tšwele pele re phela, tše bjalo ka dijo le meetse. (Ditiro 17:28) Eupša go feta moo, o nyaka gore re thabele bophelo. (Ditiro 14:15-17) E le gore re atlege bophelong, re swanetše go kwa melao ya Modimo.​—Jesaya 48:17, 18.

3. Jehofa o ile a dira’ng ka morago ga gore Kaine a bolaye Abele?

³ Beibele e re ruta gore maphelo a rena le a ba bangwe a bohlokwa kudu go Jehofa. Ka mohlala, ge Kaine e lego morwa wa Adama le Efa, a be a galefetše ngwanabo e lego Abele, Jehofa o ile a lemoša Kaine gore o swanetše go laola kgalefo ya gagwe. Eupša Kaine ga se a ka a theetša, gomme o ile a galefa kudu moo a ilego “a hlasela Abele ngwanabo gomme a mmolaya.” (Genesi 4:3-8) Jehofa o ile a otla Kaine ka ge a bolaile Abele. (Genesi 4:9-11) Ka gona, kgalefo le lehloyo di kotsi ka gobane di ka dira gore re be ba bašoro goba ba sehlogo. Motho yo a dirago dilo tše bjalo a ka se hwetše bophelo bjo bo sa felego. (Bala 1 Johane 3:15.) E le gore re thabiše Jehofa, re swanetše go ithuta go rata batho ka moka.​—1 Johane 3:11, 12.

4. O mongwe wa melao yeo Modimo a e neilego Baisiraele o re ruta’ng ka mpho ya bophelo?

 ⁴ Mengwaga e dikete ka morago, Jehofa o ile a bontšha gore o lebelela bophelo bo le bohlokwa kudu ge a be a nea Moshe Melao e Lesome. O mongwe wa melao yeo o re: “O se ke wa bolaya.” (Doiteronomio 5:17) Ge e ba motho a bolaile yo mongwe ka boomo, motho yoo le yena o be a swanetše go bolawa.

5. Modimo o ikwa bjang ka go ntšha mpa?

⁵ Modimo o ikwa bjang ka go ntšha mpa? Gaešita le bophelo bja lesea leo le sego la tšwa le belegwa bo bohlokwa kudu go Jehofa. Molaong woo Jehofa a o neilego Baisiraele, o ile a bolela gore ge e ba motho a ka gobatša mosadi gomme ngwana wa gagwe a hwa, motho yoo o swanetše go bolawa. (Bala Ekisodo 21:22, 23; Psalme 127:3.) Se se re ruta gore go ntšha mpa go fošagetše.​—Bala Tlhaloso 28.

6, 7. Re bontšha Jehofa bjang gore re lebelela bophelo bo le bohlokwa kudu?

⁶ Re ka bontšha Jehofa bjang gore re lebelela bophelo bja rena le bja ba bangwe bo le bohlokwa kudu? Ka gore re se dire selo le ge e le sefe seo se ka beago bophelo bja rena goba bja ba bangwe kotsing. Ka gona re ka se kgoge motšoko goba seneifi goba ra diriša dihlaretagi gampe, ka gobane di a re gobatša e bile di ka re bolaya.

⁷ Modimo o re file bophelo le mebele ya rena, gomme re swanetše go di diriša ka tsela yeo a re laelago gore re di diriše. Ka gona re swanetše go hlokomela mebele ya rena. Ge e ba re sa e hlokomele, re tla šilafala pele ga mahlo a Modimo. (Baroma 6:19; 12:1; 2 Bakorinthe 7:1) Re ka se kgone go hlankela Jehofa yo a re filego bophelo, ge e ba re sa lebelele bophelo bo le bohlokwa kudu. Gaešita le ge go ka ba thata gore re tlogele mekgwa e mebe yeo re e tlwaetšego, Jehofa o tla re thuša ge e ba re iteka ka gobane re lebelela bophelo bo le bohlokwa kudu.

8. Re tla dira’ng go kgonthišetša gore ga re bee maphelo a rena le a ba bangwe kotsing?

 ⁸ Re ithutile gore bophelo ke mpho e bohlokwa kudu. Jehofa o a tseba gore re tla dira sohle seo re ka se kgonago gore re se bee maphelo a rena le a ba bangwe kotsing. Re dira se ka tsela yeo re otlelago dikoloi tša rena, dithuthuthu goba senamelwa le ge e le sefe se sengwe. Ga re tšee karolo dipapading tše kotsi goba tšeo di nago le bošoro. (Psalme 11:5) Le gona re dira sohle seo re ka se kgonago gore magae a rena a šireletšege. Jehofa o ile a laela Baisiraele gore: “Ge o ka aga ntlo e mpsha, o age le mmotwana [goba, leboto] ka godimo ga tlhaka ya gago, e le gore ntlo yeo ya gago e se be le molato wa madi ka gobane motho a ka wa go yona.”​—Doiteronomio 22:8.

9. Re swanetše go swara bjang diphoofolo?

⁹ Gaešita le tsela yeo re swarago diphoofolo ka yona e bohlokwa go Jehofa. O re dumelela gore re bolaye diphoofolo gore re hwetše dijo le diaparo, le gona o re dumelela gore re bolaye phoofolo e itšego ge e ba e bea bophelo bja rena kotsing. (Genesi 3:21; 9:3; Ekisodo 21:28) Eupša re ka se be sehlogo go diphoofolo goba go di bolaela feela go ithabiša.​—Diema 12:10.

10. Re tseba bjang gore madi a emela bophelo?

¹⁰ Madi ke a makgethwa go Jehofa ka gobane a emela bophelo. Ka morago ga gore Kaine a bolaye Abele, Jehofa o ile a botša Kaine gore: “Madi a ngwaneno a nkgoeletša a le mmung.” (Genesi 4:10) Madi a Abele a be a emela bophelo bja gagwe, gomme Jehofa o ile a otla Kaine ka ge a bolaile Abele. Ka morago ga Meetsefula a mehleng ya Noa, Jehofa o ile a bontšha gape gore madi a emela bophelo. Jehofa o ile a dumelela Noa le ba lapa la gagwe gore  ba je nama ya diphoofolo. O itše: “Le ka ja phoofolo e nngwe le e nngwe e phelago. Ge e le dimela tše ditala tšona, ke le nea tšona ka moka.” Lega go le bjalo, go be go na le selo setee seo Jehofa a ilego a ba laela gore ba se se je. O itše: “Feela le se ke la ja nama yeo e nago le moya wa yona, e lego madi a yona.”​—Genesi 1:29; 9:3, 4.

11. Ke taelo efe ya mabapi le madi yeo Modimo a ilego a e nea setšhaba sa Isiraele?

¹¹ Ka morago ga mengwaga e ka bago e 800 Jehofa a boditše Noa gore a se je madi, o ile a laela setšhaba sa gagwe gape gore: “Ge e le motho le ge e le ofe wa bana ba Isiraele goba modiiledi yo a diiletšego go lena yo e ka rego ge a tsoma a swara phoofolo goba nonyana e jewago, gona a tšholle madi a yona a a khupetše ka mmu.” Ke moka a oketša ka gore: “Le se ke la ja madi.” (Lefitiko 17:13, 14) Jehofa o be a sa dutše a nyaka gore batho ba gagwe ba lebelele madi e le a makgethwa. Ba be ba ka ja nama eupša e sego madi. Ge ba be ba bolaile phoofolo gore ba e je, ba be ba swanetše go tšhollela madi a yona mmung.

12. Bakriste ba lebelela madi bjang?

¹² Mengwaga e itšego ka morago ga ge Jesu a hwile, baapostola le bagolo ba phuthego ya Bokriste kua Jerusalema ba ile ba kopana gore ba dire phetho ya gore ke dikarolo dife tšeo di bego di sa šoma go Bakriste tša Molao wo o bego o neilwe Baisiraele. (Bala Ditiro 15:28, 29; 21:25.) Jehofa o ile a ba thuša go kwešiša gore madi a be a sa le bohlokwa go yena le gore ba sa dutše ba swanetše go a tšea e le a makgethwa. Bakriste ba lekgolong la pele la nywaga ba be ba se ba swanela go ja goba go nwa madi goba go ja nama yeo e sego ya tšwa madi gabotse. Ge ba be ba ka dira bjalo, go be go tla no swana le go rapela medimo ya diswantšho goba go dira bootswa. Go tloga ka nako yeo go ya pele, Bakriste ba therešo ba ile ba gana go ja goba go  nwa madi. Go thwe’ng ka rena lehono? Jehofa o sa nyaka gore re lebelele madi e le a makgethwa.

13. Ke ka baka la’ng Bakriste ba gana go tšhelwa madi?

¹³ Na se se bolela gore Bakriste ba swanetše go gana le go tšhelwa madi? Ee, go bjalo. Jehofa o re laetše gore re se ke ra ja madi goba ra a nwa. Ge ngaka e be e ka go botša gore o se ke wa nwa bjala, na o be o ka bo hlabela mo mmeleng wa gago? Aowa! Ka mo go swanago, taelo ya gore re se ke ra ja madi goba go a nwa e bolela gore ga se ra swanela go tšhelwa madi.​—Bala Tlhaloso 29.

14, 15. Go bohlokwa gakaaka’ng gore Mokriste a hlomphe bophelo le go kwa Jehofa?

¹⁴ Re tla dira’ng ge e ba ngaka e ka re botša gore re tlo hwa ge e ba re sa tšhelwe madi? Motho yo mongwe le yo mongwe o swanetše go itirela phetho ya ge e ba a tla kwa molao wa Modimo wa mabapi le madi goba a ka se o kwe. Rena Bakriste re hlompha kudu mpho ya Modimo ya bophelo, le gona re tla nyaka mekgwa e mengwe ya kalafo gore re se ke ra hwa; eupša re ka se amogele go tšhelwa madi.

¹⁵ Re dira sohle seo re ka se kgonago gore re dule re phetše gabotse, eupša ka gobane bophelo bo le bohlokwa kudu go Modimo, re ka se dumele go tšhelwa madi. Go bohlokwa kudu go kwa Jehofa go e na le gore re leke go telefatša bophelo bja rena ka go se mo kwe. Jesu o itše: “Mang le mang yo a nyakago go phološa moya wa gagwe o tla o loba, eupša mang le mang yo a lobago moya wa gagwe ka baka la ka, o tla o rua.” (Mateo 16:25) Re nyaka go kwa Jehofa ka gobane re mo rata. O tseba seo se ka re holago, le gona go etša Jehofa re lebelela bophelo bo le bohlokwa kudu e bile e le bjo bokgethwa.​—Baheberu 11:6.

16. Ke ka baka la’ng bahlanka ba Modimo ba nyaka go mo kwa?

¹⁶ Bahlanka ba botegago ba Modimo ba ikemišeditše go  kwa molao wa gagwe wa mabapi le madi. Ba ka se je madi goba go a nwa, e bile ba ka se tšhelwe madi ka mabaka le ge e le afe a tša kalafo. * Lega go le bjalo, ba tla amogela dikalafo tše dingwe e le gore ba phološe maphelo a bona. Ba kgodišegile gore Mmopi wa bona o tseba seo se ka ba holago. Na o a dumela gore Jehofa o tseba seo se ka go holago?

17. Ke tsela efe e nnoši yeo Jehofa a bego a dumeletše Baisiraele go diriša madi ka yona?

¹⁷ Molaong woo Modimo a ilego a o fa Moshe, Jehofa o ile a botša Baisiraele gore: “Bophelo bja sephedi bo mo mading gomme nna ke a beile aletareng gore le direle meoya ya lena poelano, [goba, go kgopela tebalelo] ka gobane madi ke ona a dirago poelano ka bophelo bjo bo lego go ona.” (Lefitiko 17:11) Ge Baisiraele ba be ba dirile sebe, ba be ba kgona go kgopela Jehofa gore a ba lebalele ka go dira sehlabelo ka phoofolo gomme ba kgopela moperisita gore a tšhollele a mangwe a madi a yona aletareng ka tempeleng. Yeo e be e le tsela e nnoši yeo Jehofa a bego a dumeletše Baisiraele go diriša madi.

18. Sehlabelo sa Jesu se dira gore re tle re kgone go hwetša’ng?

¹⁸ Ge Jesu a be a le mo lefaseng, o ile a fediša molao wa go dira dihlabelo ka diphoofolo ka go neela bophelo bja gagwe, goba go fana ka madi a gagwe, e le gore re lebalelwe dibe. (Mateo 20:28; Baheberu 10:1) Bophelo bja Jesu bo be bo na le mohola kudu moo e lego gore ka morago ga gore Jehofa a mo tsošetše legodimong, Jehofa o ile a nea batho ka moka sebaka sa go tlo phela ka mo go sa felego.​—Johane 3:16; Baheberu 9:11, 12; 1 Petro 1:18, 19.

19. Re swanetše go dira’ng gore re ‘hlweke mading a batho bohle’?

 ¹⁹ Re leboga Jehofa gore o re file mpho ye e kgahlišago ya bophelo! Le gona re nyaka go botša batho gore ge e ba ba na le tumelo go Jesu ba ka phela ka mo go sa felego. Re rata batho, le gona re tla dira sohle se re ka se kgonago go ba ruta seo ba swanetšego go se dira gore ba hwetše bophelo. (Hesekiele 3:17-21) Ke moka, re tla kgona go bolela go swana le moapostola Paulo gore: “Ke hlwekile mading a batho bohle, gobane ga se ka lesa go le botša morero ka moka wa Modimo.” (Ditiro 20:26, 27) Ee, re bontšha gore re tloga re hlompha bophelo le madi ge re botša ba bangwe ka Jehofa le kamoo bophelo bo lego bohlokwa ka gona go yena.