1. Háísh éí iiná nihainílá?

JIIHÓVAH éí “Diyin God hináanii” nilı̨́. (Jeremiah 10:10) Bí éí ánihiilaa, índa iiná nihainílá. Diyin Bizaad kóbíłní: “Tʼáá ałtsoní íinilaa, éí íinínízinii bee ádaalyaago dahólǫ́.” (Revelation 4:11) Jiihóvah éí dahiniiʼnáa doo nízin. Iiná ayóó ílı̨́įgo nihainílá.​—Acts 17:24, 25 yíníłtaʼ.

2. Haitʼéego niheʼiinaʼ yáʼátʼéehgo siláa doo?

² Łaʼ bídin dahwiinidzinígíí éí chʼiyáán dóó tó. Díí éí Jiihóvah nihainíláago bee dahiniiʼná. (Acts 17:28) Iiná íiyisíí baa nihił dahózhǫ́ǫ doo nízin. (Acts 14:15-17) God bibee hazʼánii bikʼeh honiilʼı̨́įgo éí niheʼiinaʼ yáʼátʼéehgo siláa doo.—Isaiah 48:17, 18.

3. Kéin bitsilí Éíbel yiyiisxı̨́įgo, Jiihóvah haa yidzaa?

³ Diyin Bizaad yee naʼnitingo Jiihóvah éí diné bibee daʼiinaʼ ílı̨́įgo yaa nitsíkees. Kéin, Ádam dóó Íiv beʼawééʼ ńtʼééʼ baa haneʼgo éí bitsilí Éíbel ayóó átʼéego yichʼįʼ báhóóchįįd. Jiihóvah éí díí áháchįʼ bikʼeh dídleeh hodííniid. Kéin tʼáadoo akʼeh hółʼı̨́į da. Tʼóó tséʼédin báhóóchįįdgo “bitsilí Éíbel . . . yiyiisxı̨́.” (Genesis 4:3-8) Kéin ákójiidzaago biniinaa atíhoʼdiilyaa. (Genesis 4:9-13) Éí bąą ajoodlá índa áháchįʼ bááhádzid, háálá łaʼda atídíílííł. Ákójítʼéhígíí éí hoolʼáágóó iiná doo haa doolyéeł da. (1 John 3:15 yíníłtaʼ.) Diné ayóóʼííníʼníigo éí Jiihóvah baa bił hózhǫ́.​—1 John 3:11, 12.

4. God bibee hazʼánii biiʼdę́ę́ʼ łaʼ, iiná haitʼéego yee naʼnitin?

 ⁴ Kóhóótʼįįdóó ląʼí nááhaigo, Mózes éí neeznáago bikʼeh óʼooʼníiłii beílyá. Éí biiʼ Jiihóvah iiná ayóó ílı̨́įgo ííshjání áyiilaa. Éí łaʼ kótʼéego bikááʼ, “diné tsʼídá doo diyííłhéeł da.” (Deuteronomy 5:17) Diné łaʼ diyeeshxééł jiniizı̨́įʼgo áádóó jiisxı̨́įgo éí hó ałdóʼ hodiʼyoolyééł.

5. Awééʼ atsą́ haalʼeełgi, God haitʼéego yaa nitsíkees?

⁵ Awééʼ atsą́ haalʼeełgi, Jiihóvah haitʼéego yaa nitsíkees? Awééʼ tʼahdíí atsą́ sitı̨́įgo bibee iinaʼ ayóó ílı̨́įgo yaa nitsíkees. Ízrel dineʼé bee hazʼáanii baa yílyáhą́ą áníigo, amá yiltsą́ągo łaʼda atíbiilaago, bitsʼą́ą́dóó awééʼígíí daaztsą́ągo atíʼiilaaígíí bidiʼyoolyééł. Éí kóní: “Diné łaʼ ahigą́ągo biniinaa asdzání yiltsánígíí atíyiilaago áádóó bitsą́haʼííʼéelgo, nidi amá dóó awééʼ éí tʼáadoo ádzaaígóogo atíʼiilaaígíí ninázhʼdoodlééł. . . . Nidi łaʼ beʼiinaʼ ninítʼíʼgo éí atíʼiilaaígíí hweʼiinaʼ bee bidiníná ninázhʼdoodlééł.” (Exodus 21:22, 23, NW; Psalm 127:3.) Díí yee nanihinitingo éí awééʼ atsą́ haalʼeełgi doo álʼı̨́į da.​—Endnote 28 níníłʼı̨́.

6, 7. Iiná ílı̨́įgo níilʼı̨́įgo, éí haitʼéego Jiihóvah bił ííshjánígo íilʼı̨́į doo?

⁶ Tʼáá ałtso iiná ílı̨́įgo níilʼı̨́įgo, éí haitʼéego Jiihóvah bił ííshjánígo íilʼı̨́į doo? Éí niheʼiinaʼ dóó łahdę́ę́ʼ bibeʼiinaʼ baa siitiʼ doo. Áko nátʼoh doo choiʼı̨́į da, dóó azeeʼ doo bee tsiʼnaʼadáa da. Háálá éí atsʼíís yaa dahoołʼaah dóó naʼałtseed.

⁷ God éí iiná índa nihitsʼíís nihainílá, áko bí íinízinígíí bikʼehgo hazhóʼó choiniilʼı̨́į doo. Nihitsʼíís baa áhwiilyą́ą doo. Doo baa áhwiilyą́ą́góó éí doo diyingo baa nitsíikees doo. (Romans 6:19; 12:1; 2 Corinthians 7:1) Iiná doo nihił nilı̨́ı̨́góó éí Jiihóvah doo bá neelʼaʼ da doo. Iiná nihił nilı̨́įgo éí doo yáʼádaashóonii  niʼádiilnííł. Azhą́ shı̨́ı̨́ nanitłʼah dooleeł ndi, Jiihóvah nihíká análwoʼ doo.

8. Haitʼéego éí niheʼiinaʼ dóó łahdę́ę́ʼ bibeʼiinaʼ baa siitiʼ doo?

⁸ Iiná ayóó ílı̨́įgo nihaa yílyáago baa ídahwiilʼą́ą́ʼ. Jiihóvah éí niheʼiinaʼ dóó náánáłahdę́ę́ʼ bibeʼiinaʼ baa siitiʼ doo nihóʼní. Éí áłʼąą ádaatʼéego ndaalbąąsígíí hazhóʼó ndeilbąąs doo. Báhádzidgo índa atéʼélʼı̨́įgo bee nidaʼaʼnéhígíí bitsʼąą kóniitʼée doo. (Psalm 11:5) Nihighan hazʼą́ągi ałdóʼ, łaʼda doo atídooníił da biniyé hashtʼe hólzin doo. Jiihóvah éí Ízrel dineʼé kwíidííniid: “Kin ániidíii ádá áníléehgo bikááʼdę́ę́ʼ bibąąhgóó tsé ahéédíítłʼı̨́ı̨́ł, áko áádę́ę́ʼ tʼáá háiida doo adah adootłish da, índa dił doo bee ádihodidííltʼih da.”​—Deuteronomy 22:8.

9. Naaldlooshii éí haitʼéego baa nitsíikees doo?

⁹ Naaldlooshii baa nitsíikeesgi éí Jiihóvah ílı̨́įgo yinéłʼı̨́. Chʼiyáán dóó ééʼ biniyé choidooʼįįłgo Jiihóvah éí naaldlooshii naaltseedgo yee hasʼą́. Ndi naaldlooshii łaʼ atíʼiilaago, éí diyoolyéełgo yee hasʼą́. (Genesis 3:21; 9:3; Exodus 21:28) Ákondi naaldlooshii doo atélʼı̨́į da, doodaiiʼ baa honeenigo doo naaltseed da.​—Proverbs 12:10.

10. Dił éí iiná bił ahídéétʼiʼgo, haitʼéego nihił bééhózin?

¹⁰ Jiihóvah éí dił dílzingo yaa nitsíkees, háálá dił éí iiná bił ahídéétʼiʼ. Kéin bitsilí Éíbel yiyiisxı̨́įgo Jiihóvah éí Kéin kwííłní: “Nitsilí bidił biinééʼ łeeshtahdę́ę́ʼ shichʼįʼ yicha.” (Genesis 4:10) Éíbel bidił yę́ę éí bibeʼ iiná bił ahídéétʼiʼ, áko Jiihóvah éí Kéin bitsilí Éíbel yiyiisxı̨́įgo biniinaa atíhoʼdiilyaa. Nóah biyóołkááłdą́ą́ʼ tó yíląądóó bikʼijįʼ, dił éí iiná bił ahídéétʼiʼgo  átʼé níigo Jiihóvah ííshjánígo ánááyiidlaa. Nóah dóó beʼasdzą́ą́ dóó baʼáłchíní, naaldlooshii bitsįʼ bichʼiyąʼ dooleełgo yeidiníʼą́. Jiihóvah ání: “Naaldeehii nináneelʼą́ąjįʼ nihichʼiyąʼ doo, naniseʼ daadáanii nihaa diníʼánígi átʼéego nihaa dinishʼaah.” Ndi, Jiihóvah áháłní: “Atsįʼ éí dił [iiná] tʼáá biiʼ hólǫ́ǫgo doo dadoohsı̨́įł da, atsʼíís éí dił yee hiná.”​—Genesis 1:29; 9:3, 4.

11. God dił yee hazʼą́ągi, bidineʼé haʼátʼíí yiłníigo yee diníʼą́?

¹¹ Nóah dił doo dadoohsı̨́įł da biʼdooʼniid yę́ędóó 800 nááhaigo, Jiihóvah bidineʼé ííłní: “Łaʼda naalzheehgo naaldlooshii, doodaiiʼ nidaatʼaʼii daadánígíí łaʼ shóyoostʼeʼgo łeeshtahjįʼ yizéididoogishgo bidiłígíí yikʼi hwiidoogoł.” Áádóó ání: “Bidił doo dadoohsı̨́įł da.” (Leviticus 17:13, 14) Jiihóvah éí bidineʼé dił dílzingo ádajósin doo, hóʼníí ńtʼééʼ. Atsįʼígíí dajiyą́ą doo, ndi diłígíí éí dooda. Chʼiyáán biniyé naaldlooshii nidajiłtseedgo, diłígíí éí łeeshtahjįʼ yáádajiidzíʼ ńtʼę́ę́ʼ.

12. Christ bikʼeh dahółʼínígíí, dił haitʼéego yaa nitsídaakees?

¹² Jesus daaztsą́ą́dóó ląʼí nááhaigo, Jerúsalemgi daalʼaadii áádóó hastóí á naazíinii áłah sílı̨́ı̨́ʼ. Éí Jiihóvah bibee hazʼánii biiʼdóó, háiidígíí lá Christ yikʼeh dahółʼínígíí tʼahdii bídadéétʼiʼ danízingo yiniyé áłah daazlı̨́ı̨́ʼ. (Acts 15:28, 29 yíníłtaʼ; 21:25.) Áádóó Jiihóvah éí dił tʼahdii ílı̨́įgo yaa nitsíkeesgo baa ákodazhniizı̨́ı̨́ʼ. Áko Jiihóvah éí hó ałdóʼ dił dílzingo ádajósin doo hóʼní. Níléídę́ę́ʼ Christ yikʼeh dahółʼínę́ę, dił doo deiyą́ą da, áádóó doo deidlą́ą da ńtʼééʼ. Áko naaldlooshii nídeiłʼahgo, bidił tʼáadoo hazhóʼó nahjįʼ kólyaaígíí bitsįʼ doo deiyą́ą da ńtʼééʼ. Dił dajiyą́ dóó dajidlą́ągo éí edaʼalyaii bichʼįʼ nahadlá doodaiiʼ naʼageh bee tsiʼnaʼadáhígi beełtʼéego tʼóó baaʼíh.  Áádóó wóshdę́ę́ʼ hodeeshzhiizhdóó, Christ yikʼeh dahółʼínígíí dił doo deiyą́ą da áádóó doo deidlą́ą da ńtʼééʼ. Ákoshąʼ dííshjı̨́įdi? Tʼáá ákótʼéego Jiihóvah éí dił dadíníilzin doo nihóʼní.

13. Christ yikʼeh dahółʼínígíí, haʼátʼíí biniyé dił iih nádziih dooda daaní?

¹³ Áko Christ yikʼeh dahółʼínígíí éí dił iih nádziihgi dooda daaníi doo. Jiihóvah éí dił doo dííyı̨́įł da doodaiiʼ doo díídlı̨́įł da nihił ní. Azeeʼ ííłʼíní wáin tʼáadoo nidlání nidííniidgo, ákoósh tsah bee wáin ádiih hikáah doo? Nda shı̨́ı̨́! Dił doo jiiyą́ą da índa doo jiidlą́ą da danihidiʼnínígi átʼéego, doo éí tsah bee dił nihiih hikáah da doo.​—Endnote 29 níníłʼı̨́.

14, 15. Iiná dóó Jiihóvah bikʼeh hóʼı̨́įgi, haitʼéego ílı̨́įgo baa nitsáhákees?

¹⁴ Azeeʼ ííłʼíní łaʼ, dił tʼáadoo niih nákaahgóó dadíítsaał nihidííniidgo shąʼ? God éí dił yee hazʼą́ągi tʼáá łáʼí niitínígo bikʼeh ádiilníiłgi nihąąh silá. God iiná einíláhígíí nihił danilı̨́. Áko łah átʼéhígíí dił tʼáágééd choidiilʼı̨́ı̨́łígi dahólónígíí chodeiiniilʼı̨́.

¹⁵ God iiná bił nílı̨́įgo biniinaa nihitsʼíís biih híníłígíí baa siitiʼ łeh. Áko dił doo nihiih nídookáał da, háálá Jiihóvah bikʼeh hóʼı̨́ı̨́jí áłtsé siláa doo. Jesus ání: “Tʼáá háiida jiinánígíí bąąh hą́ą́snízinígíí éí yóóʼazhdootłish, nidi tʼáá háiida shí shiniinaa jiinánígíí ninázhdiníʼą́ągo, éí jiinánígíí ádá shóizhdoołtʼeeł.” (Matthew 16:25) Jiihóvah bikʼehgóó ániitʼéii doo niidzin, háálá ayóóʼííníiʼní. Nihá yáʼádaatʼéehii bił bééhózin. Bí átʼéhígi átʼéego, nihí ałdóʼ iiná dílzingo ayóó ílı̨́įgo baa nitsídeikees.​—Hebrews 11:6.

16. God bá ndaalʼaʼí, haʼátʼíí biniyé bikʼeh dahółʼı̨́?

¹⁶ God bá ndaalʼaʼí éí dił chooʼı̨́įgi bee hazʼánígíí bikʼehgóó  ádaniitʼée doo danízin. Éí dił doo deidooyı̨́įł da índa doo deidoodlı̨́įł da, áádóó dił iih nádziihgi ałdóʼ yitsʼą́ą́ʼ ádaatʼé. * Ákondi dił tʼáágééd dahólónígíí chodayoołʼı̨́įgo bidaʼiinaʼ doo ndahatʼéeh da. Háálá dayoodlą́ągo iiná dóó dił áyiilaii God, éí bá yáʼádaatʼéhígíí tʼáá íídą́ą́ʼ bił bééhózin. Díísh yinídlą́?

17. Ízreldi, haitʼéego dił chooʼı̨́įgo Jiihóvah yee hasʼą́ą́ ńtʼééʼ?

¹⁷ God bibee hazʼáanii Mózes yeiníláhą́ą biiʼdę́ę́ʼ, bidineʼé Ízrel kwíidííniid: “Atsʼíís éí dił yee hiná, áádóó éí nihaa diníʼą́ągo bikááʼ nááʼiiniihí bikáaʼgi bee nihá kʼééhodoodǫǫł, háálá diłígíí bee iináago bee á kʼééhoodǫǫłii átʼé.” (Leviticus 17:11) Ízrel dineʼé bąąhági átʼéii ádaatʼı̨́įgo, Jiihóvah há yóóʼanéidiyiiʼaah doo biniyé naaldlooshii náádayiiłniih ńtʼééʼ. Éí nááʼiiłniihii naaldlooshii yaa nídeiłtéehgo áádóó kin biiʼ sohodizingi nááʼiiniihí bikáaʼjįʼ diłígíí yáádajiidziʼ ńtʼééʼ. Ízrel dineʼé kótʼéego tʼéiyá dił chodayoołʼı̨́įgo Jiihóvah há yee hasʼą́ą́ ńtʼééʼ.

18. Jesus nináʼádeetʼą́ągi, haʼátʼíí nihá baa honítʼiʼ doo?

¹⁸ Jesus beʼiinaʼ ninéidiníʼą́ągo bidił yę́ę éí naaldlooshii bidił bikékʼehjįʼ ajííyá. Díí binahjįʼ nihibąąhági ádaatʼéii nihá kʼéédaʼdoolchǫǫł. (Matthew 20:28; Hebrews 10:1) Jesus beʼiinaʼ ayóó átʼéego ílı̨́įgo biniinaa Jiihóvah éí bílaʼashdlaʼii hoolʼáágóó iiná bá ahóótʼiʼ dooleełgo áyiilaa.​—John 3:16; Hebrews 9:12; 1 Peter 1:18, 19.

19. Diné “bidił doo bee shaa náhódóotʼįįł da” niidzingo, haadiiʼnííł?

 ¹⁹ Jiihóvah iiná nihainíláagi éí baa hózhǫ́ǫgo baa ahééh daniidzin! Jesus deinohdlą́ągo hoolʼáágóó dahiinohʼnáa doogo átʼé, dadiiʼníigo diné bee bił dahwiilneʼ doo. Diné ayóóʼádeíníiʼní, éí hoolʼáágóó iiná nídeididoolééł biniyé nidaniitin. (Ezekiel 3:17-21) Áko Paul ádííniid yę́ęgi átʼéego nihí ałdóʼ kódadiiʼníi doo: Diné “bidił doo bee shaa náhódóotʼįįł da, háálá Diyin God binahatʼaʼ tʼáadoo nihitsʼąą nanéłʼı̨́įʼ da, nidi tʼáá átʼé bee nihił nahosisneʼ.” (Acts 20:26, 27) Jiihóvah índa iiná ílı̨́įgo yaa nitsíkeesgi baa dahwiilneʼgo éí iiná dóó dił dadíníilzingo átʼé.