1. ¿Pitaj ñucanchijman causaita cushca?

JEHOVÁ DIOSCA ‘causaj Diosmi’ can (Jeremías 10:10). Paimi ñucanchijman causaita curca. Apocalipsis 4:11-pi Diosmanta parlashpaca, “canmari tucui ima tiyajtapish rurashcangui. Can munashpa rurashcamantami tucui imapish tiyan” ninmi. Yaya Dios causaita cujpimi causanchij, purinchij. Chaimantami causaitaca valorana canchij (Salmo 36:9-ta liyipai).

2. ¿Alaja causaita charingapajca imatataj rurana canchij?

² Yaya Diosca ñucanchij cushilla causachunmi munan (Hechos 14:15-17). Chaimi micunitata, yaquituta, tucui imalla minishtishcacunata cushca (Hechos 17:28). Alaja causaita charingapajca Dios mandashcacunatami pajtachina canchij (Isaías 48:17, 18).

3. ¿Caín paipaj huauqui Abelta huañuchijpica Diosca imatataj rurarca?

³ Bibliapica, tucui gentecunapaj causaimi Diospajca valishca can ninmi. Adanpaj churi Cainmanta yachashun. Caín paipaj huauqui Abelhuan colerajpimi Yaya Diosca, ama chashna coleraichu nishpa mandarca. Cainca Dios mandashcata uyanapaj randica, yallitaj ‘pꞌiñarishpami Abelta huañuchirca’ (Génesis 4:3-8). Chashna rurashcamantami Diosca Caintaca maldicirca (Génesis 4:9-13). Ñucanchijpish shujtajcunahuan yallitaj colerashpaca paicunata llaquichina yuyaitachari charishun. Yallitaj colerajcuna cashpaca huiñai causaitaca mana charishunchu (1 Juan 3:15-ta liyipai). Diospaj  ñaupajpi alli ricuringapajca tucui laya gentecunatami cꞌuyana canchij (1 Juan 3:11, 12).

4. ¿Diosca israelcunataca imamantataj shujtajcunata ama huañuchinguichij nirca?

⁴ Diospajca causaica achca valishcami can. Chaimantami Diosca israelitacunaman 10 mandamientocunata cucushpaca ‘ama huañuchinguichij’ nircami (Deuteronomio 5:17). Moisespaj tiempopica, pipish paipaj munaimanta shujtajcunata huañuchishpaca paipishmi huañuna carca.

5. ¿Huahuata shulluchinaca imamantataj mana alli can?

⁵ Huahuata shulluchinaca Diospaj ñaupajpica mana allichu can. Paipajca manaraj huacharishca huahuapaj causaipish achca valishcami can. Por ejemplo, israelitacunaman cushca leypica: “Maijan cꞌaricuna macanacucushpa chichu huarmita panda macajpi huahuata manaraj huachana punlla pajtajpi huahua huacharijpica, ni pi mana huañujpica, chai cꞌarica chai huarmipaj cusa mashnata pagachun nishcata pagachun, chai runaca juezcuna mandashcata pagachun. Ashtahuanpish maijanpish huañujpica, chai runapish huañuchishca cachun” nircami (Éxodo 21:22, 23, NM; Salmo 127:3; nota 28-ta ricui).

6, 7. ¿Causaita valorashcataca ima shinataj ricuchishun?

⁶ Ñucanchij causaita, shujtajcunapaj causaita valorashpaca mana peligropi churanachu canchij. Shinallataj drogarina, fumana, machana viciota charishpaca ñucanchij saludtami dañashun, hasta huañui imamanmi chayai tucushun. Cai viciocunamanta caruyashpaca causaita valorashcatami ricuchishun.

⁷ Causaica Dios cushca sumaj regalomi can. Diosta adorashpa catingapajca causaitami valorana canchij. Ñucanchij cuerpota mana cuidashpaca causaita mana  valorashcatami ricuchishun. Yaya Diospaj ñaupajpipish mana alli ricurishunchu (Romanos 6:19; 12:1; 2 Corintios 7:1). Viciocunata, mana alli costumbrecunata saquinaca sinchi shinachari ricuringa. Pero chai viciocunata saquichun, causaita valorachunca Diosllatajmi ayudanga.

8. ¿Ñucanchij causaita, shujtajcunapaj causaita valorashpaca imatataj mana rurashun?

⁸ Jehová Dios causaita cushcamantami ñucanchij causaitapish, shujtajcunapaj causaitapish mana peligropi churana canchij. Chaimantami shuj carrota, motota manejacushpapish mana maipish cachun manejana canchij. Causaita peligropi churaj pugllaicunapipish mana participanachu canchij (Salmo 11:5). Diosca israelitacunamanca: “Terrasayuj huasita rurashpaca chai muyundijta pircanguichij. Chashna rurashpami maijan chai jahuamanta urmashpa huañujpica, cancunapaj huasi ucupuracunataca mana juchachishca canguichij” nircami (Deuteronomio 22:8). Ñucanchij huasitapish tucuitami allichishpa charina canchij.

9. ¿Animalcunataca ima layataj cuidana canchij?

⁹ Yaya Diosca animalcunatapish alli cuidachunmi munan. Paica animalcunataca micungapaj o churanata charingapaj huañuchichunmi saquishca. Shinallataj maijan animal ñucanchij causaita peligropi churacujpica huañuchichunmi saquishca (Génesis 3:21; 9:3; Éxodo 21:28). Pero animalcunataca mana maipish cachun huañuchinachu canchij. Shinallataj pugllangaraiculla mana macanacuchinachu canchij (Proverbios 12:10).

10. ¿Yahuarpi causai cashcataca Diosca ima shinataj ricuchirca?

¹⁰ Yahuarpi causai cashcamantami Diospajca achca valishca can. Chaimantami Caín paipaj huauqui Abelta  huañuchijpica Yaya Diosca: “Cambaj huauquipaj yahuarmi ñucataca allpamanta caparicun” nirca (Génesis 4:10). Abelpaj yahuarmi allpamanta ñucata caparicun nishpaca, Yaya Diosca Abelpaj causaimantami parlacurca. Juillu tamyashca qꞌuipaca Diosca Noepish paipaj familiapish animalcunata huañuchishpa micuchunmi saquirca. Paica: ‘Causaiyuj caj tucui animalcunaca cancuna micunapajmi. Chashnallataj yacu granocunatapish, verdi qꞌuihuacunatapish tucuitami cancunaman cuni. Pero, causaita cuj yahuarndij aichataca ama micunguichij’ nircami (Génesis 1:29; 9:3, 4).

11. ¿Israelitacunamanca Jehová Diosca imatataj mandarca?

¹¹ Noeman yahuarta ama micuchun nishca punllamantaca ñami 800 huatacuna pasashca carca. Yahuar achca valishca cashcata ricuchingapajmi Yaya Diosca israelitacunamanca: ‘Maijan israelcuna cashpa, paicunapurapi causaj mana israelcuna cashpapish micuna animalta cashpa, alasyuj micuna animalta cashpapish shitana caspihuan huañuchishpaca yahuartaca allpahuan tapachichun. Yahuartaca amataj micunguichijchu’ nirca (Levítico 17:13, 14). Caipi ricushca shinaca israelitacunaca shuj animalpaj aichata micungapajca yahuartaca allpapi jichashpami tapachina carca.

12. ¿Diosta sirvijcunaca ima shinataj yahuarca valishca cashcata ricuchinchij?

¹² Jesús huañushca asha huatacuna qꞌuipami apostolcunapish, shujtaj ancianocunapish Jerusalenpi tandanacurcacuna. Chaipimi Moisesman cushca leymanta imalla mandashcacunata pajtachishpa catinata ricurcacuna (Hechos 15:28, 29-ta liyipai; Hechos 21:25). Yahuar valishca cashcata intindichunca Jehová Diosmi ayudarca. Yahuarta micunaca yanga dioscunata adorashca shina o huainayashpa juchata rurashca shinami can.  Chaimantami Jesusta punta catijcunaca yahuarta mana micujcuna, mana ubyajcuna carca. Yahuarlla aichatapish mana micujcunachu carca. Chai tiempomanta cunancamami Diosta sirvijcunaca yahuartaca mana micunchij, mana ubyanchij. Chashnami yahuarca valishca cashcata ricuchinchij.

13. ¿Diosta sirvijcunaca imamantataj yahuarta mana churarinchij?

¹³ Diosca yahuarta amataj micunguichij, amataj ubyanguichij ninmi. Pero ¿yahuartaca venacunapi churarinallachu canchij? Mana. Caipi yuyashun. Shuj doctor, tragotaca mana ubyanachu cangui nijpica, ¿tragotaca venacunapi churaringuimanchu? Mana churaringuimanchu. Chashna layallatajmi yahuarta venacunapi churarishpaca chai yahuarta micucushca, ubyacushca laya canga (nota 29-ta ricui).

14, 15. ¿Ashtahuan causasha nishpapish imamantataj yahuartaca mana churachinchij?

¹⁴ Doctorcuna, “yahuarta mana churarishpaca huañunguimi” nijpica ¿imatataj rurashun? Cada unomi Diospaj mandashcacunata cazunata o mana cazunata decidina canchij. Diosta sirvijcunaca causaita valorashcamantami jambiringapajca shujtaj tratamientocunata mashcanchij. Pero yahuartaca manataj churachinchijchu.

¹⁵ Diospajca yahuarca achca valishcami can. Chaimantami alli saludta charisha nishpapish yahuartaca mana churachinchij. Yahuarta churachishpaca tal vez ashtahuanmi causashun. Pero Diospaj ñaupajpica mana alli ricurishunchu. Jesusca: “Pipish quiquin causaita quishpichisha nijca, chingaringami. Pipish ñucata catishcamanta quiquin causaita chingachijca huiñai causaitami japinga” nircami (Mateo 16:25). Jehová Diosta cꞌuyashcamantami pai mandashcacunata cazusha  ninchij. Paimi ñucanchijpaj ima alli cashcataca yachan. Ñucanchijpish pai shinami causaitaca valorana canchij (Hebreos 11:6).

16. ¿Yaya Diostaca imamantataj cazuna canchij?

¹⁶ Yaya Dios causaita cushcamantami ñucanchijpaj ima alli cashcata paica alli yachan. Chaimantami Diosta cazushun nishpa yahuartaca mana micunchij, mana ubyanchij, mana churachinchij. * Pero mana huañushun nishpami shujtaj laya tratamientocunata chasquinchij.

17. ¿Israelitacuna yahuarta imapi utilizachuntaj Diosca saquirca?

¹⁷ Jehová Diosca israelitacunamanca: “Aichapaj causaica yahuarpimi. Yahuartaca cancunapaj almamanta altarpi churanapajmi curcani. Yahuarmi cancunapaj almataca quishpichin” nircami (Levítico 17:11; nota 17-ta ricui). Israelitacuna paicunapaj juchacunata Dios perdonachunca, shuj animaltami temploman apana carca. Chaipimi sacerdoteca chai animalta huañuchishpa sacrificiota cuna carca. Chai animalpaj yahuartapish altar jahuapimi jichana carca. Chaipajllami Yayitu Diosca yahuarta utilizachun saquirca.

18. ¿Jesús huañushcamantaca ima bendiciontataj charishun?

¹⁸ Jesús cai Allpaman shamushpami paipaj causaita cushpa ñucanchij juchacunamanta huañurca. Chai punllamantami animalcunata huañuchishpa sacrificiota ruranaca ña mana minishtirin (Mateo 20:28; Hebreos 10:1). Jesuspaj causaica achca valishcami can. Pai huañushcamantami Diosca ñucanchijmanca huiñaita  causana oportunidadta cushca (Juan 3:16; Hebreos 9:11, 12; 1 Pedro 1:18, 19).

19. “Yahuarmantaca ima juchachina illajmi canchij” ningapajca ¿imatataj rurana canchij?

¹⁹ Yaya Diosmanta yachachishpami causaita valorashcataca ricuchinchij. Chaimantami shujtajcunapish Jesuspi crishpa huiñai causaita charichun imata rurana cashcata yachachinchij (Ezequiel 3:17-21). Chashna rurashpallami ñucanchijpish apóstol Pablo shina sintirishun. Paica, “chashna tucuita huillashcamantaca, cancunapaj yahuarmantaca ima juchachina illajmi canchij. Taita Dios imallata munashcataca, mana pacashpami tucuita huillarcani” nircami (Hechos 20:26, 27).