1. Noha ayatuhaire obwomeezi?

YAHWE “nuwe Ruhanga omwomezi.” (Yeremiya 10:10) Nuwe muhangi kandi atuhaire obwomeezi. Baibuli egamba ngu: “Niwe wahangire byona kandi nkokuwagondeze bikabaho kandi bikahangwa.” (Okusuku’rwa 4:11) Yahwe akagonza tube bomeezi. Obwomeezi kiri kisembo eky’omuhendo eky’atuhaire.—Soma Zabuli 36:9.

2. Nitusobora tuta kuba n’obwomeezi oburungi?

² Yahwe atuhaire ebintu ebiratukonyera kwikara tuli bomeezi. Nk’ekyokurorraho, atuhaire eby’okulya n’amaizi. (Engeso Ezabakwenda 17:28) Baitu, ekintu eky’arukutugondeza kukira muno nukwo kutunga okusemere’rwa omu bwomeezi. (Engeso Ezabakwenda 14:15-17) Kusobora kuba n’obwomeezi oburungi, tusemeriire kworobera ebiragiro bye.—Isaya 48:17, 18.

3. Yahwe akakora ki Kaini obuyaisire Aberi?

³ Baibuli egamba ngu obwomeezi bwaitu hamu n’obwomeezi obw’abantu abandi buli bw’omuheendo hali Yahwe. Nk’ekyokurorraho, Kaini—mutabani wa Adamu na Haawa—obuyakwatiirwe omuto we Aberi ekiniga, Yahwe akagambira Kaini ngu asemeriire kuleka ekiniga. Kaini atahurre kandi ekiniga kye kikeyongera “yaimuki’ra Aberi mugenziwe, yamuita.” (Okubanza 4:3-8) Yahwe akafubira Kaini habw’okwita Aberi. (Okubanza 4:9-11) Nahabweki ekiniga n’enobi bibi muno habwokuba nibisobora kutuletera obwisi. Abantu ab’ekiniga kiingi tibalitunga obwomeezi obutahwaho. (Soma 1 Yohana 3:15.) Tusemeriire  kugonza abantu boona obuturaaba nitugonza kusemeza Yahwe.—1 Yohana 3:11, 12.

4. Ekimu ha biragiro Ruhanga ebi yahaire Abaisareri kitwegesa ki ha bikwatiraine n’ekisembo ky’obwomeezi?

⁴ Hanyuma y’emyaka nyingi, Yahwe akooleka ngu obwomeezi abutwara kuba kintu kikuru obu yahaire Musa Ebiragiro Ikumi. Kimu ha biragiro binu kikaba nikigamba: “Otaliita.” (Ekyebiragiro 5:17) Omuntu obu yaitaga omuntu ondi akigenderiire, nauwe yaitwaga.

5. Okwihamu enda Ruhanga akubazaaho ki?

⁵ Ruhanga ahurra ata omuntu obwaihamu enda? Obwomeezi bw’omwana atakazairwe nabwo bw’omuhendo omu maiso ga Yahwe. Omu biragiro Yahwe ebi yahaire Abaisareri, akagamba ngu kakuba omuntu ahutaaza omukazi wenda kikaletereza enda ye kurugamu, omuntu ogu akaba asemeriire kwitwa. (Soma Okuruga 21:22, 23; Zabuli 127:3.) Kinu nikitwegesa ngu kwihamu enda kibi.—Rora Ebyongiirweho, akacweka 28.

6, 7. Tusobora tuta kwoleka Yahwe ngu obwomeezi nitubutwara kuba obw’omuhendo?

⁶ Tusobora tuta kwoleka Yahwe ngu nitutwara obwomeezi bwaitu n’obw’abantu abandi kuba obw’omuhendo? Titusemeriire kukora ebintu ebirukuta obwomeezi bwaitu rundi obw’abantu abandi omu kabi. Nahabw’eki titusemeriire kukozesa etaaba, kulya amairungi rundi kunywa enjaahi hamu n’ebibazi ebindi ebirukutookoza obwongo, habw’okuba bisiisa obwomeezi bwaitu kandi nibisobora kutukora kubi rundi n’okutwita.

⁷ Obwomeezi n’omubiri ebitwine Ruhanga nuwe yabituhaire, nahabweki tusemeriire kubikozesa omu mulingo arukugonza. Tusemeriire kurolerra kurungi emibiri Yaitu. Yahwe n’aija kuturora nk’abantu abatasemiire obuturaaba tutaroleriire kurungi emibiri yaitu. (Abarumi 6:19; 12:1; 2 Abakolinso 7:1) Titusobora kuramya Yahwe ayatuhaire  obwomeezi kandi kunu tutarukuteekamu obwomeezi ekitiinisa. Nikisobora kuba kigumire kuleka ebikorwa ebibi, baitu obuturalengaho kubireka, Yahwe n’aija kutukonyera.

8. Kiki ekiturakora kurora ngu titwateeka obwomeezi bwaitu n’obw’abandi omu kabi?

⁸ Twegere ngu obwomeezi buli kisembo eky’omuhendo. Yahwe amanyire ngu titurukwija kukora kintu kyona ekirata obwomeezi bwaitu rundi obw’omuntu ondi weena omu kabi. Titurukwija kuta obwomeezi omu kabi obuturaaba nituvuga emotoka rundi ekiruka kindi kyona. Tusemeriire kwetantara emizaano eye raturugirramu akabi. (Zabuli 11:5) Tusemeriire kukora kyona ekirukusoboka kurora ngu amaka gaitu tigaaba ndugirro y’obutandwa. Yahwe akaragira Abaisareri ngu: “Obwolyombeka enju empyaka olikora orugo ha ruguru yayo, oleke okuleta esagama ha nju yawe rundi omuntu obwaligwaho.”—Ekyebiragiro 22:8.

9. Ebisoro tusemeriire kubitwaza tuta?

⁹ Omulingo tutwazamu ebisoro nakyo kiri kintu kikuru hali Yahwe. Yahwe aikiriza twite ebisoro nukwo tutunge eby’okulya, n’eby’okujwara, rundi nitusobora kwita ekisoro kakuba kiba nikireeta akabi. (Okubanza 3:21; 9:3; Okuruga 21:28) Baitu titusemeriire kwita ebisoro tutaine ekigendererwa kyona rundi kubiita habw’okugonza okwesemeza.—Enfumo 12:10.

10. Tumanyire tuta ngu obwomeezi buli omu sagama?

¹⁰ Habwokuba obwomeezi buli omu sagama Yahwe arora esagama nk‘erukwera. Kaini obu yaisire Aberi, Yahwe akamugambira ngu: “Iraka eryesagama ya mugenzi wawe nirinyami’ra okuruga ha itaka.” (Okubanza 4:10) Obwomeezi bwa Aberi bwali omu sagama kandi Yahwe akafubira Kaini habw’okwita mugenzi we. Hanyuma y’okusandarra  kw’amaizi omu kasumi ka Nuha, Yahwe akongera yakyoleka kurungi ngu obwomeezi buli omu sagama. Akaikiriza Nuha n’eka ye okulya ebisoro. Akagamba ngu: “Ebintu byona ebyomezi ebirukugenda biriba ebyokulya namberemuli nkobunyansi obubisi nukwo mbahaire byona.” Baitu, haroho ekintu kimu Yahwe eki yabatangire kulya: “Enyama hamu nobwomezi bwayo—niyo sagama yayo—mutaligirya.”—Okubanza 1:29; 9:3, 4.

11. Ruhanga akaheereza ihanga lya Isareri kiragiro ki ekirukukwata ha sagama?

¹¹ Obu harabireho emyaka nka 800 hanyuma y’okutanga Nuha kulya esagama, Yahwe akongera yaragira abantu be ngu: “Omuntu wena wena owomu bana ba Isareri, rundi omu banyaihanga abagonya omulibo, alikwata nahiiga ekisoro kyona rundi enyonyi yona erukulibwa alisesa esagama yayo nagisweke’ra nitaka.” Kandi y’abagamba: “Mutalirya esagama.” (Ebyabalevi 17:13, 14) Yahwe akaba n’agonza abantu be ab’akasumi ako kutwara esagama n’ekintu eky’omuhendo. Bakaba nibaikirizibwa kulya enyama baitu hatali esagama. Obu baitaga ekisoro ky’okulya, bakaba basemeriire kusesa esagama yakyo ha itaka.

12. Abakristaayo batwara bata esagama?

¹² Hanyuma y’akasumi Yesu afiire, abakwenda, hamu n’abagurusi ab’omu kitebe Ekikristaayo omu Yerusalemu bakesorooza hamu okubazaaho ebiragiro ebi Yahwe yahaire Isareri. Ekigendererwa ky’okwesorooza hamu kyali kukomamu ebiragiro Abakristaayo ebi bakaba nibakyayetaagisa kuhondera. (Soma Engeso Ezabakwenda 15:28, 29; 21:25.) Yahwe akabakonyera okwetegereza ngu esagama yali y’omuhendo kandi baali basemeriire kugitwara enk’eyerukwera. Abakristaayo ab’omu kyasa ky’okubanza bakaba batarukwikirizibwa kulya, n’okunywa esagama, rundi kulya enyama y’ekisoro ekikaba kitasazirwe esagama ekaseseka. Okulya esagama kikaba kikorwa kibi ekirukwinganaingana  n’okuramya ebisisani rundi okusihana. Kuruga obu Abakristaayo ab’amananu bangira kimu kulya rundi kunywa esagama. Kandi hati, esagama nikirizibwa? Nahati Yahwe n’agonza esagama tugitwale kuba kintu eky’omuhendo.

13. Habwaki Abakristaayo bataikiriza kutebwamu esagama omu mubiri?

¹³ Kinu nikimanyisa ngu Abakristaayo basemeriire kwanga n’okutekebwamu esagama? Ego. Yahwe akatutanga kulya rundi kunywa esagama. Kakuba dakitaali waawe akugambira ngu otanywa amarwa, wakwikiriize bagarabye omu binywa byawe nibakozesa enkiinzo? Nangwa! Omu mulingo nugwo gumu, ekiragiro ekirukututanga kulya rundi kunywa esagama nikitwarramu kwanga kutebwamu esagama kuraba omu binywa.—Rora Ebyongiirweho, akacweka 29.

14, 15. Habwaki kiri kikuru Omukristaayo kworobera Yahwe n’okutekamu obwomeezi ekitinisa?

¹⁴ Kakuba dakitaali akugamba ngu n’oija kufa obworaaba otateirwemu esagama? Buli muntu asemeriire kwecweramu kworobera ekiragiro kya Ruhanga ekirukukwata ha sagama. Abakristaayo batamu ekisembo eky’obwomeezi ekitinisa kandi nibasobora kukozesa obujanjabi bundi oburukwikirizibwa Ruhanga baitu batatairwemu esagama.

¹⁵ Tulengaho kulinda kurungi obwomeezi, baitu habw’okuba obwomeezi bw’omuhendo omu maiso ga Ruhanga, titwikiriza kutebwamu esagama. Kikuru muno okworobera Yahwe mukiikaro ky’okucwa ebiragiro bye ha bw’okugonza kukiza obwomeezi bwaitu. Yesu akagamba ngu: “Anyakugonza okukiza obwomezibwe bulimubura, [n’ogu] alibuza obwomezibwe habwange alibuzora.” (Matayo 16:25) Tusemeriire kworobera Yahwe habw’okuba tumugonza. Atugondeza ebintu ebirungi, kandi naitwe obwomeezi tusemeriire kubutwara kuba kintu ky’omuhendo nkauwe nk’okw’abutwara.—Abaheburaniya 11:6.

16. Habwaki Abaheereza ba Ruhanga bahondera ebiragiro bye?

 ¹⁶ Abaheereza ba Ruhanga abesigwa behaireyo kworobera ekiragiro kye ekirukukwata ha sagama. Tibanywa esagama kandi tibagirya. Kandi tibaikiriza kuteekwamu esagama. * Baikiriza kukozesa emibazi endi yona ey’erukusiimwa Ruhanga nukwo bakize obwomeezi bwabu. Bakimanyire ngu Ruhanga ayahangire obwomeezi n’esagama amanyire ebi barukwetaga. Nokimanya ngu Yahwe amanyire eby’orukwetaga n’okukukira?

17. Yahwe akaikiriza Abaisareri kukozesa esagama omu mulingo ki?

¹⁷ Yahwe akaha Musa ekiragiro n’agamba Abaisareri ngu: “Obwomezi obwomubiri buli omu sagama kandi ngibahaire ha Kyoto okulihi’ra obwomezi bwanyu baitu esagama niyo erihi’ra obwomezi.” (Abyabalevi 17:11) Omuisareri obu yakoraga ekibi, akaba asemeriire kuhonga ekisoro nukwo Yahwe amuganyire. Kandi yasabaga nyakatagara kuseesa esagama y’ekisoro eki ha kyoto. Gunu nugwo omulingo gumu gwonka ngu Yahwe yaikiriize Abaisareri kukozesamu esagama.

18. Okufa kwa Yesu kututeriireho mugisa ki?

¹⁸ Yesu obu yaizire omu nsi, akaihaho ekiragiro ky’okuhonga obu yahaireyo obwomeezi bwe rundi esagama ye nukwo tusobole kuganyirwa ebibi byaitu. (Matayo 20:28; Abaheburaniya 10:1) Obwomeezi bwa Yesu bukaba bw’omuhendo muno habwokuba hanyuma y’okuhumbuuka, Yahwe akaheereza abantu omugisa ogw’okutunga obwomeezi obutahwaho.—Yohana 3:16; Abaheburaniya 9:11, 12; 1 Petero 1:18, 19.

19. Kiki ekitusemeriire kukora ‘kusemezebwaho esagama y’abantu boona’?

 ¹⁹ Nitusiima Yahwe habwokuba akatuha ekisembo ky’obwomeezi. Kandi nitugonza kugambira abantu ngu kakuba baikiririza omu Yesu, nibaija kutunga obwomeezi obutahwaho. Habw’okugonza abantu, nitwija kukora kyona ekirukusoboka kubeegesa omulingo basobora kutunga obwomeezi obutahwaho. (Ezekyeri 3:17-21) Nk’omukwenda Paulo, naitwe nitwija kugamba: “Nyowe nsemezibweho esagama ya bona. Baitu ntatine okubagambira amagezi gona aga Ruhanga.” (Engeso Ezabakwenda 20:26, 27) Obutugambira abandi ebirukukwata hali Yahwe n’omulingo atwaramu obwomeezi, tuba nitwoleka ngu nitutekamu obwomeezi n’esagama y’abantu ekitinisa.